1, 2. ¿Tuʼux jeʼel k-taʼakikba teʼ kʼiinoʼobaʼ?

TUKULTEʼ táan a bin tiʼ junpʼéel bejeʼ ku káajal u sen nookoytal. Tiʼ leloʼ ku joʼopʼol u léembal yéetel u kíilbal le cháakoʼ yéetel ku wojchajal junpʼéel kʼaʼamkach jaʼ. Teech túuneʼ ka jáan kaxtik tuʼux a taʼakikaba. Kéen a kaxteʼ ku jach kiʼimaktal a wóol.

² Bejlaʼa xaneʼ yoʼolal le baʼaloʼob talamtak ku sen úuchloʼ jeʼel u páajtal k-aʼalikeʼ bey táan u kʼáaxal junpʼéel kʼaʼamkach jaʼeʼ. Maʼ xaaneʼ ka tuklik: «¿Tuʼux jeʼel k-taʼakikbaeʼ?». Le salmistaoʼ tu yaʼalaj tiʼ Jéeoba: «Beyech junpʼéel lugar seguroeʼ, beyech junpʼéel lugar tuʼux kin taʼakikinbaeʼ, in Dios, tiʼ teech kin confiar» (Salmo 91:2). Jéeobaeʼ tu jaajil jeʼel u kanáantkoʼon bejlaʼeʼ yéetel maʼ kun xáantaleʼ yaan u tsʼáaiktoʼon junpʼéel jatsʼuts kuxtal.

3. ¿Baʼax unaj k-beetik utiaʼal ka u yáantoʼon Jéeoba?

³ ¿Bix u kanáantkoʼon Jéeoba? Ku yáantkoʼon tiʼ jeʼel baʼaxak ka k-aktáanteʼ. Letiʼeʼ maas yaan u páajtalil tiʼ jeʼel máaxak u kʼáat u beettoʼon loobeʼ. Tsʼoʼoleʼ kex ka úuchuktoʼon wa baʼax bejlaʼeʼ k-ojel maʼ tun xáantal kéen u yutskíinte. Le Bibliaoʼ ku yaʼaliktoʼon: «Pʼáat[keʼex] ichil u yaabilaj Dios» (Judas 21). Utiaʼal u yáantkoʼon Jéeoba kéen yanaktoʼon problemaseʼ maʼ unaj u xuʼulul k-bisikba tu yéeteliʼ. Baʼaleʼ ¿bix jeʼel k-beetkeʼ?

4, 5. ¿Bix u yeʼesik u yaabiltmoʼon Jéeoba?

⁴ Utiaʼal maʼ u xuʼulul k-bisikba yéetel Jéeobaeʼ unaj  k-naʼatik bukaʼaj u yaabiltmoʼon. Tuukulnen tiʼ tuláakal baʼax u tsʼaamajtoʼon: junpʼéel jatsʼuts Luʼum chuup yéetel jatsʼuts cheʼob bey xan yéetel baʼalcheʼob, kiʼikiʼ baʼaloʼob utiaʼal k-jaante bey xan jaʼ utiaʼal k-ukʼe. Teʼ Bibliaoʼ ku yaʼaliktoʼon xan bix u kʼaabaʼ yéetel bix u modos. Baʼaleʼ úuchik u túuxtik Jesús u kʼub u kuxtal t-oʼolaleʼ tu maas eʼesajtoʼon bukaʼaj u yaabiltmoʼon (Juan 3:16). Tsʼoʼoleʼ yoʼolal leloʼ táan k-páaʼtik u yantaltoʼon junpʼéel jatsʼuts kuxtal.

⁵ Jéeobaeʼ tsʼoʼok u tsʼáaik u Reino teʼ kaʼanoʼ. Maʼ kun xáantaleʼ le gobiernoaʼ yaan u sutik paraísoil le Luʼumaʼ yéetel tiʼ ken k-kuxtal mantatsʼ ich jeetsʼelil bey xan ich kiʼimak óolaliʼ (Salmo 37:29). Uláakʼ bix u yeʼesiktoʼon u yaabilaj Jéeobaeʼ letiʼe u kaʼansiktoʼon bix jeʼel k-bisik junpʼéel kuxtal maʼalob teʼ kʼiinoʼobaʼ. Ku yaʼaliktoʼon xan ka orarnakoʼon jeʼel baʼalak súutukileʼ; letiʼeʼ yaan u yuʼubikoʼon. Tuláakal leloʼ ku yeʼesikeʼ Jéeobaeʼ jach tu jaajil u yaabiltmoʼon.

6. ¿Baʼax unaj a beetik yoʼolal le yaabilaj ku yeʼesiktech Jéeobaoʼ?

⁶ ¿Baʼax ku páaʼtaʼal ka a beet yoʼolal le yaabilaj ku yeʼesiktech Jéeobaoʼ? Tsʼáa u graciasil yoʼolal le baʼaxoʼob tsʼoʼok u beetik ta woʼolaloʼ. Bejlaʼeʼ yaʼab máax maʼatech u tsʼáaik u diosboʼotikil. Bey úuchik xan ka taal Jesús way Luʼumeʼ. Juntéenjeakeʼ tu tsʼakaj diez máakoʼob yaan lepra tiʼob, baʼaleʼ chéen juntúul tu tsʼáaj u diosboʼotikiliʼ (Lucas 17:12-17). Jeʼex le máax tu tsʼáaj u diosboʼotikiloʼ toʼoneʼ mantatsʼ unaj k-tsʼáaik u graciasil tiʼ Jéeoba yoʼolal baʼax ku beetik t-oʼolal.

7. ¿Bix unaj k-yaabiltik Jéeoba?

⁷ Toʼon xaneʼ unaj k-eʼesik k-yaabiltmaj Jéeoba. Jesúseʼ tu yaʼalaj tiʼ u discípuloʼob unaj u yaabiltikoʼob Jéeoba yéetel tuláakal u puksiʼikʼaloʼob, yéetel tuláakal u kuxtaloʼob  bey xan yéetel tuláakal u tuukuloʼob (xok Mateo 22:37).

8, 9. ¿Bix jeʼel u yeʼesik máak u yaabiltmaj Jéeobaeʼ?

⁸ ¿Chéen wa unaj k-aʼalik k-yaabiltmaj Jéeoba? Maʼ. Wa k-yaabiltmaj yéetel tuláakal k-puksiʼikʼal, yéetel tuláakal k-kuxtal bey xan yéetel tuláakal k-tuukuleʼ yaan k-eʼesik yoʼolal baʼaxoʼob k-beetik (Mateo 7:16-20). Le Bibliaoʼ ku yeʼesikeʼ wa k-yaabiltmaj Dioseʼ yaan k-beetik le baʼaxoʼob ku yaʼalikoʼ. ¿Talam wa u beetaʼal? Maʼatech, «le baʼaxoʼob ku yaʼalikoʼ maʼ talam u beetaʼaloʼobiʼ» (xok 1 Juan 5:3).

⁹ Kéen k-beet baʼax ku yaʼalik Jéeobaeʼ ku kiʼimaktal k-óol yéetel ku yantal u biilal k-kuxtal (Isaías 48:17, 18). Baʼaleʼ ¿baʼax jeʼel u yáantkoʼon utiaʼal maʼ u xuʼulul k-bisikba yéetel Jéeobaeʼ? Koʼox ilik.

10. ¿Baʼaxten unaj u seguer a kaanbal tiʼ Jéeoba?

¹⁰ ¿Bix káajik a biskaba yéetel Jéeoba? Le ka joʼopʼ a xokik le Bibliaoʼ ta kʼaj óoltaj maʼalob yéetel káaj a biskaba tu yéetel. Leloʼ bey jeʼex junpʼéel kʼáakʼeʼ. Utiaʼal maʼ u tuʼupuleʼ kʼaʼabéet u seguer a tsʼáaik siʼiʼ. U kʼáat u yaʼaleʼ unaj u seguer a kaanbal tiʼ Jéeoba utiaʼal maʼ u xuʼulul a biskaba tu yéetel (Proverbios 2:1-5).

11. ¿Baʼax kun úuchul kéen a maas xakʼalxokt le Bibliaoʼ?

¹¹ Kéen a maas xakʼalxokt le Bibliaoʼ yaan a kanik uláakʼ baʼaxoʼob kun kʼuchul ta puksiʼikʼal. Bey úuchik tiʼ kaʼatúul u discípuloʼob Jesús ka tsoʼoltiʼob baʼax u kʼáat u yaʼal jujunpʼéel profecíaʼoboʼ. Letiʼobeʼ tu yaʼaloʼob: «¿Maʼ wa t-uʼuyaj bey táan u yelel k-puksiʼikʼal le táan u taal u tsikbal t-éetel teʼ bejoʼ, le táan u tsoliktoʼon jach baʼax ku yaʼalik u Tʼaan Diosoʼ?» (Lucas 24:32).

12, 13. 1) ¿Baʼax jeʼel u yúuchul tiʼ le yaabilaj k-uʼuyik yoʼolal Diosoʼ? 2) ¿Baʼax unaj k-beetik utiaʼal maʼ u saʼatal k-yaabilaj tiʼ Jéeoba?

 ¹² Le baʼax tu kaʼansaj Jesús tiʼ u discípuloʼoboʼ kʼuch tu puksiʼikʼaloʼob. Maʼ xaaneʼ bey ta wuʼuyilaba ka káaj a xokik le Bibliaoʼ. Úuchik a beetik beyoʼ ta kʼaj óoltaj Jéeoba yéetel kʼuchech a yaabilte. Techeʼ maʼ a kʼáat ka saʼatak le yaabilaj ka wuʼuyik tu yoʼolaloʼ (Mateo 24:12).

¹³ Beora u amigoech Dioseʼ unaj a kanáantik maʼ u xuʼulul a biskaba tu yéetel. Utiaʼal leloʼ unaj u seguer a kaanbal tiʼ Jéeoba bey xan tiʼ Jesús (Juan 17:3). Unaj a tuklik xan bix jeʼel a tsʼáaik ta kuxtal le baʼax ka kanikoʼ. Kéen a xok le Bibliaoʼ, tukle: «¿Baʼax ku kaʼansikten yoʼolal Jéeoba? ¿Baʼaxten unaj in yaabiltik yéetel tuláakal in puksiʼikʼal bey xan yéetel tuláakal in kuxtal?» (1 Timoteo 4:15).

14. ¿Bix u yáantkoʼon le oración utiaʼal k-maas k-yaabiltik Jéeobaoʼ?

¹⁴ Wa mantatsʼ ka tsikbal yéetel juntúul a amigoeʼ,  ¿máasaʼ maas ka biskaba tu yéetel? Bey u yúuchul yéetel le yaabilaj k-uʼuyik tu yoʼolal Jéeobaoʼ: ku maas muʼukʼaʼantal wa mantatsʼ k-orar tiʼ letiʼ (xok 1 Tesalonicenses 5:17). Le oraciónoʼ junpʼéel jatsʼuts siibal u tsʼaamajtoʼon Dios. Mantatsʼ unaj k-aʼaliktiʼ bix k-uʼuyikba (Salmo 62:8). Baʼaleʼ maʼ unaj k-sen aʼalik baʼaloʼob chéen k-kanmaj de memoriailiʼ. T-puksiʼikʼal unaj u jóokʼol le baʼax k-aʼalikoʼ. Wa k-beetik beyoʼ yéetel wa ku seguer k-xokik le Bibliaoʼ yaan u maas muʼukʼaʼantal k-yaabilaj tiʼ Jéeoba.

15, 16. Jeʼex Pabloeʼ, ¿bix unaj k-ilik le u tsikbaltaʼal u tʼaan Dios tiʼ u maasiloʼ?

¹⁵ Utiaʼal u seguer k-bisikba yéetel Jéeobaeʼ unaj k-tsikbaltik le baʼaxoʼob tsʼoʼok k-kanik tu yoʼolaloʼ. K-tʼaan yoʼolal Jéeobaeʼ junpʼéel jatsʼuts meyaj (Lucas 1:74). Leloʼ letiʼe baʼax tu yaʼalaj Jesús unaj u beetik u discípuloʼoboʼ. Cada juntúul tiʼ toʼoneʼ unaj u tsikbaltik baʼax ken u beet u Reino Dios. Techeʼ, ¿táan wa a beetik? (Mateo 24:14; 28:19, 20).

¹⁶ Apóstol Pabloeʼ jach nojoch baʼal tu yilil u tsikbaltik u tʼaan Dios tiʼ u maasil (2 Corintios 4:7). K-tiaʼal xaneʼ minaʼan uláakʼ baʼal maas jatsʼuts tiʼ k-tʼaan yoʼolal Jéeoba bey xan yoʼolal baʼax ken u beete. K-beetik leloʼ táakaʼan ichil le adoración k-tsʼáaiktiʼoʼ. Dios xaneʼ nojoch baʼal u yilik baʼax k-beetik utiaʼal k-meyajtik (Hebreos 6:10). Kéen a beet le meyaj kʼubéentaʼantechoʼ ka wáantik u maasil u bisuba yéetel Dios, tsʼoʼoleʼ tak teech ken a maas bisaba tu yéetel. Wa ka tʼaan tu yoʼolal Jéeobaeʼ jeʼel u yantaltech kuxtal minaʼan u xuuleʼ bey xan tiʼ le máaxoʼob uʼuyikechoʼ (xok 1 Corintios 15:58). ¡Minaʼan uláakʼ meyaj maas jeʼel u taasiktech kiʼimak óolaleʼ!

17. ¿Baʼaxten jach kʼaʼabéet u tsikbaltaʼal u tʼaan Dios bejlaʼeʼ?

 ¹⁷ Le Bibliaoʼ ku yaʼalikeʼ unaj u séeb tsikbaltaʼal u tʼaan Dios, ku yaʼalik: «Tsikbalt u tʼaan Dios, jach tsʼáa a wóol a beet[e]» (2 Timoteo 4:2). Yaʼab máak kʼaʼabéet u yojéeltik baʼax ken u beet u Reino Dios. Le Bibliaoʼ ku yaʼalikeʼ «u nojoch kʼiinil Jéeobaeʼ naatsʼ yanil» yéetel «séebaʼan u taal». Tsʼoʼoleʼ «yaan u kʼuchul jach tu yorail» (Sofonías 1:14; Habacuk 2:3). Maʼ tun xáantaleʼ Jéeobaeʼ yaan u xuʼulsik u kʼasaʼan yóokʼol kaab Satanás. Baʼaleʼ táanileʼ unaj k-tsʼáaik u yojéelt le máakoʼoboʼ utiaʼal u chʼaʼtuklik u meyajtikoʼob Jéeoba.

18. ¿Baʼaxten unaj k-muchʼikba k-adorart Jéeoba?

¹⁸ Jéeobaeʼ u kʼáat ka k-muchʼba k-adorart yéetel uláakʼ máaxoʼob meyajtik. Le Bibliaoʼ ku yaʼalik: «Koʼoneʼex ilik bix jeʼel k-paklan áantikbaʼex utiaʼal ka yanak yaabilaj ichiloʼoneʼex bey xan utiaʼal ka k-beeteʼex baʼaloʼob maʼalobtakeʼ. Tsʼoʼoleʼ maʼ unaj u xuʼulul k-muchʼikbaʼex jeʼex suuk u beetik jujuntúul máakoʼobeʼ, baʼaxeʼ unaj k-paklan líiʼsik k-óol. Tuláakal le baʼaloʼobaʼ unaj k-ilik maas beetkoʼob tumen naatsʼ yanil le kʼiin u yaʼalmaj Diosoʼ» (Hebreos 10:24, 25). Mantatsʼ unaj k-bin muchʼtáambal tumen teʼeloʼ jeʼel u páajtal k-paklan líiʼsik k-óol yéetel u maasileʼ.

19. ¿Baʼax jeʼel u yáantkoʼon k-yaabilt le sukuʼunoʼob yéetel le kiikoʼoboʼ?

¹⁹ Teʼ muchʼtáambaloʼoboʼ jeʼel a kaxtik a amigoʼobeʼ. Letiʼobeʼ yaan u yáantkechoʼob a meyajt Jéeoba. Yaan a kʼaj óoltik jejeláas sukuʼunoʼob yéetel kiikoʼob u tsʼaamaj u yóol u meyajtoʼob Jéeoba. Baʼaleʼ láayliʼ kʼeban máakoʼob jeʼex techeʼ, le oʼolal yaan kʼiineʼ ku beetkoʼob baʼax maʼ maʼalobiʼ. Kéen úuchuk beyoʼ ilawil a perdonarkoʼob (xok Colosenses 3:13). Ilawil le baʼaxoʼob maʼalobtak  ku beetkoʼoboʼ. Beyoʼ yaan a yaabiltikoʼob yéetel yaan a maas biskaba yéetel Jéeoba.

20, 21. ¿Baʼax le «kuxtal jach tu jaajil kuxtaloʼ»?

²⁰ Jéeobaeʼ u kʼáat ka yanak junpʼéel maʼalob kuxtal tiʼ tuláakal u amigoʼob. Le Bibliaoʼ ku yaʼalikeʼ maʼ kun xáantaleʼ yaan u kʼexpajal le kuxtaloʼ.

²¹ Maʼ kun xáantaleʼ maʼ chéen 70 wa 80 años ken k-kuxtaliʼ. Yaan u yantaltoʼon «kuxtal minaʼan u xuul» tiʼ junpʼéel Luʼum sutaʼan paraísoil. Teʼeloʼ yaan u yantaltoʼon toj óolal, jeetsʼelil yéetel kiʼimak óolaliʼ. Letiʼe «kuxtal jach tu jaajil kuxtal» ku yaʼalik le Bibliaoʼ. Jéeobaeʼ ku yaʼalik u tsʼáaiktoʼon le jaajil kuxtaloʼ, baʼaleʼ unaj k-tsʼáaik k-óol k-tiaʼalinte (1 Timoteo 6:12, 19).

22. 1) ¿Bix jeʼel u páajtal u yantaltoʼon le «kuxtal jach tu jaajil kuxtaloʼ»? 2) ¿Baʼaxten maʼ náajaltbil u beetaʼal le kuxtal minaʼan u xuuloʼ?

²² ¿Bix jeʼel k-tsʼáaik k-óol k-tiaʼalint le kuxtal jeʼeloʼ? Unaj k-beetik «baʼax uts» yéetel «baʼaloʼob maʼalobtak» (1 Timoteo 6:18). Leloʼ u kʼáat u yaʼaleʼ unaj k-tsʼáaik ichil k-kuxtal le baʼaxoʼob k-kanik teʼ Bibliaoʼ. Baʼaleʼ le kuxtal minaʼan u xuuloʼ maʼ tu náajaltaʼal chéen yoʼolal baʼaxoʼob ku beetik máak. U jaajileʼ junpʼéel siibal ku tsʼáaik Dios yoʼolal u «nojoch utsil» tiʼ máaxoʼob chúukaʼan u yóoloʼob tiʼ (Romanos 5:15). K-Taata yaan teʼ kaʼanoʼ jach tu jaajil u kʼáat u tsʼáatoʼon le jatsʼuts siibaloʼ.

23. ¿Baʼaxten unaj a séeb chʼaʼtuklik a beetik baʼax uts tu tʼaan Dios?

²³ Tukulte: «¿Kin adorartik wa Dios jeʼex u kʼáatoʼ?». Wa ka wilik yaan kʼeexoʼob unaj a beetkeʼ unaj a séeb beetik. Wa k-kʼubik k-óol tiʼ Jéeoba yéetel k-beetik baʼax ku yaʼalikeʼ, letiʼeʼ jeʼel u kanáantkoʼoneʼ. Yaan u kanáantkoʼon tak tu tsʼook u kʼiinil u kʼasaʼan yóokʼol  kaab Satanás. Kéen tsʼoʼokkeʼ yaan u tsʼáaiktoʼon kuxtal minaʼan u xuul teʼ Paraíso jeʼex u yaʼalmiloʼ. Wa teech ka chʼaʼtuklik a beetik baʼax uts tu tʼaan Dioseʼ jeʼel a tiaʼalintik le kuxtal minaʼan u xuuloʼ.