1, 2. 1) ¿Baʼax tu yaʼalaj juntúul ángel tiʼ le koʼoleloʼob bin u yiloʼob tuʼux tsʼaʼab u wíinklil Jesúsoʼ? 2) ¿Baʼax tu yaʼalaj Jesús tiʼ le koʼoleloʼob ka u beetoʼoboʼ?

TÁAN u sáastal tu kʼiinil 16 tiʼ nisán teʼ año 33. Tsʼoʼok u máan 36 horas kíimik Jesús. Junmúuchʼ koʼoleloʼob jach yaachajaʼan u yóoloʼobeʼ táan u bin u yiloʼob tuʼux tsʼaʼab u wíinklil Jesús, tumen taak u jiʼikoʼob kiʼibok aceiteʼob yéetel kiʼibok xíiwoʼob tu wíinklil. Le ka kʼuchoʼobeʼ jach jaʼakʼ u yóoloʼob le ka tu yiloʼob minaʼan u wíinklil Jesúsiʼ. Teʼ súutukoʼ chíikpaj juntúul ángel, ka tu yaʼalajtiʼob tsʼoʼok u kaʼa kuxkíintaʼal Jesús. Tu yaʼalaj xan: «Táan u bin Galilea táanil tiʼ teʼex, teʼeloʼ tiʼ ken a wileʼexiʼ» (Mat. 28:1-7; Luc. 23:56; 24:10).

² Le táan u lukʼul le koʼoleloʼoboʼ tu chíikbesuba Jesús tiʼobeʼ, ka tu yaʼalaj: «Xeen a waʼaleʼex tiʼ in sukuʼunoʼob ka xiʼikoʼob Galilea, tiʼ ken in wiloʼobiʼ» (Mat. 28:10). Chéen pʼelak kaʼa kuxkíintaʼabikeʼ Jesúseʼ tu yilaj u muchʼkuba yéetel u discípuloʼob. Teʼ súutuk jeʼeloʼ tu kʼubéentajtiʼob junpʼéel nojoch meyaj.

3, 4. ¿Baʼax eʼesik maʼ chéen tiʼ le apóstoloʼob aʼalaʼab ka u beetoʼob le baʼax ku yaʼalik Mateo 28:19 yéetel 20? (Ilawil le dibujo yaan tu yáax táan juʼunil le revistaaʼ).

³ (Xok Mateo 28:16-20). Le ka tu muchʼuba Jesús yéetel u discípuloʼoboʼ tu tsolajtiʼob máakalmáak le nojoch meyaj ken u beetoʼob teʼ kʼiinoʼob jeʼeloʼ. Le meyajaʼ láayliʼ letiʼe k-beetik tak teʼ kʼiinoʼobaʼ. Letiʼeʼ tu yaʼalajtiʼob: «Le oʼolaleʼ xeeneʼex tu yiknal u kajnáaliloʼob tuláakal le kaajoʼoboʼ[.] [...] Kaʼanseʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼexoʼ».

⁴ Jesúseʼ u kʼáat ka kʼaʼaytajnak tuláakal le máaxoʼob tsaypachtikoʼ. Le nojoch meyajaʼ maʼ chéen tu kʼubéentaj tiʼ le 11 apóstoloʼoboʼ.  ¿Baʼaxten k-aʼalik? Tumen le ka tu yaʼalaj unaj u kaʼansaʼal uláakʼ máakoʼobeʼ maʼ chéen tiʼ u apóstoloʼob tu yaʼaliʼ, yaan xan uláakʼ discípuloʼob binoʼob tu montañail Galilea. Kʼaʼajaktoʼoneʼ le ángeloʼ tu yaʼalaj tiʼ le koʼoleloʼob ka xiʼikoʼob Galileaoʼ tumen tiʼ ken u yiloʼob Jesúsiʼ. Le oʼolal maʼ xaaneʼ teʼ kʼiin jeʼeloʼ tak jujuntúul koʼoleloʼob tsaypachtik Jesús anchajoʼobiʼ. Ka máan kʼiineʼ apóstol Pabloeʼ tu yaʼalaj: «[Jesúseʼ] tu chíikbesuba xan tiʼ maas tiʼ 500 sukuʼunoʼob muchʼukbaloʼob» (1 Cor. 15:6). ¿Tuʼux tu chíikbesuba tiʼob?

5. ¿Baʼax eʼesik le baʼax ku yaʼalik Yáax tiʼ Corintios 15:6, táan u tʼaan tiʼ le baʼax ku yaʼalik Mateo capítulo 28?

⁵ Yaʼab baʼax eʼesikeʼ le ka tu yaʼalaj Pablo le baʼax ku chíikpajal tiʼ Yáax tiʼ Corintios 15:6, táan kaʼach u tuukul tiʼ le baʼax tu yaʼalaj Jesús tiʼ u discípuloʼob ku chíikpajal tiʼ Mateo capítulo 28. ¿Baʼaxoʼob eʼesik? Yáaxeʼ u maas yaʼabil tiʼ u discípuloʼob Jesúseʼ galileoʼob. Le oʼolal maas maʼalob ka muʼuchʼkoʼob tiʼ junpʼéel montaña yaan Galilea maʼ tiʼ junpʼéel naj tu kaajil Jerusaléniʼ. U kaʼapʼéeleʼ kʼaʼajaktoʼoneʼ chéen pʼelak úuchik u kaʼa kuxtaleʼ Jesúseʼ tu muchʼuba yéetel u 11 apóstoloʼob tiʼ junpʼéel naj yaan Jerusalén. Wa chéen tiʼ u apóstoloʼob tu kʼubéentaj u kʼaʼaytajoʼob yéetel u kaʼanskoʼob le máakoʼoboʼ tsʼoʼok kaʼach u yaʼaliktiʼob le ka tu muchʼoʼob Jerusalénoʼ, bejlaʼaʼ maʼ tu yaʼalik tiʼ u apóstoloʼob, le koʼoleloʼob yéetel tiʼ le discípuloʼob ka u muchʼubaʼob tu yéetel Galileaoʼ (Luc. 24:33, 36).

6. 1) ¿Bix u yeʼesik Mateo 28:20 unaj u kaʼansaʼal le máakoʼob u meyajtoʼob Jéeoba tak teʼ kʼiinoʼobaʼ? 2) ¿Baʼax eʼesik táan u béeychajal?

⁶ U yóoxpʼéeleʼ Jesúseʼ maʼ chéen tiʼ le jaajil cristianoʼob kuxlajoʼob teʼ yáax siglo tu yaʼalaj ka u kaʼansoʼob le máakoʼoboʼ. ¿Baʼaxten k-aʼalik? Yoʼolal le u tsʼook tʼaanoʼob tu yaʼalaj Jesús tiʼ le máaxoʼob tsaypacht le ka tu muchʼuba yéeteloʼoboʼ. Letiʼeʼ tu yaʼalaj: «Tiʼ yanen ta wéeteleʼex tak teʼ kʼiinoʼob táan u tsʼoʼokol tiʼ le yóokʼol kaabaʼ» (Mat. 28:20). Le baʼax tu yaʼalaj Jesúsoʼ jach táan u béeychajal teʼ kʼiinoʼobaʼ. ¿Baʼaxten k-aʼalik beyoʼ? Tumen cada añoeʼ ku yokjaʼ óoliʼ 300 mil máakoʼob.

7. ¿Baʼax kaʼapʼéel baʼal ken k-xakʼalte, yéetel baʼaxten?

⁷ Yaʼab tiʼ le máaxoʼob ku tsʼaʼabal xookoʼ ku yokjaʼob. Baʼaleʼ yaan jujuntúuloʼobeʼ bey chan saajkoʼobeʼ. Jatsʼuts u yilkoʼob le baʼax ku kankoʼoboʼ, baʼaleʼ maʼ tu kʼexik u kuxtaloʼob utiaʼal ka okjaʼanakoʼob. Wa yaan máax tiʼ ka tsʼáaik xookeʼ, k-ojleʼ taak a wáantik u kʼex u kuxtal utiaʼal ka u meyajt Jéeoba. Teʼ xookaʼ yaan k-ilik baʼax unaj k-beetik utiaʼal k-kʼuchul tu puksiʼikʼal le j-xoknáaloʼoboʼ yéetel bix jeʼel k-áantkoʼob u yaabiltoʼob Jéeobaeʼ. ¿Baʼaxten jach kʼaʼabéet k-xakʼaltik le kaʼapʼéel baʼaloʼobaʼ? Tumen maʼ xaaneʼ yaan u kʼuchul u kʼiinil k-chʼaʼtuklik wa kʼaʼabéet u seguer k-tsʼáaik xook tiʼ wa máax wa yaan k-xulik.

8. ¿Baʼaxten jeʼel u talamtal k-áantik le j-xoknáaloʼob u yaabiltoʼob Jéeobaoʼ?

⁸ Jéeobaeʼ u kʼáat ka k-meyajt tumen k-yaabiltmaj. Le oʼolaleʼ kʼaʼabéet k-áantik le j-xoknáaloʼob u yiloʼob yaabiltaʼanoʼob tumen Jéeoba yéetel ku kanáantaʼaloʼob. Kʼaʼabéet u naʼatkoʼobeʼ Jéeobaeʼ «u taata le paalaloʼob minaʼan u papáʼoboʼ, letiʼ xan kanáantik le viudaʼoboʼ» (Sal. 68:5). Lelaʼ jach kʼaʼanaʼan ka k-beete, tumen kéen u tsʼáaʼob cuenta yaabiltaʼanoʼob tumen Jéeobaeʼ yaan xan u maas yaabiltikoʼob. Chéen baʼaleʼ yaan j-xoknáaloʼobeʼ maʼ eʼesaʼab yaabilaj tiʼob tumen u taataʼob tu paaliloʼobiʼ, le oʼolal maʼ chéen chʼaʼabil u yilkoʼob Jéeoba bey juntúul taatatsil yaan u yaabilajeʼ (2 Tim. 3:1, 3). Le oʼolaleʼ kéen k-tsʼáa xook tiʼ wa máaxeʼ unaj k-kaʼansiktiʼ le jatsʼuts modos yaan tiʼ Jéeobaoʼ. Unaj k-áantik u creert yaabiltaʼan tumen Jéeoba yéetel u kʼáat ka yanaktiʼ kuxtal minaʼan u xuul. ¿Bix jeʼel k-áantkoʼobeʼ?

9, 10. ¿Máakalmáak le libroʼob unaj u meyajtoʼon utiaʼal k-tsʼáaik xookoʼ, yéetel baʼaxten?

 ⁹ Meyajnaktoʼon le libroʼob ¿Baʼax k-kanik teʼ Bibliaoʼ? yéetel Pʼáatkech ichil u yaabilaj Dios. Le libroʼobaʼ beetaʼan utiaʼal k-kʼuchul tu puksiʼikʼal le máaxoʼob tiʼ k-tsʼáaik xookoʼ. ¿Koʼox ilik baʼaxten? Jeʼex tu yáax xookil le libro k-Kanikoʼ ku núukaʼal le kʼáatchiʼobaʼ: ¿Kʼasaʼan wa Dios t-éetel? ¿Bix u yuʼubikuba Dios kéen muʼyajnakoʼon? Tsʼoʼoleʼ ku tsoʼolol xan wa jeʼel u páajtal a biskaba yéetel Dioseʼ. Le libro Yaabilajoʼ ku yáantik le j-xoknáal u tsʼáa cuentaeʼ wa ku beetik le baʼaxoʼob ku kaʼansik le Bibliaoʼ yaan u bin utsil tiʼ, tsʼoʼoleʼ yaan u maas biskuba yéetel Jéeoba. Kex yaʼab u téenel tsʼoʼok k-tsʼáaik xook yéetel le kaʼapʼéel libroʼobaʼ unaj k-líiʼsikba tubeel cada kéen xiʼikoʼon tsʼáa xook, kʼaʼajaktoʼoneʼ cada j-xoknáaleʼ maʼ junpʼéeliliʼ bix unaj u yáantaʼaliʼ le oʼolal kʼaʼabéet k-tuklik bix jeʼel k-áantik cada juntúuleʼ.

¹⁰ Chéen baʼaleʼ, ¿kux túun wa le j-xoknáal u kʼáat u kan junpʼéel baʼal maʼ tu tsoʼolol tiʼ le nuʼukuloʼob tsʼaʼantoʼon utiaʼal kaʼansajoʼ? Wa  beyoʼ maas maʼalob ka k-aʼaltiʼ ka u xok tu cuenta, beyoʼ maʼ tun xóotʼol le xook tsʼoʼok k-káajsik yéetel le libroʼob tsʼoʼok k-aʼalikoʼ.

11. 1) ¿Baʼax kʼiin unaj k-káajsik k-orar yéetel le j-xoknáaloʼ? 2) ¿Bix jeʼel k-áantik le j-xoknáal u naʼat kʼaʼabéet u orar máak táanil tiʼ le xook yéetel kéen tsʼoʼokkoʼ?

¹¹ Unaj k-káajsik le xook yéetel oraciónoʼ. ¿Baʼax kʼiin unaj u káajal k-orar yéetel le j-xoknáaloʼ? Wa tsʼoʼok u jéetsʼel le xookoʼ unaj k-beetik u maas séebaʼanil ku páajtal. Kʼaʼabéet k-áantik le j-xoknáal u yil kʼaʼabéet u yáantaj le espíritu santo utiaʼal k-naʼatik baʼax ku kaʼansik u Tʼaan Diosoʼ. ¿Bix jeʼel k-beetkeʼ? Yaan sukuʼunoʼobeʼ ku meyajtiʼob baʼax ku yaʼalik Santiago 1:5 utiaʼal u tsolik tiʼ u j-xoknáaloʼob baʼaxten kʼaʼabéet u orar máak táanil tiʼ le xookoʼ bey xan kéen tsʼoʼokok. Teʼeloʼ ku yaʼalik: «Wa yaan tiʼ teʼex ku bineltik naʼat tiʼeʼ seguernak u kʼáatik tiʼ Dios». Kéen tsʼoʼokok u xokikoʼob le tekstoaʼ ku kʼáatkoʼob tiʼ le j-xoknáaloʼ: «¿Bix a tuklik jeʼel a kʼáatik naʼat tiʼ Dioseʼ?». Maʼ xaaneʼ le j-xoknáaloʼ u taatsʼ ken u núuke: «Wa kin orar».

12. ¿Bix jeʼel u yáantkoʼon le Salmo 139:2 tak 4 utiaʼal k-kaʼansik tiʼ le j-xoknáal kʼaʼabéet u tsikbaltik tiʼ Jéeoba jach bix u yuʼubikuba?

¹² Unaj k-kaʼansiktiʼ bix unaj u orar. Aʼaltiʼeʼ Jéeobaeʼ jach taak u yuʼubik le oraciónoʼob ken u beetoʼ. Unaj k-kaʼansiktiʼeʼ jeʼel u páajtal k-aʼalik tiʼ Jéeoba bix k-uʼuyikba yéetel jeʼel xan u páajtal k-tsikbaltiktiʼ tak baʼaloʼob maʼ tu páajtal k-tsikbaltik tiʼ mix máak. Maʼ u tuʼubultoʼoneʼ Jéeobaeʼ u yojel baʼax yaan tu tsʼuʼ k-puksiʼikʼal yéetel t-tuukul (xok Salmo 139:2-4). Jeʼel xan u páajtal k-aʼaliktiʼeʼ maʼalob ka u kʼáat tiʼ Jéeoba ka áantaʼak u kʼex bix u tuukul yéetel ka u pʼat jujunpʼéel baʼaloʼob maʼ maʼalobtak suuk u beetkiʼ. Koʼox aʼalikeʼ tsʼoʼok u chan máan kʼiin táan a tsʼáaik xook tiʼ wa máax, chéen baʼaleʼ jach uts tu tʼaan u bin tiʼ fiestaʼob ku bin tu contra baʼax ku kaʼansik le Bibliaoʼ. Kex u yojel maʼ maʼalob u yilik Dioseʼ jach uts tu yich jujunpʼéel baʼaxoʼob ku beetaʼal teʼ fiestaoʼ, le oʼolal talam u yilik u pʼatik. Unaj k-áantik u yileʼ kʼaʼabéet u yaʼalik tiʼ Jéeoba baʼaxten ku talamtaltiʼ u pʼatik yéetel u kʼáatik ka áantaʼak u pʼekt le baʼaxoʼob kʼaastakoʼ (Sal. 97:10).

13. 1) ¿Baʼaxten kʼaʼabéet k-ilik ka séeb xiʼik le j-xoknáal teʼ muchʼtáambaloʼ? 2) ¿Baʼax jeʼel u páajtal k-beetik utiaʼal maʼ u yuʼubikuba jelaʼanil kéen xiʼik teʼ muchʼtáambaloʼ?

¹³ Unaj k-aʼaliktiʼ kʼaʼabéet u bin muchʼtáambal. ¿Baʼaxten? Tumen le baʼax ku kaʼansaʼal yéetel le baʼax ken u yil teʼ muchʼtáambaloʼoboʼ jeʼel u péeksik u puksiʼikʼal utiaʼal ka taakchajak u maas meyajtik Jéeobaeʼ. Le oʼolal maʼalob ka k-eʼestiʼ le video ¿Bix le muchʼtáambaloʼob ku beetaʼal teʼ Najil Reinooʼ? Tsʼoʼoleʼ k-invitartik ka xiʼikiʼ. Jeʼel xan u páajtal k-aʼaliktiʼ yaan k-máan chʼaʼeʼ. Uláakʼ baʼax jach maʼalob ka k-beeteʼ, letiʼe k-aʼalik tiʼ jejeláas sukuʼunoʼob ka u láakʼintoʼon k-tsʼáa le xookoʼ. Beyoʼ le j-xoknáaloʼ yaan u bin u kʼaj óoltik jujunpʼíitil le múuchʼuliloʼ, le kéen xiʼik túun teʼ muchʼtáambaloʼ maʼ jelaʼan ken u yuʼubilubaiʼ tumen yaan máaxoʼob u kʼaj óoliʼ.

14. ¿Baʼax kun péeksik le j-xoknáal utiaʼal u taaktal u maas meyajtik Jéeobaoʼ?

¹⁴ Toʼoneʼ k-kʼáat ka u maas meyajt Jéeoba le máaxoʼob k-tsʼáaik xook tiʼoboʼ (Efe. 4:13). Maʼ xaaneʼ kéen káajak u xook wa máaxeʼ chéen ku beetik yoʼolal le utsiloʼob ken u taas tiʼoʼ. Baʼaleʼ kéen káajak u maas yaabiltik Jéeobaeʼ ku naʼatik kʼaʼabéet u yáantik u maasil, maases le sukuʼunoʼob yanoʼob teʼ múuchʼuliloʼ (Mat. 22:37-39). Junpʼéel baʼax maʼ unaj u tuʼubul k-kaʼansik tiʼ le máaxoʼob k-tsʼáaik xookoʼ, letiʼe u yilkoʼob kʼaʼabéet u síijil t-puksiʼikʼal síik k-taakʼin utiaʼal u seguer u kʼaʼaytaʼal le Reino tuláakal yóokʼol kaaboʼ.

15. ¿Bix jeʼel k-áantik le j-xoknáal u kan u yutskíint le problemaʼob ku yantaltiʼ yéetel uláakʼ sukuʼunoʼoboʼ?

¹⁵ Unaj k-kaʼansiktiʼ bix unaj u aktáantik le problemaʼoboʼ. Koʼox aʼalikeʼ juntúul j-xoknáal  tsʼoʼok u káajal u jóokʼol kʼaʼaytaj kex maʼ okjaʼanajaʼaneʼ ku yaʼaliktoʼon aʼalaʼab baʼal tiʼ tumen juntúul sukuʼun. ¿Baʼax ken k-beet teʼ súutukiloʼ? Tu lugar k-ilik máax tiʼ yaan u culpaileʼ maas maʼalob ka k-eʼestiʼ baʼax ku yaʼalik le Bibliaoʼ. Maʼalob ka k-aʼaltiʼ yaan kaʼapʼéel baʼal jeʼel u páajtal u beetkeʼ: yáaxeʼ u perdonartik le sukuʼunoʼ, u kaʼapʼéeleʼ wa ku yuʼubik maʼ tu páajtal u tuʼubsik le baʼax beetaʼabtiʼoʼ unaj u tʼaan tu yéetel utiaʼal u yutskíintik le problemaoʼ, baʼaleʼ unaj u beetik yéetel yaabilaj (ket yéetel Mateo 18:15). Unaj k-áantik le j-xoknáal utiaʼal ka u tukult tubeel baʼax ken u yaʼal táanil tiʼ u bin tʼaan yéetel le sukuʼunoʼ. Kʼaʼabéet k-eʼesiktiʼ bix jeʼel u kaxtik áantaj teʼ JW Library^®, teʼ libro Áantaj utiaʼal u xakʼalxook u j-jaajkunajoʼob Jéeoba yéetel teʼ sitio jw.org^®, beyoʼ yaan u yilik bix jeʼel u yutskíintik le problemaoʼ. Wa ku kanik u yutskíint le problemaʼob táanil tiʼ u yokjaʼoʼ maas maʼalob ken u bisuba yéetel le sukuʼunoʼob teʼ múuchʼulil kéen tsʼoʼokok u yokjaʼoʼ.

16. ¿Baʼax utsil jeʼel u kʼamik le j-xoknáal kéen k-invitart uláakʼ sukuʼunoʼob teʼ tsʼaa xookoʼ?

¹⁶ Unaj k-aʼalik tiʼ le superintendente tiʼ circuito wa tiʼ uláakʼ sukuʼunoʼob ka u láakʼintoʼon k-tsʼáa le xookoʼ. ¿Baʼaxten unaj k-beetik? Jujunpʼéel baʼax oʼolaleʼ tsʼoʼok k-aʼalik teʼ xóotʼol 13, chéen baʼaleʼ yaan uláakʼ baʼax oʼolal unaj k-beetik. Jujuntúul j-kʼaʼaytajoʼobeʼ yoʼolal le baʼaxoʼob tsʼoʼok u aktáantkoʼob ichil u kuxtaloʼoboʼ maas jeʼel u yáantkoʼob le j-xoknáaloʼ. Koʼox aʼalikeʼ le j-xoknáaloʼ tu yilik u pʼatik u tsʼuʼutsʼ chamal, chéen baʼaleʼ maʼ béeyakiʼ. Kéen xiʼikoʼon k-tsʼáa xook tiʼeʼ jeʼel u páajtal k-invitartik juntúul j-kʼaʼaytaj talamchaj xan u pʼatik u tsʼuʼutsʼ chamal. Beyoʼ jeʼel u yaʼalik tiʼ le j-xoknáal jujunpʼéel baʼaloʼob jeʼel u yáantik u pʼat le viciooʼ. Wa k-invitartik juntúul sukuʼun úuch káajak u tsʼáaik xook, baʼaleʼ chan k-suʼlaktal k-tsʼáa le xookoʼ, jeʼel u páajtal k-aʼaliktiʼ ka u nuʼukt le xookoʼ. Jeʼex k-ilkoʼ kéen k-invitart uláakʼ sukuʼunoʼobeʼ yaʼab utsil jeʼel u taasik tiʼ le j-xoknáaloʼ. Maʼ u tuʼubultoʼoneʼ le baʼax taak k-beetkoʼ letiʼe k-áantik ka u maas meyajt Jéeobaoʼ.

17, 18. ¿Baʼaxoʼob unaj k-chʼaʼik en cuenta ken k-chʼaʼtukult wa yaan k-xulik k-tsʼáaik xook tiʼ juntúul j-xoknáal?

¹⁷ Wa le j-xoknáal maʼ tu beetik kʼeexoʼob ichil u kuxtaloʼ, maʼalob ka k-tukult tubeel wa yaan u seguer k-tsʼáaik xook tiʼ. Utiaʼal leloʼ kʼaʼabéet k-ilik bukaʼaj ku naʼatik tiʼ le baʼax ku xokikoʼ. Yaan máakeʼ ku chan xáantal táan u xook tak ken káajak u beetik kʼeexoʼob. Le oʼolal maʼalob ka k-tukle: «Tak tuʼux ku páajtaltiʼeʼ, ¿táan wa u yilik u beetik kʼeexoʼob utiaʼal u maas meyajtik Jéeoba? ¿Táan wa u tsʼáaik ichil u kuxtal le baʼax ku kanikoʼ?» (Mat. 28:20). Kex xaan u beetik kʼeexoʼob ichil u kuxtaleʼ kʼaʼabéet chíikaʼan u yilaʼal taak u maas meyajtik Jéeoba.

¹⁸ Chéen baʼaleʼ, ¿kux túun wa táan k-tsʼáaik xook tiʼ máax maʼ tu yilik wa kʼaʼanaʼan le xook k-tsʼáaiktiʼoʼ? Koʼox aʼalikeʼ juntúul a j-xoknáaleʼ tsʼoʼok u láaj xokik le libro k-Kanikoʼ yéetel maʼ xaaneʼ tsʼoʼok tak u káajsik le libro Yaabilajoʼ,  chéen baʼaleʼ mix juntéen xiʼik muchʼtáambal mix tiʼ le Kʼaʼajsajiloʼ. Tsʼoʼoleʼ wa ku jáan jóokʼol baʼax u beet kex maʼ jach kʼaʼanaʼaneʼ ku yaʼalik maʼ tun xook. Wa yaan juntúul a j-xoknáal beyoʼ kʼaʼabéet a tʼaan tu yéetel utiaʼal a wilkeʼex baʼax ken a beeteʼex. *

19. 1) ¿Baʼax jeʼel k-aʼalik tiʼ juntúul j-xoknáal maʼ tu yilik wa kʼaʼabéet u xookiʼ? 2) ¿Baʼaxten unaj k-chʼaʼik en cuenta bix u yuʼubikuba le j-xoknáaloʼ?

¹⁹ Kéen tsikbalnakech yéetel a j-xoknáaleʼ jeʼel u páajtal a kʼáatiktiʼeʼ: «¿Baʼax talamkúuntiktech a beetkaba u testigo Jéeoba?». Maʼ xaaneʼ kex tsʼoʼok u chan máan kʼiin káajak k-tsʼáaik xook tiʼeʼ, jeʼel u núukiktoʼoneʼ: «Uts tin tʼaan in xokik le Bibliaoʼ chéen baʼaleʼ mix bikʼin ken in beetinba u testigo Jéeoba». Wa bey u tuukuloʼ, ¿máasaʼ maas maʼalob ka xuʼuluk k-tsʼáaik xook tiʼ? Baʼaleʼ le baʼax ken u yaʼal le j-xoknáal kéen a beet le kʼáatchiʼ tiʼoʼ yaan u yeʼesiktech baʼaxten maʼ tu maas meyajtik Jéeoba. Maʼ xaaneʼ ku yuʼubik maʼ tu páajtal u jóokʼol kʼaʼaytaj joonaj joonajil. Kéen a naʼat bix u yuʼubikuba yéetel baʼax talamkúuntik tiʼeʼ maas jeʼel u páajtal a wáantikeʼ.

20. ¿Bix jeʼel u yáantkoʼon Hechos 13:48 k-il wa yaan u xuʼulul k-tsʼáaik xook tiʼ wa máaxeʼ?

²⁰ U jaajileʼ yaan j-xoknáaloʼobeʼ beyoʼob jeʼex le israelitaʼob kuxlajoʼob tu kʼiiniloʼob Ezequieloʼ. Jéeobaeʼ tu yaʼalaj tiʼ Ezequiel baʼax ku tuklik tu yoʼolaloʼob: «¡Uʼuy a wuʼuye! Tu táanoʼobeʼ techeʼ beyech juntúul máak jatsʼuts u kʼaay táan u kʼayik junpʼéel u kʼaayil yaabilaj mientras táan u paxik junpʼéel u nuʼukulil paax yaan u cuerdaileʼ. Letiʼobeʼ yaan u yuʼubikoʼob baʼax ka waʼalik, chéen baʼaleʼ mix máak ken u beet le baʼax ka waʼalikoʼ» (Eze. 33:32). Maʼ xaaneʼ talam k-ilik k-aʼalik tiʼ wa máax yaan u xuʼulul k-tsʼáaik xook tiʼ, baʼaleʼ maʼ u tuʼubultoʼoneʼ «jach chéen junpʼíit kʼiin pʼaatal» (1 Cor. 7:29). Le oʼolaleʼ tu lugar k-peʼertik tiempo yéetel juntúul máax maʼ taak u maas meyajtik Jéeobaeʼ, maas maʼalob ka k-kaxt «le máaxoʼob jach tu jaajil u yóol ku yeʼeskoʼob u kʼáat u kʼamoʼob le kuxtal minaʼan u xuuloʼ» (xok Hechos 13:48).

21. ¿Máakalmáak u tekstoil le año 2020, yéetel bix ken u yáantiloʼon?

²¹ U tekstoil le año 2020, yaan u yáantkoʼon k-il jach kʼaʼanaʼan k-beetik tubeel le meyaj kʼubéentaʼantoʼonoʼ: k-áantik le máakoʼob u meyajtoʼob Jéeobaoʼ. Le tekstoaʼ chʼaʼabaʼan tiʼ le baʼax tu yaʼalaj Jesús ka tu muchʼuba yéetel u discípuloʼob tu montañail Galileaoʼ. Le oʼolaleʼ maʼ k-tuʼubsik u tekstoil le año 2020: «Kaʼanseʼexoʼob utiaʼal ka taalakoʼob tin paach. Tsʼáaʼex u yokjaʼob» (Mat. 28:19).