Techeʼ, ¿Jach wa ka kʼubik a wóol tiʼ Dios?
Techeʼ, ¿Jach wa ka kʼubik a wóol tiʼ Dios?
«Kaxteʼex táanil u [reino] Jajal Dios.» (MATEO 6:33.)
1, 2. ¿Baʼax tu beetaj utúul táankelem sukuʼun, yéetel baʼax oʼolal?
UTÚUL táankelem sukuʼun kaʼacheʼ u kʼáat maas áantaj tu múuchʼulil, baʼaleʼ yaan kaʼach upʼéel talmil tiʼ: le meyaj ku beetik kaʼachoʼ maʼatech u chaʼik u bin tiʼ tuláakal le muchʼtáambaloʼoboʼ. ¿Baʼax túun tu beetaj? Tu pʼataj le meyaj ku beetik kaʼachoʼ yéetel tu kaxtaj upʼéel meyaj maʼatech u luʼsik tiempoi tiʼ utiaʼal u meyajtik Dios. Bejlaʼeʼ, kex maʼ yaʼab ku náajaltik jeʼex kaʼacheʼ, láayliʼ ku chúukpajal utiaʼal u tsʼáaik baʼax kʼaʼabéet tiʼ u familiaeʼ, yéetel ku páajtal u maas áantaj teʼ múuchʼuliloʼ.
2 ¿Ka naʼatik wa baʼaxten tu kʼexaj u meyaj le sukuʼunaʼ? Wa ku jach luʼsiktech tiempo a meyajeʼ, ¿jeʼel wa a beetik jeʼex letiʼeʼ? Yaʼab sukuʼunoʼob tsʼoʼok u beetkoʼob beyoʼ, yéetel jach maʼalob le baʼax tu beetoʼoboʼ. Lelaʼ ku yeʼeskeʼ jach ku kʼubik u yóoloʼob tiʼ le baʼax tu yaʼalaj Jesusaʼ: «Kaxteʼex táanil u [reino] Jajal Dios yéetel le toj kuxtal utstutʼaan letiʼoʼ, tuláakal túun le baʼaloʼobaʼ bíin tsʼaʼabakteʼex xan» (Mateo 6:33). U yojloʼobeʼ Jéeoba kun tsʼáaik baʼax kʼaʼabéettiʼob, maʼ le yóokʼol kaabaʼ (Proverbios 3:23, 26).
3. ¿Baʼaxten yaan máaxoʼobeʼ jeʼel u tuklikoʼob wa láayliʼ maʼalob u kaxtik máak táanil u Reino Dioseʼ?
3 Yoʼolal le sen talmiloʼob ku máansaʼal teʼ kuxtal bejlaʼaʼ, yaan máax jeʼel u tuklikeʼ maʼ maʼalob le baʼax tu beetaj le sukuʼunaʼ. Yaʼab máakoʼob bejlaʼeʼ jach táan u máanskoʼob óotsilil, baʼaleʼ uláakʼ máakoʼobeʼ jach píit máanjaʼan u ayikʼaliloʼob. Teʼ luʼumiloʼob tuʼux jach ku yilaʼal óotsililoʼ, óoliʼ mix máak jeʼel u tuklik maʼ u kʼamik upʼéel meyaj maʼalob u boʼotaʼaleʼ. Baʼaleʼ yaʼab máakoʼob teʼ luʼumoʼob tuʼux yaan ayikʼaliloʼ, tumen séeb u koʼojtal tuláakal baʼal, u minaʼantal meyaj wa tu yoʼolal patronoʼob jach kʼasaʼanoʼobeʼ, sajak u peʼerkoʼob le maʼalob kuxtal suuk u biskoʼoboʼ. Yoʼolal bix jach talmil u kaxtik u kuxtal máakeʼ, yaneʼeʼ ku beetik le kʼáatchiʼaʼ: «¿Láayliʼ wa túun maʼalob u kaxtik máak táanil u Reino Dioseʼ?». Utiaʼal k-núukik le kʼáatchiʼaʼ, koneʼex ilik tiʼ máaxoʼob aʼalaʼab tumen Jesús ka u kaxtoʼob táanil le Reinooʼ.
«Maʼ a sen tuukuleʼex»
4, 5. ¿Baʼax tu yaʼalaj Jesús utiaʼal u yeʼesik u kaajal Dioseʼ maʼ unaj u jach chiʼichnaktal yoʼolal bix ken u kaxtil u kuxtaliʼ?
4 Jesuseʼ tiaʼan kaʼach tu luʼumil Galileaeʼ, táan u tʼaan tu táan yaʼabkach máakoʼob jejeláas tuʼux u taaloʼob (Mateo 4:25). Chéen jujuntúul tiʼ letiʼob kaʼach ayikʼaliʼ, u maasileʼ maʼ xaaneʼ láaj óotsiloʼob. Kex óoliʼ láaj óotsiloʼobeʼ, Jesuseʼ tu yaʼalajtiʼob ka u tsʼaʼob táanil le baʼax maas maʼaloboʼ, u meyajkoʼob Dios, maʼ u kaxkoʼob ayikʼaliloʼobiʼ (Mateo 6:19-21, 24). Tu yaʼalaj: «Maʼ a sen tuukuleʼex tu yoʼolal a kuxtaleʼex, baʼax kan a jaanteʼex wa baʼax kan a wukʼeʼex, mix tu yoʼolal a wíinklileʼex, baʼax kan a búukinteʼex. ¿Maʼ wa [maas] yaan u tojol le kuxtal tiʼ le janaloʼ, bey xan le wíinklil tiʼ le nookʼoʼ?» (Mateo 6:25).
5 Le baʼax tu yaʼalaj Jesusoʼ maʼ xaaneʼ maʼ maʼalob uʼuyaʼabik tumen yaʼab tiʼ le yanoʼoboʼ, tumen u yojloʼobeʼ wa maʼ u tsʼáaik yóoloʼob meyajeʼ jeʼel u máansik talmil u familiaʼobeʼ. Baʼaleʼ, Jesuseʼ tʼaanaj tiʼ le chʼíichʼoʼoboʼ, tu yaʼaleʼ Jéeobaeʼ sáamsamal u tsʼáaik tuláakal baʼax kʼaʼabéettiʼob. Tu yaʼalaj xaneʼ, Jéeobaeʼ ku kanáantik le looloʼob yaan ich kʼáaxoʼ yéetel maas jatsʼutstakoʼob tiʼ le jatsʼuts nookʼoʼob tu búukintaj rey Salomón úuchiloʼ. Wa Jéeoba ku kanáantik le chʼíichʼoʼob yéetel le looloʼoboʼ, ¿maʼ wa maas jeʼel u kanáantkoʼoneʼ? (Mateo 6:26-30.) Jeʼex tu yaʼalil Jesuseʼ, k-wíinklil yéetel k-kuxtaleʼ maas jach yaʼab u tojol tiʼ le baʼax k-manik utiaʼal k-tséentikbaoʼ bey xan tiʼ le nookʼ k-manik utiaʼal k-búukintoʼ. Wa chéen k-chʼíikil kaxt baʼax ken k-jaante, baʼax ken k-búukinteʼ yéetel maʼ k-jóoʼsik mix upʼíit súutukil utiaʼal k-meyajtik Jéeobaeʼ, leloʼ u kʼáat u yaʼaleʼ maʼ táan u meyaj k-kuxtal utiaʼal baʼax oʼolal tsʼaʼantoʼoniʼ (Eclesiastés 12:13).
Kʼaʼabéet k-jóoʼsik u súutukil utiaʼal Dios
6. 1) ¿Baʼax unaj u beetaʼal kaʼach tumen le cristianoʼob teʼ yáax siglooʼ? 2) ¿Tiʼ máax ku kʼubik u yóol le cristianoʼoboʼ?
6 Baʼaleʼ Jesuseʼ maʼ táan kaʼach u yaʼalik tiʼ le máakoʼob ka u xul u meyajoʼob ka kulak u páaʼtoʼob ka tsʼaʼabaktiʼob tumen Dios baʼax kʼaʼabéet tiʼ u familiaʼobiʼ. Tak le chʼíichʼoʼoboʼ ku máan u kaxt u yoʼochoʼob bey xan utiaʼal u mejniloʼob. Le cristianoʼob teʼ yáax siglooʼ, unaj u meyajoʼob kaʼach utiaʼal ka yanak baʼal u jaantoʼob; unaj xan u tsʼáaikoʼob kaʼach baʼax kʼaʼabéet tiʼ u familiaʼob. Le palitsiloʼob xanoʼ unaj kaʼach u tsʼáaik u yóoloʼob meyaj utiaʼal u tsʼuuliloʼob (2 Tesalonicailoʼob 3:10-12; 1 Timoteo 5:8; 1 Pedro 2:18). Apóstol Pabloeʼ ku beetik kaʼach pasel nookʼoʼob utiaʼal u kaxtik u kuxtal (Beetaʼanoʼob [Hechos] 18:1-4; 1 Tesalonicailoʼob 2:9). Baʼaleʼ le cristianoʼobaʼ maʼatech u kʼubik u yóoloʼob kaʼach tiʼ le taakʼinoʼ, baʼaxeʼ ku kʼubik u yóoloʼob tiʼ Jéeoba; lelaʼ ku taasik kaʼach jeetsʼelil tu puksiʼikʼaloʼob, upʼéel baʼax minaʼan tiʼ u maasil. Le salmistaoʼ tu yaʼalaj: «Le máaxoʼob u kʼubmaj u yóoloʼob tiʼ Yuumtsileʼ beyoʼob u puʼukil Sioneʼ, maʼ tu páajtal u péeksaʼaloʼob, jejetsʼki yaniloʼob utiaʼal kʼiinoʼob minaʼan u xuul» (Salmo 125:1).
7. Máax maʼatech u jach kʼubik u yóol tiʼ Jéeobaeʼ, ¿baʼax jeʼel u kʼuchul u tukulteʼ?
7 Le máax maʼatech u jach kʼubik u yóol tiʼ Jéeobaeʼ, maʼ xaaneʼ yáanal bix u tuukul. Óoliʼ tuláakal máakeʼ ku yilik le ayikʼalil bey upʼéel baʼal jach kʼaʼanan utiaʼal ka xiʼik utsil tiʼeʼ. Le oʼolaleʼ, yaʼab taatatsiloʼobeʼ ku yaʼalikoʼob tiʼ u paalaloʼob ka u yil u kaʼanchajal u xookoʼob, utiaʼal ka yanaktiʼob upʼéel meyaj maʼalob u boʼotaʼal. Baʼaleʼ yaan taatatsil cristianoʼob ku tuukuloʼob kaʼach beyaʼ tsʼoʼok u yilkoʼob maʼ maʼalob baʼax tu beetoʼobiʼ, tumen u paalaloʼobeʼ tsʼoʼok u xuʼulul u tsʼáaik u yóoloʼob u meyajtoʼob Dios yéetel tsʼoʼok u joʼopʼol u binoʼob tu paach chéen ayikʼaliloʼob.
8. ¿Baʼax ku páaʼtaʼal tiʼ utúul cristiano ku tuukul tubeel?
8 Le oʼolaleʼ, utúul cristiano ku tuukul tubeeleʼ ku naʼatikeʼ maʼ unaj u sen chiʼichnaktal yoʼolal bix ken u kaxtil u kuxtaliʼ yéetel unaj u jóoʼsik u súutukil utiaʼal u meyajtik Dios. Kex ka yanak u tsʼáaik yóol meyaj utiaʼal u tsʼáaik baʼax kʼaʼabéet tiʼ u familiaeʼ, maʼatech u yilik wa maas unaj u náajaltik taakʼin tiʼ u meyajtik Dios (Eclesiastés 7:12).
Maʼ a chiʼichnaktaleʼex
9. ¿Baʼax tu yaʼalaj Jesús tiʼ máaxoʼob jach ku kʼubik u yóoloʼob tiʼ Jéeoba?
9 Teʼ tseʼek tu máansaj Jesús teʼ puʼukoʼ, tu yaʼalaj: «Maʼ a sen tuukuleʼex táan a waʼalikeʼex: ¿Baʼax k-bíin jaante? wa ¿Baʼax k-bin ukʼe? wa ¿Baʼax k-bin búukinte? Tumen u kajnáaliloʼob le yóokʼol kaabaʼ ku kaxtikoʼob tuláakal le baʼaloʼobaʼ, baʼaleʼ teʼexeʼ yanteʼex juntúul Taata teʼ j-kaʼanoʼ u yojel kʼaʼabéetteʼex tuláakal le baʼaloʼobaʼ» (Mateo 6:31, 32). ¿Máasaʼ jach ku líiʼsik k-óol le tʼaanoʼobaʼ? Wa k-jach kʼubik k-óol tiʼ Jéeobaeʼ letiʼeʼ yaan u yáantkoʼon mantatsʼ. Baʼaleʼ le baʼax tu yaʼalaj Jesusoʼ ku beetik xan k-tuukul, tumen tu yaʼalaj wa k-chʼíikil kaxt chéen ayikʼaliloʼobeʼ k-eʼesik táan k-tuukul jeʼex «u kajnáaliloʼob le yóokʼol kaabaʼ».
10. ¿Bix tu yeʼesil Jesús baʼax maas u yaabiltmaj utúul táankelem máak tu natsʼuba tʼaan tu yéetel?
10 Utéenjeakileʼ utúul táankelem máak jach ayikʼaleʼ tu kʼáataj tiʼ Jesús baʼax unaj u beetik utiaʼal ka yanak kuxtal minaʼan u xuul tiʼ. Ka kʼaʼajsaʼab tiʼ tumen Jesús baʼax ku yaʼalik u Ley Moiseseʼ, letiʼeʼ tu yaʼalaj: «Paliliʼen ka joʼopʼ in tsʼoʼokbesik tuláakal lelaʼ. ¿Baʼax u binten?». Le baʼax núukaʼab tiʼ tumen Jesusoʼ maʼ xaaneʼ maʼ maʼalob uʼuyaʼabik tumen yaʼab máakoʼobiʼ. Jesuseʼ tu yaʼalaj tiʼ: «Wa a kʼáat utsil chúukaʼantaleʼ, xeen, kon baʼax yantecheʼ ka a tsʼáa tiʼ le óotsiloʼoboʼ; bey túunoʼ bíin yanaktech ayikʼalil teʼ j-kaʼanoʼ; ku tsʼoʼokoleʼ koʼoten ka a tsaypachten» (Mateo 19:16-21). Le táankelem máakoʼ lubaʼan u yóol ka bini, tumen maʼ tu páajtal u máansik u kuxtal ich óotsilil; kex u yaabilma Jéeobaeʼ maas u yaabiltmaj u ayikʼalil.
11, 12. 1) ¿Baʼax tu yaʼalaj Jesús unaj u beetik k-tuukul? 2) Le ayikʼaliloʼ, ¿bix jeʼel u beetik maʼ k-meyajtik Jéeobaeʼ?
11 Tu yoʼolal lelaʼ, Jesuseʼ tu yaʼalaj: «Jach istikia u yokol juntúul ayikʼal tu [reinoi] kaʼan. [...] [Maas] séebaʼan u máan juntúul camello tu jool jumpʼéel púutsʼeʼ maʼ ka okok juntúul ayikʼal tu [reino] Jajal Dios» (Mateo 19:23, 24). Jesuseʼ, ¿tu yóotaj wa túun u yaʼal mix utúul ayikʼal jeʼel u páajtal u yokol tu Reino Dioseʼ? Maʼatech, tumen ka tsʼoʼokeʼ tu yaʼalaj: «Baʼaleʼ Jajal Dioseʼ tuláakal baʼal ku páajtal u beetik» (Mateo 19:25, 26). Yéetel u yáantaj Jéeobaeʼ, teʼ yáax siglooʼ, yaan j-ayikʼaloʼob yéeyaʼaboʼob utiaʼal u binoʼob teʼ kaʼanoʼ (1 Timoteo 6:17). Le baʼax tu yaʼalaj Jesusoʼ tu yaʼalaj utiaʼal u yeʼesik baʼax jeʼel u yúuchul wa ku yaabiltaʼal le ayikʼaliloʼ.
12 Wa yaan máax ku jach yaabiltik baʼaxoʼob yaan tiʼ, jeʼex le táankelem máakoʼ, lelaʼ jeʼel u beetik maʼ u meyajtik Jéeoba jach tu jaajil u yóoleʼ. Lelaʼ jeʼel u yúuchul tiʼ le ayikʼaloʼoboʼ bey xan tiʼ le máaxoʼob «u kʼáatoʼob ayikʼaltaloʼ» (1 Timoteo 6:9, 10). U tuklik máak yaan u bin utsil tiʼ tumen yaan taakʼin tiʼeʼ jeʼel u beetik u xuʼulul u tsʼáaik u yóol u meyajt Dioseʼ (Mateo 5:3). Jeʼel xan u beetik u yilik bey maʼ kʼaʼabéet u yáantaj Jéeoba tiʼeʼ (Deuteronomio 6:10-12). Maʼ xaan xaneʼ, jeʼel u tsʼíiboltik ka ilaʼak bey maas maʼalob máakil tumen le sukuʼunoʼoboʼ (Santiago 2:1-4). Maʼ xaan xaneʼ, maas yaʼab súutukil ku máansik táan u náaysik u yóol yéetel u taakʼin, yéetel chéen upʼíit tiempo ku pʼatik utiaʼal Jéeoba.
Unaj k-ilik u yantaltoʼon upʼéel maʼalob tuukul
13. ¿Baʼax tuukulil maʼ maʼalob yaan kaʼach tiʼ le laodiceailoʼoboʼ?
13 U múuchʼulil Laodicea teʼ yáax siglooʼ maʼ maʼalob baʼax ku tuklik kaʼach yoʼolal le ayikʼaliloʼoboʼ. Jesuseʼ tu yaʼalaj tiʼ: «Techeʼ ka waʼalik, Teneʼ ayikʼalen, táan u binten utsil yéetel mix baʼal ku bineltikten. Techeʼ maʼ táan a chʼaʼanuʼuktik wa juntúul máakech mix baʼal u biilal, j-kʼáat máatanech, óotsilech, chʼóopech yéetel chaknuulech». Maʼ le baʼaloʼob yaan tiʼ le laodiceailoʼob beet u xuʼulul u meyajtkoʼob Jéeobaoʼ, baʼax úucheʼ jach tu kʼubaj u yóoloʼob tiʼ u ayikʼaliloʼob maʼ tiʼ Jéeobaiʼ. Le oʼolaleʼ, tu táan Dioseʼ chéen sat kʼíinaloʼob yéetel jach taʼaytak u xeʼebloʼob kaʼach tumen Jesús (Apocalipsis 3:14-17).
14. ¿Baʼaxten Pabloeʼ tʼaanaj maʼalob tiʼ le cristianoʼob ebreoʼoboʼ?
14 Baʼaleʼ Pabloeʼ tʼaanaj maʼalob tiʼ le cristianoʼob ebreoʼob yoʼolal baʼax tu beetoʼob ka chʼaʼapachtaʼaboʼoboʼ; letiʼeʼ tu yaʼalaj: «Teʼexeʼ ta chʼaʼajeʼex óotsilil tiʼ le máaxoʼob j-kʼaʼaloʼoboʼ bey xan yéetel kiʼimak óolal ta mukʼyajtajeʼex u lukʼesaʼalteʼex [baʼaxoʼob yanteʼex] tumen a wojeleʼexeʼ teʼ j-kaʼanoʼ yaan a tiaʼal teʼexeʼ baʼaloʼob [maas] maʼalobtak yéetel ku xáantaloʼob utiaʼal kʼiinoʼob minaʼan u xuul» (Hebreob 10:34). Le cristianoʼobaʼ maʼ lúub u yóoloʼob úuchik u luʼsaʼal baʼaxoʼob yantiʼob kaʼachiʼ; baʼaxeʼ maʼ xuʼul u kiʼimakil u yóoloʼobiʼ tumen maʼ luʼsaʼabtiʼob le baʼaxoʼob maas «maʼalobtak yéetel ku xáantaloʼob utiaʼal kʼiinoʼob minaʼan u xuul[oʼ]». Jeʼex le máak tu yaʼalaj Jesús tu konaj tuláakal baʼax yaan tiʼ utiaʼal u manik upʼéel perla jach yaʼab u tojleʼ, letiʼobeʼ tu chʼaʼatukultoʼob maʼ u xulik u kaxkoʼob táanil u Reino Dios, kex jeʼel baʼalak talmil ka u aktáantoʼobeʼ (Mateo 13:45, 46). ¿Máasaʼ jach maʼalob le baʼax tu beetoʼoboʼ?
15. Utúul kiik kajaʼan tu luʼumil Liberiaeʼ, ¿bix úuchik u kaxtik táanil u Reino Dios?
15 Yaʼab sukuʼunoʼob bejlaʼeʼ bey xan u tuukuloʼoboʼ. Lelaʼ bey tu beetil utúul x-lóoʼbayan kiik kajaʼan tu luʼumil Liberia, letiʼeʼ yanchaj kaʼach u páajtalil u yokol xook tiʼ upʼéel universidad; lelaʼ upʼéel baʼal jach maʼalob u yilaʼal utiaʼal ka xiʼik utsil tiʼ máak teʼ luʼum jeʼeloʼ. Baʼaleʼ, letiʼeʼ x-táanilkunsaj yéetel tsʼoʼok u yaʼalaʼal tiʼ wa jeʼel u beetik u noj táanilkunsajil ichil wa jaypʼéel mesoʼobeʼ. Letiʼeʼ tu chʼaʼatuklaj u kaxtik táanil u Reino Dios yéetel maʼ u xulik u meyajtik Dios bey x-táanilkunsajeʼ. Letiʼ túuneʼ tu yóotaj u beet u noj táanilkunsajil yéetel ich óoxpʼéel meseseʼ káaj u xokik le Biblia yéetel 21 utúulul máakoʼob. Le kiikaʼ bey xan u milesi sukuʼunoʼob yéetel kiikoʼob jeʼex letiʼeʼ táan u kaxkoʼob táanil le Reinooʼ, kex yanchaj u pʼatkoʼob pachil jujumpʼéel baʼaloʼob. ¿Baʼax áantkoʼob utiaʼal ka yanak upʼéel maʼalob tuukul tiʼob kex kuxaʼanoʼob tiʼ upʼéel yóokʼol kaab tiaʼan tu paach ayikʼaliloʼobeʼ? Koʼoneʼex ilik jujumpʼéel baʼaxoʼob áantkoʼob.
16, 17. 1) ¿Baʼaxten mix utéen unaj k-tuklik ojel tuláakal baʼal? 2) ¿Baʼaxten unaj k-oksaj óoltik yaan u béeykuntik Jéeoba baʼaxoʼob u yaʼalmaj?
16 Maʼ tu tuklikoʼob wa u yojeloʼob tuláakal. Le Bibliaoʼ ku yaʼalik: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej. Maʼ a tukultik wa sen yaʼab baʼal a wojel» (Proverbios 3:5-7). Maʼ xaaneʼ, yaan kʼiineʼ jeʼel k-tuklik maʼalob le baʼax k-kʼáat beetoʼ (Jeremías 17:9). Kex beyoʼ, máax ku yilik u lúubul utsil tiʼ Jéeobaeʼ ku kaxtik u nuʼuktaj tiʼ tuláakal baʼax ku beetik teʼ múuchʼuliloʼ, tu najil u xook, tuʼux ku meyaj, ken u náays u yóol wa tiʼ jeʼel baʼalak uláakʼ ka u beeteʼ (Salmo 48:14; 73:24).
17 Ku oksaj óoltikoʼob yaan u béeykuntik baʼax ku yaʼalik Jéeoba. Apóstol Pabloeʼ tu yaʼalaj: «Utiaʼal u natsʼikuba máak [tiʼ Dioseʼ], kʼaʼabéet u yoksaj óoltaʼal yaan Jajal Dios yéetel letiʼeʼ ku boʼotik le máaxoʼob kaxtikoʼ» (Hebreob 11:6). Wa máak maʼ tu jach oksaj óoltik wa yaan u béeykuntik Jéeoba baʼaxoʼob ku yaʼalikeʼ, maʼ xaaneʼ jeʼel u yilik u náajaltik «u baʼaloʼobil yóokʼol kaabeʼ» (1 Corintoiloʼob 7:31). Baʼaleʼ wa jach muʼukʼaʼan k-oksaj óolaleʼ yaan k-ilik kaxtik táanil u Reino Dios. ¿Bix jeʼel k-muʼukʼankúuntik oksaj óolaleʼ? Unaj k-natsʼikba tiʼ Jéeoba ich payalchiʼ yéetel unaj u suuktal k-xokik le Bibliaoʼ (Salmo 1:1-3; Filiposiloʼob 4:6, 7; Santiago 4:8). Jeʼex le rey Davidoʼ, jeʼel u páajtal k-aʼalik ich payalchiʼeʼ: «Teneʼ, Yuumtsil, in kʼubmaj in wóol tiʼ tech; teneʼ in waʼalmaj: “Techeʼ in Jajal Diosech.” Bukaʼaj nojochil a wutsil» (Salmo 31:14, 19, LSM).
18, 19. 1) ¿Bix u maas muʼukʼantal k-oksaj óolal tiʼ Jéeoba? 2) ¿Baʼaxten unaj k-óotik tsʼáa juntséelil baʼaxoʼob k-kʼáat?
18 Ku tsʼáaik u yóoloʼob u meyajtoʼob Jéeoba. Pabloeʼ tu yeʼeseʼ máax ku jach oksaj óoltik yaan u béeykuntik Jéeoba baʼaxoʼob ku yaʼalikeʼ, ku tsʼáaik u yóol u meyajte; letiʼeʼ tu tsʼíibtaj: «K-kʼáateʼ jujuntúul tiʼ teʼexeʼ ka u yeʼes tak tu xuul le líikʼ óolalaʼ [wa ka u yeʼes jach u tsʼaamaj u yóol,] utiaʼal ka utsil tsʼoʼokpajak baʼax ka páaʼtikeʼex» (Hebreob 6:11). Wa k-tsʼaamaj k-óol meyajt Jéeobaeʼ, letiʼeʼ yaan u yáantkoʼon. Cada ken u yáantoʼoneʼ ku maas nojochtal k-kʼub óolal tiʼ letiʼ yéetel ku maas yantaltoʼon u muukʼil utiaʼal maʼ k-xulik meyajtik (1 Corintoiloʼob 15:58). Tsʼoʼoleʼ, ku maas muʼukʼantal k-oksaj óolal tiʼ baʼax u yaʼalmaj u beetik (Efesoiloʼob 3:16-19).
19 Ku tsʼáaikoʼob juntséelil baʼax u kʼáatoʼob. Pabloeʼ tu tsʼáaj juntséelil upʼéel maʼalob meyaj utiaʼal ka u tsaypacht Cristo. Jach maʼalob le baʼax tu beetoʼ, kex yaan kʼiin tu yilaj óotsilil (1 Corintoiloʼob 4:11-13). Jéeobaeʼ maʼatech u yaʼalik u tsʼáaik ayikʼalil tiʼ máak, yéetel máaxoʼob meyajtikeʼ yaan kʼiineʼ jach ku yilkoʼob óotsilil. U yóotik máak kuxtal yéetel upʼíit baʼaloʼobeʼ ku yeʼesik jach tu jaajil u yóol u chʼaʼatukulmaj u meyajtik Jéeoba (1 Timoteo 6:6-8).
20. ¿Baʼaxten unaj u chúukpajal k-óol páaʼtaj?
20 Chúukaʼan u yóoloʼob páaʼtaj. Santiago, utúul tiʼ u j-tsaypachoʼob Cristoeʼ, tu yaʼalaj: «Sukuʼuneʼex, yanakteʼex chúukaʼan óolal tak ken taalak Yuumtsil» (Santiago 5:7). Teʼ kʼiinoʼobaʼ, tuláakal máak u kʼáat ka séeb úuchuk baʼax u kʼáat, le oʼolal maʼ chéen chʼaʼabil u chúukpajal u yóol máak páaʼtajiʼ. Baʼaleʼ Pabloeʼ ku yaʼaliktoʼon ka yanaktoʼon le tuukul anchaj tiʼ «le máaxoʼob tu yoʼolal le oksaj óolaloʼ yéetel tu yoʼolal le chúukaʼan óolaloʼ [ku] kʼamikoʼob le ayikʼalil aʼalaʼantiʼob tumen Jajal Diosoʼ» (Hebreob 6:12). Kʼaʼabéet k-páaʼtik u béeykuntik baʼax ku yaʼalik Jéeoba. Chéen tukultej, le baʼax k-páaʼtikoʼ upʼéel kuxtal minaʼan u xuul tiʼ upʼéel Luʼum suunajaʼan paraísoi. Le oʼolal maʼ chéen kunel ka chúukpajak k-óol páaʼtajiʼ.
21. 1) ¿Baʼax k-eʼesik ken k-kaxt táanil u Reino Dios? 2) ¿Baʼax ken k-il tuláakʼ xookoʼ?
21 K-ilik túuneʼ, jach maʼalob ka k-kaxt táanil u Reino Dios, jeʼex tu yaʼalil Jesuseʼ. Wa k-beetik beyoʼ k-eʼesik jach kʼubmaj k-óol tiʼ Jéeoba yéetel k-eʼesik táan k-yéeyik le maas maʼalob kuxtal jeʼel u yantal tiʼ máakoʼ. Baʼaleʼ, Jesuseʼ tu yaʼalaj xan maʼ k-xulik kaxtik táanil «le toj kuxtal utstutʼaan» Diosoʼ. Tuláakʼ xookoʼ yaan k-ilkeʼex baʼaxten jach maʼalob ka k-beeteʼex le baʼax tu yaʼalaj Jesusaʼ.
¿Jeʼel wa u páajtal a tsolkeʼ?
• Jesuseʼ, ¿bix tu yaʼalil unaj k-ilik le ayikʼaliloʼoboʼ?
• ¿Baʼax k-kanik tiʼ le baʼax tu yaʼalaj Jesús yoʼolal utúul camello yéetel u joolil upʼéel púutsʼoʼ?
• ¿Baʼax jeʼel u yáantkoʼob k-kaxt táanil le Reinooʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
Yaʼab tiʼ le máaxoʼob uʼuy baʼax tu yaʼalaj Jesusoʼ óotsiloʼob
[U tsolajil le oochel teʼ táan juʼun 15]
Le táankelem máak ayikʼaloʼ u yaabilajeʼ u tsʼaamaj tiʼ u ayikʼaliloʼob maʼ tiʼ Diosiʼ
[U tsolajil le oochel teʼ táan juʼun 15]
Jesuseʼ tʼaanaj tiʼ utúul máak tu konaj tuláakal baʼax yaan tiʼ utiaʼal u manik upʼéel perla jach yaʼab u tojol
[U tsolajil le oochel teʼ táan juʼun 16]
Wa jach tsʼaamaj k-óol meyajt Jéeobaeʼ, letiʼeʼ yaan u yáantkoʼon