TIʼ TULÁAKAL yóokʼol kaabeʼ le ancianoʼoboʼ nojoch baʼal u yilkoʼob le meyaj ku beetkoʼob ichil u kaajal Diosoʼ. Tsʼoʼoleʼ tuláakloʼon kiʼimak k-óol ikil u yáantkoʼonoʼob. Baʼaleʼ maʼ sen úucheʼ kʼáataʼab tiʼ le ancianoʼob tsʼoʼok u yantal u jaʼabiloʼob wa jeʼel u páajtal u pʼatik tiʼ le sukuʼunoʼob maas táankelmoʼob jujunpʼéel tiʼ le meyaj ku beetkoʼoboʼ.

Desde ka beetaʼab le kʼeexaʼ, le superintendenteʼob tiʼ circuito yéetel le sukuʼunoʼob ku tsʼáaikoʼob xook tiʼ le jejeláas escuelaʼob yanoʼoboʼ, kéen u tsʼáa 70 años tiʼobeʼ, ku xuʼulul u beetkoʼob le meyajaʼ. Tsʼoʼoleʼ le ancianoʼob yaan maas tiʼ 80 años tiʼoboʼ ku pʼatik tiʼ le maas táankelmoʼob meyajoʼob jeʼex u beetik u coordinadoriloʼob tiʼ Comité tiʼ Sucursal wa tiʼ le múuchʼ ancianoʼoboʼ. ¿Bix u yuʼubikuba le sukuʼunoʼob tsʼoʼok u yantal u jaʼabiloʼob yoʼolal le kʼeexoʼob anchajoʼobaʼ? Letiʼobeʼ tsʼoʼok u chúukpajal u yóoloʼob tiʼ Jéeoba yéetel tiʼ u kaajal.

Ken, juntúul sukuʼun tu beetaj u coordinadoril tiʼ junpʼéel Comité tiʼ Sucursal óoliʼ cuarentinueve añoseʼ, ku yaʼalik: «Ka tin wojéeltaj le baʼax chʼaʼtuklaʼaboʼ jach maʼalob tin wilil. Teʼ kʼiin jeʼeloʼ tsʼokaʼaniliʼ in waʼalik tiʼ Jéeoba ich oración kʼaʼabéettoʼon juntúul coordinador maas táankelmeʼ». Yaʼab sukuʼunoʼob tsʼoʼok u yantal u jaʼabiloʼobeʼ bey u tuukuloʼoboʼ, tsʼoʼoleʼ le ancianoʼobaʼ jach kiʼimak u yóoloʼob ikil u  beetkoʼob kaʼach le meyaj tsʼaʼantiʼoboʼ. Le oʼolaleʼ jujuntúuloʼobeʼ wéej lúub u yóoloʼob yoʼolal le kʼeexoʼob anchajoʼ.

Esperandio, juntúul sukuʼun ku beetik kaʼach u coordinadoril le múuchʼ ancianoʼoboʼ, ku yaʼalikeʼ tu káajbaleʼ chan yaachaj u yóol. Baʼaleʼ ku yaʼalikeʼ tsʼoʼok u káajal u kʼojaʼantal, le oʼolal kʼaʼabéet u jóoʼsik tiempo utiaʼal u kanáantkuba. Tak bejlaʼeʼ le sukuʼunaʼ chúukaʼan u yóol u meyajt Jéeoba yéetel jach ku yáantik le sukuʼunoʼoboʼ.

¿Bix tu yuʼubiluba le sukuʼunoʼob xuʼul u beetik u superintendenteiloʼob kex úuch káajak u beetkoʼob le meyajaʼ? Allan, tu beetaj u superintendenteil treintiocho añoseʼ, ku yaʼalik bix tu yuʼubiluba ka tu yojéeltaj le kʼeex anchajoʼ: «Tin wuʼuyaj bey láalaʼab síis jaʼ tin wóokʼoleʼ». Baʼaleʼ ku yaʼalikeʼ yaʼab utsil ku taasik u kaʼansaʼal le sukuʼunoʼob maas táankelmoʼoboʼ. Allaneʼ tak bejlaʼa chúukaʼan u yóol u meyajt Jéeobaeʼ.

Russelleʼ cuarenta años tu beetaj u superintendenteil tiʼ circuito yéetel tu tsʼáaj xook tiʼ le jejeláas escuelaʼob yaan ichil u kaajal Jéeobaoʼ. Ku yaʼalikeʼ tu káajbaleʼ letiʼ yéetel u yataneʼ lúub u yóoloʼob. Ku yaʼalik: «Jatsʼuts k-ilik kaʼach le meyaj k-beetkoʼ yéetel k-uʼuyik bey láayliʼ yaan k-muukʼ utiaʼal k-beetik le meyajoʼ». Bejlaʼeʼ tu kaʼatúulal ku meyajtiʼob le baʼaxoʼob u yojloʼob utiaʼal u yáantkoʼob le sukuʼunoʼob teʼ múuchʼulil tuʼux yanoʼoboʼ, tsʼoʼoleʼ le sukuʼunoʼoboʼ jach kiʼimak u yóoloʼob ikil u yáantajoʼob teʼ múuchʼuliloʼ.

Maʼ xaaneʼ toʼoneʼ mix juntéen k-uʼuyba jeʼex le sukuʼunoʼobaʼ. Baʼaleʼ jeʼel k-naʼatik bix u yuʼubikubaʼob kéen k-xakʼalt le tsikbalil yaan teʼ Kaʼapʼéel tiʼ Samueloʼ.

Koʼox kʼaʼajsik le ka tu tsʼáajuba Absalón tu contra rey David, u taataoʼ. Davideʼ púutsʼ Jerusalén ka bin tu kaajil Mahanaim, lelaʼ tiaʼan kaʼach tu lakʼinil le río Jordanoʼ. Teʼeloʼ David yéetel u soldadoʼobeʼ kʼaʼabéetchaj u kaxtik baʼal u jaantoʼob yéetel uláakʼ baʼaloʼob kʼaʼabéettiʼob. ¿Baʼax túun úuchi?

Óoxtúul máakoʼob kajaʼanoʼob teʼeloʼ tu síiʼob janal, camaʼob yéetel uláakʼ baʼaxoʼob kʼaʼabéet tiʼ letiʼob. Juntúul tiʼ letiʼobeʼ Barzilai (2 Sam. 17:27-29). Ka xuʼul u chʼaʼpachtaʼal David tumen Absaloneʼ, páajchaj u suut Jerusalén, Barzilai túuneʼ tu láakʼintaj tak teʼ río Jordanoʼ. Davideʼ tu yaʼalaj tiʼ Barzilai ka xiʼik tu yéetel tu kaajil Jerusalén, teʼeloʼ letiʼ kun tsʼáaik baʼal u jaante, baʼaleʼ tiʼ Barzilaieʼ maʼ kʼaʼabéetiʼ, tumen ayikʼal (2 Sam. 19:31-33). Maʼ xaaneʼ tiʼ Davideʼ jach ku lúubul utsil Barzilai yoʼolal u modos bey xan yoʼolal le maʼalob tsolnuʼukoʼob jeʼel u tsʼaʼabaltiʼoʼ. Maʼ xaan xaneʼ jach jeʼel kaʼach u kiʼimaktal u yóol Barzilai wa ka kajlak yéetel ka meyajnak teʼ palaciooʼ.

Chéen baʼaleʼ Barzilaieʼ tu yeʼesaj kabal óolal ka tu yaʼalaj tiʼ Davideʼ tsʼoʼok 80 años tiʼ, le oʼolal tsʼoʼok kaʼach tak ‹u jáawal u yuʼubik kiʼ  tu chiʼ baʼax ku jaantik yéetel ku yukʼik›. Barzilaieʼ yaʼab baʼaloʼob u yojel yoʼolal le bukaʼaj baʼaloʼob tu yilaj ichil u kuxtaloʼ. Tsʼoʼoleʼ láayliʼ ku páajtal kaʼach u tsʼáaik maʼalob tsolnuʼukoʼob, jeʼex le tsʼaʼab tiʼ le rey Rehoboam tumen u «nukuch wíinikiloʼob le kaaj» ka máan kʼiinoʼ (1 Rey. 12:6, 7; Sal. 92:12-14; Pro. 16:31). Kex beyoʼ u yojel maʼ tu páajtal u beetik yaʼab baʼal, tumen tsʼoʼok u chʼíijil. Tu yaʼaleʼ tsʼoʼok u kóoktal yéetel maʼ tu yuʼubik u kiʼil baʼax ku jaantik (Ecl. 12:4, 5). Le oʼolal tu yaʼalaj tiʼ David ka u bis Kimham, juntúul táankelem xiʼipal, maʼ xaaneʼ u hijo Barzilai (2 Sam. 19:35-40).

Le kʼeex tu beetaj u kaajal Jéeoba t-chʼaʼchiʼitaj tu káajbal le xookaʼ chíikaʼan tiʼ le baʼax tu beetaj Barzilaioʼ. Tumen tsʼoʼok u chʼíijleʼ maʼ tu yóotaj bin tu palacio Davidiʼ. Teʼ kʼiinoʼob xanaʼ chʼaʼab en cuentail baʼax maas jeʼel u taasik utsil tiʼ tuláakal le ancianoʼob ku meyajtikoʼob Jéeobaoʼ.

Le ancianoʼob tsʼoʼok u yantal u jaʼabiloʼoboʼ ku yeʼeskoʼob kabal óolal, tumen séeb úuchik u naʼatkoʼob le utsil ku taasik le kʼeex beetaʼaboʼ. Wa ku pʼatik u meyajoʼob tiʼ le maas táankelmoʼoboʼ u kaajal Jéeobaeʼ yaan u yilik baʼax unaj u beetaʼal utiaʼal u nuʼuktaʼal le bukaʼaj meyaj kun antaloʼ. Maases letiʼe sukuʼunoʼob yaan u jaʼabiloʼob kaʼansik le maas táankelmoʼob jeʼex tu beetil Barzilai yéetel u hijooʼ wa jeʼex tu beetaj Pablo yéetel Timoteooʼ (1 Cor. 4:17; Fili. 2:20-22). Le sukuʼunoʼob táankelmoʼoboʼ beyoʼob junpʼéel siibal ku tsʼáaik Jéeoba ichil le múuchʼuliloʼ «utiaʼal ka nojochchajak u wíinklil Cristo» (Efe. 4:8-12; ket yéetel Números 11:16, 17, 29).

Tiʼ tuláakal yóokʼol kaabeʼ, yaʼab tiʼ le sukuʼunoʼob tsʼoʼok u pʼatkoʼob tiʼ yaanal le meyaj ku beetkoʼob kaʼachoʼ, bejlaʼeʼ maas ku páajtal u yáantkoʼob u maasil.

Marco, tu beetaj u superintendente viajanteil diecinueve añoseʼ, ku yaʼalik: «Bejlaʼeʼ maas ku páajtal in xíimbaltik u yíicham le kiikoʼob maʼ j-Jaajkunajoʼob yanoʼob tin múuchʼuliloʼ».

Geraldo, tu beetaj u superintendente viajanteil veintiocho añoseʼ, ku yaʼalik: «Teen yéetel in wataneʼ t-chʼaʼtuklaj k-áantik le inactivoʼoboʼ yéetel k-tsʼáaik xook tiʼ yaʼab máakoʼob». Letiʼeʼ ku yaʼalikeʼ bejlaʼeʼ ku tsʼáaikoʼob xook tiʼ quince máakoʼob yéetel yaʼab inactivoʼobeʼ tsʼoʼok u joʼopʼol u kaʼa binoʼob muchʼtáambal.

Allan, le sukuʼun t-aʼalaj tu káajbal le xookaʼ, ku yaʼalik: «Bejlaʼeʼ maas ku páajtal k-táakpajal teʼ kʼaʼaytajoʼ. Jatsʼuts k-ilik k-kʼaʼaytaj teʼ tuʼux yaʼab u máan máakoʼ, tiʼ tiendaʼob yéetel joonaj joonajil. Kaʼatúul tiʼ k-vecinoʼobeʼ tsʼoʼok u láakʼintkoʼonoʼob teʼ muchʼtáambaloʼoboʼ».

¿Úuch wa joʼopʼok a meyajtik Jéeoba yéetel tsʼoʼok u yantal a pʼatik le meyaj ka beetik kaʼachoʼ? Wa beyoʼ jeʼel u páajtal a múuchʼ meyaj yéetel Jéeoba kéen a kaʼans baʼax a wojel tiʼ le sukuʼunoʼob maas táankelmoʼoboʼ. Russell, tsʼoʼok k-yáax aʼalikeʼ, ku yaʼalik: «Jéeobaeʼ táan u kaʼansik yéetel táan u meyajtiʼ le maas táankelmoʼob noʼojaʼanoʼob utiaʼal le meyajoʼ. Le sukuʼunoʼoboʼ ku kʼamkoʼob yaʼab utsil tiʼ le bix u kaʼansajoʼoboʼ bey xan bix u líiʼsik u yóoloʼob u maasil» (ilawil le cuadro « Áant le táankelmoʼob u maas meyajtoʼob Diosoʼ»).

Wa maʼ úuch tsʼaʼabaktech yaanal meyajeʼ, ilawil maʼ u lúubul a wóol. Le meyaj ta beetoʼ tsʼoʼok u yáantik yaʼab máakoʼob yéetel láayliʼ jeʼel u páajtal a seguer a wáantik u maasileʼ. Maʼ u tuʼubultecheʼ láayliʼ jach yaabiltaʼanecheʼ.

Le meyaj tsʼoʼok a beetkoʼ mix bikʼin kun tuʼubsbil tumen Jéeoba. Letiʼeʼ ku yaʼalikeʼ maʼ ken u tuʼubs «le meyaj ta beeteʼexoʼ mix le yaabilaj ta weʼeseʼex tu yoʼolal u kʼaabaʼoʼ, tumen teʼexeʼ ta wáanteʼex le máaxoʼob kiliʼichoʼoboʼ yéetel láayliʼ táan a wáantkeʼexoʼobeʼ»  (Heb. 6:10). Le tekstoaʼ ku yeʼesikeʼ Jéeobaeʼ maʼ chéen ku kʼaʼajsik le baʼaxoʼob tsʼoʼok k-beetkoʼ. Tumen jach yaabiltaʼanech tumen Jéeobaeʼ, letiʼeʼ maʼatech u tuʼubsik le meyaj tsʼoʼok a beetkoʼ bey xan le táan a beetik utiaʼal a lúubul utsil tiʼoʼ.

¿Kux túun wa maʼ tsʼaʼabaktoʼon junpʼéel túumben meyajiʼ? Kex beyoʼ láayliʼ jeʼel k-kanik yaʼab baʼaloʼobeʼ. ¿Baʼaxten k-aʼalik lelaʼ?

Tumen maʼ xaaneʼ yaan k-múuchʼ meyaj yéetel juntúul tiʼ le sukuʼunoʼob tsʼoʼok u tsʼaʼabal yaanal meyaj u beetoʼoboʼ. Wa beyoʼ jeʼel k-kanik yaʼab baʼaloʼob tiʼ letiʼeʼ. Le oʼolal unaj k-kʼáatiktiʼ bix jeʼel k-beetik wa baʼax meyajileʼ. Tsʼoʼoleʼ jeʼel u páajtal k-ilik bix u tsʼáaik u yóol u beet le meyaj tsʼaʼantiʼ bejlaʼoʼ.

Wa tsʼoʼok u yantal k-jaʼabil, le oʼolal tsʼoʼok u kʼeʼexel tuʼux k-meyaj bey xan wa táankelmoʼon wa x-lóoʼbayanoʼoneʼ, unaj k-kʼaʼajsikeʼ Jéeobaeʼ u yaabiltmaj le sukuʼunoʼob úuch joʼopʼok u chúukpajal u yóoloʼoboʼ yéetel láayliʼ táan u beetkoʼobeʼ.