Eclesiastés 5:8, jach ku beetik k-tuukul tumen ku yaʼalik: «Wa ka wilik táan u pechʼ óoltaʼal le óotsiloʼob yéetel maʼ tu beetaʼal justicia mix tu beetaʼal baʼax toj teʼ luʼum tuʼux kajaʼanechoʼ, maʼ u jaʼakʼal a wóol tu yoʼolal le baʼax ku yúuchloʼ tumen le máax yaantiʼ autoridad ku beetik u kʼasaʼaniloʼ táan u jach ilaʼal tumen juntúul máax maas kaʼanal yanil tiʼ letiʼ. Le máaxoʼob yaan autoridad tiʼoboʼ mantatsʼ yaan uláakʼ máakoʼob maas kaʼanal yaniloʼob tiʼ letiʼob».

Maʼ xaaneʼ jeʼel u tuklik máakeʼ le tekstoaʼ chéen táan u tʼaan tiʼ le máaxoʼob yaan autoridad tiʼob ichil le gobiernoʼoboʼ. Chéen baʼaleʼ wa k-tuklik tubeeleʼ yaan junpʼéel baʼax jatsʼuts ku kaʼansiktoʼon yoʼolal Jéeoba, yéetel leloʼ ku líiʼsik k-óol.

Tiʼ Eclesiastés 5:8, táan u yúuchul tʼaan tiʼ juntúul gobernante ku beetik u kʼasaʼanil tiʼ le óotsiloʼoboʼ yéetel maʼatech u beetik justicia tiʼob. Le kʼasaʼan gobernanteaʼ unaj u kʼaʼajsikeʼ maʼ xaaneʼ táan u yilaʼal baʼax ku beetik tumen uláakʼ máax yaan maas autoridad tiʼ letiʼ. Tsʼoʼoleʼ maʼ xaaneʼ tu yóokʼol le kaʼatúuloʼobaʼ yaan uláakʼ máakoʼob maas yaan u autoridadoʼob. U kʼaasileʼ yaan horaeʼ tuláakal le máaxoʼob yaan autoridad tiʼobaʼ ku chaʼik u maʼanloʼob. Tu yoʼolal leloʼ le máaxoʼob óotsiloʼoboʼ ku muʼyajoʼob.

Kex yaan hora k-sen muʼyaj yoʼolal le baʼax ku beetik le kʼasaʼan máakoʼobaʼ maʼ u tuʼubultoʼoneʼ Jéeobaeʼ táan u yilik baʼax ku beetkoʼob. Jeʼel u páajtal k-kʼáatik tiʼ Jéeoba ka u yáantoʼoneʼ yéetel k-pʼatik tu kʼab le baʼax ku beetaʼaltoʼonoʼ (Sal. 55:22; Fili. 4:6, 7). K-ojleʼ «Jéeobaeʼ jach táan u yilik baʼax ku yúuchul tiʼ tuláakal yóokʼol kaab, tumen letiʼeʼ taak u yáantik le máaxoʼob meyajtik yéetel tuláakal u puksiʼikʼaloʼoboʼ» (2 Cró. 16:9).

Le baʼax ku yaʼalik Eclesiastés 5:8, ku yeʼesiktoʼoneʼ kex jach táaj yaan u autoridad juntúul máakeʼ yaan juntúul máax maas yaan u autoridad tu yóokʼol. Le versículoaʼ maases ku kʼaʼajsiktoʼoneʼ Jéeobaeʼ letiʼe máax maas yaan autoridad tiʼoʼ. Teʼ kʼiinoʼobaʼ letiʼ ku gobernar yéetel u tsʼaamaj Jesucristo utiaʼal ka u beet u Reyil le Reinooʼ. Jéeoba, le Máax jach táaj yaan u poderoʼ ku yilik tuláakal baʼax ku yúuchul yéetel jach justo, tsʼoʼoleʼ u Hijoeʼ jach bey xanoʼ.