¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Baʼaxten tsʼaʼab le kʼaabaʼ «Cristo» tiʼ Jesusoʼ?

Le tʼaan cristooʼ tiʼ u taal tiʼ le tʼaan griego kjristós, yéetel tiʼ le tʼaan hebreo maschíaj (Mesías). Le tʼaanoʼobaʼ u kʼáat u yaʼal «yéeyaʼan». Tumen Jesús letiʼe Mesías aʼalaʼanoʼ, Jéeoba yéey utiaʼal u tʼaan tu yoʼolal. Le oʼolal jach maʼalob úuchik u tsʼaʼabal le kʼaabaʼ «Cristo, u Paal le kuxaʼan Jajal Dios» tiʼoʼ (Mat. 16:16; 1/4, táan juʼun 15).

• ¿Jesús wa le arcángel Migueloʼ?

Le kʼaabaʼ Migueloʼ ku chíikpajal cinco utéenel ichil le Biblia utiaʼal u chʼaʼachiʼitaʼal utúul ángel jach yaan u páajtaliloʼ. Tu tsʼíibil 1 Tesalonicailoʼob 4:16, ku yaʼalikeʼ Jesuseʼ letiʼ le arcángel wa u maas nojchil le angeloʼoboʼ. Le tʼaan Migueloʼ u kʼáat u yaʼal «¿Máax jeʼel bix Dioseʼ?», yéetel Jesuseʼ u kʼáat u yaʼal «Jéeobaeʼ ku tsʼáaik Salvación» (1/4, táan juʼun 19).

• ¿Baʼaxten maʼ castigartaʼab Aarón tumen Dios le úuchik u beetik le chan wakax de orooʼ?

Le baʼax tu beetaj Aaronoʼ bin tu contra u ley Dios tuʼux ku yaʼalik maʼ u beetaʼal yéetel u adorartaʼal yaanal diosoʼob (Éxo. 20:3-5). Baʼaleʼ Moiseseʼ payalchiʼinaj tu yoʼolal, beyoʼ chíikpaj u «payalchiʼ juntúul máak utseʼ jach nojoch u páajtalil» (Sant. 5:16). Aaroneʼ úuch joʼopʼok u chúukpajal u yóol u meyajt Jéeoba. Kex tu chaʼaj u túulchʼintaʼal tumen le israelitaʼob u beet le chan wakax de orooʼ, le baʼax tu beetaj ka tsʼoʼokoʼ ku yeʼeskeʼ maʼ upʼéeliliʼ u tuukul yéetel le máaxoʼob adorart le beetbil diosoʼ, tumen tu muchʼuba yéetel u paal Leví utiaʼal u tsʼáaikubaʼob tu tséel Jéeoba (Éxo. 32:25-29; 15/5, táan juʼun 21).

• ¿Baʼax jeʼel u yáantaj ken tuʼusuk máak tumen u núup yéetel yaanaleʼ?

Wa le máax ku traicionartaʼal ku beetik le baʼax ku yaʼalik le Bibliaoʼ, minaʼan baʼax oʼolal u yuʼubik tiʼ letiʼ yaan u culpai baʼax tu beetaj u núup. Jéeobaeʼ u yojel kʼaʼabéet u yáantaʼal yéetel u líiʼsaʼal u yóol le máaxoʼob ku traicionartaʼaloʼoboʼ. Upʼéel tiʼ le baʼaxoʼob ku meyaj tiʼ utiaʼal u líiʼsik u yóol máakoʼ letiʼe múuchʼuliloʼ (15/6, táan juʼun 30).

• ¿Baʼax jeʼel u beetik máak utiaʼal u tsʼáaik u pʼiis u yukʼikeʼ?

Wa yaan máax tsʼoʼok u yaʼaliktech ku píitmáan a wukʼikeʼ, ilawil a tsʼáaik u pʼiis. Le baʼaloʼobaʼ jeʼel u yáantkecheʼ: payalchiʼinen mantatsʼ, kaxt u nuʼuktaj le Bibliaoʼ, tsʼáa u pʼiis a wukʼik, kanáant yéetel máax ka biskaba, ilawil bukaʼaj ken a wukʼe, aʼal maʼ, kaxt áantaj yéetel maʼ a kʼexik a tuukul. Le máaxoʼob beetik le baʼaxoʼob ku yaʼalik Diosaʼ ku kʼamkoʼob yaʼab utsiloʼob (1/7, táan juʼun 6-9).

• ¿U kʼáat wa u yaʼal Proverbios 6:30 maʼ kʼaas ka ookolnak máakiʼ?

Maʼatech, tumen Dioseʼ láayliʼ ku yilik bey upʼéel ookoleʼ. Le oʼolal le versículo 31 ku yaʼalikeʼ «ken chuʼukuk táan u yookoleʼ yaan u sutik siete utéenel le baʼax u yokoltmajoʼ». Le oʼolal le máax u kʼáat lúubul utsil tiʼ Dioseʼ jach u puliʼ maʼ unaj u yookol kex jach kʼaʼabéet wa baʼax tiʼiʼ (1/7, táan juʼun 14).

• ¿Jeʼel wa u páajtal u yáantkoʼon le kimenoʼoboʼ?

Le Bibliaoʼ ku yeʼesikeʼ le kimenoʼoboʼ «maʼ u yojeloʼob mix baʼaliʼ» yéetel le tuʼux ku binoʼoboʼ tiʼ «ku tsʼoʼokol u yaakunajiʼ, baʼax u pʼeek tiʼ xan ku xuʼulul u tsʼíibolaloʼo[biʼ]» (Ecl. 9:5, 6). Jesuseʼ tu ketaj le kíimil yéetel weneloʼ, ken wenek máakeʼ maʼ tu páajtal u yáantik mix máak, tumen maʼ u yojel baʼax ku yúuchliʼ (1/7, táan juʼun 21).

• ¿Bix jeʼel a wáantik a paalal utiaʼal ka utsak tu yich u xookoʼobeʼ?

U yeʼesaʼal yaabilaj tiʼob yéetel u xook le taatatsil u yil u paalaloʼ ku yáantaj utiaʼal ka utsak tu yich u xookoʼob xan. Tsʼáaj le jóoʼsaʼaniloʼob tiʼoboʼ. Xooknen u yuʼuboʼob. Ilawil u táakpajloʼobiʼ yéetel tsikbalteʼex le baʼax ka xokik u yuʼuboʼoboʼ. Aʼaltiʼob ka xooknakoʼob a wuʼuye yéetel ka u kʼáatoʼob baʼax maʼ tu naʼatoʼobiʼ (15/7, táan juʼun 26).

• ¿Baʼaxten maʼ unaj k-tuukul jeʼex u maasil máakoʼob maʼatech u meyajtkoʼob Diosoʼ?

Le bix u tuukul u maasil máakoʼob yoʼolal baʼax uts yéetel baʼax kʼaasoʼ, maʼ bey u tuukul Diosiʼ. Le oʼolal toʼoneʼ k-beetik jeʼex Jesucristooʼ, letiʼeʼ tu tsʼáaj nojbeʼenil tiʼ u Taata, «maʼ tu beetaj u cuentai wa subtsil» ka kíimsaʼak tiʼ upʼéel cheʼiʼ (Heb. 12:2; 15/8, táan juʼun 5).

• ¿Baʼaxten páajchaj u yaʼalik Jesús tiʼ utúul koʼolel tsʼoʼok u perdonartaʼal u kʼeeban?

Le yaʼax profecía tu yaʼalaj Jéeoba ka tsʼoʼok u kʼebantal Adán yéetel Evaoʼ, ku yeʼeskeʼ yaan u tsʼáaik utúul chʼiʼibal wa Mesías utiaʼal u boʼotik le kʼebanoʼ. Tumen mix baʼal jeʼel u beetik maʼ u béeytal le baʼax u tukulmaj Jéeobaoʼ, desde le ka tu yaʼalaj le baʼax tsʼíibtaʼan tiʼ Génesis 3:15, tu táaneʼ tsʼoʼok u tsʼaʼabal le boʼoloʼ. Bey túunoʼ, kex maʼ u kʼub u kuxtal Cristo kaʼacheʼ, lelaʼ upʼéel baʼal jach yaan u béeytal, le oʼolal béeychaj u perdonartaʼal u kʼeeban le máakoʼob, jeʼex le koʼolelaʼ (15/8, táan juʼun 6, 7).