1. ¿Baʼax jeʼel a tuklik kéen tsʼoʼokok a xokik le libroaʼ?

TEʼ LIBROAʼ tsʼoʼok a wilik yaʼab baʼaxoʼob ku kaʼansik le Bibliaoʼ, jeʼex le kuxtal minaʼan u xuul ku yaʼalik Dios u tsʼáaikoʼ, baʼax le kíimiloʼ yéetel bix le kaʼa kuxtaloʼ (Eclesiastés 9:5; Lucas 23:43; Juan 5:28, 29; Apocalipsis 21:3, 4). Maʼ xaaneʼ tsʼoʼok u káajal a bin muchʼtáambal yéetel u testigoʼob Jéeoba, yéetel ka creertik letiʼob adorartik Dios jeʼex uts tu tʼaanoʼ (Juan 13:35). Maʼ xaan xaneʼ tsʼoʼok u káajal a biskaba yéetel Jéeoba yéetel tsʼoʼok a chʼaʼtuklik a meyajtik. Wa beyoʼ  jeʼel a waʼalikeʼ: «¿Baʼax uláakʼ unaj in beetik utiaʼal in meyajtik Dios?».

2. ¿Baʼaxten taakchaj u yokjaʼ juntúul etiopíail?

² Lelaʼ letiʼe baʼax tu kʼáataj xan juntúul máak etiopíail teʼ kʼiinoʼob tiaʼan Jesús way Luʼumoʼ. Le maʼ úuch kaʼa kuxkíintaʼak Jesúsoʼ, le discípulo Felipeoʼ tu tsikbaltaj u tʼaan Dios tiʼ le etiopíailoʼ yéetel tu yeʼesajtiʼeʼ Jesús le Mesíasoʼ. Le máakoʼ jach kiʼimakchaj u yóol yoʼolal baʼax tu kaneʼ ka tu yaʼalaj: «¡Ilawile! Teʼelaʼ yaan jaʼiʼ, ¿baʼax ku bineltik utiaʼal in wokjaʼ?» (Hechos 8:26-36).

3. 1) ¿Baʼax tu yaʼalaj Jesús tiʼ u discípuloʼob ka u beetoʼob? 2) ¿Bix unaj u tsʼaʼabal u yokjaʼ máak?

³ Le Bibliaoʼ ku yeʼesikeʼ wa a kʼáat a meyajt Jéeobaeʼ kʼaʼabéet a wokjaʼ. Jesúseʼ tu yaʼalaj tiʼ u discípuloʼob: «Kaʼanseʼexoʼob utiaʼal ka taalakoʼob tin paach. Tsʼáaʼex u yokjaʼob» (Mateo 28:19). Utiaʼal u yeʼesik kʼaʼanaʼaneʼ Jesúseʼ okjaʼanaj xan. Maʼ chéen wiʼiwitsʼbil beetaʼabik jaʼ tu pooliʼ, baʼaxeʼ láaj tʼuʼub u wíinklil ich jaʼ (Mateo 3:16). Bejlaʼeʼ kéen tsʼaʼabak u yokjaʼ máakeʼ unaj u láaj tʼuʼubul xan u wíinklil ich jaʼ.

4. ¿Baʼax ku yeʼesik máak kéen okjaʼanak?

⁴ Kéen okjaʼanak máakeʼ ku yeʼesik tu táan u maasil u kʼáat u bisuba yéetel Dios yéetel u kʼáat u meyajte (Salmo 40:7, 8). Le oʼolaleʼ maʼ xaaneʼ ka kʼáatik: «¿Baʼax unaj in beetik utiaʼal in wokjaʼ?».

5. 1) ¿Baʼax unaj a beetik táanil tiʼ a wokjaʼ? 2) ¿Baʼaxten unaj a bin teʼ muchʼtáambaloʼoboʼ?

⁵ Táanil tiʼ a wokjaʼeʼ kʼaʼabéet a kʼaj óoltik Jéeoba yéetel Jesús. Tsʼoʼok u káajal a beetik ikil a xokik  le Bibliaoʼ (xok Juan 17:3). Chéen baʼaleʼ yaan uláakʼ baʼax kʼaʼabéet a beetik. Le Bibliaoʼ ku yaʼalikeʼ kʼaʼabéet ‹k-chúukaʼan kʼaj óoltik› baʼax u kʼáat Jéeoba (Colosenses 1:9). Le muchʼtáambaloʼob ku beetik u testigoʼob Jéeobaoʼ jeʼel u yáantkech a maas bisaba yéetel Jéeobaeʼ. Le oʼolaleʼ mantatsʼ unaj a biniʼ (Hebreos 10:24, 25).

6. ¿Bukaʼaj kʼaʼabéet a kanik teʼ Biblia utiaʼal a wokjaʼoʼ?

⁶ Jeʼex úuchik yéetel le etiopíailoʼ Jéeobaeʼ maʼ tu páaʼtik ka a kan tuláakal baʼax ku yaʼalik le Biblia táanil tiʼ a wokjaʼoʼ (Hechos 8:30, 31). U jaajileʼ mix bikʼin kun xuʼulul k-kaanbal tiʼ Jéeoba (Eclesiastés 3:11). Baʼaleʼ utiaʼal a wokjaʼeʼ unaj a kanik yéetel a kʼamik jujunpʼéel tiʼ le baʼaxoʼob ku kaʼansik le Bibliaoʼ (Hebreos 5:12).

7. ¿Tiʼ baʼax tsʼoʼok u yáantkech u xookil le Bibliaoʼ?

⁷ Le Bibliaoʼ ku yaʼalik: «Wa minaʼan u fe máakeʼ maʼ tu páajtal u lúubul utsil tiʼ Dios» (Hebreos 11:6). Le oʼolaleʼ utiaʼal a wokjaʼeʼ unaj u yantaltech fe. Le Bibliaoʼ ku yaʼalikeʼ yaan máakoʼob kaʼach tu kaajil Corintoeʼ tu yuʼuboʼob baʼax ku kaʼansik u discípuloʼob Jesúseʼ ka tu creertoʼob, ka túun okjaʼanajoʼob (Hechos 18:8). U xookil le Bibliaoʼ tsʼoʼok u yáantkech a tsʼáa a fe tiʼ baʼaxoʼob ken u beet Dios bey xan tiʼ u kuxtal Jesús tu kʼubaj utiaʼal u salvarkoʼon tiʼ le kʼeban yéetel tiʼ le kíimiloʼ (Josué 23:14; Hechos 4:12; 2 Timoteo 3:16, 17).

8. ¿Baʼax ken u péeksech a tsikbalt baʼax ka kanik?

⁸ A fejeʼ yaan u maas muʼukʼaʼantal kéen a maas kan  baʼax ku yaʼalik le Bibliaoʼ bey xan kéen a wil bix u yáantkech. Yaan u taaktal a tsikbaltik le baʼax ka kanikoʼ (Jeremías 20:9; 2 Corintios 4:13). Chéen baʼaleʼ, ¿tiʼ máax jeʼel a tsikbaltikeʼ?

9, 10. 1) ¿Tiʼ máaxoʼob maʼalob ka káajak a tsikbaltik le baʼaxoʼob ka kanikoʼ? 2) ¿Baʼax kʼaʼabéet a beetik wa taak a jóokʼol a tsikbalt u tʼaan Dios yéetel le múuchʼuliloʼ?

⁹ Maʼ xaaneʼ le baʼax ka kanikoʼ jeʼel u páajtal a tsikbaltik tiʼ a láakʼtsiloʼob, a amigoʼob, a vecinoʼob, a wéet xookoʼob wa tiʼ a wéet meyajoʼob. Jach maʼalob ka a beete, baʼaleʼ unaj a weʼesik yaabilaj yéetel respeto. Kéen máanak kʼiineʼ jeʼel u páajtal a jóokʼol yéetel le múuchʼulil a tsikbalt u tʼaan Diosoʼ. Kéen a wuʼuy jeʼel u páajtaleʼ tʼaanen yéetel le máax tsʼáaiktech xookoʼ. Wa ku yilik jeʼel u páajtal a beetik yéetel wa táan a kuxtal jeʼex u kʼáat Dioseʼ yaan a múul tsikbaleʼex yéetel kaʼatúul ancianoʼob.

¹⁰ Kéen muchʼlakeʼexeʼ le ancianoʼoboʼ yaan u yilkoʼob wa ka naʼatik yéetel wa ka creertik jujunpʼéel kaʼansajoʼob yaan teʼ Bibliaoʼ bey xan wa táan a tsʼáaikoʼob ichil a kuxtal. Yaan xan u yilkoʼob wa jach tu jaajil a kʼáat a beetaba juntúul u testigo Jéeoba. Le ancianoʼoboʼ ku kanáantkoʼob tuláakal le máaxoʼob yanoʼob teʼ múuchʼuliloʼ. Le oʼolaleʼ maʼ unaj a sajaktal tʼaan tu yéeteloʼobiʼ (Hechos 20:28; 1 Pedro 5:2, 3). Kéen tsʼoʼokkeʼ yaan u yaʼalikoʼobtech wa jeʼel u páajtal a jóokʼol yéetel le múuchʼulil a tsikbalt u tʼaan Diosoʼ.

11. ¿Baʼaxten kʼaʼabéet a beetik kʼeexoʼob táanil tiʼ a jóokʼol a tsikbalt u tʼaan Dios yéetel le múuchʼuliloʼ?

¹¹ Maʼ xaaneʼ le ancianoʼoboʼ yaan u yaʼalikoʼobtech unaj a beetik jujunpʼéel kʼeexoʼob táanil tiʼ a jóokʼol a tsikbalt u tʼaan Dios yéetel le múuchʼuliloʼ. ¿Baʼaxten?  Tumen kéen jóokʼkoʼoneʼ k-bisik u kʼaabaʼ Jéeoba, le oʼolaleʼ le bix k-kuxtaloʼ unaj u beetik u alabartaʼal (1 Corintios 6:9, 10; Gálatas 5:19-21).

12. ¿Baʼaxten tuláakloʼon unaj k-kʼexik k-tuukul?

¹² Yaan uláakʼ baʼax unaj a beetik táanil tiʼ a wokjaʼ. Apóstol Pedroeʼ tu yaʼalaj: «Le oʼolaleʼ kʼex a tuukuleʼex yéetel utskíint a kuxtaleʼex utiaʼal ka perdonartaʼak a kʼebaneʼex» (Hechos 3:19). Utiaʼal u kʼexik u tuukul máakeʼ unaj u jach yaatal u yóol yoʼolal le baʼaxoʼob kʼaastak u beetmoʼ. Koʼox aʼalikeʼ wa suuk kaʼach a núupkʼebantaleʼ unaj a kʼexik a tuukul yéetel a xulik a beetik. Tsʼoʼoleʼ kex mantatsʼ ka wilik a beetik baʼax maʼalobeʼ láayliʼ unaj a kʼexik a tuukuleʼ tumen tuláakloʼon kʼebanoʼon, le oʼolal kʼaʼabéet k-perdonartaʼal tumen Dios (Romanos 3:23; 5:12).

13. ¿Baʼax u kʼáat u yaʼal u ‹yutskíintik u kuxtal› máak?

¹³ ¿Chéen wa unaj u yaatal u yóol máak yoʼolal baʼax u beetmaj? Maʼatech. Apóstol Pedroeʼ tu yaʼalaj xan: «utskíint a kuxtaleʼex». Leloʼ u kʼáat u yaʼaleʼ unaj a pʼatik le baʼaxoʼob kʼaastak ka beetkoʼ yéetel unaj u káajal a beetik baʼax maʼalob. Tukleʼ táan a bin yéetel a coche tiʼ junpʼéel tuʼux yáax a binoʼ, baʼaleʼ ka wilkeʼ maʼ letiʼe bej maʼaloboʼ. ¿Baʼax ken a beete? Yaan a jeʼelel yéetel yaan a sutik a paach utiaʼal a chʼaʼik le bej maʼaloboʼ. Bey u yúuchul xan kéen a xok le Bibliaoʼ. Maʼ xaaneʼ yaan a wilkeʼ láayliʼ yaan baʼax kʼaʼabéet a kʼexik ichil a kuxtaleʼ. Le oʼolaleʼ ilawil a séeb utskíintik. Beet le kʼeexoʼob kʼaʼabéetoʼ utiaʼal u káajal a beetik baʼax maʼalob.

14. ¿Baʼax unaj u beetik máak utiaʼal u kʼubik u kuxtal tiʼ Dios?

¹⁴ Uláakʼ baʼax kʼaʼabéet a beetik táanil tiʼ a wokjaʼeʼ a kʼubik a kuxtal tiʼ Dios. Utiaʼal a kʼubik a kuxtaleʼ unaj a orar tiʼ Jéeoba utiaʼal a waʼaliktiʼ yaan a adorartik chéen letiʼ yéetel yaan a tsʼáaik táanil a meyajtik ichil a kuxtal (Lucas 4:8).

15, 16. ¿Baʼax kun péeksik máak u kʼub u kuxtal tiʼ Dios?

¹⁵ A waʼalik tiʼ Jéeoba yaan a meyajtik chéen letiʼeʼ bey jeʼex ka a waʼal tiʼ juntúul máax a yaabiltmaj yaan a máansik tuláakal u kʼiiniloʼob a kuxtal tu yéeteleʼ. Tuukulnen tiʼ juntúul xiʼipal yaan u novia. Jeʼex u bin u maas kʼaj óoltik u noviaeʼ bey u bin u maas yaabiltik yéetel u taaktal u tsʼoʼokol u beel tu yéetel. Le baʼax ku tuklik u beetkoʼ maʼ chéen chʼaʼabiliʼ tumen yaan u kʼaʼabéettal u maas meyaj, baʼaleʼ tumen u yaabiltmaj u noviaeʼ ku chʼaʼtuklik u beetik.

¹⁶ Jeʼex u bin a maas kʼaj óoltik Jéeobaeʼ bey kun bin a maas yaabiltik yéetel u taaktal a beetik jeʼel baʼalak utiaʼal a meyajtikeʼ. Leloʼ yaan u beetik u taaktal a kʼubik a kuxtal tiʼ. Jesúseʼ tu yaʼalaj tiʼ u discípuloʼob: «Wa yaan máax u kʼáat taal tin paacheʼ u pʼektuba» (Marcos 8:34). Leloʼ u kʼáat u yaʼaleʼ yaan a wuʼuyik u tʼaan Jéeoba kex jeʼel baʼalak ka úuchkeʼ. Mantatsʼ yaan a tsʼáaik táanil a beetik baʼax u kʼáat Jéeoba, maʼ chéen le baʼaxoʼob ka tsʼíiboltikoʼ (xok 1 Pedro 4:2).

17. ¿Baʼaxten yaan máakeʼ maʼ u kʼub u kuxtal tiʼ Jéeobaiʼ?

¹⁷ Jujuntúul máakoʼobeʼ maʼ u kʼub u kuxtaloʼob tiʼ Jéeobaiʼ tumen saajkoʼob u yaʼaloʼob yaan u meyajtikoʼob  baʼaleʼ kéen tsʼoʼokkeʼ maʼ u beetkoʼob. Maʼ xaaneʼ maʼ taak u pʼatkoʼob kʼaasiliʼ, wa ku tuklikoʼobeʼ maʼ kun kʼaʼabéettal u kʼubkoʼob cuenta tiʼ Jéeoba wa maʼ u kʼubmaj u kuxtaloʼob tiʼiʼ.

18. ¿Baʼax jeʼel u yáantkech utiaʼal maʼ a tuklik wa jeʼel a pʼatik kʼaasil Jéeobaeʼ?

¹⁸ A yaabilaj tiʼ Jéeobaeʼ yaan u yáantkech utiaʼal maʼ a tuklik wa jeʼel a pʼatik kʼaasileʼ. Yaan xan u yáantkech a tsʼoʼokbes le baʼax ken a waʼaltiʼoʼ (Eclesiastés 5:4; Colosenses 1:10). Maʼ ken a tukult bey junpʼéel kuuch a beetik baʼax uts tu tʼaaneʼ. Apóstol Juaneʼ tu yaʼalaj: «Le máax u yaabiltmaj Dioseʼ ku beetik le baʼaxoʼob ku yaʼalik Diosoʼ, tsʼoʼoleʼ le baʼaxoʼob ku yaʼalikoʼ maʼ talam u beetaʼaloʼobiʼ» (1 Juan 5:3).

19. ¿Baʼaxten maʼ unaj a sajaktal a kʼub a kuxtal tiʼ Jéeobaiʼ?

¹⁹ Maʼ tu páaʼtaʼal ka a beet tuláakal baʼal jach maʼalob utiaʼal a kʼubik a kuxtal tiʼ Jéeoba. Letiʼeʼ maʼ tu kʼáatiktoʼon baʼax maʼ tu páajtal k-beetik (Salmo 103:14). Yaan u yáantkech a beet baʼax maʼalob (Isaías 41:10). Wa ka kʼubik a wóol tiʼ Jéeoba yéetel tuláakal a puksiʼikʼaleʼ letiʼeʼ «yaan u beetik u bintech utsil ichil a kuxtal» (Proverbios 3:5, 6).

20. Kéen tsʼoʼokok a kʼubik a kuxtal tiʼ Jéeobaeʼ, ¿baʼax uláakʼ jeʼel u páajtal a beetkeʼ?

²⁰ ¿Ka wuʼuyik wa listoech utiaʼal a kʼubik a kuxtal tiʼ Jéeoba? Kéen tsʼoʼokok a kʼubik a kuxtal tiʼeʼ jeʼel u páajtal a wokjaʼeʼ.

21, 22. ¿Bix jeʼel a weʼesik a fe «tu táan uláakʼ máakoʼob[eʼ]»?

²¹ Aʼal tiʼ u coordinadoril le múuchʼ ancianoʼob tsʼoʼok a kʼubik a kuxtal tiʼ Jéeoba yéetel a kʼáat okjaʼ.  Letiʼeʼ yaan u yaʼalik tiʼ uláakʼ ancianoʼob ka u xakʼaltoʼob ta wéetel jujunpʼéel kaʼansajoʼob yaan teʼ Bibliaoʼ. Wa ku yilkoʼob listoecheʼ yaan u yaʼalikoʼobtech jeʼel u páajtal a wokjaʼ tiʼ junpʼéel asamblea ku beetik u testigoʼob Jéeoba. Teʼ asambleaoʼ yaan u yantal junpʼéel jaats tuʼux kun tsolbil baʼax u kʼáat u yaʼal le okjaʼoʼ. Le sukuʼun kun tsolikoʼ yaan u beetik kaʼapʼéel  kʼáatchiʼ tiʼ le kun okjaʼoboʼ. Kéen a núuk le kʼáatchiʼoboʼ yaan a weʼesik a fe «tu táan uláakʼ máakoʼob» (Romanos 10:10).

²² Kéen tsʼoʼokkeʼ yaan u tsʼaʼabal a wokjaʼ. Yaan a láaj tʼuʼubul ich jaʼ. Leloʼ yaan u yeʼesik tiʼ tuláakal máak  tsʼoʼok a kʼubik a kuxtal tiʼ Dios yéetel u testigoech Jéeoba.

23. ¿Baʼax u kʼáat u yaʼal u yokjaʼ máak «tu kʼaabaʼ le Taataoʼ, le Paaloʼ yéetel le espíritu santooʼ»?

²³ Jesúseʼ tu yaʼaleʼ u discípuloʼobeʼ yaan u yokjaʼob «tu kʼaabaʼ le Taataoʼ, le Paaloʼ yéetel le espíritu santooʼ» (xok Mateo 28:19). Leloʼ u kʼáat u yaʼaleʼ k-kʼamik u autoridad Jéeoba, k-respetartik le meyaj tsʼaʼan u beet Jesús tumen Jéeobaoʼ yéetel k-chaʼik k-nuʼuktaʼal tumen u espíritu santo Dios (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. 1) ¿Baʼax ku yeʼesik le okjaʼoʼ? 2) ¿Baʼax ken k-il teʼ tu tsʼook xookoʼ?

²⁴ Le okjaʼoʼ ku yeʼesik junpʼéel baʼal jach kʼaʼanaʼan. Kéen tʼuʼubkech ich jaʼeʼ u kʼáat u yaʼaleʼ ka «kíimil» wa ka pʼatik le kuxtal yaantech kaʼachoʼ. Kéen jóokʼkech ichil le jaʼoʼ ka káajsik junpʼéel túumben kuxtal utiaʼal a beetik baʼax u kʼáat Jéeoba. Beyoʼ ka weʼesikeʼ tsʼoʼok u káajal a meyajtik Dios. Maʼ u tuʼubultecheʼ maʼ ta kʼubaj a kuxtal tiʼ juntúul máakiʼ mix tiʼ junpʼéel organizacióniʼ mix tiʼ junpʼéel meyajiʼ. Ta kʼubaj a kuxtal tiʼ Jéeoba.

²⁵ A kʼubik a kuxtaleʼ yaan u yáantkech a maas bisaba yéetel Jéeoba (Salmo 25:14). Baʼaleʼ maʼ u kʼáat u yaʼal wa kéen okjaʼanakech tsʼoʼok a salvarkabaiʼ. Apóstol Pabloeʼ tu yaʼalaj: «Seguernak a kaxtik a salvacióneʼex» (Filipenses 2:12). Jeʼex k-ilkoʼ le okjaʼoʼ chéen u káajbal a meyajtik Dios. ¿Baʼax jeʼel u páajtal a beetik utiaʼal maʼ u xuʼulul a biskaba yéetel Jéeobaeʼ? Leloʼ tu tsʼook xookil le libro kun núukbiloʼ.