1. ¿Máax jeʼel u yaʼaliktoʼon bix unaj k-adorartik Dioseʼ?

YAʼAB religiónoʼob aʼalik ku kaʼanskoʼob u jaajil yoʼolal Dios. Baʼaleʼ leloʼ maʼ jaajiʼ, tumen jejeláas baʼax ku kaʼanskoʼob yoʼolal máax Dios yéetel bix unaj k-adorartik. ¿Bix túun jeʼel u páajtal k-kʼaj óoltik u jaajil religióneʼ? Chéen Jéeoba jeʼel u páajtal u yaʼaliktoʼon bix unaj k-adorarkeʼ.

2. ¿Bix jeʼel k-ojéeltik bix u kʼáat Dios ka k-adorarte?

² Jéeobaeʼ u tsʼaamajtoʼon le Biblia utiaʼal k-ojéeltik bix unaj k-adorarkoʼ, le oʼolal maʼalob ka a xakʼalxokte. Dioseʼ u kʼáat u yáantech a naʼat le baʼaxoʼob ku kaʼansikoʼ, tumen u kʼáat ka xiʼiktech utsil (Isaías 48:17).

3. ¿Baʼax u kʼáat Dios ka k-beete?

³ Yaan máax aʼalikeʼ Dioseʼ ku kʼamik tuláakal le religiónoʼoboʼ, baʼaleʼ maʼ le tu kaʼansaj Jesúsiʼ. Jesúseʼ tu yaʼalaj: «Maʼ tuláakal le máaxoʼob aʼalikten ‹Yuumtsil, Yuumtsil› kun ookloʼob tu Reinoil le kaʼanoʼ, baʼaxeʼ chéen le máaxoʼob ku beetkoʼob baʼax u kʼáat in Taata[oʼ]». Dios túuneʼ u kʼáat ka k-kan baʼax u kʼáat yéetel ka k-beete. Leloʼ maʼ báaxaliʼ tumen Jesúseʼ tu yaʼaleʼ le máaxoʼob maʼatech u beetkoʼob baʼax ku yaʼalik Diosoʼ ‹kʼasaʼan máakoʼob› (Mateo 7:21-23).

4. ¿Baʼax tu yaʼalaj Jesús yoʼolal u beetaʼal baʼax uts tu tʼaan Dios?

⁴ Jesúseʼ tu yaʼaleʼ wa k-kʼáat k-beet baʼax uts tu tʼaan Dioseʼ yaʼab baʼal ken k-aktáante. Tu yaʼalaj: «Ookeneʼex tiʼ le nuʼunutʼ joonajoʼ, tumen kóoch u bejil le xuʼulsajiloʼ  yéetel nojoch u joonajil, le oʼolal yaʼab máakoʼob ku yookloʼobiʼ. Chéen baʼaleʼ u bejil le kuxtaloʼ nuʼutʼ yéetel nuʼutʼ xan u joonajil, le oʼolal maʼ yaʼab máaxoʼob kaxtikiʼ» (Mateo 7:13, 14). Le nuʼutʼ bej, wa le jaajil religiónoʼ, ku bisik máak tiʼ kuxtal minaʼan u xuul. Le kóokoch bej, wa le religión minaʼan u jaajil tiʼoʼ, ku bisik máak tiʼ kíimil. Baʼaleʼ Jéeobaeʼ maʼ u kʼáat ka kíimik mix máakiʼ, le oʼolal u kʼáat ka kaanbalnakoʼon tiʼ letiʼ (2 Pedro 3:9).

5. ¿Bix jeʼel a kʼaj óoltik máaxoʼob adorartik Dios jeʼex u kʼáateʼ?

⁵ Jesúseʼ tu yaʼalaj bix jeʼel k-kʼaj óoltik máaxoʼob adorartik Dios jeʼex u kʼáateʼ. Utiaʼal leloʼ kʼaʼabéet k-ilik baʼaxoʼob ku creerkoʼob yéetel baʼax ku beetkoʼob. Jesúseʼ tu yaʼalaj: «Tu yoʼolal le ich ku tsʼáaikoʼoboʼ tiʼ ken a kʼaj óolteʼex máaxoʼobiʼ. [...] Tuláakal xan maʼalob cheʼeʼ ku tsʼáaik maʼalob ich» (Mateo 7:16, 17). Kex le máaxoʼob adorartik Dios láayliʼ kʼeban máakoʼobeʼ mantatsʼ ku yilik u beetkoʼob baʼax maʼalob. Koʼox ilik bix jeʼel k-kʼaj óoltik le religión ku kaʼansik u jaajiloʼ.

6, 7. 1) ¿Baʼaxten le religión yaan u jaajil tiʼoʼ tiʼ le Biblia ku chʼaʼik baʼax ku kaʼansikoʼ? 2) ¿Baʼax ku kaʼansiktoʼon le baʼax tu beetaj Jesúsoʼ?

⁶ Le jaajil religiónoʼ teʼ Biblia ku chʼaʼik baʼax ku kaʼansikoʼ. Le Bibliaoʼ ku yaʼalik: «Tuláakal Tsʼíibeʼ tiʼ Dios u taal tumen letiʼ tsʼáa tu tuukul le máakoʼob utiaʼal ka u tsʼíibtoʼoboʼ. Le oʼolal le baʼax ku yaʼalikoʼ maʼalob utiaʼal kaʼansaj, utiaʼal u yaʼalaʼal u nuʼuk tiʼ máak, utiaʼal u tojkíintaʼal u kuxtal máak bey xan utiaʼal u yúuchul tsolnuʼuk jeʼex unajeʼ. Beyoʼ le máax meyajtik Diosoʼ yaan u kanik yéetel yaan u páajtal u beetik jach tubeel tuláakal maʼalob meyaj» (2 Timoteo 3:16, 17). Apóstol Pabloeʼ tu yaʼalaj tiʼ le yáax cristianoʼoboʼ: «Le ka ta wuʼuyeʼex  u tʼaan Dios t-tsikbaltajteʼexoʼ, ta kʼameʼex bey u tʼaan Dioseʼ maʼ bey u tʼaan máakoʼobeʼ» (1 Tesalonicenses 2:13). Le religión yaan u jaajil tiʼoʼ tiʼ le Biblia ku chʼaʼik u kaʼansajoʼ. Maʼ tu kaʼansik chéen baʼax suukaʼan u beetaʼal mix u tuukul chéen máakoʼobiʼ.

⁷ Tuláakal baʼax tu kaʼansaj Jesúseʼ tiʼ Dios tu kanaj (xok Juan 17:17). Jeʼel baʼaxak ka u kaʼanseʼ ku chʼaʼchiʼitik baʼax ku yaʼalik u Tʼaan Dios (Mateo 4:4, 7, 10). Máaxoʼob adorartik Dioseʼ ku beetkoʼob jeʼex Jesúseʼ. U kaʼansajoʼobeʼ tiʼ le Biblia u taaloʼ.

8. ¿Baʼax tu kaʼansaj Jesús yoʼolal bix unaj u adorartaʼal Jéeoba?

⁸ Chéen Jéeoba unaj u adorartaʼal. Salmo 83:18, ku yaʼalik: «A kʼaabaʼeʼ Jéeoba, chéen teech le Maas Nojoch Dios yaan tu yóokʼol tuláakal le luʼumaʼ». Jesúseʼ u kʼáat ka ojéeltaʼak máax u jaajil Dios, le oʼolal tu kaʼansaj u kʼaabaʼ Dios (xok Juan 17:6). Jesúseʼ tu yaʼalaj: «Jéeoba a Dios unaj a adorartik, yéetel chéen letiʼ kʼaʼabéet a meyajtik» (Mateo 4:10). Toʼon k-meyajtik Dioseʼ k-beetik le baʼax tu yaʼalaj Jesúsoʼ. K-adorartik chéen Jéeoba, ku meyajtoʼon u kʼaabaʼ yéetel k-kaʼansik tiʼ u maasil. K-kaʼansik xan baʼax ken u beet t-oʼolal.

9, 10. ¿Bix k-paklan eʼesik yaabilaj?

⁹ Unaj u yeʼesaʼal yaabilaj tiʼ u maasil. Jesúseʼ tu kaʼansaj tiʼ u discípuloʼob ka u paklan yaabiltubaʼob (xok Juan 13:35). K-yaabilaj tiʼ u maasileʼ ku beetik k-bisikba bey sukuʼuntsiloʼon kex jeʼel tuʼuxak k-taaleʼ, kex ayikʼaloʼon wa kex óotsiloʼon (Colosenses 3:14). Le oʼolal maʼatech k-táakpajal tiʼ baʼateloʼob mix tech k-kíimsik k-éet máakil. Le Bibliaoʼ ku yaʼalik: «U paalal Dios yéetel u paalal le Kʼaasilbaʼaloʼ maʼ igualoʼobiʼ, tumen tuláakal máax maʼatech u beetik baʼax tojeʼ maʼ tiʼ Dios u taaliʼ, mix le máax maʼ tu yaabiltik u sukuʼunoʼ». Ku yaʼalik xan  ka k-paklan yaabiltba yéetel maʼ k-beetik ‹jeʼex Caín, le máax tiʼ Kʼaasilbaʼal u taal yéetel tu kíimsaj u yíitsʼinoʼ› (1 Juan 3:10-12; 4:20, 21).

¹⁰ K-xupik k-muukʼ, k-tiempo yéetel uláakʼ baʼaxoʼob yaantoʼon utiaʼal k-paklan líiʼsik k-óol (Hebreos 10:24, 25). K-beetik «baʼax maʼalob utiaʼal k-áantik tuláakal máak» (Gálatas 6:10).

11. ¿Baʼaxten unaj k-beetik baʼax ku yaʼalik Jesús?

¹¹ Unaj u beetaʼal baʼax ku yaʼalik Jesús, tumen chéen tu yoʼolal jeʼel u salvarkuba máakeʼ. Le Bibliaoʼ ku yaʼalik: «Minaʼan salvación tu yoʼolal uláakʼ máak, tumen ichil u kajnáaliloʼob le luʼumoʼ maʼ tsʼaʼan uláakʼ kʼaabaʼ utiaʼal ka páajchajak k-salvartaʼaliʼ» (Hechos 4:12). Teʼ xook 5, t-kaneʼ Jéeobaeʼ tu túuxtaj Jesús utiaʼal u kʼubik u kuxtal bey junpʼéel boʼol utiaʼal u salvarkuba le máaxoʼob uʼuyik tʼaanoʼ (Mateo 20:28). Jéeobaeʼ tsʼoʼok u yéeyik Jesús u beet u Reyil yóokʼol le Luʼumaʼ. Le oʼolal le Bibliaoʼ ku yaʼalikeʼ wa k-kʼáat kuxtal utiaʼal mantatsʼeʼ unaj k-beetik baʼax ku yaʼalik Jesús (xok Juan 3:36).

12. ¿Baʼaxten maʼatech k-táakpajal tiʼ política?

¹² Maʼ unaj u táakpajal máak tiʼ políticaiʼ. Jesúseʼ maʼ táakpaj tiʼ políticaiʼ. Le táan u juzgartaʼaloʼ tu yaʼalaj tiʼ Pilato, u gobernadoril Roma: «In reinoeʼ maʼ yóokʼol kaabiliʼ» (xok Juan 18:36). Jeʼex Jesúseʼ toʼoneʼ chúukaʼan k-óol tiʼ u Reino Dios, le oʼolal maʼatech k-táakpajal tiʼ política kex jeʼel tuʼuxak kajaʼanoʼoneʼ. Baʼaleʼ le Bibliaoʼ ku yaʼalik ka yanakoʼon yáanal u «páajtalil le autoridadoʼob» wa le gobiernoʼoboʼ (Romanos 13:1). K-ilik k-kuxtal jeʼex u yaʼalik u leyoʼob le luʼum tuʼux kajaʼanoʼonoʼ. Baʼaleʼ wa junpʼéel ley ku bin tu contra baʼax ku yaʼalik Dioseʼ, toʼoneʼ unaj k-aʼalik jeʼex le apóstoloʼoboʼ: «Unaj k-uʼuyik u  tʼaan Dios, maʼ u tʼaan chéen máakoʼobiʼ» (Hechos 5:29; Marcos 12:17).

13. ¿Baʼax k-tsikbaltik yoʼolal u Reino Dios?

¹³ Unaj u tsʼaʼabal ojéeltbil chéen u Reino Dios kun utskíintik le problemas yaan teʼ yóokʼol kaabaʼ. Jesúseʼ tu yaʼaleʼ yaan u tsikbaltaʼal tiʼ tuláakal yóokʼol kaab «le baʼaloʼob maʼalobtak ken u beet le Reinooʼ» (xok Mateo 24:14). Mix junpʼéel u gobierno wíinik jeʼel u beetik le baʼax ken u beet u Reino Dios t-oʼolaloʼ (Salmo 146:3). Jesúseʼ tu kaʼansajtoʼon ka k-kʼáat le Reino kéen orarnakoʼonoʼ. Tu yaʼalaj: «Taalak a Reino, beetaʼak baʼax a kʼáat, jeʼex u beetaʼal teʼ kaʼanoʼ bey xan ka beetaʼak way luʼumeʼ» (Mateo 6:10). Teʼ Bibliaoʼ k-kanikeʼ u Reino Dioseʼ yaan u xuʼulsik tuláakal u gobierno wíinik, «chéen letiʼ kun pʼáatal utiaʼal mantatsʼ» (Daniel 2:44).

14. ¿Máaxoʼob ka tuklik adorartik Dios jeʼex u kʼáateʼ?

¹⁴ Beora tsʼoʼok k-xakʼaltik tuláakal le baʼaloʼobaʼ, tukulte: «¿Máaxoʼob kaʼansik baʼax ku yaʼalik le Bibliaoʼ? ¿Máaxoʼob tsʼáaik kʼaj óoltbil u kʼaabaʼ Dios? ¿Máaxoʼob ku paklan eʼeskoʼob yaabilaj? ¿Máaxoʼob creertik Dioseʼ tu túuxtaj Jesús utiaʼal u salvartaʼal máak? ¿Máaxoʼob maʼatech u táakpajloʼob tiʼ política? ¿Máaxoʼob tsʼáaik ojéeltbil chéen u Reino Dios kun utskíintik le problemasoʼ?». Chéen u testigoʼob Jéeoba (Isaías 43:10-12).

15. ¿Baʼax unaj k-beetik utiaʼal ka u kʼam Dios le adoración k-tsʼáaiktiʼoʼ?

¹⁵ Maʼ chéen yaan yéetel k-creertik Diosiʼ. Tak le demonioʼob creertik yaan Diosoʼ, baʼaleʼ maʼatech u beetkoʼob baʼax ku yaʼalik (Santiago 2:19). Utiaʼal u kʼamik Dios le adoración k-tsʼáaiktiʼoʼ unaj k-beetik baʼax ku yaʼaliktoʼon, maʼ chéen unaj k-creertik yaan letiʼiʼ.

16. ¿Baʼaxten unaj k-náachtal tiʼ le religión maʼatech u kaʼansik u jaajiloʼ?

 ¹⁶ Utiaʼal ka u kʼam Dios le adoración k-tsʼáaiktiʼoʼ unaj xan k-náachtal tiʼ le religión maʼatech u kaʼansik u jaajiloʼ. Profeta Isaíaseʼ tu tsʼíibtaj: «¡Náachkuntabaʼex tiʼ letiʼ yéetel ilawil a pʼáatleʼex limpioil!» (Isaías 52:11; 2 Corintios 6:17). Unaj k-náachtal tiʼ tuláakal baʼax yaan u yil yéetel le religión maʼatech u kaʼansik u jaajiloʼ.

17, 18. ¿Baʼax le «Nojoch Babiloniaoʼ», yéetel baʼaxten unaj a séeb náachtaltiʼ?

¹⁷ ¿Máakalmáak le maʼ jaajil religiónoʼ? Tuláakal le religiónoʼob maʼatech u kaʼanskoʼob ka adorartaʼak Dios jeʼex u yaʼalik le Bibliaoʼ. Le Bibliaoʼ ku yaʼalik «Nojoch Babilonia» tiʼ le religiónoʼob maʼatech u kaʼanskoʼob u jaajiloʼ (Apocalipsis 17:5). ¿Baʼaxten? Tumen ka tsʼoʼok le Búulkabaloʼ joʼopʼ u kaʼansaʼal baʼaloʼob maʼ jaajtak tu kaajil Babiloniaiʼ. Le kaʼansajoʼoboʼ kʼiʼitpajoʼob tuláakal yóokʼol kaab. Le babilonioʼoboʼ suuk kaʼach u muchʼkoʼob de a óoxtúul le diosoʼob ku adorarkoʼoboʼ. Teʼ kʼiinoʼob xanaʼ yaʼab religiónoʼob kaʼansikeʼ Dioseʼ junpʼéel trinidad, baʼaleʼ le Bibliaoʼ ku yaʼalikeʼ chéen Jéeoba u jaajil Dios, tsʼoʼoleʼ Jesúseʼ u Hijo Dios (Juan 17:3). Le babilonioʼoboʼ ku creerkoʼob kaʼach xaneʼ yaan baʼax ku pʼáatal kuxaʼanil tiʼ máak kéen kíimik yéetel ku muʼyaj infierno. Baʼaleʼ leloʼ maʼ jaajiʼ (ilawil nota 14 yéetel 17).

¹⁸ Dioseʼ ku yaʼalikeʼ maʼ kun xáantaleʼ yaan u láaj xuʼulsaʼal le religiónoʼob maʼatech u kaʼanskoʼob u jaajiloʼ (Apocalipsis 18:8). ¿Ka naʼatik wa baʼaxten unaj a séeb náachtal tiʼ le religión minaʼan u jaajil tiʼoʼ? Jéeobaeʼ u kʼáat ka a séeb beete (Apocalipsis 18:4).

19. ¿Bix ken u kanáantech Dios wa ka chʼaʼtuklik a meyajtik?

¹⁹ Wa ka chʼaʼtuklik a pʼatik le religión maʼatech u  kaʼansik u jaajil utiaʼal a meyajtik Jéeobaeʼ, maʼ xaaneʼ a láakʼtsiloʼob wa a amigoʼobeʼ maʼ ken u naʼatoʼob baʼaxten ka beetik yéetel yaan u tsʼíikiloʼob. Baʼaleʼ Jéeobaeʼ yaan u kanáantkech. Yaan xan u tsʼáaiktech junpʼéel familia tuʼux táakaʼan u millonesil máakoʼob u yaabiltmubaʼob yéetel táan u páaʼtkoʼob u kuxtaloʼob utiaʼal minaʼan u xuul tiʼ junpʼéel túumben luʼum (Marcos 10:28-30). Maʼ xaaneʼ kéen máanak kʼiineʼ a láakʼtsiloʼob wa a amigoʼob maʼ u kʼáatoʼob ka a meyajt Jéeobaeʼ jeʼel u káajal u xokikoʼob le Bibliaoʼ.

20. ¿Baʼaxten kʼaʼabéet a táakpajal ichil le religión ku kaʼansik u jaajiloʼ?

²⁰ Maʼ kun xáantaleʼ Dioseʼ yaan u xuʼulsik le kʼasaʼaniloʼ. U Reinoeʼ yaan u gobernartik le Luʼumaʼ (2 Pedro 3:9, 13). ¡Jach jatsʼuts baʼax ken u beete! Tuláakal máak ken u adorart Jéeoba jeʼex u kʼáat letiʼeʼ. Le oʼolaleʼ unaj a séeb beetik le kʼeexoʼob kʼaʼabéetoʼ utiaʼal a táakpajal ichil le religión ku kaʼansik u jaajiloʼ.