LE MÁAKOʼOBOʼ

¿Baʼax ku yaʼalik le Bibliaoʼ? Dioseʼ tu beetaj le Luʼumoʼ «utiaʼal u kajtal máakoʼobiʼ» (ISAÍAS 45:18).

LE LUʼUMAʼ

¿Baʼax ku yaʼalik le Bibliaoʼ? «Junpʼéel generación ku bin, junpʼéel generación ku taal, pero le luʼumaʼ yaan u pʼáatal utiaʼal mantatsʼ» (ECLESIASTÉS 1:4).

¿BAʼAX U KʼÁAT U YAʼALE? Le Bibliaoʼ ku yaʼalikeʼ le Luʼumaʼ mix bikʼin kun xuʼulsbil yéetel mantatsʼ kun kajtal máakoʼobiʼ. ¿Baʼax túun u kʼáat u yaʼal u xuʼulsaʼal tiʼ le yóokʼol kaabaʼ?

TUKULTE: Le Bibliaoʼ ku yaʼalikeʼ le yóokʼol kaab yaan bejlaʼaʼ yaan u xuʼulsaʼal jeʼex xuʼulsaʼabik le yóokʼol kaab tu kʼiiniloʼob Noéoʼ. Teʼ kʼiinoʼoboʼ le Luʼumoʼ chuʼup yéetel «baʼaloʼob kʼaastak» (Génesis 6:13). Chéen baʼaleʼ Noéeʼ tu beetaj baʼax maʼalob tu táan Dios, le oʼolal salvartaʼab letiʼ yéetel u familia, pero xuʼulsaʼab tiʼ le kʼasaʼan máakoʼoboʼ. Le Bibliaoʼ ku yaʼalik: «Le jaʼoʼ letiʼe baʼax meyajnaj utiaʼal u xuʼulsaʼal tiʼ le úuchben yóokʼol kaab le ka beetaʼab u búululoʼ» (2 Pedro 3:6). Bey xuʼulsaʼabik le yóokʼol kaab teʼ kʼiinoʼob jeʼeloʼ. Jeʼex k-ilkoʼ maʼ xuʼulsaʼab tiʼ le Luʼumoʼ baʼaxeʼ tiʼ le kʼasaʼan máakoʼoboʼ. Leloʼ ku yeʼesiktoʼoneʼ le kéen u yaʼal le Biblia yaan u xuʼulsaʼal tiʼ le yóokʼol kaaboʼ maʼ táan u yaʼalik wa yaan u xuʼulsaʼal tiʼ le Luʼumaʼ baʼaxeʼ táan u yaʼalikeʼ yaan u xuʼulsaʼal tiʼ le kʼasaʼan máakoʼoboʼ.

LE PROBLEMASOʼ BEY XAN LE KʼASAʼANILOʼ

¿Baʼax ku yaʼalik le Bibliaoʼ? «Ichil junpʼíit kʼiineʼ maʼ kun antal kʼasaʼan máakoʼob. Kéen paakatnakech tuʼux suuk u yantaloʼob kaʼachoʼ maʼ ken a wiloʼobiʼ. Pero le utsul máakoʼoboʼ yaan u pʼáatloʼob way luʼumeʼ, jach yaan u kiʼimaktal u yóoloʼob tumen mix baʼal kun beetik u chiʼichnaktaloʼob» (SALMO 37:10, 11).

¿BAʼAX U KʼÁAT U YAʼALE? Le Diluvio taal tu kʼiiniloʼob Noéoʼ maʼ tu xuʼulsaj tiʼ tuláakal le kʼasaʼaniloʼ. ¿Baʼaxten k-aʼalik leloʼ? Tumen le ka máan kʼiineʼ kaʼa kʼaschaj le máakoʼoboʼ. Chéen baʼaleʼ Dioseʼ yaan u kʼuchul u kʼiinil u xuʼulsik tiʼ tuláakal le kʼasaʼaniloʼ. Jeʼex u yaʼalik le Bibliaoʼ «maʼ kun antal kʼasaʼan máakoʼob». Leloʼ ku yeʼesikeʼ u gobierno Dios yaan teʼ kaʼanoʼ yaan u xuʼulsik tiʼ le kʼasaʼaniloʼ yéetel yaan u nuʼuktik le utsul máakoʼob kun pʼáatloʼob way Luʼumeʼ.

TUKULTE: ¿Baʼax ken u beet le máaxoʼob ku gobernaroʼoboʼ? ¿Yaan wa u apoyarkoʼob u Reino Dios? Le Bibliaoʼ ku yaʼalikeʼ maʼatech, baʼaxeʼ yaan u tsʼáaikubaʼob tu contra (Salmo 2:2). ¿Baʼax túun ken u beet u Reino Dios? Yaan u xuʼulsik tiʼ tuláakal le gobernanteʼoboʼ, beyoʼ «chéen letiʼ kun pʼáatal utiaʼal mantatsʼ» (Daniel 2:44). ¿Baʼaxten kʼaʼabéet u xuʼulul u gobernartaʼal le Luʼum tumen wíinikoʼ?

¿Baʼax ku yaʼalik le Bibliaoʼ? «Máakeʼ maʼ tu páajtal mix tak u yéeyik tuʼux kun xíimbal» (JEREMÍAS 10:23).

¿BAʼAX U KʼÁAT U YAʼALE? Wíinikeʼ maʼ beetaʼab utiaʼal u nuʼuktikuba tu juunaliʼ, le oʼolaleʼ maʼ tu páajtal u nuʼuktik uláakʼ máakoʼob yéetel u yutskíintik le problemas yaantiʼoboʼ.

TUKULTE: Junpʼéel enciclopediaeʼ ku yaʼalikeʼ «le gobiernoʼoboʼ maʼ tu páajtal u xuʼulskoʼob tiʼ le óotsililoʼ, le wiʼijiloʼ, le kʼojaʼaniloʼoboʼ, le guerraʼoboʼ, le ciclónoʼoboʼ, le terremotoʼoboʼ yéetel uláakʼ baʼaloʼob beyoʼ». Tsʼoʼoleʼ ku yaʼalik: «Jujuntúul máakoʼobeʼ [...] ku tuklikoʼobeʼ wa ka yanak chéen junpʼéel gobierno tiʼ tuláakal yóokʼol kaabeʼ jeʼel u xuʼulsik tiʼ le baʼaloʼobaʼ» (Britannica Academic). Chéen baʼaleʼ leloʼ maʼ jaajiʼ tumen tak wa ka u muchʼuba tuláakal le gobiernoʼoboʼ láayliʼ kʼebanoʼobeʼ, le oʼolal maʼ tu páajtal u yutskíintikoʼob tuláakal le problemas yaan way yóokʼol kaabeʼ. Chéen u Reino Dios jeʼel u páajtal u yutskíintik tuláakal le baʼaxoʼob ku muʼyajtik wíinikoʼ.

Jeʼex k-ilkoʼ le utsul máakoʼoboʼ maʼ unaj u sajaktaloʼob kéen u yaʼal le Biblia yaan u xuʼulsaʼal tiʼ le yóokʼol kaabaʼ tumen leloʼ ku yeʼesikeʼ yaan u xuʼulsaʼal tiʼ le kʼasaʼan máakoʼoboʼ yéetel yaan u yantal junpʼéel túumben luʼum.

¿Baʼax kʼiin ken úuchuk leloʼ? Teʼ tuláakʼ xookoʼ yaan k-ilik baʼax ku yaʼalik le Bibliaoʼ.