«Yéetel bukaʼaj kʼub óolal yéetel kiliʼichil unaj a kuxtaleʼex»

«Tumen tuláakal bíin xuʼulsaʼak beyoʼ bey túunoʼ yéetel bukaʼaj kʼub óolal yéetel kiliʼichil unaj a kuxtaleʼex.» (2 PED. 3:11)

1. ¿Baʼaxten jach maʼalob le baʼax tu tsʼíibtaj Pedro tiʼ le sukuʼunoʼob tu kaʼapʼéel cartaoʼ?

LE KA tu tsʼíibtaj Pedro u kaʼapʼéel cartaeʼ, le Kʼaasilbaʼaloʼ úuch joʼopʼok u chʼaʼapachtik le máaxoʼob meyajtik Diosoʼ. Baʼaleʼ maʼ béeyak u beetik u xuʼulul u tsʼáaik u yóoloʼob teʼ kʼaʼaytajoʼ mix u seguer u yaʼabtal le múuchʼuliloʼoboʼ. Le oʼolal joʼopʼ u meyajtiʼ uláakʼ upʼéel baʼax beet u lúubul yaʼab tiʼ le máaxoʼob meyajt Dios úuchjeakiloʼ. Jeʼex tu yaʼalil le apostoloʼ, Satanaseʼ joʼopʼ u kʼaskúuntik u tuukul le máaxoʼob meyajtik Dios yéetel kaʼansajoʼob maʼ jaajtakiʼ, yéetel yaʼab tiʼobeʼ «maʼ tu páajtal u yilikoʼob juntúul koʼolel wa maʼ yaan u tsʼíiboltikoʼob[iʼ]», tsʼoʼoleʼ «jach kaambalnajaʼanoʼob tiʼ le tsʼuʼutiloʼ» (2 Ped. 2:1-3, 14; Jud. 4). Le sukuʼunoʼob kuxlajoʼob teʼ kʼiinoʼob jeʼeloʼ tu yilaj u chúukpajal u yóol u meyajtoʼob Dios. Le baʼax tu tsʼíibtaj Pedro tu kaʼapʼéel cartaoʼ jach tu líiʼsaj u yóoloʼob.

2. ¿Tiʼ baʼax ku tʼaan le u yóoxpʼéel capituloi 2 Pedrooʼ, yéetel baʼax kʼáatchiʼiloʼob unaj k-beetik?

² Pedroeʼ ku yaʼalik: «Tumen toj in wilik, kaʼalikil kuxaʼaneneʼ, kin beetik a pʼilik a wicheʼex yéetel le tsolxikinoʼobaʼ, tumen k-Yuumtsil Jesucristoeʼ tsʼoʼok u beetik in wojéeltikeʼ séebaʼan kin in pʼat le kuxtalaʼ. Baʼaleʼ yaan in beetik tuláakal baʼax ku páajtaleʼ utiaʼal a kʼaʼajsikeʼex mantatsʼ le baʼaloʼobaʼ ku tsʼoʼokol in kíimil» (2 Ped. 1:13-15). Le baʼax tu yaʼalaj le apostolaʼ  ku yeʼesik letiʼeʼ jach tu tsʼáaj cuenta maʼ yaʼab u bin u kíimsaʼaliʼ. Baʼaleʼ letiʼeʼ u kʼáat ka kʼaʼajsaʼak mantatsʼ le tsolnuʼukoʼob tu tsʼáajoʼ. Lelaʼ jach bey úuchik xanoʼ, tumen le baʼaxoʼob tu yaʼaloʼ táakbesaʼaboʼob ichil le Bibliaoʼ, le oʼolal bejlaʼeʼ tuláakal máak jeʼel u páajtal u xokkeʼ. Le u yóoxpʼéel capitulooʼ jach ku líiʼsik k-óol, tumen ku tʼaan tiʼ le «u tsʼook kʼiinoʼob» tiʼ le kʼasaʼan yóokʼol kaabaʼ yéetel ku yaʼalik bix kun xuʼulsbil tiʼ le «luʼum» yéetel tiʼ le «kaʼanoʼoboʼ» (2 Ped. 3:3, 7, 10). ¿Baʼax tsolnuʼukil tu tsʼáaj Pedro teʼ carta tu tsʼíibtoʼ? ¿Bix jeʼel u yáantkoʼon utiaʼal ka u kʼamoʼon Jéeobaeʼ?

3, 4. 1) ¿Baʼax tu yaʼalaj Pedro ka beetaʼak, yéetel baʼaxten? 2) ¿Baʼaxoʼob ken k-il teʼ xookaʼ?

³ Ka tsʼoʼok u yaʼalik Pedro bix kun xuʼulsbil u kʼasaʼan yóokʼol kaab Satanaseʼ, tu yaʼalaj: «Yéetel bukaʼaj kʼub óolal yéetel kiliʼichil unaj a kuxtaleʼex» (2 Ped. 3:11, 12). Jeʼex túun k-ilkoʼ, Pedroeʼ maʼ tu beetaj upʼéel kʼáatchiʼiʼ, baʼaxeʼ tu yaʼalaj tiʼ le sukuʼunoʼob baʼax unaj u beetkoʼoboʼ. Letiʼeʼ u yojleʼ chéen le máaxoʼob ku beetkoʼob le baʼax ku yaʼalik Jéeoba yéetel ku yeʼeskoʼob jatsʼuts modos ken u salvartubaʼob teʼ kʼiin ken «u sut u jeel [le] loob» ku beetaʼal tiʼ u kaajaloʼ (Isa. 61:2). Le oʼolal tu yaʼalaj xan: «In yaabilaj sukuʼuneʼex, tumen [...] a wojeleʼex le baʼaloʼob maʼiliʼ úuchukaʼ, kanáantabaʼex, utiaʼal maʼ a jíiltaʼaleʼex tu yoʼolal u tuusoʼob le máaxoʼob kʼasaʼanoʼoboʼ mix a lukʼuleʼex tiʼ le baʼax jeetsʼel a wanileʼexoʼ» (2 Ped. 3:17).

⁴ Tumen Pedro yanchaj ichil le máaxoʼob u yojeloʼob «le baʼaloʼob maʼiliʼ úuchuk[oʼ]», u yojel teʼ tu tsʼook kʼiinoʼob xanaʼ le sukuʼunoʼoboʼ jach yaan u kʼaʼabéettal u kanáantik maʼ u náayal u yóoloʼob utiaʼal maʼ u xuʼulul u meyajtkoʼob Dios. Ka máan kʼiineʼ apóstol Juaneʼ tu maas tsolaj baʼaxten jach unaj u yilik le sukuʼunoʼob maʼ u náayal u yóoloʼoboʼ. Tsʼaʼab u yileʼ Satanaseʼ tsʼoʼok u puʼulul way Luʼumeʼ yéetel jach «pʼujaʼan» tu contra «le máaxoʼob ku tsʼoʼokbesikoʼob u yaʼalmajtʼaan [Diosoʼ] yéetel ku pʼáataloʼob yéetel chúukaʼan óolal [tʼaan tu kʼaabaʼ] Jesucristo» (Apo. 12:9, 12, 17). Le máaxoʼob yéeyaʼanoʼob utiaʼal u binoʼob kaʼan yéetel le «uláakʼ tamanoʼob» kun chúukpajal u yóol u meyajtoʼob Diosoʼ maʼ kun beetbil u lúubloʼob (Juan 10:16). Baʼaleʼ cada utúul tiʼ toʼoneʼ maʼalob ka u tukle: «¿Yaan wa u chúukpajal in wóol tak tu xuul?». Utiaʼal k-núukik tubeel le kʼáatchiʼaʼ yaan óoxpʼéel baʼax unaj k-beetik: 1) k-eʼesik jatsʼuts modos, 2) k-kanáantik maʼ k-beetik baʼax kʼaas yéetel maʼ k-náachtal tiʼ Dios, yéetel 3) k-ilik le talmiloʼob yéetel le túuntajoʼob jeʼex unajeʼ. Koʼoneʼex ilik cada upʼéel tiʼ le baʼaloʼobaʼ.

Unaj k-eʼesik jatsʼuts modos

5, 6. ¿Baʼax modosiloʼob unaj k-eʼesik, yéetel baʼax jach kʼaʼabéet u chúukpajal k-óol k-beete?

⁵ Pedroeʼ tu yaʼalaj tu káajbal u kaʼapʼéel carta: «Unaj a tsʼáaikeʼex tuláakal a wóoleʼex utiaʼal a tsaykeʼex maʼalob kuxtal tiʼ a woksaj óolaleʼex; naʼat tiʼ a maʼalob kuxtaleʼex; muʼukʼaʼan óolal tiʼ a naʼateʼex; chúukaʼan óolal tiʼ a muʼukʼaʼan óolaleʼex; [a adoracioneʼex tiʼ] Jajal Dios tiʼ a chúukaʼan óolaleʼex; sukuʼuntsil yaakunaj tiʼ a [adoracioneʼex tiʼ] Jajal Dios; yéetel kiliʼich yaakunaj tiʼ a sukuʼuntsil yaakunajeʼex. Tumen wa teʼex yanteʼex le baʼaloʼobaʼ, yéetel yanteʼex jach yaʼabeʼ, a kuxtaleʼexeʼ maʼatan u pʼáatal mix baʼal u biilal yéetel [chéen kunel a kʼaj óolmileʼex] k-Yuumtsil Jesucristo» (2 Ped. 1:5-8).

⁶ U jaajileʼ utiaʼal ka béeyak k-eʼesik jatsʼuts modoseʼ unaj k-jach tsʼáaik tuláakal k-óol utiaʼal k-beetik baʼax ku yaʼalik Dios. Jach kʼaʼabéet k-bin tiʼ tuláakal le muchʼtáambaloʼoboʼ yéetel unaj k-xokik le Biblia sáamsamaloʼ. Tsʼoʼoleʼ unaj k-beetik tuláakal le ku páajtal utiaʼal u yantaltoʼon le Adoración ich Familiailoʼ yéetel kʼaʼabéet k-beetik upʼéel bix maʼ u náakal u yóol mix utúul ichil le familiaoʼ. Le ken suukchajak k-beetkeʼ yaan u pʼáatal maʼ talam ken k-il k-jóoʼsik u tiempoiliʼ, maases le ken káajak k-ilik le utsiloʼob ku taaskoʼ.

7, 8. 1) ¿Baʼax tsʼoʼok u yaʼalik jujuntúul sukuʼunoʼob yoʼolal le Adoración ich Familiailoʼ? 2) ¿Baʼax utsiloʼob tsʼoʼok a kʼamik ikil a beetik le Adoración ich Familiailoʼ?

⁷ ¿Baʼax utsiloʼob ku taasik le Adoración ich Familiailoʼ? Utúul kiikeʼ tu tsʼíibtaj: «Táan k-kanik  yaʼab baʼaloʼob ku yaʼalik le Bibliaoʼ». Uláakʼ utúul kiikeʼ ku yaʼalik: «U jaajileʼ maʼ in kʼáat kaʼach ka xuʼuluk u beetaʼal u xookil le librooʼ, tumen letiʼe muchʼtáambal maas jatsʼuts in wilik kaʼachoʼ. Baʼaleʼ yoʼolal le adoración ich familiai ku yantaltoʼon bejlaʼaʼ, kin tsʼáaik cuentaeʼ Jéeobaeʼ u yojel baʼax maas kʼaʼabéettoʼon yéetel u yojel baʼax kʼiin ken u tsʼáatoʼon». Utúul sukuʼuneʼ ku yaʼalik: «Teen yéetel in watneʼ tsʼoʼok k-jóoʼsik yaʼab utsil tiʼ le adoración ich familiailoʼ. Tumen jeʼel u páajtal k-xakʼalxoktik le baʼax k-tuklik maas jeʼel u yáantkoʼoneʼ. Tu kaʼatúulaloʼoneʼ k-ilik táan k-maas eʼesik u yich le kiliʼich muukʼoʼ yéetel maas kiʼimak k-óol ikil k-táakpajal teʼ kʼaʼaytajoʼ». Utúul taatatsil xaneʼ ku yaʼalik: «In paalaloʼob bejlaʼeʼ ku xakʼalxookoʼob yéetel jatsʼuts u yilik u maas kaambaloʼob. Bejlaʼeʼ k-ilik jach táan u kanáantkoʼon Jéeoba yéetel ku núukik k-payalchiʼob». Techeʼ ¿bix a wilik le Adoración ich Familiai ku yaʼalik Jéeoba ka beetaʼakoʼ?

⁸ Maʼ u pʼáatal maʼ a xookeʼex ich familiai chéen yoʼolal wa baʼax. Utúul sukuʼun yéetel u yatneʼ ku yaʼalik: «Teʼ tu tsʼook kampʼéel jueves máanikoʼ jach óolak pʼáatak maʼ k-xook yoʼolal jujumpʼéel talmil yanchajtoʼon, baʼaleʼ maʼ pʼáat maʼ k-beetkiʼ». Maʼ xaaneʼ yaan kʼiineʼ yaan u kʼaʼabéettal u kʼexaʼal u yorai wa u kʼiinil. Baʼaleʼ unaj u yilik máak u beetik le Adoración ich Familiai cada semanaoʼ.

9. ¿Baʼax áant Jeremías, yéetel baʼax k-kanik tiʼ?

⁹ Tuukulnakoʼon tiʼ baʼax tu beetaj profeta Jeremías. Letiʼeʼ tu kʼamaj yéetel kiʼimak óolal le áantajoʼob ku keʼetel yéetel janal tsʼaʼabtiʼ tumen Diosoʼ, tumen tu tsʼáaj u muukʼil tiʼ utiaʼal u seguer u kʼaʼaytaj kex maʼ yaʼab máaxoʼob kʼamiʼ. Letiʼeʼ tu yaʼalaj tiʼ Jéeoba: «A tʼaan tin puksiʼikʼal túuneʼ ku suut jumpʼéel kʼáakʼ ku láaj tóok. Kin wuʼuyik tak tin baakeloʼob» (Jer. 20:8, 9). Le áantaj tsʼaʼabtiʼ tumen Jéeobaoʼ le tsʼáa u muukʼil tiʼ utiaʼal u aktáantik le talmiloʼob yanchaj tak ka xuʼulsaʼab tiʼ Jerusalenoʼ. Teʼ kʼiinoʼobaʼ yantoʼon le Biblia tu chúukaʼaniloʼ. Wa k-xokik sáamsamal yéetel wa k-tuukul jeʼex Dioseʼ, maʼ kun xuʼulul k-tsʼáaik k-óol teʼ kʼaʼaytaj, jeʼex tu beetil Jeremíasoʼ, yaan u chúukpajal k-óol kex jeʼel baʼalak talmil ka k-aktáanteʼ yéetel maʼ kun xuʼulul k-beetik baʼax maʼalob tu táan Dios (Sant. 5:10).

Unaj k-pʼáatal «x-maʼ kʼaasil yéetel x-maʼ siʼipilil»

10, 11. ¿Baʼaxten kʼaʼabéet k-beetik «tak tuʼux ku páajtal» utiaʼal k-pʼáatal «x-maʼ kʼaasil yéetel x-maʼ siʼipilil», yéetel baʼax ku kʼaʼabéettal k-beetik utiaʼal lelaʼ?

¹⁰ Toʼoneʼ k-ojel jach maʼ yaʼab kʼiinoʼob pʼaatal tiʼ le kʼasaʼan yóokʼol kaabaʼ. Le oʼolal chuup yéetel baʼaloʼob ku binoʼob tu contra Jéeoba, jeʼex u tsʼíiboltik máak baʼax maʼ utiaʼaliʼ, u núupkʼebantal yéetel u beetik loob. Jeʼel u páajtal u yaʼalaʼaleʼ Satanaseʼ ku tuklik: «Wa maʼ tu béeytal in sajakkúuntik le máaxoʼob meyajtik Diosoʼ, maʼ xaaneʼ jeʼel u béeytal in kʼaskúuntik u tuukuloʼobeʼ» (Apo. 2:13, 14). Le oʼolal jach unaj k-beetik le baʼax tu yaʼalaj Pedro tiʼ le sukuʼunoʼoboʼ: «Beeteʼex tak tuʼux ku páajtal utiaʼal ka ilaʼakeʼex tumen Jajal Dios ich jeetsʼel óolal x-maʼ kʼaasil yéetel x-maʼ siʼipilil» (2 Ped. 3:14).

¹¹ Le tʼaan «beeteʼex tak tuʼux ku páajtal» tu yaʼalaj Pedrooʼ láayliʼ letiʼe baʼax tu tsʼáaj naʼatbil le ka tu yaʼalaj: «Unaj a tsʼáaikeʼex tuláakal a wóoleʼex». Lelaʼ ku yeʼeskeʼ, Jéeoba, le máax péeks Pedro u tsʼíib le tʼaanoʼobaʼ, u yojel unaj k-jach tsʼáaik k-óol utiaʼal k-pʼáatal «x-maʼ kʼaasil yéetel x-maʼ siʼipilil», wa maʼ k-táakpajal tiʼ u  kʼasaʼan yóokʼol kaab Satanás. Kʼaʼabéet k-luʼsik t-tuukul le kʼaakʼas tsʼíibolaloʼoboʼ utiaʼal maʼ u kʼaskúuntik k-puksiʼikʼal (xokaʼak Proverbios 4:23 yéetel Santiago 1:14, 15). Yéetel kʼaʼabéet u chúukpajal k-óol k-aktáant le baʼaxoʼob ku yaʼalik le máaxoʼob u pʼeekoʼob baʼaxoʼob k-beetik yéetel «ku tʼaanoʼob kʼaas» tiʼ toʼonoʼ (1 Ped. 4:4).

12. ¿Bix u líiʼsik k-óol le baʼax ku yaʼalik Lucas 11:13?

¹² Yoʼolal le kʼeban yantoʼonoʼ ku talamtal k-beetik baʼax maʼalob (Rom. 7:21-25). Utiaʼal u béeytal k-beetkeʼ kʼaʼabéet k-natsʼikba tiʼ Jéeoba, tumen letiʼeʼ ku tsʼáaik u kiliʼich muukʼ tiʼ tuláakal le máaxoʼob kʼáatik tiʼ yéetel kabal óolaloʼ (Luc. 11:13). Le kiliʼich muukʼoʼ ku yáantkoʼon k-eʼes jatsʼuts modos, pʼáatal maʼalobil tu táan Dios yéetel ka k-aktáant le túuntajiloʼob kun maas yantal le táan u maas náatsʼal u kʼiinil Jéeobaoʼ.

Le talmiloʼoboʼ ku maas muʼukʼaʼankúuntik k-óol

13. ¿Baʼax jeʼel u yáantkoʼon k-aktáant le talmiloʼoboʼ?

¹³ Le maʼ xuʼulsaʼak tiʼ le kʼasaʼan yóokʼol kaabaʼ mantatsʼ yaan u yantal toʼon talmiloʼob. Baʼaleʼ maʼ unaj k-chaʼik u lúubul k-óoliʼ, tumen lelaʼ ku tsʼáaik tuʼux k-eʼesik yaabilaj tiʼ Dios yéetel ku maas muʼukʼaʼankúuntik k-fe tiʼ letiʼ yéetel tiʼ le Bibliaoʼ. Le disipulo Santiagooʼ, ku yaʼalik: «In sukuʼuneʼex, teʼexeʼ unaj u jach kiʼimaktal a wóoleʼex le ken máanakeʼex tiʼ jejeláas túuntaj [óoloʼob]. Tumen a wojeleʼex le ken túuntaʼak u yóol a woksaj óolaleʼexeʼ teʼexeʼ ka kanikeʼex [a weʼeseʼex] chúukaʼan óolal» (Sant. 1:2-4). Maʼ u tuʼubultoʼoneʼ «Yuumtsileʼ u yojel u [salvart] tiʼ le mukʼyajoʼoboʼ le máaxoʼob u kʼubmajoʼob u kuxtaloʼob tiʼ letiʼoʼ» (2 Ped. 2:9).

14. ¿Baʼax jeʼel k-kanik tiʼ Joseiʼ?

¹⁴ Tuukulnakoʼon tiʼ baʼax úuch tiʼ José, u hijo Jacob, letiʼeʼ koʼon tumen u sukuʼunoʼob bey utúul palitsileʼ (Gén. 37:23-28; 42:21). Le Bibliaoʼ ku yeʼeskeʼ maʼ xuʼul u tsʼáaik u fe tiʼ Diosiʼ mix tʼaanaj tu contra úuchik u chaʼabal u muʼyajiʼ. Tsʼoʼoleʼ yaan uláakʼ baʼax tu muʼyajtaj. Ka máan kʼiineʼ aʼalaʼab taakchaj u violartik u yatan u tsʼuulil, ka bisaʼab kʼalbil. Baʼaleʼ láayliʼ maʼ tu xulaj u meyajtik Jéeobaiʼ (Gén. 39:9-21). Le baʼaxoʼob tu muʼyajtoʼ tu beetaj u maas muʼukʼaʼantal u fe yéetel tu kʼamaj yaʼab utsiloʼob.

15. ¿Baʼax ku kaʼansiktoʼon le baʼax úuch tiʼ Noemioʼ?

¹⁵ U jaajileʼ le talmiloʼoboʼ ku chiʼichnakkúuntkoʼon yéetel ku beetkoʼob u lúubul k-óol. Maʼ xaaneʼ bey úuchik xan tiʼ José. Tak uláakʼ máaxoʼob meyajt Dios úuchjeakileʼ bey xan tu yuʼubilubaʼoboʼ. Jeʼex ka kíim u yíicham Noemí yéetel tu kaʼatúulil u paalaleʼ, letiʼeʼ tu yaʼalaj: «Aʼaleʼexten Mara [wa Kʼáaj], tumen [Dios] tiʼ máax yaan tuláakal páajtalileʼ tsʼoʼok u chupiken yéetel kʼáajil» (Rut 1:20, 21). Yoʼolal le baʼaxoʼob úuchtiʼoʼ tʼaanaj beyoʼ. Baʼaleʼ jeʼex Joseiʼ  maʼ tu xulaj u chúukpajal u yóol u meyajt Diosiʼ. Le oʼolal Jéeobaeʼ tu beetaj u bin utsil tiʼ (Rut 4:13-17, 22). Tsʼoʼoleʼ teʼ Paraíso ku taal u kʼiinoʼ, Jéeobaeʼ yaan u beetik u xuʼulul tuláakal le baʼaxoʼob tu muʼyajtaj Noemí yéetel u maasil máaxoʼob meyajt Dios yáanal u páajtalil Satanás yéetel u kʼasaʼan yóokʼol kaaboʼ. Tuláakal «bíin tuʼubsaʼak, maʼ bíin kʼaʼajak tiʼ mix máakiʼ» (Isa. 65:17).

16. ¿Bix unaj k-payalchiʼ, yéetel baʼaxten?

¹⁶ Jeʼel baʼaxak talmil ka yanaktoʼoneʼ jeʼel u páajtal k-aktáantik wa k-kʼaʼajsik bukaʼaj u yaabiltmiloʼon Jéeobaeʼ (xokaʼak Romailoʼob 8:35-39). Kex ka u yóot Satanás u lúuʼs k-óoleʼ, maʼ kun béeytal wa k-kanáantik k-tuukul yéetel wa k-payalchiʼ tu jaajil k-óol (1 Ped. 4:7). Jesuseʼ ku yaʼalik: «Pʼil a wicheʼex túun yéetel payalchiʼineneʼex mantatsʼ utiaʼal ka páatak a [púutsʼleʼex] tiʼ tuláakal baʼal kun úuchulaʼ bey xan utiaʼal ka páatak a wantaleʼex tu táan u Paal Máak» (Luc. 21:36). Le tʼaan ku suʼutul «payalchiʼineneʼex» meyajnaj tiʼ Jesusoʼ ku tsʼáaik xan naʼatbil «u jach kʼáat óoltik máak wa baʼax». ¿Baʼaxten tu yaʼalaj beyoʼ? Utiaʼal k-ilik wa táan k-beetik tuláakal le ku páajtal utiaʼal k-antal maʼalob tu táan letiʼ yéetel tu táan u Taata. Tumen utiaʼal k-salvartikbaeʼ unaj k-beetik baʼax utstutʼaanoʼob.

Unaj u seguer k-tsʼáaik k-óol meyajt Jéeoba

17. ¿Bix u yáantkoʼon le baʼax tu beetaj le profetaʼob utiaʼal k-kʼaʼaytaj teʼ tuʼuxoʼob óoliʼ maʼatech u kʼaʼamal le maʼalob péektsiloʼ?

¹⁷ Le meyajoʼob ku beetaʼal ichil u kaajal Jéeobaoʼ ku líiʼsik k-óol. Le oʼolal Pedroeʼ ku yaʼalik: «Yéetel bukaʼaj kʼub óolal yéetel kiliʼichil unaj a kuxtaleʼex» (2 Ped. 3:11). Le baʼax unaj k-beetik ichil k-kuxtaloʼ letiʼe k-kʼaʼaytik le maʼalob péektsiloʼ (Mat. 24:14). U jaajileʼ yaan tuʼuxoʼobeʼ talam u yúuchul kʼaʼaytaj, tumen le máakoʼoboʼ maʼ u kʼáat u yuʼuboʼobiʼ, ku chʼaʼapachkoʼonoʼob wa chéen maʼatech u jóoʼskoʼob u tiempoi u yuʼubikoʼonoʼob. Le máaxoʼob meyajt Dios úuchjeakiloʼ láayliʼ yanchaj talmiltiʼob beyaʼ. Kex beyoʼ tʼaanajoʼob «mantatsʼ» tiʼ le baʼax ku yaʼalik Diosoʼ (xokaʼak 2 Crónicas 36:15, 16; Jer. 7:24-26). ¿Baʼax áantoʼob utiaʼal ka chúukpajak u yóoloʼob? Yáaxeʼ tumen tu yiloʼob le meyaj jeʼex u yilik Jéeobaoʼ, maʼ tuukulnajoʼob jeʼex le máaxoʼob maʼatech u meyajtkoʼob Diosoʼ, yéetel u kaʼapʼéeleʼ, tu yiloʼob bey upʼéel nojbeʼenil u biskoʼob u kʼaabaʼ Dioseʼ (Jer. 15:16).

18. ¿Bix ken u tsʼáaik nojbeʼenil tiʼ u kʼaabaʼ Dios le kʼaʼaytaj ku beetaʼal bejlaʼaʼ?

¹⁸ Toʼon xaneʼ yantoʼon u jatsʼuts páajtalil k-tsʼáaik ojéeltbil u kʼaabaʼ Jéeoba bey xan baʼaxoʼob ku yaʼalik u beetik. Yoʼolal le meyaj k-beetkoʼ, ken u taas u castigo yóokʼol le máaxoʼob pʼekmiloʼ, maʼ ken u yaʼaloʼob wa maʼ tu yojéeltoʼob baʼax ku taal u kʼiiniʼ. Jeʼex u faraonil Egipto úuchjeakileʼ, yaan u yilkoʼob Jéeoba salvartikoʼon (Éxo. 8:1, 20; 14:25). Tsʼoʼoleʼ Dioseʼ yaan u yeʼesik tu táan tuláakal máakeʼ, le máaxoʼob meyajtkoʼ letiʼob tʼaanajoʼob tu kʼaabaʼ (xokaʼak Ezequiel 2:5 yéetel 33:33).

19. ¿Bix jeʼel k-jóoʼsik u yutsil le chúukaʼan óolal ku yeʼesik Jéeobaoʼ?

¹⁹ Tu tsʼoʼokbal u kaʼapʼéel carta Pedroeʼ tu yaʼalaj tiʼ le sukuʼunoʼoboʼ: «Yanak ta tuukuleʼex lelaʼ: le chúukaʼan óolal yaan tiʼ k-Yuumtsiloʼ utiaʼal [k-salvación]» (2 Ped. 3:15). Jeʼex túun k-ilkoʼ unaj k-jóoʼsik u yutsil le chúukaʼan óolal ku yeʼesik Jéeobaoʼ. ¿Bix jeʼel k-beetkeʼ? Ka k-il k-eʼesik jatsʼuts modos, k-pʼáatal «x-maʼ kʼaasil yéetel x-maʼ siʼipilil», unaj k-ilik le talmiloʼob yéetel le túuntajoʼob jeʼex unajeʼ yéetel unaj k-ilik k-táakpajal mantatsʼ teʼ kʼaʼaytajoʼ. Wa k-beetik beyoʼ yaan k-kʼamik le utsiloʼob kun ilbil teʼ «túumben kaʼanoʼob» yéetel teʼ «túumben luʼum[oʼ]» (2 Ped. 3:13).

¿Kʼajaʼan wa tech?

• ¿Baʼax jeʼel u yáantkoʼon k-eʼes jatsʼuts modoseʼ?

• ¿Baʼax jeʼel u yáantkoʼon pʼáatal «x-maʼ kʼaasil yéetel x-maʼ siʼipilil[eʼ]»?

• ¿Baʼax k-kanik tiʼ José yéetel tiʼ Noemí?

• ¿Baʼaxten k-ilik upʼéel nojbeʼenil k-bisik u kʼaabaʼ Dios?

[U kʼáatchiʼiloʼob le xookoʼ]

[U tsolajil le oochel teʼ táan juʼun 9]

¿Baʼax unaj u beetik le íichamtsil utiaʼal ka eʼesaʼak jatsʼuts modos tumen tuláakal ichil le familiaoʼ?

[U tsolajil le oochel teʼ táan juʼun 10]

¿Baʼax k-kanik tiʼ le bix úuchik u aktáantik José le túuntajiloʼoboʼ?