¿Bix anchajik le universooʼ?

Génesis 1:1, ku yaʼalik: «Tu káajbaleʼ Dioseʼ tu beetaj le kaʼanoʼoboʼ bey xan le luʼumoʼ».

Antes tiʼ 1950, le científicoʼoboʼ ku yaʼalikoʼob kaʼacheʼ le universooʼ deporsi yaniliʼeʼ, pero bejlaʼeʼ yoʼolal le baʼaxoʼob tsʼoʼok u descubrirtaʼaloʼ u maas yaʼabil le científicoʼoboʼ tsʼoʼok u tsʼáaikoʼob cuenta yaan junpʼéel bix káajik u yantal le universooʼ.

¿Bix yanil kaʼach le Luʼumoʼ?

Génesis 1:2, 9, ku yaʼalikeʼ antes u beetaʼal le Luʼumaʼ minaʼan kaʼach u forma, mix baʼal yaniʼ tsʼoʼoleʼ chuup yéetel jaʼ.

Le baʼax ku yaʼalik le Bibliaoʼ igual yéetel le baʼaxoʼob tsʼoʼok u descubrirtik le científicoʼoboʼ. Patrick Shih, juntúul biólogoeʼ ku yaʼalikeʼ jach úucheʼ «mix baʼal ku páajtal u kuxtal way Luʼumeʼ tumen minaʼan oxígenoiʼ, tsʼoʼoleʼ jach kʼaas bix yanik tuláakal». Le revista Astronomyoʼ ku yaʼalik xaneʼ «le baʼaxoʼob tsʼoʼok u descubrirtaʼaloʼ ku yeʼesikeʼ le Luʼumaʼ chuup kaʼach yéetel jaʼ yéetel óoliʼ minaʼan kaʼach tikin luʼumiʼ».

 ¿Bix úuchik u káajal u yantal le atmósferaoʼ?

Génesis 1:3-5, ku yaʼalikeʼ jujunpʼíitil káajik u juul le sáasil yóokʼol le Luʼumaʼ yéetel páajchaj u yilaʼal le Kʼiin yéetel le Lunaoʼ (Génesis 1:14-18).

Le Centro Smithsonian de Investigaciones Ambientalesoʼ ku yaʼalikeʼ jach úucheʼ chéen masakʼ le sáasil ku kʼuchul way Luʼumoʼ tumen u mejen gotasil metano yaan kaʼach teʼ atmósferaoʼ ku formarkoʼob junpʼéel baʼal bey serenoeʼ. Ka máan kʼiineʼ tu jabuba wa despejarnaji ka túun chíikpaj u azulil le kaʼanoʼ.

¿Bix káajik u yantal le baʼaloʼob kuxaʼanoʼoboʼ?

Génesis 1:20-27, ku yaʼalikeʼ le baʼaloʼob kuxaʼanoʼoboʼ bey káajik u beetaʼaloʼobaʼ: yáaxeʼ beetaʼab u clasesil baʼalcheʼob ichil le kʼáaʼnáaboʼ, tsʼoʼoleʼ beetaʼab chʼíichʼoʼob yéetel u clasesil baʼalcheʼob teʼ Luʼumaʼ, tu tsʼook ka beetaʼab wíinik. ¿Baʼax túun ku yaʼalik le científicoʼoboʼ? Letiʼobeʼ ku yaʼalikoʼobeʼ maas úuch yanak le baʼalcheʼob teʼ kʼáaʼnáaboʼ ke le baʼalcheʼob kuxaʼanoʼob teʼ luʼumaʼ, tsʼoʼok u yilkoʼob xaneʼ tu tsʼook ka chíikpaj le wíinikoʼ.

Yaan máaxoʼobeʼ ku yaʼalikoʼobeʼ le baʼax ku yaʼalik le Bibliaoʼ ku contradecirkuba yéetel le baʼax ku yaʼalik le cienciaoʼ. Lelaʼ maases ku yúuchul tumen maʼ kʼuchuk u naʼat máak baʼax ku yaʼalik le Bibliaoʼ.

Le Bibliaoʼ maʼ tu yaʼalik wa le universo yéetel le Luʼumoʼ tsʼoʼok 6,000 años yanakoʼob. Baʼaxeʼ ku yaʼalikeʼ le universo yéetel le Luʼumoʼ beetaʼaboʼob «tu káajbal» (Génesis 1:1). Jeʼex k-ilkoʼ le Bibliaoʼ maʼatech u yaʼalik jach baʼax kʼiin ka úuchi.

Le Bibliaoʼ maʼ tu yaʼalik wa le Luʼumoʼ beetaʼab ich seis días de 24 horaʼob. Le tʼaan díaoʼ jeʼel u meyaj utiaʼal u yúuchul tʼaan tiʼ jejeláas tiempoʼob wa añoseʼ. Por ejemploeʼ ku yaʼalikeʼ teʼ «día» ka beetaʼab le kaʼan yéetel le Luʼum tumen Jéeoba Diosoʼ a letiʼe ka yanchaj le yóokʼol kaab yéetel le baʼaloʼob kuxaʼanoʼoboʼ (Génesis 2:4). Ichil le tiempo jeʼeloʼ tiaʼan le seis días ku yaʼalik u yáax capítuloil Génesisoʼ. Lelaʼ ku yeʼesikeʼ xáanchaj maas tiʼ 24 horaʼob cada junpʼéel tiʼ le seis días ku yaʼalik le Bibliaoʼ.

Le Bibliaoʼ maʼ tu yaʼalik wa le baʼaloʼob kuxaʼanoʼoboʼ maʼ tu páajtal u kʼexpajloʼob kéen máanak tiempo. U libroil Génesiseʼ ku yaʼalikeʼ beetaʼab «u clasesil baʼalcheʼob» (Génesis 1:24, 25). Le tʼaan «u clasesil» baʼalcheʼobeʼ maʼ junpʼéel tʼaan científicoiʼ, baʼaxeʼ teʼ Bibliaoʼ ku meyaj utiaʼal u yúuchul tʼaan tiʼ u jejeláasil baʼaloʼob kuxaʼanoʼob. Le baʼaloʼob kuxaʼanoʼoboʼ wa tiʼ junpʼéeliliʼ clase u taaloʼobeʼ jeʼel u páajtal u kʼexpajloʼobeʼ.

 ¿Baʼax ka tuklik?

Le Bibliaoʼ ku yaʼalik bix beetaʼabik le universooʼ, bix yanik kaʼach le Luʼumoʼ yéetel bix beetaʼabik le jejeláas baʼaloʼob kuxaʼanoʼoboʼ. Wa le Biblia fácil u tsolik bix anchajik tuláakal baʼaloʼ, ¿maʼ wa jeʼel xan u páajtal u yáantkoʼon k-naʼat Máax beet tuláakal le baʼaloʼoboʼ? Le Encyclopædia Britannicaoʼ ku yaʼalik: «U jaajileʼ yaan baʼax úuch utiaʼal u yantal le kuxtaloʼ, [...] lelaʼ igual yéetel le baʼax tsʼoʼok u descubrirtik le científicoʼob tak bejlaʼoʼ». b