Maʼ unaj k-chaʼik k-nuʼuktaʼal tumen u espíritu le yóokʼol kaabaʼ
Maʼ unaj k-chaʼik k-nuʼuktaʼal tumen u espíritu le yóokʼol kaabaʼ
«Toʼoneʼ maʼ t-kʼamaj u pixan [wa u espíritu] yóokʼol kaabiʼ baʼaleʼ le [kiliʼich muukʼ, NM] ku taal tiʼ Jajal Diosoʼ.» (1 COR. 2:12.)
1, 2. 1) Tu luʼumil Gran Bretañaeʼ, ¿baʼaxten aʼalaʼab ka yanak mejen canarioʼob teʼ minaʼoboʼ? 2) ¿Baʼax talamil k-aktáantik xan bejlaʼeʼ?
TU JAʼABIL 1911, u gobiernoi Gran Bretañaeʼ tu tsʼáaj upʼéel ley tuʼux ku yaʼalik baʼax unaj u beetaʼal utiaʼal u kanáantaʼal le máaxoʼob ku meyajoʼob teʼ minaʼoboʼ. Aʼalaʼab ka yanak kaʼatúul mejen canarioʼob tiʼ tuláakal le minaʼoboʼ. ¿Baʼaxten? Tumen wa ku joʼopʼol u yelel le minaoʼ, le máaxoʼob kun bin áantik le yanoʼob ichiloʼ, yaan u biskoʼob le mejen chʼíichʼoʼoboʼ. Wa le iikʼ yaan teʼ mina ku káajal u pʼáatal maʼ patal utiaʼal u kuxtal máakeʼ, le mejen chʼíichʼoʼoboʼ ku joʼopʼol u saʼatal u yóoloʼob tak ken lúubkoʼob. Le baʼax ku yúuchul tiʼ le chʼíichʼoʼoboʼ ku yeʼesik kʼaʼabéet u séeb jóokʼol le máakoʼoboʼ. Le iikʼ maʼ patal yéetel maʼ jelaʼan xan u bookoʼ ku beetik u kuʼupul u yiikʼ máak. Wa maʼ yoʼolal le baʼax ku yúuchul tiʼ le mejen chʼíichʼoʼoboʼ le máaxoʼob yanoʼob teʼ minaoʼ jeʼel u saʼatal u yóoloʼobeʼ wa tak u kíimloʼob, tsʼoʼoleʼ maʼ ken u tsʼaʼob cuenta kaʼach wa maʼ patal le iikʼoʼ.
2 Bejlaʼeʼ yantoʼon upʼéel talamil jeʼex le máaxoʼob ku meyajoʼob tiʼ le minaʼoboʼ. ¿Baʼaxten k-aʼalik lelaʼ? Le ka tu yaʼalaj Jesús tiʼ u disipuloʼob ka u kʼaʼaytoʼob le maʼalob péektsiloʼ, u yojel kaʼach yaan u yantaloʼob tiʼ u yóokʼol kaab Satanás tuʼux le baʼaloʼob kʼaastak ku beetaʼaloʼ ku keʼetel yéetel upʼéel iikʼ maʼ patal xaniʼ (Mat. 10:16; 1 Juan 5:19). Tumen maʼ u kʼáat ka úuchuk mix baʼal tiʼ u disipuloʼobeʼ Jesuseʼ tu kʼáataj tiʼ u Taata: «Maʼ táan in kʼáatiktech ka a lukʼesoʼob tiʼ le yóokʼol kaabaʼ, táan in kʼáatik ka a tokoʼob tiʼ kʼasilbaʼal» (Juan 17:15).
3, 4. ¿Baʼax tu yaʼalaj Jesús tiʼ u disipuloʼob, yéetel baʼaxten unaj k-chʼaʼik en cuentai xan bejlaʼeʼ?
3 Jesuseʼ tu yaʼalaj ka k-kanáant maʼ u náayal k-óol, tumen leloʼ jeʼel u beetik k-kíimileʼ. Bejlaʼa kuxaʼanoʼon teʼ tsʼook kʼiinoʼobaʼ, jach jeʼel u yáantkoʼon le baʼax tu yaʼalaʼ: «Pʼil a wicheʼex [...] utiaʼal ka páatak a tokikabaʼex tiʼ tuláakal baʼal kun úuchlaʼ bey xan utiaʼal ka páatak a wantaleʼex tu táan u Paal Máak» (Luc. 21:34-36). Jesuseʼ tu yaʼalaj xan tiʼ u disipuloʼob yaan u tsʼaʼabaltiʼob kiliʼich muukʼ utiaʼal u kʼaʼajskoʼob le baʼax tsʼoʼok u kankoʼoboʼ, utiaʼal ka pʼil ichnakoʼob mantatsʼ yéetel utiaʼal maʼ u lúubuloʼob tu táabsajiloʼob le Kʼaasilbaʼaloʼ (Juan 14:26).
4 ¿Kux túun toʼon? ¿Jeʼel wa u tsʼaʼabal xan toʼon kiliʼich muukʼeʼ? Wa beyoʼ, ¿baʼax unaj k-beetik utiaʼal ka tsʼaʼabaktoʼon? Yéetel ¿baʼax le u espíritu le yóokʼol kaabaʼ, baʼax ku túulchʼintik máak u beete yéetel baʼax unaj k-beetik utiaʼal maʼ u táabskoʼon? (Xokaʼak 1 Corintoiloʼob 2:12.)
Le kiliʼich muukʼoʼ yéetel u espíritu le yóokʼol kaabaʼ
5, 6. ¿Tiʼ baʼax ku yáantkoʼon le kiliʼich muukʼoʼ, baʼaleʼ baʼax unaj k-beetik utiaʼal k-kʼamik?
5 Le kiliʼich muukʼoʼ maʼ tsʼaʼab chéen tiʼ le sukuʼunoʼob teʼ yáax siglooʼ, tak tiʼ toʼon ku tsʼaʼabal bejlaʼeʼ. Le kiliʼich muukʼoʼ jeʼel u yáantkoʼon k-beet baʼax maʼalob yéetel ka k-tsʼoʼokbes le meyaj u tsʼaamajtoʼon Diosoʼ (Rom. 12:11; 1 Ped. 4:11). Jeʼel xan u yáantkoʼon utiaʼal ka k-eʼes le jatsʼuts modos ku tsʼáaik jeʼex le yaabilajoʼ, le utsiloʼ yéetel le k-bisikba maʼalob yéetel u maasiloʼ (Gal. 5:22, 23). Baʼaleʼ Jéeobaeʼ maʼ tu tsʼáaik tiʼ le máaxoʼob maʼ u kʼáatoʼoboʼ.
6 Maʼalob ka k-tukult lelaʼ, ¿baʼax túun unaj in beetik utiaʼal ka tsʼaʼabakten le kiliʼich muukʼoʼ? Le Bibliaoʼ ku yaʼalik baʼaxoʼob unaj k-beetik. Upʼéel baʼax jach kʼaʼananeʼ, letiʼe ka k-kʼáat tiʼ Diosoʼ (xokaʼak Lucas 11:13). Uláakʼeʼ letiʼe ka k-xok le Biblia tsʼíibtaʼab yéetel u yáantaj le kiliʼich muukʼoʼ, yéetel ka k-beet le baʼax ku yaʼalikoʼ (2 Tim. 3:16). Baʼaleʼ maʼ tuláakal máax xokik le Biblia ku tsʼaʼabal le kiliʼich muukʼ tiʼoʼ. Chéen le máax ku xokik tu jaajil u yóol, ku tsʼáaik cuenta bix u yuʼubikuba Dios yéetel baʼax u kʼáat ka beetaʼakoʼ. Uláakʼ baʼax unaj k-beetkeʼ letiʼe ka k-tsʼáaba yáanal u páajtalil Jesús, le máax tsʼaʼan tumen Jéeoba utiaʼal u tsʼáaik le kiliʼich muukʼoʼ (Col. 2:6). Le oʼolaleʼ unaj k-nuʼuktik k-kuxtal yéetel baʼax tu kaʼansaj yéetel tu beetaj Jesusoʼ (1 Ped. 2:21). Jeʼex u bin k-maas tsʼáaik k-óol kuxtal jeʼex Jesuseʼ, bey xan kun bin k-kʼamik le kiliʼich muukʼoʼ.
7. U espíritu le yóokʼol kaabaʼ, ¿baʼax ku túulchʼintik u beet le máakoʼoboʼ?
7 Baʼaleʼ u espíritu le yóokʼol kaabaʼ, ku túulchʼintik le máakoʼob u beetoʼob le baʼax utstutʼaan le Kʼaasilbaʼaloʼ (xokaʼak Efesoiloʼob 2:1-3). Tuláakal tuʼux ku túulchʼintik le máakoʼob u beetoʼob baʼaloʼob ku bin tu contra le baʼax ku yaʼalik le Bibliaoʼ, «u kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel u kaʼanal ichil ku yantal tu yoʼolal u baʼaliloʼob le kuxtaloʼ» (1 Juan 2:16). Ku túulchʼintik le máakoʼob utiaʼal ka lúubkoʼob tiʼ le núupkʼebanoʼ, tiʼ le j-meeniloʼ, le sen pʼuʼujuloʼ, le káaltaliloʼ, u adorartaʼal beetbil diosoʼob yéetel tiʼ uláakʼ baʼaloʼob (Gal. 5:19-21). Yéetel ku beetik u kaʼansaʼal baʼaloʼob maʼ jaajtak tumen le máaxoʼob u xúumpʼatmoʼob Diosoʼ (2 Tim. 2:14-18). Le oʼolaleʼ jeʼex u bin u chaʼik u nuʼuktaʼal máak tumen u espíritu le yóokʼol kaabaʼ, bey xan ken u maas chíikbesil u modos Satanás.
8. ¿Baʼax unaj k-chʼaʼatuklik cada utúul tiʼ toʼon?
8 Cada utúul tiʼ toʼoneʼ unaj u chʼaʼatuklik wa yaan u chaʼik u nuʼuktaʼal tumen le kiliʼich muukʼoʼ wa tumen u espíritu le yóokʼol kaabaʼ. Le máaxoʼob tiaʼanoʼob yáanal u nuʼuktaj u espíritu le yóokʼol kaabaʼ jeʼel u béeytal u lukʼloʼob yáanal u páajtalileʼ yéetel u chaʼik u nuʼuktaʼaloʼob tumen le kiliʼich muukʼoʼ. Baʼaleʼ, yaan máaxoʼob úuch joʼopʼok u meyajtkoʼob Jéeobaeʼ jeʼel u káajal u nuʼuktaʼaloʼob tumen u espíritu le yóokʼol kaabaʼ (Fili. 3:18, 19). Le oʼolaleʼ koʼox ilik baʼax unaj k-beetik utiaʼal maʼ u yúuchultoʼon lelaʼ.
Unaj k-tsʼáaik cuenta bix táan k-kuxtal
9-11. ¿Baʼaxoʼob jeʼel u yeʼesik wa táan u káajal k-nuʼuktaʼal tumen u espíritu le yóokʼol kaabaʼ?
9 Le mineroʼob tiʼ le tʼaanajoʼon tu káajbaloʼ meyajnajtiʼob le mejen chʼíichʼoʼob utiaʼal u tsʼáaikoʼob cuenta wa tsʼoʼok u káajal u yantal iikʼ maʼ pataliʼ. Wa ku yilaʼal tsʼoʼok u lúubul le chan chʼíichʼ tuʼux tʼuchukbaloʼ, le mineroʼoboʼ unaj kaʼach u séeb jóoʼloʼob utiaʼal maʼ u kíimloʼob. Toʼon k-meyajtik Dioseʼ, ¿baʼax kun eʼesik wa tsʼoʼok u káajal k-nuʼuktaʼal tumen u espíritu le yóokʼol kaabaʼ?
10 Le ka kaambalnajoʼob tiʼ Dios yéetel ka t-kʼubaj k-kuxtal tiʼeʼ, maʼ xaaneʼ k-xokik kaʼach le Biblia sáamsamaloʼ yéetel mantatsʼ k-payalchiʼ yéetel u jaajil k-óol. Tsʼoʼoleʼ jach jatsʼuts k-ilik bin muchʼtáambal kaʼach tumen ku líiʼsik k-óol. Tuláakal le baʼaloʼobaʼ tu tokoʼon tiʼ u espíritu le yóokʼol kaabaʼ.
11 ¿Láayliʼ wa k-ilik k-xokik le Biblia sáamsamaloʼ? (Sal. 1:2.) ¿Mantatsʼ wa k-payalchiʼ tiʼ Jéeoba yéetel u jaajil k-óol? ¿Láayliʼ wa jach jatsʼuts k-ilik k-bin tiʼ tuláakal le muchʼtáambaloʼoboʼ? (Sal. 84:10.) ¿Tsʼoʼok wa u joʼopʼol k-xulik k-beetik jujumpʼéel tiʼ le baʼaloʼob tsʼoʼok k-aʼalikaʼ? U jaajileʼ maʼ chéen chʼaʼabil u jach kʼubik u yóol máak u meyajt Diosiʼ tumen yaʼab baʼaloʼob kʼaʼabéet u beetaʼal sáamsamal. Baʼaleʼ wa táan u xuʼulul k-kʼubik k-óol meyajt Dioseʼ, ¿maʼ wa ta tʼan táan u joʼopʼol k-nuʼuktaʼal tumen u espíritu le yóokʼol kaabaʼ? Wa bey táan u yúuchuloʼ, ¿yaan wa k-ilik k-chʼaʼajoʼoltik le baʼaloʼob kʼaʼanantak suuk k-beetik kaʼachoʼ?
Unaj k-kanáantikba utiaʼal maʼ k-táabsaʼal
12. ¿Baʼax tu yaʼalaj Jesús tiʼ u disipuloʼob, yéetel baʼaxten?
12 ¿Baʼax uláakʼ unaj k-beetik utiaʼal maʼ k-chaʼik u nuʼuktikoʼon u espíritu le yóokʼol kaabaʼ? Le ka tu yaʼalaj Jesús tiʼ u disipuloʼob «pʼil a wicheʼex[eʼ]», jach táant u yaʼalik ka u kanáantubaʼob tiʼ jujumpʼéel baʼaloʼobeʼ. Letiʼeʼ tu yaʼalaj: «Ilawileʼex ta woʼolaleʼex, utiaʼal maʼ u chuʼupul a puksiʼikʼaleʼex yéetel patan janal, káaltalil yéetel u táan óolaliloʼob le kuxtalaʼ, ka jáan taalak ta wóokʼoleʼex letiʼ le kʼiinoʼ. Tumen bey jumpʼéel léej bíin taalak yóokʼol tuláakal u kajnáaliloʼob tuláakal luʼum» (Luc. 21:34, 35, LTN).
13, 14. ¿Tiʼ baʼax kʼáatchiʼiloʼob maʼalob ka tuukulnakoʼon?
13 Jesuseʼ maʼ tu yaʼalaj wa kʼaas u jaantik máak kiʼikiʼ jaanloʼobiʼ wa u yukʼaʼal vino wa uláakʼ baʼaloʼobiʼ. Letiʼeʼ jach u kʼaj óol le baʼax tu yaʼalaj Salomonaʼ: «Teneʼ in wojeleʼ baʼax maʼalob ku beet wíinikeʼ, ka u kiʼimakkúunt u yóol yéetel ka u tsʼáa uts tiʼ u kuxtal kaʼalikil kuxaʼan, tumen wa k-janal, yéetel ukʼul, [bey] xan ilik u yutsil tuláakal meyajeʼ, leloʼ chéen tumen [Dios] tsʼáa tiʼ toʼon» (Ecl. 3:12, 13). Baʼaleʼ Jesuseʼ u yojel kaʼacheʼ u espíritu le yóokʼol kaabaʼ ku túulchʼintik le máakoʼob utiaʼal ka píit máanak u janaloʼob yéetel u yukʼuloʼob.
14 ¿Bix jeʼel k-tsʼáaik cuenta wa táan u káajal u nuʼuktikoʼon u espíritu le yóokʼol kaab, le beetik maʼ t-ilik wa tsʼoʼok u joʼopʼol u píitmáan k-janal wa k-ukʼul? Maʼalob ka a tukult lelaʼ: «¿Bix in wilik ken in xok teʼ Biblia yéetel tiʼ le jóoʼsaʼaniloʼob maʼ maʼalob ka píit máanak u janal máakoʼ? ¿Kin wilik wa bey maʼ tsaaj u beetaʼal u cuentailiʼ wa bey jach ku píitmáan le baʼax ku yaʼalaʼaloʼ? ¿Kin kaxtik wa baʼax in waʼal utiaʼal u yilaʼal bey maʼ kʼaas le baʼax kin beetkoʼ? * Wa suuk in wukʼikeʼ ¿kin tsʼíikil wa ken aʼalaʼakten maʼ maʼalob ka máanak in wukʼik yéetel ka in kanáantiba tiʼ le káaltaliloʼ? ¿Kin wilik wa bey maʼ jach kʼaʼanan ka in tsʼoʼokbes le baʼax ku yaʼalaʼaltenoʼ? ¿Kin tsʼíikil wa ken aʼalaʼakten tsʼoʼok u yilaʼal ku chan píitmáan in wukʼik? ¿Kin waʼalik wa tiʼ le sukuʼunoʼob maʼ tsaaj xan u tsʼoʼokbeskoʼob le tsolnuʼukoʼob ku tsʼaʼabaltoʼon yoʼolal le baʼaloʼobaʼ?». Le bix ken k-núukil le kʼáatchiʼobaʼ yaan u yeʼesik wa tsʼoʼok u káajal k-nuʼuktaʼal tumen u espíritu le yóokʼol kaabaʼ (ketaʼak yéetel Romailoʼob 13:11-14).
Maʼ unaj k-chaʼik u táabskoʼon u baʼalubaʼob le kuxtalaʼ
15. ¿Baʼax tu yaʼalaj Jesús maʼ unaj k-sen beetkiʼ?
15 Uláakʼ baʼax jeʼel k-beetik utiaʼal maʼ k-táabsaʼal tumen u espíritu le yóokʼol kaabaʼ letiʼe maʼ k-sen chiʼichnaktal yoʼolal u baʼalubaʼob le kuxtalaʼ. Jesuseʼ u yojel kaʼacheʼ tumen kʼeban wíinikoʼoneʼ séeb k-chiʼichnaktal yoʼolal jeʼel baʼaxakeʼ. Le oʼolaleʼ jach maʼalob úuchik u yaʼalik tiʼ u disipuloʼob: «Maʼ a sen tuukuleʼex tu yoʼolal a kuxtaleʼex» (Mat. 6:25). U jaajileʼ maʼ kʼaas u chiʼichnaktal máak tumen u kʼáat lúubul utsil tu táan Diosiʼ, u tsʼoʼokbesik le meyaj tsʼaʼantiʼ teʼ múuchʼuliloʼ yéetel u tsʼáaik baʼax kʼaʼabéet tiʼ u familia (1 Cor. 7:32-34). Baʼaleʼ ¿baʼax túun tu yóotaj u yaʼal Jesús?
16. ¿Baʼax ku beetik le máakoʼob nuʼuktaʼanoʼob tumen u espíritu le yóokʼol kaabaʼ?
16 Le u sen eʼesaʼal u kʼaʼananil u yantal yaʼab baʼaloʼob tiʼ máakoʼ, ku beetik u sen chiʼichnaktal wíinik. Le u espíritu le yóokʼol kaabaʼ ku beetik xan u tuklaʼal jach kʼaʼanan u yantal taakʼin tiʼ máak, yéetel utiaʼal u yilaʼal jach maʼalob yanileʼ kʼaʼabéet u yantal ayikʼaliloʼob tiʼ. Le máaxoʼob ku tuukuloʼob beyaʼ ku kíimskubaʼob meyaj yéetel maʼ kiʼimak u yóoloʼob yéetel le baʼaxoʼob yantiʼoboʼ, tumen mantatsʼ u kʼáatoʼob u maas túumbenil, u maas nojchil yéetel u maas maʼalobil tiʼ le baʼaloʼoboʼ (Pro. 18:11). Tuláakal le baʼaloʼobaʼ ku beetik u sen chiʼichnaktal máak yéetel jeʼel tak u beetik u xuʼulul u meyajtik Dioseʼ (xokaʼak Mateo 13:18, 22).
17. ¿Baʼax unaj k-beetik utiaʼal maʼ k-táabsaʼal tumen le chiʼichnakiloʼoboʼ?
17 Wa maʼ k-kʼáat ka táabsaʼakoʼoneʼ kʼaʼabéet k-beetik le baʼax tu yaʼalaj Jesusaʼ: «Kaxteʼex táanil u [reino] Jajal Dios yéetel le toj kuxtal utstutʼaan letiʼoʼ». Tsʼoʼoleʼ tu yaʼalaj xaneʼ wa k-beetik lelaʼ Dioseʼ yaan u tsʼáaiktoʼon le baʼaxoʼob kʼaʼabéettoʼonoʼ (Mat. 6:33). ¿Bix k-eʼesik jach tu jaajil k-creertik le baʼax ku yaʼalik le tekstoaʼ? Upʼéel bixeʼ letiʼe ka k-bis upʼéel «toj kuxtal» tiʼ tuláakal baʼal jeʼex u kʼáat Diosoʼ. Jeʼex ken k-boʼot le impuestoʼoboʼ maʼ maʼalob ka tuusnakoʼon utiaʼal k-boʼotik chéen upʼíitiʼ. K-ilik k-beetik tuláakal le ku páajtal utiaʼal k-boʼotik le baʼax k-pʼaxmoʼ tumen k-ilik k-tsʼoʼokbesik le baʼax u yaʼalmaj Jesusaʼ: «Bey ka tʼaanakeʼexaʼ: Bey, bey» (Mat. 5:37, LTN; Sal. 37:21). Wa k-beetik beyaʼ maʼ xaaneʼ maʼ ken k-ayikʼaltaliʼ, baʼaleʼ yaan k-pʼáatal maʼalobil tu táan Dios, yaan u yantaltoʼon upʼéel maʼalob conciencia yéetel maʼ ken k-sen chiʼichnaktal.
18. ¿Baʼax tu beetaj Jesús, yéetel baʼax utsiloʼob ken kʼam wa k-beetik jeʼex letiʼeʼ?
18 Utiaʼal k-kaxtik táanil le Reinooʼ kʼaʼabéet k-ilik baʼax táan k-tsʼáaik táanil ichil k-kuxtal. Koʼox ilik baʼax tu beetaj Jesús. Tiʼ letiʼeʼ yaan kaʼach upʼéel jach maʼalob yéetel koʼokoj nookʼ (Juan 19:23). Ku jaantik kaʼach kiʼikiʼ jaanloʼob yéetel ku yukʼik vino yéetel u amigoʼob (Mat. 11:18, 19). Baʼaleʼ utiaʼal Jesuseʼ le baʼaloʼob anchajtiʼ yéetel le u kiʼimakkúunsik u yóoloʼ, tu yilaj chéen bey xaʼakʼoʼob ku beetik u kiʼital le janaloʼ, tumen utiaʼal letiʼeʼ maas jach kʼaʼanan u beetaʼal baʼax u kʼáat Jéeoba jeʼex u janal máakeʼ (Juan 4:34-36). Ken k-beet jeʼex Jesuseʼ k-kʼamik yaʼab utsiloʼob jeʼex k-áantik yéetel le Biblia le máaxoʼob táan u muʼyajoʼoboʼ, k-áantaʼal yéetel k-yaabiltaʼal tumen le sukuʼunoʼoboʼ, tsʼoʼoleʼ k-kiʼimakkúuntik u yóol Jéeoba. Wa k-ilik baʼax táan k-tsʼáaik táanil ichil k-kuxtaleʼ maʼ ken k-bin tu paach ayikʼaliloʼob yéetel le náaysaj óolaloʼoboʼ. Baʼaxeʼ wa k-ilik u meyajtoʼon tubeeleʼ jeʼel u yáantkoʼonoʼob utiaʼal k-seguer k-meyajtik Jéeobaeʼ. Tsʼoʼoleʼ wa k-tsʼáaik táanil le Reino ichil k-kuxtaloʼ, maʼ ken u séeb táabsoʼon u espíritu le yóokʼol kaabaʼ.
Mantatsʼ unaj k-chaʼik u nuʼuktikoʼon le kiliʼich muukʼoʼ
19-21. ¿Baʼax unaj u beetik máak utiaʼal maʼ u xuʼulul u tsʼáaik yóol tiʼ u baʼalubaʼob le kiliʼich muukʼoʼ, yéetel baʼaxten bey unaj k-beetkoʼ?
19 Utiaʼal u beetik máak wa baʼaxeʼ táanileʼ ku máansik tu tuukul. Tak le baʼaxoʼob maʼ maʼalob k-jáan beetkoʼ tiʼ kʼaakʼas tuukuloʼob yáax anchajaʼantoʼon u taal. Le oʼolal le apóstol Pablooʼ tu yaʼalaj ka k-kanáant baʼaxoʼob k-tuklik. Letiʼeʼ tu yaʼalaj: «Le máaxoʼob ku kuxtaloʼob jeʼel bix u yaʼalik le luʼumkabil wíinkliloʼ chéen tiʼ u [baʼalubaʼob] le wíinkliloʼob ku tsʼáaik u yóoloʼoboʼ; baʼaleʼ le máaxoʼob kuxaʼanoʼob jeʼel bix ku yaʼalik le Kiliʼich [muukʼoʼ] ku tsʼáaik u yóoloʼob tiʼ u baʼaloʼobil le Pixan» wa kiliʼich muukʼoʼ (Rom. 8:5).
20 ¿Baʼax unaj k-beetik utiaʼal maʼ k-tuukul yéetel k-beetik le baʼaloʼob ku beetaʼal teʼ kʼasaʼan yóokʼol kaabaʼ? Unaj k-kanáantik maʼ k-oksik t-tuukul le baʼaxoʼob ku yeʼesik le yóokʼol kaabaʼ, jeʼex le baʼaxoʼob ku máansaʼal teʼ televisión yaan yil yéetel le núupkʼebaniloʼ wa u beetaʼal looboʼ. Wa ku kʼaskúuntaʼal k-tuukul tumen le baʼaloʼobaʼ maʼ kun páajtal u yantaltoʼon le kiliʼich muukʼoʼ (Sal. 11:5; 2 Cor. 6:15-18). Wa mantatsʼ k-payalchiʼ, k-xokik le Bibliaoʼ, k-tuukul tiʼ le baʼax k-xokikoʼ yéetel k-bin tiʼ tuláakal le muchʼtáambaloʼoboʼ jeʼel u tsʼaʼabaltoʼon le kiliʼich muukʼoʼ. Tsʼoʼoleʼ ken táakpajkoʼon mantatsʼ teʼ kʼaʼaytajoʼ, k-chaʼik k-nuʼuktaʼal tumen le kiliʼich muukʼoʼ.
21 Maʼ u xuʼulul k-kanáantikba utiaʼal maʼ k-nuʼuktaʼal tumen u espíritu le yóokʼol kaabaʼ yéetel le kʼaakʼas tsʼíibolaloʼob ku tsʼáaikoʼ. Tumen wa k-beetkeʼ yaan k-kʼamik yaʼab utsiloʼob jeʼex úuchik u yaʼalik Pabloaʼ: «U tsʼáaik u yóol máak chéen tiʼ u baʼaloʼobil le wíinkliloʼ ku bisik máak tiʼ kíimil; baʼaleʼ u tsʼáaik u yóol máak tiʼ u baʼaloʼobil le Pixanoʼ ku bisik máak tiʼ kuxtal yéetel tiʼ jeetsʼel óolal» (Rom. 8:6).
[Tsolajiloʼob]
^ xóot’ol 14 Utúul máak ku patan janaleʼ maʼatech u tsʼáaik u pʼiis u janal, kex tsʼoʼok u naʼajtaleʼ maʼ tu xuʼulul u janal tumen jach kiʼ u yuʼubik le baʼax ku jaantkoʼ. Jeʼex túun k-ilkoʼ utúul máax ku patan janaleʼ maʼ tu yilaʼal wa tumen polkiʼ wa tsʼoyaʼaniʼ. Tsʼoʼoleʼ yaan máaxeʼ jach polok tumen kʼojaʼan maʼ tumen ku sen janaliʼ (ilaʼak le xook ku kʼaabaʼtik “Preguntas de los lectores” jóokʼ teʼ revista La Atalaya 1 tiʼ noviembre tiʼ 2004).
¿Kʼajaʼan wa tech?
• ¿Baʼax unaj k-beetik utiaʼal u tsʼaʼabaltoʼon le kiliʼich muukʼoʼ?
• ¿Baʼax jeʼel u túulchʼintik máak u beet u espíritu le yóokʼol kaabaʼ?
• ¿Baʼax unaj k-beetik utiaʼal maʼ u táabskoʼon u espíritu le yóokʼol kaabaʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 21]
Táanil tiʼ k-bin meyaj wa k-bin xookeʼ unaj k-kʼáatik kiliʼich muukʼ
[U tsolajil le oochel teʼ táan juʼun 23]
Unaj k-kanáantik maʼ u kʼastal k-tuukul, maʼ k-tuus ken k-boʼot impuestoʼob yéetel unaj k-tsʼáaik u pʼis k-janal wa k-ukʼik wa baʼax