Ku náajmatikoʼob u yookloʼob tu Reino Dios

«Lelaʼ ku yeʼesikeʼ Jajal Dioseʼ toj [u] pʼis óol, ikil u tsʼáaikeʼex jeʼel bix máaxoʼob ku náajmatikoʼob u yookloʼob tu [reino] Jajal Dios.» (2 TES. 1:5.)

1, 2. ¿Baʼax pʼis óolalil u chʼaʼatukultmaj u beetik Dios, yéetel máax u yéeymaj utiaʼal leloʼ?

ÓOLIʼ tu jaʼabil 50 teʼ yáax siglooʼ, apóstol Pabloeʼ bin kʼaʼaytaj tu kaajil Atenas. Le táan u máan ichil le kaajoʼ tu yilaj yaan yaʼab jejeláas beetbil diosoʼobiʼ, le baʼax tu yiloʼ maʼ utschaj tu tʼaaniʼ yéetel le péeks u kʼaʼayt le maʼalob péektsil tiʼ le atenienseʼoboʼ. Le jach maʼalob kaʼansaj tu tsʼáajoʼ tu péeksaj u yóol le máaxoʼob maʼatech u meyajkoʼob Diosoʼ. Tu yaʼalajtiʼob: «Bejelaʼeʼ [Dioseʼ] ku yaʼalik tiʼ tuláakal máak tiʼ tuláakal tuʼuxeʼ, ka u kʼex u tuukuloʼob. Tumen Jajal Dioseʼ u tsʼaamaj jumpʼéel kʼiin ikil ku bin u pʼis óolt yóokʼol kaab yéetel tojil, tu yoʼolal juntúul máak u yéeymaj; lelaʼ tu jaajkúuntaj tu táan tuláakal máak ikil tu kaʼa púut kuxkintilak ichil le kimenoʼoboʼ» (Hch. 17:30, 31).

² K-ojéeltik u yéeymaj Dios upʼéel kʼiin utiaʼal u pʼis óoltaʼal le wíinikoʼoboʼ, upʼéel baʼal jach maʼ unaj u tuʼubul tiʼ máakiʼ. Baʼaleʼ, le tekstooʼ tu yeʼeseʼ Jéeobaeʼ u yéeymaj utúul máak utiaʼal u pʼis óoltik le wíinikoʼoboʼ. ¿Máax túuniʼ? Kex Pablo maʼ tu yaʼalaj u kʼaabaʼeʼ, k-ojleʼ Jesucristo. Yéetel le pʼis óolal ken u beetoʼ jeʼel u taasik kuxtal wa kíimil tiʼ le wíinikoʼoboʼ.

3. ¿Baʼax u beelal le pacto tu beetaj Jéeoba yéetel Abrahamoʼ, yéetel máax táakaʼan ichil utiaʼal u béeychajal le baʼax aʼalaʼan teʼ pactooʼ?

³ U Kʼiinil le Pʼis óoloʼ yaan u xáantal mil jaʼaboʼob, yéetel Jesús, u reyil u Reino Dioseʼ, letiʼe máax kun pʼis óol tu kʼaabaʼ Diosoʼ. Baʼaleʼ Jesuseʼ maʼ chéen tu juun kun pʼis óoliʼ. Jéeobaeʼ ku yéeyik máakoʼob way Luʼum utiaʼal ka reinarnakoʼob yéetel ka pʼis óolnakoʼob tu yéetel (ket yéetel Lucas 22:29, 30). Óoliʼ cuatro mil jaʼaboʼob tak bejlaʼeʼ, Jéeobaeʼ tu yaʼalaj yaan u yantal u Kʼiinil le Pʼis óol le ka tu beetaj upʼéel pacto yéetel Abrahamoʼ; le pactoaʼ káaj tu jaʼabil 1943 táanil tiʼ u taal Cristo (xokaʼak Génesis 22:17, 18). U jaajileʼ Abrahameʼ maʼ tu naʼataj baʼax utsiloʼob ken u taas le pacto tiʼ tuláakal le wíinikoʼoboʼ. Baʼaleʼ, bejlaʼeʼ le ken k-xok baʼax táakaʼanoʼob ichil le pactoaʼ, ku páajtal k-naʼatik u chʼiʼibal Abrahameʼ yaan baʼax yil yéetel bix kun béeychajal baʼax u chʼaʼatukultmaj u beetik Dios utiaʼal u pʼis óoltaʼal le wíinikoʼoboʼ.

4, 5. 1) ¿Máax le maas nojoch tiʼ le chʼiʼibal taal tiʼ Abrahamoʼ, yéetel baʼax tu yaʼalaj yoʼolal le Reinooʼ? 2) ¿Baʼax kʼiin ka káaj u tsʼaʼabal u páajtalil u yantal máak teʼ tu Reino Diosoʼ?

⁴ Jesuseʼ letiʼe maas nojoch tiʼ le chʼiʼibal aʼalaʼan kun taal tiʼ Abrahamoʼ, yéetel tu jaʼabil 29 teʼ yáax siglooʼ kʼuch u beetuba Mesíasi wa Cristo le ka yéeyaʼab yéetel le kiliʼich muukʼoʼ (Gal. 3:16). Ichil le óoxpʼéel jaʼaboʼob yéetel táanchumuk tsʼoʼokok u yéeyaʼaloʼ, Jesuseʼ jach tu kʼubaj u yóol  u kʼaʼayt u maʼalob péektsilil le Reino tiʼ le judíoʼoboʼ. Le ka tsʼoʼok u kʼalaʼal Juan Bautistaeʼ, Jesuseʼ tu yaʼaleʼ yaan uláakʼ máakoʼob kun yantaltiʼob u páajtalil u táakpajloʼob tu Reino Dios, letiʼeʼ tu yaʼalaj: «Káajik le kʼiin ka taal Juan Bautista tak bejelaʼeʼ, u [reinoi] kaʼaneʼ ku chʼaʼabal yéetel muukʼ, le máaxoʼob muʼukʼaʼantakoʼoboʼ u kʼáatoʼob utiaʼalintoʼob» (Mat. 11:12).

⁵ Táanil tiʼ u tʼaan tiʼ le máaxoʼob «u kʼáatoʼob utiaʼalintoʼob» u Reinoi kaʼaneʼ, Jesuseʼ tu yaʼalaj le tʼaanoʼobaʼ: «Tu jaajil kin waʼalik tiʼ teʼex, tiʼ ichil tuláakal le máaxoʼob tsʼoʼok u síijiloʼob tak bejelaʼaʼ, mix máak [maas] nojoch tiʼ Juan Bautista; baʼaleʼ le [maas] chichan tu [reinoi] kaʼaneʼ [maas] nojoch tiʼ letiʼ» (Mat. 11:11). ¿Baʼaxten tu yaʼalaj lelaʼ? Tumen u páajtalil u yantal máak tu Reino Dioseʼ káaj u tsʼaʼabal teʼ Pentecostés tiʼ u jaʼabil 33 teʼ yáax siglo, le ka yéeyaʼab yéetel kiliʼich muukʼ chéen le máaxoʼob ku chúukpajal u yóol u meyajtoʼob Diosoʼ, yéetel teʼ kʼiinoʼob jeʼeloʼ tsʼokaʼaniliʼ u kíimil Juan Bautistaeʼ (Hch. 2:1-4).

Dioseʼ ku kʼamik u chʼiʼibaloʼob Abraham

6, 7. 1) ¿Baʼaxten aʼalaʼab tiʼ Abraham yaan u yaʼabtal u chʼiʼibaloʼob «jeʼel bix sen yaʼabil u eekʼiloʼob le kaʼanoʼ»? 2) ¿Baʼax utsiloʼob tu kʼamaj Abraham, yéetel baʼax utsiloʼob ku kʼamik xan u chʼiʼibaloʼ?

⁶ Tiʼ Abrahameʼ aʼalaʼab u chʼiʼibaleʼ yaan u sen yaʼabtal «jeʼel bix sen yaʼabil u eekʼiloʼob le kaʼanoʼ» yéetel jeʼex u «saʼam luʼumil u jáal kʼáaʼnáabeʼ» (Gén. 13:16; 22:17). Lelaʼ u kʼáat u yaʼaleʼ, tu kʼiiniloʼob Abrahameʼ mix máak jeʼel u páajtal u yaʼalik kaʼach jach jaytúul le máakoʼob kun binoʼob kaʼan ku taaloʼob tiʼ u chʼiʼibaloʼ. Baʼaleʼ, ka máan kʼiineʼ ojéeltaʼabeʼ le chʼiʼibaloʼ maʼ chéen Jesusiʼ, baʼaxeʼ táakaʼan 144,000 uláakʼ máakoʼob (Apo. 7:4; 14:1).

⁷ Le Bibliaoʼ ku yaʼalik: «Abrameʼ tu yoksaj óoltaj u tʼaan Yuumtsil, tu yoʼolal leloʼ kʼaʼam Abram tumen Yuumtsil bey [toj] beel wíinikeʼ» (Gén. 15:5, 6). U jaajileʼ mix máak ku beetik tuláakal baʼax toj (Sant. 3:2). Baʼaleʼ tumen Abraham nojoch kaʼach u fejeʼ, Jéeobaeʼ tu kʼamaj bey utúul máak jach tojeʼ yéetel kʼuch u yil xan bey u amigoeʼ (Isa. 41:8). Jesús yéetel le uláakʼ máaxoʼob táakpajaʼanoʼob ichil u chʼiʼibal Abraham aʼalaʼanoʼ, tsʼoʼok xan u kʼaʼamloʼob tumen Dios bey máakoʼob jach tojoʼobeʼ, yéetel leloʼ ku taasiktiʼob maas yaʼab utsiloʼob ke le tu kʼamaj Abrahamoʼ.

8. ¿Baʼax utsiloʼob ku kʼamik le máaxoʼob táakpajaʼanoʼob ichil u chʼiʼibal Abraham kun binoʼob kaʼanoʼ?

⁸ Le máaxoʼob yéeyaʼanoʼoboʼ ku kʼaʼamloʼob tumen Dios bey máakoʼob jach tojoʼob ikil u tsʼáaik u fejoʼob tiʼ u kuxtal Jesús tu kʼubajoʼ (Rom. 3:24, 28). Jéeobaeʼ ku saʼatsik u kʼebanoʼob, le oʼolal ku páajtal u yéeyaʼaloʼob yéetel kiliʼich muukʼ utiaʼal u beetikubaʼob u paalaloʼob Dios yéetel u sukuʼunoʼob Cristo (Juan 1:12, 13). Tsʼoʼoleʼ, ku táakpajloʼob xan tiʼ le túumben pactooʼ yéetel ku kʼaabaʼintaʼaloʼob «u Israel Jajal Dios» (Gál. 6:16, LTN; Luc. 22:20). ¡Jach túun kiʼimak u yóoloʼob yoʼolal le meyaj tsʼaʼantiʼoboʼ! Yoʼolal tuláakal le baʼax ku beetik Dios tu yoʼolaloʼoboʼ, le sukuʼunoʼob yéeyaʼanoʼoboʼ maʼ tu páaʼtik u pʼáatloʼob kuxtal utiaʼal minaʼan u xuul way Luʼumeʼ. Baʼaxeʼ, le jatsʼuts páajtalilaʼ ku pʼatkoʼob utiaʼal u múul meyajoʼob yéetel Cristo tu Kʼiinil le Pʼis óoloʼ bey xan u gobernaroʼob tu yéetel teʼ kaʼanoʼ (xokaʼak Romailoʼob 8:17).

9, 10. 1) ¿Baʼax kʼiin ka yáax yéeyaʼab yéetel kiliʼich muukʼ le cristianoʼoboʼ, yéetel baʼax ken u aktáantoʼob kaʼach? 2) ¿Baʼax áantajil tsʼaʼab tiʼ le máaxoʼob yéeyaʼanoʼoboʼ?

⁹ Teʼ Pentecostés tu jaʼabil 33, ciento veinte  xiiboʼob yéetel koʼoleloʼob ku meyajtkoʼob Dioseʼ tsʼaʼabtiʼob u páajtalil u yantaloʼob ichil le máaxoʼob kun gobernaroʼob yéetel Jesús tu Kʼiinil le Pʼis óoloʼ. Le disipuloʼobaʼ letiʼe máaxoʼob yáax yéeyaʼaboʼob yéetel kiliʼich muukʼoʼ yéetel bey anchajik u páajtalil tiʼob u binoʼob kaʼanoʼ. Baʼaleʼ leloʼ maʼ u kʼáat u yaʼal wa tsʼoʼok kaʼach u náajaltkoʼob u binoʼob kaʼaniʼ. Desde teʼ kʼiin jeʼeloʼ, Satanaseʼ yaan u beetik u chʼaʼapachtaʼaloʼob, yéetel letiʼobeʼ unaj u chúukpajal u yóol u meyajtoʼob Jéeoba. Wa ku chúukpajal u yóoloʼobeʼ yaan u tsʼaʼabaltiʼob túun u coronai le kuxtaloʼ (Apo. 2:10).

¹⁰ Utiaʼal u chúukpajal u yóol le máaxoʼob yéeyaʼanoʼoboʼ, tiʼ Jéeobaeʼ meyajnaj le múuchʼuliloʼ bey xan le Biblia utiaʼal u tsʼáaiktiʼob tsolnuʼukoʼob yéetel u líiʼsik u yóoloʼob. Le apóstol Pablooʼ tu tsʼíibtaj tiʼ le sukuʼunoʼob yéeyaʼanoʼob yanoʼob Tesalónicaoʼ: «T-líiʼkʼsaj u yóol yéetel t-kiʼimakkunsaj u yóol jujuntúul tiʼ teʼex, jeʼel bix u beetik juntúul taatatsil yéetel u paalaloʼobeʼ. K-kʼubentmajteʼex ka kuxlakeʼex jeʼel bix unaj u kuxtal le máaxoʼob utiaʼaloʼob Jajal Diosoʼ, máax tʼaneʼex utiaʼal ka táakpajkeʼex tiʼ u [reino] yéetel tiʼ u nojbeʼenil» (1 Tes. 2:11, 12).

11. ¿Baʼaxoʼob tu beetaj u tsʼíibtaʼal Jéeoba utiaʼal le máaxoʼob yéeyaʼanoʼob utiaʼal u binoʼob kaʼanoʼ?

¹¹ Desde teʼ Pentecostés tu jaʼabil 33 le ka yéeyaʼab le yáax cristianoʼoboʼ, Jéeobaeʼ tu yilaj u kʼaʼabéetil u tsʼíibtaʼal le meyaj tu beetaj Jesús ka taal way Luʼumeʼ. Tu chʼaʼatuklaj xan ka tsʼíibtaʼak bix tu bisiluba Letiʼ yéetel le máaxoʼob yéeyaʼanoʼob teʼ yáax siglooʼ, bey xan le tsolnuʼukoʼob tu tsʼáajtiʼoboʼ. Le oʼolal tu beetaj u tsʼíibtaʼal le Kiliʼich Tsʼíiboʼob ich Griegooʼ. Leloʼobaʼ nupaʼaboʼob yéetel le Kiliʼich Tsʼíiboʼob ich Hebreooʼ. Le Kiliʼich Tsʼíiboʼob ich Hebreooʼ tsʼíibtaʼaboʼob chéen utiaʼal le israelitaʼob tiʼ le kʼiinoʼob táan u biskubaʼob kaʼach yéetel Diosoʼ. Yéetel le Kiliʼich Tsʼíiboʼob ich Griegooʼ tsʼíibtaʼaboʼob utiaʼal «u Israel Jajal Dios», wa le máaxoʼob yéeyaʼanoʼob kun kʼuchul u beetubaʼob u sukuʼunoʼob Cristo yéetel u paalaloʼob Dios. Baʼaleʼ jeʼex le máaxoʼob maʼ israelitaʼob kaʼach ku jóoʼskoʼob yaʼab utsiloʼob ikil u xokkoʼob le Kiliʼich Tsʼíiboʼob ich Hebreooʼ, bey xan le máaxoʼob maʼ yéeyaʼanoʼob utiaʼal u binoʼob kaʼanoʼ ku jóoʼskoʼob xan yaʼab utsiloʼob ikil u xokkoʼob yéetel u beetikoʼob le baʼax ku yaʼalik le Kiliʼich Tsʼíiboʼob ich Griegooʼ (xokaʼak 2 Timoteo 3:15-17).

12. ¿Baʼax kʼaʼabéetchaj u kʼaʼajsik Pablo tiʼ le sukuʼunoʼob yéeyaʼanoʼoboʼ?

¹² Le sukuʼunoʼob teʼ yáax siglooʼ kʼaʼamoʼob tumen Dios yéetel yéeyaʼaboʼob tumen le kiliʼich muukʼ utiaʼal ka xiʼikoʼob gobernar yéetel Cristo ken kʼuchuk u kʼiiniloʼ; baʼaleʼ lelaʼ maʼ u kʼáat u yaʼal wa jeʼel u páajtal u gobernaroʼob kaʼach yóokʼol u sukuʼunoʼob yéeyaʼanoʼob xanoʼ. Baʼaleʼ yaan jujuntúul tiʼ letiʼobeʼ maʼ bey tu naʼatiloʼobiʼ, tumen joʼopʼ u taaskubaʼob bey reyoʼob yóokʼol u sukuʼunoʼob yéeyanoʼob xanoʼ. Le oʼolal Pabloeʼ tu yaʼalajtiʼob: «Tsʼoʼok a ayikʼaltaleʼex yéetel tsʼoʼok u yantalteʼex tuláakal baʼax ku páajtal a tsʼíiboltikeʼex. [Rey] a wuʼuykabaʼex, toʼon túuneʼ tsʼoʼok a pʼatikoʼoneʼex juntséelil. ¡Kexiʼ wa [reyeʼexeʼ] utiaʼal ka páatak k-táakpajal tiʼ a [reinoʼex]!» (1 Cor. 4:8). Tsʼoʼoleʼ tu yaʼalaj xan tiʼob: «Maʼ tumen k-kʼáat okes ta wóoleʼex yéetel muukʼ baʼax unaj a woksaj óoltikeʼe[xiʼ], [...] baʼax ku yúuchuleʼ toʼoneʼ k-kʼáat áanteʼex utiaʼal ka yanakteʼex u maas yaʼabil kiʼimak óolal» (2 Cor. 1:24).

Bix u chúukpajal le máaxoʼob kun gobernar yéetel Cristooʼ

13. ¿Bix binik u yéeyaʼal le máaxoʼob kun binoʼob kaʼan desde tu jaʼabil 33?

¹³ Le 144,000 máaxoʼob kun binoʼob kaʼanoʼ maʼ chúukpajoʼob teʼ yáax siglooʼ. Káaj u yéeyaʼaloʼob tu kʼiinil le apostoloʼoboʼ yéetel maʼ xuʼul u beetaʼaliʼ. Yéetel kex tumen tiʼ le jaʼaboʼob tsʼoʼok u máanoʼob maʼ sen yaʼab máaxoʼob yéeyaʼaboʼobeʼ, bejlaʼeʼ láayliʼ yaan máaxoʼob táan u yéeyaʼaloʼobeʼ (Mat. 28:20). Desde ka káaj u reinar Jesús teʼ kaʼan tu jaʼabil 1914, yaʼab baʼaloʼob joʼopʼ u yúuchloʼob.

14, 15. Teʼ kʼiinoʼobaʼ, ¿bix tsʼoʼok u seguer u yéeyaʼal le máaxoʼob kun binoʼob kaʼanoʼ?

¹⁴ Yáax baʼax úucheʼ, Jesuseʼ tu luʼsaj teʼ kaʼan tuláakal le máaxoʼob ku binoʼob tu contra u gobierno Diosoʼ (xokaʼak Apocalipsis 12:10, 12). Ka tsʼoʼokeʼ tu yilaj ka yéeyaʼak u yalab le 144,000 máakoʼob kun reinaroʼob tu yéeteloʼ. Óoliʼ tu jaʼabiloʼob 1935 ilaʼab tsʼoʼok u yaʼabtal kaʼach le máaxoʼob  yéeyaʼanoʼoboʼ, tumen yaʼab tiʼ le máaxoʼob ku kʼamik kaʼach le maʼalob péektsiloʼ maʼ tu páaʼtik u binoʼob kaʼan. Le kiliʼich muukʼoʼ maʼ tu chíikbesik kaʼach wa yéeyaʼanoʼob (ket yéetel Romailoʼob 8:16). Baʼaleʼ, le máakoʼobaʼ ku yaʼalikoʼobeʼ táakpajaʼanoʼob tiʼ le «uláakʼ tamanoʼo[boʼ]», wa le máaxoʼob ku páaʼtik u pʼáatloʼob kuxtal utiaʼal mantatsʼ way Luʼumeʼ (Juan 10:16). Le oʼolaleʼ desde tu jaʼabil 1935, le kʼaʼaytajoʼ maases beetaʼab utiaʼal u muchʼkíintaʼal le «yaʼabkach máakoʼob» maʼ kun kíimloʼob le ken tsʼoʼokok le «nojoch yaayaj óolal», jeʼex tsʼaʼabik u yil le apóstol Juan tiʼ upʼéel náayoʼ (Apo. 7:9, 10, 14).

¹⁵ Baʼaleʼ, desde tu jaʼabiloʼob 1930 yaan jujuntúul máakoʼob tsʼoʼok u yéeyaʼaloʼob. ¿Baʼaxten? Yaan kʼiineʼ tumen táan u jeelintaʼal le máaxoʼob yéeyaʼanoʼob kaʼach tsʼoʼok u xuʼulul u meyajtkoʼob Diosoʼ (ket yéetel Apocalipsis 3:16). Jeʼex teʼ yáax siglooʼ, Pabloeʼ tu kʼaj óoltaj jujuntúul máaxoʼob xuʼul u meyajtkoʼob Dios (Fili. 3:17-19). Baʼaleʼ, ¿máaxoʼob ken u yéey Jéeoba utiaʼal u jeelintik le máakoʼobaʼ? U jaajileʼ leloʼ chéen letiʼ u yojel. Baʼaleʼ letiʼeʼ maʼ ken u yéey máaxoʼob maʼ úuch joʼopʼok u meyajkoʼobiʼ, baʼaxeʼ sukuʼunoʼob úuch joʼopʼok u meyajkoʼob yéetel tsʼoʼok u yeʼeskoʼob chúukaʼan u yóoloʼob tiʼ. Bey úuchik yéetel le disipuloʼob yanchajoʼob yéetel Jesús teʼ áakʼab le ka tu beetaj le Kʼiimbesajiloʼ (Luc. 22:28). *

16. ¿Baʼaxten kiʼimak k-óol yoʼolal le sukuʼunoʼob yéeyaʼanoʼoboʼ, yéetel baʼax jach k-ojel kun úuchul?

¹⁶ Baʼaleʼ, maʼ tuláakal le máaxoʼob ku yéeyaʼaloʼob desde tu jaʼabiloʼob 1930 táan u jeelintikoʼob le máaxoʼob yéeyaʼanoʼob kaʼach tsʼoʼok u xuʼulul u meyajtkoʼob Diosoʼ. Leloʼ u kʼáat yaʼaleʼ Jéeobaeʼ u kʼáat ka yanak sukuʼunoʼob yéeyaʼanoʼob ichil u kaajal teʼ tsʼook kʼiinoʼobaʼ, tak le ken kʼuchuk u kʼiinil u xuʼulsaʼal tiʼ le «nojoch Babilonia[oʼ]» (Apo. 17:5). * Yéetel k-ojeleʼ le ken kʼuchuk le kʼiin u yaʼalmaj Diosoʼ, yaan u chúukpajal le 144,000 máaxoʼob yéeyaʼanoʼoboʼ yéetel yaan u yantaloʼob teʼ kaʼan utiaʼal u beetik u reyiloʼoboʼ. K-ojel xaneʼ, jeʼex u yaʼalik le Bibliaoʼ, le «yaʼabkach máakoʼoboʼ» yaan u yeʼeskoʼob chúukaʼan u yóoloʼob tiʼ Jéeoba. Maʼ kun xáantaleʼ letiʼobeʼ yaan u pʼáatloʼob kuxaʼanil le ken tsʼoʼokok le «nojoch yaayaj óolal» kun taal yóokʼol u kʼasaʼan yóokʼol kaab Satanasoʼ, yéetel yaan u máanoʼob teʼ túumben yóokʼol kaaboʼ.

¡Jach taʼaytak u chúukpajal le máaxoʼob kun gobernaroʼob yéetel Cristo teʼ kaʼanoʼ!

17. Jeʼex u yaʼalik 1 Tesalonicailoʼob 4:15-17 yéetel Apocalipsis 6:9-11, ¿baʼax tsʼoʼok u yúuchul yéetel le yéeyaʼanoʼob chúukpaj u yóoloʼob tak teʼ kíimiloʼ?

¹⁷ Desde tu jaʼabil 33 teʼ yáax siglooʼ, u milesi le máaxoʼob yéeyaʼanoʼoboʼ, tsʼoʼok u yeʼeskoʼob jach nojoch u fejoʼob yéetel tsʼoʼok u chúukpajal u yóoloʼob tiʼ Jéeoba tak teʼ kíimiloʼ. Letiʼobeʼ tsʼoʼok u náajmatikoʼob u yokloʼob tu Reino Dios. Yéetel desde teʼ yáax jaʼaboʼob káajak u gobernar Cristo ka joʼopʼ u binoʼob kaʼanoʼ (xokaʼak 1 Tesalonicailoʼob 4:15-17; Apocalipsis 6:9-11).

18. 1) Le sukuʼunoʼob yéeyaʼanoʼob pʼaatloʼob way Luʼumeʼ, ¿baʼax jach u yojloʼob? 2) Le uláakʼ tamanoʼoboʼ, ¿baʼax ku tuklikoʼob yoʼolal le páajtalil tsʼaʼan tiʼ le sukuʼunoʼob yéeyaʼanoʼoboʼ?

 ¹⁸ Le sukuʼunoʼob yéeyaʼanoʼob pʼaatloʼob way Luʼumeʼ u yojloʼobeʼ wa ku chúukpajal u yóol u meyajtoʼob Dioseʼ, maʼ kun xáantaleʼ yaan u binoʼob kaʼan. U millonesi le uláakʼ tamanoʼoboʼ, ku yilkoʼob le fe yaan tiʼ le sukuʼunoʼobaʼ yéetel ku yaʼalikoʼob xan le tʼaanoʼob tu yaʼalaj le apóstol Pablo tiʼ le sukuʼunoʼob yéeyaʼanoʼob yanoʼob Tesalónicaoʼ: «Toʼoneʼ k-tʼaan ta woʼolaleʼex yéetel le oksaj óolal tiʼ u [múuchʼulil] Yuum Jajal Dios, tu yoʼolal le chowak óolaloʼ yéetel le oksaj óolal [ka] weʼesikeʼex teʼexoʼ ichil tuláakal le chʼaʼapachtajiloʼoboʼ yéetel ichil le yaayaj óolaloʼob ka mukʼyajtikeʼexoʼ. Lelaʼ ku yeʼesikeʼ Jajal Dioseʼ toj [u] pʼis óol, ikil u tsʼáaikeʼex jeʼel bix máaxoʼob ku náajmatikoʼob u yookloʼob tu [reino] Jajal Dios. Tu yoʼolal le [reinoaʼ] táan a mukʼyajeʼex» (2 Tes. 1:3- 5). Le ken kʼuchuk u kʼiinil u kíimil u tsʼook tiʼ le máaxoʼob yéeyaʼanoʼoboʼ, tiʼ jeʼel baʼalak kʼiinil ka úuchkeʼ, yaan u pʼáatal chúukaʼan teʼ kaʼan le máaxoʼob kun gobernar yéetel Cristooʼ. Lelaʼ, ¡jach túun yaan u taasik kiʼimak óolal tiʼ le máaxoʼob yanoʼob teʼ kaʼan bey xan tiʼ le máaxoʼob yanoʼob way Luʼumeʼ!

[Tsolajiloʼob]

¿A wojel wa u núukil?

• ¿Baʼax u yaʼalmaj Jéeoba tiʼ Abraham yaan yil yéetel u Kʼiinil le Pʼis óoloʼ?

• ¿Baʼaxten kʼaʼam Abraham bey utúul máak jach toj tumen Jéeobaeʼ?

• ¿Baʼax utsiloʼob ku kʼamik u chʼiʼibal Abraham ikil u kʼaʼamloʼob tumen Dios bey máakoʼob jach tojoʼobeʼ?

• ¿Baʼax jach k-ojel kun úuchul?

[U kʼáatchiʼiloʼob le xookoʼ]

[U tsolajil le oochel teʼ táan juʼun 20]

Jesuseʼ tu yaʼalaj tiʼ u disipuloʼob ka chúukpajak u yóoloʼob utiaʼal ka u náajmat u yantaloʼob teʼ Reinooʼ

[U tsolajil le oochel teʼ táan juʼun 21]

Teʼ Pentecostés tu jaʼabil 33, Jéeobaeʼ káaj u yéeyik le uláakʼ máaxoʼob táakpajaʼanoʼob tu chʼiʼibal Abrahamoʼ

[U tsolajil le oochel teʼ táan juʼun 23]

Le uláakʼ tamanoʼoboʼ jach kiʼimak u yóoloʼob tumen láayliʼ yaan sukuʼunoʼob yéeyaʼanoʼob pʼaatloʼob way Luʼum teʼ tu tsʼook kʼiinoʼobaʼ