Yaan. ¿Bix úuchik u yantaloʼob? Ka beetaʼab le angeloʼob tumen Diosoʼ tsʼaʼab u páajtalil u yéeyikoʼob baʼax ken u beetoʼob. Le maʼ úuch beetaʼak Adán yéetel Evaoʼ juntúul angeleʼ tu tsʼáajuba tu contra Dios, ka tu yoksaj xan tu tuukul le yáax wíinikoʼob ka u beetoʼob beyoʼ (Génesis 3:1-7; Apocalipsis 12:9). Le Bibliaoʼ maʼatech u yaʼalik u kʼaabaʼ le angelaʼ mix le meyaj ku beetik antes u tsʼáaikuba tu contra Diosoʼ. Chéen baʼaleʼ ka tsʼoʼok u kʼebantaleʼ tsʼaʼab u kʼaabaʼt Satanás wa «juntúul máax ku tsʼáaikuba tu contra uláakʼ», tu kʼaabaʼtaj xan Kʼaasilbaʼal wa «j-líiʼsaj tʼaan» (Mateo 4:8-11).

Bey úuchik u kaajal u kʼastal le angeloʼoboʼ. Tu kʼiiniloʼob Noeeʼ yaʼab angeloʼob «lukʼoʼob teʼ tuʼux unaj u kajtaloʼoboʼ» ka taaloʼob way Luʼumeʼ. Letiʼobeʼ tu sutubaʼob bey wíinikoʼob chéen utiaʼal u kʼebankúuntkubaʼob yéetel le koʼoleloʼoboʼ, tu tuʼubsoʼob baʼax oʼolal beetaʼaboʼob (Judas 6; Génesis 6:1-4; 1 Pedro 3:19, 20).

¿Tuʼux tsʼoʼok le kʼasaʼan angeloʼobaʼ? Ka tu xuʼulsaj Dios le kʼasaʼanil yéetel le Diluviooʼ tu kaʼa sutubaʼob angelileʼ ka suunajoʼob teʼ kaʼanoʼ. Chéen baʼaleʼ Dioseʼ maʼ tu chaʼaj tiʼ le kʼasaʼan angeloʼob wa demonioʼob u kuxtaloʼob jeʼex kaʼacheʼ. Baʼaxeʼ «tsʼaʼaboʼob ich éeʼjochʼeʼenil», wa bey kʼaʼaloʼob teʼ Tartarooʼ (Judas 6; 2 Pedro 2:4). Satanás «u nojchil le demonioʼoboʼ», le oʼolal letiʼ nuʼuktikoʼob (Mateo 12:24). Letiʼeʼ mantatsʼ táan «u yeʼeskuba bey juntúul u angelil sáasileʼ» (2 Corintoiloʼob 11:14).

Le Bibliaoʼ ku yaʼalikeʼ u Reino Dioseʼ káaj u gobernar 1914. * Le ka káajeʼ jóoʼsaʼab Satanás yéetel u demonioʼob teʼ kaʼanoʼ ka puʼuloʼob way Luʼumeʼ. Le bukaʼaj baʼaloʼob kʼaastak ku yúuchul teʼ kʼiinoʼobaʼ ku yeʼesik bukaʼaj kʼasaʼanil le demonioʼoboʼ (Apocalipsis 12:9-12).

Le baʼaxoʼob kʼaastak ku yúuchul teʼ kʼiinoʼobaʼ ku yeʼesik maʼ tun xáantal ken xuʼulsaʼak le kʼasaʼan demonioʼoboʼ. U Reino Dioseʼ maʼ ken u chaʼa u seguer u beetkoʼob baʼaloʼob kʼaastak, yaan u sutik Paraísoil le Luʼumaʼ yéetel mil años kun reinar. Ken tsʼoʼokok le mil añosoʼ le demonioʼoboʼ yaan u yóotik u túuntoʼob u yóol máak, chéen baʼaleʼ ken tsʼoʼokok lelaʼ yaan u xuʼulsaʼaloʼob junpuliʼ (Mateo 25:41; Apocalipsis 20:1-3, 7-10).