1. ¿Baʼax ku beetik u kaajal Jéeoba teʼ kʼiinoʼobaʼ?

 LE Bibliaoʼ u yaʼalmiliʼeʼ yaʼab máakoʼob ken u ofrecertubaʼob u meyajtoʼob Jéeoba jeʼex u kaʼansik Jesúsoʼ (Sal. 110:3). Teʼ kʼiinoʼobaʼ táan u béeytal le profecíaaʼ tumen cada añoeʼ le máaxoʼob meyajtik Diosoʼ ku síijil tu puksiʼikʼaloʼob u kʼaʼaytajoʼob u millonesil horaʼob. Chéen baʼaleʼ maʼ chéen leloʼ baʼaxeʼ ku yilkoʼob xan u yáantkoʼob u maasil sukuʼunoʼob. Le ancianoʼob yéetel le siervo ministerialoʼob xanoʼ ku máanskoʼob yaʼab tiempo táan u líiʼskubaʼob utiaʼal le jaatsoʼob ken u máansoʼob teʼ muchʼtáambaloʼoboʼ. Tsʼoʼoleʼ ku yilik xan u xíimbaltikoʼob wa u tʼankoʼob le sukuʼunoʼoboʼ. ¿Baʼax péeksikoʼob u beetoʼob? Letiʼe yaabilaj ku yuʼubikoʼob yoʼolal Jéeobaoʼ bey xan yoʼolal u yéet máakiloʼoboʼ (Mat. 22:37-39).

2. Jeʼex u yaʼalik Romanos 15:1-3, ¿baʼax ejemploil tu tsʼáajtoʼon Jesús?

² Jesúseʼ tu tsʼáaj táanil u yutsil u maasil, le oʼolal toʼoneʼ k-ilik k-beetik xan beyoʼ (xok Romanos 15:1-3). Leloʼ jach ku taasiktoʼon utsil, Jesúseʼ tu yaʼalaj: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hech. 20:35).

3. ¿Baʼax ken k-il teʼ xookaʼ?

³ Teʼ xookaʼ yaan k-ilik jujunpʼéel baʼax tu beetaj Jesús yoʼolal u maasil yéetel bix jeʼel k-beetik jeʼex letiʼeʼ. Tsʼoʼoleʼ yaan k-ilik baʼax jeʼel u yáantkoʼon k-tsʼáa táanil u yutsil u maasileʼ.

4. ¿Bix tu yeʼesil Jesús ku tsʼáaik táanil u yutsil u maasil?

⁴ Kex kaʼanaʼaneʼ Jesúseʼ tu yilaj u yáantik u maasil. Koʼoneʼex tuukul tiʼ le baʼax tu beetaj le ka bin ilbil tumen yaʼab máakoʼob le tiaʼan tiʼ junpʼéel montañaoʼ, maʼ xaaneʼ naatsʼ tiʼ Capernaúm. Jesúseʼ kaʼanaʼan wal kaʼacheʼ tumen bul áakʼab táan u orar. Chéen baʼaleʼ le ka tu yilaj le máakoʼob óotsiloʼob yéetel kʼojaʼanoʼoboʼ tu chʼaʼajtiʼob óotsilil. Jesúseʼ maʼ chéen tu tsʼakoʼobiʼ baʼaxeʼ jach tu líiʼsaj u yóoloʼob yéetel junpʼéel jatsʼuts discurso (Luc. 6:12-20).

5. Kex kaʼanaʼan le taatatsiloʼoboʼ, ¿bix jeʼel u beetkoʼob jeʼex Jesúseʼ?

⁵ U poolil le familiaʼoboʼ bix jeʼel u beetkoʼob jeʼex Jesúseʼ. Koʼoneʼex tuukul tiʼ juntúul taatatsil jach kaʼanaʼan kéen suunak meyaj, chéen baʼaleʼ teʼ kʼiinoʼ yaantiʼob u adoraciónoʼob ich familia. Letiʼeʼ ku taaktal u pʼatik tuláakʼ kʼiin, pero ku kʼáatik u yáantaj Jéeoba. Jéeoba túuneʼ ku núukik u oración le oʼolal ku béeytal u xook yéetel u familia jeʼex u beetkoʼob cada semanaeʼ. U paalaloʼob túuneʼ ku tsʼáaikoʼob cuentaeʼ le baʼaloʼob espiritualoʼoboʼ letiʼe baʼaxoʼob maas importante utiaʼal u taataʼoboʼ.

6. ¿Bix úuchik u dedicartik tiempo Jesús tiʼ u maasil?

⁶ Jesúseʼ tu dedicartaj tiempo tiʼ u maasil. Juntéenjeakeʼ Jesúseʼ le ka tu yojéeltaj tsʼoʼok u kíimsaʼal Juan Bautistaeʼ jach tristechaji, le Bibliaoʼ ku yaʼalik: «Ka tu yuʼubaj Jesús lelaʼ naʼak tiʼ junpʼéel barcoeʼ ka bin tiʼ junpʼéel lugar tuʼux jeʼel u páajtal u yantal tu juunaleʼ» (Mat. 14:10-13). Yaan máakoʼobeʼ kéen kíimik wa máax tiʼobeʼ maas uts tu tʼaan u yantaloʼob tu juunaloʼob. Maʼ xaaneʼ bey u kʼáat u beet Jesús kaʼachoʼ, chéen baʼaleʼ maʼ béeychajiʼ tumen yaʼab máakoʼob páaʼtik teʼ tuʼux binoʼ. ¿Baʼax túun tu beetaj? Letiʼeʼ tuukulnaj tiʼ le máakoʼoboʼ «ka tu chʼaʼaj óotsilil tiʼob». Jesúseʼ tu tsʼáaj cuenta kʼaʼabéet u kaʼansaʼaltiʼob baʼax uts tu tʼaan Dios le oʼolaleʼ tu yilaj u yáantkoʼob. Le Bibliaoʼ ku yaʼalikeʼ «joʼopʼ u kaʼansiktiʼob yaʼab baʼaloʼob» (Mar. 6:31-34; Luc. 9:10, 11).

7, 8. Aʼal junpʼéel bix u seguertaʼal u ejemplo Jesús tumen le ancianoʼoboʼ.

 ⁷ Bix u seguertik u ejemplo Jesús le ancianoʼoboʼ. ¿Máasaʼ jach k-preciartik le baʼax ku beetik le ancianoʼoboʼ? Yaʼab tiʼ toʼoneʼ maʼ k-ojel tuláakal le meyaj ku beetkoʼoboʼ. Jeʼex le sukuʼunoʼob ku yáantajoʼob ichil le Comité tiʼ Enlace yéetel le Hospitaloʼoboʼ ku bin u yiloʼob le sukuʼunoʼob teʼ hospitaloʼoboʼ, yaʼab u téeneleʼ kex tsʼuʼ áakʼab. Le ancianoʼob yéetel u familiaʼoboʼ ku tsʼáaikoʼob táanil u yutsil le sukuʼunoʼoboʼ tumen ku chʼaʼikoʼob óotsilil tiʼob.

⁸ Le ancianoʼoboʼ ku yáantajoʼob utiaʼal u beetaʼal lugaroʼob tuʼux ku muchʼkuba u testigoʼob Jéeoba bey xan teʼ tuʼux ku yúuchul junpʼéel nojoch looboʼ. Chéen baʼaleʼ maʼ chéen leloʼ, le ancianoʼoboʼ ku máanskoʼob yaʼab tiempo táan u kaʼansajoʼob, táan u yáantkoʼob le sukuʼunoʼoboʼ wa táan u líiʼskoʼob u yóoloʼob. Le oʼolaleʼ jach maʼalob ka k-felicitart le ancianoʼoboʼ bey xan u familiaʼob. K-kʼáatik tiʼ Jéeoba ka u boʼottiʼob tuláakal le bukaʼaj meyaj ku beetkoʼoboʼ. Chéen baʼaleʼ le ancianoʼoboʼ unaj u tsʼáaikoʼob u pʼiis le meyaj ku beetkoʼoboʼ. Maʼ unaj u descuidartik u familiaʼob chéen ikil u chʼíikil u beetoʼob le meyaj kʼubéentaʼantiʼob teʼ múuchʼuliloʼ.

9. Jeʼex u yaʼalik Filipenses 2:4, 5, ¿baʼax tuukulil unaj u yantaltoʼon?

⁹ (Xok Filipenses 2:4, 5). Yaʼab tiʼ toʼoneʼ maʼ ancianoʼoniʼ, chéen baʼaleʼ kex beyoʼ jeʼel k-kaanbal tiʼ le bix úuchik u  tsʼáaik Jesús táanil u yutsil u maasiloʼ. Le Bibliaoʼ ku yaʼalikeʼ letiʼeʼ «tu beetuba bey juntúul esclavoeʼ» (Fili. 2:7). ¿Baʼax k-kanik tiʼ le baʼax ku yaʼalik le tekstoaʼ? Juntúul esclavo wa juntúul j-meyajeʼ ku kaxtik bix jeʼel u lúubul utsil tiʼ u tsʼuulileʼ. Toʼoneʼ u esclavoʼon Jéeoba yéetel k-meyajtik le sukuʼunoʼoboʼ, le oʼolaleʼ k-kaxtik bix jeʼel u páajtal k-maas meyajtikoʼobeʼ. Koʼoneʼex ilik bix jeʼel u páajtal k-beetkeʼ.

10. ¿Baʼax unaj k-jach ilik?

¹⁰ Jach ilawil baʼax tuukulil yaantech. Jeʼel u páajtal a tuukul tiʼ le kʼáatchiʼobaʼ: «¿Dispuestoen wa in beet wa baʼax yoʼolal u maasil? ¿Baʼax jeʼel in waʼalik wa ka aʼalaʼakten ka in xíimbalt juntúul sukuʼun yaan u jaʼabil bey xan ka in bis muchʼtáambal juntúul kiik yaan u jaʼabileʼ? ¿Kin ofrecerkinba wa utiaʼal u beetaʼal limpieza teʼ tuʼux ku beetaʼal asamblea wa utiaʼal u tsʼaʼabal mantenimiento teʼ tuʼux ku yantaltoʼon muchʼtáambaloʼoboʼ?». Le ka t-kʼubaj k-kuxtal tiʼ Jéeobaeʼ t-aʼalajtiʼeʼ yaan u meyajtoʼon k-tiempo bey xan tuláakal le baʼax yaantoʼon utiaʼal k-meyajtikoʼ. Jéeobaeʼ jach ku kiʼimaktal u yóol kéen u yil ku meyajtoʼon tuláakal le baʼax yaantoʼon utiaʼal k-áantik u maasiloʼ. Chéen baʼaleʼ, ¿baʼax jeʼel u páajtal k-beetik wa k-tsʼáaik cuenta kʼaʼabéet k-mejorar tiʼ leloʼ?

11. ¿Bix u yáantkoʼon le oración utiaʼal k-tsʼáaik táanil u yutsil u maasiloʼ?

¹¹ Orarnen tiʼ Jéeoba. Wa ka tsʼáaik cuenta yaan tiʼ baʼax kʼaʼabéet a mejorar, chéen baʼaleʼ minaʼantech u tsʼíibolalil a beetkeʼ kʼáat áantaj tiʼ Jéeoba. Maʼ a suʼlaktal a waʼaltiʼ bix a wuʼuyikaba, yéetel kʼáattiʼ ka u tsʼáatech u tsʼíibolalil yéetel u páajtalil a beetik (Fili. 2:13).

12. ¿Bix jeʼel u yáantajoʼob ichil u kaajal Jéeoba le táankelmoʼob okjaʼanajaʼanoʼoboʼ?

¹² Wa táankelmech yéetel tsʼoʼok a wokjaʼeʼ kʼáat tiʼ Jéeoba ka u tsʼáatech u tsʼíibolalil a maas meyajtik teʼ múuchʼuliloʼ. Tiʼ jujunpʼéel lugaroʼobeʼ maas yaʼab ancianoʼob yaan ke siervo ministerialoʼob, yéetel yaʼab tiʼ le siervo ministerialoʼoboʼ tsʼoʼok u chan yantal u jaʼabiloʼob. U kaajal Jéeobaeʼ táan u bin u maas nojochtal, le oʼolaleʼ kʼaʼabéet táankelmoʼob utiaʼal u yáantkoʼob le ancianoʼob u kanáantoʼob le múuchʼuliloʼoboʼ. Wa ka bin áantaj tuʼux kʼaʼabéeteʼ yaan a lúubul utsil tiʼ Jéeoba, yaan u yúuchul tʼaan maʼalob ta woʼolal yéetel yaan u kiʼimaktal a wóol a wáantik u maasil.

13, 14. ¿Baʼax jeʼel u páajtal k-beetik yoʼolal le sukuʼunoʼoboʼ? (Ilawil le dibujo yaan tu yáax páginail le revistaaʼ).

¹³ Jach ilawil baʼax kʼaʼabéet tiʼ u maasil. Le apóstol Pablooʼ tu yaʼalaj tiʼ le hebreoʼoboʼ: «Maʼ u tuʼubulteʼex a beetkeʼex uts bey xan a wáantkeʼex uláakʼ máakoʼob yéetel le baʼaxoʼob yaanteʼexoʼ, tumen le baʼaloʼobaʼ bey junpʼéel sacrificio ku kʼuʼubul tiʼ Dioseʼ yéetel letiʼeʼ jach ku kiʼimaktal u yóol le kéen beetaʼak lelaʼ» (Heb. 13:16). ¡Jach túun maʼalob le consejo tu tsʼáajtiʼoboʼ! Tumen le maʼ úuch u túuxttiʼob le cartaaʼ le sukuʼunoʼob yanoʼob Judeaoʼ yanchaj u pʼatik u yotochoʼob, u negocioʼob yéetel u láakʼtsiloʼob utiaʼal u binoʼob teʼ montañaʼoboʼ (Mat. 24:16). Teʼ kʼiinoʼob jeʼeloʼ jach kʼaʼabéetchaj u yáantkubaʼob. Wa antes tiʼ u púutsʼloʼob tu beetoʼob le baʼax aʼalaʼabtiʼob tumen apóstol Pablooʼ maʼ yaj wal tu yililoʼob u kuxtaloʼob teʼ tuʼux binoʼoboʼ.

¹⁴ Maʼ xaaneʼ le sukuʼunoʼoboʼ maʼ mantatsʼ ken u yaʼaloʼobtoʼon baʼax kʼaʼabéettiʼobiʼ. Koʼoneʼex tuukul tiʼ juntúul  sukuʼun ku kíimil u yatan. ¿Kʼaʼabéet wa áantajtiʼ utiaʼal u beetik u yoʼoch, utiaʼal u bin wa tuʼux bey xan utiaʼal u beetik wa baʼax meyajil tu yotoch? Maʼ xaaneʼ kex kʼaʼabéet áantajtiʼeʼ maʼ ken u yaʼal mix baʼal utiaʼal maʼ u tsʼáaik junpʼéel kuuch tiʼ mix máak. Chéen baʼaleʼ wa k-áantikeʼ jeʼel u kiʼimaktal u yóoleʼ. Mix juntéen unaj k-tuklik wa jeʼel u yáantaʼal tumen uláakʼ sukuʼuneʼ wa jeʼel u kʼáatiktoʼon áantaj kéen kʼaʼabéetchajaktiʼeʼ. Maʼalob ka k-tukle: «Wa teneʼ, ¿baʼax uts tin tʼaan ka beetaʼak tin woʼolal?».

15. ¿Baʼax unaj k-beetik wa k-kʼáat k-áant u maasil?

¹⁵ Tsʼáa tuʼux u náatsʼal u maasil. Teʼ múuchʼuliloʼoboʼ u suukileʼ yaan sukuʼunoʼob yéetel kiikoʼob uts tu tʼaan u yáantkoʼob u maasil. Letiʼobeʼ maʼatech u yuʼubikoʼob junpʼéel kuuch u yáantkoʼob u maasil. Baʼaxeʼ mantatsʼ dispuestoʼob u yáantoʼon, le oʼolaleʼ toʼoneʼ k-kʼáat k-beet jeʼex letiʼobeʼ. Alan, juntúul anciano yaan 45 años tiʼeʼ, tu chʼaʼtuklaj u yeʼesik tiʼ u maasil jeʼel u páajtal u náatsʼloʼob tu yiknaleʼ. Letiʼeʼ tuukulnaj yoʼolal u ejemplo Jesúseʼ ka tu yaʼalaj: «Kex Jesús juntúul máak jach ocupado kaʼacheʼ tuláakal máak uts tu tʼaan u yantal tu yéetel. Maʼ saajkoʼob u kʼáatoʼob áantajtiʼ kaʼachiʼ. Le máakoʼoboʼ u yojloʼobeʼ jach tu jaajil yaabiltaʼanoʼob. Junpʼéel tiʼ le baʼax maas kin tsʼíiboltikoʼ letiʼe in beetkinba jeʼex Jesúseʼ yéetel ka ilaʼaken tumen u maasil bey juntúul máak jeʼel u páajtal u náatsʼal máak tu yiknaleʼ, ku yeʼesik yaabilaj bey xan utsil».

16. ¿Bix u yáantkoʼon Salmo 119:59, 60 utiaʼal k-seguertik u ejemplo Jesús?

¹⁶ Maʼ unaj u lúubul k-óol wa k-ilik maʼ tu páajtal k-beetik jach jeʼex tu beetil Jesúsoʼ  (Sant. 3:2). Juntúul máax ku kaʼansaʼal u beet junpʼéel meyajeʼ maʼ tu páajtal u beetik jach jeʼex u beetik le máax kaʼansikoʼ. Chéen baʼaleʼ wa ku tsʼáaik u yóoleʼ jujunpʼíitileʼ jeʼel u maas maʼalobtal bix u beetkeʼ. Bey túun xanoʼ wa k-tsʼáaik k-óol k-beet le baʼax k-kanik teʼ Biblia yéetel k-ilik k-utskíintik le baʼaxoʼob maʼ maʼalobtak k-beetkoʼ yaan u béeytal k-seguertik u ejemplo Jesús (xok Salmo 119:59, 60).

17, 18. ¿Baʼax utsiloʼob ku taasik k-tsʼáaik táanil u yutsil u maasil jeʼex tu beetil Jesúseʼ?

¹⁷ Le baʼax k-beetkoʼ jeʼel u péeksik u maasileʼ. Juntúul anciano ku kʼaabaʼtik Timeʼ, ku yaʼalik: «Teʼ múuchʼuliloʼ yaan táankelmoʼob tsʼoʼok u kʼuchul u beet u siervo ministerialiloʼob tumen tu yiloʼob bix u tsʼáaik u yóol uláakʼ sukuʼunoʼob u yáantoʼob u maasil. Le táankelmoʼobaʼ jach ku yáantkoʼob le ancianoʼoboʼ bey xan le múuchʼuliloʼ».

¹⁸ Le yóokʼol kaabaʼ chuup yéetel máaxoʼob ku kaxtik chéen u yutsiloʼob, chéen baʼaleʼ toʼoneʼ maʼ beyoʼoniʼ. K-ilik bix úuchik u tsʼáaik Jesús táanil u yutsil u maasileʼ ku péeksikoʼon k-beet xan beyoʼ. U jaajileʼ maʼ tu páajtal k-beetik jach jeʼex tu beetil letiʼoʼ, chéen baʼaleʼ jeʼel u páajtal k-tsʼáaik k-óol k-seguert u ejemploeʼ (1 Ped. 2:21). Wa k-tsʼáaik táanil u yutsil u maasil jeʼex tu beetil Jesúseʼ jach yaan u kiʼimaktal k-óol tumen táan k-lúubul utsil tu táan Jéeoba.