Síijen tu añoil 1954 tu kaajil Saint Paul (Minnesota, Estados Unidos). In láakʼtsiloʼobeʼ católicoʼob kaʼachi yéetel maʼ jach óotsiloʼoniʼ. Toʼoneʼ cinco u túulaloʼon, juntúul in sukuʼun yéetel óoxtúul in wíitsʼinoʼob. Tin paalileʼ xooknajen tiʼ junpʼéel escuela católica yéetel tin beetaj in chan sacristanil. Kex beyoʼ óoliʼ mix baʼal in wojel yoʼolal le Bibliaoʼ. Kex kin creertik yaan juntúul Dios beet tuláakal baʼaleʼ xuʼul in bin Iglesia.

Le yáax año káajak in xokik in abogadoil teʼ universidadoʼ juntúul sukuʼun yéetel u yataneʼ tu xíimbaltenoʼob tin wotoch. Como táan kaʼach in pʼoʼeʼ tu yaʼaloʼobten jeʼel u suutoʼob tuláakʼ kʼiineʼ. Le ka suunajoʼobeʼ tin beetajtiʼob le kaʼapʼéel kʼáatchiʼobaʼ: «¿Baʼaxten maas maʼalob u bin tiʼ le kʼasaʼan máakoʼoboʼ? ¿Baʼax unaj u beetik máak utiaʼal u yantal kiʼimak óolal tiʼ?». Tin chʼaʼajtiʼob le libro La verdad que lleva a vida eterna yéetel le Biblia Traducción del Nuevo Mundo de las Santas Escrituras, le yaʼax u paacheʼ. Káaj xan in xook tu yéeteloʼob. Yaʼab jatsʼuts baʼaloʼob tin kanaj. Jach kiʼimakchaj  in wóol le ka tin kanaj u Reino Dioseʼ letiʼe gobierno kʼaʼabéet tiʼ wíinikoʼ yéetel letiʼ kun nuʼuktik tuláakal yóokʼol kaab. Tin naʼateʼ u gobierno wíinik beetik u muʼyaj máak yéetel letiʼ xan beetik u yantal injusticia.

Tu yookbal u añoil 1982 ka tin kʼubaj in kuxtal tiʼ Jéeoba yéetel okjaʼanajen láayliʼ teʼ año jeʼeloʼ. Okjaʼanajen teʼ asamblea tiʼ distrito tu kʼaabaʼtaj «Verdad del Reino», teʼ estadio St. Paul Civic Centeroʼ. Ka máan junpʼéel semana okjaʼanakeneʼ suunajen teʼ estadiooʼ, suunajen utiaʼal in beetik le examen tuʼux kun ilbil wa jeʼel u páajtal in beetik in abogadoileʼ. Tu mesil octubre ka aʼalaʼabten tin máansaj le examenoʼ.

Teʼ asamblea tuʼux okjaʼanajenoʼ tin kʼaj óoltaj Mike Richardson, letiʼeʼ ku meyaj kaʼach teʼ Betel yaan Brooklynoʼ (Nueva York). Tu tsikbaltajteneʼ teʼ Beteloʼ maʼ úuch káajak u meyaj u Oficinail Asuntos Legalesiʼ. Jáan taal tin tuukul u tsikbalil le etíope yaan tiʼ Hechos 8:36, ka tin tuklaj: «¿Baʼax ku bineltik utiaʼal in bin meyaj tu Oficinail Asuntos Legales?». Ka túun tin chupaj le solicitud utiaʼal in bin meyaj Beteloʼ.

Le ka tin beetinba u testigo Jéeobaeʼ maʼ kiʼimakchaj u yóol in taataʼobiʼ. In papáeʼ tu kʼáatajten wa yaan u taasikten utsil in meyaj Betel. Tin waʼalajtiʼeʼ chéen junpʼíit taakʼin kun tsʼaabilten utiaʼal in wáantkinba jeʼex u tsʼaʼabal tiʼ u maasil betelitaʼoboʼ.

Maʼ béeychaj in jáan okol meyaj tu betelil Brooklyniʼ tumen táan in meyaj kaʼach bey abogado tiʼ junpʼéel tribunaleʼ. Hasta tu añoil 1984 ka béeychaj in wokol meyaj Betel. Le ka kʼucheneʼ tsʼaʼaben meyaj tu Oficinail Asuntos Legales. In meyaj bey abogado antes in wokol Beteleʼ jach tu yáanten.

Tu mesil noviembre tiʼ 1983, u testigoʼob Jéeobaeʼ tu manoʼob le Teatro Stanley. Le teatroaʼ tiaʼan kaʼach tu noj kaajil Jersey City (Nueva Jersey). Le sukuʼunoʼoboʼ tu kʼáatoʼob tiʼ le autoridad u permisoil u yutskíintikoʼob u corrienteil yéetel u plomeriail le teatrooʼ. Le sukuʼunoʼoboʼ tu yaʼaloʼob tiʼ le autoridadoʼ u kʼáat u yutskíintoʼob le teatrooʼ utiaʼal u beetkoʼob asambleaʼobiʼ. Chéen baʼaleʼ aʼalaʼabtiʼobeʼ maʼ tu páajtal u tsʼaʼabaltiʼob le permisooʼ tumen le teatrooʼ tiaʼan tuʼux yaan yaʼab negocioʼobeʼ, yéetel le leyoʼ ku yaʼalikeʼ junpʼéel religióneʼ maʼ tu páajtal u muchʼkuba tuʼux yaan yaʼab negocioʼobiʼ. Le sukuʼunoʼoboʼ tu kʼáatoʼob ka kaʼa xakʼaltaʼak tumen le juez le baʼax tu kʼáatoʼoboʼ, baʼaleʼ maʼ beetaʼabiʼ.

 Jach teʼ yáax semana kʼuchken Beteloʼ le sukuʼunoʼoboʼ binoʼob takpool tu táan le tribunal federaloʼ. Teneʼ in wojel bix u juzgartaʼal le takpoloʼob beyaʼ tumen meyajnajen dos años teʼ tribunal federal yaan Saint Pauloʼ (Minnesota). Juntúul tiʼ le abogadoʼob defenderkoʼonoʼ tu yaʼaleʼ wa le Teatro Stanley tsʼoʼok u meyaj utiaʼal u beetaʼal conciertoʼob, u máansaʼal películaʼob yéetel utiaʼal uláakʼ baʼaloʼobeʼ, ¿baʼaxten túun ku prohibirtaʼal u muchʼkuba máak utiaʼal u kaanbal tiʼ Dios? Le juezoʼoboʼ tu yaʼaloʼobeʼ maʼ maʼalob le baʼax beetaʼabtoʼonoʼ, ka tu beetoʼob u tsʼaʼabaltoʼon le permisooʼ. Desde teʼ kʼiin jeʼeloʼ tin tsʼáaj cuentaeʼ tiʼ Jéeobaeʼ ku meyaj le leyoʼob ku tsʼáaik le gobiernoʼob utiaʼal ka béeyak le baʼax u tukultmoʼ. Jach kiʼimakchaj in wóol úuchik in wáantaj utiaʼal u defendertaʼal u kaajal Jéeoba.

Maʼ tu bisaj mix junpʼéel año u yutskíintaʼal tubeel le teatrooʼ. Le oʼolal tiʼ beetaʼab u graduacionil le xook 79 tiʼ u escuelail Galaadoʼ. Lelaʼ úuch 8 tiʼ septiembre tiʼ 1985. Ka máan kʼiineʼ le teatrooʼ kʼuch kʼaj óoltbil bey u Najil Asamblea Jersey Cityeʼ. Nojoch baʼal tin wilil in wantal ichil le abogadoʼob ku defenderkoʼob u kaajal Diosoʼ. Minaʼan uláakʼ meyaj tu beetaj u kiʼimaktal in wóol jeʼex in meyaj utiaʼal Jéeobaeʼ. Maʼ tin tuklaj wa yaan u tsʼáaikten Jéeoba uláakʼ meyajoʼob ichil u kaajaliʼ.

Tu añoiloʼob 1980, le doctoroʼob yéetel le hospitaloʼoboʼ maʼatech u respetarkoʼob le derecho yaan tiʼ u testigoʼob Jéeoba utiaʼal ka tsʼaʼakakoʼob x-maʼ kʼiʼikʼiʼ. Maases le kiikoʼob embarazadaʼob maʼatech u respetartaʼal baʼax u kʼáatoʼoboʼ. Le juezoʼoboʼ ku yaʼalikoʼobeʼ deporsi unaj u kʼamkoʼob kʼiʼikʼ tumen wa ku kíimil le maamatsiloʼ yaan u pʼáatal tu juunal le chaambaloʼ.

Tu kʼiinil 29 tiʼ diciembre tiʼ 1988, síij u chaambal juntúul kiik ku kʼaabaʼtik Denise Nicoleau. Chéen baʼaleʼ úuchik u síijil le chaambaloʼ joʼopʼ u sen máansik kʼiʼikʼ, ka túun éem u hemoglobina tak 5. Le oʼolal le doctoroʼ tu yaʼalajtiʼ ka u chaʼa u tsʼaʼabal kʼiʼikʼ tiʼ, pero letiʼeʼ maʼ tu yóotiʼ. Ka sáaschaj uláakʼ kʼiineʼ le doctoroʼoboʼ tu yaʼaloʼob tiʼ juntúul juez ka u tsʼáa u permisoil u tsʼaʼabal kʼiʼikʼ tiʼ le kiikoʼ. Le juezoʼ kex maʼ u yuʼub baʼax ku tuklik le kiikoʼ tu tsʼáaj le permisooʼ, tsʼoʼoleʼ mix baʼal tu yaʼalaj tiʼ le kiikoʼ mix tiʼ u yíichamiʼ.

Viernes 30 tiʼ diciembre ka tsʼaʼab kʼiʼikʼ tiʼ le kiikoʼ, tsʼaʼabtiʼ kex u yíicham yéetel u láakʼtsiloʼobeʼ maʼ de acuerdoʼobiʼ. Tsʼoʼoleʼ teʼ kʼiin xanoʼ maʼach tumen le policía jujuntúul tiʼ u láakʼtsiloʼob le kiikoʼ bey xan jujuntúul ancianoʼob. Aʼalaʼabeʼ maʼ tu chaʼikoʼob bin u máan le doctoroʼob utiaʼal ka xiʼikoʼob u tsʼáaʼob le kʼiʼikʼoʼ. Tu jaʼatskabil sábado 31 tiʼ diciembreeʼ máansaʼan tiʼ noticia le baʼax úuchoʼ.

 Binoʼon takpool tu táan le tribunal superioroʼ. Tu jaʼatskabil luneseʼ tʼaanajen yéetel Milton Mollen, le juez kun ilik le takpooloʼ. Tin tsikbaltajtiʼ le baʼax ku yúuchloʼ ka tin waʼalajtiʼeʼ le uláakʼ juezoʼ tu firmartaj le juʼun tuʼux ku yaʼalik ka tsʼaʼabak kʼiʼikʼ tiʼ le kiikoʼ kex maʼ tsikbaltaʼak baʼax acuerdoil jeʼel u chʼaʼableʼ. Le juez Mollenoʼ tu yaʼalajten ka xiʼiken in wil tu oficina utiaʼal k-tsikbaltik le baʼax úuchoʼ yéetel utiaʼal k-ilik baʼax leyiloʼob unaj u chʼaʼabal en cuenta. Tu láakʼinten sukuʼun Philip Brumley, u superintendenteil le departamento tuʼux kin meyajoʼ. Le juezoʼ tu yaʼalaj tiʼ u abogadoil le hospital ka xiʼik xanoʼ. Xáanchaj maʼ t-kʼuchul tiʼ junpʼéel acuerdo. Le sukuʼun Brumleyoʼ hasta tu tsʼíibtaj tiʼ junpʼéel chan juʼun: «Jach kʼaʼam a tʼaan waleʼ». Maʼalob le baʼax tu yaʼalajtenoʼ, tumen le táan in wilik in weʼesik maʼ jaaj le baʼax ku yaʼalik le uláakʼ abogadooʼ káaj in pʼuʼujul.

Ka máan junpʼéel hora táan k-tsikbal yoʼolal le jeʼeloʼ, le juez Mollenoʼ tu yaʼaleʼ kéen sáasak tuláakʼ kʼiinoʼ toʼon ken k-yáax atenderbil. Le ka jóokʼoʼon tu oficina le juezoʼ tu yaʼaleʼ u abogadoil le hospitaloʼ maʼ chéen chʼaʼabil ken u ganartoʼoniʼ. Yoʼolal le baʼax tu yaʼaloʼ tin wileʼ Jéeobaeʼ táan u yeʼesiktoʼon jeʼel k-ganareʼ. Tin tsʼáaj cuenta jach táan k-áantaʼal tumen Jéeoba utiaʼal u béeychajal le baʼax u kʼáatoʼ.

Óoliʼ bul áakʼab táan k-ilik baʼax ken k-aʼal utiaʼal k-defendertik le kiikoʼ. Le tuʼux kun beetbil le juiciooʼ maʼ náach yanil tiʼ u Betelil Brooklyniʼ, le oʼolal u maas yaʼabil le sukuʼunoʼob ku múul meyajoʼob t-éeteloʼ xíimbalil úuchik u binoʼob tak teʼeloʼ. Ka tsʼoʼok u yuʼubik le kantúul juezoʼob le baʼax t-aʼaloʼ, tu yaʼaloʼobeʼ maʼ maʼalob úuchik u tsʼaʼabal kʼiʼikʼ tiʼ le kiikoʼ. Tu yaʼaloʼob xaneʼ maʼ maʼalob le baʼax tu beetaj le yáax juezoʼ tumen maʼ tu kʼáataj tiʼ le kiik wa de acuerdooʼ. Le baʼax tu beetoʼ ku bin tu contra le derecho yaan tiʼ máakoʼ.

Maʼ úuch tiʼ leloʼ le u maas nojoch tribunalil u estadoil Nueva Yorkeʼ tu yaʼaleʼ unaj u respetartaʼal u derecho le kiikoʼ. Lelaʼ letiʼe yáax tiʼ le kanpʼéel nukuch juicioʼob yaan yil yéetel le kʼiʼikʼ ganartaʼab Estados Unidosoʼ. Le juicioʼoboʼ ganartaʼab tiʼ jejeláas estadoʼob, yéetel áantajnajeniʼ (ilawil le cuadro « Juicioʼob ganartaʼab teʼ nojoch tribunaloʼoboʼ»). Tsʼoʼok xan in wáantik Betel tiʼ juicioʼob yaan yil yéetel u koʼonol wa u maʼanal najoʼob wa terrenoʼob, tiʼ juicioʼob yaan yil yéetel u paalal le sukuʼunoʼoboʼ bey xan tiʼ juicioʼob yaan yil yéetel divorcioʼob.

Ka tin kʼaj óoltaj Deniseeʼ tsʼokaʼaniliʼ u divorciarkubaʼeʼ yéetel óoxtúul u paalal yaan. Ku meyaj utiaʼal u tséentik u paalal yéetel ku beetik u precursorail. Kex maʼ chéen chʼaʼabil u kuxtaleʼ jach u tsʼaamaj kaʼach u yóol u meyajt Jéeoba. Tu añoil 1992, tu kaajil Nueva Yorkeʼ beetaʼab le Asamblea tiʼ Distrito «Portadores de Luz», teʼ asambleaoʼ tin waʼalajtiʼ wa jeʼel u béeytal in maas kʼaj óoltikeʼ. Ka máan junpʼéel añoeʼ tsʼoʼok k-beel yéetel seguernaj in wáantik u najil Betel. Kin tsʼáaik gracias tiʼ Jéeoba tumen le in watan tu tsʼáajoʼ jach yaan u fe yéetel jach kiʼimak u yóol. Jeʼex u yaʼalik Proverbios 31:12, Deniseeʼ tsʼoʼok u yáantken utiaʼal u binten utsil tuláakal u kʼiiniloʼob in kuxtal.

Le ka tsʼoʼok k-beeleʼ u hijoʼob in wataneʼ yaan kaʼach tiʼob 11, 13 yéetel 16 años. Teneʼ jach taak kaʼach in líiʼskoʼob tubeel, le oʼolal tin xakʼaltaj le baʼax u jóoʼsmaj u kaajal Jéeoba yoʼolal le majan taataʼoboʼ. Kex maʼ chéen chʼaʼabil úuchik k-líiʼskoʼobeʼ kiʼimak in wóol tumen bejlaʼeʼ jach u yaabiltmenoʼob yéetel jach ku confiaroʼob tiʼ teen. Mantatsʼ chuup kaʼach k-otoch yéetel u amigoʼob k-paalal, leloʼ tu beetaj u kiʼimaktal k-óol.

Tu añoil 2013, teen yéetel Deniseeʼ binoʼon k-kanáant k-papaʼob yanoʼob tu estadoil Wisconsin. Kex beyoʼ seguernaj in wáantaj Betel. Invitartaʼaben utiaʼal u seguer in wáantaj tiʼ jujunpʼéel baʼaloʼob ku beetik u abogadoʼob Betel.

Tu mesil septiembre tiʼ 2018, tin tsʼáaj cuentaeʼ antes in tʼaaneʼ jach yaʼab in seʼentik in kaal. Le doctor tuʼux suuk in binoʼ maʼ páajchaj u naʼatik baʼax yaanteniʼ. Le ka binen yiknal uláakʼ doctoreʼ tu yaʼalajten kʼaʼabéet in bin yiknal juntúul especialista. Tu mesil enero tiʼ 2019, le especialistaoʼ tu yaʼalajteneʼ le kʼojaʼanil yaantenoʼ jach jelaʼan yéetel kéen máanak kʼiineʼ maʼ kun béeytal in péeksik in wíinklil.

Tres días aʼalaʼakteneʼ lúuben le táan in patinaroʼ ka káach in kʼab. Jach suuk in patinar, chéen chʼaʼabil in wilik, le oʼolal le ka lúubenoʼ tin tsʼáaj cuenta táan u maastal in kʼojaʼaniloʼ. Jach táaj séeb úuchik u maastal in kʼojaʼaniloʼ, istikyaj in tʼaan, in péek yéetel tak in woʼoch istikyaj in lukʼik.

In meyaj bey abogado utiaʼal u kaajal Jéeobaeʼ junpʼéel baʼal jach ku beetik u kiʼimaktal in wóol. Páajchaj xan in tsʼíibtik yaʼab revistaʼob ku xoʼokol tumen doctoroʼob, abogadoʼob yéetel juezoʼob. Tsʼoʼoleʼ binen xan tiʼ jejeláas luʼumiloʼob utiaʼal in tʼaan tu táan yaʼab máakoʼob. Tuláakal lelaʼ tu tsʼáajten u páajtalil in defendertik le derecho yaan tiʼ le sukuʼunoʼob utiaʼal maʼ u tsʼaʼabal kʼiʼikʼ tiʼoboʼ. Kex tsʼoʼok in beetik tuláakal lelaʼ jeʼex u yaʼalik Lucas 17:10, teneʼ chéen juntúul esclavoen mix baʼal in biilal, le baʼax tsʼoʼok in beetkoʼ letiʼe baʼax unaj in beetkoʼ.