Bárbaraeʼ jach u yaabiltmaj u papá kaʼachi. Le oʼolaleʼ le baʼax aʼalaʼabtiʼoʼ tu maas lúuʼsaj u yóol, tsʼoʼoleʼ le koʼolel aʼaltiʼoʼ maʼalob u biskuba yéetel u familia. Bárbaraeʼ maʼ tu xuʼulul kaʼach u máansik tu tuukul: «¿Maʼalob wa túun u yilik Dios baʼax úuch tiʼ in papá?». Ka máan añoseʼ tu tsʼíibtaj tiʼ junpʼéel libro le baʼax úuchtiʼoʼ, tumen láayliʼ yaachajaʼan u yóoleʼ.

Jeʼex k-ilkoʼ ku máan kʼiin táan u muʼyaj máak ken kíimik wa máax tiʼ, maases wa jach u yaabiltmaj. Le oʼolal le Bibliaoʼ ku yaʼalikeʼ «le kíimiloʼ letiʼe u tsʼook enemigo[oʼ]» (1 Corintoiloʼob 15:26). Le enemigoaʼ yéetel le nojoch páajtalil yaantiʼoʼ le kʼiin maas maʼ táan k-páaʼtikoʼ ku tokiktoʼon le máaxoʼob maas k-yaabiltmoʼ. Mix máak púutsʼuk tiʼ le kíimiloʼ mix tiʼ le muʼyajil ku taaskoʼ, le oʼolal ken kíimik wa máaxeʼ maʼ k-ojel baʼax ken k-aʼaliʼ wa baʼax ken k-beete.

Maʼ xaaneʼ ka waʼalik: «¿Bukaʼaj ku xáantal táan u muʼyaj máak ken kíimik wa máax tiʼ? ¿Baʼax jeʼel u yáantik máak utiaʼal u kaʼa chʼaʼik u yóoleʼ? ¿Bix jeʼel k-áantik juntúul máak tsʼoʼok u kíimil wa máax tiʼeʼ? ¿Yaan wa u kaʼa kuxtal le kimenoʼoboʼ?».