XOOK 48
Unaj «a pʼáatleʼex santoil»
Unaj «a pʼáatleʼex santoil tiʼ tuláakal baʼal» (1 PED. 1:15).
KʼAAY 34 In kʼáat in beet baʼax toj mantatsʼ
TIʼ BAʼAX KUN TʼAAN *
1. ¿Baʼax tu yaʼalaj apóstol Pedro tiʼ le yéeyaʼanoʼob teʼ yáax siglooʼ, yéetel baʼaxten jeʼel u tuklik máak maʼ tu páajtal u beetaʼal le baʼax tu yaʼaloʼ?
LE MÁAXOʼOB táan u páaʼtik u binoʼob teʼ kaʼan bey xan le máaxoʼob táan u páaʼtik u kuxtaloʼob way Luʼumeʼ yaʼab baʼaloʼob jeʼel u kankoʼob tiʼ le baʼax tu yaʼalaj apóstol Pedro tiʼ le sukuʼunoʼob yéeyaʼanoʼob teʼ yáax siglooʼ. Letiʼeʼ tu yaʼalajtiʼob: «Baʼax kʼaʼabéet a beetkeʼexeʼ a pʼáatleʼex santoil tiʼ tuláakal baʼal, tumen le Máax tʼaneʼexoʼ santo, tsʼoʼoleʼ tsʼíibtaʼan: ‹Teʼexeʼ unaj a pʼáatleʼex santoil, tumen teneʼ santoen›» (1 Ped. 1:15, 16). Le tʼaanoʼobaʼ ku yeʼesiktoʼoneʼ jeʼel u páajtal k-pʼáatal santoil tiʼ tuláakal baʼal jeʼex Jéeobaeʼ. Maʼ xaaneʼ jeʼel k-tuklikeʼ leloʼ maʼ tu páajtal tumen kʼeban máakoʼon, chéen baʼaleʼ kex beyoʼ unaj k-ilik k-beetik. Úuchjeakileʼ le apóstol Pedrooʼ yaan kʼiineʼ tu beetaj baʼaloʼob maʼ maʼalobtakiʼ, kex beyoʼ pʼáat santoil tu táan Dios. Leloʼ ku yeʼesiktoʼoneʼ jeʼel xan u páajtal k-pʼáatal santoileʼ.
2. ¿Baʼax kʼáatchiʼiloʼob kun núukbil teʼ xookaʼ?
2 Teʼ xookaʼ yaan u núukaʼal le kʼáatchiʼobaʼ: ¿Baʼax u kʼáat u yaʼal le tʼaan santooʼ?, ¿bix u yeʼesik le Biblia de ke Jéeobaeʼ santo?, ¿bix jeʼel k-pʼáatal santoil tiʼ tuláakal baʼaleʼ? yéetel ¿baʼaxten kʼaʼabéet k-pʼáatal santoil utiaʼal k-bisikba yéetel Jéeoba?
¿BAʼAX U KʼÁAT U YAʼAL LE TʼAAN SANTOOʼ?
3. Yaʼab máakoʼobeʼ, ¿bix u tuklikoʼob juntúul máax santo, chéen baʼaleʼ baʼax jeʼel u yáantkoʼon k-ojéelt u jaajileʼ?
3 Yaʼab máakoʼobeʼ ku tuklikoʼobeʼ juntúul máax santoeʼ bey jeʼex le máaxoʼob ku beetaʼal u imagenoʼoboʼ, letiʼobeʼ triste u yilaʼaloʼob yéetel bey lubaʼan u yóoloʼobeʼ. Chéen baʼaleʼ lelaʼ maʼ jaajiʼ tumen le Bibliaoʼ ku yaʼalikeʼ Jéeobaeʼ jach santo, pero kex beyoʼ letiʼeʼ juntúul «Dios kiʼimak u yóol» (1 Tim. 1:11). Ku yaʼalik xaneʼ le máaxoʼob adorartik Diosoʼ kiʼimak u yóoloʼob (Sal. 144:15). Tsʼoʼoleʼ le ka taal Jesús way Luʼumeʼ tu yaʼaleʼ maʼ maʼalob baʼax ku beetik u nuuktakil le religiónoʼoboʼ tumen ku takikoʼob chowak nookʼoʼob yéetel ku beetkoʼob baʼax maʼalob, pero chéen utiaʼal ka ilaʼakoʼob tumen u maasil (Mat. 6:1; Mar. 12:38). Le baʼax ku yaʼalik le Bibliaoʼ ku yáantkoʼon k-il bix juntúul máax santo. Toʼoneʼ k-ojleʼ Jéeobaeʼ santo yéetel jach u yaabiltmoʼon, le oʼolal maʼ tu kʼáatiktoʼon ka k-beet junpʼéel baʼal maʼ tu páajtal k-beetik. Letiʼeʼ ku yaʼaliktoʼon unaj k-pʼáatal santoil tumen u yojel jeʼel u páajtal k-beetkeʼ. Koʼoneʼex ilik bix juntúul máax santo.
4. ¿Baʼax u kʼáat u yaʼal le tʼaan santooʼ?
4 ¿Baʼax u kʼáat u yaʼal le tʼaan santooʼ? Teʼ Bibliaoʼ maases ku meyaj utiaʼal u yúuchul tʼaan tiʼ junpʼéel baʼal limpio. Ku meyaj xan utiaʼal u yúuchul tʼaan tiʼ junpʼéel baʼal separartaʼan wa kʼubaʼan tiʼ Dios. Leloʼ ku yeʼesiktoʼoneʼ utiaʼal k-pʼáatal santoileʼ kʼaʼabéet k-bisik junpʼéel kuxtal limpio, k-adorartik Jéeoba jeʼex uts tu tʼaaneʼ yéetel k-bisikba tu yéetel. ¿Máasaʼ ku kiʼimaktal k-óol k-ojéeltikeʼ kex kʼebanoʼoneʼ ku páajtal k-bisikba yéetel Jéeoba, juntúul Dios jach santo?
«SANTO, SANTO, SANTO JÉEOBA»
5. ¿Baʼax ku kaʼansiktoʼon yoʼolal Jéeoba le baʼax tu yaʼalaj le ángeloʼoboʼ?
5 Jéeobaeʼ juntúul Dios jach santo. Leloʼ bey tu yaʼalil jujuntúul serafínoʼob wa ángeloʼob yanoʼob naatsʼ tu trono. Letiʼobeʼ tu yaʼaloʼob: «Santo, santo, santo Jéeoba, le máax gobernartik le ángeloʼoboʼ» (Isa. 6:3). Le ángeloʼoboʼ kʼaʼabéet santoʼob utiaʼal u páajtal u biskubaʼob yéetel Jéeoba, juntúul Dios santo. Úuchjeakileʼ le kéen taalak juntúul ángel way Luʼumeʼ le lugar tuʼux ku kʼuchloʼ ku pʼáatal santoil. Leloʼ bey úuchik tiʼ le lugar tuʼux tu yilaj Moisés le chan cheʼ ku tóochʼbaloʼ (Éxo. 3:2-5; Jos. 5:15).
Le u maas nojchil le sacerdoteʼoboʼ ku bisik kaʼach junpʼéel chan placa de oro tu pool ku yaʼalik: ‹Jéeobaeʼ jach santo› (Ilawil párrafo 6 yéetel 7)
6, 7. 1) Jeʼex u yaʼalik Éxodo 15:1, 11, ¿bix tu yeʼesil Moisés, Dioseʼ jach santo? 2) ¿Baʼax kʼaʼajsik kaʼach tiʼ le israelitaʼoboʼ Jéeobaeʼ jach santo? (Ilawil le dibujo yaan tu yáax páginail le revistaaʼ).
6 Le ka tsʼoʼok u kʼáatmáansik le israelitaʼob le Mar Rojooʼ Moiséseʼ tu yaʼaleʼ Jéeobaeʼ jach táaj santo (xok Éxodo 15:1, 11). Le máaxoʼob adorartik kaʼach uláakʼ diosoʼob Egiptooʼ jach jelaʼan baʼax ku beetkoʼob. Le máaxoʼob adorartik xan le diosoʼob yaan Canaánoʼ jach kʼaas baʼax ku beetkoʼob tumen letiʼobeʼ ku tóokik u paalaloʼob yéetel ku núupkʼebantaloʼob utiaʼal u adorartik u diosoʼob (Lev. 18:3, 4, 21-24; Deu. 18:9, 10). Chéen baʼaleʼ Jéeobaeʼ maʼ bey jeʼex le diosoʼobaʼ, letiʼeʼ santo le oʼolal maʼ tu kʼáatiktoʼon ka k-beet junpʼéel baʼal utiaʼal u pajik k-suʼtal wa utiaʼal u beetik k-muʼyaj. Le chan placa de oro yaan kaʼach tu táan poolal u maas nojchil le sacerdoteʼoboʼ ku yaʼalik: «Jéeobaeʼ jach santo» (Éxo. 28:36-38).
7 Le máaxoʼob ku yilkoʼob kaʼach le chan placa yaan tu táan poolal le sacerdoteoʼ ku kʼuchul u yojéeltoʼobeʼ Jéeobaeʼ jach santo. Chéen baʼaleʼ, ¿kux túun wa yaan máax maʼ tu páajtal u yilik le chan placa yaan tu táan poolal le sacerdoteoʼ? ¿Bix ken u yojéeltil wa Jéeobaeʼ jach santo? Jeʼel u páajtal kaʼach u yojéeltik le kéen xoʼokok le Ley tu táan le xiiboʼob, le koʼoleloʼob yéetel le mejen paalaloʼoboʼ (Deu. 31:9-12). Wa ka yanakoʼon kaʼach teʼ kʼiin táan u xoʼokol le Leyoʼ tsʼoʼok k-uʼuyik u xoʼokol le tʼaanoʼobaʼ: «Teneʼ Jéeobaen, teen a Dioseʼex, [...] teʼexeʼ unaj a pʼáatleʼex santoil, tumen teneʼ santoen», «teʼexeʼ unaj a pʼáatleʼex santoil tin táan, tumen teen Jéeoba a Dioseʼexeʼ santoen» (Lev. 11:44, 45; 20:7, 26).
8. ¿Baʼax ku kaʼansiktoʼon le baʼax ku yaʼalik Levítico 19:2 yéetel 1 Pedro 1:14-16?
8 Junpʼéel tiʼ le baʼaxoʼob ku xoʼokol kaʼach tiʼ u kaajil Israeloʼ letiʼe baʼax ku yaʼalik Levítico 19:2. Teʼeloʼ Jéeobaeʼ tu yaʼalaj tiʼ Moisés: «Tʼan tuláakal le israelitaʼoboʼ ka a waʼaltiʼob: ‹Teʼexeʼ unaj a pʼáatleʼex santoil, tumen teen Jéeoba a Dioseʼexeʼ santoen[›]». Maʼ xaaneʼ apóstol Pedroeʼ táan kaʼach u chʼaʼchiʼitik le baʼax ku yaʼalik Levítico 19:2 le ka tu yaʼalaj tiʼ le cristianoʼob teʼ yáax siglooʼ: «Unaj a pʼáatleʼex santoil» (xok 1 Pedro 1:14-16). U jaajileʼ teʼ kʼiinoʼobaʼ maʼ kʼaʼabéet k-tsʼoʼokbesik tuláakal le baʼax ku yaʼalik le Ley úuchjeakiloʼ, chéen baʼaleʼ le baʼax tu tsʼíibtaj Pedro yéetel le baʼax ku yaʼalik Levítico 19:2, ku yeʼesiktoʼoneʼ Jéeobaeʼ juntúul Dios santo yéetel u kʼáat ka pʼáatak santoil tuláakal le máaxoʼob yaabiltmiloʼ, kex wa táan u páaʼtkoʼob u binoʼob teʼ kaʼanoʼ bey xan wa táan u páaʼtkoʼob u pʼáatloʼob kuxtal way Luʼumeʼ (1 Ped. 1:4; 2 Ped. 3:13).
UNAJ «A PʼÁATLEʼEX SANTOIL TIʼ TULÁAKAL BAʼAL»
9. ¿Baʼaxten maʼalob ka k-xakʼalxokt le capítulo 19 tiʼ Levíticooʼ?
9 Tumen taak k-lúubul utsil tiʼ Dioseʼ kʼaʼabéet k-ojéeltik bix jeʼel k-pʼáatal santoil jeʼel bix letiʼeʼ. Teʼ capítulo 19 tiʼ Levíticooʼ Dioseʼ ku yaʼaliktoʼon jujunpʼéel baʼaloʼob unaj k-beetik utiaʼal k-pʼáatal santoil tu táan. Marcus Kalisch, juntúul máax ku xakʼalxoktik le idioma hebreooʼ, ku yaʼalik: «Le capítulo jeʼelaʼ maʼ xaaneʼ letiʼe maas chúukaʼan yéetel maas kʼaʼanaʼan yaan tiʼ tuláakal u libroil Levíticooʼ wa hasta tiʼ tuláakal le Pentateucooʼ». Koʼoneʼex xakʼaltik jujunpʼéel versículoʼob tiʼ le capítulo 19 tiʼ Levítico jach jeʼel u yáantkoʼon ichil k-kuxtaleʼ. Chéen baʼaleʼ le táan k-xakʼaltikoʼoboʼ maʼ u tuʼubultoʼoneʼ tu káajbal le capítulooʼ tu yaʼalaj: «Teʼexeʼ unaj a pʼáatleʼex santoil».
¿Baʼaxten maʼalob ka tuukulnakoʼon tiʼ le baʼax ku yaʼalik Levítico 19:3 yoʼolal le taatatsiloʼoboʼ? (Ilawil párrafo 10 tak 12) *
10, 11. Jeʼex u yaʼalik Levítico 19:3, ¿baʼax táakaʼan utiaʼal u pʼáatal máak santoil, yéetel bix unaj k-ilik le baʼax ku yaʼalikoʼ?
10 Le ka tsʼoʼok u yaʼalik tiʼ le israelitaʼob unaj u pʼáatloʼob santoiloʼ, Jéeobaeʼ tu yaʼalaj xan tiʼob: «Cada juntúul tiʼ teʼexeʼ unaj u respetartik u papá yéetel u maama [...]. Teneʼ Jéeobaen, teen a Dioseʼex» (Lev. 19:2, 3).
11 Jeʼex k-ilkoʼ Jéeobaeʼ jach u kʼáat ka k-respetart k-taataʼob. Úuchjeakileʼ juntúul xiʼipaleʼ náatsʼ tu yiknal Jesúseʼ ka tu kʼáatajtiʼ: «¿Máakalmáak le baʼaloʼob maʼalobtak unaj in beetik utiaʼal ka yanakten kuxtal minaʼan u xuuloʼ?». Ichil le baʼaxoʼob tu yaʼalaj Jesús tiʼ le xiʼipaloʼ, táakaʼan le u respetartik u papá yéetel u maamaoʼ (Mat. 19:16-19). Juntéenjeakil xaneʼ Jesúseʼ tu yaʼaleʼ maʼ maʼalob baʼax ku beetik le fariseoʼob yéetel escribaʼoboʼ tumen letiʼobeʼ táan kaʼach u mixbaʼalkúuntikoʼob «le baʼax u yaʼalmaj Diosoʼ» (Mat. 15:3-6). Letiʼobeʼ maʼatech u respetarkoʼob kaʼach u papáʼob yéetel u maamaʼob jeʼex u yaʼalik le quinto mandamientooʼ mix jeʼex u yaʼalik Levítico 19:3 (Éxo. 20:12). Maʼ u tuʼubultoʼoneʼ u libroil Levíticoeʼ antes tiʼ u yaʼalik ka u respetart máak u papá yéetel u maamaeʼ tu yaʼalaj: «Teʼexeʼ unaj a pʼáatleʼex santoil, tumen teen Jéeoba a Dioseʼexeʼ santoen».
12. ¿Baʼax maʼalob ka u tukult cada juntúul tiʼ toʼon?
12 Cada juntúul tiʼ toʼoneʼ maʼalob ka u tukle: «¿Táan wa in respetartik in papá yéetel in maama jeʼex u yaʼalik Levítico 19:3?». Wa k-ilik yaan baʼaloʼob maʼ táan k-beetkeʼ maʼalob ka k-tsʼáa k-óol k-beet desde bejlaʼeʼ. Jeʼel u páajtal k-jóoʼsik tiempo utiaʼal k-beetik wa baʼax tu yoʼolaloʼobeʼ bey xan utiaʼal k-antal tu yéeteloʼob. Maʼ xaaneʼ jeʼel u páajtal k-áantkoʼob yéetel junpʼíit taakʼineʼ, k-áantkoʼob u meyajtoʼob Jéeoba wa k-beetik uláakʼ baʼaloʼob tu yoʼolaloʼob utiaʼal u kiʼimaktal u yóoloʼob. Bey túunoʼ yaan k-tsʼoʼokbesik le baʼax ku yaʼalik Levítico 19:3.
13. 1) ¿Baʼax uláakʼ ku yaʼalik Levítico 19:3 unaj k-beetik? 2) ¿Bix jeʼel u páajtal k-seguertik u ejemplo Jesúseʼ? (Lucas 4:16-18).
13 Levítico 19:3, ku kaʼansiktoʼon uláakʼ baʼax unaj k-beetik utiaʼal k-pʼáatal santoil. Teʼeloʼ ku yaʼalikeʼ kʼaʼabéet u respetartik máak u leyil le Sábadooʼ. U jaajileʼ bejlaʼeʼ maʼ kʼaʼabéet k-tsʼoʼokbesik le ley jeʼelaʼ, chéen baʼaleʼ yaʼab baʼax jeʼel k-kanik tiʼ le israelitaʼob ku respetarkoʼob kaʼach le Sábadooʼ bey xan tiʼ le bendiciónoʼob tu kʼamoʼoboʼ. Tu kʼiinil sábadoeʼ le israelitaʼoboʼ maʼ unaj kaʼach u meyajoʼobiʼ baʼaxeʼ chéen unaj u adorarkoʼob Jéeoba. * Le oʼolal tak Jesúseʼ tu kʼiinil sábado ku bin kaʼach teʼ sinagoga utiaʼal u xokik u Tʼaan Diosoʼ (Éxo. 31:12-15; xok Lucas 4:16-18). Le baʼax ku yaʼalik Levítico 19:3, unaj u péeksikoʼon k-maas jóoʼs tiempo utiaʼal k-meyajtik Jéeoba. Wa k-ilik yaan tiʼ baʼax unaj k-mejorareʼ unaj k-tsʼáaik k-óol k-beete. Wa ku suuktal k-jóoʼsik tiempo utiaʼal k-meyajtik Jéeobaeʼ yaan k-maas bisikba tu yéetel. Leloʼ junpʼéel baʼal jach kʼaʼabéet utiaʼal k-pʼáatal santoil tu táan.
UNAJ K-MAAS BISIKBA YÉETEL JÉEOBA
14. ¿Baʼax ku kʼaʼajsiktoʼon le capítulo 19 tiʼ Levíticooʼ?
14 Le capítulo 19 tiʼ Levíticooʼ ku kʼaʼajsiktoʼon junpʼéel baʼax jeʼel u yáantkoʼon utiaʼal k-pʼáatal santoil tu táan Dioseʼ. Tu tsʼoʼokbal le versículo 4, ku yaʼalik: «Teneʼ Jéeobaen, teen a Dioseʼex». Le tʼaanoʼob beyaʼ 16 u téenel ku chíikpajal teʼ capítulo 19 tiʼ Levíticooʼ. Ku kʼaʼajsiktoʼon xan le baʼax ku yaʼalik le yáax mandamientoaʼ: «Teneʼ Jéeoba a Diosen [...]. Maʼ unaj u yantaltech uláakʼ diosoʼobiʼ, chéen teen» (Éxo. 20:2, 3). Leloʼ ku yeʼesiktoʼoneʼ tuláakal máax u kʼáat pʼáatal santoileʼ unaj u kʼaʼajaltiʼeʼ le baʼax maas importanteoʼ letiʼe u biskuba yéetel Diosoʼ. Tsʼoʼoleʼ tumen u testigoʼon Jéeobaeʼ jach k-kanáantik maʼ k-pʼatik kʼaasil u kʼaabaʼ yoʼolal baʼax k-beetik (Lev. 19:12; Isa. 57:15).
15. ¿Baʼax unaj u péeksikoʼon k-beet Levítico capítulo 19 tuʼux ku tʼaan tiʼ le sacrificioʼoboʼ?
15 Le israelitaʼoboʼ ku yeʼeskoʼob Jéeoba u Diosoʼob le kéen u tsʼoʼokbesoʼob kaʼach u leyoʼoboʼ. Levítico 18:4, ku yaʼalik: «Teʼexeʼ unaj a beetkeʼex tuláakal le baʼaxoʼob kin waʼalikteʼexoʼ yéetel unaj a kuxtaleʼex jeʼex u yaʼalik in leyoʼoboʼ. Teneʼ Jéeobaen, teen a Dioseʼex». Teʼ capítulo 19, ku chʼaʼchiʼitaʼal kaʼach jujunpʼéel baʼaloʼob unaj u beetik u kaajil Israel. Jeʼex le versículo 5 tak 8, 21 yéetel 22, ku tʼaanoʼob tiʼ le sacrificioʼob unaj kaʼach u kʼubik le israelitaʼoboʼ. Le kéen u beetoʼobeʼ unaj u yeʼeskoʼob kaʼach ku respetarkoʼob le baʼax santo tu táan Jéeobaoʼ. Le kéen k-xok le versículoʼobaʼ unaj u péeksikoʼon k-beet baʼax uts tu tʼaan Jéeoba yéetel k-alabartik jeʼex u yaʼalik Hebreos 13:15.
16. ¿Bix u yeʼesik Levítico capítulo 19 maʼ unaj k-kuxtal jeʼex le máaxoʼob maʼatech u meyajtikoʼob Diosoʼ?
16 Utiaʼal k-pʼáatal santoileʼ maʼ unaj u tuʼubultoʼoneʼ kʼaʼabéet u yilaʼal jelaʼanoʼon tiʼ le máaxoʼob maʼatech u meyajtikoʼob Diosoʼ. Leloʼ maʼ chéen chʼaʼabiliʼ tumen yaan kʼiineʼ k-éet xookoʼob, k-éet meyajoʼob, k-láakʼtsiloʼob wa uláakʼ máakoʼobeʼ jeʼel u túulchʼintkoʼon k-beet baʼaloʼob utiaʼal u xuʼulul k-meyajtik Jéeobaeʼ. Teʼ súutukiloʼob beyoʼ, ¿baʼax jeʼel u yáantkoʼon k-chʼaʼtukult baʼax ken k-beeteʼ? Junpʼéel baʼax jeʼel u yáantkoʼoneʼ letiʼe baʼax ku yaʼalik Levítico 19:19, teʼeloʼ ku yaʼalik: «Maʼ [...] unaj a búukintik junpʼéel nookʼ beetaʼan yéetel kaʼapʼéel clase hiloiʼ». Le leyaʼ ku yáantaj kaʼach utiaʼal u yilaʼal u kaajil Israeleʼ maʼ bey jeʼex u maasil kaajoʼoboʼ. Bejlaʼeʼ maʼ kʼaʼabéet k-tsʼoʼokbesik le ley tsʼaʼab tiʼ le israelitaʼoboʼ yéetel maʼ kʼaas tu táan Dios ka k-búukint junpʼéel nookʼ beetaʼan yéetel kaʼapʼéel clase hiloiʼ. Baʼax kʼaaseʼ ka joʼopʼok k-kuxtal jeʼex k-éet xookoʼob, k-éet meyajoʼob wa k-láakʼtsiloʼob maʼatech u meyajtikoʼob Diosoʼ. U jaajileʼ k-yaabiltmaj k-láakʼtsiloʼob bey xan u maasil máakoʼob, chéen baʼaleʼ le kéen horachajak k-chʼaʼtuklik junpʼéel baʼaleʼ unaj k-eʼesik maʼ beyoʼon jeʼex letiʼoboʼ. Kʼaʼajaktoʼoneʼ wa k-kʼáat pʼáatal santoileʼ maʼ unaj k-kuxtal jeʼex le máaxoʼob maʼatech u meyajtikoʼob Diosoʼ (2 Cor. 6:14-16; 1 Ped. 4:3, 4).
¿Baʼax wal tu kanaj le israelitaʼob tiʼ Levítico 19:23 tak 25, yéetel baʼax ku kaʼansik tiʼ teech? (Ilawil párrafo 17 yéetel 18) *
17, 18. ¿Baʼax ku kaʼansiktoʼon Levítico 19:23-25?
17 Le tʼaanoʼob «teneʼ Jéeobaen, teen a Dioseʼex», tu kʼaʼajsaj wal tiʼ le israelitaʼoboʼ le baʼax maas kʼaʼabéetoʼ letiʼe u biskubaʼob yéetel Jéeobaoʼ yéetel u confiaroʼob tiʼ letiʼ. Koʼoneʼex ilik junpʼéel ejemplo tiʼ bix jeʼel u páajtal u beetkoʼobeʼ, lelaʼ ku chíikpajal tiʼ Levítico 19:23 tak 25 (xoke). Le baʼax ku yaʼalik le tekstoaʼ káaj u beetik le israelitaʼob le ka ookoʼob teʼ luʼum tsʼaʼabtiʼob tumen Jéeobaoʼ. Wa juntúul israelita ku pakʼik kaʼach junkúul cheʼeʼ, tres años maʼ kun páajtal u jaantaʼal u yich. Tu cuatro añoseʼ u yich le cheʼoʼ unaj u láaj bisik u kʼub tiʼ Jéeoba, hasta tu cinco años kun páajtal kaʼach u jaantik u yich. Le leyaʼ jach tu yáantaj wal le israelitaʼob utiaʼal maʼ u sen chiʼichnaktaloʼob tu yoʼolal baʼax ken u jaantoʼoboʼ. Letiʼobeʼ unaj u confiaroʼob kaʼach tiʼ Jéeoba yéetel u tsʼáaik u yóol u meyajtoʼob. Letiʼ túuneʼ yaan kaʼach u tsʼáaik baʼax kʼaʼabéettiʼob. Le ley xanoʼ tu péeksaj le israelitaʼob utiaʼal u bisik u kʼuboʼob le baʼaxoʼob yaantiʼob teʼ tuʼux ku adorartaʼal Jéeobaoʼ.
18 Le baʼax ku yaʼalik Levítico 19:23 tak 25, ku kʼaʼajsiktoʼon le baʼax tu yaʼalaj Jesúsaʼ: «Xuʼuluk a chiʼichnaktaleʼex tu yoʼolal baʼax ken a jaanteʼex wa baʼax ken a wukʼeʼex». Tsʼoʼoleʼ tu yaʼalaj: «A Taataʼex yaan teʼ kaʼanoʼ u yojel kʼaʼabéetteʼex tuláakal le baʼaloʼobaʼ». Jeʼex k-ilkoʼ Dioseʼ yaan u tsʼáaiktoʼon tuláakal baʼax kʼaʼabéettoʼon jeʼex u beetik yéetel le chʼíichʼoʼoboʼ (Mat. 6:25, 26, 32). Tumen k-confiar tiʼ Jéeobaeʼ hasta k-áantik u maasil yéetel le baʼaxoʼob yaantoʼonoʼ yéetel k-tsʼáaik k-donaciónoʼob teʼ múuchʼuliloʼ. Jéeobaeʼ jach ku yilik bix k-eʼesik k-utsil yéetel yaan u kʼuchul u kʼiinil u boʼotiktoʼon (Mat. 6:2-4). Wa mantatsʼ k-eʼesik k-utsileʼ u kʼáat u yaʼaleʼ tsʼoʼok k-naʼatik le baʼax ku yaʼalik Levítico 19:23 tak 25.
19. ¿Baʼax utsil tsʼoʼok a jóoʼsik tiʼ le versículoʼob t-xakʼaltaj tiʼ Levítico capítulo 19?
19 Le versículoʼob tsʼoʼok k-xakʼaltik tiʼ Levítico capítulo 19, tsʼoʼok u kaʼansiktoʼon yaʼab baʼaloʼob jeʼel u páajtal k-beetik utiaʼal k-pʼáatal santoil jeʼex Jéeobaeʼ. Le kéen k-seguert u ejemploeʼ k-eʼesik táan k-tsʼáaik k-óol utiaʼal k-pʼáatal santoil tiʼ tuláakal baʼal (1 Ped. 1:15). Yaʼab máakoʼobeʼ le kéen u yiloʼob bix k-kuxtaleʼ hasta ku alabarkoʼob Jéeoba (1 Ped. 2:12). Yaʼab uláakʼ baʼaloʼob jeʼel u páajtal k-kanik tiʼ Levítico capítulo 19. Teʼ tuláakʼ xookoʼ yaan k-xakʼaltik uláakʼ versículoʼob jeʼel u yáantkoʼon utiaʼal k-pʼáatal santoil jeʼex u yaʼalik apóstol Pedrooʼ.
KʼAAY 80 Ilawil bukaʼaj u yutsil Jéeoba
^ xóot’ol 5 Toʼoneʼ k-yaabiltmaj Jéeoba yéetel taak k-beetik baʼax uts tu tʼaan. Letiʼeʼ santo, le oʼolal u kʼáat ka pʼáatkoʼon santoil xan. Chéen baʼaleʼ tumen kʼebanoʼoneʼ, ¿jeʼel wa túun u páajtal k-pʼáatal santoileʼ? Jeʼeleʼ. Utiaʼal k-ilik bix jeʼel u páajtaleʼ koʼoneʼex ilik jujunpʼéel baʼax tu yaʼalaj apóstol Pedro tiʼ le yáax cristianoʼoboʼ bey xan jujunpʼéel baʼax u yaʼalmaj Jéeoba tiʼ u kaajil Israel úuchjeakil.
^ xóot’ol 13 Utiaʼal a wojéeltik u maasil yoʼolal le Sábado bey xan baʼaxoʼob jeʼel u páajtal k-kaniktiʼeʼ ilawil le xook ku kʼaabaʼtik: «Yaan u súutukil meyaj yéetel jeʼelel», jóokʼ tiʼ U Pʼíich Tulumil Kanan diciembre tiʼ 2019.
^ xóot’ol 57 FOTOʼOB: Juntúul sukuʼuneʼ bijaʼan u xíimbalt u taataʼob junmúuchʼ yéetel u familia, letiʼeʼ mantatsʼ pendiente tiʼ letiʼob.
^ xóot’ol 59 DIBUJO: Juntúul israelitaeʼ táan u paktik u yich u paakʼal.
