Wa maʼatech k-bisikba yéetel le máaxoʼob maʼ tu lúubultoʼon utsiloʼ yaan k-pʼektikoʼob. Tsʼoʼoleʼ wa chéen k-bisikba yéetel máaxoʼob jeʼexoʼoneʼ jeʼel k-tuklikeʼ maas maʼalob le bix k-tuukuloʼ yéetel le baʼaxoʼob k-beetkoʼ.

«Píiʼ jeʼekʼabt a puksiʼikʼaleʼex» (2 CORINTIOS 6:13).

¿Baʼax u kʼáat u yaʼale? Teʼ tekstoaʼ le tʼaan puksiʼikʼaloʼ u kʼáat u yaʼal le baʼaxoʼob k-uʼuyikoʼ. Wa chéen k-bisikba yéetel le máaxoʼob chíikaʼanoʼob tiʼ toʼonoʼ, bey jeʼex ka k-kʼal u joonajil k-puksiʼikʼaleʼ. Utiaʼal maʼ u yúuchultoʼon lelaʼ unaj k-bisikba yéetel u jejeláasil máakoʼob.

Kéen k-maas kʼaj óolt wa máaxeʼ k-naʼatik baʼaxten jelaʼan bix u beetik jujunpʼéel baʼaloʼob. Tsʼoʼoleʼ kéen k-bisba tu yéeteleʼ ku káajal k-ilik bey k-amigoeʼ. Ku káajal k-maas yaabiltik yéetel kéen kiʼimakchajak u yóol wa kéen yaachajak u yóoleʼ bey xan k-uʼuyikbaoʼ.

Koʼox ilik baʼax úuch tiʼ juntúul koʼolel ku kʼaabaʼtik Nazaré. Letiʼeʼ u pʼekmaj kaʼach le máaxoʼob táanxel tuʼux u taaloʼoboʼ. Letiʼeʼ ku yaʼalik: «Yaʼab tiempo meyajnajen tu yéeteloʼob. Beyoʼ tin tsʼáaj cuenta maʼ beyoʼob jeʼex aʼalaʼabiktenoʼ. Kéen a bisaba yéetel máaxoʼob táanxel tuʼux u taaloʼobeʼ, ku xuʼulul a tuklik baʼaloʼob kʼaastak tu yoʼolaloʼob yéetel ka maas yaabiltikoʼob».

Ilawil a tsikbal yéetel máaxoʼob táanxel tuʼux u taaloʼob, yaanal u razaʼob wa u idiomaʼob. Beet lelaʼ:

• aʼaltiʼob ka u tsikbaltoʼob wa baʼax tiʼ u kuxtaloʼob

• invitartoʼob janal

• chʼenxikintoʼob yéetel ilawil baʼax maas jatsʼuts u yilkoʼob

Kéen a wuʼuy baʼax uchaʼantiʼob ichil u kuxtaloʼobeʼ yaan a maas naʼatik bix u yuʼubikubaʼob yéetel yaan u káajal a wilik maʼ kʼasaʼanoʼobiʼ.