Kʼaʼabéet tsʼáaikeʼex nib óolal
Kʼaʼabéet tsʼáaikeʼex nib óolal
«U jeetsʼel óolal Kriistoeʼ ka u nuʼukt u beel a puksiʼikʼaleʼex [...]. Yéetel [...] tsʼáaʼex nib óolal.» (TIʼ COLOSAILOʼOB 3:15.)
1. ¿Baʼax ku yilaʼal tu kaajal Dioos maʼatech u yilaʼal teʼ yóokʼol kaab tiaʼan tu kʼab Sáatanasaʼ?
JEʼEL tuʼuxak tiʼ le 94.600 múuchʼuliloʼob yaan tiʼ u j-jaakunajoʼob Jéeoba way tuláakal yóokʼol kaabeʼ, ku yilaʼaleʼ le j-jaajkunajoʼoboʼ ku yilik u tsʼáaikoʼob nib óolal. Kaada muchʼtáambaleʼ ku káajal, bey xan ku tsʼoʼokol yéetel upʼéel payalchiʼ, tuʼux ku tsʼaʼabal nib óolal tiʼ Jéeoba. Ich u j-jaajkunajoʼob Jéeobaeʼ, ken u muchʼubaʼob utiaʼal u áadorartoʼob Diooseʼ, suuk u yuʼubal tʼaanoʼob jeʼex «nib óolal wa diosboʼotik», «mix baʼal» yéetel uláakʼ tʼaanoʼob jeʼex leloʼobaʼ (Salmo 133:1). U jaajileʼ, letiʼobeʼ maʼ jeʼex le máakoʼob ku tuukuloʼob chéen tu yoʼolaloʼob tumen maʼ u kʼaj óoloʼob Dioosoʼ yéetel «mix tu yuʼubikoʼob u maʼalob péektsil k-Yuumtsil Jéesukriisto[oʼ]» (2 tiʼ Tesalonicailoʼob 1:8). Kuxaʼanoʼon tiʼ upʼéel yóokʼol kaab tuʼux maʼatech u tsʼaʼabal nib óolal, baʼaleʼ k-naʼatik baʼaxten. Tumen u dioosil le yóokʼol kaabaʼ Sáatanas; letiʼe jach chéen ku tuukul tu yoʼolal yéetel tuláakal tuʼux ku yilaʼal le tuukul yaan tiʼ letiʼoʼ (San Juan 8:44; 2 tiʼ Corintoiloʼob 4:4; 1 San Juan 5:19).
2. ¿Baʼax kʼaʼajsajil unaj k-uʼuyik, yéetel baʼax ken kane?
2 Kex baʼpachtaʼanoʼon tumen u yóokʼol kaab Sáatanaseʼ, kʼaʼabéet kanáantik k-tuukul utiaʼal maʼ u kʼaskúuntaʼal tumen bix u tuukul le máakoʼoboʼ. Teʼ yáax siiglooʼ, áapostol Paabloeʼ tu kʼaʼajsaj tiʼe kristiaanoʼob tiʼ Eefesooʼ: «Ichil tuʼux kuxaʼaneʼex kaʼachoʼ, ikil a beetikeʼex le baʼax ku beetik le yóokʼol kaabaʼ yéetel a tsʼoʼokbesikeʼex u yóolal kʼaasilbaʼal[,] máax ku meyaj tiʼ le máaxoʼob maʼ tu yuʼubikoʼob u tʼaan Kʼuoʼ [wa Dioosoʼ]. Tuláakaloʼon bey kuxlikoʼon kaʼach tiʼ le kʼiinoʼob tsʼoʼok u máanoʼoboʼ, táan k-bin kaʼach tu paach k-tsʼíibolaloʼob yéetel táan k-tsʼoʼokbesik baʼax u káat k-bakʼel yéetel k-tuukul. Le oʼolal k-náajmatik kaʼach u yaayaj jaatsʼ Kʼu jeʼel bix [uláakʼ]» máakoʼoboʼ (Tiʼ Efesoiloʼob 2:2, 3). Yaʼab máakoʼob bejlaʼeʼ le xan ku beetkoʼob. Le oʼolaleʼ, ¿baʼax oʼolal unaj k-tsʼáaik nib óolal tiʼ Dioos mantatsʼ? ¿Bix u yáantaj Jéeoba? ¿Yéetel bix jeʼel k-eʼesik jach tu jaajil táan k-tsʼáaik nib óolaleʼ?
Baʼaxten kʼaʼabéet k-tsʼáaik nib óolal
3. ¿Baʼaxten kʼaʼabéet k-tsʼáaik nib óolal tiʼ Jéeoba?
3 Jach kʼaʼabéet k-tsʼáaik nib óolal tiʼ Jéeoba Dioos, le máax beetmailoʼon yéetel tsʼaamil k-kuxtaloʼ; lelaʼ jach kʼaʼabéet k-beetik ken tuukulnakoʼon tiʼ jujumpʼéel tiʼ le yaʼabach baʼaloʼob u tsʼaamajtoʼonoʼ (Santiago 1:17). Le kuxtal ku tsʼáaiktoʼonoʼ uláakʼ baʼax oʼolal k-tsʼáaik nib óolal sáamsamal (Salmo 36:9). T-baʼpaacheʼ k-ilik yaʼab baʼaloʼob jach maʼalobtak beetaʼanoʼob tumen Jéeoba, jeʼex le Kʼiinoʼ, le Luunaoʼ yéetel le eekʼoʼoboʼ. Le baʼaloʼob yaan tu tsʼuʼ le luʼum ku yáantajoʼob utiaʼal ka yanak kuxtal way Luʼumeʼ, le bix yantal le iikʼ k-chʼaʼik utiaʼal k-kuxtaloʼ yéetel tuláakal baʼax kiúuchul utiaʼal u yantal le kuxtaloʼ, jeʼex u kʼáaxal jaʼoʼ, kieʼeskoʼobeʼ yaan baʼax oʼolal unaj k-tsʼáaik nib óolal tiʼ k-Taata yaan teʼ kaʼanoʼ. Reey Dabideʼ tiaʼalaj ich upʼéel kʼaay: «Yuumtsil in [Dioos Jéeoba] yaʼabkach le jakʼ óol meyajoʼob ta beetaj techoʼ, yaʼab a chʼaʼa óotsilil tiʼ toʼon. ¡Mix baʼal ku ketikuba ta wéetel! In kʼáat in kʼaʼaytoʼob, ka tʼaanaken tu yoʼolaloʼob, baʼaleʼ sen yaʼab, minaʼan u xookil» (Salmo 40:5).
4. ¿Baʼaxten unaj k-tsʼáaik nib óolal tiʼ Jéeoba yoʼolal le bisbail yaan ichil u kaajaloʼ?
4 Kex u j-jaajkunajoʼon Jéeoba maʼ kuxaʼanoʼob jach tiʼ upʼéel páaraisoeʼ, baʼaleʼ kuxaʼanoʼon tiʼ bey upʼéel páaraiso ichil u kaajal Diooseʼ. Ken xiʼikoʼon teʼ Najil Reeino yéetel teʼ noj muchʼtáambaloʼoboʼ, k-ilik bix u yeʼesaʼal tumen k-sukuʼunoʼob u yich u espiiritu saanto Dioos. Tsʼoʼoleʼ, yaan j-jaajkunajoʼobeʼ ken tsikbalnakoʼob yéetel máaxoʼob maʼatech u jach oksaj óolkoʼob Diooseʼ wa jach u puliʼ minaʼan u oksaj óolaloʼobeʼ, ku xokkoʼobtiʼob le baʼax tu tsʼíibtaj Paablo tiʼe galaasiailoʼob yoʼolal le «kʼaakʼas tsʼíibolaloʼoboʼ», tsʼoʼoleʼ ku kʼáatkoʼobtiʼob baʼax ku tuklikoʼob yoʼolal (Tiʼ Galaciailoʼob 5:19-23). Óoliʼ tuláakloʼobeʼ ku yaʼalikoʼob jach bey le máakoʼob bejlaʼoʼ. Ken kaʼansaʼaktiʼob máakalmáakoʼob u yich u espiiritu saanto Dioos yéetel ken bisaʼakoʼob teʼ muchʼtáambaloʼob utiaʼal ka u yiloʼob bix u yeʼesaʼaleʼ, yaʼab tiʼ letiʼobeʼ kiaʼalkoʼob: «Kʼu [wa Diooseʼ] tiʼ yaan ta wéeteleʼex tu jaajileʼ» (1 tiʼ Corintoiloʼob 14:25). Tsʼoʼoleʼ, lelaʼ maʼ chéen teʼ Najil Reeino ku yilaʼaloʼ. Jeʼel tuʼuxak ka xiʼikoʼon teʼ yóokʼol kaabaʼ, ken k-muchʼba yéetel jeʼel máaxak sukuʼunil tiʼe maas tiʼ seeis miyoones j-jaajkunajoʼoboʼ, ku yilaʼal le jatsʼuts bisbai yaan ichiloʼonoʼ. Letiʼe jatsʼuts bisbailaʼ uláakʼ baʼax oʼolal unaj k-tsʼáaik nib óolal tiʼ Jéeoba, tumen letiʼ béeykuntik yéetel u espiiritu (Sofonías 3:9; Tiʼ Efesoiloʼob 3:20, 21).
5, 6. ¿Bix k-eʼesik táan k-tsʼáaik nib óolal yoʼolal le maas nojoch siibal tsʼoʼok u tsʼáaiktoʼon Dioosoʼ?
5 Le maas nojoch siibal tsʼoʼok u tsʼáaiktoʼon Dioosoʼ, Jesus, u Paal; letiʼeʼ tsʼaʼab bey upʼéel boʼol utiaʼal sáalbasioneʼ. Áapostol Juaneʼ tu tsʼíibtaj: «In yaabilaj sukuʼuneʼex, wa Kʼu [wa Dioos] bey tu yaabiltajoʼonoʼ, toʼon xaneʼ unaj k-yaabiltikba t-baatsil» (1 San Juan 4:11). Le oʼolaleʼ, utiaʼal k-eʼesik k-tsʼáaik nib óolal tiʼ Jéeoba yoʼolal le boʼol tu tsʼáaj t-oʼolaloʼ, maʼ chéen unaj k-yaabiltik Letiʼiʼ, kʼaʼabéet xan k-yaabiltik u chuukan máakoʼob (San Mateo 22:37-39).
6 K-ilik bix úuchik u biskuba Dioos yéetel u kaajil Íisraeleʼ ku kaʼansiktoʼon bix jeʼel k-maas tsʼáaik nib óolaleʼ. Diooseʼ yaʼab baʼax tu kaʼansaj tiʼ u kaajal yéetel le Leey tu tsʼáaj tiʼ Moisesoʼ. Ichil «le kʼaj óolalil[...] yéetel le jaajil[...]» yaan teʼ Leeyoʼ, jeʼel u páajtal k-kanik yaʼab baʼaloʼob ken u yáantoʼon utiaʼal k-tsʼáaik nib óolal, jeʼex tiaʼalij Paabloeʼ (Tiʼ Romailoʼob 2:20; Tiʼ Colosailoʼob 3:15).
Óoxpʼéel baʼaloʼob k-kanik tiʼ u Leey Moises
7. Le dieesmooʼ, ¿bix u tsʼáaik kaʼach tiʼe íisraelitaʼob u páajtalil u tsʼáaikoʼob nib óolal tiʼ Jéeobaoʼ?
7 Tu Leey Moiseseʼ, Jéeobaeʼ tu yeʼesaj óoxpʼéel bix jeʼel u tsʼaʼabal nib óolal tiʼ tumen le íisraelitaʼoboʼ. Yáaxeʼ tu tsʼáa le dieesmooʼ: «Jun jaats tiʼ diees jaatsiloʼob tiʼ tuláakal u yich luʼum», bey xan «juntúul tiʼ diees wakaxoʼob wa tiʼ u baʼalcheʼiloʼob a waalakʼeʼexeʼ, yaan u jumpáaykuntaʼal utiaʼal Yuumtsil» wa Jéeoba (Levítico 27:30-32). Le táan yuʼubaʼal u tʼaan tumen le íisraelitaʼoboʼ, Jéeobaeʼ jach tu pulaj u yutsil tu yóoʼloʼob. «Taaseʼex a dieesmoʼex tu kúuchil tuʼux ku tsʼaʼabal u taakʼin kʼuʼulnaj, utiaʼal ka yanak baʼal [jaantbil] tin wotoch. Beeteʼex utiaʼal ka wileʼex wa maʼ tin jeʼik u [joonailoʼob] kaʼan utiaʼal in láalik ta wóokʼoleʼex asab yaʼab ayikʼalil.» (Malaquías 3:10.)
8. ¿Baʼax u jelaʼanil le dieesmo tiʼe siibaloʼob ku jóokʼol tu puksiʼikʼal le íisraelitaʼob u tsʼáaikoʼoboʼ?
8 U kaʼapʼéeleʼ, Jéeobaeʼ tiaʼalaj tiʼe íisraelitaʼoboʼ jeʼel u páajtal xan u tsʼáaikoʼob uláakʼ siibaloʼob ku jóokʼol tu puksiʼikʼal u tsʼáaikoʼobeʼ. Lelaʼ letiʼe tiaʼalaj Dioos yéetel u chiʼ Moisesoʼ: «Le ken okokeʼex teʼ j-luʼum tuʼux bíin in biseʼexoʼ, le ken káajak a jaantikeʼex le jejeláas janalbeʼen neekʼoʼob ku tsʼáaik le luʼum teʼeloʼ, unaj a jumpáaykunsikeʼex tsʼeʼetsʼek utiaʼal a kʼubeʼex tiʼ teen». Letiʼob túuneʼ unaj u biskoʼob u kʼuboʼob tu táan Jéeoba «u yáax jaatsil [tiʼ] le janalbeʼen neekʼoʼob» ku jochikoʼoboʼ. Wa ka wileʼ, maʼ aʼalaʼabtiʼob jach bukaʼaj ken u tsʼaʼobiʼ (Números 15:18-21). Baʼaleʼ, ken u kʼuboʼob kaʼach upʼéel siibal tiʼ Jéeoba utiaʼal u tsʼáaikoʼob nib óolaleʼ, Jéeobaeʼ ku pulik u yutsil tu yóoʼloʼob. Lelaʼ bey u yilaʼal tiʼ upʼéel náay anchaj tiʼ Éesekiel yaan yil yéetel le templooʼ. U xookileʼ kiaʼalik: «Le j-kʼiinoʼoboʼ, bin xan u kʼamoʼob u asab maʼalobil le yáax joochoʼob yéetel tuláakal tiʼibil óolaloʼob. Ku tsʼoʼokol xaneʼ, le ken a yaʼachʼteʼex u juuchʼil waajeʼ, u asab maʼalobileʼ bin a tsʼáaʼex tiʼ letiʼob. Beyoʼ bin jéetsʼek in kiʼ tʼaan tu yóokʼol a wotocheʼex» (Ezequiel 44:30).
9. ¿Baʼax tu kaʼansaj Jéeoba yéetel le meentsʼul tiaʼalaj ka pʼaʼatakoʼ?
9 U yóoxpʼéeleʼ, Jéeobaeʼ tu tsʼáaj upʼéel leey ku tʼaan tiʼe meentsʼuliloʼ: «Le ken kʼuchuk u kʼiinil joocheʼ, maʼ a láaj molik u joochil a kool, mix [a] meentsʼultik le ku pʼáataloʼ. Maʼ a láaj meentsʼultik u yich a paakʼal uuba, mix a molik u yichoʼob lubaʼanoʼoboʼ[,] pʼat tiʼ óotsiloʼob yéetel tiʼ j-táanxel luʼumiloʼob. Teneʼ Yuumtsilen a Kʼuex [wa a Diooseʼex]» (Levítico 19:9, 10). Wa ka wileʼ, maʼ tu kaʼa aʼalaʼaltiʼob jach bukaʼaj ken u pʼatoʼobiʼ. Kaada íisraelita ken u tukult bukaʼaj ken u pʼat tiʼe óotsiloʼoboʼ. Jach jeʼex tiaʼalaj le reey Sáalomonoʼ: «Tsʼa majnil tiʼ óotsileʼ, tiʼ Yuumtsil [Jéeoba] ku tsʼaʼabal. Yuumtsil xan bin u boʼote» (Proverbios 19:17). Beyaʼ, Jéeobaeʼ tu kaʼansajtiʼob ka u chʼaʼob óotsilil yéetel ka u kʼaʼajsoʼob le óotsiloʼoboʼ.
10. ¿Bix binik tiʼe íisraelitaʼob le ka xuʼul u tsʼáaikoʼob nib óolaloʼ?
10 Le íisraelitaʼoboʼ kiʼikiʼtʼantaʼaboʼob tumen Jéeoba tu kʼiinil táan u tsʼáaikoʼob le dieesmooʼ, le táan u tsʼáaikoʼob le siibaloʼob yéetel u jaajil yóoloʼoboʼ yéetel le táan u kʼaʼajsikoʼob le óotsiloʼoboʼ. Baʼaleʼ, le ka xuʼul u tsʼáaikoʼob nib óolaleʼ, pʼaʼatoʼob tumen Jéeoba, le oʼolaleʼ jach bin kʼaasiltiʼob yéetel bisaʼaboʼob táanxel luʼumil (2 Crónicas 3617-21). ¿Baʼax ku kaʼansiktoʼon lelaʼ?
Bix k-tsʼáaik nib óolal
11. ¿Bix maas k-tsʼáaik nib óolal tiʼ Jéeoba?
11 Le bix maas k-kiʼikiʼtʼantik Jéeoba yéetel k-tsʼáaik nib óolal tiʼoʼ yaan yil yéetel k-kʼubik upʼéel «siibal» tiʼ. Bejlaʼeʼ minaʼanoʼon yáanal u Leey Moises; le Leeyaʼ ku beetik kaʼach ka tsʼaʼabak baʼalcheʼob wa u yich le paakʼaloʼob bey siibaloʼob utiaʼal Jéeobaeʼ (Tiʼ Colosailoʼob 2:14). Baʼaleʼ, Paabloeʼ tiaʼalaj tiʼe kristiaanoʼob ebreʼoboʼ: «Le oʼolaleʼ unaj k-kiʼikiʼtʼantik mantatsʼ Kʼu [wa Dioos] [...]. Le kiʼikiʼtʼaanaʼ letiʼ le siibal unaj tsʼáaikoʼ. ¡[Koʼoneʼex] túun kiʼikiʼtʼantik u kaabaʼ yéetel k-chiʼ!» (Tiʼ Hebreob 13:15). Jeʼel xan u páajtal k-tsʼáaik nib óolal tiʼ Jéeoba yéetel tuláakal k-puksiʼikʼaleʼ wa ku meyajtoʼon baʼaxoʼob k-ojel yéetel baʼaxoʼob yantoʼon utiaʼal k-tsʼáaik upʼéel u siibalil kiʼikiʼtʼaan tiʼ, lelaʼ jeʼel u páajtal k-beetik ken jóoʼkoʼon kʼaʼaytajeʼ wa ken tʼaanakoʼon «tu táan u kaajal» (Salmo 26:12). ¿Baʼax jeʼel k-kanik tiʼ bix u tsʼáaikoʼob kaʼach nib óolal tiʼ Jéeoba le íisraelitaʼoboʼ?
12. Le dieesmo ku tsʼaʼabal kaʼachoʼ, ¿baʼax ku kaʼansiktoʼon tiʼ le baʼaloʼob kʼaʼabéet k-beetik toʼonoʼ?
12 Yáaxeʼ, jeʼex tsʼoʼok k-ilkoʼ, le dieesmooʼ maʼ letiʼe íisraelita yéeyik wa yaan u tsʼáaik wa maʼoʼ. Bejlaʼaʼ xaneʼ, toʼoneʼ kʼaʼabéet k-táakpajal teʼ meeyjil kaʼansajoʼ yéetel k-antal teʼ muchʼtáambaloʼoboʼ. Le baʼaloʼobaʼ maʼ toʼon ken k-yéey wa yaan k-beetik wa maʼiʼ. Kaʼ tʼaanaj tiʼ u tsʼoʼok kʼiinoʼobeʼ, Jesuseʼ tiaʼalaj: «U maʼalob péektsil le ajawiloʼ bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (San Mateo 24:14; 28:19, 20). Tiʼ baʼax yaan yil le muchʼtáambaloʼoboʼ, Paabloeʼ tu tsʼíibtaj: «Yéetel unaj k-kaxantik bix jeʼel u páajtal k-áantikba t-baatsileʼ utiaʼal ka yanaktoʼon yaakunaj yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuktiʼob maʼ u taaloʼob j-muchʼtal t-éeteliʼ, baʼaleʼ unaj k-líikʼ óoltikba [t-baatsil], asab unaj k-beetik beleʼ tumen táan a wilikeʼex u náatsʼal u kʼiinil Yuumtsil» (Tiʼ Hebreob 10:24, 25). K-eʼesik táan k-tsʼáaik nib óolal tiʼ Jéeoba le ken k-il jóokʼol kʼaʼaytaj yéetel k-kaʼansik uláakʼ máakoʼob, bey xan ken k-il jach kʼaʼanan k-muchʼikba yéetel k-sukuʼunoʼob.
13. ¿Baʼax k-kanik tiʼe siibal ku síijil tu puksiʼikʼal le íisraelitaʼob u tsʼáaikoʼob kaʼachoʼ bey xan tiʼ le meentsʼulil ku pʼatkoʼoboʼ?
13 Maʼalob xan ka k-il le uláakʼ kaʼapʼéel bix u tsʼáaik kaʼach nib óolal le íisraelitaʼoboʼ: le siibaloʼob ku síijil tu puksiʼikʼal u tsʼáaikoʼoboʼ yéetel le meentsʼulil ku pʼatkoʼoboʼ. Le dieesmooʼ ku yeʼesik jach bukaʼaj kʼaʼabéet u tsʼáaikoʼob, baʼaleʼ teʼ uláakʼ kaʼapʼelaʼ maʼ tiaʼalaʼal bukaʼaj. Le íisraelitaoʼ letiʼ kun ilik kaʼach bukaʼaj ken u tsʼáa jeʼex u tukulmij tu puksiʼikʼaleʼ. Bejlaʼa xaneʼ, kex k-ojel jach kʼaʼabéet k-táakpajal teʼ meeyjil kaʼansaj yéetel k-antal teʼ muchʼtáambaloʼoboʼ, kʼaʼabéet k-ilik wa ku síijil t-puksiʼikʼal k-beetik, bey xan wa táan k-beetik yéetel kiʼimak óolal. ¿K-ilkoʼob wa bey upʼéel bix jeʼel k-tsʼáaik nib óolal tiʼ Jéeoba yoʼolal tuláakal le baʼax u tsʼaamajtoʼonoʼ? ¿Mantatsʼ wa k-táakpajal ichiloʼob, tak le tuʼux k-ilik ku páajtaleʼ? ¿Wa k-ilkoʼob chéen bey baʼaloʼob kʼaʼabéet k-beetkeʼ? Kaada kristiaanoeʼ kʼaʼabéet u núukik le kʼáatchiʼobaʼ. Paabloeʼ tiaʼalaj: «Kaada juntúuleʼ unaj u yilik wa maʼalob baʼax ku beetik. Wa ku kiʼimaktal u yóol tu yoʼolaleʼ, lelaʼ chéen utiaʼal letiʼ maʼ utiaʼal uláakʼ máakiʼ» (Tiʼ Galaciailoʼob 6:4).
14. ¿Baʼax beetik u kʼamik Dioos le meyaj k-tsʼáaiktiʼoʼ?
14 Jéeoba Diooseʼ jach u yojel tu beel bix kuxlikoʼon yéetel u yojel bukaʼaj jeʼel u páajtal k-beetkeʼ. Kex wa yaʼab wa kex u pʼíit le baʼax k-beetik utiaʼal Jéeobaoʼ, letiʼeʼ nojoch baʼal yilik wa k-beetik yéetel tuláakal k-puksiʼikʼal. Letiʼeʼ yojel yaan jeʼel u páajtal u beetik yaʼabeʼ, yaan maʼatechiʼ, lelaʼ jach jaaj. Paabloeʼ, le ka tʼaanaj tiʼe baʼaloʼob yantoʼon utiaʼal k-tsʼáa tiʼ Dioosoʼ, tiaʼalaj: «Tumen wa juntúul máak tu jaajil u káat u tsʼáa wa baʼaxeʼ Kʼueʼ [wa Diooseʼ] ku kʼamik le baʼax yaan tiʼ le máakoʼ, letiʼeʼ maʼ táan u kʼáatik le baʼax minaʼan tiʼ le máakoʼ» (2 tiʼ Corintoiloʼob 8:12). Le tʼaanoʼobaʼ ku yeʼesiktoʼon xan bix u yilik Dioos le meyaj k-tsʼáaiktiʼoʼ. Le baʼax beetik u kʼamikeʼ, maʼ letiʼe u yaʼabiloʼ, letiʼe bix k-beetkoʼ: yéetel kiʼimak óolal bey xan yéetel u jaajil k-óol (Salmo 100:1-5; Tiʼ Colosailoʼob 3:23).
Unaj k-tuukul mantatsʼ jeʼex le j-táanilkunsajoʼoboʼ
15, 16. 1) Le táanilkunsajiloʼ, ¿baʼax yaan yil yéetel u tsʼíibolalil k-tsʼáaik nib óolal tiʼ Dioos? 2) Máax maʼ tu páajtal u beetkuba j-táanilkunsajeʼ, ¿bix jeʼel u tuukul mantatsʼ jeʼex le j-táanilkunsajoʼoboʼ?
15 Upʼéel bix k-tsʼáaik nib óolal tiʼ Jéeoba ku taasiktoʼon kiʼimak óolaleʼ, letiʼe k-chʼíikil meyajtoʼ. Yaʼab sukuʼunoʼob tsʼoʼok u yokjaʼobeʼ, tumen u yaabiltmoʼob Jéeoba yéetel ikil taak u tsʼáaikoʼob nib óolal tiʼeʼ, tsʼoʼok u beetkoʼob yaʼab kʼeexoʼob ichil u kuxtaloʼob utiaʼal u maas meyajkoʼob. Yaneʼeʼ ku meyajoʼob bey j-táanilkunsajoʼobeʼ; kaada meeseʼ 70 ooraʼob ku máanskoʼob táan u kʼaʼaytajoʼob yéetel táan u kaʼanskoʼob u jaajil tiʼ le máakoʼoboʼ. Uláakʼoʼob maʼ tu páajtal u beetkubaʼob j-táanilkunsajoʼobeʼ, yaan kʼiineʼ ku máanskoʼob 50 ooraʼob táan u kʼaʼaytajoʼob bey j-áantaj táanilkunsajoʼobeʼ.
16 Yaʼab tiʼ u palitsiloʼob Dioos maʼ tu páajtal u beetkubaʼob j-táanilkunsajoʼob wa j-áantaj táanilkusajoʼobeʼ, utiaʼal u tsʼáaikoʼob nib óolal tiʼ Jéeobaeʼ, ku yilik u tuukuloʼob mantatsʼ jeʼex le j-táanilkunsajoʼoboʼ. ¿Bix u yeʼeskoʼob? Ikil u líiʼskoʼob u yóol le j-táanilkunsajoʼoboʼ, ikil u yaʼalkoʼob xan tiʼ u paalaloʼob ka chʼíikikoʼob u meyajkoʼob Dioos yéetel ikil u jach táakpajloʼob teʼ kʼaʼaytaj, tak le bukaʼaj ku páajtaleʼ. Baʼax kun túulchʼinkoʼon k-beet tuláakal le kun páajtaleʼ, letiʼe u tsʼíibolil k-tsʼáaik nib óolal tiʼ Jéeoba yoʼolal le baʼax tsʼoʼok u beetik t-oʼolaloʼ, le baʼax táan u beetkoʼ yéetel le baʼax ken u beetoʼ.
Kʼaʼabéet k-tsʼáaik nib óolal yéetel «[k-]ayikʼaliloʼob»
17, 18. 1) ¿Bix k-tsʼáaik nib óolal yéetel «[k-]ayikʼaliloʼob»? 2) ¿Bukaʼaj tiaʼalaj Jesus tu tsʼáaj le koʼolel kimen u yíichameʼ, yéetel baʼaxten?
17 Proverbios 3:9 kiaʼalik: «Tsʼa tsiikil tiʼ Yuumtsil yéetel a ayikʼaliloʼob bey xan yéetel u yáax ichoʼob a paakʼaloʼob». U palitsiloʼob Dioos bejlaʼeʼ maʼ kʼaʼabéet u tsʼáaikoʼob le dieesmooʼ. Baʼaleʼ ku beetkoʼob le baʼax tiaʼalaj Paablo tiʼ le kristiaanoʼob tiʼ Koriintooʼ: «Kaada juntúuleʼ unaj u tsʼáaik jeʼel bix u tukultmaj tu puksiʼikʼaleʼ, maʼ yéetel x-maʼ óoliʼ, mix tumen táan u tsaʼabal tiʼiʼ, tumen Kʼueʼ [wa Diooseʼ] u yaabilmaj le máax ku tsʼáa yéetel kiʼimak óolaleʼ» (2 tiʼ Corintoiloʼob 9:7). Uláakʼ túun bix jeʼel k-tsʼáaik nib óolal tiʼ Diooseʼ letiʼe k-tsʼáaik le bajux ku síijil t-puksiʼikʼal utiaʼal k-áantaj ka kʼaʼaytaʼak le Reeino tuláakal yóokʼol kaaboʼ. Lelaʼ yaan k-beetik mantatsʼ wa jach tu jaajil taak k-tsʼáaik nib óolal tiʼ Dioos, maʼ xaaneʼ ikil líiʼsik wa bajux kaada semaana, jeʼex u beetik kaʼach le kristiaanoʼoboʼ (1 tiʼ Corintoiloʼob 16:1, 2).
18 Maʼ le bukaʼaj k-tsʼáaik kun eʼesik wa táan k-tsʼáaik nib óol tiʼ Dioos wa maʼoʼ. Baʼax maas kʼaʼananeʼ wa ku jóokʼol t-puksiʼikʼal k-tsʼáaik, jeʼex tieʼesil Jesus le ka tu yilaj táan u tsʼaʼabal taakʼin tumen le máakoʼob ichil u nuʼukulil u siibaliloʼob le teemplooʼ. Le ka tu yilaj utúul koʼolel kimen u yíicham táan u tsʼáaik «kaʼa pʼéel mejen taakʼin[eʼ]», tiaʼalaj: «Tu jaajil kin waʼalik tiʼ teʼexeʼ le óotsil x-kimen íichamaʼ asab [wa maas] yaʼab le siibal tu tsʼáajoʼ tiʼ le tu tsʼáaj le uláakʼoʼoboʼ; tumen tuláakal le máakoʼobaʼ tu tsʼáajoʼob chéen le baʼax tu yalabtaj tiʼoboʼ, baʼaleʼ le koʼolelaʼ ichil u yóotsileʼ tu tsʼáaj tuláakal le baʼax yaan tiʼ kaʼach utiaʼal u kuxtaleʼ» (San Lucas 21:1-4).
19. ¿Baʼaxten unaj k-ilik baʼax táan k-beetik utiaʼal k-tsʼáaik nib óolal tiʼ Jéeoba?
19 Le jejeláas bix jeʼel u páajtal k-tsʼáaik nib óolal tsʼoʼok k-ilkaʼ unaj u beetik k-tuklik baʼax táan k-meentik utiaʼal k-tsʼáaik nib óolal tiʼ Dioos. ¿Kʼaʼabéet wa k-maas táakpajal teʼ meeyjil kaʼansajoʼ? ¿Jeʼel wa u páajtal maas k-áantaj yéetel baʼaxoʼob yantoʼon utiaʼal ka kʼaʼaytaʼak le Reeino tuláakal tuʼuxoʼ? Wa k-ilik beetik le baʼaloʼobaʼ yaan k-kiʼimakkúuntik u yóol k-Taata yaan teʼ kaʼanoʼ, le tsʼáaiktoʼon tuláakal baʼax kʼaʼabéettoʼonoʼ, tumen yaan k-eʼesik táan k-tsʼáaik nib óolal tiʼ.
[U kʼáatchiʼiloʼob le xookoʼ]
[U tsolajil le oochel teʼ táan juʼun 32]
¿Kʼajaʼan wa tech?
• ¿Baʼaxten kʼaʼabéet k-tsʼáaik nib óolal tiʼ Jéeoba?
• ¿Baʼaxoʼob k-kanik tiʼe leeyoʼob yaan yil yéetel le dieesmooʼ, le siibaloʼob ku síijil tu puksiʼikʼal le íisraelita u tsʼáaik kaʼachoʼ yéetel xan le meentsʼulil unaj u pʼataʼaloʼ?
• ¿Bix jeʼel u yeʼesik máak ku yilik u tuukul mantatsʼ jeʼex le j-táanilkunsajoʼoboʼ?
• ¿Bix k-tsʼáaik nib óolal tiʼ Jéeoba yéetel «[k-]ayikʼaliloʼob»?