1. ¿Bix tsʼoʼok u yáantaʼal cada juntúul tiʼ toʼon tumen Jéeoba?

¿KʼAJAʼAN wa toʼon bix úuchik k-beetikba u testigo Jéeoba? Yáaxeʼ, t-ojéeltaj «le baʼaloʼob maʼalobtak ken u beet Diosoʼ», maʼ xaaneʼ tsikbaltaʼabtoʼon tumen k-taataʼob, tumen juntúul k-éet meyaj, tumen juntúul k-éet xook wa tumen juntúul u testigo Jéeoba táan u kʼaʼaytaj joonaj joonajil (Mar. 13:10). Le ka tsʼoʼokeʼ yanchaj máax tu jóoʼsaj u tiempo utiaʼal u tsʼáaiktoʼon xook. Yoʼolal leloʼ t-ojéeltaj u yaabiltmoʼon Jéeobaeʼ ka joʼopʼ xan k-yaabiltik. Tumen tu natsʼoʼon tu yiknaleʼ beoraaʼ u discípuloʼon Jesús yéetel táan k-páaʼtik k-kuxtal utiaʼal mantatsʼ (Juan 6:44). ¿Máasaʼ k-tsʼáaik u graciasil tiʼ Jéeoba úuchik u túuxtik juntúul máax kaʼansiktoʼon u jaajil utiaʼal u páajtal k-meyajtik?

2. ¿Baʼax ken k-il teʼ xookaʼ?

² Bejlaʼeʼ yaantoʼon u privilegioil k-áantik uláakʼ máakoʼob utiaʼal u yantaltiʼob le kuxtal minaʼan u xuuloʼ. Maʼ xaaneʼ chéen chʼaʼabil k-kʼaʼaytaj joonaj joonajil, chéen baʼaleʼ chan istikyaj k-ilik k-tsʼáaik xook. Wa bey u yúuchultoʼonoʼ le baʼax ken k-il teʼ xookaʼ jach yaan u yáantkoʼon. Yaan k-ilik baʼax péeksikoʼon k-beet discípuloʼob yéetel baʼax jeʼel u yáantkoʼon wa maʼ chéen chʼaʼabil k-ilik k-tsʼáaik xookiʼ. Chéen baʼaleʼ yáaxeʼ yaan k-ilik baʼaxten maʼ chéen k-kʼaʼaytajiʼ, baʼaxeʼ k-ilik k-kaʼansik le máakoʼoboʼ.

3. ¿Baʼaxten k-kʼaʼaytaj?

³ Jesúseʼ tu kʼubéentaj junpʼéel meyaj tiʼ u discípuloʼob. Ichil le meyajaʼ táakaʼan u kʼaʼaytikoʼob le baʼaloʼob maʼalobtak  ken u beet u Reino Diosoʼ (Mat. 10:7; Luc. 8:1). Letiʼeʼ tu tsolaj tiʼ u discípuloʼob baʼax unaj u beetkoʼob wa ku kʼaʼamal le baʼax ku kʼaʼaytikoʼoboʼ bey xan wa yaan máax maʼ tu kʼamik (Luc. 9:2-5). Tu yaʼalaj xaneʼ u discípuloʼobeʼ yaan u kʼaʼaytajoʼob tiʼ u «kajnáaliloʼob tuláakal kaajoʼob» (Mat. 24:14; Hech. 1:8). Kex ka kʼaʼamak bey xan wa maʼeʼ letiʼobeʼ unaj u kʼaʼaytikoʼob le baʼaloʼob maʼalobtak ken u beet u Reino Diosoʼ.

4. Jeʼex u yaʼalik Mateo 28:18-20, ¿baʼax uláakʼ táakaʼan ichil le meyaj u kʼubéentmaj Jesúsoʼ?

⁴ Uláakʼ baʼax táakaʼan ichil le meyaj tu kʼubéentaj Jesús tiʼ u discípuloʼoboʼ letiʼe u kaʼanskoʼob tiʼ le máakoʼob u tsʼoʼokbesoʼob tuláakal le baʼax u yaʼalmoʼ. Yaan jujuntúul máakoʼobeʼ ku yaʼalikoʼobeʼ lelaʼ chéen unaj u beetaʼal kaʼach teʼ yáax siglooʼ. ¿Jaaj wa leloʼ? Maʼatech, tumen Jesúseʼ tu yaʼaleʼ le meyajaʼ yaan u beetaʼal «tak teʼ kʼiinoʼob táan u tsʼoʼokol tiʼ le yóokʼol kaabaʼ» (xok Mateo 28:18-20). Maʼ xaaneʼ le tʼaanoʼobaʼ tu yaʼalaj Jesús le ka tu chíikbesuba tiʼ maas tiʼ 500 u discípuloʼoboʼ (1 Cor. 15:6). Chéen baʼaleʼ le ka máan kʼiineʼ tu yeʼesaj tiʼ le apóstol Juanoʼ u kʼáat ka táakpajak tuláakal u discípuloʼob utiaʼal u yáantaʼal le máakoʼob u kʼaj óoltoʼob Jéeobaoʼ (Apo. 22:17).

5. ¿Baʼax comparaciónil meyajnaj tiʼ Pablo utiaʼal u yeʼesik kʼaʼabéet k-kʼaʼaytaj yéetel k-kaʼansaj?

⁵ Le apóstol Pablooʼ tu ketaj le u beetaʼal discípuloʼob yéetel le baʼaxoʼob ku beetik máak le kéen u pakʼ wa baʼaxoʼ. Letiʼeʼ tu yaʼalaj tiʼ le sukuʼunoʼob yaan kaʼach Corintooʼ: «Teen pakʼe, Apolos jóoyabte [...]. Teʼex le luʼum ku meyajtaʼal tumen Diosoʼ» (xok 1 Corintios 3:6-9). Toʼoneʼ k-meyajtik le luʼum u tsʼaamajtoʼon Diosoʼ, le oʼolal maʼ chéen k-pakʼik le semillaʼoboʼ baʼaxeʼ k-jóoyabtikoʼob yéetel k-kanáantkoʼob (Juan 4:35). Chéen baʼaleʼ k-ojel Dios beetik u jóokʼol yéetel u nojochtal le baʼax k-pakʼikoʼ.

6. ¿Baʼax kʼaʼabéet k-beetik utiaʼal k-áantik le máakoʼob u beetubaʼob u discípuloʼob Jesúsoʼ?

⁶ Toʼoneʼ táan k-kaxtik «le máaxoʼob jach tu jaajil u yóol ku yeʼeskoʼob u kʼáat u kʼamoʼob le kuxtal minaʼan u xuuloʼ» (Hech. 13:48). Utiaʼal u páajtal u beetkubaʼob u discípuloʼob Jesúseʼ kʼaʼabéet k-áantkoʼob 1) u naʼatoʼob, 2) u kʼamoʼob yéetel 3) u tsʼáaʼob ichil u kuxtaloʼob le baʼax ku yaʼalik le Bibliaoʼ (Juan 17:3; Col. 2:6, 7; 1 Tes. 2:13). Le múuchʼuliloʼ jach jeʼel u yáantaj wa ku yeʼeskoʼob yaabilaj tiʼ le j-xoknáaloʼoboʼ bey xan wa ku kʼamkoʼob yéetel kiʼimak óolal teʼ muchʼtáambaloʼoboʼ (Juan 13:35). Le máax ku tsʼáaik xookoʼ maʼ xaaneʼ yaan u máan tiempo táan u yáantik le j-xoknáal utiaʼal u pʼatik le baʼaxoʼob kaʼansaʼantiʼ kaʼachoʼ (2 Cor. 10:4, 5). U yáantaʼal juntúul máak utiaʼal ka kʼuchuk u kʼiinil u yokjaʼeʼ maʼ xaaneʼ jeʼel u bisik yaʼab meseseʼ, chéen baʼaleʼ jach ku taasik utsil.

7. ¿Baʼaxten k-kʼaʼaytaj yéetel k-kaʼansaj?

⁷ Toʼoneʼ k-ilik k-kʼaʼaytaj yéetel k-kaʼansaj tumen k-yaabiltmaj Jéeoba (1 Juan 5:3). ¿Máasaʼ tumen k-yaabiltmaj Jéeobaeʼ t-chʼaʼtuklaj u káajal k-jóokʼol kʼaʼaytaj? Maʼ xaaneʼ maʼ chéen chʼaʼabil úuchik k-ilkiʼ, chéen baʼaleʼ t-beetaj tumen k-ojel letiʼe baʼax u kʼubéentmaj Jesús tiʼ u discípuloʼoboʼ. Maʼ xaaneʼ bejlaʼeʼ chéen chʼaʼabil k-ilik k-kʼaʼaytaj, chéen baʼaleʼ chan saajkoʼon k-tsʼáa xook  tiʼ wa máax. Wa bey k-uʼuyikbaoʼ jeʼel u páajtal k-orar tiʼ Jéeobaeʼ, letiʼeʼ jeʼel u yáantkoʼon k-tsʼáa xook tiʼ wa máax kex chan saajkoʼoneʼ.

8. Jeʼex u yaʼalik Marcos 6:34, ¿baʼax uláakʼ péeksikoʼon k-kaʼans le máakoʼoboʼ?

⁸ Uláakʼ baʼax oʼolal k-kaʼansik u jaajileʼ tumen k-yaabiltmaj le máakoʼoboʼ. Juntéenjeakileʼ Jesús yéetel u discípuloʼobeʼ jach kaʼanaʼanoʼob ka tsʼoʼok u kʼaʼaytajoʼob, le oʼolal tu kaxtoʼob tuʼux u jeʼeleloʼob. Chéen baʼaleʼ táan bakáan u páaʼtaʼaloʼob tumen yaʼabkach máakoʼob. Jesús túuneʼ «joʼopʼ u kaʼansiktiʼob yaʼab baʼaloʼob» (xok Marcos 6:34). ¿Baʼaxten tu kaʼansaj le máakoʼob kex kaʼanaʼanoʼ? Tumen tu tsʼáajuba tu lugaroʼob yéetel taak kaʼach u yáantkoʼob. U yojel táan u muʼyajoʼob yéetel kʼaʼabéet u líiʼsaʼal u yóoloʼob. Bejlaʼa xaneʼ kʼaʼabéet u yáantaʼal le máakoʼoboʼ tumen kex bey kiʼimak u yóoloʼobeʼ táan u muʼyajoʼob. Beyoʼob mejen tamanoʼob saatloʼob yéetel mix máak kanáantkoʼobeʼ. Le apóstol Pablooʼ tu yaʼaleʼ minaʼan u Diosoʼob yéetel minaʼan esperanza tiʼob (Efe. 2:12). Jeʼel u páajtal k-aʼalikeʼ táan u binoʼob tu «bejil le xuʼulsajiloʼ» (Mat. 7:13). Le yaabilaj yéetel le chʼaʼ óotsililoʼ letiʼe baʼax péeksikoʼon k-áant le máakoʼob táan u muʼyajoʼoboʼ. Le baʼax maas maʼalob jeʼel k-beetik tu yoʼolaloʼoboʼ letiʼe k-tsʼáaik xook tiʼoboʼ.

9. Jeʼex u yaʼalik Filipenses 2:13, ¿bix jeʼel u yáantkoʼon Jéeobaeʼ?

⁹ Maʼ xaaneʼ maʼ t-jáan aʼalik k-tsʼáaik xook tiʼ wa máax tumen k-ojel jeʼel u bisiktoʼon yaʼab tiempoeʼ. Wa bey u yúuchultoʼonoʼ maʼalob ka orarnakoʼon tiʼ Jéeoba utiaʼal k-aʼaliktiʼ bix k-uʼuyikba, yéetel utiaʼal k-kʼáatiktiʼ ka u tsʼáatoʼon u tsʼíibolalil k-kaxtik juntúul máax taak u kaanbal tiʼ le Bibliaoʼ (xok Filipenses 2:13). Le apóstol Juanoʼ tu yaʼaleʼ wa maʼ tu bin tu contra u voluntad Jéeobaeʼ letiʼeʼ jeʼel u yuʼubik k-oraciónoʼobeʼ (1 Juan 5:14, 15). Jeʼex k-ilkoʼ letiʼeʼ jeʼel u tsʼáaiktoʼon u tsʼíibolalil k-táakpajal teʼ meyaj kʼubéentaʼantoʼonoʼ.

10, 11. ¿Baʼaxten yaan kʼiineʼ maʼ t-tsʼáaik xook?

¹⁰ Kex k-ojel kʼaʼabéet k-táakpajal utiaʼal u beetaʼal discípuloʼobeʼ, maʼ xaaneʼ yaan baʼaloʼob jeʼel u talamkúuntiktoʼoneʼ. Koʼoneʼex ilik jujunpʼéeloʼobiʼ, yéetel baʼax jeʼel u yáantkoʼon k-aktáantoʼobeʼ.

¹¹ K-tuklik maʼ tu páajtal k-beetik u maasil. Maʼ xaaneʼ tsʼoʼok u yantal k-jaʼabil, kʼojaʼanoʼon wa táan k-aktáantik uláakʼ baʼaloʼob. Wa beyoʼ maʼalob ka tuukulnakoʼon tiʼ baʼax tsʼoʼok k-kanik tu kʼiiniloʼob le pandemia COVID-19. Tsʼoʼok k-ilkeʼ jeʼel u páajtal u meyajtoʼon le teléfono yéetel le Internet utiaʼal k-tsʼáaik xook tiʼ le máakoʼob desde t-otochoʼ. Yaʼab máakoʼob taak u kaanbaloʼob tiʼ le Bibliaoʼ, chéen baʼaleʼ maʼ tu páajtal u xookoʼob teʼ horaʼob suuk u jóokʼol kʼaʼaytaj le sukuʼunoʼoboʼ. Le oʼolaleʼ maʼalob ka k-il wa jeʼel u yóotkoʼob xook temprano wa de nocheeʼ. Jesúseʼ tu kaʼansaj Nicodemo de noche tumen teʼ hora ku páajtal kaʼach Nicodemooʼ (Juan 3:1, 2).

12. ¿Baʼax jeʼel u yáantkoʼon wa k-tuklik maʼ tu páajtal k-tsʼáaik xookeʼ?

¹² K-tuklik maʼ tu páajtal k-kaʼansik u maasil. Maʼ xaaneʼ k-tuklikeʼ maʼ yaʼab baʼax k-ojliʼ wa yaʼab u bintoʼon utiaʼal u páajtal k-kaʼansaj. Wa bey k-uʼuyikbaoʼ yaan óoxpʼéel baʼal jeʼel u yáantkoʼoneʼ.  Yáaxeʼ, Jéeobaeʼ ku yaʼaliktoʼoneʼ jeʼel u páajtal k-kaʼansajeʼ (2 Cor. 3:5). U kaʼapʼéeleʼ, Jesús, le máax yaantiʼ «tuláakal páajtalil teʼ kaʼanoʼ bey xan way luʼumeʼ», letiʼ kʼubéentmiltoʼon le meyajaʼ (Mat. 28:18). U yóoxpʼéeleʼ, maʼ t-juunal yanoʼoniʼ, jeʼex Jesúseʼ k-ojel yaan u yáantkoʼon Jéeoba (Juan 8:28; 12:49). Tsʼoʼoleʼ jeʼel u páajtal k-aʼalik tiʼ le superintendente tiʼ grupo, tiʼ juntúul precursor wa uláakʼ juntúul sukuʼun ka u láakʼintoʼon tsʼaa xookeʼ. Wa k-láakʼintikoʼob xan le kéen xiʼikoʼob tsʼaa xookeʼ yaʼab baʼaloʼob jeʼel k-kanik tiʼ letiʼobeʼ.

13. ¿Baʼaxten unaj k-kaʼansaj jeʼex u yaʼalaʼaltoʼon bejlaʼoʼ?

¹³ Maʼ chéen chʼaʼabil k-ilik u meyajtoʼon le túumben baʼaloʼob utiaʼal k-tsʼáaik xookoʼ. Bejlaʼeʼ tsʼoʼok u kʼexpajal le bix k-tsʼáaik xookoʼ. Utiaʼal k-tsʼáaik xook yéetel le libro Disfrutart le kuxtaloʼ jach unaj k-preparartikba tubeel tumen le bix u tsʼaʼabal xook tu yéeteloʼ jelaʼan, maʼ jeʼex suukil k-tsʼáaik xook kaʼachoʼ. Maʼ yaʼab párrafos k-xokikiʼ yéetel maas k-tsikbal yéetel le j-xoknáaloʼ. Tsʼoʼoleʼ ku meyajtoʼon videoʼob yéetel uláakʼ baʼaloʼob jeʼex le JW Library^®. Wa maʼ chéen chʼaʼabil u meyajtoʼon le túumben baʼaloʼobaʼ maʼalob ka k-kʼáat ka áantaʼakoʼon. U jaajileʼ maʼ chéen chʼaʼabil k-kʼexik le bix k-kaʼansajoʼ tumen suuktoʼon le bix k-beetik kaʼachoʼ. Chéen baʼaleʼ yéetel u yáantaj Jéeoba bey xan le sukuʼunoʼoboʼ yaan k-kanik bix jeʼel k-beetkeʼ yéetel yaan u maas kiʼimaktal k-óol kéen kaʼansajnakoʼon. Juntúul precursoreʼ ku yaʼalikeʼ le túumben bix u tsʼaʼabal xookoʼ jach ku taasik utsil tiʼ le máax ku xookoʼ bey xan tiʼ le máax ku kaʼansajoʼ.

14. 1) ¿Baʼax unaj u kʼaʼajaltoʼon wa maʼ chéen chʼaʼabil k-kʼaʼaytaj teʼ tuʼux kajaʼanoʼonoʼ? 2) ¿Bix u líiʼsik k-óol 1 Corintios 3:6, 7?

¹⁴ K-tuklik teʼ tuʼux k-kʼaʼaytajoʼ istikyaj u kaxtaʼal máax taak u xook. Maʼ xaaneʼ yaan máakoʼobeʼ maʼ taak u kaanbaloʼob tiʼ le Bibliaoʼ wa hasta ku tsʼáaikubaʼob t-contra. ¿Baʼax jeʼel u yáantkoʼon utiaʼal maʼ u lúubul k-óoleʼ? Letiʼe k-kʼaʼajsik séebaʼan u kʼexpajal le bix u kuxtal le máakoʼoboʼ. Le oʼolaleʼ yaan tiʼ letiʼobeʼ kex maʼ u kʼáatoʼob kaʼacheʼ beoraaʼ jeʼel u yóotik u natsʼubaʼob tu yiknal Dioseʼ (Mat. 5:3). Yaʼab máakoʼob kaʼach maʼ tu kʼamkoʼob mix junpʼéel publicacióneʼ bejlaʼeʼ hasta ku tsʼaʼabal xook tiʼob. Kʼaʼajaktoʼoneʼ Jéeoba u yuumil le paakʼaloʼ (Mat. 9:38). Letiʼeʼ u kʼáat ka seguernak k-paakʼal yéetel k-jóoyab tumen letiʼ beetik u jóokʼol le semillaoʼ (1 Cor. 3:6, 7). Unaj u kʼaʼajaltoʼon xaneʼ kex bejlaʼa maʼ táan k-tsʼáaik xookeʼ Jéeobaeʼ jach ku kiʼimaktal u yóol le kéen u yil bix k-tsʼáaik k-óol k-beet le meyajoʼ. *

15. ¿Bix u yuʼubikuba Jéeoba kéen káajak u xook juntúul máak yéetel kéen u tsʼáa ichil u kuxtal le baʼax ku kanikoʼ?

¹⁵ Jéeobaeʼ jach ku kiʼimaktal u yóol le kéen u yil bix u kaanbal juntúul máak yéetel bix u kaʼansik tiʼ u maasil le baʼax tsʼoʼok u kanikoʼ (Pro. 23:15, 16). Letiʼeʼ jach kiʼimak u yóol u yilik baʼax táan u yúuchul teʼ kʼiinoʼobaʼ. Jeʼex tu añoil servicio 2020, kex táan le pandemiaoʼ tsʼaʼab xook tiʼ 7,705,765 máakoʼob yéetel  okjaʼanaj 241,994 máakoʼob. Le máaxoʼob okjaʼanajoʼoboʼ yaan xan u yáantajoʼob utiaʼal u yantal u maasil discípuloʼob (Luc. 6:40). Jeʼex k-ilkoʼ le kéen táakpajkoʼon teʼ meyaj kʼubéentaʼantoʼonoʼ jach k-kiʼimakkúuntik u yóol Jéeoba.

16. ¿Baʼax maʼalob ka k-chʼaʼtukult k-beetik?

¹⁶ Maʼ chéen chʼaʼabil u tsʼaʼabal xook tiʼ wa máaxiʼ, chéen baʼaleʼ yéetel u yáantaj Jéeobaeʼ jeʼel u páajtal k-táakpajal utiaʼal u beetaʼal discípuloʼobeʼ. Maʼalob ka k-chʼaʼtukult k-tsʼáaik xook kex tiʼ juntúul máak. Le kéen tsikbalnakoʼon yéetel wa máaxeʼ jeʼel u páajtal k-aʼaliktiʼ jeʼel k-tsʼáaiktiʼ xookeʼ, maʼ xaaneʼ jeʼel u yóotkeʼ. Wa k-beetik beyoʼ Jéeobaeʼ yaan u bendecirkoʼon.

17. ¿Bix jeʼel k-uʼuyikba wa k-tsʼáaik xookeʼ?

¹⁷ Junpʼéel nojoch privilegio k-kʼaʼaytaj yéetel k-kaʼansaj. Le meyajaʼ jach ku beetik u kiʼimaktal k-óol. Le apóstol Pablooʼ le ka tsʼoʼok u kaʼansik yaʼab máakoʼob tu kaajil Tesalónicaeʼ tu yaʼalaj: «¿Baʼax le táan k-páaʼtikoʼ, yéetel máakalmáak le kiʼimak óolal yaantoʼonoʼ? ¿Máakalmáak le premio ku taasiktoʼon kiʼimak óolal tu táan Yuumtsil Jesús tu kʼiiniloʼob way yaneʼ? ¿Maʼ wa teʼexiʼ? Jach beyoʼ teʼex beetik u jach kiʼimaktal k-óol» (1 Tes. 2:19, 20; Hech. 17:1-4). Bejlaʼeʼ yaʼab sukuʼunoʼob kiʼimak xan u yóol u beetkoʼob le meyajaʼ. Stéphanie yéetel u yíichameʼ tsʼoʼok u yáantkoʼob yaʼab máakoʼob u kʼub u kuxtaloʼob tiʼ Jéeoba, le kiikoʼ ku yaʼalik: «Jach ku taasik kiʼimak óolal tiʼ máak u yáantik wa máax u kʼub u kuxtal tiʼ Jéeoba».