1. ¿Baʼax tu yaʼalaj Jesús tiʼ le ayikʼaliloʼob ku taal tiʼ Diosoʼ?

YAʼAB tiʼ le baʼaloʼob koʼojtak yaantoʼonoʼ maʼ chíikaʼan u yilaʼaloʼobiʼ. Le ka kaʼansajnaj Jesús teʼ montañaoʼ tʼaanaj tiʼ le ayikʼaliloʼob ku taal tiʼ Diosoʼ, leloʼobaʼ maas maʼalobtak tiʼ jeʼel baʼalak ayikʼalileʼ. Jesúseʼ tu yaʼalaj: «Tumen le tuʼux yaan a ayikʼaliloʼobeʼ tiʼ kun antal xan a puksiʼikʼaliʼ» (Mat. 6:19-21). K-puksiʼikʼaleʼ jeʼel u túulchʼintkoʼon utiaʼal ka xiʼikoʼon tu paach le baʼaloʼob k-tuklik koʼoj u tojoloʼoboʼ. Le oʼolaleʼ wa k-kuxtal jeʼex uts tu tʼaan Jéeobaeʼ k-muchʼkíintik baʼaloʼob koʼoj u tojoloʼob wa «ayikʼaliloʼob teʼ kaʼanoʼ». Jesúseʼ tu yaʼaleʼ le ayikʼaliloʼob beyaʼ mix máak jeʼel u páajtal u yoklikeʼ yéetel mix baʼal jeʼel u páajtal u kʼaskúuntikeʼ.

2. 1) ¿Baʼax tu yaʼalaj apóstol Pablo tiʼ Kaʼapʼéel tiʼ Corintios 4:17 yéetel 18 unaj u beetik máak? 2) ¿Baʼax ken k-xakʼalt teʼ xookaʼ?

² Le apóstol Pablooʼ tu yaʼaleʼ unaj k-chʼikik k-paakat tiʼ le «baʼaloʼob maʼatech u yilaʼaloʼob[oʼ]» (xok 2 Corintios 4:17, 18). Ichil le baʼaloʼob ku tsʼáaiktoʼon Dios maʼ chíikaʼan u yilaʼaloʼoboʼ tiaʼan le bendiciónoʼob ken k-kʼam teʼ túumben luʼumoʼ. Baʼaleʼ teʼ xookaʼ yaan k-xakʼaltik kanpʼéel tiʼ le jatsʼuts baʼaloʼob maʼ tu yilaʼal ku tsʼáaiktoʼon Dios teʼ kʼiinoʼobaʼ, jeʼex le bix k-bisikba tu yéeteloʼ, le oraciónoʼ, le espíritu santooʼ yéetel le áantaj ku tsʼáaiktoʼon Jéeoba, Jesús yéetel le ángeloʼob le kéen jóokʼkoʼon teʼ kʼaʼaytajoʼ. Tsʼoʼoleʼ yaan xan k-kanik bix jeʼel k-tsʼáaik gracias tiʼ Dios yoʼolal le jatsʼuts baʼaloʼobaʼ.

3. 1) ¿Máakalmáak le siibal maas koʼoj u tojol yaantoʼonoʼ? 2) ¿Bix jeʼel u yantaltoʼon le siibalaʼ?

³ Le siibal maas koʼoj u tojol yaantoʼonoʼ letiʼe k-bisikba yéetel  Jéeobaoʼ (Sal. 25:14). Chéen baʼaleʼ, ¿bix jeʼel u páajtal u biskuba juntúul kʼeban wíinik yéetel Jéeoba le Dios jach santooʼ? Lelaʼ ku páajtal tumen Jesúseʼ «ku luʼsik u kʼeban le yóokʼol kaab» yoʼolal u kuxtal tu kʼuboʼ (Juan 1:29). Jéeobaeʼ u yojliliʼ yaan u chúukpajal u yóol Jesús tak ken kíimik utiaʼal u salvartik le máakoʼoboʼ. Le oʼolal tak antes tiʼ u kʼubik u kuxtal Jesúseʼ, Dioseʼ tu yilaj bey u amigoʼob jujuntúul kʼeban máakoʼobeʼ (Rom. 3:25).

4. Tʼaanen tiʼ óoxtúul u amigoʼob Jéeoba kuxlajoʼob táanil tiʼ u taal Jesús.

⁴ Koʼoneʼex tʼaan tiʼ jujuntúul u amigoʼob Dios kuxlajoʼob táanil tiʼ u kʼubik u kuxtal Jesúsoʼ. Juntúul tiʼ u amigoʼobeʼ Abrahán, letiʼeʼ jach nojoch le fe tu yeʼesoʼ. Le ka máan kex 1,000 años kíimkeʼ, Jéeobaeʼ tu yaʼalaj u «amigo Abrahán» (Isa. 41:8). Lelaʼ ku yeʼesikeʼ kex ka kíimik máakeʼ Jéeobaeʼ láayliʼ ku yilik bey u amigoeʼ. Utiaʼal Jéeobaeʼ, Abraháneʼ láayliʼ kuxaʼaneʼ tumen maʼ u tuʼubsiʼ (Luc. 20:37, 38). Uláakʼ u amigoeʼ Job. Juntéenjeak u muchʼmuba le ángeloʼob teʼ kaʼanoʼ, Jéeobaeʼ tu yaʼalaj jach ku confiar tiʼ Job. Tu yaʼalaj tu yoʼolal: «Letiʼeʼ yaantiʼ junpʼéel toj kuxtal yéetel chúukaʼan u yóol u beet baʼax maʼalob, ku meyajtiken yéetel ku náachkuntkuba tiʼ baʼax kʼaas» (Job 1:6-8). Uláakʼ u amigoeʼ Daniel, letiʼeʼ kex 80 años tu meyajtaj Jéeoba tiʼ junpʼéel luʼum tuʼux ku adorartaʼal uláakʼ diosoʼob. Le tsʼoʼok u jach chʼíijil Danieloʼ óoxpáak aʼalaʼabtiʼ tumen le ángeloʼoboʼ «jach yaabiltaʼan» tumen Jéeoba (Dan. 9:23; 10:11, 19). Jéeobaeʼ jach ku tsʼíiboltik u kʼuchul u kʼiinil u kaʼa kuxkíintik u amigoʼob (Job 14:15).

5. ¿Baʼax unaj u beetik máak utiaʼal u «biskuba maʼalob» yéetel Jéeoba?

⁵ Teʼ kʼiinoʼobaʼ u millonesil kʼeban máakoʼobeʼ maʼalob u biskubaʼob yéetel Jéeoba. Yaʼab xiiboʼob, koʼoleloʼob yéetel paalaloʼob tiʼ tuláakal yóokʼol kaabeʼ, yoʼolal bix u kuxtaloʼobeʼ, ku yeʼeskoʼob jach ku biskubaʼob yéetel Dios. Le Bibliaoʼ ku yaʼalikeʼ Jéeobaeʼ «jach ku biskuba maʼalob yéetel le máaxoʼob toj u kuxtaloʼoboʼ» (Pro. 3:32). Ku páajtal u biskubaʼob yéetel Jéeoba tumen ku tsʼáaik u fejoʼob tiʼ u kuxtal Jesús tu kʼuboʼ. Yoʼolal le boʼol tu tsʼáaj Jesúsoʼ, kex maʼ k-náajaltmeʼ, ku páajtal k-kʼubik k-kuxtal tiʼ Jéeoba yéetel k-okjaʼ. Kéen k-beet le kaʼapʼéel baʼaloʼobaʼ k-táakpajal ichil le u millonesil máakoʼob ‹jach ku biskubaʼob maʼalob› yéetel Jéeoba, le máax maas yaan u poderoʼ.

6. ¿Bix jeʼel k-eʼesik tiʼ Dios nojoch baʼal k-ilik k-bisikba tu yéeteleʼ?

⁶ ¿Bix jeʼel u páajtal k-eʼesik tiʼ Dios nojoch baʼal k-ilik k-bisikba tu yéeteleʼ? Letiʼe k-eʼesik yaan k-fe jeʼex tu beetil Abrahán yéetel Jobeʼ. Letiʼobeʼ maas tiʼ 100 años chúukpaj u yóoloʼob tiʼ Dios. Toʼon xaneʼ kex jeʼel bukaʼaj tiempo joʼopʼok k-meyajtik Jéeobaeʼ unaj u chúukpajal k-óol. Tsʼoʼoleʼ jeʼex Danieleʼ wa k-ilik maas kʼaʼanaʼan k-bisikba yéetel Jéeobaeʼ jeʼel tak k-tsʼáaik k-kuxtal tu yoʼolaleʼ (Dan. 6:7, 10, 16, 22). Yéetel u yáantaj Jéeobaeʼ jeʼel u páajtal u chúukpajal k-óol k-aktáant jeʼel baʼalak ka k-muʼyajteʼ. Beyoʼ maʼ tun xuʼulul k-bisikba tu yéetel (Fili. 4:13).

7. 1) Jeʼex u yaʼalik Proverbios 15:8, ¿bix u yuʼubikuba Jéeoba kéen orarnakoʼon? 2) ¿Bix u núukik Jéeoba le oraciónoʼob k-beetiktiʼoʼ?

⁷ Uláakʼ siibal u tsʼaamajtoʼon Dios maʼ tu páajtal u yilaʼaleʼ letiʼe oraciónoʼ. U suukileʼ le amigoʼoboʼ ku tsikbaltikoʼob baʼax ku tuklikoʼob yéetel bix u yuʼubikubaʼob. Bey xan u beetik máak le táan u biskuba yéetel Jéeobaoʼ. Letiʼeʼ bey ku tsikbal t-éetel le kéen k-xok le Bibliaoʼ, tumen le kéen k-xokeʼ k-naʼatik bix u tuukul yéetel bix u yuʼubikuba. Toʼoneʼ k-tsikbal tu yéetel le kéen orarnakoʼon tiʼ letiʼoʼ, jeʼel u páajtal k-aʼaliktiʼ jach bix k-uʼuyikba  yéetel baʼaxoʼob k-tuklikeʼ. Jeʼex k-ilkoʼ Jéeobaeʼ uts tu tʼaan u yuʼubik le oraciónoʼob k-beetiktiʼoʼ (xok Proverbios 15:8). Jéeobaeʼ bey jeʼex juntúul amigo ku yeʼesik u yaabilajeʼ, le oʼolal ku núukik le oraciónoʼob k-beetkoʼ. Yaan kʼiineʼ séeb u núukik, baʼaleʼ yaan kʼiin xaneʼ kʼaʼabéet u seguer k-kʼáatiktiʼ. Baʼax k-ojleʼ seguro yaan u núukik, baʼaleʼ yaan u núukik le bix maas maʼalob u yilkoʼ yéetel teʼ súutukil ku tuklik maas maʼaloboʼ. Yaan horaeʼ le bix ken u núukiloʼ maʼ letiʼe bix k-tuklikoʼ. Jeʼex le kéen k-aktáant junpʼéel problemaeʼ, tu lugar u luʼsiktoʼoneʼ, maʼ xaaneʼ jeʼel u tsʼáaiktoʼon naʼat yéetel muukʼ utiaʼal k-aktáantikeʼ (1 Cor. 10:13).

8. ¿Bix k-tsʼáaik gracias tiʼ Jéeoba yoʼolal le oraciónoʼ?

⁸ ¿Bix jeʼel k-tsʼáaik gracias tiʼ Jéeoba ikil u chaʼik k-orar tiʼeʼ? Letiʼe ken k-beet le baʼax ku yaʼalik le tekstoaʼ: «Maʼ u jáawal a orareʼex» (1 Tes. 5:17). Jéeobaeʼ maʼatech u obligarkoʼon utiaʼal ka orarnakoʼon tiʼ letiʼ, baʼaxeʼ ku chaʼik ka síijik t-puksiʼikʼal. Le oʼolal kéen orarnakoʼon yaʼab u téenel tiʼ junpʼéel kʼiineʼ k-eʼesik k-tsʼáaik gracias tiʼ yoʼolal le jatsʼuts siibalaʼ. Baʼaleʼ kéen orarnakoʼoneʼ maʼ unaj u tuʼubultoʼon k-alabarkiʼ bey xan k-tsʼáaik gracias tiʼ yoʼolal tuláakal le baʼaxoʼob ku tsʼáaiktoʼonoʼ (Sal. 145:2, 3).

9. 1) ¿Bix u yilik le oración le sukuʼun Chrisoʼ? 2) ¿Bix a wilik le oraciónoʼ?

⁹ Jeʼel bix u máan le tiempo táan k-meyajtik Jéeoba bey xan kéen k-il bix u núukik k-oraciónoʼobeʼ unaj k-maas tsʼáaik gracias tiʼ yoʼolal le jatsʼuts siibalaʼ. Koʼox ilik baʼax tu yaʼalaj Chris, juntúul sukuʼun tsʼoʼok 47 años káajak u xupkuba u meyajt Dios. Letiʼeʼ ku yaʼalik: «Jach uts tin tʼaan in wajal temprano utiaʼal in orar tiʼ Jéeoba. Teʼ hora jeʼeloʼ jach jatsʼuts bix u juul le Kʼiinoʼ. In beetik beyoʼ ku péeksiken in tsʼáa gracias tiʼ Jéeoba yoʼolal tuláakal le baʼaxoʼob ku síiktenoʼ, tak tu yoʼolal le oraciónoʼ. Tsʼoʼoleʼ le kéen áakʼabchajak yéetel kéen in beet in oracióneʼ jach kiʼ in wenel tumen tranquilo in conciencia».

10. ¿Baʼaxten le espíritu santooʼ junpʼéel siibal jach koʼoj u tojol?

¹⁰ Uláakʼ siibal jach koʼoj u tojol ku tsʼáaiktoʼon Jéeobaeʼ letiʼe espíritu santooʼ. Jesúseʼ tu  yaʼalaj maʼ u xuʼulul k-kʼáatik tiʼ Jéeoba espíritu santo (Luc. 11:9, 13). Tiʼ Jéeobaeʼ ku meyaj le espíritu santo utiaʼal u tsʼáaiktoʼon le «páajtalil ku píitmáan tiʼ u muukʼ wíinikoʼ» (2 Cor. 4:7; Hech. 1:8). Yéetel u yáantaj le espíritu santooʼ jeʼel u béeytal k-aktáantik jeʼel baʼalak problemaileʼ.

11. ¿Bix u yáantkoʼon le espíritu santooʼ?

¹¹ Le espíritu santooʼ ku yáantkoʼon k-beet le meyajoʼob ku tsʼaʼabaltoʼon ichil u kaajal Jéeobaoʼ. Ku tsʼáaiktoʼon xan naʼat wa le baʼax kʼaʼabéet utiaʼal ka k-beet maas maʼalob le baʼaxoʼob k-ojel k-beetoʼ. Toʼoneʼ k-ojleʼ kéen jóokʼok tubeel junpʼéel meyajeʼ maʼ béeychaj t-oʼolaliʼ, baʼaxeʼ chéen yoʼolal u yáantaj le espíritu santooʼ.

12. Jeʼex u yaʼalik Salmo 139:23 yéetel 24, ¿baʼax jeʼel u páajtal k-kʼáatik ich oracióneʼ?

¹² Uláakʼ bix k-eʼesik k-tsʼáaik gracias tiʼ Dios yoʼolal le espíritu santooʼ letiʼe kéen k-kʼáattiʼ ka u yáantoʼon k-il wa yaan baʼax maʼ maʼalob tsʼoʼok u káajal k-tsʼíiboltik wa k-tuklikiʼ (xok Salmo 139:23, 24). Wa k-kʼáatik u yáantaj Jéeobaeʼ, letiʼeʼ yaan u tsʼáaiktoʼon u espíritu santo utiaʼal ka k-tsʼáa cuenta baʼax unaj k-utskíintik. Kéen k-il yaan baʼax unaj k-utskíintikeʼ unaj k-kʼáatik espíritu santo tiʼ Jéeoba utiaʼal ka xuʼuluk k-tsʼíiboltik wa k-tuklik baʼax kʼaas. Kéen k-beet beyoʼ k-eʼesik maʼ k-kʼáat k-beet baʼax kʼaasiʼ, beyoʼ Jéeobaeʼ yaan u seguer u yáantkoʼon yéetel u espíritu santo (Efe. 4:30).

13. ¿Bix jeʼel u maas taaktal k-tsʼáaik gracias tiʼ Jéeoba yoʼolal le espíritu santooʼ?

¹³ Wa k-tuukul tiʼ tuláakal le baʼaxoʼob ku béeychajal bejlaʼa yoʼolal u yáantaj le espíritu santooʼ yaan u maas taaktal k-tsʼáaik gracias tiʼ Jéeoba yoʼolal le siibalaʼ. Táanil tiʼ u suut Jesús teʼ kaʼanoʼ, tu yaʼalaj tiʼ u discípuloʼob: «Yaan a kʼamkeʼex páajtalil kéen kʼuchuk le espíritu santo ta wóokʼoleʼexoʼ, yéetel yaan a tʼaaneʼex tin woʼolal [...] tak tu maas náachil le luʼumaʼ» (Hech. 1:8). Jach jatsʼuts bix tsʼoʼok u béeychajal le baʼax tu yaʼaloʼ. Yéetel u yáantaj le espíritu santooʼ kex ocho millones y medio máakoʼob tiʼ tuláakal yóokʼol kaabeʼ táan u meyajtikoʼob Jéeoba. Tsʼoʼoleʼ jach jatsʼuts bix u biskubaʼob  tumen yéetel u yáantaj le espíritu santooʼ ku yeʼeskoʼob jatsʼuts modosoʼob jeʼex yaabilaj, kiʼimak óolal, jeetsʼelil, paciencia, utsil puksiʼikʼal, utsil, fe, maʼ u séeb kʼuuxil máak yéetel u controlarkuba máak (Gál. 5:22, 23). Jeʼex k-ilkoʼ le espíritu santooʼ junpʼéel jach koʼokoj siibal.

14. Kex maʼ chíikaʼan u yilaʼaleʼ, ¿máaxoʼob áantkoʼon teʼ kʼaʼaytajoʼ?

¹⁴ Uláakʼ siibal yaantoʼon maʼ chíikaʼan u yilaʼaleʼ letiʼe k-múul meyaj yéetel Jéeoba, Jesús yéetel le ángeloʼoboʼ (2 Cor. 6:1). Letiʼobeʼ ku yáantkoʼonoʼob utiaʼal ka béeyak k-áantik uláakʼ máakoʼob u meyajtoʼob Jéeoba. Pabloeʼ tu yaʼaleʼ letiʼ yéetel u maasil sukuʼunoʼob teʼ kʼiinoʼob jeʼeloʼ ‹u yéet meyajoʼob Dios› (1 Cor. 3:9). Kéen táakpajkoʼon teʼ kʼaʼaytajoʼ k-eʼesik táan k-múul meyaj yéetel Jesús. Bey u yeʼesik le baʼax tu yaʼalaj Jesús tiʼ u discípuloʼob le ka tsʼoʼok u yaʼaliktiʼob unaj u kaʼanskoʼob le máakoʼoboʼ, tu yaʼalajtiʼob: ‹Tiʼ yanen ta wéeteleʼexeʼ› (Mat. 28:19, 20). ¿Bix u múul meyaj le ángeloʼob t-éeteloʼ? Letiʼe kéen u yáantoʼonoʼob k-tsikbalt «le maʼalob baʼaloʼob ku taal tiʼ Dios» tiʼ tuláakal máakoʼ. Jach k-tsʼáaik gracias yoʼolal le áantaj ku tsʼáaikoʼoboʼ (Apo. 14:6).

15. ¿Baʼax tsikbalil yaan teʼ Biblia eʼesik Jéeoba natsʼik le máakoʼob tu yiknaloʼ?

¹⁵ ¿Baʼax tsʼoʼok u páajtal k-beetik yoʼolal le áantaj ku tsʼaʼabaltoʼonoʼ? Kéen k-pakʼ u semillail le Reinooʼ yaneʼ ku lúubul tiʼ puksiʼikʼaloʼob ku keʼetel yéetel maʼalob luʼum (Mat. 13:18, 23). ¿Máax beetik u jóokʼol le semilla yéetel u káajal u yichankiloʼ? Jéeoba, tumen Jesúseʼ tu yaʼalaj: «Mix máak jeʼel u páajtal u taal tin wiknal wa maʼ letiʼ natsʼikeʼ» (Juan 6:44). Teʼ Bibliaoʼ yaan junpʼéel tsikbal eʼesik jach bey u yúuchloʼ. Juntéenjeakeʼ Pabloeʼ kʼaʼaytaj naj tiʼ jujuntúul koʼoleloʼob tu joʼokajil Filipos. Juntúul tiʼ le koʼoleloʼobaʼ u kʼaabaʼeʼ Lidia. Le Bibliaoʼ ku yaʼalik tu yoʼolal: «Ka túun jeʼekʼabtaʼab u puksiʼikʼal tumen Jéeoba utiaʼal ka u kʼam le baʼaxoʼob ku yaʼalik Pablooʼ» (Hech. 16:13-15). Jeʼex tu beetil yéetel Lidiaeʼ, Jéeobaeʼ tsʼoʼok u beetik u yokol u millones máakoʼob ichil u kaajal.

16. ¿Máax unaj u alabartaʼal kéen xiʼiktoʼon utsil teʼ kʼaʼaytajoʼ?

¹⁶ ¿Máax unaj u alabartaʼal kéen xiʼiktoʼon utsil teʼ kʼaʼaytajoʼ? Le baʼax tu yaʼalaj Pablo tiʼ le múuchʼulil yaan Corintooʼ ku núukik le kʼáatchiʼoʼ. Tu yaʼalaj: «Teen pakʼe, Apolos jóoyabte, chéen baʼaleʼ Dios beet u nojochtal. Bey túunoʼ le máax ku paakʼal yéetel le máax ku jóoyaboʼ maʼ unaj u alabartaʼaliʼ, baʼaxeʼ chéen Dios tumen letiʼ beetik u nojochtal» (1 Cor. 3:6, 7). Le oʼolaleʼ le kéen xiʼiktoʼon maʼalobil teʼ kʼaʼaytajoʼ kʼaʼabéet k-alabartik Jéeoba jeʼex tu beetil Pablooʼ.

17. ¿Bix jeʼel k-eʼesik nojoch baʼal k-ilik k-múul meyaj yéetel Jéeoba, Jesucristo yéetel le ángeloʼoboʼ?

¹⁷ ¿Bix jeʼel k-eʼesik nojoch baʼal k-ilik k-múul meyaj yéetel Jéeoba, Jesucristo yéetel le ángeloʼoboʼ? Letiʼe k-kaxtik bix k-tsikbaltik tiʼ bukaʼaj máakoʼob ku páajtal le baʼaloʼob maʼalobtak ken u beet u Reino Diosoʼ. Lelaʼ jeʼel u páajtal k-beetik teʼ tuʼux yaʼab u máan máakoʼ yéetel «joonaj joonajil» (Hech. 20:20). Yaʼab sukuʼunoʼobeʼ uts tu tʼaan u káajsik u kʼaʼaytajoʼob jeʼel tuʼuxak yanoʼobeʼ yéetel tiʼ jeʼel máaxakeʼ. Le kéen u yiloʼob wa máaxeʼ ku saludarkoʼob yéetel ku yilkoʼob bix jeʼel u káajsikoʼob u tsikbaloʼob tu yéeteleʼ. Wa ku yilkoʼob ku tsʼáaik le máak tuʼux u tsikbaloʼ ku kaxtikoʼob bix jeʼel u kʼaʼaytajoʼob tiʼeʼ.

18, 19. 1) ¿Bix k-jóoyabtik u semillail le jaajoʼ? 2) ¿Bix áantaʼabik Raphalalani tumen Jéeoba?

¹⁸ Toʼoneʼ «u yéet meyajoʼon Dios», le oʼolal le  kéen k-pakʼ u semillail le jaaj tu puksiʼikʼal le máakoʼoboʼ unaj xan k-jóoyabtik. Le kéen k-il yaan máax taak u maas kaanbaleʼ unaj k-suut k-kaʼa xíimbalte. Jeʼel u páajtal xan k-aʼalik tiʼ wa máax ka xiʼik u yileʼ wa ka u tʼaneʼ, yéetel wa ku béeytaleʼ ku káajsaʼal le xook tu yéeteloʼ. Jach ku kiʼimakkúuntik k-óol k-ilik bix u yáantaʼal juntúul j-xoknáal tumen Jéeoba utiaʼal u kʼexik u tuukul yéetel u kuxtal.

¹⁹ Koʼoneʼex ilik baʼax úuch tiʼ sukuʼun Raphalalani, letiʼeʼ kajaʼan Sudáfrica yéetel j-meen kaʼachi. Jach jatsʼuts u yilik tuláakal le baʼaxoʼob ku kanik kaʼach teʼ Bibliaoʼ. Chéen baʼaleʼ le ka tu kanaj teʼ Biblia maʼ maʼalob u yilik Dios u tʼaan máak yéetel le kimenoʼoboʼ maʼ chéen chʼaʼabil tu kʼamiliʼ (Deu. 18:10-12). Jujunpʼíitil tu chaʼaj ka kʼeʼexek u tuukul tumen Dios. Ka máan kʼiineʼ xuʼul u beetik u j-meenil kex tiʼ ku kaxtik u kuxtal kaʼachiʼ. Bejlaʼaʼ yaan 60 años tiʼeʼ, ku yaʼalik: «Jach kin tsʼáaik gracias tiʼ u testigoʼob Jéeoba tumen yaʼab bix tu yáantilenoʼob, jeʼex in kaxtik junpʼéel meyajeʼ. Baʼaleʼ maases kin tsʼáaik gracias tiʼ Jéeoba tumen tu yáanten in kʼex in kuxtal. Bejlaʼeʼ okjaʼanajaʼanen yéetel ku páajtal in jóokʼol kʼaʼaytaj».

20. ¿Baʼax tsʼoʼok a chʼaʼtuklik a beetik?

²⁰ Teʼ xookaʼ tsʼoʼok k-tʼaan tiʼ kanpʼéel siibaloʼob u tsʼaamajtoʼon Dios maʼ tu páajtal u yilaʼal. Le siibal maas nojoch yaantoʼonoʼ letiʼe k-bisikba yéetel Jéeobaoʼ. Yoʼolal lelaʼ Jéeobaeʼ ku tsʼáaiktoʼon uláakʼ koʼokoj siibaloʼob: le oraciónoʼ, u espíritu santo yéetel k-múul meyaj yéetel Jéeoba, Jesús bey xan le ángeloʼoboʼ. Toʼoneʼ tsʼoʼok k-chʼaʼtuklik maʼ u xuʼulul k-ilik jach koʼokoj baʼal le siibaloʼob u tsʼaamajtoʼon Jéeobaoʼ. Mantatsʼ xan ken k-tsʼáa gracias tiʼ tumen minaʼan uláakʼ amigo jeʼex letiʼeʼ.