Le Bibliaoʼ ku yaʼalikeʼ ka máan kʼiin bisaʼak José tu luʼumil Egipto tumen le madianitaʼoboʼ, Jacob yéetel u láakʼtsiloʼobeʼ lukʼoʼob Canaáneʼ ka binoʼob kajtal Egipto. Kajlajoʼob Gosén, le tuʼux ku nupkuba le río Nilo yéetel u kʼáaʼnáabil le Mediterráneooʼ (Gén. 47:1, 6). Le israelitaʼoboʼ «seguernaj u sen yaʼabtaloʼob tu séebaʼanil yéetel sen anchaj u páajtaliloʼob». Le oʼolal le egipcioʼoboʼ sajakchajoʼob, ka túun tu palitsiltoʼob le israelitaʼoboʼ (Éxo. 1:7-14).

Yaan máaxoʼob aʼalikeʼ maʼ jaaj le baʼax ku yaʼalik le Bibliaoʼ. Chéen baʼaleʼ yaan baʼaxoʼob eʼesik jach jaaj anchaj palitsiloʼob semitaʼob * tu luʼumil Egipto.

Le arqueólogoʼoboʼ tsʼoʼok u kaxtikoʼob jujunpʼéel lugaroʼob tuʼux kajlaj máakoʼob tu xamanil Egipto. John Bimson, juntúul máax xakʼaltik u tʼaaniloʼob le Bibliaoʼ, ku yaʼalikeʼ tsʼoʼok u kaxtaʼal maas tiʼ 20 lugaroʼob tuʼux kajlaj le máaxoʼob ku taaloʼob tiʼ u chʼiʼibal Semoʼ. Tsʼoʼoleʼ James Hoffmeier, juntúul máax xokik baʼaxoʼob úuch tu luʼumil Egiptoeʼ, tu yaʼalaj: «Óoliʼ tu yáamil 1800 yéetel 1540 táanil tiʼ u taal Jesúseʼ yaʼab tiʼ le máaxoʼob ku taaloʼob tu chʼiʼibal Sem kajaʼanoʼob kaʼach tu chikʼinil Asiaeʼ binoʼob kajtal tu luʼumil Egipto». Tu yaʼalaj xan: «Le tiempo ka úuch lelaʼ letiʼe tiempo xan ka úuch le baʼax ku yaʼalik le Biblia yoʼolal Abrahán, Isaak yéetel Jacob ku tsikbaltaʼal tu libroil Génesisoʼ».

Tu noojolil Egiptoeʼ tsʼoʼok xan u kaxtaʼal uláakʼ baʼax eʼesik jaaj baʼax ku yaʼalik le Bibliaoʼ. Kaxtaʼab junpʼéel papiro tsʼíibtaʼab tu yáamil u jaʼabiloʼob 2000 yéetel 1600 táanil tiʼ u taal Jesús, teʼeloʼ tsʼíibtaʼan u kʼaabaʼ le palitsiloʼob meyajnajoʼob tiʼ junpʼéel naj yaan kaʼach tu noojolil Egiptooʼ. Maas tiʼ le cuarenta kʼaabaʼob tsʼíibtaʼanoʼoboʼ, u kʼaabaʼ le máaxoʼob taaloʼob tu chʼiʼibal Semoʼ. Le palitsiloʼobaʼ u meyajoʼobeʼ u beetkoʼob kaʼach janal, tejer yéetel uláakʼ meyajoʼob jach ku nóoksik máak. James Hoffmeiereʼ tu yaʼalaj: «Tumen maas tiʼ cuarenta máakoʼob ku taaloʼob tiʼ u chʼiʼibal Sem kajaʼanoʼob teʼ naj yaan kaʼach tu kaajil Tebaida [tu noojolil Egiptooʼ], maʼ xaaneʼ yaʼab uláakʼ tiʼ letiʼob kajaʼanoʼob tiʼ tuláakal u luʼumil Egipto, maases le tuʼux ku nupkuba le río Nilo yéetel u kʼáaʼnáabil le Mediterráneooʼ».

Le arqueólogo David Rohloʼ tu tsʼíibteʼ jujunpʼéel tiʼ u kʼaabaʼ le palitsiloʼob ku chíikpajal teʼ papiro kaxtaʼaboʼ «bey teʼ Biblia copiartaʼaboʼoboʼ». Ku chíikpajal kʼaabaʼob jeʼex Isacar, Aser yéetel Sifrá (Éxo. 1:3, 4, 15). Le oʼolal Rohleʼ ku yaʼalik: «Lelaʼ ku yeʼesik jach tu jaajil palitsiltaʼab le israelitaʼob tu luʼumil Egiptooʼ».

John Bimsoneʼ ku yaʼalik xan: «Le baʼaxoʼob tsʼoʼok u kaxtaʼaloʼoboʼ ku yeʼesik jach jaaj baʼax ku yaʼalik le Biblia yoʼolal bix úuchik u palitsiltaʼal le israelitaʼob tu luʼumil Egiptooʼ bey xan bix úuchik u jóoʼsaʼaloʼob teʼ luʼumiloʼ».