«Maʼ a weenleʼex, tumen maʼ a wojleʼex mix u kʼiinil mix u yorailiʼ» (MATEO 25:13).

«Maʼ u náayal a wóoleʼex yéetel maʼ a weenleʼex, tumen maʼ a wojleʼex baʼax kʼiin ken kʼuchuk le kʼiin aʼalaʼanoʼ» (MARCOS 13:33).

Lelaʼ ku yeʼesikeʼ mix máak u yojel jach baʼax kʼiin kéen xuʼulsaʼak tiʼ le kʼasaʼan yóokʼol kaabaʼ. Chéen Dios u yojel «u kʼiinil yéetel u yorail» (Mateo 24:36). Chéen baʼaleʼ jeʼel u páajtal k-ojéeltik wa tsʼoʼok u náatsʼal u kʼiinileʼ. Jesúseʼ tu yaʼalaj tiʼ u discípuloʼob jujunpʼéel baʼaloʼob kun eʼesik tsʼoʼok u náatsʼal u kʼiinil u xuʼulsaʼal le kʼasaʼan yóokʼol kaabaʼ.

Le señaloʼoboʼ ku yeʼesikeʼ taʼaytak u tsʼoʼokol tiʼ le yóokʼol kaabaʼ. Jesúseʼ tu yaʼalaj: «Junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino, yaan u pʼáatal minaʼan baʼal jaantbil yéetel jejeláas tuʼux ken u tíituba le luʼumoʼ» (Mateo 24:3, 7). Tsʼoʼoleʼ tu yaʼalaj xaneʼ «yaan u yantal kʼaakʼas kʼojaʼaniloʼob» (Lucas 21:11). ¿Máasaʼ táan u béeychajal le baʼax tu yaʼalaj Jesúsaʼ?

Teʼ kʼiinoʼobaʼ yaʼab máakoʼobeʼ táan u muʼyajoʼob yoʼolal le guerraʼoboʼ, le wiʼijiloʼ, le terremotoʼoboʼ yéetel le kʼojaʼaniloʼoboʼ. Jeʼex tu añoil 2004, yanchaj junpʼéel terremoto teʼ océano Índicooʼ ka tu beetaj u yantal junpʼéel tsunami, tu yoʼolal leloʼ kíim óoliʼ 225,000 máakoʼob. Ichil junpʼíit maas tiʼ junpʼéel añoeʼ le COVID-19, tu kíimsaj óoliʼ 7 millones máakoʼob tiʼ tuláakal yóokʼol kaab. Jesúseʼ tu yaʼaleʼ le baʼaloʼobaʼ yaan u yeʼesik jach taʼaytak u xuʼulsaʼal tiʼ le kʼasaʼan yóokʼol kaabaʼ.

Le Bibliaoʼ ku yaʼalikeʼ antes tiʼ u xuʼulsaʼal tiʼ le kʼasaʼan yóokʼol kaabaʼ yaan u yantal junpʼéel tiempo ku kʼaabaʼtik «u tsʼook kʼiinoʼob» (2 Pedro 3:3, 4). Jeʼex u yaʼalik Kaʼapʼéel tiʼ Timoteo 3:1 tak 5, teʼ tu tsʼook kʼiinoʼoboʼ le máakoʼoboʼ jach yaan u kʼastaloʼob (ilawil le cuadro « Le jach taʼaytak u xuʼulsaʼal tiʼ le kʼasaʼan yóokʼol kaabaʼ»). ¿Máasaʼ le máakoʼob teʼ kʼiinoʼobaʼ ku kaxtik chéen u yutsiloʼob, kʼasaʼanoʼob, u yaabiltmoʼob taakʼin yéetel maʼatech u tratarkoʼob maʼalob u maasil? Lelaʼ ku yeʼesik xaneʼ jach natsʼaʼan u kʼiinil u xuʼulsaʼal tiʼ le kʼasaʼan yóokʼol kaabaʼ.

¿Bukaʼaj kun xáantal u tsʼook kʼiinoʼoboʼ? Le Bibliaoʼ ku yaʼalikeʼ jach maʼ tun xáantal. Dioseʼ yaan u «xuʼulsik tiʼ le máaxoʼob táan u kʼaskúuntikoʼob le luʼumoʼ» (Apocalipsis 11:15-18; 12:12).

Dioseʼ u tsʼaamaj u kʼiinil yéetel u yorail utiaʼal u xuʼulsik tiʼ le kʼasaʼan yóokʼol kaabaʼ (Mateo 24:36). Chéen baʼaleʼ «maʼ u kʼáat ka xuʼulsaʼak tiʼ mix máakiʼ» (2 Pedro 3:9). Le oʼolaleʼ ku tsʼáaiktoʼon u oportunidadil k-kʼaj óoltik yéetel k-uʼuyik u tʼaan. ¿Baʼaxten? Tumen letiʼeʼ maʼ u kʼáat ka xuʼulsaʼakoʼoniʼ baʼaxeʼ u kʼáat ka kuxlakoʼon teʼ túumben luʼumoʼ.

Dioseʼ tsʼoʼok u beetik tuláakal le ku páajtal utiaʼal u kaʼansik tiʼ le máakoʼob baʼax kʼaʼabéet u beetkoʼob utiaʼal u kuxtaloʼob teʼ túumben luʼumoʼ. Jesúseʼ tu yaʼaleʼ «le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab» (Mateo 24:14). Tiʼ tuláakal yóokʼol kaabeʼ u testigoʼob Jéeobaeʼ ku máanskoʼob u millonesil horaʼob táan u kaʼanskoʼob tiʼ le máakoʼob le jatsʼuts baʼaloʼob ku kaʼansik le Bibliaoʼ. Jesúseʼ tu yaʼaleʼ le meyajaʼ yaan u beetaʼal tiʼ tuláakal yóokʼol kaab, kéen tsʼoʼokkeʼ ku taal u xuul.

Jeʼex tsʼoʼok k-ilkoʼ jach taʼaytak u xuʼulul u gobernar le máakoʼob way yóokʼol kaabeʼ. Chéen baʼaleʼ jach kiʼimak k-óol k-ojéeltikeʼ jeʼel u páajtal k-salvartikba kéen xuʼulsaʼak tiʼ le yóokʼol kaabaʼ, yéetel yaan u páajtal k-kuxtal teʼ Paraísooʼ. Teʼ tuláakʼ xookoʼ yaan u tsoʼolol baʼax kʼaʼabéet k-beetik utiaʼal k-kuxtal teʼ túumben luʼumoʼ.