1-3. 1) ¿Baʼax ku kʼaʼabéettal u beetik tuláakal le táankelem paalaloʼoboʼ, yéetel bix u keʼetel? (Ilawil le foto yaan tu káajbal le xookaʼ.) 2) ¿Baʼax jeʼel u beetik le táankelmoʼob ku meyajtikoʼob Dios utiaʼal u bin maʼalobil tiʼoboʼ?

MÁANS ta tuukuleʼ yaan a chʼaʼik junpʼéel autobús utiaʼal a bin viaje, tumen kʼaʼabéet a bin utiaʼal junpʼéel kʼiinbesaj. Kéen kʼuchkech teʼ terminaloʼ ka chiʼichnaktal kéen a wil jach chochoʼkil yéetel bukaʼaj autobusoʼob yaniʼ. Tumen a wojel tuʼux kan bineʼ ka naʼakal teʼ autobús ku bin teʼeloʼ, maʼ tiʼ yaanaliʼ.

² Le kuxtaloʼ ku keʼetel yéetel junpʼéel viaje, le táankelem paalaloʼoboʼ beyoʼob jeʼex le bukaʼaj máakoʼob yanoʼob teʼ terminaloʼ. Letiʼobeʼ yaʼab baʼaloʼob kʼaʼabéet u chʼaʼtuklikoʼob ichil u kuxtaloʼob, le oʼolal yaan horaeʼ ku chiʼichnaktaloʼob. Chéen baʼaleʼ wa jach u yojloʼob tuʼux taak u binoʼobeʼ maas chéen chʼaʼabil ken u chʼaʼtukloʼob baʼax ken u beetoʼob.

³ Le xookaʼ yaan u líiʼsik u yóol le táankelem paalaloʼob utiaʼal u chʼaʼtuklik u beetkoʼob baʼax uts tu tʼaan Jéeobaoʼ. Ichil lelaʼ táakaʼan u chʼaʼikoʼob en cuenta tiʼ tuláakal baʼax ken u beetoʼob, jeʼex le xookoʼ, le meyajoʼ yéetel baʼaxoʼob yaan yil yéetel le familiaoʼ. Táakaʼan xan u tsʼáaik u yóoloʼob u chukpachtoʼob metas utiaʼal u maas meyajtikoʼob Dios. Le táankelmoʼob ku tsʼáaik u yóoloʼob  u maas meyajtoʼob Jéeobaoʼ yaan u bendecirtaʼaloʼob yéetel yaan u bin maʼalobil tiʼob (xok Proverbios 16:3).

4. ¿Baʼax ken k-il teʼ xookaʼ?

⁴ Jach jatsʼuts u tsʼáaik metas máak utiaʼal u maas meyajtik Dios. Teʼ xookaʼ yaan k-ilik óoxpʼéel baʼax oʼolal. Le yáax kaʼapʼéeloʼ yaan u yeʼesikeʼ u yilik máak u chukpachtik junpʼéel meta utiaʼal u maas meyajtik Jéeobaeʼ ku yáantaj utiaʼal u biskuba maas maʼalob tu yéetel. U yóoxpʼéeloʼ yaan u yeʼesik le utsiloʼob ku taasik u tsʼáaik metas máak tu táankelmiloʼ.

5. ¿Máakalmáak le yáax baʼax oʼolal unaj a tsʼáaik metas ichil a kuxtaloʼ?

⁵ Le yáax baʼax oʼolal unaj a tsʼáaik metas ichil a kuxtaloʼ, utiaʼal a weʼesik tiʼ Jéeoba nojoch baʼal a wilik le yaabilaj ku yeʼesiktechoʼ bey xan utiaʼal a tsʼáaik u graciasil tiʼ yoʼolal tuláakal le baʼaxoʼob tsʼoʼok u beetik ta woʼolaloʼ. Juntúul máax meyajt Dios úuchjeakileʼ tu yaʼalaj: «Sen kaʼanal Yuumtsil, ¡bukaʼaj maʼalobil u tsʼaʼabaltech nib óolal[!]». Tu yaʼalaj xan: «In Yuumtsil, ¡teech ta beetaj u kiʼimaktal in wóol yéetel baʼaxoʼob ka beetik! ¡A meyajoʼobeʼ ku chupikenoʼob yéetel kiʼimak óolal!» (Sal. 92:1, 4). Táankelem paal, tuukulnen tiʼ le bukaʼaj baʼaloʼob u tsʼaamajtech Jéeoba jeʼex le kuxtaloʼ, u béeytal a kʼaj óoltik, le Bibliaoʼ, le múuchʼuliloʼ yéetel junpʼéel jatsʼuts esperanza. Wa ka tsʼáaik táanil a meyajtikeʼ, yaan a weʼesik ka tsʼáaik u graciasil tiʼ yoʼolal baʼax tsʼoʼok u beetik ta woʼolal, tsʼoʼoleʼ yaan a maas biskaba tu yéetel.

6. 1) ¿Baʼax utsil ku taasik a tsʼáaik a wóol a maas meyajt Jéeoba? 2) ¿Baʼax metail jeʼel u páajtal u tsʼáaik le paalaloʼoboʼ?

⁶ U kaʼapʼéel baʼax oʼolal unaj a tsʼáaik u metail a maas meyajtik Jéeobaeʼ, tumen ka beetik baʼaloʼob maʼalobtak tu táan. Lelaʼ ku beetik xan a maas biskaba tu yéetel. Apóstol Pabloeʼ tu tsʼíibtaj: «Dioseʼ maʼ kʼasaʼan utiaʼal ka u tuʼubs le meyaj ta beeteʼexoʼ mix le yaabilaj ta weʼeseʼex tu yoʼolal u kʼaabaʼoʼ» (Heb. 6:10). Mix máak unaj u yaʼalik wa jach chichan utiaʼal u tsʼáaik metas ichil u kuxtal. Jeʼex Christineeʼ, 10 años yaantiʼ ka tu chʼaʼtuklaj u xokik u tsikbalil u kuxtal sukuʼunoʼob chukaʼan u yóoloʼob. Toby, le yaan 12 años tiʼoʼ tu chʼaʼtuklaj u xokik tuláakal le Biblia táanil tiʼ u yokjaʼoʼ. Maximeʼ 11 años yaantiʼ ka okjaʼanaji, Noemi, u yíitsʼineʼ 10. Ka tsʼoʼokeʼ tu kaʼatúulal tu tsʼáajoʼob u metail u meyajoʼob Betel. Utiaʼal maʼ u tuʼubultiʼobeʼ tu takʼoʼob u solicitudil tu pakʼil u yotochoʼob. Kux teech, ¿baʼaxten maʼ ta wilik a tsʼáaik junpʼéel meta yéetel a wilik bix jeʼel a chukpachtikeʼ? (Xok Filiposiloʼob 1:10, 11.)

7, 8. 1) ¿Baʼax utsil ku taasik a tsʼáaik metas ichil a kuxtal? 2) ¿Baʼaxten tu chʼaʼtuklaj Damaris maʼ u bin xook universidad?

⁷ Koʼox ilik u tsʼook baʼax oʼolal unaj a tsʼáaik metas ichil a kuxtal. Tu táankelmil máakeʼ kʼaʼabéet u chʼaʼtuklik baʼax ken u xoke, tuʼux kun meyaj yéetel baʼax uláakʼ ken u beete. U chʼaʼtuklik máak baʼax ken u beeteʼ, bey jeʼex ka kʼuchuk tiʼ junpʼéel xaʼay bej tuʼux kun kʼaʼabéettal u chʼaʼtuklik baʼax bejil ken u biseʼ. Wa jach u yojel máak tuʼux taak u bineʼ maas chéen chʼaʼabil ken u yéey u bejil. Bey u yúuchul xan ichil k-kuxtaloʼ, wa k-ojel jach baʼax metail yaantoʼoneʼ maas chéen chʼaʼabil ken k-chʼaʼtukult baʼax ken k-beete. Proverbios 21:5, ku yeʼesikeʼ le baʼaxoʼob ku chʼaʼtukultaʼal tubeeloʼ ku jóokʼloʼob maʼalobil. Le oʼolaleʼ wa ku káajal a chʼaʼtuklik desde bejlaʼa baʼax ken a beet ichil a kuxtaleʼ, maas séeb jeʼel a chukpachtikoʼobeʼ. Lelaʼ bey tu beetil Damaris le ka anchaj u chʼaʼtuklik junpʼéel baʼal jach kʼaʼanaʼanoʼ.

⁸ Ka tu tsʼoʼoksaj u xookeʼ jach maʼalob calificacionoʼob  tsʼaʼabtiʼ. Yoʼolal leloʼ aʼalaʼab u tsʼaʼabal junpʼéel beca tiʼ utiaʼal u xokik Derecho universidad. Chéen baʼaleʼ letiʼeʼ tu chʼaʼtuklaj u meyaj tiʼ junpʼéel banco chéen wa jaypʼéel kʼiinoʼob. Letiʼeʼ ku yaʼalik baʼax oʼolal: «Teneʼ in chʼaʼtukultmaj in beetik in precursorail. Le oʼolal anchaj in kaxtik junpʼéel meyaj maʼ bul semanaiʼ. Wa ka in xok Derechoeʼ loʼobaleʼ jeʼel in náajaltik yaʼab taakʼineʼ, chéen baʼaleʼ yaan u kʼaʼabéettal kaʼach in meyaj bul semana». Bejlaʼeʼ Damariseʼ tsʼoʼok veinte años joʼopʼok u beetik u precursorail. ¿Bix u yuʼubikuba yoʼolal le baʼax tu chʼaʼtuklaj tu x-lóoʼbayaniloʼ? Letiʼeʼ ku yaʼalik: «Teʼ tuʼux kin meyajoʼ yaan abogadoʼob ku beetkoʼob le meyaj jeʼel in beetik kaʼach wa ka in xok Derechooʼ. Chéen baʼaleʼ kin wilkeʼ letiʼobeʼ maʼ kiʼimak u yóoloʼob yéetel u meyajoʼobiʼ. Úuchik in chʼaʼtuklik in beetik in precursoraileʼ maʼ chiʼichnakeniʼ, baʼaxeʼ jach maʼalob in wuʼuyikinba, tumen táan in meyajtik Jéeoba yéetel kiʼimak óolal».

9. ¿Baʼaxten unaj k-felicitartik le táankelem paalaloʼoboʼ?

⁹ Tiʼ tuláakal le múuchʼuliloʼoboʼ yaan táankelem paalaloʼob ku síijil tu puksiʼikʼaloʼob u meyajtikoʼob Jéeoba yéetel táan u yilik u chukpachtikoʼob u metaʼob, le oʼolal maʼalob ka k-felicitartoʼob. Le táankelem paalaloʼobaʼ ku chaʼik u nuʼuktaʼaloʼob tumen Jéeoba tiʼ baʼaxoʼob yaan yil yéetel u xookoʼob, u meyajoʼob yéetel u familiaʼob. Kex ku beetkoʼob lelaʼ láayliʼ kiʼimak u yóoloʼobeʼ. Rey Salomoneʼ tu yaʼalaj ka k-kʼub k-óol tiʼ Jéeoba yéetel tuláakal k-puksiʼikʼal. Tsʼoʼoleʼ tu yaʼalaj: «Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej» (Pro. 3:5, 6). Jéeobaeʼ jach u yaabiltmaj le táankelem paalaloʼoboʼ, le oʼolal ku kanáantkoʼob, ku nuʼuktikoʼob yéetel ku bendecirkoʼob.

10. 1) ¿Baʼaxten unaj a wilik a tsʼáaik táanil le kʼaʼaytajoʼ? 2) ¿Baʼax jeʼel u yáantkech utiaʼal u bintech utsil teʼ kʼaʼaytajoʼ?

¹⁰ Wa juntúul táankelem paal taak u lúubul utsil tiʼ Jéeobaeʼ unaj u tsʼáaik u yóol kʼaʼaytaj. Jesuseʼ tu kaʼanseʼ jach kʼaʼanaʼan u yúuchul kʼaʼaytaj le ka tu yaʼalaj: «Yáaxeʼ kʼaʼabéet u kʼaʼaytaʼal le maʼalob péektsiloʼ» (Mar. 13:10). Jeʼex a wilkoʼ le kʼaʼaytajoʼ junpʼéel baʼax unaj a tsʼáaik táanil ichil a kuxtal. Le oʼolaleʼ, ¿tsʼoʼok wa a chʼaʼtuklik a maas táakpajal teʼ kʼaʼaytaj wa a beetik a precursoriloʼ? Wa maʼ jatsʼuts a wilik a kʼaʼaytajeʼ, ¿baʼax jeʼel a beetkeʼ? ¿Baʼax jeʼel u yáantkech utiaʼal u bintech maʼalobil teʼ kʼaʼaytajoʼ? Kʼaʼabéet a líiʼskaba tubeel yéetel ilawil a kʼaʼaytaj tuláakal súutukil. Wa ka beetkeʼ yaan a tsʼáaik cuenta jach jatsʼuts le kʼaʼaytajoʼ.

11, 12. 1) ¿Baʼax jeʼel u beetik le paalaloʼob utiaʼal ka béeyak u kʼaʼaytajoʼob tuláakal súutukileʼ? 2) ¿Baʼax tu beetaj juntúul xiʼipal le táan u kaʼansaʼal yoʼolal religión tu escuelaoʼ?

¹¹ Tukult bey baʼax kʼáatchiʼil jeʼel u beetaʼaltech tumen a wéet xookoʼobeʼ yéetel líiʼsaba tubeel utiaʼal a núukiktiʼob. Le sitio jw.org yéetel uláakʼ publicacionoʼoboʼ jach jeʼel u yáantkecheʼ. Jeʼex wa ku kʼáataʼaltech baʼax ka tuklik yoʼolal le núupchitaloʼ, le folleto U núukil 10 preguntaʼob ku beetik le paalaloʼoboʼ, jach jeʼel u yáantkecheʼ. Le folletoaʼ ku taasik le kʼáatchiʼ ¿Baʼax unaj in beetik wa yaan máax taak u núupchital tin wéetel? Lelaʼ jeʼel u meyajtech utiaʼal a líiʼskaba tubeeleʼ (xok 1 Pedro 3:15).

¹² Kéen béeyakeʼ aʼal tiʼ a wéet xookoʼob ka ookkoʼob teʼ sitio jw.org. Lelaʼ bey tu beetil Luca tu escuela ka joʼopʼ u kaʼansaʼal yoʼolal religión tiʼob. Letiʼeʼ tu tsʼáaj cuentaeʼ le libro ku xokikoʼoboʼ ku yaʼalik baʼaloʼob maʼ jaajtak yoʼolal u j-jaajkunajoʼob Jéeobaiʼ. Kex sajak kaʼacheʼ tu kʼáataj tiʼ le maestra wa jeʼel u páajtal u máan u tsol tu táan u maasil baʼaxten maʼ jaaj le baʼax ku yaʼalik le librooʼ. Tu  tsolaj tu táan tuláakal baʼax ku creertik yéetel tu yeʼesajtiʼob le sitio yaantoʼon ich Internetoʼ. Le maestra túunoʼ tu yaʼalaj tiʼ le j-xoknáaloʼob ka u chaʼantoʼob le video ku kʼaabaʼtik Defendertaba sin ke a sutik u jeel. Lucaeʼ jach kiʼimakchaj u yóol úuchik u tʼaan tiʼ Jéeoba.

13. ¿Baʼaxten maʼ unaj u lúubul a wóol wa yaan baʼaxoʼob talamkúuntik a chukpachtik a metaʼobiʼ?

¹³ Maʼ u lúubul a wóol wa ka wilik yaan baʼaxoʼob beetik u talamtal a chukpachtik a metaʼob. Seguernak a tsʼáaik a wóol a chukpachtoʼob (2 Tim. 4:2). Katharinaeʼ bey tu beetiloʼ. Le yaan 17 años tiʼoʼ tu chʼaʼtuklaj u kʼaʼaytaj tiʼ tuláakal u yéet meyajoʼob. Kex poʼopochʼaʼab tumen juntúul tiʼ letiʼobeʼ, Katharinaeʼ seguernaj u kʼaʼaytaj. Le baʼax tu beetoʼ jach maʼalob ilaʼabik tumen Hans. Letiʼ túuneʼ káaj u xokik le publicacionoʼoboʼ, káaj u tsʼaʼabal xook tiʼ yéetel okjaʼanaji. Katharinaeʼ maʼ tu yojéeltiʼ, tumen bin kajtal yaanal tuʼux. Ka máan trece años, le tiaʼanoʼob teʼ Najil Reino yéetel u familiaoʼ, jaʼakʼ u yóol ka tu yilaj Hans kun máansik le tsoltʼaanoʼ. Lelaʼ béeychaj tumen kʼaʼaytajnaj tiʼ tuláakal u yéet meyajoʼob.

14, 15. 1) ¿Baʼax maʼ unaj u tuʼubultech wa ku sen aʼalaʼaltech ka a náays a wóoliʼ? 2) ¿Baʼax jeʼel u yáantkech utiaʼal maʼ a beetik le baʼax ku beetik uláakʼ paalaloʼoboʼ?

¹⁴ Tak beoraaʼ le xookaʼ tsʼoʼok u líiʼsik a wóol utiaʼal a chʼíikil a meyajt Jéeoba yéetel a tsʼáa metaʼob ichil a kuxtal. Yaan uláakʼ paalaloʼobeʼ chéen táan u kaxtikoʼob bix jeʼel u náaysik u yóoloʼobeʼ, maʼ xaaneʼ jeʼel u sen aʼalikoʼobtech ka a beet xan beyoʼ. Chéen baʼaleʼ maʼ u tuʼubultecheʼ yaan u kʼuchul u kʼiinil a weʼesik wa jach tu jaajil taak a chukpachtik a metaʼob. Maʼ u náayal a wóol kex uláakʼ paalaloʼob yaanal baʼax ku beetkoʼob. Kʼaʼajaktech u terminalil le autobusoʼob t-aʼalaj tu káajbaloʼ. ¿Máasaʼ mix máak jeʼel u naʼakal tiʼ junpʼéel autobús chéen tumen táan u yilik kiʼimak u yóol le máaxoʼob yanoʼoboʼ?

¹⁵ Yaʼab baʼaxoʼob jeʼel u yáantkech utiaʼal maʼ a beetik le baʼax ku beetik uláakʼ paalaloʼoboʼ. Junpʼéeleʼ letiʼe maʼ a bin teʼ tuʼuxoʼob a wojel jeʼel a túulchʼintaʼal a beet baʼax maʼ maʼaloboʼ (Pro. 22:3). Tukult xan bix kun bintech wa ka beetik baʼax kʼaas (Gal.  6:7). Uláakʼ baʼax jeʼel u yáantkecheʼ letiʼe a kʼaʼajsik kʼaʼabéettech u yáantaj u maasiloʼ. Wa kabal a wóoleʼ yaan a kʼamik le nuʼuktaj ku tsʼaʼabaltech tumen a taataʼob yéetel uláakʼ sukuʼunoʼob yiijchajaʼan u tuukuloʼoboʼ (xok 1 Pedro 5:5, 6).

16. Tsikbalt junpʼéel baʼax uchaʼan eʼesik jach kʼaʼabéettoʼon kabal óolal.

¹⁶ Koʼox ilik baʼax úuch tiʼ juntúul xiʼipal ku kʼaabaʼtik Christoph, letiʼeʼ tu yeʼesaj kabal óolal yéetel tu kʼamaj le áantaj tsʼaʼabtiʼoʼ. Maʼ úuch okjaʼanakeʼ káaj u bin tiʼ junpʼéel gimnasio. Teʼeloʼ uláakʼ táankelmoʼobeʼ tu yaʼaloʼobtiʼ ka okok báaxal ichil junpʼéel equipo. Ka tu tsikbaltaj tiʼ juntúul ancianoeʼ aʼalaʼabtiʼ ka tuukulnak tiʼ le baʼaxoʼob jeʼel u yúuchloʼ, jeʼex wa ka káajak u competir yéetel u maasiloʼ. Kex beyoʼ ook ichil le equipooʼ. Ka máan kʼiineʼ tu tsʼáaj cuentaeʼ le deporte tu yéeyoʼ sajbeʼentsil, tumen jeʼel tak u beetaʼal loob tiʼeʼ. Letiʼeʼ tu tsikbaltaj tiʼ uláakʼ ancianoʼob le baʼax ku yúuchultiʼoʼ, ka tsolnuʼuktaʼab yéetel le Bibliaoʼ. Letiʼeʼ ku yaʼalik: «Jéeobaeʼ tu túuxtaj le sukuʼunoʼob utiaʼal u tsolnuʼuktikenoʼoboʼ. Kex tu káajbal maʼ tin wuʼuyaj u tʼaanoʼobeʼ, ka tsʼookeʼ tin beetaj le baʼax tu yaʼaloʼobtenoʼ». Kux túun teech, ¿ka kʼamik wa yéetel kabal óolal le tsolnuʼukoʼob ku tsʼaʼabaltechoʼ?

17, 18. 1) ¿Bix u kʼáat Jéeoba ka kuxlak le táankelem paalaloʼoboʼ? 2) ¿Baʼax jeʼel a beetik utiaʼal maʼ u yaatal a wóol kéen yanak a jaʼabileʼ? Aʼal junpʼéel baʼax uchaʼan.

¹⁷ Jéeobaeʼ ku yaʼaliktech: «Táankelem, náays a wóol kaʼalikil tʼaʼajech; tsʼáa uts ta kuxtal kaʼalikil ka páajtal» (Ecl. 11:9). Letiʼeʼ u kʼáat ka kiʼimakchajak a wóol. Teʼ xookaʼ tsʼoʼok k-ilkeʼ junpʼéel bix jeʼel u yantaltech kiʼimak óolaleʼ letiʼe a tsʼáaik metaʼob ichil a kuxtal utiaʼal a maas meyajtik Jéeoba yéetel a chʼaʼik en cuenta tiʼ tuláakal baʼax ka chʼaʼtuklik a beetik. Wa ka beetik beora táankelmechaʼ, maas séeb ken a tsʼáa cuenta bix u nuʼuktikech Jéeoba, bix u kanáantkech yéetel bix u bendecirkech. Tuukulnen tiʼ le tsolnuʼukoʼob ku tsʼáaiktech Jéeoba ichil le Bibliaoʼ yéetel beet le baʼax ku yaʼalikaʼ: «Kaʼalikil táankelmecheʼ, kʼaʼajak tiʼ teech máax beetech» (Ecl. 12:1).

¹⁸ Maʼ mantatsʼ ken a beet a paaliliʼ. Yaan u kʼuchul u kʼiinil a nojoch máaktal. Yaʼab máakoʼobeʼ ku yaatal u yóoloʼob tumen maʼ maʼalob le baʼax tu chʼaʼtuklaj u beetkoʼob tu paaliloʼoboʼ wa tumen maʼ tu tsʼáajoʼob mix junpʼéel meta ichil u kuxtaloʼobiʼ. Chéen baʼaleʼ le paalaloʼob táan u yilik u chukpachtikoʼob junpʼéel meta utiaʼal u maas meyajtikoʼob Diosoʼ yaan u kiʼimaktal u yóoloʼob kéen yanak u jaʼabiloʼob. Bey u yuʼubikuba Mirjanaoʼ. Tu x-lóoʼbayanileʼ invitartaʼab utiaʼal u competir yéetel uláakʼ máakoʼob tiʼ uláakʼ luʼumiloʼob, tumen jach maʼalob u báaxal. Chéen baʼaleʼ letiʼeʼ tu chʼaʼtuklaj u maas tsʼáaik u yóol u meyajt Dios. Bejlaʼeʼ tsʼoʼok maas tiʼ treinta años joʼopʼok u beetik yéetel láayliʼ u tsʼaamaj u yóol u meyajt Dios yéetel u yíichameʼ. Letiʼeʼ ku yaʼalik: «U jach kʼaj óoltal máak, u yantal páajtalil tiʼ yéetel u náajaltik yaʼab taakʼineʼ séeb u xuʼululoʼob yéetel mix baʼal u biilaloʼob. Le baʼax unaj k-beetkoʼ k-meyajtik Dios yéetel k-áantik u maasil u kʼaj óoltoʼob».

19. ¿Baʼax utsil jeʼel u kʼamik le táankelem paalaloʼob wa ku tsʼáaik u yóoloʼob u meyajtoʼob Diosoʼ?

¹⁹ Toʼoneʼ k-felicitartik le paalaloʼob ku tsʼáaikoʼob táanil u meyajtikoʼob Dios kex yaʼab baʼaloʼob ku aktáantkoʼoboʼ. Ku yilik u chukpachtikoʼob u metaʼob, ku tsʼáaikoʼob táanil le kʼaʼaytaj ichil u kuxtaloʼoboʼ yéetel ku yilik maʼ u náaysaʼal u yóoloʼob tumen le kʼasaʼan yóokʼol kaabaʼ. Táankelem paalaleʼex, maʼ u tuʼubulteʼexeʼ maʼ chéen kunel le baʼax ka beetkeʼex utiaʼal a meyajtikeʼex Jéeobaoʼ. Kʼaʼajakteʼexeʼ yaabiltaʼaneʼex tumen le sukuʼunoʼoboʼ yéetel taak u yáantkeʼexoʼob. Wa ka chʼaʼikeʼex en cuenta Jéeoba tiʼ tuláakal baʼax ka beetkeʼexeʼ yaan u binteʼex maʼalobil.