Jéeobaeʼ ku kaʼansik le ancianoʼob kanáantik u kaajaloʼ
Jéeobaeʼ ku kaʼansik le ancianoʼob kanáantik u kaajaloʼ
«Yuumtsileʼ letiʼ máax tsʼáaik le ojéelajiloʼ; [...] yéetel le kʼaj óolajiloʼ ku jóokʼol tu booxel u chiʼ.» (PROVERBIOS 2:6.)
1, 2. Le sukuʼunoʼob okjaʼanajaʼanoʼoboʼ, ¿baʼaxten ku tsʼáaik u yóoloʼob utiaʼal ka u kʼamoʼob maas meyajoʼob teʼ múuchʼuliloʼ?
«JACH kiʼimakchaj in wóol le ka tsʼaʼaben in beet in ancianoi. Le meyaj tsʼaʼabtenaʼ kin wilik kaʼach bey upʼéel bix jeʼel in maas meyajtik Jéeobaeʼ. Tin wuʼuyaj jach unaj in tsʼáaik nib óolal tiʼ Jéeoba tu yoʼolal tuláakal baʼax tsʼoʼok u beetik tin woʼolaloʼ. Tsʼoʼoleʼ, in kʼáat xan kaʼach in wáant le sukuʼunoʼob tak tuʼux kun páajtaleʼ, jeʼex úuchik in wáantaʼal xan tumen uláakʼ ancianoʼoboʼ.» Lelaʼ bey tu yaʼalil Nick, utúul sukuʼun siete jaʼaboʼob joʼopʼok u beetik u ancianoi. Baʼaleʼ kex jach kiʼimak u yóol kaʼacheʼ, chan sajakchaj xan yoʼolal le meyaj ken u beet kaʼachoʼ. Letiʼeʼ tu yaʼalaj baʼaxten: «Maʼ yanakten mix 30 jaʼaboʼob le ka tsʼaʼaben in beet in ancianoiliʼ, le oʼolal tin wuʼuyaj bey minaʼanten u ojéelalil yéetel u naʼatil utiaʼal in nuʼuktik tubeel le múuchʼuliloʼ».
2 Jach yaan baʼax oʼolal u kiʼimaktal u yóol le máaxoʼob tsʼaʼanoʼob tumen Jéeoba u kanáantoʼob le múuchʼuliloʼ. Le apóstol Pablooʼ tu chʼaʼachiʼitaj baʼax tu yaʼalaj Jesús utiaʼal u kʼaʼajsik tiʼ u ancianoiloʼob Éfeso upʼéel tiʼ le baʼaxoʼob taasik kiʼimak óolaloʼ, letiʼeʼ tu yaʼalaj: «Yaan [maas] kiʼimak óolal u tsʼaʼabal wa baʼax tiʼ u kʼaʼamal wa baʼax» (Beetaʼanoʼob [Hechos] 20:35). Le sukuʼunoʼob okjaʼanajaʼanoʼoboʼ, jeʼel u páajtal u maas meyajkoʼob Jéeoba bey xan u yáantkoʼob le múuchʼulil wa ku beetkubaʼob siervo ministerialoʼob wa ancianoʼob. Le siervo ministerialoʼoboʼ ku yáantkoʼob le ancianoʼoboʼ yéetel ku beetkoʼob jejeláas meyajoʼob ku bisik yaʼab tiempo, baʼaleʼ kʼaʼabéettak. Le sukuʼunoʼobaʼ u yaabilajoʼob tiʼ Jéeoba yéetel tiʼ u yéet wíinikiloʼob péekskoʼob u meyajtoʼob le múuchʼuliloʼ (Marcos 12:30, 31).
3. ¿Baʼaxten yaan sukuʼunoʼobeʼ maʼ u kʼáat u beet u ancianoiloʼob wa u siervo ministerialiloʼobiʼ?
3 Yaan sukuʼunoʼobeʼ maʼ u kʼáatoʼob kʼuchul u beetubaʼob siervo ministerialoʼob wa ancianoʼobiʼ, tumen ku tuklikoʼobeʼ maʼ kun páajtaloʼob yéetel u meyajil. Jeʼex Nickeʼ, maʼ xaaneʼ ku tuklikoʼob minaʼantiʼob u kʼaj óolalil mix u naʼatil utiaʼal u nuʼuktikoʼob maʼalob le múuchʼuliloʼ. Techeʼ, ¿bey wa xan a tuukuloʼ? Wa beyoʼ, maʼ kʼaas ka tuukulnakech beyoʼ, tumen Jéeobaeʼ yaan u kʼáatik cuenta tiʼ le ancianoʼob yoʼolal bix tu kanáantiloʼob le múuchʼuliloʼ. Jesuseʼ tu yaʼalaj: «Tiʼ le máax yaʼab baʼal ku kʼuʼubul tiʼeʼ, yaʼab xan bíin kʼáataʼak tiʼ; tiʼ le máax yaʼab baʼal ku kʼubéentaʼal tiʼe,ʼ [maas] yaʼab xan bíin [kʼáataʼak] tiʼ» (Lucas 12:48).
4. Jéeobaeʼ, ¿bix u yáantik le máaxoʼob u tsʼaamaj utiaʼal u kanáantoʼob le múuchʼuliloʼoboʼ?
4 Le máaxoʼob ku tsʼaʼabloʼob tumen Jéeoba u beet u siervo ministerialiloʼob wa u ancianoiloʼobeʼ, ¿chéen wa tu juunaloʼob unaj u beetik u meyajoʼob teʼ múuchʼuliloʼ? Maʼatech. Jéeoba áantkoʼob utiaʼal ka u beetoʼob, yéetel ka u beetoʼob tubeel. Jeʼex t-ilaj teʼ xook máanikoʼ, Jéeobaeʼ ku yáantkoʼob yéetel u kiliʼich muukʼ, tsʼoʼoleʼ le kiliʼich muukʼaʼ ku beetik u yantaltiʼob jatsʼuts modos, utiaʼal beyoʼ ka u kanáantoʼob tubeel le múuchʼuliloʼ (Beetaʼanoʼob 20:28; Galaciailoʼob 5:22, 23). Jéeoba xaneʼ ku tsʼáaiktiʼob ojéelalil yéetel naʼatil (Proverbios 2:6). ¿Bix u beetik? Koʼoneʼex ilik óoxpʼéel bix u kaʼansaʼal tumen Jéeoba le máaxoʼob u tsʼaamaj utiaʼal u kanáantoʼob le múuchʼuliloʼoboʼ.
Ku kaʼansaʼaloʼob tumen maʼalob j-kaʼansajoʼob
5. ¿Baʼaxten jach maʼalob kaʼansajnajik Pedro yéetel Juan?
5 Le ka bisaʼab le apostoloʼob Pedro yéetel Juan tu táan le Sanedrinoʼ, le juesoʼob ku tuklaʼal kaʼach jach yaan u naʼatoʼoboʼ, tu yiloʼobeʼ le apostoloʼoboʼ máakoʼob «maʼ xooknajaʼanoʼobiʼ bey xan chéen ichil meyajil máakoʼob u taaloʼob». Kex le apostoloʼob u yojloʼob kaʼach xook yéetel tsʼíibeʼ, maʼ xooknajoʼob tiʼ mix upʼéel escuela tuʼux ku kaʼansaʼal baʼax ku yaʼalik le Bibliaoʼ. Kex beyoʼ, Pedro, Juan yéetel uláakʼ disipuloʼobeʼ tu yeʼesoʼob jach maʼalob u kaʼansajoʼob yéetel tu yáantoʼob xan yaʼab máakoʼob utiaʼal ka u tsaypachtoʼob Cristo. ¿Bix úuchik u kankoʼob kaʼansaj jach maʼalob wa maʼ kaʼanchajaʼan u xookoʼobiʼ? Le juesoʼoboʼ ka tu yuʼuboʼob bix u tʼaan Pedro yéetel Juaneʼ, «tu yojéeltajoʼob túuneʼ letiʼobeʼ j-máanoʼob yéetel Jesús» (Beetaʼanoʼob 4:1-4, 13). Kex tu kʼamoʼob u kiliʼich muukʼ Dioseʼ, baʼaleʼ kaʼansaʼaboʼob xan tumen Jesús, lelaʼ letiʼe baʼax yanchaj u éejemtaʼal tumen le juesoʼob maʼ tu naʼatkoʼob kaʼach u Tʼaan Diosoʼ (Beetaʼanoʼob 1:8). Le tiaʼan kaʼach Jesús way Luʼumeʼ tu kaʼansaj tiʼ u apostoloʼob bix ken u muchʼiloʼob le utsul máakoʼob ku keʼetloʼob yéetel tamanoʼoboʼ, baʼaleʼ maʼ chéen le tu kaʼansajtiʼobiʼ, tu kaʼansaj xan tiʼob bix ken u nuʼuktiloʼob le máaxoʼob kun ookloʼob teʼ múuchʼuliloʼ (Mateo 11:29; 20:24-28; 1 Pedro 5:4).
6. Jesús yéetel Pabloeʼ, ¿bix úuchik u kaʼanskoʼob uláakʼ disipuloʼob?
6 Jesuseʼ le ka tsʼoʼok u kaʼa kuxkíintaʼaleʼ maʼ tu xulaj u kaʼansik le máaxoʼob u tsʼaamaj utiaʼal u nuʼuktoʼob le múuchʼuliloʼ (Apocalipsis 1:1; 2:1–3:22). Letiʼ yéey Pablo utiaʼal ka u beet u apostolil yéetel letiʼ il ka kaʼansaʼak (Beetaʼanoʼob 22:6-10). Pabloeʼ jach kʼaʼanan tu yilaj le baʼax kaʼansaʼab tiʼoʼ yéetel tu kaʼansaj xan tiʼ uláakʼ ancianoʼob (Beetaʼanoʼob 20:17-35). Letiʼeʼ tu máansaj yaʼab tiempo táan u kaʼansik Timoteo u beetuba «juntúul j-meyaj kʼambeʼen, minaʼan baʼax oʼolal u chʼaʼik subtal» (2 Timoteo 2:15). Pablo yéetel Timoteoeʼ jach tu bisubaʼob maʼalob. Pabloeʼ tu yaʼalaj tu yoʼolal Timoteo: «Tsʼoʼok a wojéeltikeʼex bix u kuxtal Timoteo, yéetel bix meyajnajik tin wéetel utiaʼal u [kʼaʼaytaʼal] le maʼalob péektsiloʼ, jeʼel bix juntúul paal ku yáantik u taataeʼ» (Filiposiloʼob 2:22). Pabloeʼ maʼ tu kaʼansaj tiʼ Timoteo mix tiʼ uláakʼ sukuʼunoʼob ka tsaypachtaʼak letiʼiʼ, baʼaxeʼ tu yaʼalajtiʼob beyaʼ: «Kuxleneʼex jeʼel bix in kuxtal tenoʼ, jeʼel bix teneʼ táan in kuxtal jeʼel bix u kuxtal Cristoeʼ» (1 Corintoiloʼob 11:1).
7, 8. 1) ¿Baʼax eʼesik ku taasik utsil u beetaʼal tumen le ancianoʼob jeʼex úuchik u beetik Jesús yéetel Pabloeʼ? 2) Le ancianoʼoboʼ, ¿baʼax kʼiin kʼaʼabéet u káajal u kaʼanskoʼob le sukuʼunoʼob utiaʼal ka u beetubaʼob siervo ministerialoʼob wa ancianoʼoboʼ?
7 Jeʼex tu beetil Jesús yéetel Pabloeʼ, le ancianoʼob bejlaʼoʼ jach ku tsʼáaik u yóol u kaʼansoʼob le sukuʼunoʼob okjaʼanajaʼanoʼoboʼ, yéetel ku bin xan utsiltiʼob. Lelaʼ bey u yeʼesik baʼax úuch tiʼ Chad, letiʼeʼ utúul sukuʼun líikʼ tiʼ upʼéel naj tuʼux maʼ tuláakal j-jaajkunajoʼobiʼ, yéetel maʼ úucheʼ tsʼaʼab u beet u ancianoi teʼ múuchʼuliloʼ. Chadeʼ ku yaʼalik: «Ichil yaʼab jaʼaboʼobeʼ, yaʼab ancianoʼob jach noʼojaʼanoʼobeʼ tsʼoʼok u yáantkenoʼob utiaʼal in maas tsʼáaik in wóol in meyajt Dios. Tumen in taata maʼ j-jaajkunajeʼ, le ancianoʼoboʼ jach tu tsʼáaj u yóol u yáantenoʼob yéetel kʼuch u beetubaʼob bey in taataʼobeʼ. Tu jóoʼsoʼob tiempo utiaʼal u kaʼanskoʼobten bix unaj u yúuchul kʼaʼaytaj, yéetel utúul tiʼ letiʼobeʼ tu kaʼansajten in beet le meyajoʼob ku tsʼaʼabalten teʼ múuchʼuliloʼ».
8 Jeʼex áantaʼabik le sukuʼun tsʼoʼok aʼalikaʼ, le ancianoʼob jach noʼojaʼanoʼoboʼ ku káajal u kaʼanskoʼob le sukuʼunoʼob kex yaʼab ku binetik utiaʼal u kʼuchul u beetubaʼob siervo ministerialoʼob wa ancianoʼob. ¿Baʼaxten ku beetkoʼob beyaʼ? Tumen le Bibliaoʼ ku yaʼalikeʼ, utúul sukuʼuneʼ, táanil tiʼ u kʼuchul u beetuba siervo ministerial wa ancianoeʼ, unaj u yeʼesik tsʼoʼok u yiijtal u tuukul yéetel táan u bisik upʼéel toj kuxtal. Le Bibliaoʼ bey u yeʼesik ken u yaʼal: «[Táanil] unaj u yilaʼal wa maʼaloboʼob utiaʼal le meyajoʼ» (1 Timoteo 3:1-10).
9. ¿Baʼax unaj u beetik le ancianoʼoboʼ, yéetel baʼaxten?
9 Wa táanil yaan u yilaʼal wa noʼojaʼan utúul sukuʼun utiaʼal ka u beet u siervo ministerialil wa u ancianoileʼ, ¿maʼ wa túun yáax kʼaʼabéet u kaʼansaʼaliʼ? Jeʼex wa utúul paal ku bin xook ka tsʼaʼabak u beet upʼéel talam examen, baʼaleʼ maʼ kaʼansaʼan tiʼ tubeel le baʼax kun kʼáatbil tiʼoʼ, ¿jeʼel wa u máansik le examenoʼ? Jach talam ka u máanse. Lelaʼ ku yeʼesikeʼ, yáax kʼaʼabéet u kaʼansaʼal le paaloʼ. Tsʼoʼoleʼ utúul maʼalob profesoreʼ maʼ chéen ku kaʼansik le paalal utiaʼal ka u máans u examenoʼobiʼ, ku kaʼansik xan tiʼob bix jeʼel u meyajtiʼob le baʼax ku kanikoʼoboʼ. Le ancianoʼob xanoʼ unaj u yilkoʼob tiʼ baʼax kʼaʼabéet u yáantaʼal le sukuʼunoʼob okjaʼanajaʼanoʼoboʼ utiaʼal ka kʼuchuk u beet u siervo ministerialiloʼob wa u ancianoiloʼob. Baʼaleʼ, maʼ chéen le ku beetkoʼobiʼ, ku kaʼanskoʼob xan tiʼ le sukuʼunoʼob bix u kanáantaʼal tubeel le múuchʼuliloʼ (2 Timoteo 2:2). Le sukuʼunoʼob okjaʼanajaʼanoʼoboʼ unaj u tsʼáaik u yóoloʼob utiaʼal u beetkoʼob tuláakal baʼax ku páaʼtaʼal tiʼ máak utiaʼal ka u beet u siervo ministerialil wa u ancianoi (Tito 1:5-9). Wa le ancianoʼob ku tsʼáaik u yóol u yáantoʼob le sukuʼunoʼob u kʼáatoʼob u kʼamoʼob u maasil meyaj teʼ múuchʼuliloʼ maʼ kun xáantal ken kʼuchuk u beetoʼob le meyajoʼoboʼ.
10, 11. Le ancianoʼoboʼ, ¿bix jeʼel u páajtal u kaʼanskoʼob uláakʼ sukuʼunoʼob utiaʼal ka maas meyajnakoʼob teʼ múuchʼuliloʼ?
10 Le ancianoʼob noʼojaʼantakoʼoboʼ, ¿bix jeʼel u yáantkoʼob uláakʼ sukuʼunoʼob utiaʼal ka maas meyajnakoʼob xan teʼ múuchʼuliloʼ? Upʼéel bix u beetkoʼobeʼ, letiʼe u suuktal u jóoʼloʼob kʼaʼaytaj tu yéeteloʼoboʼ yéetel u yáantikoʼob utiaʼal «ku tsol[oʼob] maʼalob u tʼaaniloʼob le jaajoʼ» (2 Timoteo 2:15). Letiʼob xaneʼ ku tsikbalkoʼob tiʼ le sukuʼunoʼob le nojoch kiʼimak óolal ku taasiktiʼob u meyajoʼob utiaʼal u maasiloʼ, ku tsikbalkoʼob xan bix tu tsʼáajil tu tuukuloʼob u beetik u siervo ministerialiloʼob wa u ancianoiloʼob bey xan le kiʼimak óolal tu yuʼuboʼob le ka tsʼaʼabtiʼob le meyajoʼobaʼ. Le ancianoʼob xanoʼ ku tsʼáaikoʼob maʼalob tsolnuʼukoʼob tiʼ le sukuʼunoʼob utiaʼal ka u maas meyajtoʼob Diosoʼ yéetel beyoʼ ka u yeʼesoʼob tiʼ u maasil bix unaj u beetkoʼob xan (1 Pedro 5:3, 5).
11 Tak ken tsʼoʼokok u tsʼaʼabal utúul sukuʼun u beet u siervo ministerialileʼ, le ancianoʼoboʼ láayliʼ unaj u yáantkoʼobeʼ. Bruce, utúul sukuʼun úuch joʼopʼok u beetik u ancianoileʼ, ku yaʼalik: «Utstintʼaan in kutal yéetel le sukuʼun táant u tsʼaʼabal u beet u siervo ministerialil utiaʼal k-xokik le nuʼuktajiloʼob u tsʼaamaj le palitsil chúukpajaʼan u yóol yéetel yaan u naʼatoʼ. K-xokik xan le nuʼuktajoʼob ku tʼaanoʼob tiʼ wa baʼax meyajil tsʼaʼab u beet teʼ múuchʼuliloʼ, ken tsʼoʼokokeʼ utstintʼaan in múul meyaj tu yéetel tak ken u kan u beet le meyaj tu juunaloʼ». Jeʼex u bin u maas kaambaleʼ, jeʼel u páajtal u yeʼesaʼal tiʼ bix unaj u líiʼsaʼal u yóol le sukuʼunoʼob ken xíimbaltaʼakoʼoboʼ. Bruce ku yaʼalik xan: «Ken xiʼiken yéetel utúul siervo ministerial k-xíimbalt le sukuʼunoʼob utiaʼal k-líiʼsik u yóoloʼoboʼ, kin wáantik u kaxt tekstos teʼ Biblia jeʼel u líiʼsik u yóol le sukuʼun wa le familia ken k-xíimbaltoʼ. Utiaʼal ka kʼuchuk u beetuba utúul maʼalob ancianoeʼ, le siervo ministerialoʼ kʼaʼabéet u kanik u beet u kʼuchul tu puksiʼikʼal le sukuʼunoʼob le baʼax ku yaʼalik le Bibliaoʼ» (Hebreob 4:12; 5:14).
12. Le sukuʼunoʼob úuch joʼopʼok u beetik u ancianoiloʼoboʼ, ¿bix jeʼel u yáantkoʼob le túumben ancianoʼoboʼ?
12 Le túumben ancianoʼoboʼ láayliʼ kʼaʼabéet xan u maas kaʼansaʼaloʼobeʼ. Nick, le sukuʼun t-aʼalaj tu káajbal le xookaʼ, ku yaʼalik: «Jach tu yáanten le kaʼansaj tu tsʼáajten le ancianoʼoboʼ, maases le tsʼaʼabten tumen kaʼatúul sukuʼunoʼob tsʼoʼok u yantal u jaʼabiloʼoboʼ. Le sukuʼunoʼobaʼ u yojloʼob baʼax unaj u beetaʼal ken yanak u chʼaʼatuklaʼal wa baʼax teʼ múuchʼuliloʼ. Letiʼobeʼ jach ku chʼenxikintkoʼob baʼax kin waʼalik yéetel ku chʼaʼikoʼob en cuenta, kex maʼ jach bey u tuukuloʼobiʼ. Jach kaambalnajen tiʼ bix u yeʼeskoʼob kabal óolal yéetel tsiikil tiʼ le sukuʼunoʼob yéetel kiikoʼob teʼ múuchʼuliloʼ. Le ancianoʼobaʼ tu kaʼansoʼobten u kʼaʼananil u maʼalob meyajten le Biblia ken in tsolnuʼukt le sukuʼunoʼoboʼ wa ken in líiʼs u yóoloʼoboʼ».
Ku kaʼansaʼaloʼob tumen u Tʼaan Dios
13. 1) ¿Baʼax kun áantik utúul anciano u nuʼuk tubeel le múuchʼuliloʼ? 2) Jesuseʼ, ¿baʼaxten tu yaʼalaj: «In kaʼansajeʼ maʼ in tiaʼaliʼ»?
13 U Tʼaan Dioseʼ ku taasik leyoʼob, nuʼuktajoʼob yéetel u tsikbalil u kuxtal máakoʼob; lelaʼ jach jeʼel u yáantik utúul anciano utiaʼal «ka utsil chúukaʼanchajak yéetel nuʼukaʼan[chajak] utiaʼal u beetik tuláakal u jejeláasil maʼalob meyajoʼob» (2 Timoteo 3:16, 17). Jeʼel bukaʼaj kaʼanchajaʼanik u xook utúul sukuʼuneʼ, le baʼax beetik u nuʼuktik tubeel le múuchʼuliloʼ letiʼe baʼax tsʼoʼok u kanik teʼ Bibliaoʼ yéetel le bix u meyaj tiʼoʼ. Tuukulnakoʼon tiʼ Jesús, le maas maʼalob anciano tsʼoʼok u yantaloʼ; tiʼ letiʼeʼ yanchaj yaʼabach kʼaj óolal yéetel yaʼabach naʼatil. Baʼaleʼ, letiʼeʼ maʼ tu kaʼansaj chéen u tuukuloʼob tiʼ u disipuloʼobiʼ, baʼaxeʼ tu yaʼalaj: «In kaʼansajeʼ maʼ in tiaʼaliʼ baʼaleʼ utiaʼal le máax túuxtenoʼ». ¿Baʼaxten tu yaʼalaj utiaʼal u Taata le baʼax ku kaʼanskoʼ? Letiʼeʼ ku yaʼalik baʼaxten: «Le máax ku tʼaan chéen tu juunal u yóoleʼ, ku beetik chéen utiaʼal ka tsiʼikik tumen máakoʼob» (Juan 7:16, 18).
14. Le ancianoʼoboʼ, ¿bix u yeʼeskoʼob maʼ chéen táan u kaxtik u nojbeʼeniloʼobiʼ?
14 Le ancianoʼob xanoʼ maʼatech u kaxkoʼob chéen ka tsiʼikikoʼob wa ka nojbeʼenkúuntaʼakoʼobiʼ. Ken u tsolnuʼuktoʼob wa ken u líiʼsoʼob u yóol utúul sukuʼuneʼ maʼ chéen tu tuukuloʼob u taal le baʼax ku yaʼalikoʼoboʼ, ku taal tiʼ u Tʼaan Dios. U yojloʼobeʼ u meyaj utúul ancianoeʼ letiʼe u yáantik le sukuʼunoʼob utiaʼal ka tuukulnakoʼob jeʼex «u tuukul Cristo[eʼ]», maʼ ka tuukulnakoʼob jeʼex letiʼobeʼ (1 Corintoiloʼob 2:14-16). Tuukulnakoʼon tiʼ utúul anciano táan u yáantik utúul sukuʼun yéetel u yatan utiaʼal ka u yutskíintoʼob jujumpʼéel talamiloʼob yantiʼob. ¿Baʼax jeʼel u yúuchul wa chéen tiʼ baʼaxoʼob uchaʼantak ichil u kuxtal ku chʼaʼik le tsolnuʼuk ku tsʼáaikoʼ, yéetel maʼ tu chʼaʼik tiʼ baʼax ku yaʼalik le Bibliaoʼ mix tiʼ le baʼax u yaʼalmaj «le palitsil chúukpajaʼan u yóol yéetel yaan u naʼat[oʼ]»? (Mateo 24:45.) Maʼ xaaneʼ ichil le tsolnuʼuk ken u tsʼáaoʼ jeʼel u tʼaan chéen tiʼ baʼaxoʼob suuk u beetaʼal teʼ tuʼux kajaʼanoʼ wa chéen tiʼ le baʼaxoʼob u yojel letiʼoʼ. U jaajileʼ yaan baʼaxoʼob suuk u beetaʼal maʼ kʼaastakiʼ, yéetel maʼ xaaneʼ le ancianooʼ yaʼab baʼax u yilmaj ichil u kuxtal. Baʼaleʼ le sukuʼunoʼoboʼ maas jeʼel u jóoʼskoʼob utsil wa ka aʼalaʼaktiʼob tumen le ancianoʼob maas maʼalob ka u beetoʼob baʼax ku yaʼalik Jéeoba yéetel Jesús, ke ka u beetoʼob chéen baʼax ku yaʼalaʼaltiʼob tumen u maasil wa le baʼax suukaʼan u beetaʼal teʼ tuʼux kajaʼanoʼoboʼ (Salmo 12:6; Proverbios 3:5, 6).
Ku kaʼansaʼaloʼob tumen «le palitsil chúukpajaʼan u yóol yéetel yaan u naʼat[oʼ]»
15. ¿Baʼax meyajil tu tsʼáaj Jesús tiʼ «le palitsil chúukpajaʼan u yóol yéetel yaan u naʼat[oʼ]», yéetel máax áantikoʼob utiaʼal ka u tsʼoʼokbesoʼob le meyajaʼ?
15 Le apostoloʼob Pedro, Juan yéetel Pablooʼ tiaʼanoʼob kaʼach ichil «le palitsil chúukpajaʼan u yóol yéetel yaan u naʼat» tu yaʼalaj Jesusoʼ. Le palitsilaʼ letiʼeʼ sukuʼunoʼob yanoʼob way Luʼum yéeyaʼanoʼob utiaʼal u binoʼob gobernar yéetel Cristo teʼ kaʼanoʼ (Apocalipsis 5:9, 10). Teʼ tu tsʼoʼok kʼiiniloʼob le kʼasaʼan yóokʼol kaabaʼ, le sukuʼunoʼob yanoʼob ichil «le palitsil chúukpajaʼan u yóol[oʼ]» táan u bin u pʼíittaloʼob. Baʼaleʼ le meyaj pʼataʼantiʼob tumen Jesús, le u kʼaʼaykoʼob u maʼalob u péektsilil le Reino táanil tiʼ u taal le xuʼulsajiloʼ, jach táan u bisaʼal yaʼab tuʼuxoʼob. Kex táan u bin u pʼíittal le máaxoʼob yanoʼob ichil le palitsilaʼ, láayliʼ jach táan u tsʼoʼokbeskoʼob le meyaj pʼataʼantiʼoboʼ. ¿Bix u béeytal u beetkoʼob? Ku béeytal u beetkoʼob tumen tsʼoʼok u kaʼanskoʼob le máaxoʼob yanoʼob ichil le «uláakʼ j-tamanoʼob» utiaʼal ka áantaʼakoʼob tiʼ le meeyjil kʼaʼaytaj yéetel kaʼansajoʼ (Juan 10:16; Mateo 24:14; 25:40). Teʼ kʼiinoʼobaʼ, óoliʼ tuláakal le meyajaʼ ku beetaʼal tumen le «uláakʼ j-tamanoʼob[oʼ]».
16. Le palitsil chúukpajaʼan u yóoloʼ, ¿bix u kaʼansik le sukuʼunoʼob ku nuʼuktajoʼob tu kaajal Diosoʼ?
16 Le palitsiloʼ, ¿bix u kaʼansik le uláakʼ tamanoʼob utiaʼal ka u beetoʼob le meyajaʼ? Teʼ yáax siglooʼ, tiʼ le u múuchʼ sukuʼunoʼob ku tʼaanoʼob tu kʼaabaʼ le palitsiloʼ tiʼ letiʼob tsʼaʼab u páajtalil utiaʼal u kaʼanskoʼob yéetel u tsʼáaikoʼob ancianoʼob teʼ múuchʼuliloʼoboʼ; le ancianoʼob túunoʼ ku kaʼanskoʼob xan le sukuʼunoʼoboʼ (1 Corintoiloʼob 4:17). Bejlaʼa xaneʼ láayliʼ bey u beetaʼaloʼ. Le Cuerpo Gobernante wa le u chan múuchʼ ancianoʼob kun binoʼob kaʼan ku tʼaanoʼob tu kʼaabaʼ le palitsil chúukpajaʼan u yóol yéetel yaan u naʼatoʼ, u tsʼaamaj páajtalil tiʼ jujuntúul nuxiboʼob utiaʼal ka u kaʼansoʼob yéetel utiaʼal ka u tsʼaʼob uláakʼ sukuʼunoʼob utiaʼal ka u beet u ancianoiloʼob yéetel u siervo ministerialiloʼob tiʼ tuláakal le múuchʼuliloʼob yanoʼob way Luʼumeʼ. Le Cuerpo Gobernanteoʼ ku yilik xan ka tsʼaʼabak xookoʼob utiaʼal u kaʼansaʼal le máaxoʼob yanoʼob ichil u Comitei le Sucursaloʼoboʼ, tiʼ le sukuʼunoʼob ku xíimbaltikoʼob le múuchʼuliloʼoboʼ, bey xan tiʼ le ancianoʼob yéetel siervo ministerialoʼoboʼ, utiaʼal beyoʼ ka u kanoʼob bix jeʼel u maas nuʼuktikoʼob maʼalob le múuchʼuliloʼoboʼ. Tiʼ tuláakal le sukuʼunoʼobaʼ, ku tsʼaʼabal tiʼob nuʼuktaj yéetel u xookiloʼob u U Pʼíich Tulumil Kanan, yéetel tsʼíibil juʼunoʼob bey xan yéetel libroʼob, jeʼex le libro Organizados para hacer la voluntad de Jehová. *
17. 1) Le palitsiloʼ tumen jach chúukaʼan u yóol u beet baʼax ku yaʼalaʼal tiʼeʼ, ¿baʼax tsʼaʼab u beet tumen Jesús? 2) Le ancianoʼoboʼ, ¿bix u yeʼeskoʼob ku tsʼáaikubaʼob yáanal u nuʼuktaj le palitsiloʼ?
17 Jesuseʼ u yojleʼ le palitsiloʼ jach yaan u beetik tubeel tuláakal baʼax ken u yaʼal tiʼ, le oʼolal u tsʼaamaj «u kanáant tuláakal baʼax yaan tiʼ» way Luʼumeʼ (Mateo 24:47). Le ancianoʼob xanoʼ, ku tsʼáaikubaʼob tu yáanal u nuʼuktaj le palitsil chúukpajaʼan u yóoloʼ ikil u beetkoʼob baʼax ku yaʼalaʼaltiʼob tumen le Cuerpo Gobernanteoʼ. Letiʼob xaneʼ ku yáantajoʼob utiaʼal ka yanak jeetsʼelil ichil le múuchʼuliloʼ; lelaʼ ku beetkoʼob ikil u kaʼanskoʼob le sukuʼunoʼoboʼ, ikil u chaʼik u kaʼansaʼaloʼob tumen u Tʼaan Dios yéetel ikil u beetkoʼob le baʼax ku yaʼalik le palitsil chúukpajaʼan u yóoloʼ. ¿Máasaʼ jach k-tsʼáaik nib óolal tiʼ Jéeoba ikil u kaʼansik máakoʼob jach u kʼáat u yáantoʼob le sukuʼunoʼob teʼ múuchʼuliloʼ?
[Tsolajiloʼob]
^ xóot’ol 16 Beetaʼan tumen u j-jaajkunajoʼob Jéeoba.
¿Baʼax jeʼel a núukikeʼ?
• Le ancianoʼob noʼojaʼanoʼoboʼ, ¿bix u kaʼanskoʼob uláakʼ sukuʼunoʼob?
• ¿Baʼaxten le ancianoʼoboʼ maʼ tu kaʼanskoʼob chéen baʼax ku tuklikoʼob?
• ¿Bix u yeʼesik le ancianoʼob ku tsʼáaikubaʼob yáanal u nuʼuktaj le palitsiloʼ, yéetel baʼaxten ku beetkoʼob?
[U kʼáatchiʼiloʼob le xookoʼ]
[U tsolajil le oochel teʼ táan juʼun 31]
«Le palitsil chúukpajaʼan u yóol yéetel yaan u naʼat[oʼ]» jejeláas bix u kaʼansik le ancianoʼoboʼ