1, 2. 1) ¿Baʼaxten maʼ jelaʼan k-ilik u yantaltoʼon problemasiʼ? 2) ¿Baʼax ken k-xakʼalt teʼ xookaʼ?

 LE MÁAXOʼOB meyajtik Jéeobaoʼ u yojloʼob deporsi yaan u yantaltiʼob problemasoʼob. Tumen le Bibliaoʼ ku yaʼalik: «Yaʼab baʼaloʼob kʼaʼabéet k-muʼyajtik utiaʼal ka ookkoʼon tu Reino Dios» (Hech. 14:22). Tsʼoʼoleʼ u yojloʼob xaneʼ jujunpʼéel tiʼ le baʼaxoʼob ku muʼyajtikoʼob teʼ kʼiinoʼobaʼ chéen teʼ túumben luʼum kun yutstaloʼoboʼ. Tumen teʼeloʼ «maʼ tun yantal kíimil, mix okʼol, mix kʼiʼinamil yéetel mix máak kun muʼyaj» (Apo. 21:4).

² Kex Jéeoba maʼ tu luʼsiktoʼon le problemasoʼ ku yáantkoʼon k-aguantartoʼob. Koʼox ilik baʼax tu yaʼalaj apóstol Pablo tiʼ le sukuʼunoʼob kajaʼanoʼob kaʼach Romaoʼ. Ka tsʼoʼok u tʼaan tiʼ le baʼaxoʼob táan u aktáantik letiʼ yéetel le sukuʼunoʼoboʼ, tu yaʼalaj: «Yoʼolal le máax yaabiltoʼonoʼ táan k-tsʼáanchaʼatik tuláakal le baʼaloʼobaʼ» (Rom. 8:35-37). Le baʼax tu yaʼaloʼ ku yeʼesikeʼ Jéeobaeʼ jeʼel u beetik u bintoʼon maʼalobil kex táan k-aktáantik junpʼéel pruebaeʼ. Koʼox ilik bix tu yáantil José yéetel bix jeʼel u yáantkoʼon teʼ kʼiinoʼobaʼ.

3. ¿Bix úuchik u téek kʼexpajal u kuxtal José?

³ Tuláakal máak u yojel kaʼacheʼ Jacobeʼ jach u yaabiltmaj José (Gén. 37:3, 4). Yoʼolal leloʼ jach pʼektaʼab José tumen u sukuʼunoʼob. Le oʼolal chéen pʼelak páajchajeʼ tu konoʼob tiʼ le madianitaʼoboʼ. Le máakoʼob túunoʼ tu bisoʼob José Egipto, lelaʼ junpʼéel kaaj jach náach yanil teʼ  tuʼux kajaʼanoʼ. Teʼeloʼ tu konoʼob tiʼ Potifar, juntúul tiʼ u nojchil u soldadoʼob Faraón. Jeʼex k-ilkoʼ junsúutuk ka téek kʼexpaj u kuxtal José, kaʼacheʼ tiaʼan tu yotocheʼ yéetel jach yaabiltaʼan, pero ka tsʼoʼokeʼ esclavizartaʼab Egipto (Gén. 39:1).

4. Jeʼex Joséeʼ, ¿bey baʼaxoʼob jeʼel u yúuchultoʼoneʼ?

⁴ Le Bibliaoʼ ku yaʼalikeʼ «tiʼ tuláakal máak ku jáan úuchul wa baʼax» (Ecl. 9:11). Le oʼolal yaan kʼiineʼ ku yantaltoʼon xan problemas jeʼex le ku yantal tiʼ u maasil máakoʼoboʼ (1 Cor. 10:13). Wa maʼ xaaneʼ jeʼel k-burlartaʼal, k-pʼektaʼal wa k-chʼaʼpachtaʼal chéen tumen u discípuloʼon Jesús (2 Tim. 3:12). Jeʼel bixakeʼ Jéeobaeʼ jeʼel u yáantkoʼoneʼ. Koʼox ilik bix tu yáantil José.

5. ¿Tiʼ baʼax tu tsʼáaj cuenta Potifar? (Génesis 39:2-6).

⁵ (Xok Génesis 39:2-6). Potifareʼ tu yileʼ Joséeʼ jach yaan u naʼat yéetel maʼalob u meyaj. Letiʼeʼ tu tsʼáaj cuentaeʼ Jéeobaeʼ tiaʼan yéetel Joséeʼ yéetel «táan u beetik ka jóokʼok maʼalobil tuláakal baʼax ku beetik». b Ka máan kʼiineʼ Potifareʼ tu yaʼaleʼ chéen José kun atendertik. Tsʼoʼoleʼ tu tsʼáaj u nuʼukt tuláakal le máaxoʼob yanoʼob tu yotochoʼ. Yoʼolal leloʼ jach bendecirtaʼab Potifar.

6. ¿Bix wal u yuʼubikuba kaʼach Joséeʼ?

⁶ Jáan tsʼáaba tu lugar José. ¿Baʼax wal maas u kʼáat letiʼeʼ? ¿U kʼáat wa ta tʼaan ka ilaʼak jach maʼalob u meyaj tumen Potifar utiaʼal u lúubul utsil tiʼ? Maʼatech. Letiʼeʼ jach u kʼáat suut kaʼach yiknal u papá, tumen kex jach tsʼaʼan páajtalil tiʼeʼ láayliʼ u esclavo juntúul máak ku adorartik jejeláas diosoʼobeʼ. Jéeobaeʼ maʼ tu beetaj u xuʼulul u esclavizartaʼal Joséiʼ, baʼaxeʼ maas peorchaj le baʼax ku yúuchultiʼoʼ.

7. ¿Baʼaxten k-aʼalikeʼ maas peorchaj le baʼax úuch tiʼ Joséoʼ? (Génesis 39:14, 15).

⁷ Jeʼex u yaʼalik le capítulo 39 tiʼ Génesisoʼ u yatan Potifareʼ utschaj tu yich  José, le oʼolal sáamsamal ku yaʼaliktiʼ ka chilak tu yéetel. Pero letiʼeʼ maʼ tu yóotiʼ, le oʼolal le koʼoleloʼ jach pʼuʼuji ka joʼopʼ u yaʼalikeʼ óolak violartaʼak tumen Joséeʼ (xok Génesis 39:14, 15). Le ka tu yojéeltaj Potifareʼ tu beetaj u kʼaʼalal José cárcel, teʼeloʼ tiʼ tu máansaj wa jaypʼéel añosiʼ (Gén. 39:19, 20). ¿Bix le lugar tuʼux kʼaʼaloʼ? Le tʼaan ich hebreo meyajnaj tiʼ José utiaʼal u yaʼalik «cárceloʼ» jeʼel xan u páajtal u traducirtaʼal bey «cisterna» wa «jooleʼ». Lelaʼ u kʼáat u yaʼaleʼ le tuʼux kʼaʼaloʼ jach kʼaas yéetel éeʼjochʼeʼen (Gén. 40:15; nota). Tsʼoʼoleʼ le Bibliaoʼ ku yaʼalikeʼ junpʼéel tiempoeʼ kʼaʼax u yookoʼob José yéetel cadenaʼob yéetel tsʼaʼab fierro tu kaal (Sal. 105:17, 18). Jeʼex k-ilkoʼ maas peorchaj le baʼax úuchtiʼoʼ, tumen kaʼacheʼ juntúul esclavo yaan u páajtalil, pero tu tsʼookeʼ hasta kʼaʼal cárcel.

8. Kex wa táan u peortal le baʼax ku yúuchultoʼonoʼ, ¿baʼax k-ojel ku beetik Jéeoba?

⁸ ¿Yaan wa baʼax táan a muʼyajtik yéetel kex tsʼoʼok a sen orar tu yoʼolaleʼ ka wilik táan u maas peortal? Leloʼ jeʼel u yúuchleʼ. Jéeobaeʼ maʼ tu luʼsiktoʼon le problemas ku yantaltoʼon teʼ kʼasaʼan yóokʼol kaabaʼ (1 Juan 5: 19). Pero k-ojel táan u yilik tuláakal baʼax ku yúuchultoʼon yéetel taak u yáantkoʼon (Mat. 10:29-31; 1 Ped. 5:6, 7). Letiʼeʼ ku yaʼaliktoʼon: «Mix bikʼin ken in pʼatech yéetel mix bikʼin ken in xúumpʼattech» (Heb. 13:5). Yéetel u yáantaj Jéeobaeʼ jeʼel u páajtal k-aguantartik tak le baʼaloʼob k-tuklik minaʼan utskíinajil tiʼoʼ. Lelaʼ jach letiʼe baʼax úuch tiʼ Joséoʼ.

9. ¿Baʼax eʼesik Jéeobaeʼ tiaʼan kaʼach yéetel José teʼ kʼiinoʼob kʼalaʼan cárceloʼ? (Génesis 39:21-23).

⁹ (Xok Génesis 39:21-23). Teʼ kʼiinoʼob yaj baʼax ku aktáantik Joséoʼ Jéeobaeʼ maʼ tu pʼatiʼ. ¿Bix túun tu yáantil? Jeʼex tu beetil u lúubul utsil tiʼ Potifareʼ Jéeobaeʼ tu beetaj xan u lúubul utsil tiʼ u encargadoil le cárceloʼ. Le oʼolal maʼ xáanchaj ka tsʼaʼab u yil José u maasil máakoʼob kʼalaʼanoʼob cárceloʼ. Le Bibliaoʼ ku yaʼalikeʼ «u encargadoil le cárceloʼ maʼatech u chiʼichnaktal kaʼach yoʼolal le baʼaxoʼob u kʼubéentmaj tiʼ Joséoʼ». Yoʼolal leloʼ Joséeʼ xuʼul u tuukul tiʼ le baʼaxoʼob ku yúuchultiʼoʼ. U jaajileʼ maʼ suuk k-uʼuyik u tsʼaʼabal yaʼab autoridad tiʼ juntúul máak kʼalaʼan cárceliʼ, menos wa taak u violartik u yatan juntúul u nojchil le soldadoʼoboʼ. Chéen baʼaleʼ Génesis 39:23, ku yaʼaliktoʼon baʼaxten tsʼaʼab autoridad tiʼ José: «Jéeobaeʼ tiaʼan kaʼach yéetel Joséeʼ, tsʼoʼoleʼ [...] ku beetik kaʼach u jóokʼol maʼalobil tuláakal baʼax ku beetik».

10. ¿Baʼaxten wal ku tuklik José mix baʼal ku jóokʼol maʼalobil tiʼeʼ?

¹⁰ Koʼox kaʼa tsʼáaikba tu lugar José. Letiʼeʼ kʼaʼal cárcel yoʼolal junpʼéel baʼal maʼ jaajiʼ. A tuklikeʼ, ¿ku yuʼubik wa táan u bin jach maʼalobil tiʼ? ¿Baʼax wal jach ku tsʼíiboltikeʼ? ¿Letiʼe wa u lúubul maʼalobil tiʼ u encargadoil le cárceloʼ? Maʼatech, le baʼax maas ku tsʼíiboltik kaʼachoʼ letiʼe ka jóoʼsaʼak cárceloʼ. Hasta tu yaʼalaj tiʼ juntúul máak nukaʼaj jóoʼsbil kaʼach teʼ cárceloʼ ka tʼaanak tu yoʼolal tu táan Faraón (Gén. 40:14). Chéen baʼaleʼ le máakoʼ maʼ tu jáan aʼalaj tiʼ Faraón le baʼax aʼalaʼabtiʼ tumen Joséoʼ. Le oʼolal pʼáat dos años maas teʼ cárceloʼ (Gén. 40:23; 41:1, 14). Pero como táan u yáantaʼal José tumen Jéeobaeʼ láayliʼ maʼalob u bintiʼ kaʼacheʼ. ¿Baʼaxten k-aʼalik beyoʼ?

11. 1) ¿Baʼax páajchaj u beetik José yéetel u yáantaj Jéeoba? 2) Le páajtalil tsʼaʼabtiʼoʼ, ¿bix úuchik u yáantaj utiaʼal u béeytal baʼax u tukultmaj Jéeoba?

 ¹¹ Le tiaʼan José teʼ cárceloʼ Jéeobaeʼ tu beetaj u náaytik kaʼapʼéel baʼal le Faraónoʼ. Letiʼeʼ jach taak kaʼach u yojéeltik baʼax u kʼáat u yaʼal le baʼax tu náaytoʼ. Le oʼolaleʼ le ka tu yojéeltaj de ke José ku páajtal u yaʼalik baʼax u kʼáat u yaʼal le náayoʼoboʼ tu túuxtaj tʼanbil. Yéetel u yáantaj Jéeobaeʼ Joséeʼ tu yaʼalaj baʼax u kʼáat u yaʼal le náayoʼoboʼ yéetel baʼax unaj u beetik Faraón. Lelaʼ jach tu beetaj u jaʼakʼal u yóol Faraón, letiʼeʼ tu tsʼáaj cuentaeʼ táan kaʼach u yáantaʼal José tumen Jéeoba. Le oʼolal tu tsʼáaj u nuʼukt tuláakal le baʼax yaan Egiptooʼ (Gén. 41:38, 41-44). Ka máan kʼiineʼ pʼáat minaʼan baʼal jaantbil Egipto yéetel Canaán, le tuʼux kajaʼan kaʼach u familia Joséoʼ. Chéen baʼaleʼ yoʼolal le puesto yaan kaʼach tiʼ Joséoʼ páajchaj u salvartik u familia, le tuʼux kun taal kaʼach le Mesíasoʼ.

12. ¿Baʼaxoʼob tu sen beetaj Jéeoba yoʼolal José?

¹² Máans ta tuukul bix sen kʼexpajik u kuxtal José. ¿Máax beet u lúubul utsil tiʼ Potifar? ¿Máax beet u lúubul utsil tiʼ u encargadoil le cárceloʼ utiaʼal ka tsʼaʼabak u nuʼukt u maasil le máaxoʼob kʼalaʼanoʼoboʼ? ¿Máax beet u náaytik le kaʼapʼéel baʼaloʼob Faraónoʼ yéetel máax tsʼáa u páajtalil tiʼ José utiaʼal u yaʼalik baʼax u kʼáat u yaʼaloʼob? ¿Máax péeks Faraón utiaʼal u tsʼáaik José u nuʼukt le baʼaloʼob yaan Egiptooʼ? (Gén. 45:5). Jach chíikaʼan u yilaʼal Jéeoba beet u bin utsil tiʼ José. Jeʼex túun k-ilkoʼ le baʼax jach kʼaas u tukultmaj u beetik u sukuʼunoʼob Joséoʼ Jéeobaeʼ tu sutaj junpʼéel bendición utiaʼal u kaajal.

13. ¿Ku salvarkoʼon wa Jéeoba tiʼ tuláakal le baʼaxoʼob ku yúuchultoʼonoʼ?

¹³ ¿Baʼax ku kaʼansiktoʼon u tsikbalil u kuxtal José? Ku kaʼansiktoʼoneʼ Jéeobaeʼ maʼ tu salvarkoʼon tiʼ tuláakal le baʼaxoʼob kʼaastak ku yúuchultoʼonoʼ. Yéetel maʼ tu beetik u bintoʼon kʼaasil chéen utiaʼal u béeykuntik baʼax u tukultmaj (Ecl. 8:9; 9:11). Pero k-ojleʼ kéen tsʼaʼabkoʼon  a pruebaileʼ Jéeobaeʼ u yojel baʼax ku yúuchultoʼon yéetel ku chʼenxikintikoʼon kéen k-kʼáat áantaj tiʼ (Sal. 34:15; 55:22; Isa. 59:1). Pero maʼ chéen leloʼ, letiʼeʼ ku yáantkoʼon xan le kéen yanaktoʼon problemas. ¿Bix túun u beetik?

14. ¿Bix u yáantkoʼon Jéeoba kéen yanaktoʼon problemas?

¹⁴ Jéeobaeʼ ku líiʼsik k-óol jach teʼ súutukil kʼaʼabéettoʼonoʼ (2 Cor. 1:3, 4). Lelaʼ bey tu yilil Eziz, juntúul sukuʼun kajaʼan Turkmenistán. Letiʼeʼ kʼaʼal dos años cárcel yoʼolal le baʼaxoʼob ku creerkoʼ. Le sukuʼunoʼ ku tsikbaltik: «Tu kʼiinil le juiciooʼ juntúul sukuʼuneʼ tu yeʼesajten Isaías 30:15. Teʼeloʼ ku yaʼalik: ‹Wa ka pʼáatleʼex tranquiloil yéetel ka weʼeskeʼex a kʼubmaj a wóoleʼex tiʼ teneʼ yaan u yantal a muukʼeʼex›. Le baʼax ku yaʼalik le tekstooʼ tu yáanten utiaʼal in pʼáatal tranquilo yéetel utiaʼal in confiar tiʼ Jéeoba. In tuukul tiʼ le baʼax ku yaʼalikoʼ tu tsʼáajten u muukʼil utiaʼal in aguantartik tuláakal le tiempo kʼalaʼanenoʼ». ¿Kʼajaʼan wa tech le ka tu líiʼsaj a wóol Jéeoba yéetel tu yáantech jach teʼ súutukil kʼaʼabéetoʼ?

15, 16. ¿Baʼax k-kanik tiʼ le baʼax úuch tiʼ Torioʼ?

¹⁵ U suukileʼ hasta kéen tsʼoʼokok junpʼéel prueba k-tsʼáaik cuenta bix tu yáantiloʼon Jéeoba. Bey tu yilil kiik Torioʼ. Mason, u hijoeʼ seis años tsaʼayak cáncer tiʼ ka kíimi. Torieʼ tu yuʼubaj bey táan u yeʼetsʼel u puksiʼikʼaleʼ. Letiʼeʼ ku yaʼalik: «Utiaʼal juntúul maamatsileʼ le baʼax maas yajoʼ letiʼe ka kíimik juntúul u hijooʼ». Ku yaʼalik xan: «In waʼalikeʼ tuláakal le taatatsiloʼoboʼ ku tuklikoʼobeʼ maas jeʼel u aguantarkoʼob u sufriroʼobeʼ ke ka u yiloʼob u sufrir juntúul u hijo».

¹⁶ Kex jach yaj le baʼax úuchtiʼoʼ ka máan  kʼiineʼ Torieʼ tu tsʼáaj cuenta bix úuchik u yáantaʼal tumen Jéeoba. Letiʼeʼ ku yaʼalik: «Le kéen in kʼaʼajs le kʼiinoʼob kʼojaʼan Masonoʼ kin tsʼáaik cuenta bix úuchik u yantal Jéeoba tin wiknal. Kʼajaʼanteneʼ yaan kʼiinoʼobeʼ maʼ tu páajtal kaʼach u kʼamik uʼulaboʼob tumen jach táaj débil, chéen baʼaleʼ le sukuʼunoʼoboʼ ku viajaroʼob dos horas utiaʼal u taaloʼob teʼ hospitaloʼ. Mantatsʼ yaan máax kaʼach teʼ hospital utiaʼal u yáantkoʼonoʼ. Le sukuʼunoʼoboʼ tu yáantoʼon xan yéetel taakʼin. Tak teʼ súutukiloʼob maas yaj baʼax ku yúuchultoʼonoʼ maʼ tu beetajtoʼon falta mix baʼaliʼ». Jéeobaeʼ tu yáantaj Tori yéetel Mason u aguantartoʼob le baʼax ku yúuchultiʼoboʼ (ilawil le cuadro « Jéeobaeʼ tu tsʼáaj le baʼax kʼaʼabéettoʼonoʼ»).

17, 18. ¿Baʼax unaj k-beetik utiaʼal k-ilik bix u yáantkoʼon Jéeoba le kéen yanaktoʼon pruebas? (Salmo 40:5).

¹⁷ (Xok Salmo 40:5). Le kéen u beet u yotoch máakeʼ ku beetik yéetel u tuukulil u tsʼoʼoksik utiaʼal u máan kajtaliʼ. Chéen baʼaleʼ le táan u beetkoʼ maʼalob ka jáan jeʼelek utiaʼal u tuukul tiʼ le bukaʼaj meyaj tsʼoʼok u beetkoʼ. Lelaʼ jeʼel xan u páajtal k-beetik kéen yanaktoʼon junpʼéel pruebaeʼ. Jeʼel u páajtal k-jáan jeʼelel k-tukult bix táan u yáantkoʼon Jéeobaeʼ. Maʼalob ka k-tukle: «¿Bix tsʼoʼok u yáantken Jéeoba teʼ kʼiinaʼ? Kex láayliʼ yaanten le pruebaoʼ, ¿bix táan u yáantken Jéeoba utiaʼal in aguantartik?». Sáamsamaleʼ jáan jeʼelen a tukult bix tsʼoʼok u yáantkech Jéeoba teʼ kʼiinoʼ.

¹⁸ U jaajileʼ maʼ kʼaas ka k-kʼáat tiʼ Jéeoba ka u luʼs le prueba yaantoʼonoʼ (Fili. 4:6). Chéen baʼaleʼ kʼaʼabéet xan k-ilik bix táan u yáantkoʼon utiaʼal k-aktáantik le pruebaoʼ. Kʼaʼajaktoʼoneʼ Jéeobaeʼ u prometermaj u tsʼáaiktoʼon muukʼ yéetel u yáantkoʼon k-aguantart le baʼax ku yúuchultoʼonoʼ. Le oʼolaleʼ mantatsʼ kʼaʼabéet k-tsʼáaik gracias tiʼ. Wa k-beetkeʼ yaan k-tsʼáaik cuenta bix u yáantkoʼon Jéeoba le kéen yanaktoʼon pruebas jeʼex tu beetil yéetel Joséoʼ (Gén. 41:51, 52).