1. Kex jach yaan u poder Jéeobaeʼ, ¿baʼax ku beetik yoʼolal u yaabilaj?

JÉEOBA beet tuláakal baʼal, jach yaan u naʼat yéetel jach yaan u poder. Jéeobaeʼ tu yáantaj Job u naʼat lelaʼ, le oʼolal ka tsʼoʼokeʼ Jobeʼ tu yaʼalaj: «Teneʼ in wojel ku páajtal a beetik tuláakal baʼal. Tuláakal baʼax ku páajtal a beetik» (Job 42:2). Letiʼeʼ maʼ kʼaʼabéet ka áantaʼak tumen mix máak utiaʼal u beetik baʼax u kʼáatiʼ. Chéen baʼaleʼ yoʼolal u yaabilajeʼ ku invitartik uláakʼ máakoʼob utiaʼal ka múul meyajnakoʼob tu yéetel utiaʼal u béeykuntik baʼax u tukultmaj.

2. ¿Baʼax tu yaʼalaj Jéeoba tiʼ u Hijo?

² Táanil tiʼ u beetik Jéeoba le yóokʼol kaab yéetel tuláakal le baʼaxoʼob yanoʼ, tu beetaj Jesús, u Hijo. Ka tsʼoʼokeʼ Jéeobaeʼ tu yaʼalaj tiʼ u Hijo ka áantaʼak utiaʼal u beetik tuláakal u maasil baʼaloʼoboʼ (Juan 1:1-3, 18). Le apóstol Pablooʼ tʼaanaj tu yoʼolal Jesús, letiʼeʼ tu yaʼalaj: «Tu yoʼolal letiʼeʼ beetaʼab tuláakal le uláakʼ baʼaloʼoboʼ, le yanoʼob teʼ kaʼanoʼ bey xan le yanoʼob way Luʼumeʼ, le baʼaloʼob ku yilaʼaloʼoboʼ bey xan le baʼaloʼob maʼ tu yilaʼaloʼoboʼ, kex wa tronoʼob, wa jalaʼachiloʼob, wa gobiernoʼob, wa autoridadoʼob. Tuláakal le uláakʼ baʼaloʼoboʼ beetaʼaboʼob tu yoʼolal letiʼ bey xan utiaʼal letiʼ»  (Col. 1:15-17). Jeʼex túun k-ilkoʼ Jéeobaeʼ tu yaʼalaj tiʼ u maasil baʼax meyajil tu tsʼáaj u beet u Hijo. ¿Máasaʼ jach ku taasiktoʼon kiʼimak óolal le baʼax ku beetik Jéeobaaʼ?

3. ¿Baʼax meyajil tu tsʼáaj Jéeoba tiʼ Adán, yéetel baʼaxten?

³ Jéeobaeʼ tu invitartaj xan uláakʼ máakoʼob utiaʼal u múul meyajoʼob tu yéetel. Por ejemploeʼ tu yaʼalaj tiʼ Adán ka u tsʼáa u kʼaabaʼ le baʼalcheʼoboʼ (Gén. 2:19, 20). ¡Chéen tukult bukaʼaj kiʼimakil u yóol Adán kaʼach táan u beetik le meyajaʼ! Utiaʼal u tsʼáaik u kʼaabaʼ le baʼalcheʼoboʼ, letiʼeʼ ku jach ilik kaʼach baʼax ku beetkoʼob. Jéeoba beet tuláakal le baʼalcheʼoboʼ, le oʼolaleʼ jeʼel u páajtal kaʼach u tsʼáaik u kʼaabaʼobeʼ. Chéen baʼaleʼ yoʼolal u yaabilajeʼ tu yaʼalaj tiʼ Adán ka u tsʼáa u kʼaabaʼob. Dios xaneʼ tu yaʼalaj tiʼ Adán ka u sut Paraísoil le Luʼumaʼ (Gén. 1:27, 28). Ka máan kʼiineʼ Adaneʼ xuʼul u meyaj yéetel Jéeoba, yoʼolal lelaʼ sen muʼyajnaji bey xan u paalaloʼob (Gén. 3:17-19, 23).

4. ¿Bix úuchik u múul meyaj uláakʼ máakoʼob yéetel Dios utiaʼal u béeytal baʼax u tukultmaj?

⁴ Ka máan kʼiineʼ Jéeobaeʼ tu invitartaj uláakʼ máakoʼob utiaʼal ka múul meyajnakoʼob tu yéetel. Jeʼex Noeeʼ tu beetaj junpʼéel arca utiaʼal u salvarkuba junmúuchʼ yéetel u láakʼtsiloʼob le ka taal le Diluviooʼ. Moiseseʼ tu jóoʼsaj le israelitaʼob palitsiltaʼanoʼob tu luʼumil Egiptooʼ. Josueeʼ tu nuʼuktaj u kaajil Israel teʼ Luʼum Aʼalaʼan u tsʼaʼabaltiʼoboʼ. Salomoneʼ tu beetaj le templo tu kaajil Jerusalenoʼ. Maríaeʼ kʼuch u beetuba u maama Jesús. Le máaxoʼob tsʼoʼok k-aʼalikaʼ chúukpaj u yóoloʼob tiʼ Jéeoba yéetel anchaj uláakʼ máakoʼob múul meyajnajoʼob tu yéetel utiaʼal u beetik baʼax u tukultmaj.

5. 1) ¿Baʼax meyajil tsʼoʼok u invitartikoʼon Jéeoba k-beete? 2) ¿Jach wa kʼaʼabéet k-áantik Jéeoba utiaʼal u kʼaʼaytaʼal u Reinooʼ? (Ilawil le dibujo yaan tu káajbal le xookaʼ.)

⁵ Bejlaʼeʼ Jéeobaeʼ ku invitartikoʼon xan utiaʼal k-kʼaʼaytik u Reino, tsʼoʼoleʼ jejeláas bix jeʼel k-meyajtikeʼ. Chéen baʼaleʼ yaan meyajoʼob ku beetaʼal ichil u kaajal Dioseʼ maʼ tuláakloʼon jeʼel u páajtal k-beetkeʼ, pero tuláakloʼon jeʼel u páajtal k-kʼaʼaytajeʼ. U jaajileʼ wa u kʼáateʼ Jéeobaeʼ jeʼel u páajtal u kʼaʼaytajeʼ. Desde teʼ kaʼanoʼ jeʼel u páajtal u tʼanik le máakoʼob yanoʼob way Luʼumoʼ. Jesuseʼ tu yaʼaleʼ Jéeobaeʼ jeʼel u beetik u tʼaan le tuunichoʼob utiaʼal u kʼaʼaytikoʼob u Reinooʼ (Luc. 19:37-40). Chéen baʼaleʼ Dioseʼ tsʼoʼok u invitartikoʼon utiaʼal ka múul meyajnakoʼon tu yéetel (1 Cor. 3:9). Le apóstol Pablooʼ tu yaʼalaj: «Tumen u yéet meyajoʼon Dioseʼ, toʼon xaneʼ táan k-sen aʼalikteʼex maʼ a kʼamkeʼex u nojoch utsil wa maʼ kun seguer a béeykuntkeʼex le baʼax oʼolal ku tsʼaʼabalteʼexoʼ» (2 Cor. 6:1). ¿Máasaʼ jach kiʼimak k-óol ikil u invitartikoʼon Dios múul meyaj tu yéetel? Koʼoneʼex ilik baʼaxten ku taasik kiʼimak óolal k-múul meyaj yéetel Dios.

6. ¿Bix tu yuʼubiluba Jesús ikil u múul meyaj yéetel u Taata?

⁶ Ku taasik kiʼimak óolal k-múul meyaj yéetel Dios. Táanil tiʼ u taal way Luʼumeʼ Jesuseʼ tu yaʼaleʼ letiʼ yáax beetaʼab tumen Jéeoba, tu yáantaj u beet tuláakal u maasil baʼaloʼoboʼ yéetel kʼuch u jach yaabiltubaʼob (Pro. 8:22, 30, Traducción del Nuevo Mundo). Jeʼex túun k-ilkoʼ jach kiʼimakchaj u yóol Jesús ka múul meyajnaj yéetel u Taata tumen u yojel táan u beetik baʼax uts tu tʼaan. Kux túun toʼon, ¿kiʼimak wa k-óol ikil k-múul meyaj yéetel Dios?

7. ¿Baʼaxten ku taasiktoʼon kiʼimak óolal le kʼaʼaytajoʼ?

⁷ Jesuseʼ tu yaʼaleʼ ku taasik kiʼimak óolal u tsʼaʼabal wa baʼax bey xan u kʼaʼamal wa baʼax (Bax. 20:35). Ka káaj k-kanik baʼaxoʼob ku kaʼansik le Bibliaoʼ jach tu taasajtoʼon kiʼimak óolal. Bejlaʼa xaneʼ jach ku taasiktoʼon kiʼimak óolal k-tsikbaltik tiʼ uláakʼ máakoʼob le baʼaxoʼob tsʼoʼok k-kanikoʼ.  Toʼoneʼ bey k-uʼuyikbaoʼ tumen k-ilik bix u naʼatkoʼob le baʼaxoʼob ku kaʼansik le Bibliaoʼ yéetel ku natsʼkubaʼob tiʼ Dios. Tsʼoʼoleʼ jach ku kiʼimaktal k-óol xan ken k-il bix u kʼexik u tuukuloʼob yéetel u kuxtaloʼob. Minaʼan uláakʼ meyaj maas kʼaʼabéet yéetel ku taasik kiʼimak óolal jeʼex le kʼaʼaytajoʼ. Le meyajaʼ ku yáantik le máakoʼob utiaʼal ka kʼuchuk u beetubaʼob u amigoʼob Dios yéetel ka yanak kuxtal minaʼan u xuul tiʼob (2 Cor. 5:20).

8. ¿Bix u yuʼubikuba jujuntúul sukuʼunoʼob ikil u múul meyajoʼob yéetel Jéeoba?

⁸ Ken k-kaʼans tiʼ uláakʼ máakoʼob baʼax ku yaʼalik le Bibliaoʼ, k-lúubul utsil tiʼ Jéeoba tsʼoʼoleʼ maʼatech u tuʼubsik le baʼaxoʼob k-beetkoʼ. Lelaʼ ku taasiktoʼon xan kiʼimak óolal (xok 1 Corintoiloʼob 15:58). Marco, juntúul sukuʼun kajaʼan Italiaeʼ, ku yaʼalik: «Teneʼ jach kiʼimak in wóol tumen in wojel táan in tsʼáaik u maas maʼalobil tiʼ Jéeoba yéetel letiʼeʼ mix bikʼin ken u tuʼubs le baʼaxoʼob kin beetkoʼ». Franco, uláakʼ juntúul sukuʼun kajaʼan Italiaeʼ, ku yaʼalik: «Tiʼ Jéeobaeʼ ku meyaj le Biblia yéetel le publicacionoʼob utiaʼal u kʼaʼajsiktoʼon sáamsamal jach u yaabiltmoʼon yéetel kʼaʼanaʼan u yilik le baʼaxoʼob k-beetkoʼ. Tsʼoʼoleʼ kex k-ilik bey maʼ yaʼab le baʼaxoʼob k-beetik tu yoʼolaloʼ letiʼeʼ nojoch baʼal u yilik. Le oʼolaleʼ in múul meyaj yéetel Dioseʼ jach ku taasikten kiʼimak óolal yéetel ku beetik u yantal u biilal in kuxtal».

9. ¿Bix u biskuba kaʼach Jéeoba yéetel Jesús, yéetel baʼaxten?

⁹ Ken múul meyajnakoʼon yéetel le máaxoʼob k-yaabiltmoʼ k-maas bisikba tu yéeteloʼob, k-maas kʼaj óoltik u modosoʼob, k-ojéeltik baʼax taak u beetkoʼob yéetel baʼax tsʼoʼok u chʼaʼtuklik u beetkoʼob utiaʼal u tsʼoʼokbeskoʼob. Maʼ xaaneʼ Jesuseʼ meyajnaj u millonesil años yéetel Jéeoba. Le oʼolaleʼ kʼuch u jach yaabiltubaʼob yéetel mix baʼal jeʼel u beetik kaʼach u xuʼulul u biskubaʼobeʼ. Le baʼax tu yaʼalaj Jesusaʼ ku yeʼesik bix úuchik u biskubaʼob, letiʼeʼ tu yaʼalaj: «Teen yéetel le Taataoʼ juntúuliliʼon» (Juan 10:30). Jeʼex k-ilkoʼ letiʼobeʼ jach maʼalob bix úuchik u biskubaʼob yéetel jach tu paklan áantubaʼob.

10. Le kʼaʼaytajoʼ, ¿baʼaxten ku natsʼkoʼon tiʼ Dios yéetel tiʼ le sukuʼunoʼoboʼ?

¹⁰ Jesuseʼ tu kʼáataj tiʼ Jéeoba ka kanáantaʼak u disipuloʼob. ¿Baʼaxten? Jesuseʼ tu yaʼaleʼ «utiaʼal ka pʼáatkoʼob juntúuliliʼob» jeʼex letiʼ yéetel u Taataeʼ (Juan 17:11). Ken kuxlakoʼon jeʼex uts tu tʼaan Dios yéetel ken kʼaʼaytajnakoʼoneʼ, k-kʼuchul jach kʼaj óolt bix u modos, baʼaxten maʼalob ka confiarnakoʼon tiʼ letiʼ yéetel baʼaxten unaj k-chaʼik u nuʼuktikoʼon. Wa k-natsʼikba tiʼ Dioseʼ, letiʼeʼ yaan u natsʼkuba tiʼ toʼon (xok Santiago 4:8). Jeʼex k-ilkoʼ wa ku páajtal k-bisikba yéetel Dioseʼ láayliʼ jeʼel u páajtal k-bisikba yéetel le sukuʼunoʼoboʼ. ¿Baʼaxten? Tumen tuláakloʼon k-aktáantik problemaʼob, tuláakloʼon ku yantaltoʼon kiʼimak óolal yéetel tuláakloʼon táan k-ilik k-múul meyajtik Dios. Octavia, juntúul kiik kajaʼan Gran Bretañaeʼ,  ku yaʼalik: «In múul meyaj yéetel Jéeobaeʼ ku beetik in maas biskinba yéetel le sukuʼunoʼoboʼ». Le kiikoʼ ku yaʼalikeʼ maʼalob u biskuba yéetel le sukuʼunoʼoboʼ tumen tuláakloʼob u chʼaʼtukultmoʼob u maas meyajtikoʼob Jéeoba. Maʼ xaaneʼ bey xan k-uʼuyikbaoʼ. Ken k-il baʼaxoʼob ku beetik le sukuʼunoʼob utiaʼal u maas meyajtikoʼob Jéeobaoʼ ku taaktal k-maas bisikba tu yéeteloʼob.

11. ¿Baʼaxten yaan k-maas bisikba yéetel Jéeoba bey xan yéetel le sukuʼunoʼob teʼ túumben luʼumoʼ?

¹¹ Bejlaʼeʼ k-yaabiltmaj Dios bey xan le sukuʼunoʼoboʼ, chéen baʼaleʼ maas yaan k-yaabiltikoʼob teʼ túumben luʼumoʼ. ¡Chéen tukult bukaʼaj jatsʼutsil le meyajoʼob ken k-beet teʼ túumben luʼumoʼ! Yaan k-kʼamik le máaxoʼob kun kaʼa kuxtaloʼoboʼ yéetel yaan k-kaʼansiktiʼob le baʼaxoʼob ku yaʼalik Jéeobaoʼ. Tsʼoʼoleʼ yaan k-meyaj utiaʼal u suʼutul Paraísoil le Luʼumaʼ. Jach yaan u taasiktoʼon kiʼimak óolal k-múul meyaj tsʼoʼoleʼ jujunpʼíitil ken láaj luʼsaʼak k-kʼeban yáanal u Reino Cristo. Tuláakal máak yaan u múul biskubaʼob yéetel yaan u maas náatsʼloʼob tiʼ Jéeoba. Tsʼoʼoleʼ Jéeobaeʼ yaan u tsʼáaik baʼax ku tsʼíiboltik tuláakal baʼal kuxaʼan (Sal. 145:16).

12. ¿Bix u kanáantkoʼon le kʼaʼaytajoʼ?

¹² Toʼoneʼ kʼaʼabéet k-kanáantikba utiaʼal maʼ k-náachtal tiʼ Jéeoba. Kuxaʼanoʼon tu yóokʼol kaab Satanás yéetel j-kʼebanoʼon, le oʼolal jach séeb jeʼel u káajal k-tuukul yéetel k-beetik le baʼaxoʼob ku beetaʼal teʼ yóokʼol kaabaʼ. Lelaʼ jeʼel u páajtal k-ketik yéetel u corrienteil junpʼéel ríoeʼ, wa maʼ t-kanáantikba yéetel wa maʼ t-nadar yéetel tuláakal k-muukʼeʼ jeʼel u jíiltikoʼoneʼ yéetel jeʼel k-búululeʼ. Utiaʼal xan maʼ u jíiltikoʼon u yóokʼol kaab Satanaseʼ kʼaʼabéet k-kanáantikba. ¿Bix u yáantkoʼon le kʼaʼaytaj utiaʼal maʼ k-kuxtal jeʼex u yóokʼol kaab Satanaseʼ? Ken tʼaanakoʼon yoʼolal Jéeoba bey xan yoʼolal le baʼaxoʼob ku yaʼalik le Bibliaoʼ k-tuukul chéen tiʼ baʼaloʼob maʼalobtak, maʼ tiʼ baʼaloʼob jeʼel u beetik u xuʼulul u yantal k-fejeʼ (Fili. 4:8). Le kʼaʼaytajoʼ ku beetik u maas nojochtal k-fe tumen ku kʼaʼajsiktoʼon le baʼaxoʼob ken u beet Dios maʼ kun xáantaloʼ bey xan le baʼaxoʼob uts tu tʼaan ka k-beetoʼ. Tsʼoʼoleʼ ku yáantkoʼon xan utiaʼal k-kanáantikba tiʼ u yóokʼol kaab Satanás (xok Efesoiloʼob 6:14-17).

13. ¿Bix u yuʼubikuba juntúul sukuʼun yoʼolal le kʼaʼaytajoʼ?

¹³ K-tsʼáaik k-óol teʼ kʼaʼaytaj, k-xakʼalxook yéetel k-áantik le sukuʼunoʼob teʼ múuchʼuliloʼ, ku kanáantkoʼon tumen ku pʼáatal minaʼan tiempo mix utiaʼal k-tuukul tiʼ le problemaʼob ku yantaltoʼonoʼ. Joel, juntúul sukuʼun kajaʼan Australiaeʼ, ku yaʼalik: «Le kʼaʼaytajoʼ tsʼoʼok u yáantken in wil jach bix le kuxtaloʼ. Ku kʼaʼajsikten baʼax problemailoʼob ku aktáantik le máakoʼoboʼ yéetel baʼax utsiloʼob tsʼoʼok u taasikten in tsʼáaik ichil in kuxtal le baʼaxoʼob ku kaʼansik le Bibliaoʼ. Le kʼaʼaytajoʼ tsʼoʼok u yáantken in weʼes kabal óolal yéetel tsʼoʼok u yáantken confiar tiʼ Jéeoba bey xan tiʼ le sukuʼunoʼob yéetel le kiikoʼoboʼ».

14. ¿Baʼax eʼesik táan u yáantkoʼon Dios yéetel u kiliʼich muukʼ?

¹⁴ Le kʼaʼaytajoʼ ku kʼaʼajsik xan toʼoneʼ Dioseʼ u tsʼaamajtoʼon u kiliʼich muukʼ. Utiaʼal k-naʼatikeʼ koʼoneʼex ilik junpʼéel ejemplo: Chéen tukulteʼ ka contratartaʼal utiaʼal a tʼoxik waaj teʼ tuʼux kajaʼanechoʼ. Chéen baʼaleʼ maʼ kan náajal yéetel mix u peso kun tsʼaabiltech utiaʼal a beetik le meyajaʼ. Tsʼoʼoleʼ le máakoʼoboʼ maʼ kiʼ u yuʼubikoʼob le waaj ka tʼoxikoʼ yéetel ku pʼektikechoʼob. ¿Jeʼel wa u seguer a beetik le meyajaʼ? Maʼ xaaneʼ jeʼel u lúubul a wóoleʼ yéetel jeʼel tak a pʼatik le meyajoʼ. Bey u yúuchul xan yéetel le kʼaʼaytajoʼ, chéen baʼaleʼ toʼoneʼ ku seguer k-kʼaʼaytaj  kex táan k-xupik k-taakʼin, k-tiempo, kex k-pʼaʼastaʼal yéetel kex k-pʼektaʼal tumen le máakoʼoboʼ. Lelaʼ ku yeʼesiktoʼoneʼ táan u yáantkoʼon Dios yéetel u kiliʼich muukʼ.

15. Le kʼaʼaytajoʼ, ¿bix u yáantaj utiaʼal u béeytal baʼax u tukultmaj Jéeoba utiaʼal wíinik?

¹⁵ Le kʼaʼaytajoʼ, ¿bix u yáantaj utiaʼal u béeytal baʼax u tukultmaj Jéeoba utiaʼal wíinik? Dioseʼ u kʼáat kaʼach ka kuxlak wíinik utiaʼal mantatsʼ yéetel láayliʼ letiʼe baʼax u kʼáat kex kʼebanchaj Adanoʼ (Isa. 55:11). Dioseʼ tu yilaj baʼax ken u beet utiaʼal u jáalkʼabtikoʼon tiʼ le kʼeban yéetel tiʼ le kíimiloʼ. Utiaʼal lelaʼ taal Jesús way Luʼum utiaʼal u kʼub u kuxtaleʼ, chéen baʼaleʼ utiaʼal u jáalkʼabtaʼal wíinik tiʼ le kʼeban yéetel tiʼ le kíimiloʼ kʼaʼabéet u yuʼubik u tʼaan Dios. Jesuseʼ tu kaʼansaj tiʼ wíinik baʼax u kʼáat Dios ka u beete, tsʼoʼoleʼ tu yaʼalaj xan tiʼ u disipuloʼob ka u kaʼansoʼob tiʼ uláakʼ máakoʼob. Bejlaʼeʼ le ken k-áant le máakoʼob u bisubaʼob yéetel Dios yéetel ken kʼaʼaytajnakoʼonoʼ, táan k-múul meyaj tu yéetel tumen táan k-áantik le máakoʼob utiaʼal u salvarkubaʼob tiʼ le kʼeban yéetel tiʼ le kíimiloʼ.

16. ¿Bix jeʼel k-tsʼoʼokbesik le kaʼapʼéel mandamiento maas nuuktak yanoʼ?

¹⁶ Le ken k-áant le máakoʼob utiaʼal ka yanaktiʼob le kuxtal minaʼan u xuuloʼ k-eʼesik k-yaabiltmoʼob yéetel k-yaabiltmaj xan Jéeoba. «Letiʼeʼ u kʼáat ka u salvartuba tuláakal u jejeláasil máakoʼob yéetel ka kʼuchuk u chúukaʼan kʼaj óoltoʼob le jaajoʼ.» (1 Tim. 2:4.) Juntéenjeakileʼ juntúul fariseoeʼ le ka tu kʼáataj tiʼ Jesús máakalmáak le mandamiento tiʼ Ley maas nojochoʼ, letiʼeʼ tu yaʼalajtiʼ: «‹Kʼaʼabéet a yaabiltik Jéeoba yéetel tuláakal a puksiʼikʼal, tuláakal a kuxtal yéetel tuláakal a tuukul›. Lelaʼ letiʼe u maas nojchiloʼ yéetel letiʼe yáax baʼax ku yaʼalik le Leyoʼ. U kaʼapʼéeleʼ chíikaʼan tiʼ le u yáaxoʼ: ‹Kʼaʼabéet a yaabiltik a wéet máakil jeʼel bix a yaabiltikabaeʼ›» (Mat. 22:37-39). Toʼon xaneʼ le ken kʼaʼaytajnakoʼoneʼ táan k-beetik le baʼax tu yaʼalaj Jesusoʼ (xok Baʼaxoʼob 10:42).

17. Techeʼ, ¿bix a wuʼuyikaba yoʼolal u jatsʼuts privilegioil a kʼaʼaytaj?

¹⁷ Jeʼex tsʼoʼok k-ilkoʼ jach táan u bendecirtikoʼon Jéeoba. Le kʼaʼaytaj u kʼubéentmajtoʼon ka k-beetoʼ ku taasiktoʼon kiʼimak óolal, ku natsʼkoʼon tiʼ letiʼ, k-maas yaabiltik yéetel ku beetik k-maas bisikba yéetel le sukuʼunoʼoboʼ. Ken kʼaʼaytajnakoʼoneʼ k-eʼesik k-yaabiltmaj Dios bey xan uláakʼ máakoʼob. Bejlaʼeʼ u millonesil máakoʼob táan u meyajtikoʼob Jéeoba tiʼ tuláakal yóokʼol kaab kex maʼ junpʼéeliliʼ baʼax ku aktáantkoʼob ichil u kuxtaloʼobiʼ. Chéen baʼaleʼ kex wa táankelmoʼon, chʼijaʼanoʼon, ayikʼaloʼon, óotsiloʼon bey xan wa maʼ jach toj k-óoleʼ, tuláakloʼon jeʼel u páajtal k-kʼaʼaytajeʼ. Toʼoneʼ k-uʼuyikba jeʼex Chantal, juntúul kiik kajaʼan Franciaeʼ, letiʼeʼ ku yaʼalik: «Dios, le máax jach yaan u poder, le máax beet tuláakal le baʼaloʼoboʼ, le Dios kiʼimak u yóoloʼ, ku yaʼalikten: ‹¡Xeen kʼaʼaytaj! Tsikbalt baʼax taak in beetik yéetel tuláakal a puksiʼikʼal. Teen kin áantkech, yaan in tsʼáaiktech in Tʼaan yaan teʼ Bibliaoʼ, yaan in wáantikech yéetel le angeloʼoboʼ bey xan yéetel le sukuʼunoʼoboʼ, yaan in kaʼansikech kʼaʼaytaj yéetel yaan in nuʼuktikech ken kʼaʼabéetchajak›. ¡Junpʼéel nojoch privilegio k-beetik baʼax ku yaʼalik Jéeoba yéetel k-múul meyaj tu yéetel!».