Le cristianoʼoboʼ ku yeʼeskoʼob u kiʼichkelmil Jéeoba
Le cristianoʼoboʼ ku yeʼeskoʼob u kiʼichkelmil Jéeoba
«Kiʼ a wóoleʼex, tumen ka paakateʼex yéetel a wicheʼex[,] yéetel ka wuʼuyajeʼex yéetel a xikineʼex.» (MATEO 13:16.)
1. ¿Baʼax kʼáatchiʼi ku beetaʼal yoʼolal le baʼax tu beetaj le israelitaʼob le ka éem Moisés tu witsil Sinaíoʼ?
LE ISRAELITAʼOB yanoʼob aktáan tiʼ u witsil Sinaíoʼ, jach yaan kaʼach baʼax oʼolal u natsʼikubaʼob tiʼ Jéeoba. Yéetel u nojoch páajtalileʼ tu jóoʼsaj le israelitaʼob tu luʼumil Egiptooʼ, tu tsʼáaj jaʼ u yukʼoʼob yéetel tu tsʼáaj baʼal u jaantoʼob teʼ x-tokoy luʼumoʼ; tsʼoʼoleʼ, ka jóokʼ xan baʼaltelbiloʼob tumen le amalequitaʼoboʼ Jéeobaeʼ tu yáantoʼob utiaʼal ka u ganartoʼob (Éxodo 14:26-31; 16:2–17:13). Le tiaʼanoʼob aktáan tiʼ u witsil Sinaíoʼ, jach jaʼakʼ u yóoloʼob yéetel sajakchajoʼob le ka tu yuʼuboʼob u kíilbal yéetel u léembal cháakiʼ. Ka tsʼoʼokeʼ, ka tu yiloʼob u yéemel Moisés teʼ witsoʼ yéetel tu yiloʼobeʼ u yicheʼ táan u yeʼesik u kiʼichkelmil Jéeoba, baʼaleʼ, maʼ tu natsʼubaʼob utiaʼal u yilkoʼobiʼ, tu náachkuntubaʼob tiʼ. «Tu chʼaʼajoʼob sajakil» u natsʼubaʼob yiknal Moisés (Éxodo 19:10-19; 34:30). ¿Baʼaxten sajakchajoʼob u paktoʼob u kiʼichkelmil Jéeoba kex tsʼoʼok kaʼach u jach eʼesik u yutsil tiʼob?
2. Maʼ xaaneʼ, ¿baʼaxten tu chʼaʼa saajkil le israelitaʼob ka tu yiloʼob u kiʼichkelmil Dios ku chíikbesaʼal tumen Moisesoʼ?
2 Maʼ xaaneʼ tu chʼaʼajoʼob saajkil, tumen kʼaʼajtiʼob le ka tu beetoʼob utúul chan wakax de oro utiaʼal u adorartoʼobeʼ castigartaʼaboʼob tumen Jéeoba (Éxodo 32:4, 35). ¿Kaambalnajoʼob wa tiʼ le baʼax tu yiloʼoboʼ, yéetel tu tsʼáajoʼob wa nib óolal tiʼ Jéeoba? Óoliʼ mix utúul tu beetiʼ. Le maʼ yaʼab u bin u kíimil Moisesoʼ tu kʼaʼajsaj tiʼ le israelitaʼob úuchik u beetkoʼob le chan wakaxoʼ yéetel le uláakʼ súutukiloʼob maʼ tu beetoʼob baʼax utstutʼaan Diosoʼ. Tu yaʼalajtiʼob: «Ta pechabaʼex xan tiʼ baʼax tu yaʼalaj, maʼ yanchaj teʼex oksaj óoliʼ mix ta wóoltajeʼex a tsʼoʼokbesikeʼex u tʼaaniʼ. ¡Líikʼbal le kʼiin ka tin kʼaj óolteʼex tak bejelaʼaʼ, ka sen j-maʼ uʼuyajtʼantikeʼex Yuumtsil!» (Deuteronomio 9:15-24).
3. ¿Baʼax ku beetik Moisés yéetel le jaajay nookʼ ikil u pixik u táan u yich kaʼachoʼ?
3 Koʼoneʼex ilik baʼax tu beetaj Moisés le ka tu yilaj sajak le israelitaʼoboʼ: «Ku tsʼoʼokol u tʼaan yéeteloʼobeʼ tu [tsʼáaj] jumpʼéel jaajay nookʼ tu táan yich. Le ken okok kaʼach Moisés tu táan Yuumtsil utiaʼal j-tʼaan yéeteleʼ ku lukʼesik kaʼach le jaajay nookʼoʼ, bey kaʼach u pʼáatal tak ken jóokʼokoʼ. Ku yaʼalik túun tiʼ le j-israelitaʼob le tsolbeʼen tʼaanoʼob j-tsʼaʼab tiʼ tumen Yuumtsiloʼ. Le ken ilaʼak tumen le j-israelitaʼob lenkʼalak kaʼach u yich Moiseseʼ, letiʼeʼ ku kaʼa tsʼáaik le jaajay nookʼ tu táan yichoʼ, bey u pʼatikoʼ tak ken ka okok j-tʼaan yéetel Yuumtsil» (Éxodo 34:33-35). ¿Baʼaxten yaan oraeʼ ku luʼsik Moisés le jaajay nookʼ ku tsʼáaik tu táan u yichoʼ? ¿Baʼax k-kanik tiʼ le baʼax tu beetoʼ? U núukil le kʼáatchiʼobaʼ yaan u yáantkoʼon k-il wa táan k-bisikba yéetel Jéeoba jeʼex utstutʼaaneʼ.
Maʼ tu yóotoʼob u yiloʼob u kiʼichkelmil Diosiʼ
4. Jeʼex tu yaʼalil apóstol Pablooʼ, ¿baʼax u kʼáat u yaʼal le úuchik u pixik u yich Moisés yéetel upʼéel jaajay nookʼoʼ?
4 Apóstol Pabloeʼ tu yaʼaleʼ le úuchik u meyaj tiʼ Moisés upʼéel jaajay nookʼ utiaʼal u pixik u yichoʼ ku yeʼesik bix yanil u tuukul yéetel u puksiʼikʼal le israelitaʼob kaʼachoʼ. Tu tsʼíibtaj: «Le j-israelitaʼoboʼ maʼ páatji u paktikoʼob u yich Moisesiʼ, tumen u yicheʼ jach sáasjomeʼenchaji. [...] Baʼaleʼ letiʼobeʼ maʼ tu naʼatikoʼob» (2 Corintoiloʼob 3:7, 14). ¡Jach túun yaj baʼax úuchtiʼob! Letiʼobeʼ upʼéel kaaj yéeyaʼan kaʼach tumen Dios, yéetel letiʼeʼ u kʼáat kaʼach ka u natsʼubaʼob tu yiknal (Éxodo 19:4-6). Baʼaleʼ, letiʼobeʼ maʼ tu yóotoʼob u paktoʼob u kiʼichkelmil Dios ku yeʼesaʼal kaʼach tumen Moisesoʼ. Maʼ tu yeʼesoʼob yaabilaj tiʼ Jéeoba yéetel tuláakal u puksiʼikʼaloʼobiʼ mix yéetel tuláakal u tuukuloʼob mix xan tu meyajtoʼob tu jaajil u yóoloʼobiʼ, baʼaxeʼ tu náachkuntubaʼob tiʼ letiʼ.
5, 6. 1) ¿Baʼax beetaʼab tumen le israelitaʼob tu kʼiiniloʼob Moisés bey xan beetaʼabik tumen le judíoʼob teʼ yáax siglooʼ? 2) ¿Baʼax u jelaʼanil le máaxoʼob beet baʼax tu yaʼalaj Jesús tiʼ le máaxoʼob maʼ tu beetoʼoboʼ?
5 Le baʼax tu beetaj le israelitaʼoboʼ bey xan beetaʼabik teʼ yáax siglooʼ. Ka joʼopʼ u tsaypachtaʼal Jesús tumen Pabloeʼ, u núuptʼaanil u Ley Moiseseʼ tsʼokaʼaniliʼ u kʼeʼexel yéetel le túumben núuptʼaanoʼ. Jesucristo, le Moisés maas nojchoʼ, letiʼ meyajnaj tiʼ Dios utiaʼal u tsʼáaik le túumben núuptʼaanoʼ, tsʼoʼoleʼ yéetel baʼaxoʼob tu beetaj bey xan yéetel baʼaxoʼob tu yaʼaloʼ tu chúukaʼan eʼesaj u nojbeʼenil Jéeoba. Le oʼolaleʼ, Pabloeʼ tu tsʼíibtaj tu yoʼolal: «Letiʼeʼ u sáasjomeʼenil u nojbeʼenil Jajal Dios, yéetel letiʼeʼ jach ku chíikbesik bix Jajal Dios» (Hebreob 1:3). ¡Bukaʼaj jaʼtsil le páajtalil yaan kaʼach tiʼ le judíoʼoboʼ! Jeʼel kaʼach u páajtal u yuʼubikoʼob u tsikbaltaʼal tumen Jesús le kuxtal minaʼan u xuuloʼ, baʼaleʼ, yaʼab tiʼ letiʼobeʼ maʼ tu beetoʼobiʼ. Le oʼolaleʼ, Jesuseʼ tu yaʼalaj tiʼ letiʼob ku béeytal le baʼax u yaʼalmaj Isaíasaʼ: «U puksiʼikʼal le máakoʼobaʼ tsʼoʼok u chichtal, jach maakal u xikinoʼob yéetel muutsʼul u yichoʼob; utiaʼal maʼ u paakatoʼob yéetel yichoʼob, mix u yuʼubajoʼob yéetel u xikinoʼob, mix u naʼatajoʼob yéetel u puksiʼikʼaloʼob, mix u suutoʼob tiʼ teen utiaʼal ka in tsʼakoʼob» (Mateo 13:15; Isaías 6:9, 10).
6 U j-tsaypachoʼob Jesuseʼ maʼ tu beetoʼob jeʼex tu beetil yaʼab judíoʼobeʼ, letiʼeʼ tu yaʼalaj yoʼolal u j-tsaypachoʼob: «Teʼexeʼ kiʼ a wóoleʼex, tumen ka paakateʼex yéetel a wicheʼex yéetel ka wuʼuyajeʼex yéetel a xikineʼex» (Mateo 13:16). Le cristianoʼob beetik baʼax tu yaʼalaj Jesusoʼ u kʼáatoʼob u kʼaj óoltoʼob yéetel u meyajtoʼob Jéeoba. Ku kiʼimaktal u yóoloʼob ikil u beetkoʼob baʼax u kʼáat jeʼex u yaʼalik le Bibliaoʼ. Le oʼolaleʼ, le sukuʼunoʼob yéeyaʼanoʼob utiaʼal u binoʼob kaʼan yéetel le uláakʼ tamanoʼoboʼ ku chíikbeskoʼob u kiʼichkelmil Jéeoba (2 Corintoiloʼob 3:6, 18).
Baʼaxten taʼakaʼan le maʼalob péektsiloʼ
7. ¿Baʼaxten maʼ jelaʼan k-ilik maʼ u kʼaʼamal le maʼalob péektsil tumen yaʼabach máakoʼob bejlaʼaʼ?
7 K-ilik túuneʼ, tu kʼiiniloʼob Moisés yéetel tu kʼiiniloʼob Jesuseʼ óoliʼ tuláakal le israelitaʼoboʼ maʼ tu yóotaj u kʼamoʼob upʼéel baʼal jach maʼalobiʼ. Lelaʼ bey xan u yúuchul teʼ kʼiinoʼobaʼ. Bejlaʼeʼ jach yaʼab máax maʼatech u kʼamik le maʼalob péektsil k-kʼaʼaytikoʼ. Baʼaleʼ, leloʼ k-ojel bey kun úuchloʼ, tumen apóstol Pabloeʼ tu yaʼalaj: «Wa taʼakaʼan le maʼalob péektsil k-tseʼektikoʼ, taʼakaʼan chéen utiaʼaloʼob le máaxoʼob saataloʼoboʼ. Tumen tu yoʼolal maʼ táan u yoksaj óoloʼobeʼ, u [diosil] le yóokʼol kaabaʼ tu éekʼjochʼeʼenkunsaj u naʼatoʼob» (2 Corintoiloʼob 4:3, 4). Satanaseʼ táan u yilik u taʼakik le maʼalob péektsiloʼ, tsʼoʼoleʼ yaʼab máakoʼob xaneʼ, tumen maʼ u kʼáat u yiloʼob mix baʼaleʼ, bey ku pixik u yichoʼob yéetel upʼéel jaajay nookʼ utiaʼal maʼ u yilkoʼobeʼ.
8. ¿Baʼaxten ku yaʼalaʼaleʼ yaʼab máakoʼobeʼ bey chʼóoptakoʼobeʼ, yéetel bix jeʼel k-ilik maʼ u yúuchultoʼon xan beyoʼ?
8 Tuláakʼ tʼaanoʼobeʼ, yaʼab máakoʼobeʼ bey chʼóopoʼobeʼ tumen maʼ u yojloʼob wa maʼ maʼalob baʼax ku beetkoʼobiʼ. Le Bibliaoʼ ku yaʼalikeʼ yaʼab máakoʼobeʼ «tsʼoʼok u éekʼjocheʼentaʼal u naʼatoʼob [...,] minaʼan[tiʼob] le kuxtal ku taal tiʼ Jajal Diosoʼ, tumen mix baʼal u yojeloʼob tu yoʼolal u chichil u puksiʼikʼaloʼob» (Efesoiloʼob 4:18). Jeʼex Pabloeʼ, letiʼeʼ jach u kʼaj óol kaʼach le Leyoʼ, baʼaleʼ bey chʼóop kaʼacheʼ, tumen tu chʼaʼapachtaj le máaxoʼob meyajtik Dios kaʼachoʼ baʼaxeʼ tumen maʼ u yojel wa maʼ maʼalob baʼax ku beetkiʼ (1 Corintoiloʼob 15:9). Baʼaleʼ, Jéeobaeʼ tu tsʼáaj u jaajil u kʼaj óolte. Pabloeʼ tu yaʼalaj: «Tu yoʼolal lelaʼ tu chʼaʼaj teen óotsilil Jajal Dios, utiaʼal beyoʼ Jesucristoeʼ ka u chíikbes tiʼ teen yáaxileʼ tuláakal u chúukaʼan óolal. Ka j-béeychajen jeʼel bix jumpʼéel kaʼansaj tiʼ le máaxoʼob bíin u yokes u yóoloʼob tiʼ letiʼoʼ utiaʼal ka yanak tiʼob kuxtal minaʼan u xuul» (1 Timoteo 1:16). Jeʼex Pabloeʼ, yaʼab máaxoʼob pʼekmai kaʼach le baʼaxoʼob ku kaʼansik le Bibliaoʼ bejlaʼeʼ táan u meyajtkoʼob Dios. Lelaʼ letiʼ upʼéel baʼax péekskoʼon k-kʼaʼayt le maʼalob péektsil tak tiʼ le máaxoʼob maʼ u kʼáatoʼob u yuʼuboʼoboʼ. Le táan k-beetik le meyajaʼ, kʼaʼabéet k-xokik le Biblia sáamsamaloʼ yéetel k-ilik naʼatik baʼax ku yaʼalik, leloʼ yaan u yáantkoʼon utiaʼal maʼ k-beetik baʼax maʼ utstutʼaan Jéeobaiʼ.
9, 10. 1) ¿Bix úuchik u yeʼesik le judíoʼob teʼ yáax siglo maʼ u kʼáatoʼob kaʼach u kanoʼob baʼax u kʼáat Dios mix u kʼáatoʼob u kʼexoʼob bix u tuukuloʼoboʼ? 2) ¿Yaan wa baʼax bey u beetaʼal tumen le máaxoʼob yanoʼob ichil le maʼ jaajil religionoʼob bejlaʼoʼ? Tsol bey baʼaxoʼobeʼ.
9 Le baʼax oʼolal yaʼab máakoʼob bey chʼóoptakoʼobeʼ tumen maʼ u kʼáatoʼob u kanoʼob u jaajiliʼ mix u kʼáatoʼob u kʼexoʼob bix u tuukuloʼobiʼ. Teʼ yáax siglooʼ yaʼab judíoʼobeʼ maʼ tu kʼamoʼob Jesusiʼ mix u kaʼansajoʼob, tumen tu jach pechubaʼob u beetoʼob chéen baʼaxoʼob ku yaʼalik u Ley Moisés. Baʼaleʼ yanchaj xan máaxoʼob kʼame. Jeʼex le ka tsʼoʼok u kaʼa kuxtal Jesuseʼ, «yaʼab xan tiʼ le j-kʼiinoʼob judíoʼob tu kʼamajoʼob le oksaj óolaloʼ» (Beetaʼanoʼob [Hechos] 6:7). Baʼaleʼ, Pabloeʼ tu yaʼalaj baʼax tu beetaj u maas yaʼabil le judíoʼoboʼ: «Tak bejelaʼeʼ le ken [...] xoʼokok u tsʼíib Moiseseʼ, jumpʼéel nookʼ pixik u naʼatoʼob» (2 Corintoiloʼob 3:15). Maʼ xaaneʼ, Pabloeʼ u yojel le baʼax u yaʼalmaj Jesús tiʼ u nuuktakil le judíoʼobaʼ: «Teʼexeʼ ka xakʼaltikeʼex le Kiliʼich Tsʼíiboʼob yéetel chúukaʼan óolaloʼ, tumen ka páaʼtikeʼex a kaxtikeʼex tiʼobeʼ le kuxtal minaʼan u xuuloʼ, baʼaleʼ letiʼ le Kiliʼich Tsʼíiboʼob ku tʼaanoʼob tin woʼolaloʼ» (Juan 5:39). Le Kiliʼich Tsʼíiboʼob ku xakʼalxoktaʼal kaʼach tumen le judíoʼoboʼ, ku yeʼesik kaʼach Jesuseʼ letiʼ le Mesíasoʼ. Baʼaleʼ letiʼobeʼ yaanal kaʼach bix u tuukuloʼob, mix Jesús yéetel mix le milagroʼob tu beetaj áantoʼob ka u kʼexoʼob bix u tuukuloʼoboʼ.
10 Lelaʼ jach bey xan u yúuchul yéetel le máaxoʼob yanoʼob ichil le maʼ jaajil religionoʼob bejlaʼaʼ. Jeʼex le judíoʼob teʼ yáax siglooʼ, «yantiʼob jumpʼéel nojoch kʼub óolal tiʼ Jajal Dios, chéen baʼaleʼ u kʼub óolaloʼobeʼ maʼ u chʼaʼamaj u muukʼ tiʼ jumpʼéel chúukaʼan kʼaj óolaliʼ» (Romailoʼob 10:2). Yaneʼeʼ ku xokik le Bibliaoʼ, baʼaleʼ, maʼ u kʼáatoʼob u oksaj óoltoʼob baʼaxoʼob ku kaʼanskiʼ. Maʼatech u kʼamikoʼob wa tiʼ Jéeobaeʼ táan u meyaj le «palitsil chúukpajaʼan u yóol yéetel yaan u naʼat» utiaʼal u kaʼansik u kaajaloʼ (Mateo 24:45). Baʼaleʼ, toʼoneʼ k-ojel Jéeobaeʼ letiʼ kaʼansik máaxoʼob meyajtik, le oʼolal mantatsʼ táan u bin k-maas naʼatik baʼaxoʼob ku kaʼansik (Proverbios 4:18). Tumen k-chaʼik u kaʼanskoʼon Jéeobaeʼ, letiʼeʼ ku tsʼáaiktoʼon u yutsil ikil u chaʼik k-kanik baʼaxoʼob u tukulmaj u beetik.
11. ¿Baʼaxten ku yaʼalaʼal ku chʼóopkintikuba le máaxoʼob ku oksaj óoltikoʼob chéen baʼax u kʼáatoʼoboʼ?
11 Yaʼab máakoʼob xaneʼ bey ku chʼóopkintikubaʼobeʼ, tumen ku oksaj óoltikoʼob chéen baʼax u kʼáatoʼob. Aʼalaʼan yaan máaxoʼob kun pʼaʼastik máaxoʼob meyajtik Dios yéetel yaan u pʼaʼastaʼal le baʼaxoʼob ku kʼaʼaytikoʼob yoʼolal u taalbal Jesusoʼ. Apóstol Pedroeʼ tu yaʼalaj: «Baʼax ku yúuchuleʼ letiʼobeʼ maʼ u kʼáat u kʼaj óoltoʼob» wa Dioseʼ tu taasaj upʼéel Búulkabal tu kʼiiniloʼob Noé (2 Pedro 3:3-6). Bejlaʼa xaneʼ, yaʼab máakoʼob ku yaʼalikoʼob cristianoʼobeʼ ku oksaj óoltikoʼob Jéeobaeʼ utúul Dios ku chʼaʼik óotsilil, ku yeʼesik u yutsil yéetel ku saʼasaj siʼipil, baʼaleʼ maʼ u kʼáat u oksaj óoltoʼob wa ku castigartik le máaxoʼob ku beetkoʼob baʼaloʼob maʼ maʼalobtakoʼ (Éxodo 34:6, 7). Baʼaleʼ máaxoʼob jach tu jaajil ku beetkoʼob baʼax u kʼáat Dioseʼ ku yilik u naʼatkoʼob tubeel baʼaxoʼob ku kaʼansik le Bibliaoʼ.
12. ¿Baʼaxten ku yaʼalaʼal chʼóopkintaʼan le máakoʼob tumen le baʼaloʼob chéen suukaʼan u beetaʼaloʼoboʼ?
12 Yaʼab máakoʼob ku yaʼalikoʼob táan u meyajtikoʼob Dioseʼ chʼóopkintaʼanoʼob tumen baʼaloʼob chéen suukaʼan u beetaʼal. Jesuseʼ tu yaʼalaj tiʼ u nuuktakil le judíoʼoboʼ: «Teʼexeʼ tsʼoʼok a mixbaʼalkúuntikeʼex u yaʼalmaj tʼaan Jajal Dios tumen ka beetikeʼex baʼax tu yaʼalaj le úuchben máakoʼoboʼ» (Mateo 15:6). Le judíoʼoboʼ tu chʼaʼajoʼoltoʼob u meyajkoʼob Jéeoba yéetel chúukaʼan óolal le ka suunajoʼob tu luʼumoʼoboʼ, baʼaleʼ le j-kʼiinoʼoboʼ tu nojbaʼalkúuntubaʼob. U adoracionoʼobeʼ pʼáat maʼatech u yeʼesik tsiikil tiʼ Dios (Malaquías 1:6-8). Tu kʼiiniloʼob Jesuseʼ, le escribaʼob yéetel le fariseoʼoboʼ tsʼoʼok kaʼach u yokskoʼob u kaʼansaj chéen máakoʼob ichil u Ley Moisés. Jesuseʼ tu yaʼalajtiʼobeʼ j-kaʼapʼéel ichoʼob, tumen tu xuloʼob u beetkoʼob le baʼaxoʼob ku yaʼalik le Leyoʼ (Mateo 23:23, 24). Le cristianoʼob teʼ kʼiinoʼobaʼ maʼ unaj u xuʼulul u beetkoʼob baʼaxoʼob ku yaʼalik Dios chéen yoʼolal u kaʼansaj chéen wíinikoʼobiʼ.
«Bey táan u yilik le Jajal Dios maʼ táan u yilaʼaloʼ»
13. ¿Máakalmáak le kaʼapʼéel bix úuchik u yilik Moisés u kiʼichkelmil Jéeobaoʼ?
13 Le tiaʼan Moisés teʼ witsoʼ tu kʼáataj tiʼ Dios ka u chaʼa u yilik u kiʼichkelmil, Jéeoba túuneʼ tu chaʼaj tiʼ Moisés u yilik u sáasilil u kiʼichkelmil. Ken okok kaʼach teʼ tabernaculooʼ, Moiseseʼ maʼatech u pixik u yich yéetel jaajay nookʼ. Letiʼeʼ jach nojoch u oksaj óolal yéetel jach ku tsʼíiboltik kaʼach u beetik baʼax ku yaʼalik Dios. Kex tu yeʼesaj Jéeoba u kiʼichkelmil tiʼeʼ, jeʼel u páajtal u yaʼalaʼaleʼ, letiʼeʼ bey ku yilik Dios kaʼach yoʼolal le oksaj óolal yantiʼoʼ. Le Bibliaoʼ ku yaʼalikeʼ Moiseseʼ «j-pʼáat jeetsʼel tiʼ u tuukul bey táan u yilik le Jajal Dios maʼ táan u yilaʼaloʼ» (Hebreob 11:27; Éxodo 34:5-7). Tsʼoʼoleʼ maʼ chéen tu yeʼesaj u kiʼichkelmil Jéeoba úuchik u léembal u yichiʼ, tu yeʼesaj xan le úuchik u yáantik le israelitaʼob u kʼaj óoltoʼob yéetel u meyajtoʼob Jéeobaoʼ.
14. ¿Bix úuchik yilik Jesús u kiʼichkelmil Dios, yéetel baʼax beet u jach kiʼimaktal u yóol?
14 Le tiaʼan Jesús teʼ kaʼan, maʼiliʼ beetaʼak u maasil baʼaloʼoboʼ, letiʼeʼ tu jach ilaj u kiʼichkelmil Dios ich u millonesi jaʼaboʼob (Proverbios 8:22, 30). Ichil le bukaʼaj jaʼaboʼoboʼ tu jach bisubaʼob tubeel yéetel tu jach paklan yaabiltubaʼob. Jéeobaeʼ tu jach yaabiltaj Jesús, u yáax Paal. Jesús xaneʼ tu jach yaabiltaj Dios, le máax tsʼáa kuxtal tiʼoʼ (Juan 14:31; 17:24). Le yaabilaj ku yeʼesik kaʼach tu baatsil le Taatatsil yéetel le Paaloʼ, upʼéel chúukaʼan yaabilaj. Jeʼex Moiseseʼ, Jesuseʼ jach ku kiʼimaktal u yóol u yeʼesik u kiʼichkelmil Jéeoba ken kaʼansajnak kaʼachi.
15. ¿Bix u yilaʼal u kiʼichkelmil Dios tumen le cristianoʼoboʼ?
15 Jeʼex Moisés yéetel Jesuseʼ, u j-jaajkunajoʼob Jéeobaeʼ jach u kʼáatoʼob xan u yiloʼob u nojbeʼenil Dios, le oʼolaleʼ maʼatech u pʼáatal maʼ u yuʼubikoʼob le maʼalob péektsiloʼ. Apóstol Pabloeʼ tu yaʼalaj: «Le ken sutkʼajak u yóol juntúul máak tiʼ Yuumtsileʼ, le nookʼoʼ ku lukʼul tiʼ» (2 Corintoiloʼob 3:16). Toʼoneʼ k-xokik le Bibliaoʼ tumen k-kʼáat beet baʼax utstutʼaan Dios. Ken k-il u kiʼichkelmil Jéeoba ku yeʼesaʼal tumen Jesucristoeʼ, k-maas natsʼikba tu yiknal yéetel k-ilik beetik jeʼex tu beetiloʼ. Jeʼex Moisés yéetel Jesuseʼ, toʼoneʼ k-ilik u yutsil Jéeoba ken kaʼans tiʼ uláakʼ máakoʼob baʼax utstutʼaan k-kiʼichkelem Dios.
16. ¿Baʼaxten jach nojoch baʼal k-ilik k-kʼaj óoltik u jaajil?
16 Jesuseʼ tu yaʼalaj tiʼ Dios ich payalchiʼ: «Kin kiʼikiʼtʼantikech, in Yuum, [...] tumen ta weʼesaj tiʼ le máaxoʼob kabal u yóoloʼoboʼ le baʼaxoʼob ta taʼakaj tiʼ le máaxoʼob [...] yaan u naʼatoʼoboʼ» (Mateo 11:25). Jéeobaeʼ ku tsʼáaik u páajtalil tiʼ máakoʼob kabal u yóoloʼob yéetel tu jaajil u yóoloʼob taak u kankoʼob baʼax u tukulmaj u beetik, yéetel ku tsʼáaik u páajtalil tiʼob utiaʼal u kʼaj óoltkoʼob u jatsʼuts modos (1 Corintoiloʼob 1:26-28). Bejlaʼa tsʼoʼok k-natsʼikba utiaʼal ka u kanáantoʼoneʼ, letiʼeʼ ku kaʼanskoʼon utiaʼal ka xiʼiktoʼon utsil. Le oʼolaleʼ, kʼaʼabéet k-beetik tuláakal le ku páajtal utiaʼal k-maas natsʼikba tu yiknal yéetel kʼaʼabéet k-ilik jach nojoch le áantajoʼob ku tsʼáaiktoʼon utiaʼal ka maas kʼuchkoʼon kʼaj óoltoʼ.
17. ¿Bix jeʼel k-maas kʼaj óoltik u jatsʼuts modos Jéeobaeʼ?
17 Pabloeʼ tu tsʼíibtaj tiʼ le máaxoʼob yéeyaʼanoʼoboʼ: «Tuláakaloʼon, tumen maʼ pixaʼan u táan k-ich yéetel jumpʼéel nookʼeʼ, beyoʼon jumpʼéel néen ku yeʼesik u kiʼichkelemil Yuumtsileʼ; bey túunoʼ toʼoneʼ táan k-jelbesaʼal utiaʼal k-béeytal [jach] jeʼel bix Cristoeʼ, tumen u kiʼichkelemileʼ táan u yantal [...] tiʼ toʼon» (2 Corintoiloʼob 3:18). Kex wa táan k-páaʼtik k-bin kaʼan wa táan k-páaʼtik k-pʼáatal kuxtal way Luʼumeʼ, wa maas k-kʼaj óoltik u jatsʼuts modos Jéeoba jeʼex u kaʼansik le Bibliaoʼ, yaan k-maas eʼesik u kiʼichkelmil. Wa k-tuukul tiʼ baʼaxoʼob tu beetaj Jesús, baʼaxoʼob tu kaʼansaj yéetel tiʼ u kuxtal tu kʼubaj t-oʼolaloʼ yaan k-maas eʼesik u jatsʼuts modos Dios. Lelaʼ, ¡jach ku beetik u kiʼimaktal k-óol, tumen k-ojel táan k-beetik u maas kiʼikiʼtʼantaʼal k-Dios, le máax táan k-ilik eʼesik u kiʼichkelmiloʼ!
¿Kʼajaʼan wa tech?
• ¿Baʼaxten sajakchaj le israelitaʼob u paktoʼob le u kiʼichkelmil Dios ku yeʼesaʼal kaʼach tumen Moisesoʼ?
• Teʼ yáax siglooʼ, ¿bix úuchik u taʼakaʼal u jaajil, yéetel bix u taʼakaʼal teʼ kʼiinoʼobaʼ?
• Toʼon bejlaʼeʼ, ¿bix k-eʼesik u kiʼichkelmil Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 9]
Le israelitaʼoboʼ maʼ páajchaj u paktikoʼob u yich Moisesiʼ
[U tsolajil le oochel teʼ táan juʼun 11]
Jeʼex Pabloeʼ, yaʼab máaxoʼob u pʼekmoʼob kaʼach u jaajileʼ, bejlaʼeʼ táan u meyajtikoʼob Dios
[U tsolajil le oochel teʼ táan juʼun 13]
Máaxoʼob meyajtik Dioseʼ ku kiʼimaktal u yóoloʼob ikil u yeʼeskoʼob u kiʼichkelmil Dios