Jeʼex tsʼoʼok k-ilik teʼ revistaaʼ Dioseʼ jach taʼaytak u xuʼulsik tiʼ le kʼasaʼan yóokʼol kaabaʼ bey xan tiʼ le baʼaxoʼob beetik u muʼyaj máakoʼ. ¿Baʼaxten k-ojel jach taʼaytak u beetik? Tumen le Bibliaoʼ ku yaʼalik:

«Le yóokʼol kaabaʼ táan u bin u xuʼulultiʼ» (1 JUAN 2:17).

Chéen baʼaleʼ k-ojel yaan máaxoʼob ken u salvartubaʼob tumen le tekstooʼ ku seguer u yaʼalik:

«Le máax ku beetik baʼax u kʼáat Dioseʼ yaan u pʼáatal utiaʼal mantatsʼ».

Jeʼex k-ilkoʼ utiaʼal u salvarkuba máakeʼ kʼaʼabéet u yuʼubik u tʼaan Dios. Chéen baʼaleʼ utiaʼal u páajtal u beetik leloʼ yáaxeʼ kʼaʼabéet u kʼaj óoltik.

Jesúseʼ tu yaʼalaj: «Lelaʼ letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ» (Juan 17:3). Utiaʼal k-salvartikba yéetel utiaʼal k-kuxtal teʼ túumben luʼumoʼ kʼaʼabéet k-kʼaj óoltik Dios. Maʼ chéen unaj k-aʼalik k-creertik yaan Dios yéetel k-ojéeltik jujunpʼéel wa baʼax tu yoʼolaliʼ baʼaxeʼ unaj k-bisikba tu yéetel. Chéen baʼaleʼ utiaʼal leloʼ kʼaʼabéet k-jóoʼsik tiempo utiaʼal k-kʼaj óoltik tubeel. Koʼoneʼex ilik jujunpʼéel baʼax ku yaʼalik le Biblia jeʼel u yáantkoʼon k-bisba maʼalob yéetel Diosoʼ.

U jaajileʼ utiaʼal k-kuxtaleʼ kʼaʼabéet k-janal sáamsamal, chéen baʼaleʼ Jesúseʼ tu yaʼalaj: «Máakeʼ maʼ chéen yéetel waaj unaj u kuxtaliʼ, baʼaxeʼ unaj u kuxtal yéetel tuláakal baʼax ku yaʼalik Jéeoba» (Mateo 4:4).

Teʼ kʼiinoʼobaʼ Jéeobaeʼ ku tʼankoʼon yéetel le Bibliaoʼ. Kéen k-xokeʼ k-kanik baʼaxoʼob tu beetaj úuchjeakil, baʼax táan u beetik beoraaʼ yéetel baʼax ken u beet ichil junpʼíit kʼiin.

Maʼ xaaneʼ taak k-beetik baʼax uts tu tʼaan Dios, chéen baʼaleʼ maʼ chéen chʼaʼabil k-pʼatik junpʼéel baʼax maʼ maʼalob k-beetkiʼ. ¿Baʼax jeʼel u yáantkoʼoneʼ? Letiʼe k-kʼaj óoltik tubeel Diosoʼ.

Koʼoneʼex ilik baʼax úuch tiʼ juntúul koʼolel kajaʼan Asia. Letiʼeʼ jach kʼaas bix u kuxtal kaʼachi, chéen baʼaleʼ le ka káaj u xokik le Bibliaoʼ tu kaneʼ unaj u ‹púutsʼul tiʼ le núupkʼebanoʼ› (1 Corintios 6:18). Le koʼolelaʼ tu kʼáataj áantaj tiʼ Dioseʼ ka tu kʼexaj u kuxtal, chéen baʼaleʼ láayliʼ ku kanáantik maʼ u kaʼa lúubul tiʼ le baʼax kʼaas ku beetik kaʼachoʼ. Letiʼeʼ ku yaʼalik: «Le kéen in wuʼuy taak in beetik baʼax maʼ maʼalobeʼ kin kʼáatik tiʼ Jéeoba ka u yáanten, tumen in wojel tin juunaleʼ maʼ tin páajtal. Le oraciónoʼ jach tsʼoʼok u natsʼken yiknal Jéeoba». Bejlaʼeʼ u millonesil máakoʼob táan u kʼaj óoltikoʼob Dioseʼ táan xan u yáantaʼaloʼob u kʼex u kuxtaloʼob yéetel u beetoʼob baʼax uts tu tʼaan Dios (Filipenses 4:13).

Wa k-ilik k-maas kʼaj óoltik Dioseʼ letiʼeʼ yaan xan u kʼaj óoltikoʼon yéetel yaan u biskuba t-éetel (Gálatas 4:9; Salmo 25:14). Beyoʼ yaan k-salvartikba kéen xuʼulsaʼak tiʼ le kʼasaʼan yóokʼol kaabaʼ yéetel yaan u béeytal k-kuxtal teʼ túumben luʼumoʼ. Le xook ku segueroʼ yaan u tsolik bix le túumben luʼumoʼ.