«Taamchajak a mootseʼex» tiʼ Cristo

¿TSʼOʼOK wa wilik bix u pʼuʼumpʼunaʼal ukúul cheʼ tumen upʼéel kʼaʼamkach iikʼ? Kex jach kʼaʼam le iikʼoʼ maʼ tu lúuʼsik. ¿Baʼaxten? Tumen u polkil u mootsoʼobeʼ jach taamchajaʼan. Toʼoneʼ jeʼel u páajtal k-ketikba yéetel ukúul cheʼ beyaʼ. Ken k-aktáant nukuch talamiloʼobeʼ maʼ ken lúubul wa taamchajaʼan k-moots (Efe. 3:14-17). ¿Tiʼ baʼax unaj u taamchajal k-moots?

Le Bibliaoʼ ku yaʼalikeʼ «Jesucristoeʼ letiʼ» u «noj tuunichil [u] chuun pakʼ[il]» le múuchʼuliloʼ (Efe. 2:20; 1 Cor. 3:11). Tsʼoʼoleʼ ku yaʼaliktoʼon xan: «Unaj a kuxtaleʼex nupaʼaneʼex tiʼ letiʼ, a tsʼaamajeʼex u moots a kuxtaleʼex tiʼ letiʼ, chich pakʼaʼaneʼex tiʼ letiʼ yéetel jeetsʼel a wanileʼex tiʼ le oksaj óolaloʼ». Wa k-beetik le baʼax ku yaʼalik le tekstoaʼ, jeʼel u chúukpajal k-óol k-aktáant jeʼel baʼalak ka taalak tu contra k-fejeʼ, tak le kaʼansajoʼob ku beetaʼal «yéetel jatsʼuts tʼaanoʼob» tumen chéen máakoʼoboʼ (Col. 2:4-8).

Bukaʼaj «kóochil», «chowakil», «taamil» yéetel «kaʼanlil»

¿Bix jeʼel k-tsʼáaik «u moots [k-]kuxtal» tiʼ Cristo yéetel k-chich páakʼal «tiʼ le oksaj óolaloʼ»? Upʼéel bixeʼ letiʼe ka k-xok sáamsamal le Bibliaoʼ, wa k-beetikeʼ bey ka k-taamkúunt k-mootseʼ. Jéeobaeʼ u kʼáat ka k-naʼat «maʼalob yéetel tuláakal le j-oksaj óoloʼoboʼ bukaʼaj kóochil, bukaʼaj chowakil, bukaʼaj taamil yéetel bukaʼaj kaʼanlil» le u jaajiloʼ (Efe. 3:18). Lelaʼ ku yeʼesiktoʼoneʼ maʼ unaj u kiʼimaktal k-óol chéen yéetel k-kanik «u yáax baʼaliloʼob u kaʼansajoʼob Jajal Dios[iʼ]» (Heb. 5:12; 6:1). Baʼaxeʼ unaj u maas taaktal k-kʼaj óoltik jach tubeel le baʼax ku kaʼansik le Bibliaoʼ (Pro. 2:1-5).

Baʼaleʼ leloʼ maʼ u kʼáat u yaʼal wa chéen kʼaʼabéet u jach yaʼabtal u naʼat máak utiaʼal ka taamchajak u moots tiʼ le u jaajiloʼ. Tak Satanaseʼ u kʼaj óol maʼalob le baʼax ku yaʼalik le Bibliaoʼ. Le oʼolal unaj k-beetik le baʼax tu yaʼalaj Pabloaʼ: «Kʼaj óolteʼex le yaakunajoʼ, baʼax maas nojoch tiʼ tuláakal baʼax ku páajtal u kʼaj óoltaʼal» (Efe. 3:19). Bey túunoʼ, wa k-xokik le Biblia tumen k-yaabiltmaj Jéeoba yéetel tumen k-yaabiltmaj u jaajiloʼ, le baʼaxoʼob k-kankoʼ ku muʼukʼaʼankúuntik k-fe (Col. 2:2).

 Ilawil wa maʼalob a naʼatmil

Ilawil wa a naʼatmaj le baʼaxoʼob jach kʼaʼanantak ku kaʼansik le Bibliaoʼ. Maʼ xaaneʼ leloʼ jeʼel u yáantkech a maas tsʼáa a wóol a xok le Bibliaoʼ. Tuukulnakoʼon tiʼ u yáax versiculoiloʼob le carta tu túuxtaj Pablo tiʼ le Efesoiloʼoboʼ, jeʼex u yeʼesik le cuadro ku kʼaabaʼtik «Tiʼ Efesoiloʼob». Xok le versiculoʼobaʼ yéetel ilawil wa ka naʼatik baʼax u kʼáat u yaʼal le tsʼaʼan ich cursivaoʼ. Koʼox ilik cada upʼéel.

«Tu tsʼáajoʼon utiaʼal lelaʼ, maʼiliʼ yanakoʼoneʼ»

Pabloeʼ tu yaʼalaj tiʼ le sukuʼunoʼoboʼ: «[Dioseʼ] tu tsʼáajoʼon utiaʼal lelaʼ, maʼiliʼ yanakoʼoneʼ, utiaʼal ka kʼaʼamakoʼon jeʼel bix u paalaloʼobeʼ tu yoʼolal Jesucristo». Jéeobaeʼ tu tuklaj u yéeyik way Luʼum jujuntúul máakoʼob utiaʼal ka xiʼikoʼob tu yiknal teʼ kaʼanoʼ. Le máakoʼob kun kʼuchul u beetuba u paaloʼoboʼ yaan u beetik u reyiloʼob yéetel u sacerdoteiloʼob u múuchʼ yéetel Cristo (Rom. 8:19-23; Apo. 5:9, 10). Ichil le baʼaxoʼob tu yaʼalaj Satanás tu contra bix u gobernar Diosoʼ, tu tsʼáaj xan naʼatbileʼ maʼ maʼalob bix beetaʼanik wíinikiʼ. Le oʼolaleʼ jach maʼalob le úuchik u yéeyik jujuntúul wíinikoʼob utiaʼal ka táakpajkoʼob ken xuʼulsaʼak tiʼ le kʼasaʼanil yaan way Luʼumaʼ bey xan ken xuʼulsaʼak tiʼ le Kʼaasilbaʼaloʼ. Baʼaleʼ Dioseʼ maʼ tu yaʼalaj bix u kʼaabaʼ cada utúul tiʼ le máaxoʼob ken u kʼam bey u paalaloʼoboʼ, chéen baʼax tu yaʼaleʼ u múuchʼ máakoʼob kun reinar yéetel Cristo teʼ kaʼanoʼ (Apo. 14:3, 4).

¿Tiʼ baʼax yóokʼol kaabil tʼaanaj Pablo le ka tu yaʼalaj le sukuʼunoʼoboʼ u múuchʼ yéeyaʼaniloʼob «maʼiliʼ beetaʼak yóokʼol kaabeʼ»?  Maʼ táan u tʼaan tiʼ le maʼ beetaʼak wíinik wa le maʼ beetaʼak le Luʼumaʼ. Wa táanil tiʼ u beetaʼal Adán yéetel Eva tsʼoʼokaʼaniliʼ u destinartaʼaloʼob tumen Dios utiaʼal ka kʼebanchajkoʼobeʼ, ¿maʼalob wa túun ka castigartaʼakoʼob yoʼolal le baʼax tu beetoʼoboʼ? Maʼatech, tumen wa destinartaʼanoʼob kaʼacheʼ maʼ tiʼ letiʼob yaan u culpai le baʼax úuchoʼ. ¿Baʼax kʼiin túun ka tu chʼaʼatuklaj Jéeoba u xuʼulsik tiʼ Satanás bey xan tiʼ Adán yéetel Eva, le máaxoʼob tu tsʼáajubaʼob tu contra u gobernacionoʼ? Letiʼe ka tsʼoʼok u kʼebantal le yáax wíinkoʼoboʼ, baʼaleʼ táanil tiʼ u yantal u paalaloʼob.

«Tu yoʼolal u nojoch siibal utsil»

Tu káajbal u cartai Efesoiloʼobeʼ, Pabloeʼ ku yaʼalik jejeláas bix úuchik u yeʼesik «u nojoch siibal utsil» Dios. ¿Baʼaxten bey úuchik u yaʼalikoʼ? Utiaʼal u jach eʼesik wíinikeʼ maʼatech u náajaltik ka eʼesaʼak utsil tiʼ tumen Jéeoba.

U jaajileʼ, mix máak jeʼel u náajaltik ka salvartaʼakeʼ. Baʼaleʼ yoʼolal u yaabilaj tiʼ wíinikeʼ, Jéeobaeʼ tu yilaj bix ken u salvartiloʼon. Ken tuukulnakoʼon tiʼ le kʼeban yaan t-wíinklil yéetel tiʼ le baʼaloʼob maʼ maʼalobtak k-beetkoʼ k-tsʼáaik cuenta jach «nojoch [u] siibal utsil» Dios tiʼ toʼon, jeʼex úuchik u yaʼalik Pablooʼ.

«U taʼakbil tsʼíibolal» Dios

Tu káajbaleʼ Dioseʼ maʼ tu yaʼalaj bix ken u yutskíintil le baʼax beetaʼab u kʼastal tumen le Kʼaasilbaʼaloʼ, baʼaxeʼ pʼáat ichil «u taʼakbil tsʼíibolal» (Efe. 3:4, 5). Le ka máan kʼiin, tak teʼ yáax siglooʼ, Jéeobaeʼ joʼopʼ u tsʼáaik ojéeltbil bix ken u béeykuntil le baʼax u tukulmaj utiaʼal wíinik bey xan utiaʼal le Luʼumaʼ. Pabloeʼ tu yaʼaleʼ «ken kʼuchuk u kʼiinil[eʼ]» yaan u béeytal le «baʼax tukultaʼan» tumen Dios utiaʼal u kaʼa muchʼik le baʼaloʼob yanoʼob teʼ kaʼanoʼ bey xan le yanoʼob way Luʼumoʼ.

Teʼ Pentecostés tiʼ u jaʼabil 33 tiʼ le yáax siglooʼ, Jéeobaeʼ káaj u yéeyik le máaxoʼob kun binoʼob reinar yéetel Cristo teʼ kaʼanoʼ (Hch. 1:13-15; 2:1-4). Ka tsʼoʼokeʼ káaj u muchʼaʼal le máaxoʼob kun kuxtaloʼob way Luʼum yáanal le Reino tsʼaʼan tiʼ Cristooʼ (Apo. 7:14-17; 21:1-5). Le tʼaan «baʼax tukultaʼan kun úuchul» aʼalaʼab tumen Pablooʼ, maʼ táan u tʼaan tiʼ le Reino tsʼaʼan tiʼ Cristooʼ, tumen le Reinoaʼ káaj u meyaj tak tu jaʼabil 1914. Baʼaxeʼ táan u tʼaan tiʼ bix u tukulmil Dios ken u tsʼoʼokbesil le baʼax u tukulmaj u beetkoʼ: le u muchʼik le baʼaloʼob yanoʼob teʼ kaʼanoʼ bey xan le yanoʼob way Luʼumoʼ.

Tuukulnakoʼon jeʼex nukuch máakoʼobeʼ

Wa k-jóoʼsik tiempo utiaʼal k-xokik le Bibliaoʼ yaan k-kʼuchul k-naʼat u «kóochil», u «chowakil», u «taamil» yéetel u «kaʼanlil» le u jaajiloʼ. Tiʼ Satanaseʼ ku meyaj le u sen chiʼichnakiloʼob le kuxtal utiaʼal u jáawsik k-xakʼalxoktik le Bibliaoʼ. Maʼ unaj k-chaʼik u beetiktoʼon beyoʼoʼ. Meyajnaktoʼon le «naʼat» u tsʼaamajtoʼon Dios utiaʼal k-tuukul «jeʼel bix nukuch máakoʼobeʼ» (1 Juan 5:20; 1 Cor. 14:20). Mantatsʼ unaj k-ilik baʼax oʼolal k-creertik wa baʼax, beyoʼ yaan u páajtal k-beetik le baʼax ku yaʼalik le Bibliaaʼ: «[Nuʼuktabaʼex] utiaʼal a núukikeʼex tiʼ tuláakal ka u kʼáatoʼob a chiʼex tu yoʼolal le alab óolal yaan tiʼ teʼexoʼ» (1 Ped. 3:15).

Tukulteʼ tiʼ yanech teʼ múuchʼulil yaan Éfeso le ka xokaʼab le carta tu túuxtaj Pablooʼ. ¿Maʼ wa ken u líiʼs a wóol utiaʼal a maas kʼaj óoltik u Hijo Dios? (Efe. 4:13, 14.) ¿Máasaʼ jeʼeleʼ? Le oʼolaleʼ, chaʼa xan u líiʼsaʼal a wóol bejlaʼa tumen le baʼax tu yaʼalaj Pablooʼ. A yaabilaj tiʼ Jéeoba yéetel a naʼatik tubeel le baʼax ku yaʼalik le Bibliaoʼ yaan u yáantkech utiaʼal a maas taamkúuntik a moots tiʼ Cristo. Beyoʼ yaan u chúukpajal a wóol a aktáan jeʼel baʼalak talmil ka beetaʼak u yantaltech tumen Satanás teʼ tu tsʼook kʼiinoʼobaʼ (Sal. 1:1-3; Jer. 17:7, 8).

[U tsolajil le oochel teʼ táan juʼun 27]

«Tiʼ Efesoiloʼob»

«Koʼox kiʼikiʼtʼantik Jajal Dios yéetel u Taata k-Yuumtsil Jesucristo, tumen tu yoʼolal nupaʼanoʼon tiʼ Cristoeʼ letiʼeʼ tsʼoʼok u kiʼikiʼtʼantikoʼon yéetel tuláakal u jejeláasil pixanbeʼen kiʼikiʼ tʼaanoʼob tiʼ kaʼanil kúuchiloʼob. Jajal Dioseʼ tu yéeyajoʼon tiʼ Cristo maʼiliʼ beetaʼak yóokʼol kaabeʼ, utiaʼal ka yanakoʼon tu táan yéetel kʼub óolal bey xan yéetel x-maʼ siʼipilil. Tu yoʼolal u yaakunajeʼ tu tsʼáajoʼon utiaʼal lelaʼ, maʼiliʼ yanakoʼoneʼ, utiaʼal ka kʼaʼamakoʼon jeʼel bix u paalaloʼobeʼ tu yoʼolal Jesucristo jeʼel bix tu yóoltaj u beeteʼ. Le oʼolaleʼ mantatsʼ táan k-kiʼikiʼtʼantik Jajal Dios tu yoʼolal u nojbeʼen utsil, yéetel le u yutsilaʼ tu kiʼikiʼtʼantajoʼon le ka nuʼupoʼon yéetel u yaabilaj u Paaleʼ. Tu yoʼolal u nojoch siibal utsileʼ, Jajal Dioseʼ tsʼoʼok u tokikoʼon tu yoʼolal u kʼiʼikʼel u Paal, ikil tu saʼatsajil k-kʼebanoʼob. Jajal Dioseʼ jach yaʼab u siibal utsil tu yeʼesajtoʼon, tumen tu tsʼáajtoʼon tuláakal kʼaj óolalil yéetel naʼatil. Yéetel tsʼoʼok u beetik k-kʼaj óoltik u taʼakbil tsʼíibolalaʼ, u káat u yaʼaleʼ, le baʼax u tukultmaj u tsʼoʼokbesik letiʼoʼ. Tiʼ le baʼax tukultaʼan kun úuchulaʼ, yéetel yaan u yúuchul le ken kʼuchuk u kʼiinileʼ, Jajal Dioseʼ yaan u nupik yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob luʼumoʼ.» (Efe. 1:3-10.)