Táankelem paal, maʼ a beetik baʼax ku yaʼalik u maasil
Táankelem paal, maʼ a beetik baʼax ku yaʼalik u maasil
«A tsikbaleʼexeʼ mantatsʼ ka uʼuyaʼak maʼalob yéetel jatsʼuts, yéetel ka a wojéelteʼex bix unaj a núukikeʼex u tʼaan [u maasil].» (COL. 4:6)
1, 2. ¿Baʼax ku taaktal u beetik yaʼab táankelem paalal?
MAʼ XAANEʼ tsʼoʼok a wuʼuyik u sen aʼalaʼal tiʼ wa máax ka u beet upʼéel baʼax maʼ maʼalobiʼ, wa maʼ xaaneʼ tiʼ teech tsʼoʼok u sen aʼalaʼal ka beet upʼéel baʼax kʼaas. ¿Bix a wuʼuyikaba teʼ súutukoʼob beyoʼ? Maʼ xaaneʼ ka wuʼuyikaba jeʼex Christopher, utúul xiʼipal yaan 14 jaʼaboʼob tiʼeʼ, letiʼeʼ ku yaʼalik: «Baʼax taalen in kaxt wayeʼ, wa maʼeʼ, kin wuʼuyik bey in kʼáat in beet jeʼex u maasil utiaʼal maʼ u yilkoʼob wa jelaʼan bix in kuxtaloʼ».
2 ¿Ka wuʼuyik wa yaan kʼiin taak a beetik baʼax ku yaʼaliktech a wéet paaliloʼob? Wa beyoʼ, ¿baʼaxten? ¿Tumen wa a kʼáat lúubul utsil tiʼob? Leloʼ maʼ kʼaasiʼ. Tak le máaxoʼob tsʼoʼok u nuuktaloʼoboʼ ku yilik u beetkoʼob baʼax utstutʼaan u maasil. Mix máak utstutʼaan u tsʼaʼabal jumpáayil, kex jeʼel jaypʼéel jaʼab yantiʼeʼ. Baʼaleʼ wa a kʼáat a beet baʼax maʼalobeʼ, maʼ tiʼ tuláakal máak kan lúubul utsiliʼ. Tak tiʼ Jesuseʼ bey úuchikoʼ, baʼaleʼ tu yilaj u beetik baʼax maʼalob mantatsʼ. Kex yaan máaxoʼob tsaypacht yéetel tu beetubaʼob u disipuloʼobeʼ, pʼektaʼab tumen u maasil yéetel taasaʼab mix baʼalil (Isa. 53:3).
¿Tak baʼax jeʼel u péekskoʼon k-beet baʼax ku yaʼalik u maasileʼ?
3. ¿Baʼaxten maʼ unaj a beetik baʼaxoʼob ku beetaʼal tumen u maasiliʼ?
3 Maʼ xaaneʼ jeʼel u taaktal a beetik baʼax ku yaʼalik u maasil utiaʼal maʼ u pʼaʼaskechoʼobeʼ. Baʼaleʼ maʼ beetik baʼax ku yaʼalikoʼob. Le máaxoʼob meyajtik Diosoʼ maʼ unaj u chaʼik u suʼusutaʼaloʼob bey mejen paalaloʼob «séebaʼan u kʼexik u tuukuloʼob[eʼ]» (Efe. 4:14). Le mejen paalaloʼoboʼ jach séeb u yoksaʼal yaanal baʼal tu tuukuloʼob. Baʼaleʼ kʼaʼajaktecheʼ táan a nojochtal. Wa jach ka creertik utiaʼal a wutsil le baʼaxoʼob ku yaʼalik Jéeobaoʼ, maʼ chaʼik u kʼexaʼal a tuukul tumen mix máak. ¡Teech unaj a yéeyik baʼax ken a beete! (Deu. 10:12, 13.) Wa ka beetik baʼax ku yaʼalik u maasileʼ táan a chaʼik u suʼusutikoʼob a kuxtal. A beetik chéen baʼax ku yaʼalik u maasileʼ bey ka chaʼa u palitsilkechoʼobeʼ (xokaʼak Romailoʼob 6:16).
4, 5. 1) ¿Baʼax tu beetaj Aarón utéenjeakil, yéetel baʼax ku kaʼansiktoʼon? 2) ¿Bix jeʼel a túulchʼintaʼal a beet baʼax maʼ maʼalobeʼ?
4 Utéenjeakileʼ Aarón, u sukuʼun Moiseseʼ, tu beetaj baʼax ku yaʼalik u maasil. Lelaʼ úuch le ka aʼalaʼabtiʼ tumen u maasil israelitaʼob ka u beet upʼéel beetbil dios. Baʼaleʼ maʼ tuklik wa tu beetaj tumen jach sajak. Kʼaʼajaktecheʼ letiʼeʼ bin tʼaan tu táan faraón, le máax maas yaan u páajtalil kaʼach Egiptooʼ, letiʼeʼ tu yaʼalajtiʼ baʼax ken u beet Dios. Baʼaleʼ le ka joʼopʼ u yaʼalaʼaltiʼ tumen le israelitaʼob ka u beet le chan wakax de orooʼ, sajakchaj tiʼobeʼ ka tu beetaj. Maas talam úuchik u yilik maʼ u beetik le baʼax ku yaʼalik le israelitaʼoboʼ ke úuchik u bin tʼaan tu táan u reyil Egipto. Lelaʼ ku yeʼeskeʼ le baʼax ku yaʼalik u maasiloʼ jach séeb jeʼel u beetik u lúubul máakeʼ (Éxo. 7:1, 2; 32:1-4).
5 Le baʼax úuch tiʼ Aaronoʼ ku yeʼeskeʼ maʼ chéen le táankelem paalal wa le máaxoʼob saajkoʼob jeʼel u beetkoʼob baʼax ku yaʼalik u maasiloʼ. Tak máakoʼob táan u yilik u beetkoʼob baʼax maʼalob jeʼex techoʼ. Maʼ xaaneʼ yaan u yaʼalaʼaltech baʼal, yaan u yaʼalaʼaltech saajkech wa uláakʼ baʼaloʼob utiaʼal u túulchʼintaʼal a beet baʼax kʼaas. Jeʼel máakalmáak tiʼ le baʼaloʼob ka úuchuktechaʼ maʼ chéen chʼaʼabil jeʼel a aktáantikeʼ. Wa a kʼáat a beet baʼax maʼalobeʼ, táanil kʼaʼabéet a jach creertik le baʼax tsʼoʼok a kanikoʼ.
«Ileʼex wa jeetsʼel a wanileʼex tiʼ le oksaj óolaloʼ»
6, 7. 1) ¿Baʼaxten jach unaj a wilik wa jaaj le baʼax ka creertikoʼ, yéetel bix jeʼel u páajtal a beetkeʼ? 2) ¿Baʼax kʼáatchiʼiloʼob unaj a beetik utiaʼal a muʼukʼaʼankúuntik a fe?
6 Utiaʼal maʼ a beetik chéen baʼax ku yaʼalik u maasileʼ kʼaʼabéet a creertik jach jaaj le baʼaxoʼob tsʼoʼok a kanik teʼ Bibliaoʼ (xokaʼak 2 Corintoiloʼob 13:5). ¿Baʼaxten? Tumen wa ka creertik jach jaajeʼ, kex suʼlakecheʼ maʼ ken a chʼaʼa saajkil tʼaan tu yoʼolal (2 Tim. 1:7, 8). Baʼaleʼ wa maʼ ta jach creertikeʼ, maas yaan u talamtaltech a tʼaan, kex ka wuʼuyik jeʼel u páajtal a beetkeʼ. Le oʼolal maʼalob ka wil wa jach jaaj le baʼax tsʼoʼok a kanik teʼ Bibliaoʼ. Táanileʼ tuukulnen tiʼ le baʼaxoʼob kʼaʼabéet u yáax kanaʼaloʼ. Jeʼex techeʼ ka creertik yaan Dios yéetel tsʼoʼok a wuʼuyik baʼaxten uláakʼ máakoʼobeʼ ku creertikoʼob xan. Le oʼolal unaj a tuklik: «¿Baʼax áantken in wil jach tu jaajil yaan Dios?». Baʼaleʼ le kʼáatchiʼaʼ unaj a beetik utiaʼal u maas muʼukʼaʼantal a fe, maʼ utiaʼal u kaʼapʼéeltal a tuukuliʼ. Maʼalob xan ka tukleʼ: «¿Bix jeʼel in wojéeltik wa Dios beet u tsʼíibtaʼal le Bibliaoʼ?» (2 Tim. 3:16). «¿Baʼaxoʼob áantken in wil kuxaʼanoʼon tu “tsʼook jaʼaboʼob”?» (2 Tim. 3:1-5.) «¿Baʼax áantken in wil le baʼaxoʼob ku yaʼalik Jéeobaoʼ utiaʼal in wutsil?» (Isa. 48:17, 18.)
7 Maʼ xaaneʼ saajkech tuukul tiʼ le kʼáatchiʼobaʼ, tumen ka tuklik maʼ tu páajtal a núukikoʼob. Baʼaleʼ leloʼ maʼ maʼalobiʼ, bey jeʼex ka waʼal maʼ ken a pakt le baʼax eʼesik wa tsʼoʼok u xuʼupul le gasolina yaan tu tanquei a cocheoʼ. Tumen wa tsʼoʼok u xuʼupleʼ kʼaʼabéet a wojéeltik utiaʼal a manik uláakʼ. Bey túun xanoʼ, maʼ unaj a sajaktal a wil wa yaan tuʼux unaj a maas muʼukʼaʼankúuntik a fejiʼ (Hch. 17:11).
8. ¿Baʼax jeʼel u yáantkech a wil maas maʼalob ka beet baʼax ku yaʼalik Dios utiaʼal maʼ a lúubul tiʼ núupkʼebaneʼ?
8 Tuukulnakoʼon tiʼ lelaʼ. Le Bibliaoʼ ku yaʼalik: «Púutsʼeneʼex, túun tiʼ le núupkʼebanoʼ». Tukulte: «¿Baʼaxten maʼalob le baʼax ku yaʼalikaʼ?». Tukult baʼaxten ku núupkʼebantal a wéet paaliloʼob yéetel baʼaxten ku yaʼalik le Biblia le máax ku núupkʼebantaloʼ «ku kʼebankúuntik u wíinklil» (1 Cor. 6:18). Ken tsʼoʼokok a wilik baʼaxteneʼ, tukulte: «¿Baʼax maas maʼalob ka in beete? ¿Jach wa tu jaajil maʼ kʼaas u núupkʼebankuntikuba máakiʼ?». Tuukulnen tiʼ baʼax jeʼel u yúuchul wa ka beet upʼéel baʼal beyoʼ. Maʼ xaaneʼ yaan tiʼ a wéet paaliloʼobeʼ yaan u yaʼalikoʼobtech jach maʼalob baʼax ta beetaj, baʼaleʼ ¿bix ken a wuʼuyilaba le ken yanakech yéetel a taataʼob wa yéetel le sukuʼunoʼob teʼ tu Najil Reinooʼ? ¿Yéetel bix ken a wuʼuyilaba ken payalchiʼinakech tiʼ Dios? ¿Jach wa tu jaajil a kʼáat a náachkuntaba tiʼ Dios chéen utiaʼal a lúubul utsil tiʼ a wéet paaliloʼob?
9, 10. ¿Bix jeʼel u yáantkech le baʼax ka creertik utiaʼal maʼ a beetik le baʼax ku yaʼalik a wéet paaliloʼoboʼ?
9 Wa táan a táankelemtal bey xan wa táan a x-lóoʼbayantaleʼ, tiaʼanech tu kʼiinil a kanik a chʼaʼanuʼukt «baʼax le utsoʼ bey xan baʼax le kʼaasoʼ» (xokaʼak Hebreob 5:14). Bejlaʼeʼ u kʼiinil a maas naʼatik baʼax u kʼáat u yaʼal a beetkaba j-jaajkunajil tiʼ Jéeoba. Leloʼ yaan u yáantkech a maas muʼukʼaʼankúunt a fe. Beyoʼ ken aʼalaʼaktech tumen a wéet paaliloʼob ka beet baʼax maʼ maʼalobeʼ, séebaʼan ken a waʼaltiʼob maʼ ken a beete yéetel maʼ kan sajaktal tiʼob. Yaan a wuʼuykaba jeʼex utúul x-lóoʼbayan kiik tu yaʼaleʼ: «Ken in waʼal tiʼ in wéet paaliloʼob maʼ ken in beet le baʼaxoʼob ku yaʼalikoʼoboʼ kin weʼesiktiʼob jach máaxeniʼ. Kin weʼesiktiʼob maʼ chéen yaan in religioniʼ. Baʼaxeʼ ku kaʼansikten bix unaj in tuukul, baʼaxoʼob ken in beete yéetel ku kaʼansikten baʼax maʼalob yéetel baʼax maʼ maʼalobiʼ. Kin weʼesiktiʼob letiʼe baʼax maas in kʼáat in beetoʼ».
10 U jaajileʼ maʼ chéen chʼaʼabil u beetik máak baʼax maʼalobiʼ, mix u tʼaan tiʼ le baʼax ku yaʼalik le Bibliaoʼ (Luc. 13:24). Maʼ xaaneʼ yaan kʼiineʼ ka tuklik wa maʼ chéen kunel a beetik baʼax maʼalobiʼ. Baʼaleʼ unaj u kʼaʼajaltecheʼ wa suʼlakech a waʼal baʼax ka creertikeʼ, yaan a maas pʼaʼastaʼal tumen a wéet paaliloʼob wa yaan u maas aʼalikoʼobtech ka beet baʼax maʼ maʼalobiʼ. Baʼaleʼ wa ka waʼalik tu jaajil a wóol baʼax ka creertikeʼ, yaan a wilikeʼ maʼ kun seguer u yaʼalikoʼobtech ka beet baʼax maʼ maʼalobiʼ (ket yéetel Lucas 4:12, 13).
Tukult baʼax ken a núuke
11. ¿Baʼax maʼalob ka u beet máak utiaʼal maʼ u yokskuba ich talmil?
11 Uláakʼ baʼax jeʼel u yáantkech utiaʼal maʼ a beetik baʼax ku yaʼalik u maasileʼ letiʼe a tukultik baʼax ken a núukoʼ (xokaʼak Proverbios 15:28). Lelaʼ ku yeʼeskeʼ kʼaʼabéet a tuklik baʼaxoʼob jeʼel a aktáantikeʼ. A beetik beyoʼ jeʼel u yáantkech utiaʼal maʼ a baʼateltʼaan yéetel mix máakeʼ. Koʼox aʼalikeʼ le táan u bin a xíimbaloʼ ka wilik náacheʼ yaan jujuntúul tiʼ a wéet xookoʼobeʼ táan u tsʼuʼutsʼkoʼob chamal teʼ bejoʼ. ¿A tuklikeʼ jeʼel wa u yaʼalikoʼobtech ka tsʼuʼutsʼ upʼéel chamaleʼ? ¿Baʼax unaj a beetik utiaʼal maʼ a wokskaba ichil le talmilaʼ? Proverbios 22:3 ku yaʼalik: «Máak ku tuukuleʼ ku yilik u taal u chuun yajeʼ ku jechik». Wa ka bin táanxel bejileʼ maʼ xaaneʼ maʼ ken a woksaba ich talmil. Leloʼ maʼ u kʼáat u yaʼal wa saajkechiʼ, baʼaxeʼ ku yeʼesik yaan a naʼat.
12. ¿Baʼax unaj a waʼalik ken beetaʼaktech upʼéel kʼáatchiʼ yoʼolal upʼéel baʼax maʼ maʼalobiʼ?
12 Baʼaleʼ ¿kux túun wa ku yantal upʼéel talmil maʼ tu páajtal a tséeltik? Tukulteʼ utúul tiʼ a wéet paalileʼ ku yaʼaliktech: «¿Jach wa tu jaajil mix utéen núupchilakech yéetel wa máax?». ¿Baʼax jeʼel a núukik wa ka aʼalaʼaktech beyoʼ? Unaj a beetik le baʼax ku yaʼalik le tekstoaʼ: «A tsikbaleʼexeʼ mantatsʼ ka uʼuyaʼak maʼalob yéetel jatsʼuts, yéetel ka a wojéelteʼex bix unaj a núukikeʼex u tʼaan [u maasil]» (Col. 4:6). Jeʼex u yaʼalik le tekstoaʼ, le bix ken a núukil le baʼax ku yaʼalaʼaltechoʼ yaan yil yéetel baʼax talmil ka aktáantik. Yaan kʼiineʼ maʼ jach kʼaʼabéet a waʼalik baʼax ku yaʼalik le Bibliaoʼ, baʼaxeʼ chéen kʼaʼabéet a waʼalik: «Maʼatech, maʼ in beetiʼ, leloʼ upʼéel baʼal chéen teen unaj in chʼaʼatuklik wa yaan in beetik wa maʼ».
13. ¿Baʼax kʼaʼabéet u chʼaʼik en cuentai máak utiaʼal u yilik wa yaan u núukik baʼax ku yaʼalaʼaltiʼ?
13 Tuukulnen tiʼ baʼax tu beetaj Jesús. Wa u yojel chéen kunel ka u núuk baʼax ku yaʼalaʼaltiʼeʼ, ku yilik maʼ u núukik wa ku yaʼalik chéen upʼéel tʼaan, jeʼex le ka kʼáatchiʼitaʼab tumen Herodeseʼ (Luc. 23:8, 9). U suukileʼ maas maʼalob maʼ núukik mix baʼal ken aʼalaʼaktech baʼax maʼ maʼalobiʼ (Pro. 26:4; Ecl. 3:1, 7). Baʼaleʼ ¿kux túun wa ka wilik le máax aʼaliktechoʼ jach taak u yojéeltik le baʼax ku kʼáatkoʼ? Kex ka joʼopʼok u tsʼíikil ta wéeteleʼ, maʼ xaaneʼ ku beetik chéen tumen maʼ tu naʼatik baʼaxten maʼ múul chilakech yéetel wa máaxiʼ wa yoʼolal uláakʼ baʼal (1 Ped. 4:4). Wa beyoʼ jeʼel u páajtal a maas tsoliktiʼ yéetel le Biblia baʼaxten maʼatech a beetkoʼ. Maʼ sajaktal yoʼolal baʼax jeʼel u yaʼaliktech u maasileʼ, baʼaxeʼ líiʼsaba utiaʼal a núukik «tiʼ tuláakal ka u kʼáatoʼob a chiʼ» yoʼolal baʼax ka creertik (1 Ped. 3:15).
14. ¿Bix jeʼel a sutik tu yóokʼol a wéet paaliloʼob le baʼax ku yaʼalikoʼobtechoʼ?
14 Yaan kʼiineʼ jeʼel u páajtal a sutik le kʼáatchiʼ tu yóokʼol le máax beetkoʼ. Baʼaleʼ unaj a wilik maʼ a beetik u tsʼíikil. Jeʼex wa ku yaʼalaʼaltech tumen a wéet paalil ka tsʼuʼutsʼ upʼéel chamaleʼ, jeʼel u páajtal a waʼaliktiʼeʼ: «Maʼ, diosboʼotik», tsʼoʼoleʼ ka kʼáatiktiʼ: «¿Techeʼ ka tsʼuʼutsʼ chamal? Tin tuklaj jach yaan a naʼateʼ». Beyoʼ ka sutik tu yóokʼol le baʼax ku yaʼalikoʼ. Leloʼ jeʼel u beetik u tuklik baʼaxten ku tsʼuʼutsʼik chamaleʼ, maʼ kun kʼaʼabéettal a tsoliktiʼ mix baʼal. *
15. ¿Baʼax súutukil unaj a lukʼul yiknal a wéet paaliloʼob, yéetel baʼaxten?
15 ¿Kux túun wa láayliʼ ku yaʼaliktech a wéet paaliloʼob ka a beet baʼax maʼ maʼalobeʼ? Maas maʼalob ka luʼkechiʼ. Wa ku seguer a pʼáatal yiknaloʼobeʼ, jeʼel a beetik le baʼax ku yaʼalikoʼoboʼ. Le oʼolal unaj a lukʼul tu yiknaloʼob. Maʼ a wilik bey tsʼoʼok u ganarkechoʼobeʼ. Tumen maʼ béeychaj u beetkoʼob a lúubliʼ. Baʼaxeʼ maʼ ta chaʼaj u suʼusutkechoʼobiʼ, tsʼoʼoleʼ ta kiʼimakkúuntaj u yóol Jéeoba (Pro. 27:11).
«Baʼaxoʼob ku maʼalob tukultaʼaloʼobeʼ maʼalob u jóokʼol»
16. ¿Bix jeʼel a túulchʼintaʼal a beet baʼax maʼ maʼalob tumen uláakʼ táankelem paalal ku yaʼalikoʼob táan u meyajtkoʼob Jéeobaeʼ?
16 Yaan kʼiineʼ letiʼe táankelem paalaloʼob ku yaʼalikoʼob táan u meyajtkoʼob Dios aʼaliktech ka beet baʼax maʼ maʼaloboʼ. Koʼox aʼalikeʼ utúul tiʼ letiʼobeʼ ku invitarkech ka xiʼikech tiʼ upʼéel kʼiimbesaj. ¿Baʼax jeʼel a beetik wa ken kʼuchkech ka wilik minaʼan mix utúul sukuʼun yaan u jaʼabil utiaʼal nuʼuktikeʼ? ¿Wa baʼax jeʼel a beetik wa utúul táankelem paal ku bisik cerveza wa aguardiente, baʼaleʼ mix utúul yaan u jaʼabil utiaʼal u yukʼikiʼ? Teʼ súutukiloʼob beyaʼ teech kan chʼaʼatuklik baʼax ken a beet yéetel u yáantaj a conciencia nuʼuktaʼan tumen le Bibliaoʼ. Utúul x-lóoʼbayan kiikeʼ ku yaʼalik: «Teen yéetel in kiikeʼ lukʼoʼon teʼ cineoʼ, tumen yaʼab tʼaanoʼob kʼaastak ku yaʼalaʼaliʼ, baʼaleʼ uláakʼ táankelem paalaloʼobeʼ pʼáat u chaʼantoʼob. K-taataʼobeʼ kiʼimakchaj u yóoloʼob yoʼolal le baʼax t-beetoʼ, baʼaleʼ u maasil táankelem paalaloʼoboʼ kʼuuxilnajoʼob, tumen ku yaʼalikoʼobeʼ t-pʼatoʼob kʼaasil».
17. Wa ka invitartaʼakech tiʼ upʼéel kʼiimbesajeʼ, ¿baʼax jeʼel u yáantkech utiaʼal maʼ a táakpajal tiʼ baʼax maʼ maʼalobeʼ?
17 Le baʼax tu beetaj le kiikoʼobaʼ, ku yeʼeskeʼ wa ka beetik baʼax ku yaʼalik a conciencia nuʼuktaʼan tumen le Bibliaoʼ, maʼ xaaneʼ yaan u yaʼalaʼaltech baʼal. Kex beyoʼ, maas maʼalob ka beet le baʼax ka tuklik maʼaloboʼ. Baʼaleʼ kʼaʼabéet a tuklik táanil baʼax ken a beete. Wa yaan a bin tiʼ upʼéel kʼiimbesajeʼ, tukult uláakʼ baʼax jeʼel a beetik wa ka wilik yaan baʼax maʼ maʼalob ku beetaʼaliʼ. Yaan táankelem paalaloʼobeʼ ku yaʼalikoʼob tiʼ u taataʼob yaan u tʼankoʼob ka xiʼikoʼob chʼaʼabil wa ku yilkoʼob yaan baʼax maʼ maʼalob ku beetaʼaliʼ (Sal. 26:4, 5). Jeʼex u yaʼalik le Bibliaoʼ, «baʼaxoʼob ku maʼalob tukultaʼaloʼobeʼ maʼalob u jóokʼol» (Pro. 21:5).
Kiʼimakchajak a wóol ta táankelmil
18, 19. 1) ¿Bix a wojéeltik Jéeobaeʼ u kʼáat ka kiʼimakchajak a wóol? 2) ¿Baʼax utsil ken u kʼam le máaxoʼob maʼatech u beetkoʼob le baʼax ku yaʼalik u maasiloʼ?
18 Jéeobaeʼ u tsʼaamajtech u páajtalil a kiʼimakkúuntik a wóol (xokaʼak Eclesiastés 11:9). Kʼaʼajaktecheʼ yaʼab tiʼ a wéet paaliloʼobeʼ chéen táan «u kiʼimakkúuns[ik] u yóol[oʼob] tu yoʼolal tsʼeʼetsʼek kʼiinoʼob tiʼ u kiʼimak óolaliloʼob le kʼebanoʼ» (Heb. 11:25). Jéeobaeʼ ku yaʼalik u tsʼáaiktech upʼéel baʼax maas maʼalob: kiʼimak óolal utiaʼal minaʼan u xuul. Le oʼolal ken taakchajak a beetik baʼax maʼ maʼalobeʼ, kʼaʼajaktech le baʼax ku kʼáatiktechoʼ utiaʼal a wutsil.
19 ¿Baʼax utsil jeʼel a jóoʼsik wa ka beetik baʼax ku yaʼalik a wéet paaliloʼobeʼ? Mix baʼal, tumen maʼ xaaneʼ séeb ken u tuʼubsiloʼob tak bix a kʼaabaʼ. Baʼaleʼ wa ka wilik maʼ a beetik baʼax ku yaʼalik u maasileʼ, Jéeobaeʼ maʼ ken u tuʼubs bix úuchik u chúukpajal a wóol. Letiʼeʼ yaan u jeʼik le «kaʼan utiaʼal [u] láalik ta [wóokʼol] yaʼab ayikʼali[loʼ]» (Mal. 3:10). Letiʼeʼ ku tsʼáaiktech u kiliʼich muukʼ utiaʼal maʼ sajaktal. Maʼ u tuʼubultecheʼ yéetel u yáantaj Jéeobaeʼ yaan u chúukpajal a wóol utiaʼal maʼ a beetik baʼax ku yaʼalik u maasil.
[Tsolajiloʼob]
^ xóot’ol 14 Ilawil le xook “Estrategia contra la presión de grupo” tiʼ le libro Lo que los jóvenes preguntan. Respuestas prácticas (u kaʼapʼéel libro), táan juʼun 132 yéetel 133.
¿Kʼajaʼan wa tech?
• ¿Tak baʼax jeʼel u péekskoʼon k-beet baʼax ku yaʼalik u maasileʼ?
• ¿Baʼaxten jach unaj k-creertik le baʼax tsʼoʼok k-kanik teʼ Bibliaoʼ?
• ¿Baʼax jeʼel u yáantkech utiaʼal maʼ a beetik le baʼax ku yaʼalik a wéet paaliloʼobeʼ?
• ¿Bix a wojéeltik Jéeobaeʼ ku kiʼimaktal u yóol ikil u chúukpajal a wóol a beet baʼax ku yaʼalik?
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
¿Baʼaxten tu beetaj Aarón utúul chan wakax de oro?
[U tsolajil le oochel teʼ táan juʼun 10]
Tukult táanil baʼax ken a waʼale