Kʼáatchiʼob ku beetaʼal

Le ka tʼaanaj Pablo tiʼ «u tsʼaʼabal kʼab tu yóokʼol le j-oksaj óoloʼoboʼ», ¿táan wa u tʼaan tiʼ u tsʼaʼabal u beet máak u ancianoi, wa tiʼ yaanal baʼal? (Heb. 6:2).

Le tʼaanaʼ teʼ Bibliaoʼ yaan tuʼux ku meyaj utiaʼal u yúuchul tʼaan tiʼ u tsʼaʼabal u beet máak upʼéel meyaj tu kaajal Dios, baʼaleʼ teʼ tekstoaʼ maʼ xaaneʼ Pabloeʼ táan kaʼach u tʼaan tiʼ u tsʼaʼabal kʼab tu yóokʼol le j-oksaj óoloʼob utiaʼal ka u kʼamoʼob kiliʼich muukʼoʼ.

Jeʼex le maʼ yaʼab u bin utiaʼal u kíimloʼ, «Moiseseʼ tu tsʼáaj u kʼab yóokʼol Josué» utiaʼal u tsʼáaiktiʼ u páajtalil u nuʼuktik le israelitaʼoboʼ (Deu. 34:9). Teʼ yáax siglo xanoʼ, tsʼaʼab kʼab tu yóokʼol jujuntúul sukuʼunoʼob utiaʼal ka u beetoʼob meyajoʼob teʼ múuchʼuliloʼ (Hch. 6:6; 1 Tim. 4:14). Tiʼ le jeʼel táan xan kaʼach u tʼaan Pablo le ka tu yaʼalaj tiʼ Timoteo maʼ u séeb tsʼáaik u kʼab yóokʼol wa máaxoʼ (1 Tim. 5:22).

Baʼaleʼ teʼ carta tu túuxtaj tiʼ le Hebreoʼoboʼ, Pabloeʼ táan kaʼach u yaʼalik tiʼ le sukuʼunoʼob ka «máan[koʼob] táanil tiʼ chúukaʼan naʼatil, LTN», tumen tsʼoʼok kaʼach u pʼatkoʼob «le yáax kaʼansajoʼob[oʼ]». Ka tsʼoʼokeʼ tʼaanaj tiʼ «le u kʼexik u tuukul máak tu yóokʼol le meyajoʼob ku bisikoʼob máak tiʼ kíimiloʼ, le u yoksaj óoltaʼal Jajal Diosoʼ, le kaʼansajoʼob tu yóokʼol le okjaʼoʼ, le u tsʼaʼabal kʼab tu yóokʼol le j-oksaj óoloʼoboʼ» (Heb. 6:1, 2). Le u tsʼaʼabal u beet máak u ancianoiloʼ, ¿táakaʼan wa túun ichil le yáax kaʼansajoʼob unaj u pʼataʼal utiaʼal ka máankoʼob táanil tiʼ chúukaʼan naʼatil le máaxoʼob meyajtik Diosoʼ? Maʼatech. U beetik u ancianoi máakeʼ upʼéel jatsʼuts meyaj ku tsʼaʼabal tiʼ le sukuʼunoʼob tsʼoʼok u yiijtal u naʼatoʼoboʼ, yéetel mantatsʼ unaj u kanáantkoʼob utiaʼal maʼ u peʼertikoʼob (1 Tim. 3:1).

Baʼaleʼ yaan xan uláakʼ baʼax oʼolal tsʼaʼab kʼab tu yóokʼol le j-oksaj óoloʼoboʼ. Teʼ yáax siglooʼ, Jéeobaeʼ xuʼul u kʼamik Israel bey u kaajaleʼ ka tu yéeyaj upʼéel túumben kaaj, lelaʼ letiʼe máaxoʼob yéeyaʼaboʼob utiaʼal u binoʼob kaʼanoʼ (Mat. 21:43; Hch. 15:14; Gal. 6:16). Le úuchik u tsʼaʼabal kiliʼich muukʼ tiʼ jujuntúul sukuʼunoʼob utiaʼal u tʼankoʼob jejeláas tʼaanoʼobeʼ, le eʼes tsʼoʼok kaʼach u yéeyik Jéeoba upʼéel túumben kaaj (1 Cor. 12:4-11). Jeʼex le ka tu kʼamaj Cornelio yéetel u familia le maʼalob péektsiloʼ tu kʼamajoʼob xan kiliʼich muukʼ, ka káaj u tʼaanoʼob «ichil jejeláas tʼaanoʼob» (Hch. 10:44-46).

Úuchjeakileʼ ku tsʼaʼabal xan kʼab tu yóokʼol máak utiaʼal ka u kʼam u páajtalil u beetik milagroʼob. Le ka tu kʼaʼaytaj Felipe le maʼalob péektsil tu kaajil Samariaoʼ, yaʼab máakoʼob okjaʼanajoʼob. Le Cuerpo Gobernante túunoʼ tu túuxtaj apóstol Pedro yéetel Juan teʼeloʼ. ¿Baʼax oʼolal? Le Bibliaoʼ ku yaʼalik: «Tu tsʼáaj u kʼaboʼob tu yóokʼoloʼobeʼ ka tu kʼamajoʼob Kiliʼich [muukʼ]». Lelaʼ u kʼáat u yaʼaleʼ tsʼaʼabtiʼob u páajtalil u beetkoʼob milagroʼob. K-aʼalik lelaʼ tumen Simón, utúul mago kaʼacheʼ, ka tu yilaj baʼax ku páajtal u beetaʼal yéetel le kiliʼich muukʼoʼ tu yaʼalaj u manik u páajtalil u tsʼáaik xan u kʼab yóokʼol uláakʼoʼob utiaʼal ka u beetoʼob milagroʼob (Hch. 8:5-20). Ka máan kʼiineʼ okjaʼanaj doce disipuloʼob tu múuchʼulil Éfeso. Le Bibliaoʼ ku yaʼalik: «Le ka tu tsʼáaj Pablo u kʼab tu yóokʼoloʼobeʼ, Kiliʼich [muukʼ] taal tu yóokʼoloʼob, ka tʼaanajoʼob tiʼ jejeláas tʼaanoʼob ka tu tsikbaltajoʼob péektsiloʼob tu kʼamajoʼob tiʼ Jajal Dios» (Hch. 19:1-7; ketaʼak yéetel 2 Timoteo 1:6).

Le oʼolal tu tekstoi Hebreob 6:2, maʼ xaaneʼ Pabloeʼ táan kaʼach u tʼaan tiʼ u tsʼaʼabal kʼab yóokʼol le máaxoʼob maʼ úuch okjaʼanakoʼoboʼ utiaʼal ka u beetoʼob milagroʼob yéetel u yáantaj le kiliʼich muukʼoʼ.