U perdonar máakeʼ letiʼe maʼ u chaʼik u seguer u kuup tu puksiʼikʼal le baʼax beetaʼabtiʼoʼ yéetel maʼ u chʼaʼkʼuxtik le máax ofendertoʼ. Chéen baʼaleʼ lelaʼ maʼ u kʼáat u yaʼal wa yaan u beetik máak bey mix baʼal úucheʼ.

LE BIBLIAOʼ KU YAʼALIK: «Seguernak a muʼyajtikabaʼex ta baatsileʼex yéetel a perdonarkabaʼex ta baatsileʼex yéetel u jaajil a wóoleʼex kex wa yaan baʼax oʼolal u tʼaan máak tu contra uláakʼ» (Colosenses 3:13).

«Wa a yaabiltmaj wa máaxeʼ maʼ ta chʼíikil a wil chéen le baʼaxoʼob maʼ maʼalobtak ku beetkoʼ, baʼaxeʼ ka wilik le baʼaxoʼob ku beetik utiaʼal u maas maʼalobkíintik u modosoʼ» (Aaron).

Wa maʼ ta perdonareʼ jeʼel a kʼojaʼantal yéetel u lúubul a wóoleʼ, tsʼoʼoleʼ jeʼel xan u xuʼulul a biskaba maʼalob yéetel a núupeʼ.

«Juntéenjeakeʼ in wíichameʼ tu kʼáatajten perdón úuchik u beetik junpʼéel baʼal jach náakʼten. Kex maʼ chéen chʼaʼabileʼ tin perdonartaj, pero yaachaj in wóol tumen maʼ tin séeb beetiʼ, wa ka in séeb perdonart kaʼacheʼ bejlaʼa maʼ t-sen muʼyajeʼ» (Julia).

TUUKULNEN TIʼ LELAʼ

Wa a núup ku beetik u yaatal a wóoleʼ tuukulnen tiʼ lelaʼ:

• ¿Jach wa séeb in kʼuuxil?

• ¿Jach wa kʼaʼabéet u kʼáataʼalten perdón, wa jeʼel u páajtal in pʼatik chéen beyoʼ?

MÚUL TSIKBALTEʼEX LELAʼ

• ¿Bukaʼaj tiempo k-chaʼik u máan utiaʼal k-perdonartikba?

• ¿Baʼax unaj k-beetik utiaʼal k-séeb k-perdonartikba?

BEETEʼEX LELAʼ

• Wa a núup ku beetik u yaatal a wóoleʼ maʼ a jáan tuklik wa u yóoliliʼ u beeteʼ.

• Ilawil a naʼatik a núup, kʼaʼajaktecheʼ «tuláakloʼon k-tʼóochpajal yaʼab u téenel» wa k-beetik baʼaloʼob maʼ maʼalobtakiʼ (Santiago 3:2).

«Wa tu kaʼatúulaloʼon t-beetaj baʼax maʼ maʼalobeʼ maas chéen chʼaʼabil k-perdonartikba. Pero wa chéen juntúul tu beetaj baʼax maʼ unajeʼ, maas istikyaj. Utiaʼal k-perdonareʼ kʼaʼabéet humildeʼon» (Kimberly).

LE BIBLIAOʼ KU YAʼALIK: «Ilawil a séeb utskíintik le problema yaantech tu yéeteloʼ» (Mateo 5:25).