U kaʼansajoʼob Jesuseʼ jeʼel u taasiktech kiʼimak óolaleʼ
U kaʼansajoʼob Jesuseʼ jeʼel u taasiktech kiʼimak óolaleʼ
«[Jesuseʼ] naʼak teʼ puʼukoʼ [...] ka náatsʼ u j-kaambaloʼobeʼ, ka joʼopʼ u kaʼambesikoʼob.» (MAT. 5:1, 2)
1, 2. 1) ¿Baʼaxoʼob tu beetaj Jesús táanil tiʼ u kaʼansaj teʼ puʼukoʼ? 2) ¿Baʼax tu yaʼalaj Jesús le ka tu káajsaj u tsoltʼaanoʼ?
TU JAʼABIL 31 teʼ yáax siglooʼ Jesuseʼ xuʼul u kʼaʼaytaj teʼ kaajoʼob yaan Galilea utiaʼal u bin tu kʼiimbesajil le Pascua kun beetbil Jerusalenoʼ (Juan 5:1). Ka suunaj Galileaeʼ, bul áakʼab payalchiʼinaj tiʼ Dios utiaʼal u yéeyik tubeel u apostoloʼob. Tuláakʼ kʼiineʼ bin ilbil tumen yaʼabach máakoʼob, letiʼ túuneʼ tu tsʼakaj le kʼojaʼanoʼob taasaʼabtiʼoʼ. Tsʼoʼoleʼ ka bin tu jáal upʼéel puʼukeʼ ka joʼopʼ u kaʼansik u disipuloʼob bey xan le uláakʼ máakoʼoboʼ (Mat. 4:23–5:2; Luc. 6:12-19).
2 Jesús túuneʼ tu káajsaj le tsoltʼaan kʼaj óolaʼan bey u Kaʼansajil le Puʼukoʼ; teʼeloʼ tu yaʼaleʼ utiaʼal ka yanak kiʼimak óolal tiʼ máakeʼ unaj u natsʼkuba tiʼ Dios (xokaʼak Mateo 5:1-12). Le kiʼimak óolal tu yaʼalaj Jesusoʼ letiʼe u yuʼubikuba máak maʼalobiloʼ. Jesuseʼ tu yaʼalaj máakalmáak le nueve baʼaxoʼob jeʼel u taasik kiʼimak óolal tiʼ máakoʼ. Le baʼaxoʼob tu tsoloʼ ku yeʼesik baʼaxten le máaxoʼob meyajtik Diosoʼ jach kiʼimak u yóoloʼob yéetel tak bejlaʼa jeʼel u taasiktoʼon utsiloʼobeʼ. Koʼox xakʼaltik cada upʼéel tiʼ le baʼaxoʼob tu yaʼaloʼ.
«Le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ»
3. ¿Baʼax u yojel le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ?
3 «Kiʼimak u yóol le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ, tumen tiʼ letiʼob kun tsʼaabil u reinoi kaʼan.» (Mat. 5:3. NM.) Le máakoʼob beyaʼ u yojloʼob náach yaniloʼob tiʼ Dios yéetel u yojloʼob xan kʼaʼabéet u chʼaʼabal óotsilil tiʼob tumen Letiʼ.
4, 5. 1) ¿Baʼaxten kiʼimak u yóol le máaxoʼob ku yilkoʼob u kʼaʼananil u natsʼkubaʼob tiʼ Diosoʼ? 2) ¿Bix jeʼel k-natsʼikba tiʼ Jéeobaeʼ?
4 Le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ, kiʼimak u yóoloʼob tumen u yojloʼob «tiʼ letiʼob kun tsʼaabil u reinoi kaʼan». Le yáax disipuloʼoboʼ le ka tu creertoʼob Jesús letiʼe Mesíasoʼ, tsʼaʼabtiʼob u jatsʼuts páajtalil u binoʼob gobernar teʼ kaʼan tu yéeteloʼ (Luc. 22:28-30). Kex wa yaan k-bin teʼ kaʼan bey xan wa yaan k-pʼáatal kuxtal way Luʼumeʼ, yaan u jach kiʼimaktal k-óol wa k-ilik u kʼaʼabéetil k-natsʼikba tiʼ Dios bey xan wa k-ilik kʼaʼabéettoʼon u yáantaj tiʼ jeʼel baʼalakeʼ.
5 U jaajileʼ maʼ tuláakal máak ku yilik u kʼaʼananil u natsʼkuba tiʼ Diosiʼ, yaʼab tiʼ letiʼobeʼ minaʼan u fejoʼob yéetel u pʼekmoʼob le baʼaloʼob yaan yil yéetel Jéeobaoʼ (2 Tes. 3:1, 2; Heb. 12:16). Wa jach tu jaajil k-kʼáat natsʼba tiʼ Jéeobaeʼ, kʼaʼabéet k-xokik mantatsʼ le Bibliaoʼ, k-áantik uláakʼ máakoʼob utiaʼal ka kaambalnakoʼob tiʼ Dios yéetel k-bin mantatsʼ teʼ muchʼtáambaloʼoboʼ (Mat. 28:19, 20; Heb. 10:23-25).
«Kiʼ u yóoloʼob le máaxoʼob okʼom u yóoloʼoboʼ»
6. ¿Máaxoʼob le yaachajaʼan u yóoloʼoboʼ, yéetel baʼaxten tu yaʼalaj Jesús kiʼimak u yóoloʼob?
6 «Kiʼ u yóoloʼob le máaxoʼob okʼom u yóoloʼoboʼ, tumen Jajal Dios bíin [kiʼimakkúuntik] u yóoloʼob.» (Mat. 5:4.) «Le máaxoʼob okʼom u yóoloʼob» wa yaachajaʼan u yóoloʼoboʼ láayliʼ letiʼe «máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ». Maʼ yaachajaʼan u yóoloʼob yoʼolal le baʼaxoʼob ku muʼyajkoʼoboʼ, baʼaxeʼ bey u yuʼubikubaʼoboʼ tumen kʼeban wíinikoʼob yéetel tumen yaj tu yóol u yilkoʼob bix u muʼyaj le máakoʼob yoʼolal le kʼebanoʼ. Baʼaleʼ ¿baʼaxten túun tu yaʼalaj Jesús kiʼimak u yóoloʼob? Tumen naatsʼ yaniloʼob tiʼ Jéeoba, ku tsʼáaik u fejoʼob tiʼ Letiʼ bey xan tiʼ Jesús (Juan 3:36).
7. ¿Bix unaj k-ilik le kʼasaʼan yóokʼol kaabaʼ?
7 ¿Ku yaatal wa k-óol yoʼolal le kʼasaʼanil yaan teʼ yóokʼol kaabaʼ? ¿Bix unaj k-ilik le kʼasaʼan yóokʼol kaab yéetel le baʼaxoʼob ku yaʼalik u tsʼáaikoʼ? Le apóstol Juanoʼ tu yaʼalaj: «Tumen mix baʼal tiʼ le baʼaxoʼob ku yaʼalik u tsʼáaik yóokʼol kaaboʼ tiʼ Jajal Dios le taata u taaloʼ, baʼaleʼ tiʼ yóokʼol kaab u taal. U kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel u kaʼanal ichil ku yantal yoʼolal u baʼaliloʼob le kuxtaloʼ, tuláakal lelaʼ letiʼ le baʼaxoʼob ku yaʼalik yóokʼol kaab u tsʼáaikoʼ» (1 Juan 2:16). Baʼaleʼ ¿baʼax jeʼel u páajtal k-beetik wa k-tsʼáaik cuenta táan k-náachtal tiʼ Dios tumen tsʼoʼok u joʼopʼol k-tuukul jeʼex u máakiloʼob le yóokʼol kaabaʼ? Unaj k-payalchiʼ mantatsʼ, unaj k-xokik le Bibliaoʼ yéetel unaj k-kaxtik u yáantaj le ancianoʼoboʼ. Kex yaachajaʼan k-óol yoʼolal talamil baʼal k-aktáantikeʼ wa maas k-natsʼikba tiʼ Dioseʼ yaan u líikʼil k-óol (1 Cor. 2:12, NM; Sal. 119:52; Sant. 5:14, 15).
Kiʼ u yóoloʼob le máaxoʼob maʼ séeb u kʼuuxiloʼoboʼ
8, 9. 1) ¿Bix utúul máak maʼ tu séeb kʼuuxil? 2) ¿Baʼaxten kiʼimak u yóol le máaxoʼob maʼ tu séeb kʼuuxiloʼoboʼ?
8 «Kiʼ u yóoloʼob le máaxoʼob [maʼ séeb u kʼuuxiloʼoboʼ, NM] tumen bíin utiaʼaltoʼob le luʼumaʼ.» (Mat. 5:5.) Utúul máak maʼ séeb u kʼuuxileʼ, maʼ u kʼáat u yaʼal wa jach u pʼatmubaiʼ; maʼ u kʼáat xan u yaʼal wa chéen ka u yeʼes máak bey jach utseʼ (1 Tim. 6:11, NM). Le máax maʼ tu séeb kʼuuxileʼ ku beetik baʼax u kʼáat Jéeoba yéetel ku chaʼik u nuʼuktaʼal tumen letiʼ. Le máax yantiʼ le jatsʼuts modosaʼ maʼalob u tratartik u maasil jeʼex u yeʼesik le baʼax tu yaʼalaj le apóstol Pablo tiʼ le sukuʼunoʼob yanoʼob kaʼach Romaoʼ (xokaʼak Romailoʼob 12:17-19).
9 ¿Baʼaxten tu yaʼalaj Jesús kiʼ u yóol le máaxoʼob maʼ séeb u kʼuuxiloʼoboʼ? Tumen letiʼobeʼ «bíin utiaʼaltoʼob le luʼumaʼ». Jesuseʼ, letiʼe yáax máax ken utiaʼalint le Luʼumaʼ tumen jach tu yeʼesaj le jatsʼuts modosaʼ (Sal. 2:8; Mat. 11:29; Heb. 2:8, 9). Le máaxoʼob kun gobernar «junmúuchʼ yéetel Cristo» yéetel ku yeʼesikoʼob le jatsʼuts modosaʼ yaan xan utiaʼalintkoʼob le Luʼumaʼ (Rom. 8:16, 17). Tsʼoʼoleʼ uláakʼ yaʼabach máakoʼob maʼ séeb u kʼuuxiloʼob xaneʼ yaan u kuxtaloʼob utiaʼal mantatsʼ way Luʼum yáanal u nuʼuktaj le gobiernoaʼ (Sal. 37:10, 11).
10. ¿Baʼax talamiloʼob jeʼel u yantal wa jach séeb u pʼuʼujul máakeʼ?
10 Jeʼex Jesuseʼ toʼon xaneʼ maʼ unaj k-séeb kʼuuxiliʼ. Baʼaleʼ ¿kux túun wa jach séeb k-pʼuʼujul yéetel maʼ maʼalob bix k-tratartik u maasiliʼ? Maʼ xaaneʼ mix máak ken u yóot u bisuba t-éetel. Tsʼoʼoleʼ, le máax yantiʼ le kʼaakʼas modosaʼ maʼ tu páajtal u tsʼaʼabal u beet u ancianoi wa uláakʼ meyajoʼob teʼ múuchʼuliloʼ (1 Tim. 3:1, 3). Apóstol Pabloeʼ tu yaʼalaj tiʼ Tito ka u kʼaʼajs tiʼ le sukuʼunoʼob yanoʼob Cretaoʼ maʼ u kaxkoʼob baʼateʼel, maʼ u séeb kʼuuxiloʼob yéetel ka u chʼaʼob en cuenta baʼax ku yaʼalik u maasil (Tito 3:1, 2, NM). U jaajileʼ le máaxoʼob maʼatech u séeb kʼuuxiloʼoboʼ jach yaʼab u yáantajoʼob teʼ múuchʼuliloʼ.
«Kiʼ u yóoloʼob le máaxoʼob wiʼijoʼob yéetel ukʼajoʼob» tiʼ upʼéel toj kuxtaloʼ
11-13. 1) ¿Bix utúul máak wiʼij yéetel ukʼaj tiʼ u beetik baʼax utstutʼaan Dios? 2) ¿Bix u yáantaʼaloʼob tumen Dios le máaxoʼob u kʼáatoʼob ka yanaktiʼob upʼéel toj kuxtaloʼ?
11 «Kiʼ u yóoloʼob le máaxoʼob wiʼijoʼob yéetel ukʼajoʼob utiaʼal u beetikoʼob baʼax utstutʼaan Jajal Dios, tumen letiʼ [...] bíin áantikoʼob utiaʼal u beetoʼob beyoʼ.» (Mat. 5:6.) Jesuseʼ táan kaʼach u tʼaan tiʼ u yantal upʼéel toj kuxtal tiʼ máak yéetel u tsʼoʼokbesaʼal u yaʼalmajtʼaanoʼob Jéeoba. Le salmistaoʼ tu yaʼalaj jach u kʼáat u tsʼoʼokbes u yaʼalmajtʼaanoʼob Dios (Sal. 119:20). Jeʼex le salmistaoʼ, ¿k-kʼáat wa k-tsʼoʼokbes le baʼax ku yaʼaliktoʼon Jéeobaoʼ?
12 Jeʼex tu yaʼalil Jesuseʼ, le máaxoʼob u kʼáat ka yanaktiʼob upʼéel toj kuxtaleʼ yaan u yáantaʼaloʼob tumen Jéeoba utiaʼal ka yanaktiʼob. Lelaʼ béeychaj le ka tsʼoʼok le Pentecostés tiʼ u jaʼabil 33 le ka tu tsʼáaj Dios u kiliʼich muukʼ tiʼ le sukuʼunoʼob utiaʼal ka u yeʼesoʼob tiʼ «u máakiloʼob yóokʼol kaabeʼ yaan [...] jumpʼéel maʼalob bej» (Juan 16:8). Jéeobaeʼ tu tsʼáaj xan u kiliʼich muukʼ tiʼ jujuntúul máakoʼob utiaʼal ka u tsʼíibtoʼob le Kiliʼich Tsʼíiboʼob ich griego jach maʼalobtakoʼob «utiaʼal tsolxikin tiʼ jumpʼéel toj kuxtal[oʼ]» (2 Tim. 3:16). Tsʼoʼoleʼ, láayliʼ letiʼe kiliʼich muukʼ áantkoʼon utiaʼal ka yanaktoʼon «le túumben wíinikoʼ beetaʼan jeʼel bix u kʼáat Jajal Dioseʼ yéetel ku chíikbesaʼal yéetel jumpʼéel kuxtal tu jaajil toj» (Efe. 4:24). Jach ku líiʼsik k-óol ojéeltik yoʼolal le u kuxtal Jesús tu kʼuboʼ, le máaxoʼob ku arrepentiroʼoboʼ jeʼel u páajtal u yantaltiʼob upʼéel toj kuxtal tu táan Dioseʼ (xokaʼak Romailoʼob 3:23, 24).
13 Le máaxoʼob táan u páaʼtik u kuxtaloʼob tiʼ upʼéel paraíso way Luʼumeʼ, tiʼ kun tsʼaabiltiʼob u páajtalil u yantaltiʼob upʼéel toj kuxtal utiaʼal mantatsʼiʼ. Le maʼ béeychajkeʼ, unaj k-tsʼáaik óol k-tsʼoʼokbes mantatsʼ le baʼax utstutʼaan Jéeobaoʼ. Jesuseʼ tu yaʼalaj: «Kaxteʼex táanil u [reino] Jajal Dios yéetel le toj kuxtal utstutʼaan letiʼoʼ» (Mat. 6:33). Wa k-beetik le baʼax tu yaʼalaʼ yaan k-tsʼáaik cuenta kʼaʼabéet k-maas tsʼáaik k-óol «tiʼ u meeyjul Yuumtsil», yéetel lelaʼ jach yaan u taasiktoʼon kiʼimak óolal (1 Cor. 15:58).
¿Baʼaxten kiʼimak u yóol le máaxoʼob ku chʼaʼikoʼob óotsililoʼ?
14, 15. 1) ¿Bix jeʼel u páajtal k-chʼaʼik óotsilil tiʼ u maasileʼ? 2) ¿Baʼaxten yaan kiʼimak óolal tiʼ le máaxoʼob ku chʼaʼikoʼob óotsililoʼ?
14 «Kiʼ u yóoloʼob le máaxoʼob ku chʼaʼikoʼob óotsilil tiʼ uláakʼ máakoʼoboʼ, tumen bíin chʼaʼabak óotsilil tiʼob tumen Jajal Dios.» (Mat. 5:7.) Le máax ku chʼaʼik óotsililoʼ ku yilik u yáantik u maasil. Jeʼex Jesuseʼ, tumen tu chʼaʼaj óotsilileʼ tu tsʼakaj yaʼab máakoʼob (Mat. 14:14). Jeʼex u chʼaʼik óotsilil Jéeoba tiʼ le máaxoʼob ku arrepentiroʼoboʼ, toʼon xaneʼ k-chʼaʼik óotsilil tiʼ u maasil ken k-perdonart le baʼax kʼaas ku beetkoʼobtoʼonoʼ (Éxo. 34:6, 7; Sal. 103:10). Uláakʼ bix jeʼel k-beetkeʼ letiʼe ken k-áant yéetel ken k-líiʼs u yóol le máaxoʼob ku muʼyajoʼoboʼ. Lelaʼ maases k-beetik ken k-kʼaʼayt le maʼalob péektsil tiʼ le máakoʼoboʼ. Beyoʼ k-chʼaʼik óotsilil tiʼ le máakoʼob jeʼex tu beetil Jesús «ka joʼopʼ u kaʼansiktiʼob yaʼabkach baʼaloʼob[oʼ]» (Mar. 6:34).
15 Toʼoneʼ k-ilik jach jaaj le baʼax tu yaʼalaj Jesusaʼ: «Kiʼ u yóoloʼob le máaxoʼob ku chʼaʼikoʼob óotsilil tiʼ uláakʼ máakoʼoboʼ, tumen bíin chʼaʼabak óotsilil tiʼob tumen Jajal Dios». Wa k-chʼaʼik óotsilil tiʼ u maasileʼ yaan xan u chʼaʼabaltoʼon óotsilil. Tsʼoʼoleʼ ken u pʼis óoltoʼon Jéeobaeʼ yaan u chʼaʼik en cuentai wa t-chʼaʼaj óotsilil (Sant. 2:13). Jeʼex k-ilkoʼ, chéen le máaxoʼob ku chʼaʼikoʼob óotsilil yaan u saʼasaʼal u kʼebanoʼob yéetel yaan u tsʼaʼabaltiʼob le kuxtal minaʼan u xuuloʼ (Mat. 6:15).
¿Baʼaxten yaan kiʼimak óolal tiʼ le máaxoʼob sak u puksiʼikʼaloʼoboʼ?
16. ¿Bix le máaxoʼob «sak u puksiʼikʼaloʼoboʼ», yéetel bix u yilkoʼob Dios?
16 «Kiʼ u yóoloʼob le máaxoʼob sak u puksiʼikʼaloʼoboʼ, tumen letiʼobeʼ bíin u yiloʼob Jajal Dios.» (Mat. 5:8.) Wa yantoʼon upʼéel sak puksiʼikʼaleʼ yaan u tsʼaʼabal cuenta tiʼ bix k-tratartik u maasil yéetel baʼax modosi yantoʼon. Tsʼoʼoleʼ yaan «k-yaabil[tikba] t-baatsil yéetel jumpʼéel yaakunaj síijaʼan tiʼ jumpʼéel sasak puksiʼikʼal» (1 Tim. 1:5). Wa k-beetkeʼ yaan k-antal ichil le máaxoʼob «bíin u yiloʼob Jajal Dios[oʼ]». Lelaʼ maʼ u kʼáat u yaʼal wa tuláakloʼon ken k-il Dios jeʼex u yilaʼal utúul wíinikeʼ, tumen Jéeobaeʼ ku yaʼalik: «Mix máak jeʼel u páajtal u yilik u táan in wich, wa maʼ yaan u kíimil» (Éxo. 33:20). Wa k-xakʼaltik le jatsʼuts modos anchaj tiʼ u Hijooʼ yaan u páajtal k-ilik Jéeoba, tumen Jesuseʼ tu yaʼalaj: «Le máax ku yilken teneʼ ku yilik le Taataoʼ». Letiʼeʼ tu yaʼaleʼ ken k-beet le baʼax tu beetajoʼ bey ka k-il Dioseʼ tumen letiʼeʼ tu chíikbesaj u modos u Taata (Juan 14:7-9). Uláakʼ bix jeʼel u páajtal k-ilik Jéeobaeʼ letiʼe ken tuukulnakoʼon tiʼ le áantaj ku tsʼáaiktoʼon teʼ kʼiinoʼobaʼ (Job 42:5). Baʼaleʼ le máaxoʼob yéeyaʼanoʼoboʼ, le ken kʼuchkoʼob teʼ kaʼanoʼ yaan u yilkoʼob jach bix Jéeoba (1 Juan 3:2).
17. ¿Baʼax ku beetik le máaxoʼob yantiʼob upʼéel sak puksiʼikʼaloʼ?
17 Le máax yaan upʼéel sak puksiʼikʼal tiʼeʼ maʼatech u náaysik u yóol yéetel le baʼaxoʼob u pʼekmaj Jéeobaoʼ (1 Cró. 28:9; Isa. 52:11). Wa bey yanil k-puksiʼikʼaloʼ, le baʼaxoʼob ken k-aʼal yéetel ken k-beetoʼ yaan u beetik u kiʼimaktal u yóol Jéeoba yéetel yaan k-eʼesik jach tu jaajil táan k-meyajtik jeʼex u kʼáateʼ.
Le máaxoʼob yantiʼob jeetsʼel óolaloʼ ku kʼuchul u beetubaʼob u paalaloʼob Dios
18, 19. ¿Bix le máaxoʼob yaan jeetsʼel óolal tiʼoboʼ?
18 «Kiʼ u yóoloʼob le máaxoʼob ku meyajoʼob utiaʼal ka yanak jeetsʼel óolal ichil máakoʼob, tumen bíin aʼalaʼakeʼ, letiʼobeʼ u paalaloʼob Jajal Dios.» (Mat. 5:9.) Le máaxoʼob ku meyajoʼob utiaʼal ka yanak jeetsʼel óolal ichil le máakoʼoboʼ, ku kʼaj óoltaʼaloʼob yoʼolal bix u kuxtaloʼob. Wa ku beetaʼal kʼaas tiʼobeʼ maʼ tu sutkoʼob u jeel, baʼaxeʼ ku beetikoʼob «uts mantatsʼ [...] tiʼ tuláakal» (1 Tes. 5:15).
19 Le máaxoʼob «ku meyajoʼob utiaʼal ka yanak jeetsʼel óolal ichil máakoʼob[eʼ]» maʼatech u kʼiʼitbeskoʼob tsikbal «ku beetik u yantal kʼuuxiltáambal» (Pro. 16:28). Tsʼoʼoleʼ mantatsʼ ku yilkoʼob u yantaltiʼob «jeetsʼel óolal yéetel tuláakal máak» (Heb. 12:14).
20. ¿Máaxoʼob tsʼoʼok u kʼuchul u beetubaʼob «u paalaloʼob Jajal Dios», yéetel máaxoʼob xan kun kʼuchul u beetubaʼob beyoʼ?
20 Le máaxoʼob yaan jeetsʼel óolal tiʼoboʼ yaan u kʼuchul u beetubaʼob «u paalaloʼob Jajal Dios». Jéeobaeʼ tsʼoʼok u yilik bey u paalal le máaxoʼob yéeyaʼanoʼob utiaʼal u binoʼob kaʼanoʼ, le oʼolal ku yaʼalaʼal «u paalaloʼob» yéetel jach maʼalob u biskubaʼob tu yéetel. Yantiʼob le jatsʼuts páajtalilaʼ tumen tsʼoʼok u tsʼáaik u fejoʼob tiʼ Jesús yéetel jach u kʼubmaj u yóol u meyajtoʼob le «u [Diosil] yaakunaj yéetel jeetsʼel óolal[oʼ]» (2 Cor. 13:11; Juan 1:12). Baʼaleʼ ¿baʼax túun kun úuchul yéetel le «uláakʼ tamanoʼob[oʼ]»? Teʼ Mil jaʼaboʼoboʼ, utiaʼal letiʼobeʼ Jesuseʼ yaan u kʼuchul u beetuba «u Yuumbil [wa Taata] minaʼan xuʼulul tiʼ»; baʼaleʼ le ken tsʼoʼokok le Mil jaʼaboʼobaʼ Jesuseʼ yaan u tsʼáaikuba yáanal u páajtalil Jéeoba, yéetel le máaxoʼob kun pʼáatloʼob kuxtal way Luʼumeʼ yaan xan u kʼuchul u beetubaʼob u paalaloʼob Dios (Juan 10:16; Isa. 9:6; Rom. 8:21; 1 Cor. 15:27, 28).
21. ¿Baʼax ken k-beet wa kuxaʼanoʼon tu yoʼolal kiliʼich muukʼ?
21 «Wa kuxaʼanoʼon tu yoʼolal Kiliʼich [muukʼeʼ]», yaan u tsʼaʼabal cuenta yantoʼon jeetsʼelil. Tsʼoʼoleʼ maʼ ken k-kaxant «baʼateʼel t-baatsiliʼ» (Gal. 5:22-26). Baʼaxeʼ yaan k-ilik k-kuxtal «ich jeetsʼel yéetel tuláakal máak» (Rom. 12:18).
Kiʼimak k-óol kex tumen k-chʼaʼapachtaʼal
22-24. 1) ¿Baʼaxten yaan kiʼimak óolal tiʼ le máaxoʼob ku chʼaʼapachtaʼaloʼoboʼ? 2) ¿Baʼax ken k-kan teʼ tuláakʼ kaʼapʼéel xookoʼoboʼ?
22 «Kiʼ u yóoloʼob le máaxoʼob ku mukʼyajtikoʼob chʼaʼapachtajil tu yoʼolal u beetikoʼob baʼax utstutʼaan Jajal Dios, tumen utiaʼaloʼob u [reinoi] kaʼan.» (Mat. 5:10.) Tsʼoʼoleʼ Jesuseʼ tu yaʼalaj xan: «Kiʼ a wóoleʼex le ken poʼochʼokeʼex tumen máakoʼob, ken beetaʼak tiʼ teʼex baʼaloʼob kʼaastak, bey xan ken líikʼesaʼak ta wóokʼoleʼex tuláakal tuusoʼob tin woʼolal. Kiʼichajak a wóoleʼex, tumen bíin a kʼameʼex jumpʼéel nojoch boʼolal teʼ kaʼanoʼ, tumen bey xan chʼaʼapachtaʼabikoʼob le [profetaʼob] taaloʼob táanil tiʼ teʼexoʼ» (Mat. 5:11, 12).
23 Jeʼex le profetaʼob úuchjeakiloʼ, toʼon xaneʼ k-ojleʼ le máakoʼoboʼ yaan u tʼaanoʼob kʼaas t-contra yéetel yaan u chʼaʼapachtkoʼonoʼob tumen táan k-beetik «baʼax utstutʼaan Jajal Dios». Baʼaleʼ wa ku chúukpajal k-óol aktáant le talamiloʼobaʼ yaan u taasiktoʼon kiʼimak óolal k-ojéeltik maʼalob u yilik Jéeoba le baʼax k-beetkoʼ (1 Ped. 2:19-21). Le muʼyajiloʼob k-aktáantkoʼ mix bikʼin ken u luʼstoʼon le kiʼimak óolal k-uʼuyik ikil k-meyajtik Jéeobaoʼ. Maʼ tu luʼsik xan le kiʼimak óolal yaan tiʼ le máaxoʼob ku binoʼob gobernar yéetel Cristo teʼ kaʼanoʼ mix tiʼ le máaxoʼob kun pʼáatloʼob kuxtal way Luʼumeʼ. Tuláakal le baʼaloʼobaʼ ku yeʼesikoʼobeʼ maʼalob yaniloʼob tu táan Jéeoba yéetel jach kiʼimak u yóoloʼob.
24 Baʼaleʼ yaʼab uláakʼ baʼaloʼob jeʼel k-kanik tiʼ le kaʼansaj tu beetaj Jesús teʼ le puʼukoʼ. Teʼ tuláakʼ kaʼapʼéel xookoʼoboʼ yaan k-xakʼaltik uláakʼ baʼaloʼob tu kaʼansaj Jesús. Yáaxeʼ yaan k-ilik bix jeʼel k-tsʼáaik ichil k-kuxtal le baʼaxoʼob tu kaʼansoʼ.
¿Baʼax jeʼel a núukikeʼ?
• ¿Baʼaxten kiʼimak u yóol «le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ»?
• ¿Baʼaxten yaan kiʼimak óolal tiʼ le máaxoʼob maʼ tu séeb kʼuuxiloʼoboʼ?
• ¿Baʼaxten yaan kiʼimak óolal tiʼ le máaxoʼob ku chʼaʼapachtaʼaloʼoboʼ?
• ¿Máakalmáak tiʼ le nueve baʼaloʼob tu yaʼalaj Jesús maas utschaj ta wichoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 7]
Le nueve baʼaloʼob ku taasik kiʼimak óolal tiʼ máak tu yaʼalaj Jesusoʼ, láayliʼ xan jeʼel u taasiktoʼon utsiloʼobeʼ
[U tsolajil le oochel teʼ táan juʼun 8]
Upʼéel bix k-chʼaʼik óotsilil tiʼ le máakoʼoboʼ letiʼe ken k-kʼaʼayttiʼob le maʼalob péektsiloʼ