1, 2. 1) ¿Baʼaxten le oraciónoʼ junpʼéel siibal u tsʼaamaj Dios? 2) ¿Baʼaxten unaj k-ojéeltik baʼax ku kaʼansik le Biblia yoʼolal le oraciónoʼ?

LE LUʼUMAʼ jach chichan wa k-ketik yéetel uláakʼ baʼaxoʼob u beetmaj Dios. Utiaʼal Jéeobaeʼ tuláakloʼon way Luʼumeʼ beyoʼon u chan chʼáaj jaʼeʼ (Salmo 115:15; Isaías 40:15). Kex jach táaj chichnoʼoneʼ le Bibliaoʼ ku yaʼalik: «Jéeobaeʼ tiaʼan naatsʼ tiʼ tuláakal le máaxoʼob chʼaʼchiʼitik u kʼaabaʼoʼ, le máaxoʼob yéetel u jaajil u yóoloʼob ku beetkoʼoboʼ. Ku tsʼáaik tiʼ le máaxoʼob meyajtik le baʼax ku kʼáatkoʼoboʼ, ku salvarkoʼob le kéen u yuʼub táan u kʼáatkoʼob áantaj» (Salmo 145:18, 19). Toʼoneʼ jeʼel u páajtal k-bisikba yéetel Jéeoba, le Dios jach yaan u páajtalil yéetel u beetmaj tuláakal baʼaloʼ. Tsʼoʼoleʼ jeʼel u yuʼubik k-oracióneʼ. Le oraciónoʼ junpʼéel jatsʼuts baʼax u siimajtoʼon Dios.

² Jéeobaeʼ chéen jeʼel u yuʼubik k-oración wa k-beetik jeʼex u kʼáateʼ. ¿Bix unaj k-beetik? Koʼox ilik baʼax ku kaʼansik le Biblia yoʼolal le oraciónoʼ.

3. ¿Baʼaxten kʼaʼabéet a orar tiʼ Jéeoba?

³ Jéeobaeʼ u kʼáat ka orarnakech wa ka tʼaanakech tu yéetel. ¿Bix k-ojéeltik? Uʼuy baʼax ku yaʼaliktech Dios tiʼ Filipenses 4:6, 7 (xoke). Le Máax Beetmil le kaʼan yéetel le Luʼumoʼ u kʼáat u yáantech yéetel u kʼáat ka a tsikbalttiʼ  bix a wuʼuyikaba bey xan baʼaxoʼob chiʼichnakkúuntikech.

4. ¿Bix jeʼel u yáantkech a orar mantatsʼ tiʼ Jéeobaeʼ?

⁴ A orar tiʼ Jéeobaeʼ jeʼel u yáantkech a maas bisaba tu yéeteleʼ. Kaʼatúul amigoʼobeʼ ku maas biskubaʼob kéen u tsikbaltoʼob baʼax ku tuklikoʼob, bix u yuʼubikubaʼob yéetel baʼax chiʼichnakkúuntikoʼob. Jéeoba xaneʼ ku tsikbaltiktech teʼ Biblia baʼax ku tuklik, bix u yuʼubikuba yéetel baʼax ken u beet maʼ kun xáantal. Teech xaneʼ kéen orarnakech tiʼ Jéeobaeʼ jeʼel u páajtal a tsikbaltiktiʼ baʼaxoʼob ku yúuchultecheʼ. Kéen a beeteʼ yaan a maas biskaba yéetel Jéeoba (Santiago 4:8).

5. ¿Baʼaxten k-aʼalik Jéeobaeʼ maʼ tu yuʼubik tuláakal le oraciónoʼoboʼ?

⁵ ¿Ku yuʼubik wa Jéeoba tuláakal le oraciónoʼoboʼ? Maʼatech. Tu kʼiinil profeta Isaíaseʼ, Jéeobaeʼ tu yaʼalaj tiʼ le israelitaʼoboʼ: «Kex yaʼab oraciónoʼob ka beetkeʼexeʼ  teneʼ maʼ tin wuʼuyik. A kʼabeʼexeʼ papaʼkil yéetel kʼiʼikʼ» (Isaías 1:15). Wa táan k-beetik baʼax maʼ uts tu tʼaan Jéeobaeʼ maʼ kun uʼuybil k-oraciónoʼob.

6. 1) ¿Baʼaxten kʼaʼabéet u yantaltoʼon fe? 2) ¿Bix jeʼel k-eʼesik yaan k-fejeʼ?

⁶ Utiaʼal u yuʼubik Jéeoba k-oraciónoʼobeʼ unaj k-tsʼáaik fe tiʼ letiʼ (Marcos 11:24). Apóstol Pabloeʼ tu yaʼalaj: «Wa minaʼan u fe máakeʼ maʼ tu páajtal u lúubul utsil tiʼ Dios, tumen le máax ku natsʼkuba tu yiknal Dioseʼ kʼaʼabéet u creertik jach tu jaajil yaan Dios. Kʼaʼabéet xan u creertik jach tu jaajil ku tsʼáaik baʼaloʼob maʼalobtak tiʼ le máaxoʼob ku tsʼáaik u yóol u kaxtoʼo[boʼ]» (Hebreos 11:6). Baʼaleʼ maʼ chéen unaj k-aʼalik yaan k-fejiʼ, baʼaxeʼ mantatsʼ unaj k-uʼuyik u tʼaan Jéeoba (xok Santiago 2:26).

7. 1) ¿Baʼaxten unaj k-eʼesik kabal óolal yéetel tsiikil kéen orarnakoʼon tiʼ Jéeoba? 2) ¿Bix jeʼel k-orar yéetel u jaajil k-óoleʼ?

⁷ Kéen orarnakoʼon tiʼ Jéeobaeʼ unaj k-eʼesik kabal óolal yéetel tsiikil. ¿Baʼaxten? Tumen tak kéen tʼaanakoʼon yéetel juntúul rey wa presidenteeʼ k-eʼesik tsiikil tiʼ. Kéen tʼaanakoʼon yéetel Jéeobaeʼ maas unaj k-beetik, tumen letiʼe Dios yaan tuláakal páajtalil tiʼoʼ (Génesis 17:1; Salmo 138:6). Unaj xan k-orar yéetel u jaajil k-óol utiaʼal u jóokʼol t-puksiʼikʼal le baʼax ken k-aʼaloʼ. Maʼ unaj k-sen aʼalik chéen junpʼéeliliʼ baʼaliʼ (Mateo 6:7, 8).

8. ¿Baʼax unaj k-beetik kéen tsʼoʼokok k-kʼáatik wa baʼax tiʼ Dios?

⁸ Kéen k-kʼáat wa baʼax tiʼ Jéeoba ich oracióneʼ unaj k-eʼesik jach tu jaajil taak k-kʼamik. Maʼ xaaneʼ k-kʼáatik ka u tsʼáatoʼon baʼax kʼaʼabéettoʼon sáamsamal. Baʼaleʼ maʼ unaj k-maʼakʼóoltal ka k-páaʼt u láaj tsʼáaiktoʼoniʼ. Unaj k-tsʼáaik k-óol k-beet wa baʼax meyajil utiaʼal ka yanaktoʼon le baʼaxoʼob kʼaʼabéettoʼonoʼ (Mateo 6:11; 2 Tesalonicenses  3:10). Wa k-kʼáatik tiʼ Jéeoba ka u yáantoʼon k-pʼat wa baʼax kʼaaseʼ unaj k-ilik k-náachtal xan tiʼ baʼaxoʼob jeʼel u beetik k-lúubuleʼ (Colosenses 3:5). Koʼox ilik jujunpʼéel kʼáatchiʼob ku beetaʼal yoʼolal le oraciónoʼ.

9. 1) ¿Tiʼ máax unaj k-orar? 2) ¿Baʼax ku kaʼansiktoʼon Juan 14:6 yoʼolal le oraciónoʼ?

⁹ ¿Tiʼ máax unaj k-orar? Jesúseʼ tu kaʼansaj u discípuloʼob ka orarnakoʼob beyaʼ: «K-Taata yanech teʼ kaʼanoʼ» (Mateo 6:9). Jeʼex k-ilkoʼ chéen tiʼ Jéeoba unaj k-orar. Jesúseʼ tu yaʼalaj xan: «Teen le bejoʼ, teen le jaajoʼ yéetel teen le kuxtaloʼ. Mix máak ku náatsʼal tu yiknal le Taata wa maʼ tin woʼolaloʼ» (Juan 14:6). Lelaʼ ku kaʼansiktoʼoneʼ unaj k-orar tu kʼaabaʼ Jesús. ¿Baʼax u kʼáat u yaʼal lelaʼ? Utiaʼal u núukaʼal k-oracióneʼ kʼaʼabéet k-respetartik le meyaj kʼubéentaʼan tiʼ Jesúsoʼ. Jeʼex tsʼoʼok k-kanikoʼ Jesúseʼ taal way Luʼum utiaʼal u salvarkoʼon tiʼ le kʼeban yéetel tiʼ le kíimiloʼ (Juan 3:16; Romanos 5:12). Jéeobaeʼ tu tsʼáaj xan Jesús u beet u Nojoch Sacerdoteil yéetel u Juezil (Juan 5:22; Hebreos 6:20).

10. ¿Bix unaj k-antal kéen orarnakoʼon? Tsole.

¹⁰ ¿Chéen wa junpʼéeliliʼ bix unaj k-antal kéen orarnakoʼon? Maʼ, Jéeobaeʼ maʼ tu yaʼalik wa unaj k-xoltal, k-kutal wa k-waʼatal utiaʼal k-orar. Le Bibliaoʼ ku yaʼalikeʼ jeʼel u béeytal k-antal jejeláas bixeʼ, baʼaleʼ unaj k-beetik yéetel tsiikil (1 Crónicas 17:16; Nehemías 8:6; Daniel 6:10; Marcos 11:25). Baʼax maas kʼaʼanaʼan utiaʼal Jéeobaeʼ ka tʼaanakoʼon yéetel tsiikil, maʼ le bix yaniloʼon kéen orarnakoʼonoʼ. Jeʼel u béeytal k-orar kʼaʼam wa chaambelileʼ, jeʼel tuʼuxak ka yanakoʼoneʼ, tiʼ jeʼel  baʼalak súutukileʼ, de kʼiin wa de áakʼab. Kéen orarnakoʼon tiʼ Jéeoba kex minaʼan uláakʼ máax uʼuyikeʼ letiʼeʼ ku yuʼubik (Nehemías 2:1-6).

11. ¿Baʼax jeʼel u páajtal k-aʼalik kéen orarnakoʼoneʼ?

¹¹ ¿Baʼax jeʼel u páajtal k-aʼalik kéen orarnakoʼoneʼ? Yoʼolal jeʼel baʼaxak uts tu tʼaan Jéeobaeʼ. Le Bibliaoʼ ku yaʼalik: «Jeʼel baʼalak ka k-kʼáat tiʼ Dioseʼ, wa maʼ tu bin tu contra u voluntadeʼ, letiʼeʼ yaan u yuʼubik» (1 Juan 5:14). ¿Jeʼel wa u béeytal k-orar tiʼ baʼax chiʼichnakkúuntikoʼoneʼ? Jeʼeleʼ. K-orar tiʼ Jéeobaeʼ bey jeʼex k-tsikbal yéetel juntúul k-amigoeʼ. Jeʼel u páajtal k-tsikbaltiktiʼ bix k-uʼuyikbaeʼ (Salmo 62:8). Jeʼel u páajtal xan k-kʼáatik u espíritu santo utiaʼal k-beetik baʼax maʼalobeʼ (Lucas 11:13). Unaj k-kʼáatik xan ka u tsʼáatoʼon naʼat utiaʼal k-nuʼuktik k-kuxtal yéetel utiaʼal k-aktáantik le problemasoʼ (Santiago 1:5). Unaj k-kʼáatik tiʼ Jéeoba ka u perdonart k-kʼebanoʼob (Efesios 1:3, 7). Kʼaʼanaʼan xan ka orarnakoʼon yoʼolal u maasil, jeʼex k-láakʼtsiloʼob bey xan le sukuʼunoʼoboʼ (Hechos 12:5; Colosenses 4:12).

12. ¿Yoʼolal baʼaxoʼob maas kʼaʼabéet k-orar?

¹² ¿Yoʼolal baʼaxoʼob maas kʼaʼabéet k-orar? Yoʼolal Jéeoba bey yoʼolal baʼax u kʼáat. Unaj k-tsʼáaik u graciasil tiʼ Jéeoba yoʼolal tuláakal baʼax ku beetik t-oʼolal (1 Crónicas 29:10-13). Ka tu kaʼansaj Jesús orar u discípuloʼobeʼ tu yeʼesaj baʼax maas kʼaʼabéet u kʼáataʼal (xok Mateo 6:9-13). Tu yaʼaleʼ yáax unaj k-kʼáatik ka santificartaʼak u kʼaabaʼ Dios wa ka pʼáatak limpioil. Tsʼoʼoleʼ tu yaʼalaj ka k-kʼáat ka taalak u Reino Dios yéetel ka beetaʼak baʼax u kʼáat way Luʼumeʼ. Kéen tsʼoʼokok k-orar yoʼolal le baʼaloʼob maas kʼaʼanaʼantakoʼ, tu yaʼalaj jeʼel u páajtal k-kʼáatik  baʼaxoʼob kʼaʼabéettoʼoneʼ. Kéen k-tsʼáa táanil Jéeoba yéetel baʼax u kʼáat kéen orarnakoʼoneʼ k-eʼesik baʼax maas kʼaʼanaʼan ichil k-kuxtal.

13. ¿Bukaʼaj unaj u xáantal k-oración?

¹³ ¿Bukaʼaj unaj u xáantal k-oración? Le Bibliaoʼ maʼ tu yaʼalik. Maʼ xaaneʼ táanil tiʼ k-janaleʼ jeʼel u páajtal k-beetik junpʼéel oración maʼ tu jach xáantaleʼ, baʼaleʼ kéen k-tsikbalt tiʼ Jéeoba baʼax ku yúuchultoʼon wa  kéen k-tsʼáa gracias tiʼeʼ jeʼel u páajtal u maas xáantaleʼ (1 Samuel 1:12, 15). Maʼ unaj u sen xáantal k-oración utiaʼal k-taasikba nojbaʼalil jeʼex tu beetil jujuntúul máakoʼob tu kʼiinil Jesúsoʼ (Lucas 20:46, 47). Tiʼ Jéeobaeʼ maʼatech u lúubul utsil le oraciónoʼob beyoʼ. U kʼáat ka jóokʼok t-puksiʼikʼal le baʼax k-aʼaliktiʼoʼ.

14. ¿Baʼax súutukil unaj k-orar, yéetel baʼax ku kaʼansiktoʼon yoʼolal Jéeoba?

¹⁴ ¿Baʼax súutukil unaj k-orar? Jéeobaeʼ u kʼáat ka tsikbalnakoʼon tuláakal súutukil tu yéetel. Le Bibliaoʼ ku yaʼaliktoʼon «maʼ u xuʼulul a orareʼex» yéetel «maʼ u jáawal a orareʼex» (Mateo 26:41; Romanos 12:12; 1 Tesalonicenses 5:17). Jéeobaeʼ mantatsʼ u kʼáat u yuʼuboʼon. Sáamsamal jeʼel u páajtal k-tsʼáaik u graciasil tiʼ yoʼolal u yaabilaj bey xan yoʼolal u yutsileʼ. Jeʼel u béeytal  xan k-kʼáatik tiʼ ka u nuʼuktoʼoneʼ, ka u tsʼáatoʼon muukʼ yéetel ka u líiʼs k-óol. Wa k-ilik bey junpʼéel nojoch siibal le oraciónoʼ yaan k-tʼaan yéetel Jéeoba jeʼel baʼalak súutukileʼ.

15. ¿Baʼaxten unaj k-aʼalik «amén» tu tsʼoʼokbal junpʼéel oración?

¹⁵ ¿Baʼaxten unaj k-aʼalik «ka béeyak» tu tsʼoʼokbal junpʼéel oración? Kéen k-aʼal «ka béeyak» wa «améneʼ» k-eʼesik t-puksiʼikʼal ku jóokʼol le baʼax t-aʼaloʼ (Salmo 41:13). Tsʼoʼoleʼ le Bibliaoʼ ku yaʼalikeʼ unaj k-aʼalik «amén» tu tsʼoʼokbal junpʼéel oración ku beetaʼal tu táan yaʼab máakoʼob. Jeʼel u páajtal k-aʼalik kʼaʼameʼ wa chéen ichil k-tuukul. Beyoʼ k-eʼesik maʼalob k-uʼuyik le baʼax aʼalaʼaboʼ (1 Crónicas 16:36; 1 Corintios 14:16).

16. ¿Baʼaxten k-aʼalikeʼ Jéeobaeʼ ku núukik k-oraciónoʼob?

¹⁶ ¿Ku núukik wa Jéeoba k-oraciónoʼob? Ku núukik. Le Bibliaoʼ ku yaʼalikeʼ letiʼ «uʼuyik le oraciónoʼoboʼ» (Salmo 65:2). Jéeobaeʼ ku yuʼubik u oración u millonesil máakoʼob yéetel jejeláas bix u núukiktiʼob.

17. ¿Bix u meyaj tiʼ Jéeoba u ángeloʼob yéetel máaxoʼob meyajtik utiaʼal u núukik k-oración?

¹⁷ Tiʼ Jéeobaeʼ ku meyaj le ángeloʼob bey xan máaxoʼob meyajtik way Luʼumeʼ utiaʼal u núukik k-oraciónoʼob (Hebreos 1:13, 14). Yaʼab máakoʼobeʼ tsʼoʼok u oraroʼob utiaʼal ka áantaʼak u naʼatoʼob le Bibliaoʼ. Teʼ súutukoʼ ku kʼuchul xíimbaltbiloʼob tumen u testigoʼob Jéeoba. Leloʼ ku yeʼesikeʼ le ángeloʼoboʼ ku táakpajloʼob utiaʼal u tsʼaʼabal ojéeltbil le «maʼalob baʼaloʼob ku taal tiʼ Dios» tiʼ tuláakal le Luʼumaʼ (xok Apocalipsis 14:6). Tsʼoʼoleʼ yaʼab tiʼ toʼoneʼ tsʼoʼok k-orar tiʼ Jéeoba yoʼolal junpʼéel problema, wa yoʼolal uláakʼ baʼal, ka áantaʼaboʼon  tumen juntúul sukuʼun teʼ múuchʼuliloʼ (Proverbios 12:25; Santiago 2:16).

18. ¿Bix u meyaj tiʼ Jéeoba u espíritu santo bey xan le Biblia utiaʼal u núukik k-oraciónoʼ?

¹⁸ Tiʼ Jéeobaeʼ ku meyaj xan u espíritu santo utiaʼal u núukik k-oración. Kéen k-kʼáat ka u yáantoʼon utiaʼal k-utskíintik wa baʼax problemaileʼ, tiʼ Dioseʼ jeʼel u meyajtiʼ u espíritu santo utiaʼal u nuʼuktikoʼon bey xan utiaʼal u líiʼsik k-óoleʼ (2 Corintios 4:7). Tiʼ Jéeobaeʼ ku meyaj xan le Biblia utiaʼal u yáantkoʼon k-il baʼax unaj k-beetkoʼ. Kéen k-xok le Bibliaoʼ jeʼel k-kaxtik tekstoʼob jeʼel u yáantkoʼoneʼ. Jéeoba xaneʼ jeʼel u beetik u yaʼalik wa baʼax juntúul sukuʼun teʼ muchʼtáambal utiaʼal u líiʼsik k-óoloʼ. Jeʼel xan u péeksik juntúul anciano utiaʼal u yeʼesiktoʼon junpʼéel teksto jeʼel u yáantkoʼoneʼ (Gálatas 6:1).

19. ¿Baʼaxten jeʼel k-tuklik maʼ tun núukbil k-oración tumen Jéeobaeʼ?

¹⁹ Yaan kʼiineʼ jeʼel k-kʼáatik baʼaxten Jéeobaeʼ maʼ u núuk k-oracióniʼ. Maʼ u tuʼubultoʼoneʼ u yojel baʼax súutukil yéetel bix ken u núukil k-oraciónoʼob. Letiʼeʼ u yojel baʼax kʼaʼabéettoʼon. Maʼ xaaneʼ yaan u seguer k-kʼáatik utiaʼal k-eʼesiktiʼ jach tu jaajil k-kʼáat ka u yáantoʼon yéetel yaan k-fe tiʼ letiʼ (Lucas 11:5-10). Yaan kʼiineʼ le bix u núukiktoʼonoʼ maʼ bey k-páaʼtik kaʼachiʼ. Maʼ xaaneʼ k-orar tiʼ tumen yaantoʼon junpʼéel problema, baʼaleʼ Jéeobaeʼ maʼ ten u luʼstoʼon, baʼaxeʼ chéen yaan u tsʼáaiktoʼon u muukʼil utiaʼal k-aktáantik (xok Filipenses 4:13).

20. ¿Baʼaxten mantatsʼ unaj k-orar tiʼ Jéeoba?

²⁰ Jeʼex tsʼoʼok k-kanikoʼ le oraciónoʼ junpʼéel jatsʼuts siibal u tsʼaamajtoʼon Jéeoba. Toʼoneʼ k-ojel ku yuʼubikoʼon (Salmo 145:18). Wa mantatsʼ k-orar tiʼ yéetel u jaajil k-óoleʼ maas yaan k-bisikba tu yéetel.