¿Baʼaxten kʼaʼabéet k-ojéeltik wa yaan Máax beet tuláakal baʼal?
Tumen wa ka kʼuchuk a creert yaan Dioseʼ maʼ xaaneʼ jeʼel u taaktal a wojéeltik wa tiʼ letiʼ u taal le Bibliaoʼ. Tsʼoʼoleʼ wa ka creertik baʼax ku yaʼalik le Bibliaoʼ yaan a kʼamik le utsiloʼobaʼ.
Yaan u yantaltech kiʼimak óolal
LE BIBLIAOʼ KU YAʼALIK: «Dioseʼ [...] tu yeʼesaj u yutsil [...]. Letiʼeʼ tu beetaj u kʼáaxal jaʼ, u yichankil le cheʼoboʼ, tu tsʼáaj baʼal u jaantoʼob yéetel tu beetaj u kiʼimaktal u yóol u puksiʼikʼaloʼob» (Hechos 14:17).
BAʼAX U KʼÁAT U YAʼALE: Tuláakal le jatsʼuts baʼaloʼob beetaʼanoʼob way Luʼumeʼ u siibaloʼob Dios. Jeʼex u bin a xokik le Bibliaoʼ yaan a kanik jach u yaabiltmech.
Yaan a kanik bix jeʼel u bintech utsileʼ
LE BIBLIAOʼ KU YAʼALIK: «Techeʼ yaan a naʼatik baʼax maʼalob, baʼax toj yéetel baʼax tubeel, yaan a naʼatik baʼax u kʼáat u yaʼal u bin máak tiʼ le maʼalob bejoʼ» (Proverbios 2:9).
BAʼAX U KʼÁAT U YAʼALE: Como Dios beetmil tuláakal baʼaleʼ u yojel baʼax unaj k-beetik utiaʼal u yantaltoʼon kiʼimak óolal. Wa ka xokik le Bibliaoʼ yaan a kanik bix jeʼel u bintech utsileʼ.
Yaan a kaxtik u núukil le preguntaʼob yaantechoʼ
LE BIBLIAOʼ KU YAʼALIK: «Yaan u béeytal a kanik baʼaloʼob yaan yil yéetel Dios» (Proverbios 2:5).
BAʼAX U KʼÁAT U YAʼALE: A wojéeltik wa yaan Máax beet tuláakal baʼaleʼ yaan u yáantkech a wojéelt u núukil le preguntaʼobaʼ: ¿Baʼax oʼolal kuxaʼanoʼon? ¿Baʼaxten ku sen sufrir máak? ¿Baʼax ku yúuchul tiʼ máak kéen kíimik? Chéen le Biblia jeʼel u núukiktech le preguntaʼobaʼ.
Yaan u yantaltech esperanza
LE BIBLIAOʼ KU YAʼALIK: «Jéeobaeʼ ku yaʼalik: ‹Teneʼ in wojel baʼax ken in beet ta woʼolaleʼex, maʼ ken in taas kʼaas ta wóokʼoleʼex, baʼaxeʼ yaan in beetik u yantalteʼex jeetsʼelil, utiaʼal ka xiʼikteʼex maʼalobil yéetel utiaʼal ka béeychajak le baʼax ka páaʼtkeʼexoʼ›» (Jeremías 29:11).
BAʼAX U KʼÁAT U YAʼALE: Maʼ tun xáantaleʼ Dioseʼ yaan u xuʼulsik le kʼasaʼaniloʼ, le sufrimientooʼ yéetel le kíimiloʼ. Wa k-confiar tiʼ u promesaʼob Dioseʼ yaan u yáantkoʼon utiaʼal k-aguantartik le problemas ku yantaltoʼonoʼ.
