Le máax bisik upʼéel toj kuxtaleʼ yaan u nojbeʼenkúuntik Dios utiaʼal mantatsʼ
Le máax bisik upʼéel toj kuxtaleʼ yaan u nojbeʼenkúuntik Dios utiaʼal mantatsʼ
«¡Máak tojeʼ mantatsʼ bíin kʼaʼajsaʼak! [...] Mantatsʼ uts u puksiʼikʼal.» (SAL. 112:6, 9)
1. 1) ¿Baʼax maʼalob baʼal táan u páaʼtik le máaxoʼob toj u kuxtaloʼoboʼ? 2) ¿Baʼax kʼáatchiʼil ku beetaʼal yoʼolal le toj kuxtaloʼ?
¡LE MÁAXOʼOB bisik upʼéel toj kuxtaloʼ jach maʼalob baʼax ku páaʼtikoʼob! Mix bikʼin kun xuʼulul u kaambaloʼob tiʼ u jatsʼuts modos Jéeoba. Jeʼex kun bin u maas kʼaj óoltkoʼob le baʼaxoʼob u beetmoʼ bey kun maas taaktal u nojbeʼenkúuntkoʼob. Le Salmo 112 ku yaʼalikeʼ utiaʼal ka u kʼam máak le jatsʼuts baʼaloʼobaʼ kʼaʼabéet u bisik upʼéel toj kuxtal. Baʼaleʼ utúul kʼeban wíinikeʼ, ¿jeʼel u páajtal u bisik upʼéel toj kuxtal tu táan Jéeoba, le Dios jach toj baʼax ku beetik yéetel kiliʼichoʼ? U jaajileʼ kex k-tsʼáaik k-óol beet baʼax tojeʼ mantatsʼ k-beetik baʼax maʼ maʼalobiʼ, yéetel yaan kʼiineʼ k-lúubul tiʼ nukuch kʼebanoʼob (Rom 3:23; Sant. 3:2).
2. ¿Baʼax kaʼapʼéel baʼal tu beetaj Jéeoba yoʼolal u nojoch yaabilaj?
2 ¿Baʼax túun tsʼoʼok u beetik Jéeoba utiaʼal ka páajchajak k-bisik upʼéel toj kuxtal tu táan? Yáaxeʼ, tu yoʼolal u nojoch yaabilajeʼ tu máansaj u kuxtal u Hijo tu jobnel María utiaʼal ka síijik bey máax minaʼan u kʼebaneʼ (Luc. 1:30-35). Tsʼoʼoleʼ le ka kíimsaʼab Jesuseʼ, Jéeobaeʼ tu kaʼa kuxkíintaj utiaʼal ka xiʼik tukaʼatéen teʼ kaʼanoʼ (1 Ped. 3:18).
3. ¿Baʼaxten yéetel kiʼimak óolal tu tsʼáaj Jéeoba tiʼ u Hijo le kuxtal minaʼan u xuul teʼ kaʼanoʼ?
3 Jéeobaeʼ tu tsʼáaj tiʼ Jesús upʼéel kuxtal maʼ tu páajtal u xuʼulsaʼal, lelaʼ upʼéel baʼal minaʼan kaʼach tiʼ táanil tiʼ u taal way Luʼumeʼ (Heb. 7:15-17, 28). Jéeobaeʼ yéetel kiʼimak óolal tu tsʼáaj tiʼ u Hijo le jatsʼuts páajtalilaʼ, tumen chúukpaj u yóol tak ka tu aktáantaj nukuch talamiloʼob. Le úuchik u chúukpajal u yóol Jesusoʼ tu yeʼesaj maʼ jaaj wa wíinikeʼ chéen ku meyajtik Dios yoʼolal le utsiloʼob ku kʼamik tiʼ, jeʼex u yaʼalmil Satanasoʼ (Pro. 27:11).
4. 1) ¿Baʼax tu beetaj Jesús t-oʼolal le ka kʼuch teʼ kaʼanoʼ, yéetel baʼax tu beetaj Jéeoba? 2) ¿Bix a wuʼuykaba yoʼolal le baʼax tsʼoʼok u beetik Jéeoba yéetel Jesús ta woʼolaloʼ?
4 Le ka kʼuch teʼ kaʼanoʼ, Jesuseʼ ook «tu táan Jajal Dios t-oʼolal» utiaʼal u kʼubiktiʼ u tojol «u kʼiʼikʼel». Jéeoba túuneʼ tu kʼamaj bey upʼéel boʼol utiaʼal «u saʼatsaʼal k-kʼebanoʼob[eʼ]». Le oʼolal ku páajtal k-bisik upʼéel toj kuxtal bey xan «k-meyajtik le kuxaʼan Jajal Diosoʼ». Lelaʼ unaj u péekskoʼon k-aʼal xan le tʼaanoʼob ku chíikpajal tu káajbal le Salmo 112, tuʼux ku yaʼalik ka nojbeʼenkúuntaʼak Jéeobaoʼ (Heb. 9:12-14,24; 1 Juan 2:2).
5. 1) ¿Baʼax unaj k-beetik utiaʼal maʼ u xuʼulul k-kʼaʼamal tumen Dios? 2) ¿Bix tsʼíibtaʼanil ich hebreo le Salmo 111 yéetel 112?
5 Utiaʼal maʼ u xuʼulul k-kʼaʼamal tumen Dioseʼ maʼ unaj u jáawal k-tsʼáaik k-fe tiʼ le u kʼiʼikʼel Cristo tu wekaj t-oʼolaloʼ. Maʼ unaj u máan mix upʼéel kʼiin wa maʼ k-tsʼáaik u nib óolalil tiʼ Jéeoba yoʼolal le nojoch yaabilaj ku yeʼesiktoʼonoʼ (Juan 3:16). Tsʼoʼoleʼ unaj k-jóoʼsik u tiempoi utiaʼal k-xakʼalxoktik le Bibliaoʼ yéetel k-tsʼáaik ichil k-kuxtal le baʼax k-kanikoʼ. Le Salmo 112 ku tsʼáaik maʼalob tsolnuʼuk tiʼ le máaxoʼob u kʼáat u bisoʼob upʼéel toj kuxtal tu táan Diosoʼ. U jaajileʼ le Salmo 111 yéetel le 112 ku tʼaanoʼob tiʼ upʼéeliliʼ baʼal. Tu kaʼapʼéelileʼ ku káajloʼob yéetel le tʼaanoʼobaʼ: «¡Nojbeʼenkúuntaʼak Jah!» wa «¡Aleluya!». Le baʼaxoʼob ku yaʼalik ken tsʼoʼokok le tʼaanoʼobaʼ, ich hebreoeʼ veintidós u xóotʼoloʼob, cada upʼéeleʼ ku káajal yéetel upʼéel tiʼ le letraʼob ku taasik le alfabeto hebreooʼ. *
Upʼéel baʼax ku taasiktoʼon kiʼimak óolal
6. ¿Baʼax utsiloʼob ku kʼamik le «máax toj u kuxtal» ku chʼaʼachiʼitaʼal teʼ Salmo 112?
6 «Uts yanil máax tsikik [wa ku chʼaʼik saajkilil tiʼ, NM] Yuumtsil yéetel uts tu yóol u yaʼalmajtʼaanoʼob. U chʼiʼibaloʼob máax toj u kuxtaleʼ yaan u bin utsil tiʼob yaan xan u yantal páajtalil tiʼob teʼ luʼumaʼ.» (Sal. 112:1, 2.) Le apóstol Pablooʼ tu yaʼaleʼ le baʼax ku yaʼalik le Salmo 112:9, tiʼ le sukuʼunoʼob teʼ yáax siglo ku béeytaloʼ (xokaʼak 2 Corintoiloʼob 9:8, 9). Le salmoaʼ jach maʼalob u yeʼesik bix jeʼel u yantal kiʼimak óolal tiʼ le máaxoʼob tsaypachtik Cristo teʼ kʼiinoʼobaʼ.
7. ¿Baʼaxten unaj k-chʼaʼik upʼéel maʼalob saajkilil tiʼ Dios, yéetel bix unaj k-ilik le baʼax ku yaʼalik Diosoʼ?
7 Jeʼex u yeʼesik le Salmo 112:1, le máaxoʼob meyajtik Jéeobaoʼ ku taasik kiʼimak óolal tiʼob u chʼaʼikoʼob saajkil tiʼ. Le maʼalob saajkilaʼ ku yáantaj utiaʼal maʼ u yantal mix baʼal u yiloʼob yéetel u kʼasaʼan yóokʼol kaab Satanás. Tsʼoʼoleʼ jach utstutʼaan u xokkoʼob le Bibliaoʼ yéetel u beetkoʼob le baʼax ku yaʼalik Diosoʼ. Ichil lelaʼ táakaʼan u kʼaʼaytaʼal u maʼalob péektsilil le Reino tiʼ tuláakal yóokʼol kaaboʼ. Tsʼoʼoleʼ le máaxoʼob bisik upʼéel toj kuxtaloʼ ku yáantkoʼob u maasil utiaʼal ka kaambalnakoʼob tiʼ Jéeoba yéetel ku yaʼalikoʼob tiʼ le kʼasaʼan máakoʼob ka u kʼex u kuxtaloʼob utiaʼal maʼ u xuʼulsaʼal tiʼoboʼ (Eze. 3:17, 18; Mat. 28:19, 20).
8. 1) ¿Baʼax utsiloʼob tsʼoʼok u kʼamik bejlaʼa le máaxoʼob jach u tsʼaamaj u yóol u meyajtoʼob Diosoʼ? 2) ¿Baʼax utsiloʼob ken u kʼam le máaxoʼob ku páaʼtik u pʼáatloʼob kuxtal way Luʼumeʼ?
8 Tumen jach u tsʼaamaj u yóol u beetoʼob le meyajaʼ, bejlaʼeʼ le máaxoʼob meyajtik Diosoʼ tsʼoʼok u chukik maas tiʼ siete millones utúulaloʼob. Bey túunoʼ mix máak jeʼel u páajtal u yaʼalik wa jach upʼíit le máaxoʼob meyajtik Dios bejlaʼoʼ (Juan 10:16; Apo. 7:9, 14). Tsʼoʼoleʼ, yaan u kʼamikoʼob maas yaʼab utsiloʼob ken u béeykunt Jéeoba le baʼax u tukulmoʼ. Tuláakal le máaxoʼob meyajtik Dios táan u páaʼtik u kuxtaloʼob way Luʼumeʼ yaan u kanáantaʼaloʼob tiʼ le «nojoch yaayaj óolaloʼ», le máakoʼobaʼ letiʼob «le túumben luʼum» «tuʼux tuláakal baʼal toj» kun beetbiloʼ. Le máaxoʼob kun salvartbiloʼob tiʼ le Armagedonoʼ «yaan u bin utsil tiʼob». Letiʼobeʼ yaan u kʼamikoʼob le máaxoʼob kun kaʼa kuxkíintbiloʼoboʼ. ¿Máasaʼ jach jatsʼuts le baʼax ku páaʼtikoʼoboʼ? Tsʼoʼoleʼ le máaxoʼob utstutʼaan u tsʼáaikoʼob ichil u kuxtaloʼob u yaʼalmajtʼaanoʼob Jéeobaeʼ yaan u láaj luʼsaʼal u kʼebanoʼob yéetel yaan u kʼamkoʼob «u nojbeʼen jáalkʼabtajil u paalaloʼob Jajal Dios» (2 Ped. 3:13; Rom. 8:21).
Meyajnaktoʼon tubeel le baʼaloʼob yantoʼonoʼ
9, 10. Le máaxoʼob yéeyaʼanoʼob bey xan le uláakʼ tamanoʼoboʼ, ¿bix tsʼoʼok u meyajtiʼob le ayikʼalil yantiʼoboʼ, yéetel baʼax ken u kʼamoʼob wa ku chúukpajal u yóoloʼob?
9 «Tiʼ u yotocheʼ yaan u yantal yaʼabkach ayikʼalil, yéetel mantatsʼ uts u puksiʼikʼal. Bey sáasilil ichil éekʼjochʼeʼenileʼ ku jóopbal utiaʼal utsil máakoʼob. Ku chʼaʼa óotsilil, j-muun óol yéetel toj u kuxtal.» (Sal. 112:3, 4.) Jujuntúul tiʼ le máaxoʼob meyajt Dios úuchjeakiloʼ jach ayikʼaloʼob. Baʼaleʼ, kex óotsil máakeʼ, wa maʼalob yanil tu táan Dioseʼ jeʼel xan u páajtal u yaʼalaʼaleʼ ayikʼal. Tsʼoʼoleʼ, u jaajileʼ óoliʼ tuláakal le máaxoʼob meyajtik Diosoʼ maʼ ayikʼaloʼobiʼ le oʼolal ku mixbaʼalkúuntaʼaloʼob jeʼex úuchik tu kʼiiniloʼob Jesusoʼ (Luc. 4:18; 7:22; Juan 7:49). Baʼaleʼ kex óotsiloʼoneʼ, tuláakloʼon jeʼel k-ayikʼaltal tu táan Dioseʼ (Mat. 6:20; 1 Tim. 6:18, 19; xokaʼak Santiago 2:5).
10 Le máaxoʼob yéeyaʼanoʼob utiaʼal u binoʼob kaʼan bey xan le uláakʼ tamanoʼoboʼ ku kaʼanskoʼob tiʼ uláakʼ máakoʼob le baʼaxoʼob tsʼoʼok u kankoʼob tiʼ Dios ku keʼetel yéetel ayikʼaliloʼoboʼ. Teʼ kʼasaʼan yóokʼol kaabaʼ, letiʼobeʼ beyoʼob «sáasilil ichil éekʼjochʼeʼenileʼ ku jóopbal utiaʼal utsil máakoʼob». ¿Bix u beetkoʼob? Letiʼe ken u yáantoʼob le máakoʼob utiaʼal ka yanaktiʼob le ojéelaj yéetel le kʼaj óolal ku taal tiʼ Diosoʼ. Le máaxoʼob ilik u xuʼulsik u kʼaʼaytaʼal u maʼalob péektsilil le Reinooʼ maʼ kun béeytaloʼob, tumen le utsiloʼob ken u taas le meyajaʼ utiaʼal «mantatsʼ». Le máaxoʼob meyajtik Jéeobaoʼ wa ku chúukpajal u yóol u aktáantoʼob le talamiloʼoboʼ u yojloʼob yaan u kʼamikoʼob le kuxtal minaʼan u xuuloʼ.
11, 12. Le máaxoʼob meyajtik Jéeobaoʼ, ¿bix u meyajtiʼob le baʼaxoʼob yantiʼoboʼ?
11 Le sukuʼunoʼob yéeyaʼanoʼob bey xan le «yaʼabkach máakoʼoboʼ» tsʼoʼok u tsʼáaikoʼob yéetel kiʼimak óolal le baʼaxoʼob yantiʼob utiaʼal u yáantajoʼoboʼ (Apo. 7:9). Le Salmo 112:9 ku yaʼalik yoʼolal le máax toj u kuxtaloʼ: «Ku tʼoxik siibal tiʼ óotsiloʼob». Le máaxoʼob meyajtik Dios bejlaʼaʼ ku yilik u paklan áantkubaʼob yéetel baʼaxoʼob kʼaʼabéettiʼob yéetel ku yilik u yáantkoʼob u maasil. Ku meyajtiʼob xan le baʼaxoʼob yantiʼob utiaʼal u yáantajoʼob teʼ tuʼuxoʼob ku yúuchul upʼéel nojoch loobiloʼ. Jeʼex úuchik u yaʼalik Jesusoʼ leloʼ ku taasik kiʼimak óolal tiʼob (xokaʼak Beetaʼanoʼob [Hechos] 20:35 yéetel 2 Corintoiloʼob 9:7).
12 Tuukulnakoʼon xan tiʼ bukaʼaj taakʼin ku xuʼupul utiaʼal u beetaʼal ich 172 jejeláas tʼaanoʼob le revistaaʼ, tsʼoʼoleʼ yaʼab tiʼ le máaxoʼob xokikoʼ óotsiloʼob. Le revistaaʼ ku jóoʼsaʼal xan utiaʼal u yáantaʼal le máaxoʼob kóokoʼob yéetel maʼ tu páajtal u tʼaanoʼoboʼ, bey xan utiaʼal le máaxoʼob minaʼan u sáasiloʼoboʼ.
Utsoʼob yéetel toj baʼax ku beetikoʼob
13. ¿Máaxoʼob jach nojoch bix u yeʼesik u yutsiloʼob, yéetel bix jeʼel k-beetik jeʼex letiʼobeʼ?
13 «Le utsil máakoʼ ku tsʼáaik baʼal majnil yéetel utsil puksiʼikʼal.» (Sal. 112:5.) U jaajileʼ, tsʼoʼok k-ilkeʼ yaʼab tiʼ le máaxoʼob tsʼáaik áantajoʼ maʼatech u beetkoʼob tumen ku chʼaʼikoʼob óotsilil wa tumen utsoʼob. Jujuntúuloʼobeʼ ku beetkoʼob chéen utiaʼal ka ilaʼakoʼob tumen u maasil, yéetel uláakʼoʼobeʼ ku beetkoʼob chéen tumen ku yaʼalaʼaltiʼob. U jaajileʼ óoliʼ mix máak kʼamik yéetel kiʼimak óolal le áantaj ku tsʼaʼabal tumen utúul máax kʼaas bix u tratartik u maasil bey xan wa maʼ yéetel kiʼimak óolal ku beetkiʼ. Baʼaleʼ ¿máasaʼ jach ku kiʼimaktal u yóol máak ken áantaʼak tumen utúul máax jach uts? Jéeobaeʼ ku yeʼesik bix unaj u yeʼesik u yutsil máak tiʼ tuláakal, letiʼeʼ ku beetik yéetel kiʼimak óolal yéetel maʼ chéen upʼíit ku tsʼáaikiʼ (1 Tim. 1:11, Sant. 1:5, 17). Jesús xaneʼ tu yeʼesaj xan u yutsil jeʼex u beetik Jéeobaeʼ (Mar. 1:40-42). Wa k-kʼáat pʼáatal maʼalobil tu táan Dioseʼ unaj k-eʼesik utsil yéetel kiʼimak óolal bey xan yéetel u jaajil k-óol, lelaʼ maases unaj k-beetik ken k-kʼaʼayt le maʼalob péektsiloʼ bey xan ken k-áant le máakoʼob kaambal tiʼ Jéeobaoʼ.
14. ¿Bix jeʼel k-beetik baʼax «toj» mantatsʼeʼ?
14 «Ku nuʼuktik u baʼalubaʼob yéetel tojil.» (Sal. 112:5.) Jeʼex tu yaʼalil Jesuseʼ le palitsil chúukpajaʼan u yóol yéetel yaan u naʼatoʼ ku beetik baʼax ku yaʼalik Jéeoba ken u kanáant le baʼaxoʼob kʼubéentaʼantiʼoʼ (xokaʼak Lucas 12:42-44). Bey u yeʼesik le nuʼuktaj ku tsʼáaik tiʼ le ancianoʼob utiaʼal ka u yiloʼob baʼax unaj beetaʼal ken lúubuk utúul sukuʼun tiʼ upʼéel nojoch kʼebanoʼ. Le tojil ku yeʼesik le palitsil chúukpajaʼan u yóol yéetel yaan u naʼatoʼ chíikaʼan xan tiʼ le tsolnuʼukoʼob ku tsʼáaik utiaʼal u nuʼuktaʼal le múuchʼuliloʼoboʼ, le najoʼob tuʼux yaan le misioneroʼoboʼ bey xan u najiloʼob Betel yaan tiʼ tuláakal yóokʼol kaab. U jaajileʼ maʼ chéen le ancianoʼob unaj u beetkoʼob baʼax tojoʼ, tuláakloʼon unaj k-beetik ken k-bisba yéetel u maasil sukuʼunoʼob, yéetel unaj k-beetik baʼax toj tak tiʼ le máaxoʼob maʼatech u meyajtkoʼob Diosoʼ, lelaʼ bey unaj k-beetik tak tiʼ baʼaloʼob yaan yil yéetel taakʼin (xokaʼak Miqueas 6:8-11).
Utsiloʼob utiaʼal le máaxoʼob toj u kuxtaloʼoboʼ
15, 16. 1) Le máaxoʼob yantiʼob upʼéel toj kuxtaloʼ, ¿bix u yuʼubikubaʼob yoʼolal le baʼaloʼob kʼaastak ku yúuchul teʼ kʼiinoʼobaʼ? 2) ¿Baʼax maʼ xuʼuluk u beetik le máaxoʼob meyajtik Diosoʼ?
15 «Le oʼolaleʼ mix bikʼin bíin lúubuk. ¡Máak tojeʼ mantatsʼ bíin kʼaʼajsaʼak! Maʼ sajak tiʼ u tsikbalil baʼax kʼaas ku yúuchuliʼ; u puksiʼikʼaleʼ jejetsʼkil yanil, u kʼubmaj u yóol tiʼ Yuumtsil. U puksiʼikʼaleʼ jejetsʼkil yanil; minaʼan sajakil tiʼ; yéetel páajtalil ku cheʼej paktik u j-pʼeekoʼob.» (Sal. 112:6-8.) Mix utéen uʼuyaʼak u yaʼalaʼal u sen úuchul yaʼab baʼaloʼob kʼaastak jeʼex teʼ kʼiinoʼobaʼ. Mantatsʼ k-uʼuyik u yúuchul tʼaan tiʼ baʼateltáambaloʼob, terrorismo, yaayaj kʼojaʼaniloʼob mix utéen ilaʼakoʼob, wa yaayaj kʼojaʼaniloʼob yáax yanchajaʼanoʼob, ookolil, óotsilil yéetel u kʼaskúuntaʼal le Luʼumaʼ. Le máaxoʼob bisik upʼéel toj kuxtaloʼ ku chiʼichnaktaloʼob yoʼolal le baʼaloʼobaʼ, baʼaleʼ maʼ saajkoʼob yoʼolal baʼax ku taal u kʼiiniliʼ, tumen «u puksiʼikʼal[oʼobeʼ] jejetsʼkil yanil». U yojloʼobeʼ maʼ kun xáantaleʼ teʼ túumben luʼum ken u tsʼáa Diosoʼ maʼ kun antal le baʼaloʼobaʼ. Tsʼoʼoleʼ wa ku yúuchultiʼob upʼéel nojoch loobeʼ, maʼ tu lúubul u yóoloʼob jeʼex u maasileʼ, tumen u yojloʼob yaan u yáantaʼaloʼob tumen Jéeoba. Letiʼeʼ mix bikʼin ken u chaʼa u lúubloʼob, baʼaxeʼ yaan u yáantkoʼob utiaʼal ka u aktáantoʼob le talamiloʼoboʼ (Fili. 4:13).
16 Le máaxoʼob toj u kuxtaloʼoboʼ ku pʼektaʼaloʼob yéetel ku yaʼalaʼal baʼaloʼob tu contraʼob, baʼaleʼ le máaxoʼob pʼekmiloʼoboʼ mix bikʼin ken u beet u xuʼulul u kʼaʼaytajoʼob. Maʼ xuʼuluk xan u tsʼáaik u yóol u beetoʼob le meyaj kʼubéentaʼantiʼoboʼ: u kʼaʼaytkoʼob le maʼalob péektsiloʼ yéetel u kaʼanskoʼob le máaxoʼob taak u maas kaambaloʼob tiʼ le Bibliaoʼ. U jaajileʼ jeʼex u bin u náatsʼal u kʼiinil le xuʼulsajiloʼ, yaan u maas pʼektaʼaloʼob yéetel yaan u chʼaʼapachtaʼaloʼob, baʼaleʼ lelaʼ yaan u tsʼoʼokol ken u yóot Gog tiʼ Magog wa Satanás u xuʼulsoʼob. Le máaxoʼob túun meyajtik Jéeobaoʼ yaan u yilkoʼob bix kun xuʼulsbil le máaxoʼob pʼekmiloʼoboʼ. ¿Máasaʼ jach jatsʼuts ka u yil máak bix ken u kiliʼichkúuntik u kʼaabaʼ Jéeoba? (Eze. 38:18, 22, 23.)
«Ku líikʼesik u táan joʼolal yéetel tsiikil»
17. Le máaxoʼob yantiʼob upʼéel toj kuxtaloʼ, ¿bix ken u «líikʼe[sil] u táan joʼola[loʼob] yéetel tsiikil»?
17 ¿Máasaʼ jach yaan u kiʼimaktal k-óol ken páajchajak k-múul nojbeʼenkúuntik Jéeoba le ken xuʼulsaʼak tiʼ Satanás bey xan tiʼ u kʼasaʼan yóokʼol kaab? Lelaʼ letiʼe baʼax ken u yil le máaxoʼob maʼ tu xuʼulul u biskoʼob upʼéel toj kuxtal tu táan Diosoʼ. Letiʼobeʼ maʼ kun xuʼulsbiltiʼob paʼteʼ yéetel Satanás, baʼaxeʼ yaan u «líikʼesik u táan joʼola[loʼob] yéetel tsiikil» (Sal. 112:9). Yaan u jach kiʼimaktal u yóoloʼob ken xuʼulsaʼak tumen Jéeoba tiʼ tuláakal le máaxoʼob u tsʼaamubaʼob tu contra u gobernacionoʼ.
18. ¿Bix kun béeytal u tsʼook tʼaaniloʼob le Salmo 112?
18 «Le kʼaakʼas máakoʼ le ken u yileʼ ku pʼuʼujul; ichil u x-maʼ muukʼaleʼ ku jajachʼ koj. U tsʼíibolaj le kʼaakʼas máakoʼoboʼ ku mixbaʼaltal.» (Sal. 112:10.) Maʼ ku xáantaleʼ le máaxoʼob pʼekmil u kaajal Jéeobaoʼ yaan u pʼáatloʼob «x-maʼ muu[kʼil]». Le u tsʼíibolalil u yilkoʼob ka xuʼuluk u kʼaʼaytaʼal le maʼalob péektsiloʼ yéetel le chʼaʼapʼektajil ku yuʼubkoʼob yoʼolal u kaajal Jéeobaeʼ yaan u mixbaʼalkúuntaʼal ken xuʼulsaʼaktiʼob teʼ nojoch yaayaj óolaloʼ (Mat. 24:21, NM).
19. ¿Baʼax k-ojel ken u beet Jéeoba?
19 ¿Yaan wa a salvarkaba utiaʼal ka a wil le jatsʼuts baʼaloʼob ken u beet Jéeobaoʼ? Baʼaleʼ wa ka kíimileʼ, ¿yaan wa a kaʼa kuxkíintaʼal ichil le máakoʼob utstak kun kaʼa líiʼsbiloʼoboʼ? (Hch. 24:15). Yaan, baʼaleʼ unaj a wilik maʼ u xuʼulul a tsʼáaik a fe tiʼ u kuxtal Jesús tu kʼuboʼ yéetel maʼ u xuʼulul a weʼesik u jatsʼuts modos Jéeoba, jeʼex u beetik «le máax» toj u kuxtal ku chʼaʼachiʼitaʼal teʼ Salmo 112 (xokaʼak Efesoiloʼob 5:1, 2). Jéeobaeʼ mix bikʼin ken u tuʼubs le máaxoʼob bisik upʼéel toj kuxtaloʼ mix le baʼaxoʼob tu beetoʼoboʼ. Yaan u kʼaʼajskoʼob mantatsʼ yéetel maʼ kun xuʼulul u yaabiltkoʼob (Sal. 112:3, 6, 9).
[Tsolajiloʼob]
^ xóot’ol 5 Le kaʼapʼéel salmoʼobaʼ chíikaʼanoʼob tiʼ bix tsʼíibtaʼaniloʼob bey xan tiʼ baʼax ku yaʼalikoʼob. U jatsʼuts modos Dios ku chʼaʼachiʼitaʼal teʼ Salmo 111, ku yeʼesaʼal tumen le máaxoʼob yaabiltmil, jeʼex u yaʼalik le Salmo 112. Leloʼ bey u yilaʼal ken keʼetek le baʼax ku yaʼalik Salmo 111:3, 4 yéetel Salmo 112:3, 4.
Kʼáatchiʼob utiaʼal u tuukul máak
• ¿Baʼax péekskoʼon k-aʼal «¡Aleluya!»?
• ¿Baʼaxoʼob beetik u kiʼimaktal u yóol le máaxoʼob meyajtik Diosoʼ?
• Utiaʼal ka yaabiltaʼakoʼon tumen Jéeobaeʼ, ¿bix unaj k-tsʼáaik le baʼaxoʼob yantoʼonoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 25]
Utiaʼal maʼ u xuʼulul k-kʼaʼamal tumen Dioseʼ unaj k-tsʼáaik fe tiʼ u kʼiʼikʼel Jesús
[U tsolajil le oochel teʼ táan juʼun 26]
Le taakʼin ku siʼibil yéetel kiʼimak óolaloʼ ku meyaj utiaʼal u tsʼaʼabal áantaj teʼ tuʼux ku yúuchul nukuch loobiloʼ yéetel utiaʼal u beetaʼal jóoʼsaʼaniloʼob