¿Bix tu yeʼesil Jesús u justicia Dios?

«Dioseʼ tu kʼubaj bey juntúul kíimsbil baʼalcheʼ utiaʼal ka u kaʼa bisuba máak tu yéetel yoʼolal le fe ku tsʼáaikoʼob tiʼ le u kʼiʼikʼel Cristooʼ. Lelaʼ Dioseʼ tu beetaj utiaʼal u yeʼesik u justicia.» (ROM. 3:25, NM)

1, 2. 1) ¿Baʼax ku yaʼalik le Biblia yoʼolal le muʼyajil yaan teʼ kʼiinoʼobaʼ? 2) ¿Baʼax kʼáatchiʼiloʼob ken k-núuk teʼ xookaʼ?

TULÁAKAL máakeʼ u yuʼubmaj u tsikbalil le baʼax tu beetaj Adán tu jardinil Edenoʼ. Le oʼolal bejlaʼeʼ tuláakloʼon k-muʼyaj. Le Bibliaoʼ ku yaʼalik: «Tu yoʼolal juntúuliliʼ máak ook le kʼeban tiʼ le yóokʼol kaabaʼ ka tu taasaj yéeteleʼ le kíimiloʼ, bey xan máanik xan le kíimiloʼ tiʼ tuláakal máakoʼob tumen tuláakal kʼebanchajoʼob» (Rom. 5:12). Kex k-ilik maʼ k-beetik baʼax kʼaaseʼ yaan kʼiineʼ k-beetik baʼaloʼob maʼ maʼalobiʼ, le oʼolal kʼaʼabéet k-kʼáatik tiʼ Dios ka u perdonartoʼon. Apóstol Pabloeʼ ku yaʼalik: «Maʼatan in beetik le baʼax maʼalob in kʼáatoʼ, baʼaleʼ táan in beetik le baʼax kʼaas maʼ in kʼáatoʼ. ¡Jach óotsilen!» (Rom. 7:19, 24).

² Teʼ xookaʼ yaan k-ilik u núukil le kʼáatchiʼobaʼ: ¿Bix páajchajik u síijil Jesús x-maʼ kʼebanil wa tuláakal máak kʼeban? ¿Baʼaxten okjaʼanaji? ¿Bix tu yeʼesil u justicia Jéeoba le tiaʼan way Luʼumoʼ? Yéetel ¿baʼax béeychaj úuchik u tsʼáaik u kuxtaloʼ?

Aʼalaʼab maʼ maʼalob bix u gobernar Diosiʼ

3. ¿Bix tuʼusik Eva tumen le Kʼaasilbaʼaloʼ?

³ Le yáax máakoʼoboʼ tu luʼsubaʼob yáanal u gobierno Dios ka tu tsʼáajubaʼob tu tséel u gobierno «le úuchben kaan ku kʼaabaʼintik Kʼaasilbaʼal wa Satanasoʼ» (Apo. 12:9). ¿Baʼax jach tu jaajil le úuchoʼ? Le ka tu kʼáataj Satanás tiʼ Eva wa jach tu jaajil maʼ unaj u jaantkoʼob «u yich mix junkúul cheʼ yaan» teʼ jardinoʼ, tu beetaj u tuklaʼal maʼ maʼalob bix u gobernar Jéeobaiʼ. Evaeʼ tu yaʼalajtiʼ chéen u yich ukúul cheʼ maʼ unaj u jaantkoʼobiʼ, yéetel wa ku jaantkoʼobeʼ yaan u kíimloʼob. Baʼaleʼ Satanaseʼ tu yaʼalajtiʼ: «Maʼ ta kíimileʼex»; bey úuchik u yaʼalik chéen táan u tuus Jéeobaoʼ. Yéetel le baʼaxoʼob tu yaʼaloʼ tu beetaj u tuklaʼal tumen Eva yaan baʼax maʼalob ku luʼsaʼaltiʼob tumen Dios. Tu yaʼalajtiʼeʼ wa ku jaantik u yich le cheʼoʼ yaan u kʼuchul u beetuba jeʼex Dioseʼ yéetel yaan u páajtal u chʼaʼatuklik baʼax maʼalob yéetel baʼax kʼaas (Gén. 3:1-5).

4. ¿Bix úuchik u pʼáatal wíinik yáanal u páajtalil Satanás?

⁴ Jeʼex túun k-ilkoʼ, le Kʼaasilbaʼaloʼ, tu tsʼáaj naʼatbileʼ maas jeʼel u yantal kiʼimak óolal tiʼ wíinik wa ku luʼskuba tu tséel u gobernación Jéeobaeʼ. Adaneʼ unaj kaʼach u yeʼesik maas maʼalob bix u gobernar Dios, baʼaleʼ maʼ tu beetiʼ, baʼaxeʼ tu yuʼubaj u tʼaan u yatan ka tu jaantaj u yich le cheʼ aʼalaʼantiʼob maʼ u jaantkoʼoboʼ. Bey úuchik u xuʼulul u biskuba yéetel Diosoʼ, tsʼoʼoleʼ tu tsʼáajoʼon yáanal u páajtalil le kʼeban yéetel le kíimiloʼ. Bey túun úuchik u pʼáatal máak yáanal u páajtalil Satanás, «u [diosil] le yóokʼol kaabaʼ» (2 Cor. 4:4; Rom. 7:14).

5. 1) ¿Bix úuchik u béeykuntik Jéeoba le baʼax u yaʼalmoʼ? 2) ¿Baʼax ku yeʼesik le baʼax tu yaʼalaj Jéeoba le ka tu juzgartaj Adán yéetel Evaoʼ?

⁵ Jéeobaeʼ ku béeykuntik tuláakal baʼax ku yaʼalik. Le oʼolal le castigo tu tsʼáaj tiʼ Adán yéetel Evaoʼ letiʼe kíimiloʼ (Gén. 3:16-19). Baʼaleʼ lelaʼ maʼ u kʼáat u yaʼal wa maʼ kun béeytal le baʼax u tukulmoʼ. Le baʼax tu yaʼalaj ka tu juzgartoʼoboʼ  ku yeʼeskeʼ yaan upʼéel baʼax maʼalob ku páaʼtik u paalaloʼob. Jéeobaeʼ tu yaʼaleʼ yaan u tsʼáaik utúul «chʼiʼibal», yéetel kex yaan u chiʼibil tu tuunkuy tumen Satanaseʼ yaan u yutstal yéetel yaan u tsʼáanchaʼatik tu pool (Gén. 3:15). Le Bibliaoʼ ku yáantkoʼon k-maas naʼat le ken u yaʼal Jesucristo, «u Paal Jajal Dioseʼ[,] taal utiaʼal u mixbaʼalkúunt le baʼax u beetmaj Kʼaasilbaʼaloʼ» (1 Juan 3:8). Baʼaleʼ ¿bix úuchik u chíikbesik u justicia Jéeoba le baʼaxoʼob tu beetaj Jesús yéetel le úuchik u kíimloʼ?

¿Baʼax tu chíikbesaj u yokjaʼ Jesús?

6. ¿Bix k-ojéeltik Jesuseʼ maʼ yanchaj u kʼebaniʼ?

⁶ Dioseʼ u tukulmeʼ, le ken nojochchajak Jesuseʼ, yaan u pʼáatal jach jeʼex Adán táanil tiʼ u kʼebantaleʼ (Rom. 5:14; 1 Cor. 15:45). Utiaʼal leloʼ kʼaʼabéetchaj u síijil x-maʼ kʼebanil. ¿Bix páajchajik wa tuláakal máak kʼeban? Le ángel Gabrieloʼ tu yaʼalaj tiʼ María, u maama Jesús: «Kiliʼich [muukʼ] kun taal ta wóokʼol, u páajtalil sen kaʼanal [...] Jajal Dios kun toʼikech bey yéetel jumpʼéel múuyaleʼ. Le beetik xaneʼ le kiliʼich chaampal kun síijiloʼ yaan u tʼaʼanal u Paal Jajal Dios» (Luc. 1:35). Maʼ xaaneʼ tu chichnil Jesuseʼ, tsikbaltaʼabtiʼ tumen u maama jujumpʼéel baʼaloʼob yaan yil yéetel le bix úuchik u síijloʼ. Le oʼolal le ka bin yéetel José, u yíicham, u kaxtoʼob teʼ templooʼ, Jesuseʼ tu yaʼalajtiʼob: «¿Maʼ wa a wojeleʼex [tu yotoch] in Taata unaj in wantaliʼ?» (Luc. 2:49). Leloʼ ku yeʼeskeʼ desde tu chichnil Jesuseʼ u yojel letiʼeʼ u Hijo Dios. Le oʼolal tu yilaj u chíikbesik u justicia Dios mantatsʼ.

7. ¿Baʼax jach koʼoj u tojol yaan kaʼach tiʼ Jesús?

⁷ Jesuseʼ tu yeʼesaj jach utstutʼaan u kaambal tiʼ Dios, le oʼolal bin mantatsʼ tuʼux ku adorartaʼal. Letiʼeʼ jach maʼalob u tsʼoʼomel utiaʼal u láaj pʼáatal tu pool le baʼaxoʼob ku yuʼubik yéetel ku xokik teʼ Kiliʼich Tsʼíiboʼob ich Hebreooʼ (Luc. 4:16). Tsʼoʼoleʼ le wíinklil x-maʼ kʼeban yantiʼ kaʼachoʼ, upʼéel baʼax jach koʼoj u tojol jeʼel u páajtal u tsʼáaik tu yoʼolal tuláakal máakeʼ. Lelaʼ bey aʼalaʼanil teʼ Salmo 40:6 tak 8, maʼ xaaneʼ le ka okjaʼanajoʼ kʼaʼajtiʼ le baʼax ku yaʼalikoʼ (Luc. 3:21; xokaʼak Hebreob 10:9, 10).

8. ¿Baʼaxten maʼ u kʼáat Juan u tsʼáa u yokjaʼ Jesús kaʼachiʼ?

⁸ Ka bin Jesús yiknal Juan utiaʼal ka tsʼaʼabak u yokjaʼeʼ, Juaneʼ maʼ tu jáan óotaj kaʼachiʼ. ¿Baʼaxten? Tumen le okjaʼ ku tsʼáaik kaʼachoʼ ku chíikbesik tsʼoʼok u arrepentir le judíoʼob yoʼolal le baʼaxoʼob maʼ maʼalobtak u beetmoʼoboʼ yéetel tumen maʼ tu beetkoʼob le baʼax ku yaʼalik le Leyoʼ. Tumen láakʼtsiloʼobeʼ,  Juaneʼ u yojel minaʼan u kʼeeban Jesús, le oʼolal maʼ kʼaʼabéet u yeʼesik wa tsʼoʼok u arrepentiriʼ. Baʼaleʼ Jesuseʼ tu yaʼalajtiʼ: «Beet beyoʼ, tumen u najmal ka k-beet tuláakal baʼax ku yaʼalik Jajal Dios» (Mat. 3:15.)

9. ¿Baʼax tu chíikbesaj u yokjaʼ Jesús?

⁹ Wa Jesús u kʼáateʼ jeʼel u béeytal u yantal u paalal minaʼan u kʼebanoʼob, jeʼex Adán kaʼacheʼ. Baʼaleʼ maʼ máan tu tuukul baʼaloʼob beyoʼ, tumen u yojel maʼ le u kʼáat Jéeoba ka u beetiʼ. Letiʼeʼ túuxtaʼab tumen Dios utiaʼal ka u beet u Mesíasi wa le Chʼiʼibal aʼalaʼanoʼ, lelaʼ u kʼáat u yaʼaleʼ yaan u kʼubik u kuxtal tu yoʼolal tuláakal máak (xokaʼak Isaías 53:5, 6, 12). Baʼaleʼ le úuchik u yokjaʼ Jesusoʼ yaanal baʼax ku chíikbesik tiʼ le okjaʼ ku tsʼaʼabaltoʼonoʼ. Maʼ u kʼáat u yaʼal wa táan u kʼubik u kuxtal tiʼ Jéeobaiʼ, tumen síij tu kaajil Israel, upʼéel kaaj u kʼubmuba tiʼ Dios. Baʼaxeʼ le úuchik u yokjaʼoʼ tu yeʼesaj nukaʼaj u beet baʼax ku yaʼalik u Taata, jeʼex aʼalaʼanil teʼ profecíaʼob ku tʼaanoʼob tiʼ le Mesíasoʼ.

10. ¿Baʼax u kʼáat Dios ka u beet le Mesías kaʼachoʼ, yéetel bix úuchik u beetik Jesús?

¹⁰ Jesuseʼ tu beetaj yéetel kiʼimak óolal baʼax utstutʼaan Dios, ichil lelaʼ táakaʼan u kʼaʼaytik le maʼalob péektsiloʼ, u kaʼansik uláakʼ máakoʼob yéetel u yáantkoʼob utiaʼal ka u seguert u kaʼanskoʼob u maasil. Baʼaleʼ le ka okjaʼanajoʼ tu yeʼesaj jeʼel u yóotik ka chʼaʼapachtaʼak yéetel ka kíimsaʼak utiaʼal u yeʼesik u tsʼáamuba tu tséel u gobernación Jéeobaeʼ. Letiʼeʼ jach u yaabiltmaj u Taata. Le oʼolal yéetel kiʼimak óolal tu beetaj baʼax ku yaʼalik Jéeoba yéetel tu tsʼáaj u kuxtal yoʼolal wíinikoʼob (Juan 14:31). Tu taasaj kiʼimak óolal tiʼ u yojéeltik jeʼel u béeytal u jáalkʼabtikoʼon tiʼ le kʼeban yéetel tiʼ le kíimil ken u kʼub u kuxtaloʼ. ¿Kʼaʼam wa tumen Jéeoba le baʼax tu beetoʼ? ¡Kʼaʼami!

11. ¿Bix úuchik u yeʼesik Jéeoba tu kʼamaj Jesús bey le Mesías aʼalaʼanoʼ?

¹¹ Le kampʼéel Evangelioʼoboʼ ku yeʼeskeʼ Jéeobaeʼ tu kʼamaj Jesús le ka jóokʼ ichil u jaʼil le Jordanoʼ. Juan Bautistaeʼ ku yaʼalik yoʼolal le baʼax úuchoʼ: «Teneʼ tin wilaj u jeʼepajal kaʼaneʼ yéetel u yéemel kiliʼich [muukʼ] bey juntúul palomaeʼ ka pʼáat tu yóokʼol [Jesús]. [...] Teneʼ tsʼoʼok in wilik, le beetik kin jaajkúuntikeʼ letiʼ u Paal Jajal Dios» (Juan 1:32-34). Teʼ kʼiin jeʼeloʼ Jéeobaeʼ tu yaʼalaj xan: «Lelaʼ in paal in yaabilaj, tu yoʼolal máax jach kiʼimak in wóol» (Mat. 3:17; Mar. 1:11; Luc. 3:22).

Chúukpaj u yóol tak ka kíimi

12. ¿Baʼax tu beetaj Jesús ichil le óoxpʼéel jaʼaboʼob ka tak táankoch tsʼoʼokok u yokjaʼoʼ?

¹² Ichil le óoxpʼéel jaʼaboʼob ka tak táankoch tsʼoʼokok u yokjaʼ Jesusoʼ, jach tu tsʼáaj u yóol u kaʼans le máakoʼob u kʼaj óoltoʼob u Taataoʼ yéetel tu yeʼesaj chéen letiʼ maas maʼalob bix u gobernar. Letiʼeʼ maʼ chéen chʼaʼabil úuchik u bisik le maʼalob péektsil tiʼ u kajnáaliloʼob Israeloʼ, tumen teʼ kʼiinoʼoboʼ xíimbalil u máan máak, kex beyoʼ letiʼeʼ tu beetaj yéetel kiʼimak óolal (Juan 4:6, 34; 18:37). Tsʼoʼoleʼ maʼ chéen tu kʼaʼaytaj le maʼalob péektsiloʼ, baʼaxeʼ tu tsʼakaj kʼojaʼanoʼob, tu tséentaj yaʼabkach máakoʼob yéetel tu kaʼa kuxkíintaj kimenoʼob. Lelaʼ ku yeʼesik baʼaxoʼob ken u beet u gobierno Dios yoʼolal tuláakal máak (Mat. 11:4, 5).

13. ¿Baʼax tu yaʼalaj Jesús unaj k-kʼáatik ken payalchiʼinakoʼon?

¹³ Jesuseʼ tu yeʼesaj kabal óolal, tumen tu tsʼáa nojbeʼenil tiʼ Jéeoba yoʼolal le baʼaxoʼob tu kaʼansoʼ bey xan úuchik u tsʼakik le máakoʼoboʼ (Juan 5:19; 11:41-44). Tu yaʼalaj xan baʼax unaj k-yáax kʼáatik ichil k-payalchiʼob. Unaj k-kʼáatik ka «kiliʼichkúunsaʼak» u kʼaabaʼ Dios yéetel ka taalak u gobierno utiaʼal ka u luʼs u kʼasaʼan gobierno Satanás, utiaʼal u beetaʼal baʼax utstutʼaan Dios «way luʼumeʼ jeʼel bix u beetaʼal teʼ kaʼanoʼ» (Mat. 6:9, 10). Tsʼoʼoleʼ  tu yaʼalaj ka k-tsʼáa «táanil u Reino Dios yéetel u justicia» (Mat. 6:33, NM).

14. Kex minaʼan u kʼeeban Jesuseʼ, ¿baʼaxten maʼ chéen chʼaʼabil úuchik u tsʼoʼokbesik le baʼax túuxtaʼab u beet tumen u Taataoʼ?

¹⁴ Jeʼex úuchik u náatsʼal u kʼiinil u kʼubik u kuxtal Jesuseʼ, bey úuchik u yuʼubik maas talam le baʼax ken u beetoʼ. Baʼaleʼ yaan baʼax oʼolal tu yuʼububa beyoʼ, tumen utiaʼal u béeykuntik le baʼax u kʼáat u Taata yéetel utiaʼal u yeʼesik maʼ jaaj le baʼax aʼalaʼan tu contraoʼ, kʼaʼabéet u chúukpajal u yóol u muʼyajt le baʼaxoʼob kun beetbiltiʼoʼ yéetel u kíimsaʼal bey utúul kʼasaʼan máakeʼ. Cinco kʼiinoʼob u bin u kíimsaʼaleʼ tu yaʼalaj tiʼ Jéeoba: «Péeknajaʼan in wóol. ¿Baʼax túun kin in waʼale? ¿Yaan wa in waʼalik: In Yuum, token tiʼ le baʼax kun úuchul tenaʼ? Baʼaleʼ taalajaʼanen utiaʼal lelaʼ». Letiʼeʼ tu yuʼububa beyoʼ tumen láayliʼ utúul wíinikeʼ. Baʼaleʼ maʼ chʼíik tuukul chéen tiʼ letiʼiʼ, baʼaxeʼ tuukulnaj tiʼ Dios, le oʼolal tu yaʼalajtiʼ: «In Yuum, nojbeʼenkúunt a kʼaabaʼ». Tu séebaʼanileʼ aʼalaʼabtiʼ tumen Jéeoba: «Tsʼoʼok in nojbeʼenkúuntik yéetel yaan in nojbeʼenkúuntik tu kaʼatéen» (Juan 12:27, 28). Jeʼex túun k-ilkoʼ Jesuseʼ chúukpaj u yóol u aktáant upʼéel muʼyajil jach nojoch mix utéen muʼyajtaʼak tumen wíinik. Baʼaleʼ le baʼaxoʼob aʼalaʼab tiʼ tumen u Taataoʼ le áant u yil jeʼel u páajtal u chúukpajal u yóol utiaʼal u tsʼáaik nojbeʼenil tiʼ yéetel utiaʼal u yeʼesik chéen tiʼ letiʼ yaan u derechoi u gobernar. Letiʼeʼ béeychaj u beetik lelaʼ.

¿Baʼax béeychaj yoʼolal u kuxtal Jesús tu kʼuboʼ?

15. ¿Baʼaxten tu yaʼalaj Jesús «tsʼokaʼan tuláakal» táanil tiʼ u kíimil?

¹⁵ Le bajaʼan teʼ cheʼ, táanil tiʼ u kíimloʼ tu yaʼalaj: «Tsʼokaʼan tuláakal» (Juan 19:30). Yéetel u yáantaj Dioseʼ yaʼab baʼaloʼob tu beetaj ichil le óoxpʼéel jaʼaboʼob ka tak táankoch ka tsʼoʼok u yokjaʼoʼ. Teʼ súutuk ka kíimoʼ tu tíituba le luʼumoʼ, le oʼolal le soldado yaan naatsʼ tiʼoʼ tu yaʼalaj: «¡Tu jaajil, le máakaʼ u Paal Jajal Dios!» (Mat. 27:54). Le soldadoaʼ tu yaʼalaj beyoʼ tumen tu yilaj bix úuchik u pʼaʼastaʼal le ka tu yaʼalaj letiʼeʼ u Hijo Dios. Kex jach yaʼab baʼaxoʼob tu muʼyajtaj Jesuseʼ, chúukpaj u yóol tak ka kíimi, beyoʼ tu yeʼesaj maʼ jaaj baʼax ku yaʼalik Satanasiʼ. Kʼaʼajaktoʼoneʼ le Kʼaasilbaʼaloʼ u yaʼalmaj yoʼolal le máaxoʼob ku tsʼáaikubaʼob tu tséel u gobernación Diosoʼ: «Wíinikeʼ, jeʼel u kʼubik tuláakal baʼax utiaʼal, tu yoʼolal maʼ u kíimsaʼal[eʼ]» (Job 2:4). Le úuchik u chúukpajal u yóol Jesús tak ka kíimoʼ, tu yeʼeseʼ Adán yéetel Evaeʼ jeʼel kaʼach u páajtal u chúukpajal u yóol u beetoʼob baʼax ku yaʼalik Dioseʼ, letiʼobeʼ maas maʼ talam kaʼach jeʼel u beetkoʼobeʼ. Le oʼolal le baʼaxoʼob tu beetaj Jesús yéetel le úuchik u kíimloʼ tu yeʼesaj u justicia Jéeoba yéetel tu yeʼesaj chéen tiʼ letiʼ yaan u derechoi u gobernar (xokaʼak Proverbios 27:11). Baʼaleʼ ¿yaan wa uláakʼ baʼax béeychaj le úuchik u kʼubik u kuxtal Jesusoʼ? ¡Yaan!

16, 17. 1) ¿Baʼax tsʼáaj u páajtalil u kʼaʼamal le kʼeban wíinikoʼob tumen Jéeoba táanil tiʼ u taal Jesusoʼ? 2) ¿Baʼax páajtalil tu tsʼáaj Jéeoba tiʼ u Hijo úuchik u chúukpajal u yóol u meyajte, yéetel baʼaxoʼob ku beetik Jesucristo teʼ kʼiinoʼobaʼ?

¹⁶ Le máaxoʼob meyajt Jéeoba yéetel chúukaʼan óolal táanil tiʼ u taal Jesús way Luʼumeʼ, yaan u kaʼa kuxkíintaʼaloʼob (Isa. 25:8; Dan. 12:13). Baʼaleʼ utiaʼal u kʼaʼamal le utsiloʼob tumen le kʼeban wíinikoʼoboʼ, yaan upʼéel baʼax tu beetaj Jéeoba. ¿Baʼax túuniʼ? Le Bibliaoʼ ku yaʼalik: «Dioseʼ tu kʼubaj bey juntúul kíimsbil baʼalcheʼ utiaʼal ka u kaʼa bisuba máak tu yéetel yoʼolal le fe ku tsʼáaikoʼob tiʼ le u kʼiʼikʼel Cristooʼ. Lelaʼ Dioseʼ tu beetaj utiaʼal u yeʼesik u justicia, tumen letiʼeʼ táan kaʼach u perdonartik le  kʼebanoʼob beetaʼab úuchjeakil le táan u yeʼesik u chúukaʼan óolaloʼ; tu beetaj xan utiaʼal u yeʼesik u justicia teʼ kʼiinoʼobaʼ, beyoʼ letiʼeʼ yaan u chíikpajal maʼalob baʼax ku beetik, tak ken u yaʼal toj u kuxtal le máax ku tsʼáaik u fe tiʼ Jesusoʼ» (Rom. 3:25, 26, NM). *

¹⁷ Tumen chúukpaj u yóol Jesuseʼ, kaʼa kuxkíintaʼab tumen Jéeoba yéetel tsʼaʼab maas yaʼab páajtalil tiʼ le bukaʼaj yantiʼ kaʼach táanil tiʼ u taal way Luʼumeʼ. Bejlaʼeʼ Jesuseʼ utúul ángel maʼ tu béeytal u kíimil mix bikʼin (Heb. 1:3). Tsʼoʼoleʼ yéetel le meyaj ku beetik Jesucristo bey Nojoch j-Kʼiinil yéetel Reyiloʼ, jeʼel u páajtal u yáantik u disipuloʼob utiaʼal ka u yeʼesoʼob xan u justicia Dioseʼ. ¿Máasaʼ jach ku taasiktoʼon kiʼimak óolal k-ojéeltik Jéeobaeʼ ku tsʼáaik u yutsil tiʼ tuláakal le máaxoʼob ku chúukpajal u yóoloʼob tiʼ, jeʼex beetaʼabik tumen u Hijooʼ? (xokaʼak Salmo 34:3 yéetel Hebreob 11:6.)

18. ¿Baʼax kʼáatchiʼi kun núukbil teʼ tuláakʼ xookoʼ?

¹⁸ Desde tu kʼiiniloʼob Abeleʼ, le máakoʼoboʼ páajchaj u biskubaʼob yéetel Jéeoba tumen ku tsʼáaik u fejoʼob tiʼ yéetel ku kʼubik u yóoloʼob tiʼ le Chʼiʼibal aʼalaʼanoʼ. Dioseʼ u yojel yaan u chúukpajal u yóol Jesús tak tu kíimil yéetel yaan u boʼotik «u kʼeban yóokʼol kaab» (Juan 1:29). Le úuchik u kʼubik u kuxtal Cristooʼ ku taasik yaʼab utsiloʼob tiʼ tuláakal máak bejlaʼeʼ (Rom. 3:26). ¿Baʼax utsil jeʼel u taasiktecheʼ? Lelaʼ le ken k-il teʼ tuláakʼ xookoʼ.

[Tsolajiloʼob]

¿Baʼax jeʼel a núukikeʼ?

• ¿Bix úuchik u yaʼalaʼal maʼ maʼalob bix u gobernar Diosiʼ?

• ¿Baʼax tu chíikbesaj u yokjaʼ Jesús?

• ¿Baʼax béeychaj úuchik u kʼubik u kuxtal Jesús?

[U kʼáatchiʼiloʼob le xookoʼ]

[U tsolajil le oochel teʼ táan juʼun 9]

¿A wojel wa baʼax tu chíikbesaj u yokjaʼ Jesús?