Tiʼ yaʼab sukuʼunoʼobeʼ ku meyaj jejeláas aplicaciónoʼob utiaʼal u tsikbaloʼob yéetel u láakʼtsiloʼob bey xan yéetel u amigoʼob. Chéen baʼaleʼ le máaxoʼob yiijchajaʼan u tuukuloʼoboʼ ku chʼaʼikoʼob en cuenta le baʼax ku yaʼalik le Bibliaaʼ: «Le máax yaan u naʼatoʼ ku taʼakikuba kéen u yil junpʼéel peligro, pero le máax maʼ jach yaan u naʼatoʼ ku seguertik u beel, le oʼolal ku yilik u consecuenciail» (Pro. 27:12).

Jéeobaeʼ jach taak u kanáantkoʼon, le oʼolal ku yaʼaliktoʼon maʼ unaj k-bisikba yéetel le máaxoʼob expulsadoʼoboʼ, le máaxoʼob taak u beetik u jatskuba le múuchʼuliloʼ mix le máaxoʼob ku kaʼanskoʼob baʼaloʼob ku bin tu contra le baʼax ku yaʼalik le Bibliaoʼ (Rom. 16:17; 1 Cor. 5:11; 2 Juan 10, 11). Yaan máaxoʼob ku muchʼkubaʼob t-éeteleʼ maʼ tu kuxtaloʼob jeʼex u yaʼalik Jéeobaoʼ (2 Tim. 2:20, 21). U jaajileʼ maas chéen chʼaʼabil u yéeyik u amigoʼob máak wa u kʼaj óoloʼob. Chéen baʼaleʼ maas difícil u yéeyik máak maʼalob amigoʼob wa ku meyajtiʼ junpʼéel aplicación utiaʼal u kaxtik.

Chéen baʼaleʼ wa táan u tuklik máak u yokol teʼ grupoʼob tuʼux ku tsikbal yaʼab máakoʼoboʼ maas unaj u kanáantkuba. Yaan sukuʼunoʼobeʼ tsʼoʼok u yookloʼob ichil le grupoʼob beyaʼ, tumen maʼ tu kanáantubaʼobeʼ yaj baʼax tsʼoʼok u yúuchultiʼob. U jaajileʼ u yantal máak ichil le grupoʼob jach nuuktak tuʼux yaan u cientosil máakoʼoboʼ jach jeʼel u difíciltal tiʼ u kʼaj óoltik cada juntúuleʼ wa u yojéeltik wa u yaabiltmaj Jéeoba. Salmo 26:4, ku yaʼalik: «Maʼatech in máan yéetel le máakoʼob ku tuusoʼoboʼ, yéetel kin náachkuntikinba tiʼ le máaxoʼob ku taʼakikoʼob jach bixoʼoboʼ». Jeʼex u yaʼalik le tekstooʼ maas maʼalob ka tsikbalnakoʼon yéetel le máaxoʼob jach tu jaajil k-kʼaj óoloʼ.

Chéen baʼaleʼ kʼaʼabéet k-kanáantikba xan tak tiʼ le grupoʼob tuʼux maʼ yaʼab máakoʼob yanoʼoboʼ, tumen leloʼ jeʼel u beetik k-perdertik k-tiempoeʼ yéetel jeʼel u beetik u káajal k-tsikbal tiʼ baʼaloʼob maʼ tu taasik mix junpʼéel utsileʼ. Maʼ unaj xan k-tuklik wa kʼaʼabéet k-núukik tuláakal le baʼaxoʼob ku tsʼíibtaʼaloʼ. Pabloeʼ tu yaʼalaj tiʼ Timoteo ka u kanáantuba tiʼ le máaxoʼob chéen «ku x-mukul tʼaanoʼob tiʼ u maasil» yéetel «ku yoksikubaʼob ichil u kuxtal yaanal máak[oʼ]» (1 Tim. 5:13). Teʼ kʼiinoʼobaʼ le kéen u usart máak le aplicaciónoʼob ku meyaj utiaʼal u yúuchul tsikbaloʼ jach séeb jeʼel u x-mukul tʼaan tiʼ u maasileʼ wa u yoksikuba ichil u kuxtal yaanal máakeʼ.

Juntúul u testigo Jéeoba yiijchajaʼan u tuukuleʼ maʼatech u criticartik u maasil mix tech u máan u tsikbalt junpʼéel baʼal maʼ unaj u yojéeltaʼal tumen u maasiliʼ (Sal. 15:3; Pro. 20:19). Tsʼoʼoleʼ maʼatech u yoksikuba tuʼux ku tsikbaltaʼal baʼaloʼob maʼ ojéelaʼan wa jach jaajiʼ wa chéen tsʼaʼan u maasil (Efe. 4:25). Wa yaan baʼax kʼaʼabéet u tsʼaʼabal k-ojéelteʼ ku tsʼaʼabal k-ojéelt teʼ sitio jw.org bey xan tu programail JW Broadcasting^®. Jeʼel u páajtal k-confiar tiʼ tuláakal le información ku tsʼaʼabaltoʼon teʼeloʼ.

Yaan sukuʼunoʼobeʼ ku meyajtiʼob le aplicaciónoʼob utiaʼal u kʼaʼaytikoʼob u koonoloʼob, utiaʼal u maanoʼob wa utiaʼal u kaxtikoʼob juntúul máax utiaʼal meyaj. Tuláakal lelaʼ ku beetkoʼob chéen yoʼolal negocio, mix baʼal yaan u yil yéetel le adoración ku tsʼaʼabal tiʼ Jéeobaoʼ, le kaʼapʼéel baʼaloʼobaʼ maʼ unaj u xaʼakʼtaʼaloʼobiʼ. Le sukuʼunoʼob ku yilik u kanáantkubaʼob utiaʼal maʼ u yaabiltikoʼob le taakʼinoʼ ku yilkoʼob maʼ u usarkoʼob u maasil sukuʼunoʼob chéen utiaʼal u yantaltiʼob taakʼin (Heb. 13:5).

Maʼ xaaneʼ yaan sukuʼunoʼobeʼ jeʼel u meyajtiʼob le aplicaciónoʼob utiaʼal u kʼáatkoʼob taakʼinoʼ tumen taak u yáantkoʼob le sukuʼunoʼob ku muʼyajoʼoboʼ wa le táan u máanskoʼob nojoch loobiloʼoboʼ. Pero ¿kʼaas wa ka beetaʼak lelaʼ? Toʼoneʼ k-yaabiltmaj k-sukuʼunoʼob le oʼolal k-ilik k-líiʼsik u yóoloʼob yéetel k-áantkoʼob le kéen kʼaʼabéetchajak (Sant. 2:15, 16). Chéen baʼaleʼ wa utiaʼal k-áantik le sukuʼunoʼob ku meyajtoʼon junpʼéel nojoch grupo tuʼux ku yúuchul tsikbaloʼ jeʼel k-beetik u maas difíciltal tiʼ le organización wa tiʼ le ancianoʼob u tsʼáaikoʼob le áantajoʼ, u jaajileʼ maʼ táan k-áantkoʼobiʼ (1 Tim. 5:3, 4, 9, 10, 16). Mix máak unaj u tsʼáaik naʼatbil wa kʼubéentaʼantiʼ tumen le organización ka u kanáant le sukuʼunoʼoboʼ.

Toʼoneʼ k-kʼáat ka alabartaʼak Jéeoba yoʼolal tuláakal baʼax k-beetik (1 Cor. 10:31). Le oʼolaleʼ le kéen meyajnaktoʼon junpʼéel aplicación utiaʼal k-túuxtik mensajeeʼ maʼalob ka tuukulnakoʼon tiʼ bix jeʼel k-kanáantikbaeʼ yéetel tiʼ bix jeʼel u meyajtoʼon maʼalobeʼ.