Unaj k-kanáantik k-toj óolal jeʼex u kʼáat Jéeobaoʼ
Unaj k-kanáantik k-toj óolal jeʼex u kʼáat Jéeobaoʼ
«Yaabilt túun Yuumtsil a Jajal Dios [...] yéetel tuláakal a tuukul, yéetel tuláakal a muukʼ.» (MAR. 12:30.)
1. ¿Baʼax u kʼáat Dios kaʼach utiaʼal le wíinikoʼoboʼ?
LE KA tu beetaj wíinikeʼ, Dioseʼ maʼ tu beetaj utiaʼal ka kʼojaʼanchajak yéetel ka kíimkiʼ. Letiʼeʼ tu tsʼáaj Adán yéetel Eva tu jatsʼuts jardinil Edén utiaʼal u meyajkoʼob yéetel utiaʼal u kanáantkoʼob utiaʼal mantatsʼ, maʼ chéen utiaʼal setenta wa ochenta jaʼaboʼobiʼ (Gén. 2:8, 15; Sal. 90:10). Wa ka u yuʼuboʼob kaʼach u tʼaan Dios yéetel ka u yeʼesoʼob chéen letiʼ unaj u gobernareʼ, maʼ kun kʼojaʼantaloʼob mix kun kíimiloʼob.
2, 3. 1) ¿Bix u ketik u libroi Eclesiastés le u chʼíijil máakoʼ? 2) ¿Máax beet u káajal u yantal le kíimiloʼ, yéetel bix kun xuʼulsbil tiʼ le kíimiloʼ?
2 Le capítulo 12 tiʼ Eclesiastesoʼ, ku chʼaʼachiʼitik le talamiloʼob yéetel le muʼyajiloʼob ku taasik le chʼíijiloʼ (xokaʼak Eclesiastés 12:1-7). U saktal u pool máakeʼ ku keʼetel yéetel u sakil u lool le «almendrooʼ». U yook le máak tsʼoʼok u chʼíijiloʼ, ku keʼetel yéetel «xiixib máakoʼob» oʼochankil u máanoʼob yéetel ku kikilankiloʼob. U bin u sáasil u yich máakeʼ ku keʼetel yéetel nojoch koʼoleloʼob maʼ tu kaxtikoʼob sáasil kex ku chʼeeneboʼob teʼ ventanaoʼ. U júutul u koj máakeʼ ku keʼetel yéetel «x-juuchʼoʼob» tsʼoʼok u xuʼulul u meyajoʼob tumen tsʼoʼok u pʼáatloʼob «chéen wa jaytúul[oʼob]».
3 U kikilankil u yook, u bin u sáasil yéetel u júutul u koj máakeʼ maʼ letiʼe u tukulmaj Dios ka úuchuk kaʼachoʼ. U kíimil máak tu yoʼolal le kʼebanoʼ upʼéel tiʼ «le baʼax u beetmaj kʼaasibaʼal» kun luʼsbil tumen Jesucristo yéetel u Reinooʼ. Le apóstol Juanoʼ tu yaʼalaj: «U Paal Jajal Dioseʼ taal utiaʼal u mixbaʼalkúunt le baʼax u beetmaj kʼaasibaʼaloʼ» (1 Juan 3:8).
Maʼ kʼaas u chiʼichnaktal máak yoʼolal u toj óolaliʼ
4. ¿Baʼaxten maases k-kanáantik toj óolal, baʼaleʼ baʼax maʼ tu tuʼubultoʼon?
4 Jeʼex u maasil máakoʼobeʼ, toʼon k-meyajtik Dioseʼ láayliʼ k-kʼojaʼantal yéetel k-chʼíijileʼ. Le oʼolal maʼ kʼaas ka k-kanáantba utiaʼal ka yanaktoʼon toj óolaliʼ. Tsʼoʼoleʼ lelaʼ k-beetik tumen k-kʼáat meyajt Jéeoba yéetel tuláakal k-muukʼ (Mar. 12:30). Baʼaleʼ maʼ unaj u tuʼubultoʼoneʼ kʼeban wíinikoʼon, le beetik kex maʼ k-kʼáateʼ séeb k-chʼíijil yéetel yaʼab k-kʼojaʼantal.
5. Úuchjeakileʼ, ¿máaxoʼob tu aktáantoʼob xan kʼojaʼaniloʼob yéetel baʼax k-kanik tiʼ letiʼob?
5 Úuchjeakileʼ, yaʼab tiʼ le máaxoʼob meyajt Diosoʼ tu muʼyajtoʼob kʼojaʼaniloʼob. Utúul tiʼ letiʼobeʼ Epafrodito (Fili. 2:25-27). Timoteo, u yéet kʼaʼaytaj kaʼach le apóstol Pablooʼ, mantatsʼ ku kʼojaʼantal tiʼ u nakʼ, le beetik aʼalaʼab tiʼ ka u yukʼ «jumpʼíit vino» (1 Tim. 5:23). Uláakʼ xan máax kʼojaʼanchajeʼ letiʼe apóstol Pablooʼ, letiʼeʼ tu aktáantaj «jumpʼéel mukʼyaj [...] jeʼel bix jumpʼéel kʼiʼix chʼiikil» tu wíinklileʼ, maʼ xaaneʼ maʼ sáasil kaʼach u paakatiʼ wa upʼéel kʼojaʼanil minaʼan kaʼach tsʼaakil tiʼ (2 Cor. 12:7; Gal. 4:15; 6:11). Le beetik mantatsʼ tu kʼáat óoltaj tiʼ Jéeoba ka luʼsaʼaktiʼ (xokaʼak 2 Corintoiloʼob 12:8-10). Baʼaleʼ Dioseʼ maʼ tu beetaj upʼéel milagro utiaʼal u tsʼakikiʼ, baʼaxeʼ tu yáantaj utiaʼal u aktáantik le kʼojaʼaniloʼ. Jéeobaeʼ tu yeʼesaj u nojoch páajtalil úuchik u yáantik Pablo u aktáant le kʼojaʼaniloʼ. ¿Máasaʼ yaʼab baʼaloʼob jeʼel k-kanik tiʼ le baʼax úuch tiʼ Pablooʼ?
Maʼ a sen chiʼichnaktal yoʼolal a toj óolal
6, 7. ¿Baʼaxten maʼ maʼalob ka sen chiʼichnakchajkoʼon yoʼolal k-toj óolaliʼ?
6 Jeʼex ojéelaʼaneʼ, toʼon u j-jaajkunajoʼon Jéeobaeʼ k-kʼamik jejeláas tratamientoʼob utiaʼal k-tsʼaʼakal yéetel k-tsʼáaik u nib óolalil yoʼolal le áantaj ku tsʼaʼabaltoʼon tumen le doctoroʼoboʼ. Tsʼoʼoleʼ le revista ¡Despertad!, yaan kʼiineʼ ku taasik xookoʼob ku tʼaanoʼob yoʼolal le toj óolaloʼ, baʼaleʼ maʼatech u yaʼalik baʼax tratamientoi maas maʼalob ka u kʼam máak. Baʼaleʼ, tumen maʼ kʼuchuk u kʼiinil u xuʼulsaʼal tiʼ le kʼojaʼaniloʼ, maʼ unaj k-sen chiʼichnaktal k-kaxt bix jeʼel u xuʼulul k-kʼojaʼantaleʼ. Maʼ unaj xan k-beetik jeʼex le máakoʼob ku tuklikoʼob maʼ kun antal upʼéel kuxtal maas maʼalob, le oʼolal ku kʼamkoʼob jeʼel baʼalak tratamientoi utiaʼal ka tsʼaʼakkoʼobeʼ (Efe. 2:2, 12). Toʼoneʼ maʼ k-kʼáat náachtal tiʼ Jéeoba chéen tumen k-kʼáat utstaliʼ, tumen k-ojel wa ku chúukpajal k-óol beet baʼax u kʼáat Jéeobaeʼ, yaan u tsʼáaiktoʼon «le kuxtal minaʼan u xuul» teʼ Paraísooʼ (1 Tim. 6:12, 19; 2 Ped. 3:13).
7 Uláakʼ baʼax oʼolal maʼ unaj k-sen chiʼichnaktal tu yoʼolal k-toj óolaleʼ, letiʼe k-ojéeltik jeʼel u beetik u káajal k-tuukul chéen t-oʼolaloʼ. Pabloeʼ bey úuchik u yaʼalik tiʼ le Filiposiloʼoboʼ: «Mix juntúul ka u kaxant chéen le baʼaloʼob utiaʼal u yutsil tu juunaloʼ, baʼaleʼ le baʼax utiaʼal u yutsil xan le uláakʼoʼoboʼ» (Fili. 2:4). Maʼ kʼaas ka k-kanáantba utiaʼal maʼ k-sen kʼojaʼantaliʼ, baʼaleʼ baʼax jeʼel u yáankoʼon utiaʼal maʼ k-sen chiʼichnaktal tu yoʼolaleʼ, letiʼe k-kaxtik u yutsil le sukuʼunoʼoboʼ bey xan maʼ u xuʼulul k-kʼaʼaytik u maʼalob péektsilil le Reinooʼ (Mat. 24:14).
8. ¿Baʼaxoʼob jeʼel u káajal k-beetik wa k-sen chiʼichnaktal yoʼolal k-toj óolaleʼ?
8 Lelaʼ jeʼel xan u beetik u xuʼulul k-tsʼáaik táanil ichil k-kuxtal k-meyajtik Dioseʼ. Tsʼoʼoleʼ jeʼel xan u beetik u káajal k-aʼalik tiʼ u maasiloʼobeʼ maas maʼalob upʼéel tratamiento wa upʼéel vitamina ke uláakʼoʼob. Baʼaleʼ maʼalob ka tuukulnakoʼon tiʼ le baʼax tu yaʼalaj Pabloaʼ: «Yéeyeʼex mantatsʼ baʼax [maas] maʼalob. Beyoʼ jeʼel u páajtal u yantalteʼex jumpʼéel sak kuxtaleʼ yéetel maʼ bíin yanak mix baʼal a siʼipilkúuntaʼaleʼex tu kʼiinil le ken taalak Cristoeʼ» (Fili. 1:10).
¿Baʼax maas unaj k-tsʼáaik táanil?
9. ¿Máakalmáak upʼéel tiʼ le baʼaxoʼob jach kʼaʼanan u beetaʼaloʼ, yéetel baʼaxten?
9 Toʼoneʼ k-ojleʼ, le baʼax maas kʼaʼanan ka beetaʼak teʼ kʼiinoʼobaʼ letiʼe u kʼaʼaytaʼal le maʼalob péektsiloʼ yéetel u kaʼansaʼal uláakʼ máakoʼob tiʼ le Bibliaoʼ. Wa k-beetikeʼ maʼ chéen tiʼ toʼon ken u taas utsiliʼ yaan xan u taasik utsil tiʼ le máaxoʼob k-kaʼanskoʼoboʼ (Pro. 17:22, 1 Tim. 4:15, 16). Le revista ¡Despertad! yéetel U Pʼíich Tulumil Kananoʼ, yaan kʼiineʼ ku taaskoʼob u tsikbalil u kuxtal jujuntúul sukuʼunoʼob táan u aktáantikoʼob upʼéel yaayaj kʼojaʼanil. Utiaʼal maʼ u sen chiʼichnaktaloʼobeʼ, ku yáantkoʼob uláakʼ máakoʼob u kʼaj óoltoʼob Jéeoba yéetel ku kaʼanskoʼobtiʼob baʼaxoʼob ken u beete. *
10. ¿Baʼaxten jach kʼaʼanan ka k-il baʼax tratamientoi ken k-kʼame?
10 Ken kʼojaʼanchajkoʼoneʼ cada utúul tiʼ toʼon unaj «u bisik u kuuch» wa u chʼaʼatuklik baʼax tratamientoi ken u kʼame (Gal. 6: 5). Baʼaleʼ unaj xan k-chʼaʼik en cuenta baʼax ku tuklik Jéeoba yoʼolal le tratamientooʼ. Jeʼex maʼatech k-óotik ka tsʼaʼabaktoʼon kʼiʼikʼ tumen k-kʼáat beet baʼax utstutʼaan Jéeobaeʼ, maʼatech k-kʼamik xan upʼéel tratamiento jeʼel u beetik k-náachtal tiʼeʼ (Hch. 15:20). Yaan horaeʼ le bix u tsʼaʼakal wa u yaʼalaʼal tiʼ máak baʼax kʼojaʼanil yantiʼoʼ, yaan baʼax u yil yéetel le espiritismooʼ. Úuchjeakileʼ, Jéeobaeʼ tu yaʼalaj tiʼ le israelitaʼob táakpajoʼob tiʼ le espiritismooʼ: «Maʼ a taaskeʼex tiʼ teen [siibaloʼob] minaʼan u tojol; tsʼoʼok u náakal in wóol tiʼ u buutsʼiloʼob. Teʼexeʼ, ka tʼanikeʼex kaaj utiaʼal u kʼiimbesoʼob u kʼiinil chichan [luna], sábado, baʼaleʼ teneʼ, maʼ bíin in kʼam baʼax ku beetik máaxoʼob kʼaas u kuxtaloʼob», wa yaan baʼax u yiloʼob yéetel espiritismoiʼ (Isa. 1:13). Le oʼolal wa k-kʼojaʼantaleʼ, ¿máasaʼ jach upuliʼ maʼ k-kʼáat beet mix baʼal jeʼel u beetik maʼ u yuʼubal k-payalchiʼob tumen Jéeobaeʼ? (Lam. 3:44).
Unaj u yantaltoʼon naʼatil
11, 12. ¿Baʼaxten kʼaʼabéettoʼon naʼatil ken k-il baʼax tratamientoi ken k-kʼame?
11 U jaajileʼ Jéeobaeʼ maʼ ken u beet upʼéel milagro utiaʼal u tsʼakkoʼon, baʼaleʼ jeʼel u páajtal k-kʼáatiktiʼ ka u yáantoʼon k-yéey upʼéel maʼalob tratamientoeʼ. Utiaʼal k-chʼaʼatuklik tubeel máakalmáak ken k-kʼame unaj k-chʼaʼik en cuenta baʼax ku yaʼalik le Bibliaoʼ. Tsʼoʼoleʼ, wa nojoch le kʼojaʼanil yantoʼonoʼ maʼ chéen u yáantaj utúul doctor unaj k-kaxtikiʼ, tumen Proverbios 15:22 ku yaʼalikeʼ «u béeytal jumpʼéel meyajeʼ ku yúuchul tu yoʼolal u yaʼab j-tsolxikinoʼob». Tsʼoʼoleʼ Pabloeʼ tu yaʼalaj «ka k-bis way yóokʼol kaabeʼ jumpʼéel kuxtal ich maʼalob tuukul, tojil yéetel kʼub óolal tiʼ Jajal Dios» (Tito 2:12).
12 Bejlaʼeʼ yaʼab máakoʼobeʼ jach chiʼichnakoʼob jeʼex le koʼolel tu kʼiiniloʼob Jesús yaan kaʼach tiʼ upʼéel yaayaj kʼojaʼanileʼ. Marcos 5:25, 26 ku yaʼalik: «Yaan kaʼach juntúul koʼolel kʼojaʼan, yaan min doce jaʼaboʼob káajak u tuul kʼiʼikʼ tiʼ. Tsʼoʼok u mukʼyaj jach yaʼab tu kʼab yaʼabkach j-tsʼakyajoʼob, yéetel tsʼoʼok u xupik tuláakal baʼax yaan kaʼach tiʼ; baʼaleʼ mix jumpʼíit uts tu kaxtaj, chéen seten kʼaschaj u kʼojaʼanil». Baʼaleʼ Jesuseʼ tu tsʼakaj yéetel tu chʼaʼaj óotsilil tiʼ (Mar. 5:27-34). Yaan sukuʼunoʼobeʼ, tumen jach chiʼichnakoʼob tumen u kʼáatoʼob ka tsʼaʼakakoʼob jeʼex le koʼolelaʼ, tsʼoʼok u kʼamikoʼob upʼéel tratamiento ku bin tu contra le Bibliaoʼ.
13, 14. 1) Le bix ken k-tsʼakbiloʼ, ¿bix jeʼel u meyaj tiʼ Satanás utiaʼal u náachkuntoʼon tiʼ Jéeobaeʼ? 2) ¿Baʼaxten unaj k-náachtal tiʼ tuláakal baʼal yaan yil yéetel le espiritismooʼ?
13 Satanaseʼ yaʼab baʼaloʼob ku meyajtiʼ utiaʼal u náachkuntkoʼon tiʼ Jéeoba. Letiʼeʼ ku yilik ka lúubkoʼon tiʼ le núupkʼebanoʼ, ka xiʼikoʼon tu paach le ayikʼaliloʼoboʼ yéetel ka k-kʼam tratamientoʼob yaan baʼax u yiloʼob yéetel le espiritismooʼ. Wa táan k-kʼáatik tiʼ Jéeoba ka u tokoʼon tiʼ le Kʼaasilbaʼal yéetel tiʼ tuláakal baʼal kʼaaseʼ, maʼ unaj k-yéeyik upʼéel tratamiento yaan baʼax u yil yéetel espiritismoiʼ, tumen leloʼ jeʼel u tsʼáaik tuʼux u táabskoʼon Satanaseʼ (Mat. 6:13; Tito 2:14).
14 Jéeobaeʼ tu yaʼalaj tiʼ le israelitaʼob ka náachchajkoʼob tiʼ tuláakal baʼax yaan yil yéetel le espiritismooʼ (Deu. 18:10-12). Pabloeʼ tu yaʼalaj xaneʼ le pulyaʼajil wa espiritismooʼ táakaʼan ichil «le kʼaakʼas tsʼíibolaloʼoboʼ» (Gal. 5:19 20). Tsʼoʼoleʼ le Bibliaoʼ ku yaʼalikeʼ le máaxoʼob ku táakpajloʼob tiʼ baʼaxoʼob yaan yil yéetel le «pulyaʼajoʼ» yaan u xuʼulsaʼaltiʼob (Apo. 21:8). Jeʼex k-ilkoʼ, Jéeobaeʼ jach u pʼekmaj tuláakal baʼax yaan yil yéetel le espiritismooʼ.
Unaj k-eʼesik yantoʼon upʼéel utsil puksiʼikʼal yéetel upʼéel maʼalob tuukul
15, 16. 1) ¿Baʼaxten kʼaʼabéettoʼon naʼatil ken k-yéey baʼax tratamientoi ken k-kʼame? 2) ¿Baʼax tu yaʼalaj le Cuerpo Gobernante teʼ yáax siglo ka beetaʼakoʼ?
15 Jeʼex tsʼoʼok k-ilkoʼ wa k-tuklik bey maʼ maʼalob upʼéel tratamientoeʼ, maas maʼalob maʼ k-kʼamik. Baʼaleʼ, lelaʼ maʼ u kʼáat u yaʼal wa chéen tumen maʼ k-ojel bix upʼéel tratamientoeʼ yaan baʼax u yil yéetel le espiritismooʼ. Le beetik kʼaʼabéettoʼon naʼatil utiaʼal k-kanáantik k-toj óolal jeʼex u kʼáat Jéeobaeʼ. Le capituloi 3 tiʼ Proverbiosoʼ ku yaʼaliktoʼon baʼax unaj k-beetik: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej [...]. Yanak tiʼ teech maʼalob a tuukul mantatsʼ yiijchajak xan a tuukul mantatsʼ, tumen a tiaʼaleʼ u sayabil a kuxtal» (Pro. 3:5, 6, 21, 22).
16 Le oʼolaleʼ, kex k-ilik kanáantik k-toj óolaleʼ, maʼatech k-kʼamik upʼéel tratamiento jeʼel u beetik k-náachtal tiʼ Jéeobaeʼ. Tiʼ jeʼel baʼalak ken k-beet, jeʼex le yaan yil yéetel k-toj óolaloʼ unaj k-beetik tuláakal jeʼex u kʼáat Jéeobaeʼ. Beyoʼ le máakoʼoboʼ yaan u yilkoʼob uts k-puksiʼikʼal yéetel maʼalob k-tuukul (Fili. 4:5). Teʼ yáax siglooʼ le Cuerpo Gobernanteoʼ tu túuxtaj upʼéel carta tiʼ le disipuloʼoboʼ utiaʼal u yaʼaliktiʼob maʼ unaj u adorarkoʼob idoloʼobiʼ, u yoksikoʼob kʼiʼikʼ tu wíinkliloʼob mix xan u núupkʼebantaloʼob. Tu tsʼookeʼ aʼalaʼabtiʼob: «Wa ka kanáantikabaʼex tiʼ le baʼaloʼobaʼ, uts baʼax ka beetikeʼex» (Hch. 15:28, 29). ¿Baʼax utsiloʼob túun ken u kʼamoʼob wa ka u beetoʼob le baʼax aʼalaʼabtiʼoboʼ?
Toj óolal bejlaʼeʼ yéetel maʼ ku xáantaleʼ toj óolal utiaʼal mantatsʼ
17. ¿Bix tsʼoʼok u yáantkoʼon tiʼ k-toj óolal k-beetik le baʼax ku yaʼalik le Bibliaoʼ?
17 Cada utúul tiʼ toʼoneʼ maʼalob ka u tukult lelaʼ: «¿Kin wilik wa baʼax utsiloʼob tsʼoʼok u taasikten in beetik baʼax ku yaʼalik le Biblia tiʼ baʼaxoʼob yaan yil yéetel le kʼiʼikʼ bey xan yéetel le núupkʼebanoʼ?». Maʼalob xan ka tuukulnakoʼon tiʼ le utsiloʼob tsʼoʼok k-kʼamik ikil k-kanáantikba tiʼ le baʼaloʼob kʼaastak ku beetik le máaxoʼob maʼatech u meyajtkoʼob Diosoʼ (2 Cor. 7:1). K-kanáantik k-wíinklil jeʼex u yaʼalik le Bibliaoʼ, ku yáantkoʼon utiaʼal maʼ k-jach kʼojaʼantal. Tsʼoʼoleʼ, tumen maʼatech k-tsʼuʼutsʼik chamal yéetel maʼatech u meyajtoʼon drogaʼobeʼ maʼatech k-muʼyajtik le kʼojaʼaniloʼob ku taasik le baʼaloʼobaʼ yéetel maʼalob yaniloʼon tu táan Dios. Yéetel tumen k-tsʼáaik u pʼiis k-janal yéetel maʼatech k-káaltaleʼ, maʼatech k-muʼyajtik le kʼojaʼaniloʼob ku tsaʼisik le baʼaloʼobaʼ (xokaʼak Proverbios 23:20 yéetel Tito 2:2, 3). Kex u wenel máak yéetel u beetik ejercicio ku yáantaj utiaʼal maʼ k-kʼojaʼantaleʼ, baʼax áantikoʼon utiaʼal ka xiʼiktoʼon maʼalobeʼ letiʼe k-beetik baʼax ku yaʼalik le Bibliaoʼ.
18. 1) ¿Baʼax maas unaj k-tsʼáaik táanil ichil k-kuxtal? 2) ¿Baʼax ku yaʼalik le Biblia kun úuchul yéetel le kʼojaʼaniloʼ?
18 Baʼaleʼ maases unaj k-ilik k-pʼáatal maʼalobil tu táan Jéeoba yéetel k-maas kʼaj óoltik. Letiʼeʼ ku yaʼalik u tsʼáaiktoʼon le kuxtal bejlaʼaʼ yéetel «le kuxtal bíin taalakoʼ» (1 Tim. 4:8; Sal. 36:9). Yoʼolal u kuxtal Jesús tu kʼubaj t-óolaloʼ, teʼ Paraíso ken u tsʼáa Diosoʼ, mix máak kun kʼojaʼantal, tuláakaloʼob yaan u maas natsʼkubaʼob tiʼ Dios yéetel yaan xan u perdonartaʼal u kʼebanoʼob. Jesuseʼ, yaan u biskoʼon «tiʼ u sayabiloʼob u jaʼil kuxtal», yéetel Jajal Dioseʼ bíin u choʼo «tuláakal u jaʼil u yich» máak (Apo. 7:14-17; 22:1, 2). Ken úuchuk lelaʼ yaan u béeytal le baʼax ku yaʼalik le Bibliaaʼ: «Mix juntúul kajnáal bíin u yaʼal: Kʼojaʼanen» (Isa. 33:24).
19. ¿Baʼax jach k-ojel ken u beet Jéeoba t-oʼolal?
19 K-ojel táan u jach náatsʼal u kʼiinil k-jáalkʼabtaʼal bey xan u luʼsaʼal le kʼojaʼaniloʼob yéetel le kíimil tumen Jéeobaoʼ. Le maʼ kʼuchuk le kʼiin jeʼeloʼ, Jéeobaeʼ yaan u yáantkoʼon utiaʼal ka chúukpajak óol k-aktáant le kʼojaʼaniloʼoboʼ, tumen letiʼeʼ u yaabiltmoʼon (1 Pedro 5:7). Le oʼolaleʼ, ken k-kanáant k-toj óolaleʼ mantatsʼ unaj k-chʼaʼik en cuenta baʼax ku yaʼalik le Bibliaoʼ.
[Tsolajiloʼob]
^ xóot’ol 9 Teʼ revista La Atalaya 1 tiʼ septiembre tiʼ 2003, teʼ cuadro yaan teʼ táan juʼun 17, jeʼel u páajtal a wilik upʼéel lista tiʼ u tsikbalil u kuxtal le sukuʼunoʼobaʼ.
[U tsolajil le oochel teʼ táan juʼun 26]
Utiaʼal kʼaʼajsbil
• ¿Máax beet u káajal u yantal le kʼojaʼaniloʼoboʼ, yéetel máax kun luʼsik le kʼojaʼanil bey xan le kíimiloʼ?
• Kex tumen maʼ kʼaas k-chiʼichnaktal yoʼolal k-toj óolaleʼ, ¿baʼax unaj k-kanáantik maʼ k-beetik?
• ¿Baʼaxten unaj k-chʼaʼik en cuenta baʼax ku tuklik Jéeoba yoʼolal le tratamiento ken k-yéeyoʼ?
• K-beetik baʼax ku yaʼalik le Bibliaoʼ, ¿bix u yáantkoʼon utiaʼal ka yanaktoʼon toj óolal?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Jéeobaeʼ maʼ tu beetoʼon utiaʼal k-kʼojaʼantal yéetel utiaʼal k-chʼíijliʼ
[U tsolajil le oochel teʼ táan juʼun 25]
Kex tumen ku aktáantkoʼob kʼojaʼanileʼ, le máaxoʼob meyajtik Jéeobaoʼ ku beetkoʼob yéetel kiʼimak óolal