¿Bix úuchik u yantal tuláakal le baʼaxoʼob yaan teʼ universo bey xan le kuxtal way Luʼumoʼ? ¿Chéen wa bey anchajikoʼ wa Dios beete? Le kaʼatúul científicoʼob ku yaʼalaʼal tu káajbal le xookaʼ ku yaʼalikoʼobeʼ chéen bey anchajik le kuxtaloʼ, pero le Bibliaoʼ ku yaʼalikeʼ Dios beet tuláakal baʼal. Yaan máaxeʼ ku apoyartik le baʼax ku yaʼalik le científicoʼoboʼ, pero yaan máax xaneʼ ku apoyartik baʼax ku yaʼalik le Bibliaoʼ. Yaan máakeʼ jach ku defendertik baʼax ku creertik le oʼolal uts tu tʼaan u yaʼalik tiʼ libroʼob bey xan tiʼ televisión.

Maʼ xaaneʼ teʼ escuelaoʼ tsʼoʼok u kaʼansaʼaltech tumen le maestroʼob chéen bey anchajik tuláakal baʼaloʼ, pero ¿tu yeʼesoʼobtech wa baʼaxten bey u yaʼalikoʼoboʼ? Maʼ xaan xaneʼ a wuʼuymaj u kaʼansaʼal tumen u nuuktakil le religiónoʼob Dios beetmil tuláakal baʼaloʼ, pero ¿tu yeʼesoʼobtech wa baʼaxten bey u yaʼalikoʼoboʼ, wa chéen tu yaʼaloʼobtech kʼaʼabéet a creertik utiaʼal a weʼesik yaan a fe?

Maʼ xaaneʼ tsʼoʼok a máansik ta tuukul le baʼaloʼobaʼ yéetel ka tuklik difícil u yojéeltaʼal wa yaan Máax beetmil tuláakal baʼal. Tsʼoʼoleʼ ka tuklik waleʼ maʼ jach kʼaʼabéet u yojéeltik máakiʼ.

Le revistaaʼ yaan u yeʼesiktech jujunpʼéel baʼaloʼob tsʼoʼok u yáantik yaʼab máakoʼob u tsʼáaʼob cuenta yaan Máax beetmil tuláakal baʼal. Yaan a wilik xan baʼaxten kʼaʼabéet u yojéeltik máak bix anchajik le kuxtal way Luʼumoʼ.