TIʼ U YÁAX TÁAN JUʼUNIL | U JAAJIL YOʼOLAL U KAJNÁALILOʼOB KAʼAN
¿Máaxoʼob kajaʼanoʼob teʼ kaʼanoʼ?
¿A máansmaj wa ta tuukul bix le kuxtal teʼ kaʼanoʼ? Desde úuchjeakileʼ yaʼab máakoʼob tsʼoʼok u tuklikoʼob leloʼ. Yaan máax tuklikeʼ teʼ kaʼan kajaʼan k-úuchben láakʼtsiloʼob tsʼoʼok u kíimloʼoboʼ yéetel kʼaʼabéet k-respetartikoʼob. Uláakʼoʼobeʼ ku tuklikoʼobeʼ le kaʼanoʼ junpʼéel lugar tuʼux yaan kiʼimak óolal, yéetel tiʼ kajaʼan angeloʼob yéetel utsul máakoʼob tsʼoʼok u kíimloʼobiʼ. Yaan xan máax aʼalikeʼ le kaʼanoʼ letiʼe lugar tuʼux kajaʼan u millonesil diosoʼoboʼ.
Yaʼab máax aʼalikeʼ maʼ tu páajtal k-ojéeltik mix baʼal yoʼolal le kaʼanoʼ, tumen mix máak bin naʼakak yéetel éemek utiaʼal u yaʼaliktoʼon bix le kuxtal teʼeloʼ. Pero lelaʼ maʼ jaajiʼ tumen Jesús, máax kajaʼan kaʼach teʼ kaʼanoʼ, éem way Luʼumeʼ. Letiʼeʼ juntaatsʼ úuchik u yaʼalik tiʼ le máaxoʼob nuʼuktik le religionoʼob teʼ yáax siglooʼ: «Tsʼoʼok in wéemel teʼ kaʼan utiaʼal in beet le baʼax u kʼáat le máax túuxtenoʼ». Jesuseʼ jach u yilmaj le baʼax tu yaʼalaj tiʼ u apostoloʼobaʼ: «Tu yotoch in Taataeʼ yaʼab kúuchiloʼob yaan» (Juan 6:38; 14:2).
Jeʼex ojéelaʼaniloʼ u Taata Jesuseʼ Jéeoba Dios, yéetel u yotocheʼ tiaʼan teʼ kaʼanoʼ (Salmo 83:18, Traducción del Nuevo Mundo de las Santas Escrituras). Chéen Jéeoba Dios yéetel Jesucristo jeʼel u tsoliktoʼon jach bix le kuxtal teʼ kaʼanoʼ. Letiʼobeʼ yaʼab baʼax tsʼoʼok u tsʼáaikoʼob u yojéelt le máaxoʼob meyajt úuchjeakiloʼ. Utiaʼal leloʼ tu tsʼáaj u náaytoʼob baʼaloʼob ku beetik u péek u yóol máak.
Teʼ xook ku segueroʼ yaan k-ilik baʼax ku yaʼalik le tekstoʼob tuʼux ku tsoʼolol le jejeláas náayoʼob tsʼaʼab tiʼ le máakoʼoboʼ. Ken a xokeʼ kʼaʼajaktech maʼ táan k-tʼaan tiʼ baʼax ku páajtal u yilaʼal wa u maʼachliʼ. Teʼ náayoʼobaʼ Dioseʼ tu lugar u yeʼesik baʼaloʼob chéen u kajnáaliloʼob kaʼan jeʼel u naʼatkoʼobeʼ, tu yeʼesaj baʼaloʼob jeʼel u yáantkoʼon k-naʼat bix le «yaʼab kúuchiloʼob yaan» teʼ kaʼanoʼ.
