1. ¿Baʼax oraciónil ken k-il teʼ xookaʼ?

U MILLONESIL máakoʼob u yojloʼob le padrenuestrooʼ. Le oración jeʼeloʼ Jesús beet utiaʼal u kaʼansik orar u discípuloʼob. ¿Baʼax tu kʼáataj Jesús teʼ oraciónaʼ? ¿Baʼaxten kʼaʼabéet k-naʼatik tubeel le oraciónaʼ?

2. ¿Baʼax tu kaʼansaj Jesús ka k-kʼáat ich oración?

² Jesúseʼ tu yaʼalaj: «Bey unaj a orareʼexaʼ: ‹K-Taata yanech teʼ kaʼanoʼ, santificartaʼak a kʼaabaʼ. Taalak a Reino, beetaʼak baʼax a kʼáat, jeʼex u beetaʼal teʼ kaʼanoʼ bey xan ka beetaʼak way luʼumeʼ›» (xok Mateo 6:9-13). ¿Baʼaxten tu yaʼalaj Jesús ka k-kʼáat le óoxpʼéel baʼaloʼobaʼ? (Ilawil nota 19).

3. ¿Baʼax unaj k-ojéeltik yoʼolal u Reino Dios?

³ Tsʼoʼok k-kanikeʼ u kʼaabaʼ Dioseʼ Jéeoba. Tsʼoʼok k-kanik xan baʼax u tukultmaj Dios utiaʼal wíinik bey xan utiaʼal le Luʼumaʼ. Baʼaleʼ ¿baʼaxten tu yaʼalaj Jesús: «Taalak a Reino»? Teʼ xookaʼ yaan k-kanik baʼax u Reino Dios, baʼax ken u beete yéetel bix ken u santificart u kʼaabaʼ Dios.

4. ¿Baʼax u Reino Dios, yéetel máax u Reyil?

⁴ U Reino Dioseʼ junpʼéel gobierno tsʼaʼan teʼ kaʼanoʼ. Jéeoba yéey Jesús utiaʼal u beetik u Reyil, wa u gobernanteil. Le Bibliaoʼ ku yaʼalikeʼ Jesúseʼ «u Rey le máaxoʼob ku reinaroʼoboʼ, u Yuumtsil le máaxoʼob ku  gobernaroʼoboʼ» (1 Timoteo 6:15). Jesúseʼ maas yaan u páajtalil tiʼ tuláakal le gobiernoʼob tsʼaʼan tumen wíinikoʼ, le oʼolal k-ojel maas jeʼel u yáantkoʼoneʼ.

5. ¿Tuʼux kun antal u Reino Dios, yéetel baʼax ken u gobernarte?

⁵ Jesúseʼ suunaj teʼ kaʼan 40 días kaʼa kuxkíintaʼakoʼ. Ka máan kʼiineʼ Jéeobaeʼ tu tsʼáaj u beet u Reyil le Reinooʼ (Hechos 2:33). U Reino Dioseʼ desde teʼ kaʼan ken u gobernart le Luʼumaʼ (Apocalipsis 11:15). Le oʼolal ku yaʼalaʼal xan tiʼ «u Reinoil kaʼan» (Mateo 16:19).

6, 7. ¿Baʼaxten Jesúseʼ maas maʼalob tiʼ le gobernanteʼob yaan way Luʼumoʼ?

⁶ Le Bibliaoʼ ku yaʼalikeʼ Jesúseʼ maas maʼalob tiʼ jeʼel máaxak gobernanteil way Luʼumeʼ, tumen «chéen letiʼ maʼ tu páajtal u kíimil» (1 Timoteo 6:16). Wíinikeʼ ku kíimil, baʼaleʼ Jesúseʼ mix bikʼin u kíimil. Mantatsʼ ken k-jóoʼs u yutsil le baʼax ken u beet t-oʼolaloʼ.

⁷ Junpʼéel profecía yaan teʼ Bibliaoʼ ku yaʼalik bix kun gobernar Jesús: «Yaan u yantal u poder Jéeoba tu yóokʼol. [...] Yaan u yantal u naʼat, yaʼab baʼax ken u kane, yaan u tsʼáaik maʼalob nuʼuktaj, jach yaan u yantal u muukʼ, yaʼab baʼax ken u yojéelte yéetel jach yaan u respetartik Jéeoba». Maʼ kun juzgar «chéen tu yoʼolal baʼax ku jáan ilik, mix ken u castigart máak chéen tu yoʼolal baʼax ku yuʼubik u yaʼalaʼal», baʼaxeʼ «yaan u beetik justicia tiʼ le óotsiloʼoboʼ» (Isaías 11:2-4). ¿Maʼ wa uts ta tʼaan ka u gobernartech juntúul rey beyoʼ?

8. ¿Bix k-ojéeltik maʼ tu juunal kun gobernar Jesúsiʼ?

 ⁸ Dioseʼ u yéeymaj jujuntúul máakoʼob utiaʼal u gobernaroʼob yéetel Jesús teʼ kaʼanoʼ. Apóstol Pabloeʼ tu yaʼalaj tiʼ Timoteo: «Wa ku chúukpajal k-óol muʼyajeʼ junmúuchʼ xan ken k-reinar» (2 Timoteo 2:12). ¿Jaytúul le kun gobernaroʼob yéetel Jesúsoʼ?

9. 1) ¿Jaytúul máak kun gobernar yéetel Jesús? 2) ¿Baʼax kʼiin ka joʼopʼ u yéeyaʼaloʼob?

⁹ Jeʼex t-kanil teʼ xook 7, Juaneʼ tu yilaj Jesús bey juntúul Rey tiaʼan teʼ kaʼan yéetel uláakʼ 144,000 reyoʼoboʼ. ¿Máaxoʼob le 144,000? Juaneʼ tu yaʼalaj: «Tu táanpoolal le máakoʼobaʼ tsʼíibtaʼan u kʼaabaʼ le Tamanoʼ bey xan u kʼaabaʼ u Taata». Tu yaʼalaj xan: «Ku binoʼob tu paach le Taman [wa Jesús] jeʼel tuʼuxak ka xiʼikoʼ. Maʼanoʼob ichil le wíinikoʼob[oʼ]» (xok Apocalipsis 14:1, 4). Le 144,000 kun «reinaroʼob tu yóokʼol le luʼum» yéetel Jesúsoʼ jach chúukaʼan u yóoloʼob u meyajtoʼob Dios. Kéen kíimkoʼobeʼ ku kaʼa kuxkíintaʼaloʼob teʼ kaʼanoʼ (Apocalipsis 5:10). Jéeobaeʼ káaj u yéeyikoʼob desde tu kʼiinil le apóstoloʼoboʼ.

10. ¿Bix tu yeʼesil u yaabilaj Jéeoba úuchik u yéeyik Jesús yéetel le 144,000 utiaʼal u gobernaroʼoboʼ?

¹⁰ Jéeobaeʼ jach u yaabiltmoʼon, le oʼolal tu yéeyaj jujuntúul wíinikoʼob utiaʼal u gobernaroʼob yéetel Jesús. Jesúseʼ maʼalob bix kun gobernar tumen u yojel bix u muʼyaj wíinik. Jeʼex tu yaʼalil apóstol Pablooʼ Jesúseʼ ku «naʼatik le baʼaxoʼob k-muʼyajtikoʼ» tumen «tsʼoʼok u túuntaʼal u yóol tiʼ tuláakal baʼal jeʼex toʼoneʼ» (Hebreos 4:15; 5:8). Le 144,000 xanoʼ u yojloʼob bix u kuxtal wíinik tumen muʼyajnajoʼob xan yoʼolal le kʼebanoʼ. Jesús yéetel le 144,000, jach tu jaajil u  yojloʼob baʼaxoʼob k-muʼyajtik yéetel ku naʼatkoʼob bix k-uʼuyikba.

11. ¿Baʼaxten unaj k-kʼáatik ich oración ka beetaʼak baʼax u kʼáat Dios teʼ kaʼanoʼ?

¹¹ Jesúseʼ tu kaʼansaj u discípuloʼob u kʼáatoʼob ich oración ka beetaʼak baʼax u kʼáat Dios teʼ kaʼanoʼ. ¿Baʼaxten? Teʼ xook 3, t-kaneʼ Satanáseʼ líikʼ tu contra Dios. Jéeobaeʼ tu chaʼaj u pʼáatal Satanás yéetel u demonioʼob junpʼíit kʼiinoʼob teʼ kaʼanoʼ. Le oʼolaleʼ maʼ tuláakal u kajnáaliloʼob kaʼan beetik kaʼach baʼax u kʼáat Diosiʼ. Teʼ xook 10, yaan k-kanik u maasil yoʼolal Satanás yéetel le demonioʼoboʼ.

12. ¿Baʼax kaʼapʼéel baʼal tu yaʼalaj Apocalipsis 12:10 kun úuchul?

¹² Le Bibliaoʼ tu yaʼaleʼ kéen u beet u Reyil Jesúseʼ yaan u baʼateʼel tu contra Satanás (xok Apocalipsis 12:7-10). Apocalipsis 12:10, tu yaʼaleʼ kaʼapʼéel baʼal kʼaʼanaʼantak kun úuchul. Yáaxeʼ yaan u káajal u beetik u Reyil Jesús. U kaʼapʼéeleʼ yaan u puʼulul Satanás way Luʼumeʼ. Jeʼex ken a wiloʼ tsʼoʼok u béeytal le kaʼapʼéel baʼaloʼobaʼ.

13. ¿Baʼax úuch teʼ kaʼan ka jóoʼsaʼab Satanásoʼ?

¹³ Jach kiʼimakchaj u yóol le utsul ángeloʼob ka jóoʼsaʼab Satanás yéetel u demonioʼob teʼ kaʼanoʼ. Le Bibliaoʼ ku yaʼalik: «¡Kiʼimakchajak a wóoleʼex, kaʼaneʼex, bey xan teʼex, u kajnáalileʼex kaʼan!» (Apocalipsis 12:12). Bejlaʼeʼ jach yaan jeetsʼelil teʼ kaʼanoʼ tumen tuláakal máak beetik baʼax uts tu tʼaan Diosiʼ.

14. ¿Baʼax ku yúuchul way Luʼum úuchik u puʼulul Satanásoʼ?

 ¹⁴ Baʼaleʼ way Luʼumeʼ jach yaan muʼyajil «tumen le Kʼaasilbaʼaloʼ tsʼoʼok u yéemel». Tsʼoʼoleʼ «jach pʼujaʼan tumen u yojel chéen junpʼíit kʼiin pʼaataltiʼ» (Apocalipsis 12:12). Satanáseʼ jach pʼujaʼan xan tumen jóoʼsaʼab teʼ kaʼanoʼ yéetel u yojel maʼ tun xáantal kéen xuʼulsaʼak. Le oʼolal táan u beetik u muʼyaj tuláakal máak way Luʼumeʼ.

15. ¿Baʼax u tukultmaj Dios utiaʼal le Luʼumaʼ?

¹⁵ Baʼaleʼ maʼ kʼexpajak baʼax u tukultmaj Dios utiaʼal le Luʼumaʼ. Láayliʼ u kʼáat ka suʼutuk paraísoil utiaʼal ka kuxlak máakoʼob minaʼan u kʼebanoʼob utiaʼal mantatsʼ (Salmo 37:29). ¿Bix ken u béeykuntil u Reino Dios leloʼ?

16, 17. ¿Baʼax ku yaʼaliktoʼon Daniel 2:44 yoʼolal u Reino Dios?

¹⁶ Daniel 2:44, ku yaʼalik: «Teʼ kʼiinoʼob táan u gobernar le reyoʼoboʼ u Diosil le kaʼanoʼ yaan u tsʼáaik junpʼéel reino mix bikʼin kun xuʼulsbiltiʼ. Le reinoaʼ mix bikʼin kun máan tu kʼab uláakʼ kaaj. Baʼaxeʼ yaan u xiixkúuntik yéetel yaan u xuʼulsik tiʼ tuláakal le reinoʼobaʼ, chéen letiʼ kun pʼáatal utiaʼal mantatsʼ». ¿Baʼax k-kanik teʼ profecía yoʼolal u Reino Diosoʼ?

¹⁷ Yáaxeʼ k-kanikeʼ u Reino Dioseʼ yaan u káajal u gobernar «teʼ kʼiinoʼob táan u gobernar le reyoʼoboʼ». U kʼáat u yaʼaleʼ láayliʼ yaan máakoʼob táan u gobernaroʼob way Luʼum kéen káajak u meyaj le Reinooʼ. U kaʼapʼéeleʼ u Reino Dioseʼ mix bikʼin kun xuʼulsbil mix kun máansbil tiʼ uláakʼ kaaj. U yóoxpʼéeleʼ u gobiernoiloʼob yóokʼol kaabeʼ yaan u baʼateloʼob tu contra u Reino Dios. Baʼaleʼ u Reino Dios kun ganar  yéetel letiʼ ken u gobernart tuláakal le Luʼumaʼ. Minaʼan uláakʼ gobierno maas maʼalob jeʼel u yantaltoʼoneʼ.

18. ¿Bix u kʼaabaʼ le baʼateʼel ken u beet le gobernanteʼob tu contra u Reino Diosoʼ?

¹⁸ ¿Bix kun káajal u baʼateʼel le gobiernoʼob tu contra u Reino Diosoʼ? Le demonioʼoboʼ yaan u tuskoʼob «u reyiloʼob tuláakal yóokʼol kaab utiaʼal ka u muchʼkíintoʼob teʼ baʼateʼel kun antal tu noj kʼiinil le Dios jach táaj yaan u poderoʼ». Teʼ baʼateʼel ku kʼaabaʼtik Armagedónoʼ le gobernanteʼoboʼ yaan u baʼateloʼob tu contra u Reino Dios (Apocalipsis 16:14, 16; ilawil nota 10).

19, 20. ¿Baʼaxten kʼaʼabéettoʼon u Reino Dios?

¹⁹ ¿Baʼaxten kʼaʼabéettoʼon u Reino Dios? Yáaxeʼ tumen kʼebanoʼon, k-kʼojaʼantal yéetel k-kíimil. Baʼaleʼ yáanal u Reino Dioseʼ yaan k-kuxtal utiaʼal mantatsʼ. Juan 3:16, ku yaʼalik: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul».

²⁰ U kaʼapʼéel baʼax oʼolal kʼaʼabéettoʼon u Reino Dioseʼ tumen tsʼoʼok u jach kʼastal le kuxtaloʼ yéetel chéen Dios jeʼel u páajtal u yutskíintikeʼ. Máax maʼ tu xuʼulul u tuus, u yookol wa u bisik junpʼéel kʼaakʼas kuxtaleʼ yaan u xuʼulsaʼal teʼ Armagedónoʼ (xok Salmo 37:10). U yóoxpʼéel baʼax oʼolal kʼaʼabéettoʼoneʼ tumen le gobernanteʼob yaan bejlaʼoʼ jach kʼasaʼanoʼob, ku yookoloʼob, maʼ tu páajtal u yutskíintikoʼob tuláakal le problemasoʼ, tsʼoʼoleʼ maʼ u kʼáat u yáantoʼob máak u yuʼub  u tʼaan Diosiʼ. Jeʼex u yaʼalik le Bibliaoʼ máakeʼ chéen ku gobernartik «u yéet máakil utiaʼal u beetik kʼaas tiʼ» (Eclesiastés 8:9).

21. ¿Bix kun áantaj le Reino utiaʼal ka beetaʼak baʼax u kʼáat Dios way Luʼumoʼ?

²¹ Kéen tsʼoʼokok Armagedóneʼ le Reinooʼ yaan u yilik ka beetaʼak mantatsʼ baʼax u kʼáat Dios way Luʼumeʼ. Yaan u kʼalik Satanás yéetel u demonioʼob (Apocalipsis 20:1-3). Kéen máanak kʼiineʼ mix máak kun kʼojaʼantal mix kun kíimil. Yoʼolal u kuxtal Jesús tu kʼubaj bey boʼoloʼ máaxoʼob uʼuyik u tʼaan Dioseʼ yaan u kuxtaloʼob mantatsʼ teʼ Paraísooʼ (Apocalipsis 22:1-3). Le Reinooʼ yaan u santificartik u kʼaabaʼ Dios. U kʼáat u yaʼaleʼ yaan u beetik u respetartaʼal Dios tumen tuláakal máak (ilawil nota 20).

22. ¿Bix k-ojéeltik maʼ káaj u reinar Jesús le ka taal way Luʼumoʼ mix le táant u suut teʼ kaʼanoʼ?

²² Jesúseʼ tu yaʼalaj tiʼ u discípuloʼob ka u kʼáatoʼob ich oración: «Taalak a Reino». K-ilik túuneʼ u Reino Dioseʼ maʼ káajak u meyaj way Luʼumeʼ. Yáaxeʼ yanchaj u tsʼaʼabal u beet u Reyil Jesús tumen Jéeoba.  ¿Chéen wa kʼuchik teʼ kaʼan ka tsʼaʼab u beet u Reyiloʼ? Maʼ. Yanchaj u páaʼtaj. Maʼ úuch kaʼa kuxkíintaʼakeʼ, apóstol Pedro yéetel Pabloeʼ tu tsoloʼob bix béeychajik tiʼ Jesús le profecía yaan teʼ Salmo 110:1. Teʼeloʼ Jéeobaeʼ tu yaʼalajtiʼ: «Kulen tin x-noʼoj kʼab utiaʼal ka a páaʼt in tsʼáaik a enemigoʼob bey junpʼéel kʼáancheʼ utiaʼal a tsʼáaik a wookoʼobeʼ» (Hechos 2:32-35; Hebreos 10:12, 13). ¿Bukaʼaj tiempo tu páaʼtaj Jesús utiaʼal ka tsʼaʼabak u beet u Reyil?

23. 1) ¿Baʼax kʼiin ka káaj u beetik u Reyil Jesús? 2) ¿Baʼax ken k-il tuláakʼ xookoʼ?

²³ Yaʼab u bin u kʼuchul u jaʼabil 1914, junmúuchʼ cristianoʼobeʼ tu naʼatoʼob yaan u béeychajal profecíaʼob jach kʼaʼanaʼantak teʼ jaʼab jeʼeloʼ. Le baʼaxoʼob káaj u yúuchloʼ ku yeʼesik jach jaaj baʼax tu yaʼaloʼob: Jesúseʼ káaj u reinar tu jaʼabil 1914 (Salmo 110:2). Ka tsʼoʼokeʼ puʼul Satanás way Luʼumeʼ; bejlaʼeʼ «chéen junpʼíit kʼiin pʼaataltiʼ» (Apocalipsis 12:12). Tuláakʼ xookeʼ yaan k-ilik baʼaxoʼob eʼesik kuxaʼanoʼon tu tsʼook kʼiinoʼob. Yaan xan k-kanik baʼax ken u beet le Reino utiaʼal ka beetaʼak baʼax u kʼáat Dios way Luʼumeʼ (ilawil nota 21).