Jáan tuukulnen yoʼolal bix u yuʼubikuba le máaxoʼob gemeloʼoboʼ. Letiʼobeʼ jach maʼalob u naʼatkubaʼob. Nancy Segal, u directorail le tuʼux ku yilaʼal bix u biskuba le gemeloʼoboʼ yéetel yaan xan u gemelaeʼ ku yaʼalikeʼ «jujuntúul gemeloʼobeʼ jach jatsʼuts bix u biskubaʼob yéetel séeb u naʼatkubaʼob». Juntúul koʼolel jach maʼalob u biskuba yéetel u gemelaeʼ, tu yaʼalaj: «Toʼoneʼ jach maʼalob bix k-kʼaj óoltmikba».

¿Baʼax beetik u naʼatkubaʼob tubeel? U jaajileʼ yaan baʼax u yil le bix u líiʼsaʼaloʼoboʼ, chéen baʼaleʼ jujunpʼéel estudioʼobeʼ ku yeʼeskoʼobeʼ jach yaan baʼax u yil u kʼiʼikʼeloʼob.

TUKULT LELAʼ: Dioseʼ jach jatsʼuts bix tu beetil u wíinklil máak, le beetik jach u yojel bix k-uʼuyikba. Le oʼolal le rey Davidoʼ tu yaʼalaj: ‹Teech máax beeten tu jobnel in maama. Mix baʼal bal ta wich bix beetpajik in wíinklil [...]. A wichoʼobeʼ tu yilajoʼob in wíinklil le táan u chʼaʼik wíinklileʼ; tuláakal lelaʼ tsʼíibtaʼan yanil tiʼ a tsʼíibil juʼun› (Salmo 139:13, 15, 16). Jéeobaeʼ maʼ chéen u yojel jach bix beetaʼanikoʼoniʼ, baʼaxeʼ u yojel bix k-uʼuyikba yoʼolal le baʼaxoʼob uchaʼantoʼonoʼ. Lelaʼ ku yeʼesikeʼ chéen letiʼ naʼatkoʼon jach tubeel.

Davideʼ tu yaʼalaj: «Yuumtsil, tsʼoʼok a xakʼaltik in kuxtal, a kʼaj óolen xan; techeʼ a kʼaj óol tuláakal baʼaxoʼob kin beetik; kex tak náachileʼ, a wojel baʼax kin tuklik. Maʼiliʼ tʼaanakeneʼ, Yuumtsil techeʼ tsʼoʼok a wojéeltik» (Salmo 139:1, 2, 4). Jéeobaeʼ u yojel baʼaxoʼob k-tuklik yéetel baʼaxoʼob yaan t-puksiʼikʼal (1 Crónicas 28:9; 1 Samuel 16:6, 7). Lelaʼ ¿baʼax ku yeʼesiktoʼon yoʼolal Dios?

Ku yeʼesikeʼ kex yaan kʼiin maʼ tu jóokʼol t-chiʼ baʼax ken k-aʼal tiʼ Dios kéen orarnakoʼoneʼ, letiʼeʼ u yojel baʼax k-kʼáat k-aʼaltiʼ. Letiʼeʼ maʼ chéen ku yilik baʼaxoʼob k-beetkiʼ, baʼaxeʼ u yojel baʼax péeksikoʼon k-beete. Tsʼoʼoleʼ u yojel xan baʼax jeʼel k-beetik wa ku kʼexpajal bix k-kuxtaleʼ. Dioseʼ tu beetoʼon yéetel u páajtalil k-eʼesik yaabilaj le oʼolal ku tsʼíiboltik u kʼaj óoltik yéetel u naʼatik baʼaxoʼob k-tuklik yéetel baʼaxoʼob k-kʼáat k-beete (1 Juan 4:7-10).

 Le Bibliaoʼ ku kaʼansik:

• «Jéeobaeʼ u pʼilmaj u yich utiaʼal u kanáantik le máaxoʼob toj u kuxtaloʼoboʼ, yéetel ku chʼebik u xikin utiaʼal u yuʼubik u kʼáat óolaloʼob.» (1 PEDRO 3:12.)

• Dioseʼ ku yaʼalik: «In wichoʼobeʼ táan u paktikechoʼob. Bíin in tsʼáatech kaʼanbesajiloʼob; bíin in tsʼáatech tsolxikinoʼob; bíin in weʼes teech le bej unaj a bisikoʼ» (SALMO 32:8).

K-ojéeltik ku chʼaʼiktoʼon óotsilil Dioseʼ, ¿jeʼel wa u yáantkoʼon kéen muʼyajnakoʼoneʼ? Tuukulnen tiʼ baʼax úuch tiʼ Anna, kajaʼan tu luʼumil Nigeria. Letiʼeʼ ku yaʼalik: «Yoʼolal le baʼaxoʼob ku yúuchultenoʼ kʼuchen in tukult minaʼan u biilal u seguer in kuxtal. Le ka ilaʼab yaanten cancereʼ, in wíichameʼ tsʼokaʼaniliʼ u kíimileʼ, tsʼoʼoleʼ in hijaeʼ tiaʼan hospitaleʼ tumen ku chuʼupul u cerebro yéetel jaʼ. Jach talam tin wilaj in wantal hospital teʼ kʼiinoʼob kʼojaʼan in hija xanoʼ. Teneʼ anchaj in operartaʼal, u beetaʼalten quimioterapia yéetel radioterapia».

¿Baʼax áant Anna teʼ talam kʼiinoʼoboʼ? Letiʼeʼ ku yaʼalik: «Uts tin tʼaan in tuukul tiʼ tekstoʼob jeʼex Filiposiloʼob 4:6 yéetel 7, tuʼux ku yaʼalikeʼ ‹u jeetsʼelil Dios ku táatsʼmáansik tuláakal tuukuloʼobeʼ yaan u kanáantik a puksiʼikʼaleʼex yéetel a tuukuleʼex›. Cada kéen tuukulnaken tiʼ le tekstoaʼ kin wuʼuyik naatsʼ yanilen tiʼ Jéeoba, leloʼ ku beetik in wilik chéen letiʼ naʼatik jach baʼax ku yúuchulten. Le máaxoʼob tuʼux kin muchʼkinba in adorart Diosoʼ jach tu líiʼsoʼob in wóol xan».

Tsʼoʼoleʼ ku yaʼalik: «Kex láayliʼ kʼojaʼaneneʼ, bejlaʼeʼ maas maʼalob in wuʼuyikinba. Maʼatech u lúubul in wóol kex ka yanaktoʼon problemaʼob tumen in wojel Jéeobaeʼ tiaʼan tin wéeteleʼ. Santiago 5:11, ku yaʼalik: ‹Kiʼimak u yóol le máaxoʼob ku chúukpajal u yóoloʼob muʼyajoʼ. Teʼexeʼ a wuʼuymeʼex u yaʼalaʼal bix chúukpajik u yóol Job, yéetel tsʼoʼok a wilkeʼex baʼax utsil tsʼaʼabtiʼ tumen Jéeoba; Jéeobaeʼ jach nojoch u yaabilaj yéetel ku chʼaʼik óotsilil›». Jéeobaeʼ tu naʼataj bix tu yuʼubiluba Job yoʼolal le problemaʼob tu aktáantoʼ, yéetel bey xan u naʼatik bix k-uʼuyikba kéen muʼyajnakoʼonoʼ.