Kʼáatchiʼob ku beetaʼal

Teʼ kʼiinoʼobaʼ, ¿unaj wa xan u beetaʼal tumen le cristianoʼob le baʼaxoʼob ku yaʼalik u Ley Moisés, yaan yil yéetel u tsʼoʼokol u beel máak yéetel utúul u láakʼtsiloʼ?

Le Ley tsʼaʼab tiʼ le israelitaʼob tumen Jéeobaoʼ maʼatech u jach aʼalik bix unaj u kʼiimbesaʼal upʼéel tsʼoʼokol beel, baʼaleʼ ku yaʼalik yéetel máaxoʼob maʼ maʼalob ka tsʼoʼokok u beel máakiʼ. Jeʼex u libroi Levítico 18:6-20, ku yaʼalikeʼ le láakʼtsiloʼoboʼ maʼ unaj u tsʼoʼokol u beeloʼob tu baatsiloʼobiʼ. Teʼ kʼiinoʼobaʼ, le cristianoʼoboʼ maʼ tiaʼanoʼob yáanal le Ley tsʼaʼab tiʼ le israelitaʼob úuchiloʼ, le oʼolaleʼ, maʼatech u páaʼtaʼal ka u tsʼoʼokbesoʼob baʼaxoʼob ku yaʼalik le Leyoʼ (Efesoiloʼob 2:15; Colosailoʼob 2:14). Baʼaleʼ, lelaʼ maʼ u kʼáat u yaʼal wa maʼ unaj u tuukuloʼob tiʼ baʼax ku yaʼalik Levítico 18:6-20 ken u yéeyoʼob yéetel máax kun tsʼoʼokol u beeloʼobiʼ. Koʼoneʼex ilik baʼaxten.

Yáaxeʼ, teʼ yóokʼol kaabaʼ yaan leyoʼob ku yaʼalikoʼob maʼ maʼalob ka tsʼoʼokok u beel máak yéetel utúul máax jach u láakʼtsiliʼ; tiʼ baʼaloʼob yaan yil yéetel lelaʼ, le máaxoʼob meyajtik Diosoʼ unaj u beetkoʼob baʼaxoʼob ku yaʼalik le ley tsʼaʼan tumen le gobiernoʼob teʼ tuʼux kajaʼanoʼoboʼ (Mateo 22:21; Romailoʼob 13:1). Le leyoʼobaʼ ku kʼexpajal tiʼ cada luʼum. Yaʼab tiʼ le leyoʼobaʼ ku tsʼaʼabaloʼob yoʼolal le kʼojaʼaniloʼob jeʼel u taasik tiʼ u paalal le máaxoʼob ku tsʼoʼokol u beeloʼob yéetel máax jach u láakʼtsiloʼoboʼ; tumen tsʼoʼok u yilaʼaleʼ u paalal le máaxoʼob ku tsʼoʼokol u beeloʼob beyaʼ maas jeʼel u síijloʼob yéetel wa baʼax kʼojaʼanileʼ bey xan yéetel wa baʼax defectoi tu wíinkliloʼob. Yoʼolal lelaʼ, yéetel tumen «unaj u [yantaloʼob] tu yáanal u páajtalil le jalaʼach wíinikoʼoboʼ», le cristianoʼoboʼ ku chʼaʼikoʼob en cuentai le ley tsʼaʼan teʼ luʼum tuʼux kajaʼanoʼob ken u chʼaʼatukult u tsʼoʼokol u beeloʼoboʼ.

Unaj xan u chʼaʼabal en cuentai baʼax maʼalob yéetel baʼax maʼ maʼalob u yilaʼal teʼ tuʼux kajaʼan máakoʼ. Óoliʼ tuláakal tuʼuxeʼ kʼaas u yilaʼal ka tsʼoʼokok u beel máak yéetel utúul u láakʼtsil. Baʼaleʼ, kex yaan jujumpʼéel tuʼuxoʼob maʼ jelaʼan u yilaʼal le tsʼoʼokol beeloʼob beyaʼ, le libro The Encyclopædia Britannicaoʼ, ku yaʼalik: «U suukaʼanileʼ wa jach u láakʼtsiluba utúul xiib yéetel utúul koʼoleleʼ jach upuliʼ maʼ maʼalob ka tsʼoʼokok u beeloʼobiʼ». Le oʼolaleʼ, utúul cristianoeʼ, kex maʼ yéetel utúul máax jach u láakʼtsilil ku tuklik u tsʼoʼokol u beeleʼ unaj u chʼaʼik en cuentai bix u yilaʼal teʼ tuʼux kajaʼanoʼ utiaʼal maʼ u beetik u yúuchul tʼaan kʼaas tiʼ le múuchʼuliloʼ mix tiʼ u kiʼichkelem kʼaabaʼ Dios (2 Corintoiloʼob 6:3).

Unaj k-nuʼuktikba xan yéetel le tuukul wa conciencia u tsʼaamajtoʼon Diosoʼ. Tuláakal máakeʼ tsʼaʼan u páajtalil tiʼ u naʼatik baʼax maʼalob yéetel baʼax maʼ maʼalobiʼ (Romailoʼob 2:15). Wa ku nuʼuktaʼal k-conciencia tumen le Bibliaoʼ yaan u yáantkoʼon k-ojéelt baʼax maʼalob, baʼax maʼ maʼalobiʼ, baʼax jeʼel u yáantkoʼoneʼ wa baʼax jeʼel u beetik u bintoʼon kʼaasileʼ; baʼaleʼ wa maʼ tu yaʼaliktoʼon mix baʼaleʼ, leloʼ u kʼáat u yaʼaleʼ tsʼoʼok k-kʼaskúuntik yéetel baʼaloʼob kʼaastak wa subtsiltakoʼ. Jéeobaeʼ tʼaanaj tiʼ u kʼaʼabéetil u kanáantik máak u conciencia le ka tu yaʼalaj tiʼ le israelitaʼob maʼ maʼalob ka tsʼoʼokok u beel máak yéetel utúul u láakʼtsiloʼ. Letiʼeʼ tu yaʼalajtiʼob: «Maʼ a kuxtaleʼex jeʼel bix u yúuchul kuxtal Egipto le tuʼux kajnáaleʼex kaʼachoʼ. Maʼ a kuxtaleʼex jeʼel bix u yúuchul kuxtal Canaán le luʼum tuʼux bíin in biseʼexoʼ, mix a tsʼoʼokbesikeʼex u yaʼalmaj tʼaanoʼob» (Levítico 18:3). Le cristianoʼob xan bejlaʼoʼ ku kanáantkoʼob maʼ u kʼaskúuntaʼal u concienciaʼob tumen le baʼaloʼob kʼaastak ku beetik le máaxoʼob maʼatech u meyajtkoʼob Diosoʼ (Efesoiloʼob 4:17-19).

Jeʼex túun k-ilkoʼ, kex maʼ tiaʼanoʼon yáanal u Ley Moiseseʼ, k-conciencia nuʼuktaʼan tumen le Bibliaoʼ ku yáantkoʼon k-il maʼ maʼalob ka tsʼoʼokok u beel utúul xiib yéetel utúul koʼolel jach u láakʼtsilubaʼobiʼ, jeʼex ka tsʼoʼokok u beel utúul taatatsil yéetel u hija, utúul maamatsil yéetel u hijo, utúul sukuʼuntsil yéetel u yíitsʼin wa utúul kiktsil yéetel u yíitsʼin. * Baʼaleʼ, tiʼ baʼax yaan yil yéetel u tsʼoʼokol u beel máak yéetel máax maʼ jach u láakʼtsileʼ, le cristianoʼoboʼ ku yilik u beetkoʼob jeʼex suukaʼanil yéetel jeʼex u yaʼalik le leyoʼob yaan teʼ luʼum tuʼux kajaʼanoʼoboʼ. Ken u beetoʼob beyoʼ ku yeʼeskoʼob xan tsiikil tiʼ le tsʼoʼokol beel jeʼex u yaʼalik le Bibliaoʼ (Hebreob 13:4).

[Tsolajiloʼob]