¿Yaan wa kʼiin tsʼoʼok a kʼojaʼantal? Maʼ xaaneʼ como séeb úuchik a wutstaleʼ hasta mix kʼajaʼantechiʼ. Pero maʼ bey u yúuchul ken kíimik wa máaxiʼ. Doctor Alan Wolfelteʼ tu tsʼíibtaj: «U jaajileʼ maʼatech u tuʼubsik máak wa yaan máax kíim tiʼ. [...] Chéen yoʼolal u yáantaj u maasil yéetel ken máanak kʼiineʼ ku xuʼulul u sen muʼyaj máak» (Healing a Spouseʼs Grieving Heart).

Bey úuchik tiʼ Abrahán ka kíim u yatanoʼ. Le Bibliaoʼ ku yaʼalikeʼ «tumen jach yaachaj u yóoleʼ káaj u yoʼtik u yatan» (Génesis 23:2, Traducción del Nuevo Mundo de las Santas Escrituras). Ken u yaʼal «káaj u yoʼtik[oʼ]» ku tsʼáaik naʼatbil xáanchaj táan u muʼyaj. * Jacobeʼ jach muʼyajnaj xan ka tu yojéeltaj kíimsaʼab José, u hijo, tumen juntúul tsʼíitsʼik baʼalcheʼ. «Yaʼab kʼiinoʼob tu yoʼtaj.» U láakʼtsiloʼobeʼ maʼ tu kaxtoʼob bix jeʼel u líiʼskoʼob u yóoleʼ. Kex máan yaʼab añoseʼ láayliʼ yaachajaʼan u yóoleʼ (Génesis 37:34, 35; 42:36; 45:28).

Bejlaʼa xaneʼ yaʼab máak muʼyajtik u kíimil máax u yaabiltmaj. Koʼox ilik bix u yuʼubikubaʼob.

• «In wíicham Roberteʼ, kíim 9 tiʼ julio tiʼ 2008. Tu sáastal le kʼiin ka accidentarnajoʼ chéen bey jeʼex u maasil kʼiinoʼobeʼ. Jeʼex suukileʼ ukʼunajeʼ, tu tsʼuʼutsʼen, tu méekʼen, ka tu yaʼalajten u yaabiltmen, tsʼoʼoleʼ ka bin meyaj. Tsʼoʼok seis años kíimik pero láayliʼ yaachajaʼan in wóoleʼ. Míin mix bikʼin kun xuʼulul in muʼyajtik úuchik u kíimil.» (Gail, 60 años yaantiʼ.)

• «Kex tsʼoʼok dieciocho años kíimik in x-kiʼichpan ataneʼ, láayliʼ kin kʼaʼajsikeʼ yéetel ku yaatal in wóol tumen minaʼan tin wiknal. Ken in wil junpʼéel baʼal jatsʼutseʼ ku kʼaʼajalten yéetel kin waʼalik: ‹¡Bukaʼaj maʼalobil wa kuxaʼan in watan utiaʼal ka u yile!›.» (Etienne, 84 años yaantiʼ.)

Jeʼex k-ilkoʼ yaan horaeʼ deporsi ku xáantal yaachajaʼan u yóol máak. Cada máakeʼ jelaʼan bix u yeʼesik yaachajaʼan u yóol, le beetik maʼ unaj k-juzgartik u maasiliʼ. Maʼ maʼalob xan ka k-taʼak bix k-uʼuyikba chéen tumen k-tuklik jelaʼan kun ilbil tumen u maasiliʼ. ¿Baʼax jeʼel u yáantkoʼon utiaʼal u kaʼa líikʼil k-óoleʼ?