Ezequieleʼ tsʼokaʼaniliʼ u yilik nukuch estatuas tsʼaʼanoʼob tu yookbal le palacioʼob yéetel le temploʼoboʼ. Leloʼobaʼ tsʼaʼanoʼob bin utiaʼal u kanáantkoʼob le lugaroʼobaʼ. Le estatuasaʼ yaan u forma toro yéetel león tiʼob, yaan kaʼach u xiikʼoʼob yéetel u pool wíinik tiʼob. Úuchjeakileʼ tu luʼumil Asiria yéetel Babiloniaeʼ jach yaan le nukuch estatuas beyaʼ. Ezequieleʼ maʼ xaaneʼ jaʼakʼ u yóol yoʼolal u nojchiloʼob tumen yaneʼ seis metros u kaʼanlil kaʼachi. U jaajileʼ tak toʼon jeʼel u jaʼakʼal k-óol wa ka k-il kaʼacheʼ, tsʼoʼoleʼ chéen tuunichoʼob.

Chéen baʼaleʼ le kantúul baʼaloʼob tu yilaj Ezequieloʼ «kuxaʼanoʼob». Leloʼ jach tu beetaj u jaʼakʼal u yóol, le oʼolal tu káajbal le libro tu tsʼíibtoʼ 11 u téenel tu chʼaʼchiʼitoʼob (Eze. 1:5-22). Úuchik u yilik bix u péek le kantúul querubínoʼob yáanal le tronooʼ letiʼeʼ tu tsʼáaj cuentaeʼ Jéeobaeʼ ku páajtal u controlartik tuláakal le baʼax u beetmoʼ. Le baʼax tu yilaj Ezequieloʼ ku yeʼesiktoʼon u kiʼichkelmil, u poder yéetel le derecho yaan tiʼ Jéeoba utiaʼal u gobernaroʼ (1 Cró. 29:11).