YAAN máakoʼobeʼ ku tuklikoʼobeʼ kʼaʼabéet u tratartaʼaloʼob maas maʼalob tiʼ u maasil. Kex ka tratartaʼakoʼob maʼalobeʼ letiʼobeʼ u kʼáatoʼob ka tsʼaʼabaktiʼob u maasil. Jach letiʼe baʼax u yaʼalmaj le Biblia kun úuchloʼ, u yaʼalmeʼ teʼ tu tsʼook kʼiinoʼoboʼ le máakoʼoboʼ yaan u tuukuloʼob chéen tu yoʼolaloʼob yéetel maʼ ken u agradecertoʼob le baʼax ku tsʼaʼabaltiʼoboʼ (2 Tim. 3:2).

Le u kaʼantal u yich máakoʼ maʼ túumbeniʼ. Por ejemploeʼ Adán yéetel Evaeʼ tu tukloʼobeʼ tiʼ letiʼobeʼ yaan u derechoil u yéeyikoʼob baʼax uts yéetel baʼax kʼaas. Yoʼolal le baʼax tu beetoʼoboʼ tuláakloʼon k-sufrir. Ka máan yaʼab años xaneʼ le rey Uzíasoʼ tu tukleʼ como reyeʼ jeʼel u páajtal u tóokik incienso teʼ templooʼ, pero u jaajileʼ maʼ letiʼ tsʼaʼab utiaʼal ka u beet le meyajaʼ (2 Cró. 26:​18, 19). Lelaʼ bey úuchik xan yéetel le fariseoʼob bey xan yéetel le saduceoʼoboʼ, letiʼobeʼ ku tuklikoʼobeʼ jach especialoʼob tumen ku taaloʼob tiʼ u paalal Abrahán (Mat. 3:9).

Teʼ kʼiinoʼobaʼ jach yaʼab máakoʼob ku taaskubaʼob nojbaʼalil, wa maʼ t-kanáantikbaeʼ jeʼel u káajal k-tuukul jeʼex letiʼobeʼ (Gál. 5:26). Maʼ xaaneʼ jeʼel u káajal k-tuklikeʼ k-merecertik ka tsʼaʼabaktoʼon junpʼéel privilegio wa ka tratartaʼakoʼon maas maʼalob tiʼ u maasil. ¿Baʼax jeʼel u yáantkoʼon utiaʼal maʼ k-tuukul beyoʼ? Yáaxeʼ kʼaʼabéet k-kanik baʼax ku tuklik Jéeoba yoʼolal le máaxoʼob ku tuukuloʼob beyoʼ. Yaan kaʼapʼéel tekstoʼob jeʼel u yáantkoʼoneʼ.

Jéeoba aʼalik baʼax unaj u tsʼaʼabal tiʼ cada juntúul máak. Koʼoneʼex ilik jujunpʼéel ejemploʼob.

•   Ichil le familiaoʼ ku páaʼtaʼaleʼ ka respetartaʼak le íichamtsil tumen u yatanoʼ, yéetel le íichamtsil xanoʼ kʼaʼabéet u yeʼesik u yaabiltmaj u yatan (Efe. 5:33). Le máaxoʼob tsʼokaʼan u beeloʼoboʼ kʼaʼabéet u yeʼeskoʼob u paklan yaabiltmubaʼob (1 Cor. 7:3). Le taatatsiloʼoboʼ kʼaʼabéet u kanáantik yéetel u yeʼeskoʼob yaabilaj tiʼ u paalaloʼob, yéetel le paalaloʼoboʼ kʼaʼabéet u yuʼubik u tʼaan u taataʼob (2 Cor. 12:14; Efe. 6:2).

• Ichil le múuchʼuliloʼ ku páaʼtaʼal ka k-respetart le ancianoʼoboʼ (1 Tes. 5:12). Pero lelaʼ maʼ u kʼáat u yaʼal wa le ancianoʼoboʼ yaan u derechoil tiʼob u controlarkoʼob tuláakal le baʼax ku beetik le sukuʼunoʼob yéetel le kiikoʼoboʼ (1 Ped. 5:​2, 3).

• Dioseʼ u tsʼaamaj u derechoil tiʼ le gobiernoʼob ka boʼotaʼak le impuesto tiʼoboʼ yéetel ka respetartaʼakoʼob (Rom. 13:​1, 6, 7).

Jéeobaeʼ jach u yaabiltmoʼon le oʼolal ku tsʼáaiktoʼon yaʼab baʼaloʼob kex maʼ t-merecertik. Tumen kʼeban máakoʼoneʼ le baʼax k-náajaltmoʼ kíimil (Rom. 6:23). Pero Jéeobaeʼ ku tsʼáaiktoʼon yaʼab bendiciónoʼob tumen jach u yaabiltmoʼon (Sal. 103:​10, 11). Tuláakal le bendiciónoʼob ku tsʼáaiktoʼonoʼ maʼ k-náajaltmiʼ. Letiʼeʼ ku beetik tumen ku chʼaʼiktoʼon óotsilil (Rom. 12:​6-8; Efe. 2:8).

Kʼaʼabéet k-kanáantikba utiaʼal maʼ k-tuukul jeʼex u máakiloʼob le yóokʼol kaabaʼ. Juntéenjeakeʼ Jesúseʼ tu tsikbaltaj junpʼéel baʼal ku yeʼesik jach séeb jeʼel u kʼastal u tuukul máakeʼ. Letiʼeʼ tʼaanaj tiʼ junjaats máakoʼob contratartaʼaboʼob desde temprano utiaʼal u meyajoʼob bul kʼiin. Le máax contratartoʼoboʼ tu yaʼalajtiʼobeʼ junpʼéel denario ken u boʼottiʼob, le máakoʼob túunoʼ tu aceptartoʼob. Chéen baʼaleʼ de tardeeʼ u yuumil le parcelaoʼ bin u contratart u maasil j-meyajoʼob. Le ka horachaj túun u boʼotkoʼobeʼ tiʼ tuláakloʼob tu tsʼáaj junpʼéel denario. Le máaxoʼob káaj u meyajoʼob desde tempranooʼ káaj u kʼuuxiloʼob, joʼopʼ u yaʼalikoʼobeʼ kʼaʼabéet u boʼotaʼaloʼob maas yaʼab tumen bul kʼiin meyajnajoʼob (Mat. 20:​1-16). Yéetel le tsikbalaʼ Jesúseʼ tu kaʼansaj tiʼ u discípuloʼobeʼ kʼaʼabéet u kiʼimaktal u yóol máak yéetel le baʼax ku tsʼaʼabaltiʼ tumen Diosoʼ.

Tsʼáa u diosboʼotikil tuláakal baʼal, maʼ a kʼáatik u maasil (1 Tes. 5:18). Beet jeʼex apóstol  Pabloeʼ letiʼeʼ kex yaan tiʼ u derechoil u kʼáatik tiʼ le sukuʼunoʼob yanoʼob Corinto le baʼaxoʼob kʼaʼabéettiʼoʼ maʼ tu beetiʼ (1 Cor. 9:​11-14). Toʼoneʼ kʼaʼabéet xan k-apreciartik le baʼaxoʼob ku tsʼaʼabaltoʼonoʼ, maʼ kʼaʼabéet k-kʼáatik u maasiliʼ.

Eʼes kabal óolal. Le máaxoʼob kaʼanal u yichoʼoboʼ u suukileʼ ku tuklikoʼobeʼ maas yaantiʼob derecho tiʼ tuláakal baʼal ke u maasil. Utiaʼal maʼ k-tuukul beyoʼ kʼaʼabéet k-eʼesik kabal óolal.

Profeta Danieleʼ jach kabal u yóol kaʼachi. Letiʼeʼ líikʼ tiʼ junpʼéel maʼalob familia, tsʼoʼoleʼ kiʼichkelem, yaan u naʼat yéetel yaʼab baʼax u yojel. Yoʼolal lelaʼ jeʼel u tuklik kaʼacheʼ ku merecertik ka tsʼaʼabaktiʼ yaʼab baʼaloʼob (Dan. 1:​3, 4, 19, 20). Pero Danieleʼ maʼ bey u tuukuliʼ, letiʼeʼ mantatsʼ tu yeʼesaj kabal u yóol, le oʼolal jach yaabiltaʼab tumen Jéeoba (Dan. 2:30; 10:​11, 12).

Jach ilawil maʼ u kaʼantal a wich jeʼex u máakiloʼob le yóokʼol kaabaʼ. Tu lugar leloʼ kiʼimakchajak a wóol yéetel le bendiciónoʼob ku tsʼáaiktech Jéeobaoʼ.