Anchaj kiʼimak óolal ichil u kuxtaloʼob ¿Bix jeʼel u páajtal u yantal xan tiʼ techeʼ?

MARC, utúul precursor regular kajaʼan Canadaeʼ, tiʼ ku meyaj kaʼach tiʼ upʼéel empresa tuʼux ku beetaʼal maquinaʼob utiaʼal meyaj tiʼ le astronautaʼoboʼ. Utéenjeakileʼ, aʼalaʼab yaan u tsʼaʼabaltiʼ upʼéel meyaj maas maʼalob u náajalil ichil le empresaoʼ, baʼaleʼ kʼaʼabéet kaʼach u meyaj bulkʼiin. ¿Baʼax túun tu beetaj Marc?

Amy, utúul kiik kajaʼan Filipinaseʼ, precursora regular kaʼach táanil tiʼ u tsʼoʼokol u xook. Baʼaleʼ, ka tsʼoʼok u xookeʼ aʼalaʼabtiʼ wa jeʼel u meyaj tiʼ upʼéel tuʼux jach maʼalob u náajalileʼ, baʼaleʼ kʼaʼabéet kaʼach u meyaj bulkʼiin. ¿Baʼax túun tu beetaj Amy?

Marc yéetel Amieʼ maʼ upʼéeliliʼ baʼax tu chʼaʼatuklaj u beetkoʼobiʼ, yéetel le bix biniktiʼoboʼ ku yeʼesik jach jaaj le baʼax tu yaʼalaj Pablo tiʼ le corintoiloʼoboʼ: «Le máaxoʼob táan u náajaltikoʼob u baʼaloʼobil yóokʼol kaabeʼ unaj u kuxtaloʼob bey maʼ táan u náajaltikoʼobeʼ» (1 Cor. 7:29- 31).

Bix unaj u meyajtoʼon u baʼaloʼobil le yóokʼol kaabaʼ

Táanil tiʼ k-ilik baʼax tu beetaj Marc yéetel Amieʼ, koʼox ilik baʼax u kʼáat u yaʼal le tʼaan «yóokʼol kaab» (ich griegoeʼ kó·smos) tu yaʼalaj Pablo teʼ carta tu tsʼíibtaj tiʼ le corintoiloʼoboʼ. Teʼ versiculoʼobaʼ, le tʼaan kó·smos meyajnaj tiʼ Pablooʼ u kʼáat u yaʼal tuláakal le baʼaloʼob kʼaʼabéet tiʼ máak jeʼex le jaanloʼ, le nookʼoʼ yéetel upʼéel tuʼux u kajtal. * U jaajileʼ tuláakloʼon kʼaʼabéet k-meyaj utiaʼal u yantaltoʼon le baʼaloʼobaʼ. Le oʼolaleʼ ku meyajtoʼon le yóokʼol kaab utiaʼal k-tsʼáaik tiʼ k-familia le baʼaxoʼob kʼaʼabéettiʼoboʼ (1 Tim. 5:8). Baʼaleʼ k-tsʼáaik cuentaeʼ «le yóokʼol kaaboʼ táan u bin u xuʼulul» (1 Juan 2:17). Le oʼolaleʼ maʼ unaj k-náajaltik u baʼalubaʼob le yóokʼol kaabaʼ (1 Cor. 7:31).

Le baʼax tu yaʼalaj Pabloaʼ tsʼoʼok u yáantik yaʼab sukuʼunoʼob utiaʼal u meyajtiʼob le  «yóokʼol kaab» chéen utiaʼal u kaxtikoʼob le baʼax kʼaʼabéettiʼoboʼ, beyoʼ maʼ tu chʼíikloʼob chéen tiʼ u meyajoʼob. Lelaʼ jach tsʼoʼok u taasik kiʼimak óolal tiʼob, tumen ku béeychajal u máanskoʼob maas yaʼab tiempo yéetel u familiaʼob bey xan utiaʼal u meyajtkoʼob Dios. Tsʼoʼoleʼ tsʼoʼok xan u kankoʼob u maas kʼub u yóoloʼob tiʼ Jéeoba maʼ tiʼ u baʼalubaʼob le yóokʼol kaabaʼ. ¿Jeʼel wa u páajtal a beetik xan beyoʼ? ¿Jeʼel wa u páajtal a wilik a kuxtal chéen yéetel le baʼaxoʼob kʼaʼabéettech utiaʼal a maas meyajtik Jéeobaoʼ? (Mat. 6:19-24, 33.)

«Tsʼoʼok k-uʼuyik maas naatsʼ yaniloʼon tiʼ Jéeoba»

Marc, tiʼ le máax tʼaanajoʼon tu káajbaloʼ, tu beetaj le baʼax tu yaʼalaj Pablooʼ, le beetik maʼ tu yóotaj u kʼam le meyaj aʼalaʼab u tsʼaʼabaltiʼoʼ. Jach maʼ sen yaʼab kʼiinoʼob máanakeʼ le patronoʼ tu yaʼalaj tiʼ Marc jeʼel u maas naʼaksik u sueldo wa ku kʼamik le meyajoʼ. Marqueʼ ku yaʼalik: «Kex maʼ chéen chʼaʼabileʼ tin kaʼa aʼalajtiʼ maʼ tin kʼamik le meyajoʼ». ¿Baʼaxten maʼ tu kʼamiʼ? Letiʼeʼ ku yaʼalik: «Teen yéetel Paula, in wataneʼ, k-kʼáat kaʼach maas meyajt Jéeoba, le oʼolal t-chʼaʼatuklaj kuxtal chéen yéetel le baʼax kʼaʼabéettoʼonoʼ. T-kʼáataj tiʼ Jéeoba ka u tsʼáatoʼon le naʼat kʼaʼabéettoʼon utiaʼal k-maas meyajtikoʼ yéetel t-chʼaʼatuklaj baʼax kʼiin ken káajak k-beetik».

Paula, u yatan Marqueʼ, ku yaʼalik xan: «Teeneʼ precursora regularen kaʼach yéetel chéen óoxpʼéel kʼiin kin meyaj bey secretaria tiʼ upʼéel hospitaleʼ. Jach maʼalob in náajal kaʼach, baʼaleʼ jeʼex in wíichameʼ in kʼáat xan kaʼach in maas meyajt Jéeoba tiʼ upʼéel tuʼux jach kʼaʼabéet áantaj. Le oʼolaleʼ tin chʼaʼatuklaj in pʼatik in meyaj, baʼaleʼ le ka tin waʼalaj tiʼ in patrona nikaʼaj in pʼat le meyajoʼ, tu yaʼalajten yaan upʼéel meyaj tuʼux táan u kaxtaʼal máax beetik, yéetel tu yaʼalajten jach jeʼel in beetik maʼalob le meyajoʼ. Kex letiʼe meyaj maas maʼalob u boʼotaʼal teʼ hospitaloʼ, teneʼ tin beetaj le baʼax tsʼoʼok in chʼaʼatuklik in beetikoʼ, ka xuʼul in meyaj. Ka tin tsolaj tiʼ in patrona baʼaxten maʼ tin kʼamik le meyajoʼ, letiʼeʼ tu yaʼalajten jach nojoch in fe yoʼolal le baʼax tin beetoʼ».

Ka máan kʼiineʼ, Marc yéetel Paulaeʼ túuxtaʼaboʼob bey precursoroʼob especialoʼob tiʼ upʼéel múuchʼulil Canadá, tuʼux jach kʼaʼabéet áantaj. ¿Bix tu yuʼubilubaʼob yoʼolal le kʼeexoʼob tu beetoʼob ichil u kuxtaloʼoboʼ? Marqueʼ ku yaʼalik: «Le meyaj yanten kaʼachoʼ jach maʼalob yéetel jach úuch joʼopʼok in beetik, le oʼolaleʼ le ka tin pʼateʼ jach tin tuklaj, baʼaleʼ Jéeobaeʼ tu beetaj u bintoʼon utsil. Bejlaʼeʼ jach kiʼimak k-óol ikil k-áantik uláakʼ máakoʼob. K-meyajtik Jéeobaeʼ tsʼoʼok xan u yáantkoʼon utiaʼal k-bisikba maas maʼalob. Ken tsikbalnaken yéetel in wataneʼ mantatsʼ k-tʼaan tiʼ baʼaxoʼob yaan yil yéetel le meyaj k-tsʼáaik tiʼ Jéeobaoʼ, tumen letiʼe baʼaxoʼob maas taasik kiʼimak óolal tiʼ máakoʼ. Yéetel tsʼoʼok k-uʼuyik maas naatsʼ yaniloʼon tiʼ Jéeoba» (Hch. 20:35). Paulaeʼ ku yaʼalik xan: «U pʼatik máak upʼéel maʼalob meyaj bey xan upʼéel maʼalob najeʼ, ku beetik u maas kʼubik u yóol máak tiʼ Jéeoba. Lelaʼ letiʼe baʼax tsʼoʼok k-beetkoʼ, yéetel Jéeobaeʼ jach tsʼoʼok u yáantkoʼon.  Le sukuʼunoʼob teʼ múuchʼulil tuʼux yanoʼonoʼ jach utsoʼob t-éetel tsʼoʼoleʼ jach kiʼimak u yóoloʼob yéetel le meyaj k-beetikoʼ. Le tiempo kin máansik kaʼach tin meyajoʼ bejlaʼeʼ ku meyajten utiaʼal in wáantik uláakʼ máakoʼob u kʼaj óoltoʼob Dios. Jach kiʼimak in wóol ikil in meyajtik Jéeoba teʼ múuchʼulilaʼ».

Yaan taakʼin tiʼ kaʼach, baʼaleʼ minaʼan kiʼimak óolal tiʼ

Amy, tiʼ máax xan tʼaanajoʼon tu káajbaleʼ yaanal baʼax tu chʼaʼatuklaj u beetik. Letiʼeʼ, tu kʼamaj le meyaj tsʼaʼabtiʼoʼ yéetel joʼop u náajaltik yaʼab taakʼin. Letiʼeʼ ku yaʼalik: «Le yáax jaʼab tin máansaj teʼ meyajoʼ tin wilaj xan in jóokʼol kʼaʼaytaj mantatsʼ, baʼaleʼ ka máan kʼiineʼ káaj in máansik maas yaʼab tiempo táan in meyaj. Aʼalaʼab yaan u tsʼaʼabalten upʼéel maas maʼalob meyaj yéetel joʼopʼ in tsʼáaik in wóol utiaʼal u tsʼaʼabalten. Jeʼex binik in tsʼáaik in wóol teʼ meyajoʼ bey xan úuchik u bin in náachtal tiʼ Jéeoba, tak ka xuʼul in jóokʼol kʼaʼaytaj».

Amieʼ ku kʼaʼajsik le baʼax úuchtiʼoʼ: «Jach maʼalob in náajal kaʼachi. Mantatsʼ táan in viajar yéetel jach maʼalob in tratartaʼal yoʼolal le maʼalob meyaj yantenoʼ. Baʼaleʼ maʼ kiʼimak in wóoliʼ. Yéetel kex yanten taakʼineʼ yaʼab talamiloʼob xan yanten kaʼach. Kin tuklik kaʼach baʼaxten maʼ kiʼimak in wóoliʼ yéetel tin tsʼáaj cuentaeʼ úuchik in chʼíikil meyajeʼ óolak in xúumpʼat u kaajal Jéeoba. Le oʼolaleʼ, jeʼex u yaʼalik le Bibliaoʼ táan kaʼach in chupik in kuxtal yéetel yaayaj óolal» (1 Tim. 6:10).

¿Baʼax tu beetaj Amy? Letiʼeʼ ku yaʼalik: «Tin kʼáataj áantaj tiʼ le ancianoʼoboʼ yéetel káaj in bin tu kaʼatéen teʼ muchʼtáambaloʼoboʼ. Utéenjeakil le táan k-kʼaay teʼ muchʼtáambaloʼ, joʼopʼ in wokʼol le ka kʼaʼajten le kiʼimak óolal anchajten tiʼ le cinco jaʼaboʼob tin beetaj in precursorai kex maʼ jach yanten taakʼin kaʼachoʼ. Tin tsʼáaj cuenta jach kʼaʼabéet in kaʼa tsʼáaik táanil ichil in kuxtal le Reinooʼ yéetel kʼaʼabéet u xuʼulul in kaxtik ayikʼaliloʼob. Le beetik tin kʼáataj ka tsʼaʼabakten uláakʼ meyaj kex chéen ka in náajalt táanchumuk tiʼ le kin náajaltik kaʼachoʼ, yéetel káaj in jóokʼol kʼaʼaytaj tu kaʼatéen». Amieʼ, yéetel kiʼimak óolal ku yaʼalik: «Le jaʼaboʼob tin beetaj in precursorailoʼ jach tu taasajten kiʼimak óolal. Yéetel kex bejlaʼa maʼ precursoraeneʼ, jach kiʼimak in wóol, yanten upʼéel kiʼimak óolal maʼ anchajten le kaʼach in kʼubmimba chéen meyajoʼ».

Techeʼ, ¿jeʼel wa u páajtal xan a beetik kʼeexoʼob ichil a kuxtaleʼ? Wa ka beetkeʼ yaan u yantaltech maas yaʼab tiempo utiaʼal a meyajtik Jéeoba yéetel yaan u yantaltech kiʼimak óolal ichil a kuxtal (Pro. 10:22).

[Tsolajiloʼob]

[U tsolajil le oochel teʼ táan juʼun 19]

«Jach utschaj tin wich»

[U tsolajil le oochel teʼ táan juʼun 19]

David, utúul anciano kajaʼan tu Luʼumil Estados Unidoseʼ, u kʼáat kaʼach u beetuba precursor regular jeʼex u yatan yéetel u paalaleʼ. Utiaʼal u páajtal u beetikeʼ, tu kʼáataj ka chaʼabak u jóokʼol maas temprano tiʼ u meyaj, ka túun tu beetuba precursor. ¿Tu taasaj wa kiʼimak óolal tiʼ u beetik u precursori? Ka máan wa jaypʼéel mesoʼobeʼ, Davideʼ tu tsʼíibtaj tiʼ utúul u amigo: «Minaʼan uláakʼ baʼal maas ku taasikten kiʼimak óolal ke in maas meyajtik Jéeoba u múuchʼ yéetel in familia. Tin tuklaj jach talam u beetik máak u precursori, baʼaleʼ tin wilaj maʼ beyiʼ. Desde le yáax kʼiinoʼ jach utschaj tin wich».

[U tsolajil le oochel teʼ táan juʼun 19]

¿Jeʼel wa u páajtal a beetik kʼeexoʼob ichil a kuxtal utiaʼal a maas meyajtik Jéeobaeʼ?

[U tsolajil le oochel teʼ táan juʼun 18]

Marc yéetel Paula teʼ kʼaʼaytajoʼ